SANGU LUIRUAMAH- Bung 2 Na

[Chhantea Pautu]

SANGU LUIRUAMAH
- Chhantea Pautu

Bung 2 Na

       Zoremsangi awm dan ka sawi hi nakina mipakhat chungchanga thil awm dan kan hriat fiah nan a ni. Hei hi ka sawi duh; eng lai mah hi lo ngaihthahin lo hmaih suh ang che.

Muanawma a buai ruk em em lai hian kei chu ruahmanna felfai tak pawh nei chuang lova kal bo ka tum a, ka kal bo hmain thil mak leh ngaihnawm takin hnena sawi tur ka nei a, ka sawi ṭan mék tawh bawk a ni!

       Nun hi belthleng, a thal zawnga awm ṭha hle hle lai, vawi-leh-khata khaikhup thawk ang mai a nih châng awmin ka hria! Hmangaihna avangin kan zawltling-vawn-nat a, vawnchhan dapin kan phar ruai a, kan tlu lek lek ṭhin. Kei pawh hian thathona reng reng ka nei lo va, hmangaihna hian thinlung a tih nat awlsam ang aiin a lo dam har si; ka mang zo va, ṭhian kawm ka châk lo va, ka mamawh hle thung. Mahniin ka awm cheuh cheuh a; hei, tlaivar ka hnaih chu a ni leh ta reng mai.

       Ka hmangaihin mipa dang, Social Media vela pawh tak leh nel taka a kâwm vel hmuh chu ka tân tawrh hrehawm a ni a; Rose pâr kuangah hian mi chhun na thei hling zum tak a awm a ni tih ka hre thiam ve ṭan ta a nih hi. Ka awm dan hi ka duh dan a ni bîk lo a; mahse, hma lama ke pen chu ka tân a harsa hle si. Thathona tel miah lova nun hman chu khuang lova chai ang chauh a ni; nun a ngui a, ka tân natna dang a ṭul lo, hmangaihna avanga ka thinlung hliam hi natna a tling tawk hle a. Ka hetih avang hian ramhnuai pilril taka rawl bo ka tum ta a, eng chen nge ka va thang ang a, eng thil nge ka chungah thleng dawn tih chu ka hre lâwk bik lo; a châng chuan tlachawp taka nun hman a, thil tawn apîang pal hmiah hmiah chunga chhawr ṭangkai tum hi thinlung nâ hian a mamawh ve fo niin ka hria.

       Ka sawi tawh angin he ka thinlung natna ka kal bopui hma hian he chanchin hi ka han hrilh hmasa ang che u.

       Chu thil ka hrîat leh zân chu Thla bial zan a ni a, tukverh inhawng lam chu ka pan a, ka thawm hriat chu ngun takin ka han ngaithla a. Kan kawmthlang, Sunhlu kung awmna vela nausen ṭap, lungrun leh lung la tak maia ring vak si lova ṭap leh ngâk ngâk ṭhin thawm chu ka han hre leh ta a, chu nausen ṭap thawm chuan ka tirilah a ṭham a, tukverha dâk chhuaka chu lam hawi reng chung chuan ka ṭim er er a, ka za chem chem a; a ṭap ri chuan khawngaih thlâ a la takzet a ni. A khât tâwkin a rawn ṭap leh ṭhin a.

       Kum 2016 Khuangchawi thla a nih kha. Zan khat chu kan ṭhenawmpa chuan a in piah maiah nausen ṭap thawm hi zing lam khawvar hma hret hian a hria a, ṭap thawm chu pâwn lam niin lang mah se; chuti ang huna pâwna nausen ṭah thu awma a hriat si loh avangin ṭhenawm te nau ṭap ri ni turah a ngai lui a, ṭap ri erawh ring vak si lo hi a hre leh ṭhin. Mu chungin a ngaithla reng a, nausen ṭap thawm chu a chuai raih raih a, a tâwpah a reh hlen ta niin a sawi. Chu thil chu ka ngaihtuahnaah a lo thar nawn leh a, kan ṭhenawmpain nausen ṭap thawm a hriat tûk zîngah chuan kan kawmthlang thingkungah hmeichhia, la naupang tak, hmel ṭha tak pakhat chu a nau pûak lâi nen thî-a hmuh a ni a; an lo inkhai a, inawkhlum ni ngeia rin a ni.

       Chu thil thlen hnu-a he nausen ṭap ka hriat ṭhin hi ka la sawi chhuak ngai lo. Kan kawmthlang thingkunga hmeichhia, la naupang tak leh hmel ṭha tak te nufa lo inkhai ngawt mai te nen ka nun a inkungkaih chhoh tâk dân phei chu ka la sawi chhuak chhin lo hrim hrim; he hmeichhia hi kan khaw mi leh sa a ni lo lehnghal a.

       A khât táwkin nausen ṭap thawm chu ka hre ta fo a, zan reh lam, khawvar lam hnaihah a ni tlangpui bawk. He nausen ṭap thawm ka lo hriat mai theih nachhan pawh hi ka hmangaih châna ka zawltling-vawn-nat avanga ka zan muhil thei lo inṭan aṭang khan a ni, ka tlaivar fo si a. A ṭap lungrun thei hle a, lairil fan ngâih hian a tap ni berin ka hria; midang, hre ve ṭhina insawi hi ka hre ngai miah lo va. An hria a, an sawi duh lo nge, kei chauhin ka hria tih lah ka hre bîk lo.

       Ka hmangaih nena kan inṭhenna pawh thla tam a liam ta; mahse tun thlengin mi hlim thei ka nihna te, thatho thei tak ka nihna te kha ka la nei kir leh thei lo va, ka thinlung hi a saltâng reng mai a ni. Chuta karah, thla hmasa mai khan kum 2016 khuangchawi thlaa kan kawmthlanga lo inkhai hmeichhia kha, ka hmangaih em em Dintei nutei fanu a ni tih ka hria a; kha thil a thlen lai khan kan khuaah ka awm lo va, engmah kha a kîlkèlhin ka hre ve tak tak lo. A hnu-a ka thil hriat zui leh tâk erawh, mi tu te emaw chhungkaw nun buarchuar tak chanchin a nih avangin sawi zui pawh châkawm loh tak a ni; mahse, kei hian sawi ṭul riaua hriatna ka nei a, kan tih sual avanga kan chunga ânchhe lo thleng thei laka kan fimkhur phahna tur a nih ngei pawh ka duhin ka beisei takzet.

       He thil chungchanga keimah ka tel vena bîka in lo chhinchhiah tura ka duh chu- I hmangaih tak tak chu i hmangaih tak tak a nih ngat chuan, eng anga tling lo leh bawlhhlawh pawh ni se, i thinlungah mipawimawh ber angin a châm reng tawh a, a tlin lohna i hriat tam poh leh amah i hmangaihna thinlung avangin i natna a thûk telh telh ang tih leh, i hmangaih chuan nangmah a hmangaih ve vang che ni hauh lo va, a rilru ṭhatna vang ngawta i chunga a ṭhat nasat apîangin amah i hmangaih avanga i thinlung natna a pung zel ang tih hi a ni!

       Tichuan, zan dang ang bawkin nausen ṭap thawm a han reh a, nuam ti lo zetin tukverh chu ka khar a, ka khumah chuan ka mu meng leh ta kar a. Ka rilru-ah naute leh a nu kha an riak reng mai.
* * * * * * *

       Ani chu a hmel a ṭha a; mahse a lerh. A ngainatawm; mahse a nun a rawng si. A zei hle a; chu chu a hlauhawmna a ni thung. A mitmeng, chezia, a pian ṭhatna leh a nu leh pa neihnunna chu a hriamhrei ṭangkai tak a ni. Nula lakah a hriam a chelek hle a; mahse a nula theih tawh ten a fa an la pai ngai miah lo. Hei hi Lalremruata nihna chu a ni.

       Chhiar dawn ta se Remruata kutzungṭang neih hian a nula theih tawh zat a daih teuh lo! A duh táwka a khawih theih hmeichhe derdep hi an lo tam khawp mai; a duhtawka a CK pui theih, a duh hun huna an 'naked pic' a dil chhuah theih hmeichhe ṭhenkhat te chu hmu ta la, i awih loh avangin i nui ringawt hial ang! A hmeichhe kawih thal tawh ṭhenkhat te Sunday inkhawm nungchang hmu ve ngat phei la chu, Zoram Kristian-te nun pâwnlàn dan thûk leh ril zia chhut thiam i nih ngat chuan, zirchianin tun lai zoram khawvel nun leh Sodom leh Gomorra nun tehkhin inhmeh zia i hmu pha ngat ang!

       Chuti ang thil a nih mek laiin Hminghlui chu tleirawltè, zakzum tak, nu hnâp mai, a rualpui khawpui tleirawl dang te ang lo taka tunlaina ṭha lo takin a la khawih dâk loh, thianghlim fai ser mai a ni; mahse a thinlung chu hnehin a awm ve ta.

       Star chu a lo nei ve fo tawh a, ngaihzawng erawh a la nei ngai lo. A tleirawl tituai chu a nalh takzet a, a pian a fel thlep a, sweet sixteen pel chho hlim, nula puitling taksa pu chho ṭan leh taksa inphut mawi tak a ni.

       Ṭhalai ten Phone changkang an nei sup sup a, Social Media luhchilhin ṭhian kawm nan tak an hmang chho a, Social Media chhungah ngat chuan nun a lo zalen halh mai si, tuma'n min khap tak tak thei lo va, khap phak niin kan inhre lo hrim hrim bawk. Kan duh duh Mizo ṭawng hawrawp dik mang lovin kan sawi a, kan duh duh pic kan upload a; chuti anga kan awm dan lo kalha sawiseltu chu kan lim erh ṭhin. He tunlaina nun hian Hminghlui pawh a kal kân tak tak thei bik lo.

       Zankhat chu a status-ah, "Ka lug a leg eee...khwge ka lèn tir ag ooo..." tih hi a post a.

       A post hnu lawkah mipakhat hian, "Hetah ron len tir rwh," tiin a rawn coment a.

       Hminghlui chuan a Profile a'n check phawt a. A hmel a ṭha, a pa len hmel khawp mai. Tihian a va chhang a, "wm hlat hmel e mei..."

       "Hla lo lutuk...i bul lokah k om maithei sin..."

       "Hla i tihna..."

       "Hehehe...i van ce lo..."

       "Cuti mi...lom e..."

       "Mmm...khoi vengah ge in om?"

       Hminghlui chuan a chhang zui tawh lem chuang lo va; mahse chupa chuan zan rei deuh tawh hnu-ah inbox lamah a rawn be zui ta nge nge a. Pangngai tak leh polite takin a rawn bia a, ani pawhin ṭha takin a lo kawm ve zel a, chupa chuan fiamthu a duhin a ninawm lo tawka chhan dan a thiam hle.

       Chuta ṭang chuan an inbia an inbia a, mipa zawk pawh a huangtau sawtin a ngampa tan tawh hle a, huat theih chiah si loh hian ṭawngkam eng emaw deuh hlekin a fiam ṭan ta zauh zauh a; a ninawm miau loh avangin Hminghlui chuan a haw miah lo. Chutia an inkawm nasat lai tak chuan zan khat chu a chhan sawi miah si lo hian mipa chu a reh ta daih a; 'a reh' han tih lemah, reh tak tak chu a ni lo, amah Hminghlui chu a be ta lo mai zawk a ni. Zan thum ngawt a reh a, Hminghlui chuan a ngai ru ta hle mai si, rawn biak a tum tawh der si lo, a mangang ru em em mai a, biak hmasak a hreh si, midang post vel leh pic vel chu a coment tho bawk si a; chu'ngte chu a lo thîk ve em em ringawt mai a ni!

       Zan linaah chuan a rawn be ta a; Hminghlui chu a phur takzet a, a lo thinrim rŭk vang erawh chuan a chhang vat duh bik lo. A vawi thum rawn inbox naah chuan a chhang lo phal ta bîk lo va. A han titau dawn a; mahse chupa chuan a tilungawi thiam ngang mai. Hminghlui chuan ṭawngkam zahmawh lek leka a fiam leh zeuh ṭhin pawh chu a haw phal tawh lo; a rawn biak loh chhung khan a lo ngai hman hle a ni.

       An inbe ngawrh chho lehzual a, mipa a zei a, a nawr thiam em avangin an CK ṭan ta zeuh zeuh bawk! A tawpah chuan hun remchang dapin an inhmu ta nge nge a; facebook inbox lama a lo CK pui fo tawh avangin mipa chuan a zuam nghal hle mai. A vawi khat tihna a nih loh avangin Hminghlui chu a nawr thiam hle a, hemi zan hian Hminghlui chuan a virginity chu a hloh ta ngei reng a.

       Mahse, Hminghlui chu a hlim tlat! Remruata hi a duh a, a hmangaih a ni. A tân chuan eng pawh a huam a, engkim a phal a, a tana a inpekna hian bituk chin a nei thei lo vang. A virginity hloh mah se, a hmangaih ber tana a rohlu ber pea a inngaihna chuan a hmel chu a tisen siah a, a mitmeng chu a rilru hlim avangin a de sawr sawr a.

       Remruata rilru erawh a dang daih. A haw hnu chuan, a online a, Hminghlui a wish hnu-ah zan tam tak ṭawngkam zahmawh uchuak tak taka a lo CK pui tawh Sangpui nen chuan an hna ngai chu an chhunzawm zui leh a. Sangpuii hi Pasal pawm lai nei, fa pawh pahnih nei tawh, a hahdam avanga no sen sak mai, nu hmel ṭha tak, kum 30 bawr vel mi a ni. Remruata nen hian ṭawngkam maia CK lovin a pasal zin bo hlanin an khawsa dun fo tawh!

       Pain pa a nih a pawisa lo va, nuin nu ka ni tlat a ti phal tawh lo. Tisa nawmnain nun a rûn a, Remruata hi sual hmanrua pakhat a ni.
* * * * * * *

Kaslla chuan a lo hriat tawh; mahse rei tak a chhung te laka a lo thup tawh au thawm chu a hre leh ta a. He au thawm a hriat hian zanlai dar 12:14am vel bawr hi a ni ziah a. A ngaihna hre lova awmtirtu, a chhungril ṭham a, a hmul thî ti ding fotu he au thawm a hriat ṭhin hi ngaia neih harsa a ti em em a.

Zan dang ang bawkin a tho a, emergency light chu a han on a, thim zingah chhuakin a mutna dup nuam tak chu a thawh san leh ta a. Hemi zana au thawm a hriat hi chu zan dang aiin a dan a dang deuh niin a hria a; zan dangah chuan, au thawm chu hre mah se, khawi lam aṭanga rawn chhuak nge tih rin ngaihna a hre ngai lo. Hre reng chungin in chhung kil tin a fang kual a, mahse a kal lohna lam apiangah au thawm chu a awm ni maiin a hria a ni; chu pawh chu a ni chiah em tih a chiang chuang lo.

He thawm hi mipakhat thawm mai a ni ngai lo va, thawm inpawlh, hmeichhe aw ni awm tak tak pawh tel, mi pahnih pathum lai, na tuara an ṭe thawm, mangang leh sarak vak vak thawm a ni ṭhin.

"Awi ka nuuuu...ka duh lo...!"

"Khawngaihin ti suh, ti tawh lo hram rawh...!"

"I fapa a nih kha, i rila rah a ni asin...tawp rawh...duh tawk rawh...!"

"Awi ka nuuuu...a na e mai...min pui teh u...!"

"Âpa...âpa...âpa...ka duh lo...!"

Heti anga au thawm rapthlak hi kumkhat zet an luah tawh inah chuan Kaslla chuan zantin, khel lovin thlakhat chhung chu a hre ta. Thawm awmna a zawng a, a hre thei lo. Chu thawm chuan a lu bûrah a luh ngut ngut a, a nun chu a zuai zo a, a chaw ei tha a tho thei lo va, a cher talh talh a, a pawr phang mai a, zanah hian thlakhat chhung chu mutmu a tuah mumallo reng reng a ni.

Kaslla hi tlangval senior ve ṭan tawh, mahni tawka sa nghet tak, dawihzep lo tak mai hi a ni a, an inchhunga thawm ngaihnawm lo zet pawh chu sawi chhuak duh lovin amah ngeiin a chhan zawn chhuah a tum tlat a. A chhung te hian engmah an hre ve lo niin a hria a; chuvangin han hrilha an rilru han tih buai ting tang kha a duh lo a ni.

A emergency light ken chu a han herh êng zual sauh a, a lu bûr luhtu, a thluak ti buai vek thei khawpa mihring na tuar ṭe thawm lo rik chhuahna lam chu a pan ta a. An in hi in lian ve pangngai tak, in sak dan dang ang lo taka an sak a ni a. In chanve vel innghahna lei chu 6ft. vel dawn hian laih khuar a ni a, chumi laih khuar chhuat chu in chhuatah chuan hmangin, choka atan te, ṭhutkhawmna pindan atan te leh chaweina hmun atana hman a ni a; mahse, in chanve chhuat chu sang zawk hle chungin choka a tana an hman leh chhungkaw chaw ei nan bera an hman bawk in chanve dawn chu a chung rangva thlengin engmah chhawng pawh awm lovin a awm a, chumi awm zia chu, choka, ṭhutkhawmna pindan, chaweina hmun te chu a lîang a sângin a thawveng hle tihna a ni. In innghahna, laih khuar ve loh, in chanve vel chu a chhawnga awm a ni a, chu'ng chu Kaslla te chhung, chhungkaw rual tak, mi pakua lai te chuan mut pindanah an hmang vek thung a, a chhawng chunglam thlengin. Ka han sawi leh duh chu, in hi sak dan danglam tehchiam awm lovin killi nei a ni tawp a, a dung 40ft. vel leh, a vang 36ft. vel a ni a, chhim leh hmar hawiin a dung a, hmar lam, a innghahna lei laih khuar huam chinah luhna pui ber, kawngkapui kan tih ṭhin hi a awm a ni.

Kaslla chuan thawm awmna lam nia a hriat choka lam chu a han pan a, a chhuk thlak hnu chuan curent a han ti eng a, a bengah chuan au thawm chu a la ri reng mai!

Choka leh ṭhutkhawmna leh chaweina pin dan bang, a nihna takah chuan leih laih khuar bang chu lungrem nalh tak vek hian a mar nalh zaih a; mahse mak deuh mai hian chhak lam pang hmun hnih lai chu rual rem vak lo hian in chei danglamna ni awm tak hian a bang lung rem chu bang dang aia a poh bakah, a rual rem lo hle mai a. Chu lung rem rualrem lo leh poh bik inkar lai chu ṭhutkhawmna pindan zawn chiah hi a ni a, chu lai takah chuan lehkhabu dahna chhuar hi a awm a, lehkhabu eng emaw zat hi a inrem ṭhat bawk.

Kaslla chu a lu bûra au thawm châm tlat avang chuan ṭhutkhawmna pindan chu panin a kal zel a, chhak lam bang poh bik pakhat zawn a thlen chuan a thil hriat chu a reh ta daih a, hmun danga ri ang pawhin a hre tawh lo. Thawm chu thehhmeh ang mai hian a reh vung vung a. Chutia thawm a reh ta thut mai chu mak a tiin a hrilhhai ang reng zawk hle a, hriat leh tumin a han ngaichang ngial a, a hre leh ta chuang lo. Mak ti deuh tak hian a kal sawn a, chutia a kal sawn veleh chuan au thawm chu a hre leh ṭan nghal a. Chhak lam bang poh bik lai vel aṭanga rawn chhuak ngei ni hian a hria a. A va pan hnai leh a; mahse a hmaa a dinna zawn a thlen chuan au thawm chu a reh leh ta daih si a. Mak hi a ti lehzual a. Rei vak lo a din hnu-ah a kal sawn leh a; mahse current a han off chiah chuan a ngai te bawkin au thawm chu a bengah a lo ri leh ta. Kaslla chuan mak a ti, hemi zan ber kher hi chuan a lo chhuahna ngai aṭang hlirin au thawm chu a lo chhuak si a. A let leh ngat a, lung rem poh zawn a thlen chuan au thawm chu a reh leh hmak a.

Kaslla chu a ngaihna hre lovin a ding ta reng a, lung rem poh bik chu a en reng a. A nakinah phei chuan a hnaih a, ngunthlûk zet hian a han en a, chu lung rem poh bik rual rem lem lo zet chu a kutin a han khawih a, hnai set sawtah lung rem chu a han en a, a beng chu dawhin lung rem poh bik lai chu a bek a chuan han siktir a, ngun deuh hian thawm a awm nge awm lo tiin a han ngaithla a. Minutes nga vel a ngaihthlak hnu chuan hla deuh taka au thawm ni awm tak hi a han hre ta a, hla taka aw ri a ni. Chu aw chuan mangan hmel zet hian, "Kal rawh, kal rawh, kha a khawih ang che, a khawih ve mai ang che," ti ni hian a hria a; hmeichhe aw a ni.

A beng chu a dawh reng a, aw chu lo hnai tial tial hian a hria a. Chutihlai chuan Kaslla hmul thi chu a ding sung sung a, chhung lamah vawtin a ṭham emaw chu tih tur khawpin boruak a dang lam a. Aw chu a lo hnai zel a, a awm pawh a nuam lo telh telh a, a velah chuan amah uap khurtu thil eng emaw hi awm tlatin a hria a. Chutah, hmeichhe aw ring zet mai hian vin zet hian, "Kal rawh ka tih chu...a khawih dawn che kha," a rawn ti ta thut mai. A sawitu rawl a vin em avagin leh a rin em avangin Kaslla chu a phu chiang hle a, bang aṭang chuan a per sawn rang hle a, chu achhapah, a beng bul lawkah hian, "Khi khi hnaih suh," tiin mipa aw thum lam hian a rawn ṭawng khum dùt hian a la hre zui a, a inher zawk a, tumah a hmu si lo. Lung rem poh bik chu a en vawng vawng a.