Liandingpuii-10

Story tawi te te emaw luanliamna emaw post na
Rohlupuia Renthlei
Posts: 18
Joined: April 29th, 2021, 8:10 pm

Liandingpuii-10

Unread post by Rohlupuia Renthlei » May 2nd, 2021, 9:47 pm

Liandingpuii-10 (Last)


Hringnun hi a mak ngawt mai. Mihring remruat na hian tawp chin a nei a, ruahmanna ṭha tak tak neiin inhre ṭhin mahila, a hlawhtlinna kawngah thu kan nei si lo! Thihna avanga manganna ruamah pawh, diriama, nuihzat a, hmusit tu ka tawn rualin, lainatna leh khawngaihna avanga ka hmêl an hmuh ringawt pawha mittui tla zawih zawih a min kuah vawng vawngtu ka tawng fo mai!


Dingpuii room chu ka room emaw tih mai turin ka lut zing a, ka chawlh neih chhun chu an Inah ka hmang zo a ni thaw thâng mai. A nu leh pa ten min hnar lova, lainatna leh hmangaihna nen min dawm a. Nutei nise, loh theih loha class a kal a nih ngawt loh chuan, ka bulah a tàp chawt a. Kei lahin ka ngaiin ka thlahlel nen, kan inzui chawt a ni ber mai.


Zankhat chu, tui tak mai hian ka muhil bawrh bawrh a. Ka ngaihtuahna te chu ka mang phan em maw ni.... Dingpuii nen ngei chuan hlim takin ka room ah, kan inkutsuih zan, zan duhawm ber mai chu kan hmang dun a, ka âwma a lu nghat tlãnin, ka beng a khal niap niap a! "A mak tiraw, nupa chu kan ni ve ta der mai si a! Fa hmasa berah hmeichhia kan nei ang a, a dawtah mipa...." tiin a phun sep sep a. A hnungzânga chul hauh hauh pahin, "I duhthusam chu a takin thleng se, chhungkaw hlim tak din dun ang aw...." tiin ka chul hauh hauh a. Chutihlai tak chuan ka za deuh chiai chiai a, Dingpuii chu lehthal ṭhakin, chet ka la chho dawn a, mahse, mak tak maiin a ral riai riai a. Ka au lawm lawm a, "Dingpui, min lo nghak rawh...." tiin ka au chhuak a. Ka harh zawk a, thlan fimin mi lo bual huh hman vek nia!


Ka meng hlawl ka'n hawi chhuah chuan, ka awm nghenga bei tlen chung hian Nutei chuan min lo en reng mai a. Ka'n hawi kual a, Dingpuii room emaw tiin Nutei khumah zawk ka lo mu a ni ngei mai. Nizan khan ka chiang lo ruai kha a nia. Nutei chu kuai herin, "Ka mutna tur ka hai a ni maw....?" tih pahin thawh chhuah ka tum a. Nutei chuan phal loin, ka bulah a rawn tawlh chho a. Min nek set set a.




"Nute, ka insawn a ngai....kan tân a ṭha lo ang...." tih pahin thawhchhuah ka tum leh nghal a. Mahse mak tak maiin Nutei chuan, "Zanin chauh tal ka bulah awm tlang ve la...." tiin min rawn kuah ta mai! Tleirawl tituai nalh zet leh khal ṭalhin min han nek chuan, lusun avanga khawharna nen, nupui tur nau mah nise, a nalh lo chuang si lova. Chumi zan, khawhar taka hun ka hman fo aṭanga thlakhatna chamah ngei chuan, ka nupui ni mai tur, Inkutsuih mai tura min rawn pan mek tu, thihna nun rawngin mi laksak tak nau ngei nen chuan khawvel thar kan din a nih chu!


Hei hi em ni hringnun khawvel inher chhoh zel dan tur hi ni dawn le? Dingpuiin ka khawvel famkim lo nuaih kha a rawn remkhawm a. Keimaha kim lo nuaih kha kan in tawn leh aṭang khan a kim thlup a nih kha! Chutihlai reng chuan ka hmâ-a fiahna te paltlang zo loin, hmeichhe dangah ka pakai fo a. Tisa takin ka duh dan leh nuam tih zawngin ka hun ka hmang zel a. Biak In hung chhûngah ngei ka bawhchhiatna avanga natna tawngin, chu natna, chhiatna rapthlak ber chuan hum sualah bawk min hruai lut leh si!


Vawikhat mai a ni lo, vawi hnih, vawi thum zet kan khawsa a. A thianghlimna zawng zawng nen ka tân a inhlan a nih chu! Chuti chung chuan ka nun a hlim reng reng si lo! Nutei chu ka awm nghengin a thaw sâk sâk a. Nimin lawka mittui kâra inhnem dun mawlh mawlh khan, mittui dang kan ko chhuak leh si. Chu mittui chuan thlan mual min hruai thleng lo mahse, thlana mu hnu sulhnu chu keimahah a riak tlat si! Engtin nge ka hma hun ka hman ang a, engtin nge nun ka hman chhoh zel ang le?


Hun a liam a, thla a vei a, ka hna chu ka bansan dawn a nih ngawt si loh chuan, kei hian lungngaihna ruam thuk tak aṭanga zalenna dâr khawng tura ka beih a ngai a nih hi! Heti ringawt chuan, mittui kârah pawh, tisa nawmna zawngin, hmun zalen leh chimbuai phak lohna hmun kan haihchham si lo. A mitmu em pawh a keh hmain, tum loh lamah hruai penin ka awm ta si! Inthiamlohna in min chenchilh reng a, chuti chung pawh chuan thlemna ka do hneh ngang lo a ni si a. Hna pawh chu han zawm leh teh reng ila, Mampuii chu ka kalsan thei dawn em ni? Thihna leh tisa chakna chuan kawng dik min kawh hmuh thei lo zawk em ni le?


Ka hna ka zawm leh hnu chuan, keimah leh keimah infuihin, theih tawpin Nutei leh Mampuii pawh ka hlat hret hret zel a. A tawpkhawkah pawh pumpelhna kawng dapin, kawng awlsam leh nuam chu zawh lui ṭalh loin ka in sum ṭang ṭang a. Harsa tiin chau ṭhin mahila, tum luihna lian tak avangin ka pumpelh hram hram chu a ni ber e.



Zankhat chu, ka room-ah khawhar leh mal inti ngawih ngawiha hun ka hman lai chuan, khaw chhak kilah Thla a rawn lang dut dut a. Inthlahrung awm takin Lentlâng pang aṭang chuan khawvel a rawn bih dûk dûk a! Tukverh hawng meuhin ka thlir a, ka nunhlui liam ta te chu a mal malin an rawn lang zut zut mai bawk nen. Lunglennain min luhchilh a, khawharna chuan min buan let tawp tawp a!




"Kei hi enge maw ka nih a, heti teh hrepa ka awm ni le....Ka tân damin enge awmzia a neih?" tiin ka inngaihtuah lungpuam nasa mai a. Dam thlakhlelhna reng nei loin, ka taksa ngei pawh chu ka thlahlel zo lo a. Ka ta ni hauh lo, keimaha "Nunna thaw" chu keima duhthu ngei a tih tawp tumin, ka nupui ni mai tur hnena cheng ve thei tura in ngaihna lian tak leh; mahni inkhawngaihna chuan mi buan tluin, hmun awl atân hmun remchâng melhin ka tei thuak thuak a!




Stool dawh a, a hmun tur taka hruihrual chu suih nghetin, nghawngtawk nei lêk loa ka in valh hmiah hmiah lai chuan, mittui kârah Dingpuii chuan mi lo nam ṭang ṭang a! Chutihlai mêk pawh chuan, mahni inhmangaihna avang bawk chuan:


Ka di tel lova hringnun hman reng zawng,
Ka zuam mawlh lo ve, ka zuam thei mawlh lo
Hmangaih ber kianga ka len ve theih nân,
Awmlai nunrawng, min hruai ve rawh....!?


tiin ka phun mawlh mawlh a! Mahse, chu tih lai tak, hmabak hlen tuma ke ka pen dawn lai tak chuan, Kan venga Baptist Biak In chhung ngeia Dingpuiin tihtakzeta,

"Kan dam chhûng nite chhiar dan tûr min zirtir ang che, Finna thinlung kan neih phah hialna tûrin...."

Tia a sawi lai ngei mai, aw tliang, fiah leh lungkuai zet mai chu ka thinlung bengah a rawn ri ral ral a! Chu aw chu ka ngaithla lo thei si lo! Kei hian ka dam chhung ni chhiar thiam a, finna thinlung nei tur hian, hmabak hlen tur ka la ngah si zia chiang takin ka thinlungah a rawn in tar lang zut zut a! Engvangin nge, mi dawihzep ber ang mai a hringnun hmachhawn ngam lo tura ka lo in siam? Thim a awm chuan èng a awm bawk ang chu mawle....Lungngaihna dawtah chuan hlimna pawh a awm dawn lo em ni?


Chu darkar hlu tak chuan hringnun chhiar thiam turin Zirlai thar min chhawpchhuah sak ta! Khawvelah hian ka mal hauh lo e. Eng dinhmunah pawh ding dawn ila, nun thar, rahbi thar rap tura huaisenna chuan min hneh ta. Ka nunhlui chu engpawh nise, hriat reng a hlawh a nih pawhin, ka siamṭha tawh dawn lo. A lo la thleng lo zawk zawh dik a, rap fuh tura ka insiam rem a ngai zawk a nih hi! Chumi tur chuan hun ṭha ka la nei alawm le. Ka sualna te chu tuman hre loin, ka daifuh lohte chu min hriatpui lo mahse, engkim hmu a, hre vektu hmaah chuan simin, nun thara nung turin hunṭha leh duhawm zawk pek ka lo la ni cheu a nih hi! Chuvangin, ka dai fuh lohte chu senlar angin lar mahse, ngaihdam a la ni thei a, nawh rehin a la awm thei si a!



"Hawh u, LALPA hnênah i kîr ang u: Min lo pawt sawm tawh na a, min tidam leh dâwn si a, Min lo vaw tawh na a, min tuam leh dâwn si a."

Ka zawn ngai loh chhandamna, ka hmuh ngai loh Lal Isua ka hmuh a, ka neih ngai loh nun hlimna dik tak ka hmuh theih nân, pawh sawm a, vuakin ka awm tawh a. Chu dinhmun aṭang ngei chuan tihdam leh tuamdam nihna ka lo hlawh ta!


Ka nunin Krista a zawn a, a hmuh a, a neih theih nân, LIANDINGPUII hmanga hringnun zirlai thar zirtir ka lo ni reng si. Thi mah sela, kei ka tân a nung reng tawh dawn si a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)