Ih maw Tuaiterek

Story tawi te te emaw luanliamna emaw post na
Cck Lalchhuanawmi
Posts: 322
Joined: August 5th, 2022, 8:54 pm

Ih maw Tuaiterek

Unread post by Cck Lalchhuanawmi » October 3rd, 2022, 7:34 pm

Ih maw Tuaiterek, Engtik thleng nge ni dawn???
True Story Based
Ziaktu: Cck Lalchhuanawmi


"Tuaitereki a awm lo tih hre tho mah ila, an vengah ṭulna vanga riak chho ka ni a, haw dawn hnaihah chuan tiin an ina han chuankai reng reng ka duh ta a.

In an lo sa mek hi a lo ni a, ka lut chu Tuaitereki nu hian min lo be vat nghal a, keipawh ṭhu ren rawnin kan titi siam siam a, a ṭawng duh ve reuh bawk nen kan ri chel chul mai.

Haw tura ka intintuah lai chuan, " Tuaitereki lo haw hunah in innei daih ang a, inchungah khian in awm daih dawn a nia", tiin min thlah a, ka nui lui sak a, ka thinlung erawh a nâ vawng vawng mai.

Tuaitereki ka duhna tihbo tuma kan vengnu chauh ka rilrua dah ka tum mek lai a ni a, ani pawhin min haw lo tih ka hrechiang hle. Inngaizawng kan ni tih nemnghehna awm chiah lo mah se, inngaizawng ang chiahin kan awm tawh thung. Tuaitereki pawh ka hre chang tawh lo hial zawk. A tua ve mah mah chuan kan inhawlo tih chu kan tilangin kan inhriatsak a, mahse; inngaizawng ni chiah si lo, dinhmun laklawh deuha kan awm laiin tihian, Tuaitereki te vengah ṭulna avangin ka riak chho a ni a, tihian an ina chuangkai hramin a nu-ina thu min thlahna chuan ka lunghlui a tithoin Tuaitereki chu ka lo hmangaih hle tawh a ni tih chu ka hriatchhuah phah bawk.

Mipa inla pa ve tawk tak, hlauh nei ngai lo anga inngai ve ṭhin kha, amah ka chan mai ang tih hlauhna chuan min rawn man a, ka haw kawngah chuan inla pa ve tak hi Tuaitereki ngaiin ka ṭap chhuak ta hial mai!

Ka hmuh hmasak ber ṭum chu ka hre thei chiah tawh lo, a nui mawiin a fel em em a, a rilru a ṭhain ṭhenrual kawm a thiam êm êm bawk, chungte chuan min vei tir a ni ngei ang.

Ṭum khat chu kan Kohhranin Mission Field tlawhin kan zin dawn a, chutah chuan Sumo-ah a hnungah chiah chuan ka ṭhu ta mai!

Ka lûng a inthum chhawk dup dup a, ka khur der derin ka hre bawk, chutah chiah chuan ka lo duh reng a ni tih ka hre ta a. Min lo la hre vak lo mah se, a hnung ringawta ka ṭhu te kha nuam ka van ti tak, Mission Field kan thlen hma kha chu, kawng tluan khan ka khi ṭhaw reng hian nia ka rin ni.

Tichuan, kan zin kan haw chho hnu aṭangin ka be ve ta zeuh zeuh a, ka lai chhe nasa thei a sin. Kohhran thil a vangte pawh ni ang e, kan inkawmngaih ve hle tawh bawk.

Ka phak ang tawkin ka chhui zui ve zel a, ngaihzawng a nei nge nei lo tih te, a rawng duh ber te, a chawhmeh ngainat zawng zawng zawngte nen pawh ni ang. A ruk khan ka buai ve thei ṭhin a sin.

A hnu deuhah chuan ngaihzawng a nei tih ka hre ta a, kan zinna hmun ami niin, kan zin chhung zawng khan an lo inbe ṭhain an lo inngaizawng a ni ngei ang. Khami ka hre zet zawng ka hnîm ruih nghal thei, mahse; duh berte an hlim phawt chuan tiin, ka duhna erawh a nasa tulh tulh thung.

" Vawiin chu leng ho ang u, ka ṭhianpa kha a lo zin a", tiin Tuaitereki chuan min lo bia a, ka thikna leh natna te chu thup hram hramin, " A ni maw! Awle, kan leng dawn nia", tiin, kan ṭhianpa pakhat nen, kan pali chuan kan inzui chhuak ve ta a.

Reiek tlangah te kan leng a, an inkaih lai te chuan ka lo thik ru hle, mahse; a hlim hmel ka hmuh chuan thik hle mah ila a hlim chuan ka hlim ve tho si.

Ṭhianpa lah chuan, " Nawm loh i tih hmel", chik zeta min en kur chung hian a ti ṭhin roh a, tuma hriat duh loha inthup ve hram hram tum laiin, ka hrilh chuang lo a, a nawm thuin ka chhang ve mai a, engmah hriat a nei lo nih hmel, a chhah leu luau em mai.

Mahse, zan khat inkhawm kan bang chu, Tuaitereki ṭhianpa chuan Tuaitereki û a melh dan chu dik zân lo hian ka hre ta tlat a, khata ka rilru nât zia kha, a ṭhianpa chu va keuh thlûk tawp kha nia ka nâp ni.

Tuaitereki chu hrilh ka tum ta a, ko hrangin ka zam lutuk chu a mit ngeia en chung chuan ka hrilh thei ta tlat lo, hnung lam ka hawi tir ta ringawt a, tichuan; a ṭhianpain a û a melh dan te chu dik tawk loa ka ngaihzia thu te chu ka hrilh ta a.

Muangchanga rawn inherin, " Engah mah ngai suh, a ho lutuk, ahmain an lo inhriatsa vang a niang, rilru tinâ suh", nui sen sen chung hian a ti ta roh a, a kalsawn nghal daih bawk. Tichuan, kei pawh ngaihṭha zan lo chuan kan ṭhiante awmna lam chu ka pan ve leh ta a.

Hun a kal zel a, Tuaiterekin ngaihzawng a nei bawk nen, keipawh chuan tum loh deuhin ngaihzawng ka nei ve ta keuh!

Mahse, Tuaitereki ka duhna erawh a la bo thei chuang lo, ka la ngaihtuah reng zel tho. A dik lo tiin ka rilru ka siam a, ka bialnu chauh ngaihtuah ka tum ta a, ka ngaihtuah ta reng bawk a, ka bialnu pawh chuan ka rilru a luah ṭanin ka duh ta êm êm chho viau, mahse; Tuaitereki pawh ka la hre reng tho.

Inkhawmpuiin Champhaiah zin a ngai a, V-day ni-ah tak kan zin dawn avangin ka bialnu tan thilpek lei lawkin, " V-day ni-ah tak kan zin dawn si a, tihian kan ur lawk ni mai, Christmas-te pawh kan ur lawk ṭhin kha", tiin thilpek ka leisak chu ka pe a.

Inkhawmpui chu ni thum chiah kan cham, ni thum tak tak chiah. Ni thum kan cham chhung chuan ka bialnu ka duhna leh ka thlakhlelna te chu a bo vek!

Tuaitereki bawk chuan ka ngaihtuahna a luah leh ṭan tawh.

A chang hi chuan awmzia hre map lo hian ka lo nâ veng veng ṭhin! Ka phu lo em mawni aw tih chang lah ka ngah.

Kan haw hnuah pawh ka bialnu lakah ka rilru ka pe thei ta tlat lo a, ṭhen daih pawh ka duh, mahse; chhan awm em em loa mi han ṭhen hmasak ringawt zawng ka duh chiah lo a, nuam ti tawh zan lo chung chuan ka bialnu nen kan inkawp chho ve zel tho a.

A hnuah chuan Tuaitereki bulah ka bialnu chu ṭhen ka duh thu te leh, rilru pe lo tak chung chuan ka kawp theih tawh loh thu te ka hrilh a, " A nih chuan, ṭhen daih mai rawh", min lo ti ta a, ka bialnu pawh ka ṭhen zui nghal, ka duh ber thu kha a pawimawh tlat si a.

Hun a kal leh hret a Tuaitereki pawh Nurse zir turin Phaiah a kal dawn a, Airport-ah pawh ka thlah ve thlap, tun thlengin Airport kawnga ka kal chang apiang hian ka ngai tharin ka lung a leng ruih ruih zel.

Ka duh thu pawh ka hrilh ta lo char char a, biak pawh ka be ta ngai mang lo, a hma aṭanga ka duhzia hrilh ka tum tehreng nen khan, tunah lah a zirlai ka tihbuai ka hlauh vangin ka hrilh duh ta lo a, a zir zawh hun nghah mai ka ti tlu ta rawih a ni.

Tichuan, hun leh thla kum a liam a, Tuaitereki pawh hre chang tawh loin ka awm awmin ka awm ve ta tawp tawp a, duh dang neiin, ka duh tharnu nen chuan kan ni ta hial a.

Ka bialnu thar chu ka duh ngawih ngawihin ka rilru zawng zawng a luah a, Tuaitereki pawh ka duhna leh ngaihtuah zuina a bo vek hial, la hre tho mah ila Tuaitereki lakah rilru ka pe tawh lo a ni deuh ber.

Ka bialnu ka duh ngawih ngawih lai leh Tuaitereki ka duhna bo vek tawh hnuah zan khat ka mangah chuan min duh thu Tuaitereki chuan min lo hrilh a, " Eng nga tinge a hma khan min hrilh loh, ka duhzia che pawh i hre reng awm tho si a", ka lo ti a, ngaihzawng nei lai ka nih avangin ka rilru a lo buai khawp mai a, chutah ka ṭhangharh ta hlawl!

Ngaihna hre lo zetin inchung melh kurin ka khap fap fap ringawt.

Chu ka mumang vang chuan Tuaitereki ka duh thar leh ta sawt a, mumang mai mah nise, ka chhungrilah erawh ka hlim veng veng thung. Ka bialnu nen pawh kan inṭhen zui leh daih bawk.

Hun a kal leh hret hret a, kan thil zirpui ṭhin nen chuan kan inbe ṭha chho leh tial tial a, amah chu ka duh thar leh ta sawt bawk, mi pakhat chauh duh hlur ang chi ka ni bawk nen. Tuaitereki reng ka hre chang tawh lo. Chutih lai chuan Tuaitereki pawh phai aṭangin a lo haw ve bawk, amaherawhchu; ka duhna a awm tawh loh avang leh duh thar ka neih tak avang chuan an venga han kal a, an ina han chuankai pawh ka tum lo.

Ka duh thar hnenah chuan ka duhzia hrilh ka tum ta a, ML Tournament kan neih lai a ni bawk nen, Tournament-a kan chak chuan ka duh thu hrilh ka tum a, kan chak loh pawhin hrilh ka tum tho. Tournament kan neih chhung zawng ka be lo a, kan neih zawhah ka duhzia hrilh ka tum avangin.

ML Tournament chu kan zo a kan chak miah lo, mahse; ka duhzia hrilh ka tum tho. Zan dar sawmpakhat a ri tawh ang, ka va bia a, a muhil tawh ni ngei ang chu min lo chhang ta si lo a, atuka hrilh tumin ka muhil zui ve mai bawk. Mahse, ka mangah chuan Tuaitereki chu ka hmu leh ta hlawl!

Tuaitereki bawk chu ka duh tharin ka ngaihtuahna a luah leh ta ngut ngut a, ngaihna hre lo zet hian ka chal ka beng dat dat ringawt.

A tu zawk hnenah chuan nge ka duhzia thu ka hrilh tak ang?

Chu chuan ka rilru a kap buai nasa êm êm a, duh thar ka nei a, hlim ve viau tawh tura ka inngaih laiin ka mangah Tuaitereki a lo inlar leh bawk si a.

A tua ve mah mah pawh chu ka duhzia hrilh loin ka tlingta ta ringawt bawk a, an pahnih chuan ka ngaihsak zui lo ve ve bawk.

Hun leh thla kum a ral leh zel a, tumah ngaihsak lovin hun ka hmang chho ve leh zel a, chutih lai chuan kan vengnu pakhat hi kan dawrah puan ṭhui a rawn zir ve a dawra ka awm ve lai a ni bawk nen, ani nen chuan kan inbe ṭha leh chho viau a, mahse; dawra kan inhmuha kan inbia tih lohah chuan message emaw a hranpa taka han biak lumlam vak ka nei lo, a number pawh ka dil lo.

Chutia nitin inhmua inbe reng reng ta na na na chu kan lo innel chho leh ta viau a, kan inkarah induhtawnna a awm tih pawh hai rual a ni tawh lo, chutiang ni si chuan a number ka la dil lo a, dawra kan inhmuh leh inbiak chauh chu ni mai.

Zan khat chu ka û-te nen chakai kan chhit dawn a, chumi vang chuan dawr khar hmain kan vengnu pawh chu, " Chakai ka lo hawn ve dawn che nia", tiin, a puan ṭhui zir pawh chu kan ban hmat tir a.

Chakai kan chhit, dar sawm pel hret tawh lama Thlama kan chawl chu fb, messenger aṭang hian kan vengnu chuan, " Chakai chu min lo hawn ve ta em?", tih chu min lo thawn a, kha kha kan inbiakna hmasa ber a ni. Amahah chauh chuan rilru pek ṭan leh ka tum ta a, mahse; chumi zan bawk chuan Tuaitereki bawk chu ka mangah a lo inlar leh ta a ni.

Midang hnena rilru thar pua, hmalam pan ka tum laiin ka manga a lo inlar ziah mai hi ka hrethiam thei lo a ni.

Tun ṭum erawh, engah mah ngai duh tawh lovin, nitina ka biak leh min hawlo tih ka hriat reng reng kan vengnu hnenah chauh chuan rilru zawng zawng pek ka tum ta a ni.

Mahse, hetia ṭulna avanga Tuaitereki te venga ka riah a, an in ka chuankaia a nu thusawi, fiamthu nge thutak tih pawh hriat loh khan Tuaitereki chu min hriatchhuah thar tir leh a, tihian ka ṭap chhuak ta hial a ni.

Ani kha ka thinlung zawng zawngin ka duhin ka lo hmangaih ngawih ngawih a ni tih ka hrechhuak a, tu hnena mah sawichhuah rem si lo hian mahniin ka tuar ta tlawk tlawk mai a ni.

Kan vengnu pawh be ṭha tho mah ila, a zeuh zeuhin ni tawh thung, Tuaitereki chauh chu ngaihtuah ka tum ta a, nghah mai pawh pawi ka ti tawh lo.

Engtiang pawhin lo awm se, Bawrhsawm tak leh dinhmun chhe tak pawhin lo awm mah se, keichuan thlahthlam mai lova vawn tlat hi a ni ka duh, a chhan chu ka hmeichhe hmangaih a nih avangin.

Tudang ngaihtuah tawh lovin, Tuaitereki chauh ngaihtuah leh nghak chungin hun ka hmang chho ta bek bek a nih hi.

Zan khat ka mang lehah chuan Tuaitereki a lo haw chu niin!

Ni rei vak lo hnuah ka ṭhianpa ka kawmngaih em em, Tuaitereki ṭhian kawmngaih em em ni bawk nena kan inbiakin, " Tuaitereki a lo haw dawn kha", a ti ta hlawl. A lo haw tur ka hriat chuan ka hlim veng veng mai.

Chumi hnu lawkah ka mangah chuan a lo haw leh a, Tuaitereki chu ka be ta tawp, " I lo haw dawn em ni",

" Aw, naktukah ka lo haw dawn", a ti ta a. A lo haw tur ka mangah ka hmu lawk nge, ka mang aṭangin Tuaitereki hian min lo hrilh hre zawk nge ni?

A lo haw hnu chuan ka mangah bawk ka hmu leh a, chutah erawh bialpa a lo nei thung.

Ka rilru nâ lutuk chuan Hun ṭha bawhpelh ka tum bik ta hauh lo, ka duhzia chu hrilh ka tum ta a, chumi hmain bialpa a neih leh neih loh ka zawt phawt, " Nei lo, neih tur pawh an awm lo", tiin min lo chhang a, chutah chuan ngaihngam takin hman aṭanga ka duh ṭhin zia leh, ngaihzawng leh duh ngawih ngawih ka neih chang pawha, amah bawk ka manga a lo inlar ṭhin thu te leh, ka thinlunga a thar zel ṭhin thu te chu ka hrilh ta vek a.

Nurse zir tura a kal hmaa hrilh ka tum tawh thu te, hrilh leh ta mai lova a zir zawh hun nghah mai ka tum thu te ka hrilh a, ka thinlung zawng zawnga ka duh awm chhun leh, ka inthup theih tawh ngang loh vanga inpuang ka ni tih te chu ka hrilh ta a, chhanna duhawm tak min pek kher pawh ka phut nghal loh thu ka hrilh bawk a, Nurse a zir zawh hun ka nghak thei ang em tih ka zawt bawk.

" Min duh ve avangin ka lawm lutuk, mahse; keimah hi ka la inpeih chiah lo, ka zirna vang pawh ni chiah lo mah se, ka la inpeih lo", tiin min lo chhang ta khiah a.

" Ka nghak thei che ang em? Hun rei tak nghah ngai pawh ni mah la, ka nghak thei ang che, rem i ti ang em?",

" Ka sawi lawk thei lo",

" Awle, hun rei tak nghah ngai pawh ni mah la, ka duhna che a bo hma chu ka nghak zel ang che. I inpeih huna duh dang i lo nei a nih pawhin ṭhian ṭha tak kan la ni zel thei tho lawm", tiin ka chhang a, " Awle, nuam lo tih phah suh aw", tiin min lo chhang let ve bawk.

Ka duhzia a hre tawh a, ka hmangaih a ni tih erawh a hre si lo, hre turin ka hrilh bawk si lo a.

Ka tana Khuanu ruat a nih chuan ka chang ang a, a nih loh leh ka tana Khuanu ruat loh ka hmangaih a ni dawn a, a inpeih huna midang a neih pawhin ka lawmpui tho ang, ka hmangaih miau si a.

Tihian, ka nghak phawt mai ang e!", tiin, kan ṭhianpa ngawih ngawih chuan min hrilh ta a, hun rei tak a lo up beh tawh, " Min ziahsak rawh", a tih vang chauha, min ring ngam leh ngaihngam taka min hrilh chu a lawmawm zawkin, kan inhrilhfiah nasa bawk a, veng leh hmingte thupsakin a lungdum takin ka ziah chhuahsak lo ang ti erawh ka hlau hle thung.

Ṭawng duh ve tak, uang peih tak leh chimawm thiam em em a ni a, min hrilh chiah chu, a inpuang te pawh niang chu, " Inla pa ve tak hi ka ṭap hial a sin", a ti chu mak tih vangin kan meng pawng zawr zawr mai lawm!

Chutih laia, hetiang a ruka a lo tuar erawh ka lainat hle a, kei lah hi mi hnêm thiam lo tih takah, min hrilh kar lakah hian, " Ka rilru i tihah",

" Ka mang i ti dawng",

" Ka khawngaih che e", emaw, " Ka mittui a tla dawn", ka lo ti sek a, a ruk tak chuan ninawm min ti ngawt ang.

Mahse, ṭhiante hlimthla ringawt pawh lo hlimpui ve em em ka nihna leh, an lungngaihna tea lo lungngaihpui ka nih ve ṭhin avangin, " Ih maw Tuaiterek, Engtik thleng nge ni dawn?", ka tihpui ve ta vawng vawng mai a ni!

*** HMANGAIHNA HI CHUAN MI ZAKZUM BERA KAN HRIAT TEAH PAWH HUAISENNA LEH DAWHTHEIHNA A LO TUH ZEL ZAWNG A NIH HI ***



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)