KA THLAH LO'NG CHE Episode-5 Becky Rafa Renthlei

[Becky Rafa Renthlei]

KA THLAH LO'NG CHE

Becky Rafa Renthlei

Episode-5
Rinsangpuii

Ka harh apiangin Lawmsangzela a lo meng ve hman ziah a, zinglam dar thum a ri tawh a, tûn hi vawili ka harhna a ni tawh! A mutna lam ka va en chuan uluk zet hian games a lo khêl a, puan pawh a sin chuang lo. Ngawirengin ka thlir vang vang a.

A sam dum hlap chu a fai hmel hle a, a hnar ngul invuah fuh zet te a hmai erawh a mâm lutuk bik lo a bawl ve deuhvin ka hria. A hâng hran lo a ngo teh hluak pawh a ni hek lo, heti khawp a min ngaihsaktu hi ka thlahlel lo thei bik lo chu a ni e.

"Hey, min en reng lo khân muthilh tum rawh," kiai suk chung hian min rawn be thut a, ka hawisawn hman tawh si lo nen zâm zetin ka hmui ka pet zauh a.

"Muhil zawk rawh, i chau lutuk ang."

"I bula mut i phal chuan ka muhil ang a, i phal loh chuan ka chau zankhua mai ang." fiamthua tiin a rawn ṭhu chhuak a phone a charge zui nghal a, "Mut dun an phal loh khâ," ka ti sap a.

"An phalna ka lâk kher a ngai hleinem, min hau awm lo em mai." Tih pahin ka mutna lamah a rawn phei ta a. Phone call hmanga kan inbiak ṭhin lai kha chuan a ho ve hlein ka hre sia; ka rin aiin a puitling daih. Fiamthu han sawi zauh châng nei mah se a zawng a zain a ri hluai kher lo.

"Lawmsang, kum engzat nge i nih tawh?" Ka tih chuan nui suk chung hian, "Nang aiin ka upa zawk," ka puansin keuvin a rawn inthawlh ve ringawt nia.

"Tho vat rawh, a chiloh lutuk.." namsawn ka tum chuan, "Engtin mah ka ti lo ang che, tihian ka mu ringawt dawn alawm, damlo awmpuite chu an hrethiam ve awm em mai," a ti leh tlat!

"An hrethiam pawh a ni mahna keima'n ka hrethiam lo alawm," Venflon an vuah lohna lam ka bânin ka nghawk salh a.

"Rinsangpui, min cho viau suh ka fâwp hrep mai ang che."

"A ve ringawt a che.."

"Ve ka ni lo, keimah i Lawmsangzela, 02 aṭanga i rawn biak ṭhin kha.." ka inrin hman hmain ka hmuiah a rawn fâwp ta a, ka lo ṭang ve bawk nen duh ang thâl chuan min fâwp ṭha thei bik hek suh, thawhuai chung hian, "Khatia i ṭan deuh ṭung khan a nuam dangdai.." a la ti hrâm. Min fawh nawn tum tawh chuan lo hian, "Ka duh che a, min hnar tumin phe phê mah la ka umzui zel ang che." Nghet charhin a ti ta a.

'Kan ingaizawng ta e' tih sawi fak tur awm lo mah se kan thinlung erawh a inpawh ta. Khawvar rak thlengin kan titi dun a, thingpui sem an lo luh hma deuhva min thawhsan chuan ka ui ru ang reng.

"Thingpui in ve ang aw, chumi zawhah ka haw zuai ang." A hmai a phih nghal a, a chezia hrim hrimah a inringtawk em em a, hmân aṭanga lo inhresa tawh leh inhmu fo tawh kan ang zâwk mah.

Chuti lutuka buaipui ngai ka ni tawh lêm lo bawk a, nurse-in ka zun teh paha min paihsak chuan, "Hei, thi pawh a awm mang tawh hleinem, achangtupa hian riahpui reng che se la a ṭha ang," tia min fiam chuan ka nui hak a, "Ka riahpui hian a dam sawt sawt dawn tih hria ila chuan a zâwnin ka riak zak zak tur a nia, kan Rinsangpuii hian a duh leh pek tawp nâng," Lawmsanga nui ṭhâ chu ka melh rum vei ngial a, a nui nasa zual sauh.

Mama'n a lokal mêk tih a rawn sawi ta bawk nen min hawsan ve ta a, "Min lo ngai lutuk lo la, ka lokal leh veleh ka rawn duat leh ang che" tih paha a nui suk hmel kha ka ngainat zawng tak.

Naktuk hian Hospital kan chhuahsan tawh dâwn a, Kidney transplant ti turin rilru ka siam mêk, sum tamtak sên a ngaih dawn avangin ka inthlahrung ru viau a, 'Mate, i damna tur a nih phawt chuan kan neih zawng zawng chân vek mah ila pawi kan ti rêng rêng lo, khawvel thil ral leh mai tur anni a nunna a hlu ber.' Ka pa ṭawngkam dam thlap kha ngaihthlâk a va nuam si êm!

Cabin-ah ka nau nen kan awm a, Frederick-a rawngbawlna chungchâng sawia a ṭawng mawlh mawlh lai chuan Lawmsanga a rawn lût leh hlawl tawh. Hnathawh a nei lo nge, a mimal nun ka hriatsak thui lo hlê a, nu leh pa a nei tawh lo zawk nge pawh ka hriat si loh!

"Ramdin, i û hi Temple-ah kan hruai ve dâwn em ni ang?" Kan thusawi lai hresa ang hrimin a rawn ti lût a.

"A duh phawt chuan hruai a ṭha ang; mahse, khawpui chhunga motor khalh ka hreh deuh," Mama'n a tih chuan "Keima'n ka khalh mai dawn nia, naktuk zan chu tum ve chhin phawt ila zan hnih chiah hun a awm tawh a." An pahnih inbiaknaah chuan ka inrawlh lo hrim hrim.

Lawmsanga a awm hi chuan Mama hian a ring tawp a ni ber. An inkawm thei phian a, ruihtheih thilin a tihbuai loh mipa ka hnaiha an awm thei hi ka lawm tawk viau.

Mama pawh ka nau mah nise min enkawlna kawngah leh inchhungkhura a mawhphurhna a hlen chungchangah sawiselna tur ka hre hauh lo va, MA vâl a ni ve tawh a, nupui neih lam a âwn miah lo hi mak ka ti deuh ṭhin a bialnu Dinmawii nen pawh hunawlah an inbe chamchî a, Lawmsangzela leh ka nau style hi a inang ru riau bawk.

"Mate, i ṭhianpa a awm thova bazar lamah ka teithla ve lawk ang aw." Mama ka chhân hmain, "Lo ngaihtuah duh suh, zanah pawh ka riak thei a nia, min hawsan hunah te chuan awmpui pawh duh ve mah ila a theih awm si lova a hun lai hian ka âm ve duh a nia." Lawmsanga'n a lo chhâng duah a, "I lo awm hlauhva min chhâwk zangkhai hle a ni." Mama pawh a lawm tak tak tih ka hre reng.

Kan pahnih chauhva kan awm hnu chuan ka ngawi reng a, "Sp, ka awm ve i duh loh chuan sawi ṭha mai la.." ka eitur Apple a zai mawlh mawlh a, "Ka duh lo tih ka sawi loh hi.."

"Min biak hmasak hi thih hreh hian i hreh a, kan inhmuh hma kha chuan min ngainain engkim min hrilh ṭhin kha a ni a, tunah chuan i mizia a dang daih." Nichin lawka a fiamthu hmel kha hmuh tur a awm tawh miah lo.

"I ngaih dan a dik lo a nih kha, a hma a ka rilru ang chiah ka la pu reng." Ka ti sap a.

"A nih chuan min duh lovin ṭhian ang thovin em ni min la en?" A ti ta khauh mai le.

"I ngai kâwi zel a duh lo che ni ila tlang takin ka sawi ang min hriat kha; mahse, ka dinhmun hi en la ka hlauthawng a ni." Dik takin ka chhâng ve hmiah.

"I natna vânga thlah tur che ni ila ka thlah daih tawh ang che, tun thlenga ka la pan zel nachhan che hi engvang nge ni a i rin? Ka duh che a, eng dinhmunah pawh ding la phatsan che ka tum lo. Tunah innei nghal ang tihna lam a ni lo a nia." Khumah ṭhuin ka kut a vuan a, "Dik tak chuan min hlat i châk hmel ka ti ṭhin, nangmahah rilru tamtak ka lo sêng tawh a chuti mai chuan kalsan che hi ka thei lo." A thutak hle a, tun hi kan inkâr thu a sawi thui ve ber ṭum a ni ngei ang.

"Nat nawn leh ka duh tawh lova ka nihna ang ang a min pawm thei a nih chuan min kalsan hmasa te a nih loh bawk chuan ka kalsan bik lo ang che." Ka sawi chhuak ve ta nge nge alawm.

"Ka lawm e, i tân ka awm reng ang." Min fawh tuma a rawn kun hniam chuan ka lo thlesawn a, "Rinsangpui, vawikhat chiah.." ka mitah tak min en chuan ka lâi kher mai.

Mipat hmeichhiatna lamah ka la fihlim thlap, Lalvenpuia khân vawi eng emawzat chu a tum ve ṭhin; mahse, Pathian zarah ka inveng ve zel a, min nawrlui ta bik lo kha a nia, infawh ringawt te chu a pawi dawn em ni, a hma pawhin kan infawp fo alawm le.

Lawmsangzela rawn kûn hniam leh chu ka hnar ta bik lo.

Dam thlapa min fawhna chuan ka chhungril a fan raih raih thei nia. Ka lo chhâng lêt ve tih a hriat chuan min fawp uar zual sauhva, "Sp, Pathian chakna rinchhanin hmalam pan kan tum dawn nia. Bâng lova ṭawngṭai ṭhintute hian a malsawmna an chang mai ṭhin," ka rin loh deuhvin a ti chhuak ta a.

"Lawmsang, englo.."

"I natna ang kha ka tuar kher lo a ni maithei; mahse, ka beidawnpui reng reng lo che a nia, beidawnna hi chak lohna leh sual hnathawh chikhat a ni a, i taksa damna ai khân i thinlung damna Pathian aṭanga beiseina thar i neih a pawimawh zawk." Ka kut vuan chunga a thilsawi chuan min hneh kher mai.

"Awm lo la chuan ka natna hian min hneh tawh ngei ang, Pathian min pêk liau liau i ni.." Ka ti ve ta a.

"Naktuk zanah chuan inkhawm ve kan tum dawn nia, taksa damna ringawt beisei lo la ka tih kha theihnghilh miah suh ang che."

Chumi hnu chuan Restaurant ami eitur a zuk la a, kan ei dun ta a, min duat khu chûk hran lo na a, min ngaihsak viau thung.

Zan lamah pawh Mama nen min riahpui a, games khêlin an tui phian, ka nunah 'mipa ka seng lût tawh lovang' ka lo ti ve a, Lawmsangzela a lo lan meuh chuan ka thutiam ka bawhchhe rawk rawk mai alawm le.

Inrinni Zan
6:00 Pm

Hospital kan chhuahsan tawh a, Mama'n car khalh a huphurh deuh avangin Lawmsanga rualin kan kal ta a, hepa hian eng nge maw a thawh chiah le!? An chhungkaw chanchin sawipui a duh eih bawk si lova î20 car a rawn keng a, hmanzan khan helmet a rawn keng lût tih ka hmu bawk a, ka lo rin dan ang a mipa tlahlang mai mai a nih loh hmel.

"Rinsangpui, thâwk la vak la, ngun deuhvin thusawi ngaithla ang che." Nui chunga min biak chuan ka melh râm râm a.

Suit dum body fit inbelin a sam pawh a siam uluk kher mai. Biak in kawng zawh chawp hmel a pu lo va a nun en hrim hrim hian innghahna tlâk mipa a ni. Kan inhmu tam telh telh a, ka ngaisâng telh telh.

Frederick-a thusawi lai chu ngun takin a en a, Mama paw'n khawdang a hawi meuh lo. Keimah ber zawk hian Pathian aṭanga dam ka lo tum loh zia leh mihring lam aṭang chauhvin ka lo thlir ṭhin tih ka inhrechhuak a, he ka natna hi vûi nun nei chungin ka lo tuar ṭhin zawk a lo ni.

Damna chang a mi an phêt suau suau lai te chuan eng mah ka taksaah danglamna a awm hran lo. Mahse, Pathian aṭang chuan eng natna pawh tuarin tâwk ila lungawi taka pawm dan erawh a thusawi aṭangin ka man thiam ve ta.

Mihringah ka lo innghat lutuk a, beisei tur dik tak ka lo beisei ngai loh avangin tûn thleng hian hahchawlhna tak tak nei lovin ka lo awm ṭhin tihte thlengin ka ngaihtuah phah bawk.

"Sp, i chau em?" Inkhawm kan bâng tawh a, Lawmsanga pawh ngaihven lo hian ka rilru ngaihtuahna ka lo kâwm ngat ngat chu niin!

"Chau lo ve, nang zawk."

"Chau lo ve a, naktuk zanah chuan hma deuh hlekah kal kan tum tawh dawn nia."

Ka nutei te in kan thlen tâk avangin Mama'n car aṭanga min pawm chhuah a tum chuan, "Ramdin, ka pawm ve hun a ni tawh." Hnial theih miah loh hian ka ṭhutna lamah a rawn kal a, zo zeta min pawmin inchhungah min luhpui ta a. Ka kal thei tho tak nâ a, ka zun siakna hian kal vel a tih harsat avangin min pawm mai zel.

"I zun siakna kha ka lo phelh ang chu." Mama inthlâk hlânin Lawmsanga ka bulah rawn ṭhu phei a.

"Engvangin nge i phelh ngawt ang a?" Ka tih chuan, "I lo dam daih tawh pawh a ni thei a tunge hria?"

"Fiamthuna chi a ni lo a nia," ka ti nghat a.

"Ka fiamthu lo a nia, khatia i vuah reng te chuan eng mah a hriat theih dawn hleinem," a la tih zel avang chuan ka thin tertek a chhuak thut.

"Lawmsangzel, ka zun chhuak hre lo khawpa mi mâwlah min ngai em ni? Ka dam a nih chuan ka hre hmasaber ang chu i duh duh sawi ringawt suh." Ka duh aiin ka vîn mah mah.

"I va'n thinchhe tak," tiin a tho hluai a, "Zaidam i zir tel a ngai a nia, hlek hluk mai." Ka chhânna pawh nghâk lo hian a chhuak zui hmak a, ka inthiam leh si lo.

"Lawmsang..." umzui tumin ka tho chhuak a, ka che deuh phut bawk nen ka zun siakna bag ka thlauhin ka pal phei nawk a! Ka serh aṭanga rawn lum chhuak puat chu ka hre rang kher mai.

"Mama.."

Ka nau hmanhmawh lutukin a rawn chhuak a, Lawmsanga erawh a rawn lang ta lo!

"Mama, engtin nge kan tih ang, ka vuah thiam tawh hleinem.." ka ṭap lo chauh tawh a, tunah zan dar sawm a ri tawh a, Casualty-ah kan tlanchho a nih ngawt loh chuan keini unau tân pipe vuah ve ngawt chi ninghal lo chuan..

"Engtin nge maw i tih thlawn reng reng le?" Min vîn hauh lo náa lungawi aw erawh a ni lo.

Chhân pawh ka chhâng tawh lo, ngawireng hian room-ah ka lût ta a, ka nutei te nupa thawmhnaw lain an zin a, an inah kan awm rih ta kha a nia.

"Mate, kawngka lo hawng teh." Ka nauvin vawithum ngawt kawngkhar a rawn sawi tawh a ka hawng duh ṭhak lo. Mahni inbuaipui thei lo khawpa ka awm hi hrehawm ka tih châng a tam a, pianpui hmeichhia tal nei ila chuan a zia deuh tur; mipa leh hmeichhia zawng a buaithlâkna chin a awm leh ṭhin.

Khumah ṭhuin ka melh ngai ka melh ngar ngar a, ṭawngṭai pawh ka ṭawngṭai thei lo.

"Mate, ka tihpalh lo hawng teh.." Mama mangang aw hre mah ila ka la che duh chuang lo. A beidawng ta a ni ang a reh ta vang vang a, zun siakna vuah tawh lo chuan ka mu ta a, nula pumpa hetia damchhung hun han hman ringawt dawn mai chu(h).

Lawmsangzela'n min rawn be ta miah lo a, call chu sawi loh whatsapp aṭang takngial pawhin min rawn be lo! Ka lo ti mah mah deuh em maw ni le.

Hetia ka nat hnu hian ka thin a chhe zual a, eng emaw hlekah ka vîn hlar zel tih ka hria; mahse, ka sim thei lo a chhâ chu a ni e, bengchheng pawh ka ngaihthei eih lo.

"Tihpalh lutuk." Tih tê chiah whatsapp aṭangin ka thawn a, chhânna ka hmu lo, rilru hrehawm zet hian ka mu meng kar a, Mama nise a reh hmiah bawk.

Khawvar dâwn hnaihah ka tâi bâwr vel a rawn nâ a, zun chhuak ang tlata inhriatna ka neih chu le! Rang lutuka tho chhuakin Toilet ka pan ta nghal a. Ka ṭhu fel chiah tihah ka zung ta hlawl mai le!

Kumkhat leh thla sarih zun siakna hmang ngar ngar tu kha keimahin ka zung thei ta! Ka muttui rawn far fap chu dan tumna pawh ka nei lo a, thawh chhuah mai nachâng pawh ka hre hek lo. Lâwm avanga ṭap chungin ka inhnît ta faih faih a.

'Lalpa ka lawm e' a bâk sawi tur ka hre lo a, beiseina nung neitu tân beisei tur dik tak pana inkawltir hi a him ber tih ka hriat chhuah phah ta bawk.

Mama kaithovin ka hrilh hmasa dawn nge ka pa zâwk, â Lawmsangzela ka phone zawk dawn em ni ang? Tih hmasak ber tur hre lo hian ka vei sek a, khum bula tui bottle chu banin ka in zo nghâl vek a, vawithum tal ka zun chhin phawt loh chuan tumah ka hrilh duh leh lo.

Rinsangpuii hian nunphung pangngai ka zawh ve dawn ta a va ang ve...

A rûka nui ver ver chungin khua ka nghâk var ta law law a....

B+>[BeckirafARenthleI]<+®®