Mittui a hul ang (short story) by Remruati Bawitlung (Haylor)

Story tawi te te emaw luanliamna emaw post na
Remruati (Haylor)
Posts: 680
Joined: June 22nd, 2016, 9:24 pm

Mittui a hul ang (short story) by Remruati Bawitlung (Haylor)

Unread post by Remruati (Haylor) » November 16th, 2019, 7:58 pm

MITTUI A HUL ANG

Remruati Bawitlung (Haylor)

" Puipui keichu science hi ka tui ve thlawt lo... "

Lk-a chuan a hma a Chemistry bu chhah zet mai en vung vung pah chuan a rawn ti sap a. Engmah sawi lo mah ila a ruk tak chuan ka beidawnpui rum rum tawh.

"a har lo lutuk ,IUPAC name te chu functional group i hriat chuan i hre nghal vek a ni mai " ka lo ti ve tak na a vawitam ka lo hrilh nawn tawh avangin a man pawh ka beisei hran lo.

"theih chu nise Journalist nih a Mizoram pawna zin bo daih ka chak "min rawn en vang vang pah chuan a rawn ti leh a.

"Lk...khatiang kha ngaihtuah tawh lo turin ka hrilh tawh che kha, ṭha deuh in kan zir anga i pass em em ang "

Ka thiam ang tawkin ka lo fuih ve a amaherawhchu a hmela lungngaihnate leh beidawnnate hi hmuh hmaih tum eng ang mah ila hmuh hmaih a harsa takzet .

"nangchu i vannei e... i duh duh i zir thei a, keichu ka pa thu hi ka hnial ngam lo chu a nih ber hi "

A kawchhung tawt lutuk tur chu a khat tawkin a han thaw chhuak leh hak hak ṭhin a, a tawrhna hi hriatthiam pui vek seng lo mah ila a hmel ka hmuh zawng ringawt pawh hian ka lo nat pui ve em em tho.




"keipawh ka duh ang diak diak in thil a kal bik hleinem... class-XII kan pass veleh hmun hranah kan zir daih dawn nia " fuih pahin phur hmel zeta ka tih takah chuan za lo zet hian min rawn nuih nghal suk a, ka sam rawn tuai thur zeuh pahin a lehkhabu bawk chu a melh lehnghal a.

Chutia IUPAC name tal man tir hram tuma kan lo in zirtir malh malh lai chuan in hnuai lamah thawm ri rum rum kan hriat thut avangin mak ti takin ka in melh nghal hra a, thil thleng chu hrilh chawp ngai lovin ka ring thiam nghal.

" ka pa a rawn haw tawh a nih chu... kan duhtawk tawh mai dawn mi ?"

A hlauthawng a ni tih ka hriat avangin hnial buai lovin ka lo bu nghat a,ka lehkhabu chu khup in ka bag ah min khung luh sak nghal nghal sawk sawk bawk a.

"ihh...naktuk ah ka pa rawn haw hma in kan zir leh mai dawn nia "

" aw le... kan inah kan zir ve thung tawh dawn nia " ka tih chuan ka mit ah tak chiang taka rawn en pah chuan ka kut chu a rawn hum vang vang a,la kal lo turin min duh viau mahse loh theih loh in ka haw a ngai tawh tlat si.

"rawn riak ve mai rawh "

" i mawl lutuk, min man chhuak anga sin " boruak rit lutuk tih zia awm nan ka lo fiam let zeuh a.

Min rawn nuih vur vur pah chuan a rawn kun hniam riai riai a ,zawi te in ka hmuia a rawn fawh vawng vawng hnu chuan a room atang chuan min kai chhuak a, inhnuai lamah kan in zui thla nghal a.




Nidang ang bawkin pa Rinawma chu ṭhuthleng ah ṭhu in rui hle e ti lo chuan zu chu a lo in thlit belh leh kerh kerh tawh a, chhuatah ah chuan glass keh them a awm nuai bawk a ,TV lah chu a volume a ti ring em em mai lehnghal .

" ehe... Puipui i rawn kal a ni maw? " Pa Rinawma chuan min rawn hmuh rual chuan polite fahran hian a lo ti nghal vat a.

" aw... haw ka lo tum chiah a "ṭha deuh hian ka lo chhang ve mai bawk a ,mahse ka ṭawng ri a hre zui tawh pawhin ka hre lo.

Vengkhata awm mah ni ila Lk'n bike in kan in chhoh na peng thleng chu min rawn thlah thlap a, a bak erawh step tlemte chhoh ngai a awm avangin a bike chu kawng sirah a han hung ṭha te te phawt a ,ka bag min khai chhawk sak pah chuan step ah chuan kan chho dun chhat chhat a.

"tunlai hi nu Marini ka hmu khat riau mai " ka ti chhuak hlawl a,a nu chanchin ka lo sawi chhuak ta kher kher hi ka inchhir leh hnuhnawh.

" nia ka pi te in lamah a awm phei rih a "a han thaw chhuak deuh hak a, a sawi tum ka hre nghal mai , a nu a tlan leh tawh tih na!

Engvanga hetiang thil hi zawt chut chut reng nge maw ka nih le? urghh!! Zosangpui thil hi ngaihtuah chiang hmasa ve ṭhin teh.

An chhungkaw chungchang hrim hrim hi min hrilh hreh hle a ni tih chu a awmdan aṭang pawhin hai rual a ni lo. Ni e, tuin nge mahni nu te tlan chungchang leh mahni pate zuruih chungchang bialnu te bulah sawi sawi duh ang.

Kan gate bul kan thlen chhoh chuan ka bag min rawn pek pah hian, "ka rawn lut lo mai ang, i nu in a hau leh palh ang che "kun lap chung chuan a ti chuai raih a.

Hetiang anga Lka meuh a awm lai hmuh hi a hrehawm takzet. Mipa a zawnga pa ber mai tia sawi hial, luhlul leh ngeng lutuk mahni ngaihdan pawh sawi chhuak mai mai lo in a hetiang anga a awm lap tawh hi chuan a rilru a hah thawkhat hle tihna a ni mai.

" zanah lehkha zir hma in ka rawn bia ang che " ka tih chuan a lo bu nghat a,a kal hma chuan "him deuhin in i thleng dawn nia "nuih sang pah chuan ka va ti leh hram a, ngawi rengin min rawn nuih leh vur vur tawh,a hmela hlimna tlemte rawn lang ve ser ser te pawh hi ka tan chuan hahdam huai na tham .

Lka nen hian kum hnih dawn kan in kawp ve tawh a, sikul khatah kan luh mai bakah class khat section khatah kan lo awmdun lehzel bawk nen kan in zui nasa in ka taksa peng pakhat ang maiah ka ngai hmiah tawh.




Pa Rinawma hi contractor first class kan tih mai ang kha a ni a, Nu Marini erawh Pharmacist a ni thung chutah Lka hi an fa nei chhun a ni lehnghal a ,a duh apiang a nei thei ti ila ka sawi sual lovang.

An che thei a ni tih chu tlang hriat, in chhawng lian tak tak nei in awhawm viau angin lang mahse Lka aṭang ringawt pawh hian an in chhung khur hrehawm zia leh an hlim loh zia a hriat theih.

Pa Rinawma hian nula a hruai luh loh leh engtik lai pawhin zu a rui reng a ,Nu Marini lah a tlan reng emaw tih mai turin inah a awm khat!

An fapa hi an enkawl lo hle e ti lo chuan a mimal nun an control sak leh viau lawi sia, a nih chak em em Journalist pawh ni thei lovin Science an lak luih tir a, a nu leh pa te avangin Lkan hun harsa tak a tawng mek zel chu a nih hi .A harsatna pawh hi an hmuh sak leh tawp nang .

Tlaia ka lo hrilh lawk tawh angin Lka chu lehkha zir hma in ka va text ta ngei a mahse darkar khat hnu ah pawh min rawn reply lo.

Ka message a hmu lo a nih ringin ka va text ṭha leh ngat a, min reply har em avangin ka ngaihṭha lo chuan ka va call ta nge nge a chutichung pawh chuan a pickup chuang lo.

" Lallawmkim i van chak dawn lo tak ,eng nge maw tal rawn sawi ve tal tur che nia "tih hmuk pahin ka ṭhu tum bar a.Ring ngam chiah lo mah ila be tu a ngah ṭhin si a hmeichhe dang min biak san a nih te ka ring rum rum tawh.

Thinrim ru hle mah ila lehkha zir a ngaih miau avangin naktuk a sawi fel ah ka dah ta ringawt a, amah avangin ka zir ṭhat loh phah lehnghal.

_________________________________________

Assembly kan neih lai techuan a khat tawkin Lka chu ka zawng kual deuh reng a,mahse vawiin chu sikul a rawn kal dawn lo pawh a ni mahna a hmel hmuh tur reng reng a awm lo.

Nizan aṭang tawh a ka message a reply theih loh chu sawiloh tun thleng pawha a hmel takngial pawh a rawn lan theih loh avang chuan a hma aiin ka lungawi lo zual a, nuih pawh ka nui hlei thei tawh lo.




Darkar chanve dawn ni sa hnuaia a kan din hnu chuan Assembly a zo tawh dawn emaw tih nak alaiin Principal chu a tiang sei zet a hman thiam ngei mai nen chuan a rawn lang hlawl mai!! A hnu lawka Lka leh a ṭhiante pathum hian an rawn zui ve bawk a, ka lo hlauthawng nghal kher mai!

Principal hian thu puan tur pawimawh emaw thil thleng danglam bik emaw a awm te a nih ngawt loh chuan a rawn in lan ngai zen zen loh avangin kan hlauthawng chuan kan lo in en kual hrak hrak hlawm a, kei ang tho in midang pawh an lo hlauthawng ve tho a ni tih a hriat theih.

"Sikul in rules tamtak a nei a zawm harsa tak tak erawh pakhatmah a awm lo. He sikul ah hian i rawn lut tawh nih chuan dan zawm kim ve tura beisei in nih laiin heng mite hi chuan kan sikul dan bawhchhia in bathroom ah meizial an lo va zu ru pawt pawt a,zirtirtute leh Principal hi engah mah min ngai lo tihna a ni. Chuvang chuan an chungah hian action na tak lak a ni ang. Lallawmkim nang ngat phei hi chu ka
vawithum manna i ni tawh "

Principal chuan chiang fiah fel faih deuh hian a puang nghal dap dap a,Lka a lo awm ve leh zel bawk nen midang ho chuan min rawn en hrek hrek hlawm a, ka zak lutuk chu principal thusawi chhung zawng pawh khan ka lo ip char char.

Assembly-a zawh chuan class-a ka lut tur chu Lka chuan min rawn pawt let nghal dawrh a, a kut paih thlak pahin ka theihpatawpa rum hian ka lo melh let hrep ringawt.

"Puipui meizial kha ka zu ve miah lo a nia... ka ti tak tak "

Midang zik nuaih nauh na karah chuan a thiam ang tawkin a han in sawi thiam ve tak na in ka mit ka lo chet kual ralh duh chauh.

"min rawn zui rawh " tih pahin midang tam lohna laiah chuan ka kai phei nghal dawr dawr a, kan inhnial buai hrep takin a zahthlak dawn emai.

"anih i zuk si loh chuan engtin nge an man theih che, zu tawh lo turin vawi engzat nge ka hrilh che pawh ka hre tawh lo, bakah ka message leh call pawh i chhang duh lo lehnghal "

"ka ṭhiante zuk lai ka lo nghak alawm, chuan nizan kha chu ka tihpalh takzet zet ,reply che kha ka duh lutuk "

" a nih i hmai pilh hrep hrup te leh duk thluah te hi engtin nge i sawi fiah leh dawn... i in sual leh tawh em ni? " a thusawi hi awih tur nge awih loh tur pawh ka hrethiam tawh lo, ka rilru hi a buai nuai a ni ber.

"hei chu... englo a nia " a hmai duk kulh mai khawih pah chuan a rawn ti sap a.

"i insual tih min hrilh miah suh " ka lo ti leh hmak tawh .

" ih.... ni... nizanah ka pa nen kan in tibuai a " a tih rual chuan ka kâ hup pahin ka lo meng phawk nghal kawk a .

Lalpa leh!! an in tibuai leh tawh amaw!Heihi a vawikhatna pawh a ni tawh lo!

Heivang hi a lo nih ngei dawn hi min reply theih loh na chhan.

Ka thinrimna te ve zawng zawng kha chu vawilehkhatah khawngaihna in a rawn inthlak nghal thawk a, a hmel ngui bam mai ka hmuh phei hi chuan zawh belh châkna pawh ka nei lo. Engmah hrechiang mang lova a chunga ka lo thinrim ve ringawt avang khan ngaihdam dil hial te ka duh.




Kei hi chu ka heti tlat zel, ka rilru hi a nem leh lutuk a ka thinrim rei thei lo chu a nih ber hi. Engpawh chu nise hmeichhe dang a be lo hlauh a, ka ngaih a ṭha lehnghal em em ringawt tawh.

" Lk ka tih.... "

" Zosangpuii leh Lka kha class ah lut tawh rawh u " Miss Helen ,kan english teacher chuan min rawn pawt chat daih a, kan pahnih chuan kan in en hrak a engmah sawi lovin class lam panin ka in zui phei nghal a .

" Lk.. lo ding lawk teh "

Kan lut tur chu Miss Helen'n Lka alo koh pen leh daih avang chuan ner sawk pahin ka luhsan daih a, ka ṭhutna aṭang chuan Miss Helen-i thusawi hriat tum chuan a hmuiphun chu ka lo thlithlai ran thung.

Lka a rawn luh hnu chuan a hmel chu a ngui sawt a chau deuh hmel te pawh a pu . A ṭhutna lam pan hmasa ta lo chuan ka bulah chuan a rawn ṭhu thurh a, Miss Helen in eng nge a hrilh tih chu hriat chak hmel zet hian ka lo zawt vat bawk .

"Banah a inah kal lawk turin min tia " a ti chuai raih a, a ni ai ai in ka lo lungngai zawk.

Miss Helen-i tehhrep hi a huangtau sawt in a zakthei lo mah mah,a awmdan hi zirtirtute awm dan tur pawh a ni lo.

" kan pahnih in kan kal dawn nia "

" Puipui... keichu school sawn daih ka chak "

"chutiang ngaihtuah suh, kan in exam ṭep tawh hi, he school ninawm zet hi kan chhuahsan ṭep tawh " ti hnual zawng nilo in ka thiam ang tawk in ka lo fuih ve ṭhin a, a chang hi chuan a thaw ve huai te hian ka hre ṭhin .

" saw Sir a rawn kal tawh i ṭhutna ah va let tawh rawh, tlaiah chuan kan pahnih in kan kal dawn nia " tih pahin a necktie sawi zet chu ka siam ṭhat saka, hreh tak chungin a in sawn phei nghal hna hna bawk a.

Miss Helen-i hi kan zirtirtu mah nise a hmel ka hmuh zawng ringawt pawh hian ka luak a ti chhuak hluah hluah, Class-XI aṭang tawh khan Lka hi a ngaizawng tlat lehnghal a!!

In awih lo maithei mahse thudik a ni miau sia, vawikhat phei kha chu a in a thlah turin a ngen tlat a ,a in rin loh laiin a lo fawh tawh mai bakah muttpui ah te pawh a thlem tawh nghe nghe .

Lka lah hi mi ngawichawi chi a lo ni bawk nen miss Helen-i hian a sawi chhuak dawn lo a ni tih a hriat chian em avang hian a huangtau zual a, hrehawm ti tak chungin rei tak chhung kha chu amah in a lo tuar char char tawh .

Kei ngei pawh hi min hrilh na ala rei lo nachungin midang kâ aṭangin ka lo hre fo tawh ṭhin a,min hrilh tirh pawhin ka hriat hmasak ber ṭum ang em em kha chuan mak ka ti tawh lo . A chhungte leh midang hrilh a phal miau loh avangin kan pahnih in kan zep ngawt ngawt mai ringawt a mahse Miss Helen-i hmel ka hmuh apiang hian sawi chhuahsak vek te hi ka duh rum rum ṭhin.




Lka hi pianṭha leh hleitling tak a ni a, alo hmelṭha tel lehzel bawk nen hmeichhia hi a zûnah kan uai huai huai mai chu a nih ber hi, a thlavang ka hauh luatah keimah lehzel pawh hi huat ka hlawh nasa khawp mai.

Classroom kan phiah ni a nih avangin class banah midang pathumte nen kan awm khawtlai bika, Lka ve thung chu principal in a koh avangin office-ah a kal daih thung.

Hmun kan phiat zo chiah ka bag ka en fel lai vel chuan Lka chu rilru hah hmel zet hian classroom-ah chuan a rawn lut chhat chhat a, bag ah ṭhat paha ka hawi let chuan zat loh hmel zet hian min rawn nuih suk a,eng ang pawhin hlim hmel put tum ve teh mahse a mitmeng erawhin a hlim loh zia a thup bo ve thei hauh lo thung.

" Engtin nge a lo tih che? " Principal in a a tih dan chu ka lo zawt nghal vat a ,khik deuh vur vur pah hian ,"Rinliana khian engtin mah min ti thei hleinem " uang deuh tak hian a lo ti a, ka awih lo lutuk chuan ka lo ner khum nawng nawng mai.

" tak taka cheng zanga min fine tir a, pawisa an duh bawka ka zuk loh thu ka hrilh ka hrilh pawhin min fine tir ta tho a nih kha "
Rs 500 lawih fine dawn mahse hei aia tam hi a lo fine fo tawh ṭhin avangin mak ka ti hran lo, a nu leh pate an koh loh chhung chuan a pawi lo turah ah ka ngai.

"midang zuk lai pawhin lo awm ve tawh suh aw" ka tih chuan thuawih takin a lo bu nghat nghat a, "a nih chuan Miss Helen-i inah chuan kan kal dawn ta em? " ka tih zawm zat a, nuih tawp riai riai pahin a tukhum chu a nuai nghal nauh nauh ringawt.

" ughh... Nichin khan kan in hmu a, ka darah rawn khawih a tum a ka rawn kal san daih "

" Enga!! " chunu phiangsen chu,a ti mah mah tawh a ni! Lka hi mualpho tel ve zel dawn lo se chuan Principal bulah ka report tawh ang mawle.

Engpawh chu nise kan in zui rei tawh bawka thil zep tlat emaw thup tlat emaw ang kha a ching tawh lova a zia hlauh.

"engmah a thleng lo min tawk hman lo hrim hrim " min bengdaih nan a ti ve tak nain kei aiin amah zawk zawk hian hrehawm a ti tih ka hre ve kar.

"a koh leh che chuan i nu leh pa emaw Principal emaw i hrilh ang tih min tiam rawh " hrehawm ka lo tihpui em avangin ka ti ta ringawt a, aman hrilh dawn kher lo mahse keiman ka hrilh dawn avangin lo hre lawk ve reng reng rawh se.

" aw le...thinrim tawh suh chuan Kfc ah ka treat ang che " a rawn ti nghal sap a.

Hepa tak hi chu aw...engtin nge mi hian sual an tih theih zawk le? midangte a ngaihtuah zia leh mi pawisawi lo tak a ni zia hi mite hian min hriatpui ve se ka ti takzet.

_________________________________________

☆12:30pm☆

Ka chhungte mu vek tawh mahse lehkha ka la zir avangin ka la meng hram hram a,mu duh tawh hle mah ila Lk'an a mut dawnah min rawn biak tur thu min lo hrilh lawk vek tawh avangin nghah pahin in tih harh nan a khat tawkin ka tui inchhawp sa chu ka in deuh reng a, phone lah ka en bang chuang lo.

" zanin hi avan zir rei em em? " mutsan daih ka hreh ve si a, ka men luih na lamah ka lu te hi a na bûr tawh.

Chutia muthlu lek lek a ka lehkhabu ka lo en vung vung lai chuan ka phone a rawn rik thut avangin ka phu deuh zawk a, ka harh nghal kawk bawk.

Lka a nih ringin rang tak leh phur takin ka phone chu ka han en nghal vata, Emily message lo ni rengin, Lka a nih loh avangin phur lo zet hian ka han hawng a.

*Pui...news kha i lo hre ve tawh em?* tih ringawt hi min rawn thawn a.
*Ai hrelo ,eng nge?*tiin ka lo reply nghal , a rawn sawi ho leh ngawt ang chu.

Reiloteah ah Emily message bawk chu ka dawng lehnghal a, nuih vur vur paha ka hawn nak chuan ka meng phawk nghal kawk a, ka nui tawp chiang kher mai!!

*Miss Helen in Lk'n khawih a tum thu vel in a puh kha, engmah i lo la hre ve lo em ni? " tih hi a lo ni a, min ṭhawn em avangin reply mai nachang pawh ka hrelo.

Engkim hriat nghal vek ka duh avangin kut khur der der chung hian message chu ka han type leh a, ka type zawh hmain rin loh lutuk maiin Lka call ka dawng hlauh!! Ka pickup rang kher mai .

"pawnah rawn chhuak rawh " a rawn ti ta thut mai,ka ṭhu ngil nghal zawt ringawt.

"enga!!? "

" tunah in in kawtah ka awm "

"eng... enge hetah i rawn tih? bakah ka rawn chhuak thei lo tih i hriat kha "

"i rawn chhuak lo a nih chuan ka rawn lut dawn " a tih rual chuan a awm tak tak nge awm tak tak lo fiah tumin tukverh aṭang chuan ka zuk bih thla dek dek a, a lo awm tak tak a nih chu!!

Nidangah hetiang hian a awm ngai si lova zanin hi engvanga hetianga awm thut nge maw a nih le? A nih loh pawhin Miss Helen-i vang pawh kha a ni maithei .

" lo awm rawh ka rawn chhuak ang "tih sap pahin phone ka dah nghal a.

A rawn lut leh duh tak tak dawn tih ka hriatchian em avangin buaina a siam hma a chhuah mai kha a ṭhat zawk mai bakah a rilru a hah a nih ka rin avangin a bula awm hrim hrim ka duh .

Zanrei a chhuah ruk hi ngaihdan ṭha tak ni lo mahse pawnah min lo nghah reng tawh miau avangin ka huaisenna zawng zawng sawmkhawm in leh inchhungril khur der der chung chuan ka chhuak thei ta hram a, ka chhungten min rawn man chhuah loh hram ka beisei .

Kawta ka va chhuah phei nak chuan thatchhe zet hian a bike ngheng chung hian a lo ṭhu kun lap a, min rawn hmuh rual chuan min rawn nuih vur vur a, min rawn pan hnai nghal bawk a.

"Eng nge i hriat a tun ang zan reiah te rawn kal tur em ni? " a engamah hma in ka vin nghal tun tun a,engmah hre lo anga awm hram hram ka duh .

" ka hmu chak lutuk che a chuan zanin hi i va chhelo em em ve " a khabe khawih neuh neuh pah hian a rawn ti kher a,a rukin ka lo nui pat pat ringawt.

Lka hian hetiang zawng hian vawikhatmah min la fak ngai miah lova,tunataka min han fak ve ngei hi a lawmawm lutuk a ka bengdar te pawh hian lawmthu min hrilh duh hial ang chu.

" eheu!.... i rui elaw ?!" a mizia ah a lang lutuk si lova, zu rim hre lo ilang chuan a rui tih ka hre miah lo ang. Hun rei tak chhung a in tawh si lova engvanga in ṭha leh nge maw a nih le?

"rui ṭep ,tlemte bak ka in lo "

"khawia mi nge i neih? Engvangin nge i in leh? " ka lungawi loh em avang chuan a zawh theih ang ang chu ka zawt nghal zung zung a, a nin hmel em em lehnghal.

"ka pa zu ka ru chhuak a,ka ti tak tak tlemte chauh ka in " a in thiamlo leh hnuhnawh aniang en pawh min en ngam lovin a kun tlat ringawt.

"i in tawh loh tur thu kha min tiam tawh sia engahmah min lo ngai miah lo a ni maw? " a tam emaw a tlem emaw pawh nise a in tho alawm.

Na taka hauh duh viau mah ila a in chhan leh heta a rawn kal nachhan hi chiang taka ka hriat ve kar avangin ka hau thei thlawt lo ,hauh a hnek in ka hnuk a ti ulh zawk .

" ih... tlai ah khan ka nu a rawn haw a, eng nge min hrilh i hre duh em? " a hmui liah zeuh pahin lei ṭhil chu a chhir chhat chhat a,sawi hreh hmel zet hian ," ka pa nen an in ṭhen tur thu min hrilh asin "a tih hul hak ruala a mittui rawn far fap ka hmuh chuan ka khawngaih lutuk chuan va kuah thlawp a ṭahpui hawm hawm mai ka nap.

Tuna a buaina tawh pawh hi a rapthlak tawh viau laiin a nu leh pate lehzel pawh maw!!? Miss Helen in a puh dan chungchang vel pawh kha a nu leh pate a la hrilh hauh lo ang le.

" pawi... pawi ka ti lutuk "

A tawrh hi a na em a hnem tu tur zawk ka nih laiin keimah zawk hi ka lo lungngai a,Lka a mittui meuh a tlak takah chuan insum a harsa takzet. Tahbelh tih takah ka mittui lah chu a rawn lung thla nghal ngiai ngiai a,a buaina te sut kian sak turin tih theih lah chu ka nei der bawk si lo.

" engkim a ṭha leh mai ang "
Ka mittui a rawn hmuh hma chuan amah hnungchhawn zawng hian ka ding daih a ,a ruk in ka mittui chu ka hru nghal zeuh bawk.

" ṭha vek se ka ti takzet " rawn tih sap pahin hnung lam aṭangin nghet tak hian min rawn kuah nghal vawng vawng a, a hmai chu ka darah a hnim tlat bawk.

"Miss Helen-i chungchang vel kha a dik lo tiraw ?" min hrilh hun nghah duh viau mah ila a thup bo leh mai ang tih ka hlauh avangin ka zawt ta ringawt a .

" i lo hre tawh a ani maw" tih bak in min chhang lo.

Lka hian a duh loh em avangin a thlemna te kha a lo hnar sak anga, Miss Helen hi mi nasa tak alo ni bawk nen a thinrim chuan khatiang khan a puh ta mai a nih ka ring .

"Puipui....boruak ka hip luh zawng ringawt pawha ka thinlung rawn na vawng vawng mai ṭhin hi a tih reh dan khawngaih takin min hrilh rawh " a rawn thawk lum ham ham ruala ka dar rawn huh dap ka hriat chuan ka kun nghal lap a,ṭap chhuak lo turin ka in sehruh fan fan bawk.

"Engkim ti thei Pathian kan nei alawm, a ni chuan kan tawrh zawh loh tur min tawrh tir ngai hleinem " pangngai taka ka sawi chhuah theih avang chuan ka in awih lo hial zawk.

Keimah zawk zawk hian Pathian hi ka lo dempui a, mi pakhat tawrh atan chuan a nasa mah mah tawh in ka hria. Engthil sual nge a tih bik ang le hetiang em em a a tawrh nasat?

" ni e , naktuk zingah chuan engkim a lo ṭha leh vek mai ang chuan lungngaihna awm tawh miah lovin hun ka hmang ve thei tawh bawk anga " amah leh amah a inhnem zawng te chuan ka insum thei tawh lo chuan ka lo in hnit khum nghal hlawp hlawp ringawt a.

Surprise checking an neih avangin kan vai chuan pawnah min chhuah tir dial a,phal loh thil engmah pai lo mah ila ka hlauthawng in ka khur deuh der der renga, Lka erawh rilru hah loh hmel zetin ipte zen chung hian ka bulah chuan a lo ding ngât thung.

"Lallawmkim hetah rawn kal teh " Sir Mawia'n a rawn tih chuan mak ti takin kan pahnih chuan kan in en nghal haw a, midang pawhin Lka chu an rawn en nghal ṭhap bawk.

"Engvanga cigratte hi rawn pai leh nge i nih? "

Class zawng zawng hma ah chuan a ti ta piap piap mai, ka lo khawngaih lutuk chu ka lo ip nghal chawih chawih ringawt.

A nihna takah chuan vawiin pawh hi sikul kal tum miah lo kha a nia, ka nawr luih nasat em avanga rawn kal hram hram chauh a ni a, ka lo sawm lui ta kher kher kha ka inchhir leh hnuhnawh.

" ka ta a ni lo " a ni lah alo ngeng ve bawk nen a rul tawk lek hian a lo ti ram hmaih a.

" a nih chuan engtin nge i bag ah a awm theih? "

" ka hre bik lo, midangin an dah aniang "

" hahh.... Principal i hmachhawn leh ngei a ngai dawn a nih hi, kha i sam te lah chu meh a hun tawh a nih kha. Miss Tete hei Lka hi lo fine tir ang che sam a met lo ania "

Sir Mawia chauh nilo zirtirtute ho hrim hrim hian Lka hi an ngaithei lo bik riau emaw tih mai tur hian hnehsawh deuh deuh hian an ti bik ziah ṭhin a,chutah Miss Helen in dawt in a lo puh lehzel bawk nen hrehawm a ti viau ang le .A chang hi chuan midangte pawh hian an tih dan hi awm ang lo an tih ṭhin zia an sawi khawm ve nak nak ṭhin.

Zirtirtute ho office-a an chhoh vek hnu chuan Lka chu ka va pan nghal chat a, thil awmzia ka zawh pawhin cigarette kha a ta a nih lo thu leh a hriat loh laiin a ṭhianpa John'an a bag ah a lo dah ruk thu bakin min chhang lo. A insawifiahna chu ka lo awih leh hmak tawh a chhan chu a thiam loh pawh nise dawt min hrilh ngai tlat lo.

Class-ah lut hmasa lovin ka ṭhiannu nen zung turin zun in ah kan kal hmasa te te phawt a minute thum pawh kan awm tling lovang tihin kan let leh nghal a ,chumi chhung lek chuan kan class room kawtah chuan class dang ho te nen lam an lo awm khawm luih luih a, thil thleng a awm leh tawh a ni tih hai rual a ni lo.

" Emily engthil nge thleng? " ka ṭhutpuinu chu ka zawt ta ringawt a.

" Lka leh John-a te an insual alawm, Sir Hming'n a rawn ṭhelh a office lamah a phih chho nghal dawr dawr mai " zep miah lovin a lo ti nghal sam sam a, ka hlauthawng lutuk hi ka lungphu pawh a rawn in thum rawn nghal dawt dawt mai.

"Puipui ,Lka leh John-a te an suspend an ti ka la hrechiang bik lo " Jenny chuan rawn tlan luh hlawk hlawk pah hian a rawn ti a, hethil zet chuan min ṭhawng chiang kher mai!!

" ka rawn let leh vat ang " thil hriatfiah tum chuan ka tlan chhuak nghal daih a, office ah chhoh ka tum lai takin Lka nen kan in tawk hlauh!

" an Suspend che mi? " a engamah hma chuan ka ti chhuak nghal phawng a, min chhang lo mahse a ngui danah hian a dik a ni tih ka ring thiam nghal mai.

" vawi engzat nge ka hrilh tawh che pawh ka hre lo ka thusawi hi i ngaithla ngai lo reng reng " ka lo ti lehnghal tun tun a, ka thusawi hi awih mai se chuan an suspend lo nimai tur,a hma ka ngaih vang zawk a ni.

"man chhuah a hlauh avangin ka bag ah cigratte alo dah ru a chutah inthiamlohna nei hauh lovin Miss Helen-i nen kawp che angin min lo puh vei a nih kha "

" Chuan an suspend phah bawk che ,engtin nge i tih dawn? kan in exam ṭep tawh hi " ka thinrim lutuk hi au tawn tawn mai ka duh, a thinchhiat em avang hian a hma hun a ti chhe vek dawn a nih hi. Thil dang vangin a chungah hian thinrim ka tum ngai lo mahse a luhlul em avang hian ka thinrim takzet .

"Principal in ka pa a hmu duh a mahse ka pa hmuh tir ai chuan sikul ka sawn mai ang " a lo ti hmak a nih chu!! duhthlan tur dang a nei loh lai pawhin ala chapo em em tho.

" Enga?!! i fiamthu em ni, Lawmkim engthil mah hi i ngaipawimawh tak tak ngai dawn lo a nih hi ,chutah mu thei lek lovin ka lo hlauthawnpui em em ṭhin che asin."

" min ngaihtuah suh ka tih tawh kha "

" hahh... i inthlak danglam theih ka lo ring ṭhin a mahse tunah chuan i lakah hian beiseina chhete pawh ka nei tawh lo. Nangmah avanga rilru hah reng leh hlauthawng reng reng a awm hi ka peih tawh lo ,ka kham tawh lutuk che i bulah hian ka awm peih tawh lo " ka ti nghal tawn tawn a, ka mit te lah chu a sen vek tawh.

Hetiang anga ka tih tawp loh chuan engtik ah mah a in thlak danglam ngai lovang .

" min kalsan i tum em ni? " zawi sap hian a rawn ti a, ka hre thei lo lek lek zawk.

"Hlim deuha awm ka duh tawh " tih hmak pahin ka in her nghal a, ka mittui rawn tling nghal pum chu tih tlak loh hram tumin ka han khap zui fak fak bawk a, classroom lam panin ka tlan let nghal nal nal bawk.

Sikul aṭanga a haw daih avangin vawiin nilengin ka in hmu tawh lova, tukin zinga kan in biak bak kha chu phone ah pawh kan in be leh tawh lo hrim hrim.

Lehkha ka zir zawh chuan dar12 pel tawh mahse mut pahin ka phone chu ka thlek deuh chhen a,Lka message ka beisei a ni zawk mah aniang chu. Vawiin a ka thil sawi kha ka thinrim laia sawi mai mai ka nih avangin ka ti tak tak lo a ni tih hrilh duh hle mah ila a ni pawhin min rawn be bik lova ,va biak hmasak bik kha ka tum bik hauh lo.

" pawilo min rawn biak loh chuan naktuk ah ka va be hmasa mai ang " tih nauh nauh pahin lungawi lo deuh chung hian ka mu ngat a, reiloteah ka muhil nghal vat bawk.

" Puipui.... Puipui" ka nu in min rawn sawi nawk nawk avang chuan meng siar siar pahin ka phone chu ka hmet eng nghal vat a, Dar4 pawh ala ri si lova engvanga min rawn kaitho hma em em nge maw a nih le?

" Eng nge ni ta?" ka meng ṭhat theih loh avangin ka mit chu ka han nuai nawk nawk a.

" ih... tun lawkah khan Lka a boral a nih chu !"

" maw? " min ṭhawn em avang chuan ka meng phawk nghal kawk a, ka mutchhuak zawng zawng te pawh a reh nghal vek.

"I nutei sawi dan kha chuan a room ah a in awkhlum a tia ,tunah i pa pawh kal turin a in siam mek " ka nu meuh in tun ang zing karah min rawn hrilh tawh chuan fiamthu mai mai a ni thei bawk si lo mahse he khawvela awm ve tawh lo tur atan chuan awih a har mah mah.

" i kal ve dawn em? i kal duh dawn chuan i pa rualin i kal thei ania " ka nu aw pawh chu a khur der der a, kan inkawp a ni tih a hriat ve vek avangin a ni pawhin mak a ti ve hle a ni tih a hriat theih.

" aih dawn lo " tih hmuk pahin blanket chuan ka in khuh leh hmak.

Engvangin nge ka kal ve ringawt ang, a la thi reng reng hleinem. Vawiin ah pawh ngaihdam dil turin thutlukna ka siam fel vek tawh a min kalsan daih thei lo hrim hrim. Nilo,heihi ka mumang pawh alo ni maithei asin.

Ka nu in room a chhuahsan hnu chuan ka phone chu hmet eng nghal in class group a message lo awm ṭeuh chu ka hawng nghal a, tupawh mai chuan 'Lk RIP ' tih leh thlahna thu an ziah te chu ka chhiar thlak zel takah chuan Lka hi he khawvel ah hian a awm ve tawh lova heihi mumang nilo in a tak ngei a ni tih chu ka hrefiah telh telh a chutichung pawh chuan ka la awih phal chuang lo.

Mi luhlul ve ngang tih takah Lka boral thu hi ka awih duh miau loh avangin a vuina ah pawh kal lovin ka birthday a a teddy bear min pek kuah ṭai chung hian melh ngai melh vung vung pahin ka khumah chuan ka ṭhu nileng ṭhak a,a vuina ah ka kal ngam lo a ni zawk mah, kumkhua a mangtha tur atan chuan ka la phal lo.

" ka haw lutuk che " min kalsan daih avang chuan ka han ti leh ringawt ṭhin a, ka mittui lah chu tlak a hnek in a hul hiau a ṭah chhuak hle mahila ka ṭap chhuak thei hauh si lo .Ka awm zawn na lutuk hi ka han dawm leh vang vang ṭhin a ṭap thei ngat ila chuan ka rilru tawt lutuk te pawh hi a zia ve deuh mahna.

He khawvel hi hrehawm ilo ti viau a nih pawhin keipawh hian hrehawm ka ti ve tho asin, nang lehzel in i hmachhawn ngam lo a nih chuan kei tehlul hian engtin nge ka hmachhawn ve tak ang.Ka hriat loh in i rilru hahna tamtak i zep tih chu hre tho mah ila mahni nunna meuh ti tawp duh tur khawpin i rilru a hah a ni tih hi engvangin nge min hrilh mai loh?

" ka haw lutuk che, i aw vawikhat tal hriat leh ka la chak asin ,rawn let leh mai rawh mangṭha tih takngial pawh min la hrilh loh kha "

_____________________________________________


☆Ni thum hnuah ☆

Ka nu in Lka a ral dawn avangin hreh viau mah ila a tawp na atan tiin ka nu chu ka zui ta nge nge a, chaw mumal ka la ei loh bakah ka la mut mang loh avangin ka taksa chu a chau
in a zawi vek tawh a chutichung pawh chuan ka ril a ṭam in ka mut a chhuak thei chuang lo.

Kan kal hun lai tak hi chaw ei reh hun lai nih avangin tu vakmah an lo awm lo hlauh a, mi tam lai chu nise ka taksa hian a zo lo mai ang.

"Puipui in rawn kal thei a ni maw? " Pa Rinawma ka hmuh zawng ringawt pawh hian ka thinlung hi a rawn na nghal vawng vawng a,Lka hmela rilru natna tamtak ka lo hmuh ṭhin kha min hriatchhuah tir nghal zawt zawt mai.

Nu Marini leh Pa Rinawma ten min biak pawh chuan ka lo bu nghat ringawt zel a, ka nu in rang takin min lo chhan sak nghal vat ṭhin a.

Ngatinge pawh ka hrelo Pa Rinawm leh Nu Marini te hi ka haw tlat peka, ka hmuh zawng ringawt pawh hian inhum ruh ngai khawpin ka thin a rim a, Lka an tih dan te leh an enkawl dan vel te kha ka hre chhuak lo thei ṭhin lo.

" Puipui ,Lka puan hi i duh ber i la dawn nia " Nu Marini bawk chuan puan an dahkhawmna bag chu ka hma ah chuan a rawn dah a, khawih pawh tum lem lovin ka en vung vung ringawt.

"thil thleng hi i hrethiam lo viau ang tih chu ka hria mahse Lka khan hetiang tih duh tur khawp hian rilru hahna a nei tih pawh ka lo hre lo reng reng " tih pahin Nu Marini chu a ṭap nghal zawih zawih a, a bulah Pa Rinawma chu ngawi rengin a lo ṭhu ve bawk a.

Nu Marini tap lai te leh Pa Rinawma lungngai hmel te chu ngawi rengin ka en renga, tawng chhuah loh tum teh mah ila ka insum thei tawh thlawt Lo.


"Nu Marin engmah I hre reng nang" ka ti chhuak phawng ringawt.

Inchhunga awm zawng zawng ka nu pawh tiamin mak ti tak hian min rawn en ha hlawm a, mahse Lka tana tawngchhuak ka nih avangin ka zak duh bik Lo.

"vawikhat pawh in fapa ngaihdan leh rilru hahna te hi i zawt ngai tlat lo alawm, a ni chuan engtik lai pawhin a ngaihtuah reng ṭhin cheu asin.A ngaihtuah ang cheu hian vawikhat tal ngaihtuah let ve ni ula chuan in fapa hi hlim takin he khawvel ah hian ala awm ang."ka tih zawh rual chuan Lka a boral hnua a vawikhat nan ka mittui chu a rawn tla nghal zung zung a, ka nu in min lo dan tum teh mahse ka zam mai mai dawn tawh lo.

"A nihna takah chuan Lka hi keini ho hian a ni that ni!, kan fel lutuk avangin kan kiangah chuan a leng ve lova ,kan ṭhat em avangin a ni chu a in sit ṭhin a asin. Sawisel bo kan nih hlawm avangin a ni chuan kan kianga awm ve chu hrehawm a ti a,thih hial a thlang ta zawk a nih hi.

Vawikhat tal a ngaihdan te leh a rilru te kha hriatthiam pui ve ni ila chu kan zingah hian ala awm ve anga ,hlim takin a nun a hmang ve ngei ang" ka sawi zawh rual rual chuan pawnah ka tlan chhuak nghal daih a ,car-a ka inkhung hnu chuan insumna tel hauh lovin ka ṭap chhuak nghal hawm hawm a, ka taksa peng tin te hian a ngaiin rawn let leh se ka ti takzet.

Ka rilru a thil awm zawng zawng ka sawichhuah vek takah chuan ka thaw nghal huai a ,a hma daih aṭang tawh khan huaisenna lo nei ni ila chu Miss Helen khan dawt in a puh lo anga ,A nu leh pate pawhin tlem talin an ngaihsak phah bawk ang. Mahse ka dawihzep avang leh hmingchhiat ka hlauh luatah thudik chu ka zep pui zela a tawpah phei chuan ka taksa peng pakhat ang maia ka lo ngaihthin-a ngei kha ka chan phah ta a nih hi .

"Engkim ka sawi chhuak vek asin " nuih luih sek pahin leh in chhuang takin van lam chu ka thlir chho vang vang a ,Lka pawhin van aṭangin min rawn nuih vur vur pah hian 'i ti ṭha e " a lo tih ve ngei ka ring .

Lk boruak i hip luh apiangin i thinlung a na ṭhin i ti tiraw? Lungngaihna awm tawh lovin hlim takin hun i hman duh thu kha min hrilh a tunah chuan mite endawng leh hmuhsitna awm tawh lo na ah chuan thlamuang takin chawl la,vanramah ka hming ilo hre tawh lo a nih pawhin Angel te nen min lo hmuak tho rawh aw.

THE END
°treat people with kindness°
(fakna hi hmeh theihnghilh Lo ang u aw ...xoxo)

(Kan fanu ang bawkin kan fapa te pawh hian sexual harassment an tawng ve thei tih hria la ,i fanu i ngaihtuah ang chiahin i fapa pawh thlithlai ṭhin ang che. Hmelhriat loh te laka an him loh chu sawiloh hostel, school leh zirtirtute lakah pawh an him zo tawh lo a ni tih hria la engpawh tawng thei vek kan nih avangin i fanu/fapa in thil a hrilh ngam loh khawp che in in hmuam up suh ang che.

Kan fate hian eng nge an tih rilru hahna an nei em tih te thlengin nu leh Pate hian thlithlai I tum bawk ang u)



Link:
BBcode:
HTML:
Hide post links
Show post links

Secret writer
Posts: 1
Joined: March 13th, 2020, 1:37 am

Unread post by Secret writer » March 13th, 2020, 1:46 am

Mittui a hul ang tih hi youtube ah chhiar i phal em le

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)