INTHEN A AWM TAWH LO'NG by Hnahna Richard Syuhlô

Story tawi te te emaw luanliamna emaw post na
Richard B Syuhlo
Posts: 1
Joined: January 28th, 2020, 3:34 pm

INTHEN A AWM TAWH LO'NG by Hnahna Richard Syuhlô

Unread post by Richard B Syuhlo » May 17th, 2021, 11:25 pm

INṬHEN A AWM TAWH LO'NG

Ziaktu - Hnahna Richard Syuhlô

(Short Story based on True Story)


Semester exam kan zawh tawh avang chuan chawlh hmang turin ka pian leh mûrna Hawthai khawpui pan chuan ka hawng ta a. College zirlai te chawlh hman lai a nih avang chuan khawlai chu a lûn hle mai a, khawlaia veivâk pawh an tam nangiang mai.



Nipui hun chu a ral ṭep tawh a, fûr hun pawh a inṭan leh ṭep tawh bawk. Fûr a inṭan ṭep tawh avang chuan thli pawh chu a tleh sep sep reng a. Zankhat chu, tukverh bula ṭhuin pawnlam ka thlir ngawi reng a, chumi zan chuan, chhum zingah lunglên tizual tur tawk vela thla êng chuan ka lung min lên hle mai a. Inchhunga ka mawng hun reng pawh chu mawngmîr an sawi ang mai chuan ṭhut pawh min ṭhuttir ṭha hle hle thei ta lo, ka lenrual lungduh te hlim leh lawm taka tual an chaihna, khawlai chu ka pan ve ta nge nge a. Ka han vâk vel a, lungkuai taka theihai bûk hnuai hmang ṭangkai em em te, ṭhianṭha ni awm tak titi mawlh mawlh te, nula leh tlangval inkai rial chunga khawlaia lo vakvel te, nu leh pa, tar leh naupang te chen chuan ka tawk vel bawk a. An hlim hmel ka hmuh te chuan Keimaha awm sual, sual hnathawh ka do hneh rual loh chuan min hmêrsawmin, anni chu thîk namên loin ka thîk a.



Rilru na taka min siam a, min kalsan zui tu, leh lengdang ṭang min belhsantu ngaihna chuan ka thinlungah hmun rawn chang thar leh in, ka ngai em em mai a, mahse amah ka huatna leh ka ngaihna chu a inchen vel ang. Chu zan lunglenthlak tak chu ka tan chuan zan khawharna leh lungngaihna min thlentu mai a ni si.



Pan tur ber pawh hreloin kawngpui ka zawh a, chutia kawngpui ka zawh mêk lai chuan lamkhuang kung hi ka va pawh hlawl mai a. Chutah chuan nula pakhat hi min hnungchhawn zawngin a lo ṭhu a, a ṭap ri ka hriat avang chuan ka kal pêl zet a, mahse ka pên chu a tawp chiang kher mai. Ka kal pêlna lam chu hawikir leh in, chu hmeichhe awmna lam chu ka va pan ta a.



"Puih theina che ka nei em? Sebastian ka nia" tiin ka va bia a.

Min rawn lehhawih pah chuan "Aih, awm lo e, ka lawm lutuk" tih pah chuan min hnungchhawn zawngin a inher leh nghal a. Mahse, a mitmengah khan lungngaihna bak hmuh ka neih loh avang chuan kalsan mai ka tum bik lo. Mipa ka ni a, puih theina ka nei chuan puih ngei ka tum bawk a ni. A harsatna te ka zawh pawhin min chhang ṭha duh der lo nia, "keini zawng kan hmu leh hriatte sawi lovin kan awm thei lo" tih nen chuan inperhsan tak a ni. Mahse, dawhthei tak chuan ka nghak a, ka zawt leh ṭhin a, chutia reifê ka nghah hnu chuan a chanchin zawng zawng chu min hrilh ta vek a. Rei ngial kan titi hnu chuan, phone number te inpe in, hawn zai kan rel ve ta a.



Chanchin te inhrilh a, rei tak kan inkawm hnu chuan kan inkarah solomon-a hmangaihna aia thuk zawk, hmêlma hmangaihna(agape hmangaihna) ngei mai chuan bu a rawn khuar ṭan ta tih reng kan hre lo. Lal Davida'n, "Ka chungah a hmangaihna a nghah tlat avângin ka chhanhim ang a: Ka hming a hriat avângin hmun sângah ka hlang a(Sam 91:14)" a tih ang khan a ni chu chhanhimin, ka thinlunga hmun sâng berah chuan ka hlang ta a.


Hla phuahtu'n, "A kianga awm a ṭhat zia sawifiah thiam tehreng ila" a tih ang deuh khan a felna, a ṭhatna, a duhawmna te hrilhfiah thiam tehreng ila, ka kawng min êntu chanchin hi tlâng ka than tir tur. Zukpui duhawm tak leh zukchal nalh tak angin englai pawhin aṭâng chhung chuan min tilungawi fova, a hmangaihna ah chuan ka lawm fo ṭhin.


Hun leh ni te chu an liam ve zel a, college ṭan hun a nih tak avang chuan ka hmangaih pawh chu thiamna zir turin vairam(Hyderabad) lam min pansan a lo hun leh ta a, a kal nî tura an ruat chu zankhat chauhin min dang ta. Chu zan kher chu kan âm dun ngei mai, mahse hun hian kan lungngaihna min hriatthiampui ve si lo, mittui nen ui tak chungin kan in mangṭha ta a ni kha.


Sabrina chuan min kalsan ve ta tak tak a, ka lung a leng ngei mai. Ka chaw ei pawh a tui thei lo, chaw ei châkna reng ka nei lo a ni e. Biak hlatna aṭang te chuan inbe ve ṭhin mah ila, kan inkarah chuan tlâng tam tak an ṭhu vûm mai si, khawhar a hnem mawlh lo a ni ber e. Ani pawh chu tluang takin a zirna(awmna) hmun tur Hyderabad a thleng ve ta a. "Hawh teh, zankhuain hmangaihna duhtawkin i chen ang khai, hmangaihnain inhnem ang" tih mai a nia ka duh ni, mahse ka hmangaih lah chu hmun hla takah a awm si.


College ṭan hun a nih tawh avangin keipawh chuan Siaha khawpui panin ka seilenna khua chu ka chhuahsan ve ta a. Hun leh ni te chu an liam ve zel a, ka hmangaih nen chuan in be ve ṭhin in, kan inngai in kan inthlahhlelh em em ṭhin a ni.


"Seba, engtik lai pawhin nui reng ṭhin ang che aw" tia min hrilh te chu ka bengah chuan a ri nawn reng ṭhin a. Zing ka thawh phat aṭangin nuih ka tum ṭhin a ni. Advice ṭha tak tak min pe ṭhin a, min zilhhauna aw-kâ te chu ka tan chuan ka nunna tluka hlu vek a ni.



Hun chu a kal ngaiin a la kal reng a, hriatloh karah semester exam pawh chu karkhat chauhin min dang ta. Taima taka zira hlawhtlinna chan ngei chu kan tum nghet tlat a. Ka nu leh pa, ka laka an innghah zia te chu min hriat nawn tir ṭhin. Kan pahnih inkarah hi chuan inhriatthiam tawnna hian hmun a khuar nghet hle a ni. A ni ang nula fel leh hmelṭha, kei mimawl ina ka lo tawng ta mai hi vannei ka inti in, Pathian hnenah pawh lawmthu ka sawi fo ṭhin.


Semester exam pawh chu Pathian kaihruaina azarah ṭha takin kan zo fel ve ta a. Sabrina-i erawh keini aia an ṭan tlai hret avangin a la zo ve lo a ni. Pathianin a awmpui anga, a ni pawh chuan ṭha taka exam a zawh ngei ka beisei tlat a ni.


Ka inhmuhleh hun tur chu ka nghakhlelh em em mai a, loneituten buh seng hun an nghahhlelh a, an seng hun tur beiseina nena nî an chhiar ṭhin ang hian, kan calendar chu ka sawp hneh viau. Chutia tlumtea thlir taka kan inhmuhleh hun tur ngaihtuaha hun ka hman mek lai chuan kan result pawh chu a lo chhuak ve ta nge nge a. Ka duati nen chuan Pathian khawngaihna azarah Distinction ah ve ve kan pass a, kan lawm ngei mai. A lo thlen huna pass aruala lawm mai ka duh thu ka hrilh lai kha chuan a va'n hlim tehreng em!


A lo thlen hun ka nghahhlelh tluk in, a ni pawh chuan min hmuh chu a thlahhlelh ve em em a. Aizawl a lo thlen hunah pawh theih nih se lo tlang nghal mai a duh thu min hrilh lawm lawm reng bawk a. Ka thinlung a hlim ngei mai.


Tuk khat chu ka lung hi a leng em em a, mitthi, thi tawh te chu ka ngai em em a, ṭingṭang la chhuak in, awrawl tawpin vânram ngaih hla kan zai chiam a ni kha! Ṭhenawm te chuan bengchheng min ti ve ngawtin a nia ka rin ni. Chhunah chuan State Bank ah thil pawimawh tih tur ka nei avang chuan Bank ah ka kal a, rin aiin ka buaipui rei deuh a, unau hmelhai hun awm velah in ka thleng ve ta hram a. Ka inbual zawh chuan, zanriah chu kan kil a ni nghal der mai.


Ka phone lo a ri ral ral a, hmanhmawh lem lo chuan ka pick up zui nghal a, "eng maw!?" thil dang sawi ka tum viau a, sawi pawh ka sawi chhuak ngei chuan ka hria mahse ka aw a ri chhuak thei lo. Ka ke zungpui aṭanga ka chhip ler thleng chuan a hit vek ni berin ka hria. Ka khur nasat em avang chuan ka phone pawh chu chelh zo lovin chhuatah chuan a tla thla ṭhuai bawk a.


"I thihna apiangah chuan ka thi ang a, chutah chuan min phûm ve mai tûr a ni; nang leh kei hi thihna chauh lo chuan, thihna ni lo thil dangina min ṭhen dawn ai chuan Lalpan ka chungah thlentir zawk mai rawh se" tia a sawi te chu ka rilru ah a lo lang zawt zawt a.


A hmelṭha tak ṭhin te kha a dâng zo ta a, a kut lum ther ther ṭhin te kha a dai zo ta. Hetih chung pawh hian he khawvela mawina awm zawng zawng hian ka mitah chuan an khum thei mawlh si lo. A kuang chungah te chuan ka ṭap a, ka râk a, ka au chiam a, mahse chhangtu ka nei lo. Ṭah hla ka chham chiam lai chuan a reh tlawk tlawk a, ka ṭap thawm chauh lo chu rî a chhuak hauh lo. Ka ṭhiante chuan pawn lamah min hruai chhuak a, pawnah chuan mi an lo ṭhahnem hle mai a, mara fa(mizo te) tlawmngaihna a tharin ka hriatchian phah hle. Tlai lam dar thum vela vuiliam tur a ni avang chuan pawnah ka awm khawtlai rei duh lova, zunram kan thiar zawh chuan kan lut zui leh nghal mai a.


"Khawngaih takin a kuang khuhna kha la chhil suh u, ka duat-i kha a hmel hmu lo chuan ka awm thei lovang. Thlahhlelh em em a a hmel hmu hun, hun leh nî ka chhiar zat pawh in hre si lo!." Mipui thawm pawh a reh diak a. Kei erawh chu lungngai em em in ka ṭap zawih zawih a. Ka awmdan a dik lo niin an hria a ni chek ang ka ṭhiante chu ka bul hnai ah an lo awm ṭhup a. Ka ri hriatna chu zawih zawihin a hla zel a, ka hmufiah thei tawh hek lo, a thim ta nghal vek a.


Ka mit ka mên leh chuan khumah hian ka lo mu reng chu niin, thil ka ngaihtuah let a, "Sabrina kha! ni lo", thlanmual lamah ka tlan liam nghal vat a. Leivung, vum thur mai, thar lâm tak chuan ka mit a la ber a. A thlan chungah chuan ṭhu in, ka'n ṭap leh ri a. Sawi tur tam tak ka nei a, mahse ka sawichhuak thei lo. Hnawhtu a awm tlat nia hriatna ka nei. Pu A. Chhualai-a hla, "Di, i biahthu min hlan zawng te kha, kei lungmawl thinlai ah hian a châm reng mai. I zûn ngaih lunglên chauh hi maw ka tawrh dawn a? Di, inṭhen tawh lo'ng aw, tia i biahthu min hlan zawng te kha thinlai ah a châm a, nghilh a har mang e" tia mawi em em a, a sak te chu ka rilru ah a lo lang zut zut a, ka mittui ko thla tu bawk a ni leh si.


An phumna thlana ṭhu chung chuan, "Sabrina, he khawvel mawina te hi lo thlahhlelh miah suh ang che aw. Vân hmun nuam, inṭhen awm tawh lo na ah hlim takin kan intawk leh dawn nia aw. Thihna lui ka lo dai hunah, lui ralah(kamah) khan min lo nghak ang che aw. Chutah chuan inṭhen tawh ngai lo turin kan intawng leh dawn nia" tiin ka thla ta a.

A TAWP TA



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)