The Feared Crimson King 15

[B.laltlanhlui]

Alice POV

Thudik a ni thei dawn em ni? Kan ramri hi chhan nei lovin a rawn bei a, Khawpui chhunga mite a thah fe hnuah thu chu ka pa hnen a rawn thleng ve chiah a ni. Chuta ṭang chuan indona a chhuak a, ama bul ṭan vek a ni

Ka lei chu ka seh ṭun a, thisen a rawn chhuak ta reng bawk. Hnial a, ama bul ṭan vek anih thu hrilh ka duh hle mai. Ka chhungte hian indona bul an ṭan ka ring lo. Kan mite kan venghim zawk ṭhin

Tlai hun chhung zawng chuan a tu ve ve mah chu kan ṭawng tawh lo. Chhiahhlawh mipa chu a glass tikhat turin a hui reng bawk

Rei tawk kan ngawih dun hnu chuan ka ṭawng chhuak a

"Ka kal thei tawh ang em ka Lalpa?" Ka ti a

Lal chu a rum nghut a, min vai liam ta, ka va lawm tak. Mut hahdam ka duh. Dawhkan aṭang chuan tho in kawngka lam ka pan a

"Naktuk aṭang court kan ṭan dawn nia" Lal in a rawn tih chuan ka lo bu nghat a

Ka pindan ka thleng chiah, khumah ka mu thlawp a, ka thaw chhuak hak. 'Aw, Lalpa khawngaihin naktukah min hre tu awm loh tir hram rawh'
________________________________________

Zingah Lal chuan min rawn kaitho a "Insiam rawh, kan kal ṭep tawh ania" a tih zawh ah min chhuahsan a

Khum aṭang tho in thawmhnaw bawm chu ka hai a, kawrfual dum lam chu ka zawng a, chhawhchhi rawng a bân sei chu ka thlang a, vawiinah hian mi an thih nual ka rin vang a ni, chuvang chuan zahna ka lantir ve an ngai

Kawngka an rawn kik leh a, Lal chenna a kan kal chhung chuan engmah kan sawi dun lo. Kawng ka hre ve tawh emaw ka tih apiangin kan la kal lohna a lo ni zel a, kan kalna tur ber pawh ka hre tawh lo

Kawngkhar pakhat kan thlen chuan Lal in min rawn en a, vengtuten an lo hawng a, pui ka ti ngei mai

Lal ṭhutthleng lian deuh ah lukham sen chu marble bang in a ep a, carpet sen chu a inphah phei zul bawk. Chandelier lian tak hi ceiling lai takah chuan a inkhai thla zul a, vengtute chu a hnungah an intlar a, an thuam famkim an inbel chuan a lem nge a tak tih thliar hran an har.

Mahse Lal chuan hahdam turin a hrilh hlawm a, an ralthuam chu an dah thla ta a, Crimson Lal hnungah chuan hmanhmawh deuhin ka kal a, Lal ṭhutthleng ah a han ṭhu a, ka zui ang nge tih ka hriat mai loh avangin kailawn ah chuan ka ding reng mai, ka han hawi chho a, a bân nghat in a lo ṭhu reng

A mood a fuh hmel loh khawp mai. Min thlir leh vung vung lai chuan kan boruak inlumlet dan hi mak ka ti ve khawp mai

"Lo kal rawh" hmun dang hawi miah lova min lo en reng chu ka thawmhnaw khai kang in fimkhur takin ka lawn a

"Hetah hian ding rawh" a ṭhutna vei lam chu a kawk a, a sawi ang zel chuan ka ti a

A tir darkar ah chuan Loneitute an rawn kal a, ṭhenkhat chuan an lo enkawlna ah fair taka rorel an duh thu an sawi a, a ṭhen leh thung chuan khaw chhiat avanga chhiah pek an harsat thu an lo sawi bawk a, ka rin loh lutuk in Lal chuan a hrethiam hlawm khawp mai. A dawhthei in a mite mamawh a ngaithla uluk hle. A invawng fel hle bawk

Ka ding rei bawk a, ka ke a kham hle a ni. Mahse thu puang tu in a dawt leh a inlan tur a chhiar chuan ka na pawh ka theihnghilh vek "A dawt leh chu Lyrian mite an ni ang!" A ti a

A khi suk a, Lal hnuaia thawk mi awmthei ve tak a ni ngei ang

Ka mite hi rorelna dik pek a tum ka ring lo
"Case 1 na: Thingtlang mi, Walzenorian te nena indo" a ti a

Lal ka va melh chuan a hmelah danglamna pakhat mah a awm lo, kawngka an rawn hawn chuan chu lam chu a lo hawi reng a

Ka thil hmuh chuan min ṭhawng ngei mai. Mi sawmthum leh sawmli chuang vel, vengtuten an rawn nawr lut a, an cher chhia in an bal khawp mai. An rawn tlu lut khup khup a, an chakna neihchhun chuan an rawn pen lut ṭawk ṭawk a

"Chibai buk rawh u!" Vengtu pakhat ribbon sen a bâna bun chuan thu a han pe a, Lal hnuaia hotu pakhat a ni ngei ang

Mipui khawngaihthlak tak te chuan hmanhmawh deuhin an lu an kun a, Crimson Lal an hlauh em avangin a mitah pawh an en ngam lo

"Tunah ṭhu rawh u!" General chuan thu a han pe leh a, an vaiin an kut chain a phuar chu chhuatah a ri tleng tleng a. Ka rin loh lutuk in mipui zingah chuan nu valai leh naupang te pawh an lo awm nuk a

Chhuatah an ṭhuttir pawh chu zahngaihna chhete an lantir ve na ah ka ngai mai

Kan ngawih leh ṭhap hnuah room chhung ah chuan hriau pawh tla se a hriat theih ang tih tur a ni

'Engkim a ṭha vek' tia ṭawng thlamuan ka chak takzet, ka inher ka inher a

Lal ka va melh leh zeuh a, a hmelah chuan a ngaihtuah awm a lang miah lo, a chhuk en hlawm hnuah a rawn ṭawng chhuak a

"Helai hmuna in awm chhan hi in ngaihtuah ngei ang a" Lal aw chu a khawk rum rum a, tu mahin an en ngam lo, thawm chhuah ngam pawh an awm lo

"Ka han sawifiah ang e, ka sawi nawn dawn loh avangin ngaithla ṭha viau ang che u" a khabe dawmin a sawi chhunzawm a

"Zahngaihna tlem te in chang dawn a, court ah hian fair taka rorel a ni ang. Walzenor lalram chunga in thil tihsual ang zel in hmu ang" a ti a

"Ṭan tawh ang le" Lal chuan thupuangtu chu chhiar zawm turin a han ti a, a rawn chhiar ṭan ta a

"Walzenor sipaite man an duh lova, an lo bei let" a ti a

Lal in thu a sawi leh hma chuan tuemaw hi a rawn ṭawng a "Eng nge kan chan tur ni ta ang?" A rawn ti a

Naupang kum sawmpali bawr vel a ni, rang takin a kun leh nghal daih, a rawn ṭawng chhuah avangin pawi a ti hnuhnawh a ni ngei ang

Lal hmel ah chuan mak tihna a rawn lang a, vengtu zinga pakhat chu a zaizir a, mipui lamah a va kal a, an lo phu dual dual mai. Naupangte chu a va pan a

'Aw Lalpa, khawngaihin tihnat tir lo hram rawh' tiin rilru ṭawngṭaina ka lo nei a, "Aw Lalber" zam deuhin ka lo ti sap a, min rawn melh zawk a, ka hmulthi a ding sung sung

Naupangte chu a bâna chain vuahin mipui kal pelin Lal hmaah an rawn hruai a, chhuatah an ṭhingṭhit tir lai te chuan a hmai a dâng chhuak vek. Vengtu chuan naupang dar chu vuan in lehlam ah chem a keng a

Samuela lu an lak lai chu ka mitthla ah a rawn lang nghal zut zut

'Khawngaihin ngaidam hram rawh' ka rilru in ka ti mawlh mawlh a

Lal chu ṭhu ngil at in naupang chu chik em em hian a melh a "Sawi nawn leh rawh" khauh takin a han ti a

Naupang mit aṭang chuan mittui a rawn luang ngiai ngiai a, a kâ angin engemaw sawi a tum chu a ri chhuak thei lo

Lal hian dawhtheina a tlachham ve si a, ka khawngaih hle mai. A nunna in a tawrh phah ngei awm si a

****

Chhunzawm tur