MASI KAN URLAWK ALAWM LE..!! By M Lusei Palian.

Story tawi te te emaw luanliamna emaw post na
TMAWII
Posts: 417
Joined: May 18th, 2018, 8:29 am

MASI KAN URLAWK ALAWM LE..!! By M Lusei Palian.

Unread post by TMAWII » December 14th, 2019, 9:32 pm

MASI KAN URLAWK ALAWM LE !!!

M.Lusei Palian


Episode-1



Thingtlang rawlthar han nih chuan engtik lai mai pawh hian competition kan bei reng mai hi a nia. Zo leh zo lovin tui ṭinhnih kan kawt a, tlangval tih dan kan entawn angai miau mai si a. Kan aw te pawh a lo englo pawr aw ve ṭan miau mai si a. A hun ve tawh a ni mahna. Kan naupan laia kan Boss U kunga tho kha kan hotupa chu ala ni rih a, han thlak tum ṭhin viau mah ila, a fing phian si a, kan Boss hi kan thlak hlei thei lo chu a ni. Masi a hnai ṭan tih kan ban leh ngal te, kan hmui aṭang te chuan kan hre thei tawh a. Masi huna tlaivar dan tur mawlh hi kan lunglai kaptu a ni. Buk neih nge neih loh ṭha tawh zawk ang aw tih chu kan ṭhian ho committee apianga kan agenda chu a ni.Tlangvalte tih dan entawn a, kumin chu buhtui um ṭawih siam ve ngei kan tum chu a ni a. Mahse a buaithlak phian mai, a tih dan thiam alawi kan awmlo chu kan buaina a ni.


Kan Boss U kunga chuan remruatna fing zet mai a nei ta alawm le. Chu chu hetiang deuh hi a ni. Tu emaw ber chu Biaksailovi te thiltih dan zir turin kan intir chhuak anga, chu chuan kan ṭhianho aiawhin ava zir chhuak anga, chuan kan ti ve ang. Tu nge kal anga, tu nge kan tan va thawk ang.??? Kan buai phian mai! Biaksailovi(Hming tak tak ani lova, a hming lem mai mai alo ni, tun hnuah ka hre ve leh hnuhnawh a) nuthlawi ngo veh vawh, heh pan hlang mai, pa ho leh tlangval te tilawm thiam em em mai, mahse bak ve tak chu biangbiak a huphurh awm lem loh! Mahse a head mistiri( bel mawngzawm mistiri) U Hranga hi a ni huphurhawm chu ni, a hnar a ṭawk sen hlar tawh a, mawng dep deuh thinchhe zet a ni si! Mahse U Hranga hi thinchhe viau mahse englai pawh a vin reng chu a ni bik lo, mi in Hrangek hnapthlengsen an tih ṭhin vang mai mai a ni. U Hranga hian Sudden Muanga hi a haw hle a, a bulah chuan sawi miah loh tur a ni tawp mai! Sawi miah lo ila, Chuan a tih dan dan a awm ang.


Thlasik ni a ni a, ni chu suk chen vel a nih chuan zan lama Biaksailovi lama zaizap zawng a kan thu ken va inleihbuak mai chu kan tithlu ta a. Kei ni ṭhianho pawh zanriah ei turin mahni in lam ṭheuh kan pan ta rih a. Thlasik khua a ni tawh a, tui avang phian a, in lamah chuan zanriah kan la peih chiah loh avang chuan tuikhurah tui kawt turin ka chhuak leh ta rih a. Kan khaw tuikhur kawng hi feh kawng aṭanga peng a ni a, hla lutuk lo, mahse kawng chho ve deuh a ni.

Ka vannei nge ni tuikhurah chuan mi an lo awm mang lova, Nu Hruaiphakari chu alo insu a, chu deuh chauh chu a ni. Khawtlang hruaitute khan insuk an phal tawh lo emaw ka ti a, mahse he nu hi hauh chi a ni lo! Ka be lem lova, tui ṭin hnih kawt chuan ka chho ta a, feh kawng peng ka thlen chuan kan chawlhna ṭhin ah chuan ka lo chawl a, ka thaw hle hle a, ka fitness bun chu ṭin aṭanga tui bua chuan a tihhuh avang chuan anal deuh a. Ka tleuh nawk nawk a, kal leh mai ka
tum lai tak chuan feh kawng aṭanga U Hranga ipte pui puar luah a lo chho chu ka hmu ta ale... i hi le...a chi dawn e.

Ka lo thlir vawng vawng a, a ni lah chu min rawn hmuh ve leh chuan a rawn kal chak sawt a, kan la inhlat deuh na a, ka inher ta a. Chutah le...." Min lo nghak teh.." U Hranga chuan a rawn ti ṭial ruan mai a. Kan ding leh hlek a, a rawn thaw chho hluam hluam a.
" Mei....mei...meizi....al i ak mial em, ka tihuh palh a..." a rawn ti a. Ka rilru a buai ta nak mai, ka sikret ah hi khawchhak chhuak ṭhianho in kan inkawn a kan lei a ni si a. Ṭheh nge ṭheh loh chi zawk ang aw...?
In ngaihtuah rei a ngai lo, mei zial ka zu ru ṭhin tih a hre ve tlat bawk si...Tin, amah hi kan mamawh bawk si. I he lovin, ka ṭheh ta ngei a, a ṭan a, a pak bial tulh tulh a.
Chutihlai tak chuan Nu Hruaii Hruaiphakari a rawn chho ve ta tlat mai, min rawn hmu ta si.

" Zu rim ava nam ve...." hnar phit dat dat chuan a la rawn tizui a, he nu zet hi chu aw...amah ang pathum hi kan khuaah awm se chuan kan intualvuak fo hian ka ring tlat a ni. " Pu Hlira te Inah luh chhoh a ngai a ni..." a la tizui a. Ava han chimawm ṭhin tak em!Pu Hlira hi kan khaw Ṭangrual pawl hotupa a ni a, mahse a fapa pawn zu a heh ve lutuk tho... U Hranga ngaih dan a ni ta hauh lo mai, ".....i duh duhna ah han lengkawi la ti nia, kal vat mai teh.....i hing ...."a ti ve nghal zat a. Nu Hruaii lah a dang mai lo, a lo hawi let a, " Hrangek...." a rawn ti tlat! A mupuiin a kap ve ta tlat mai! Chutah U Hranga a chu a sa ta phat mai...." Hruaichimawm...Hruaiphakar...haw rang rawh..ka duhloh hnu i nih kha..." a ti ve tlat.Nu Hruaii chu a riat nawi ta mai mai a, a kal liam ve ta hnu hnu a. U Hranga ala lungawi hauh lo, a la phun nung nung a," Ti teh...Taia ka thil hi ka thuhruk hma in i fenthlir khan tlem azawng kan thal dawn em ni niang....nge khulai mau khu i zuk sat anga mauthei kan siam dawn zawk?" Min rawn melh chung chuan a ti a.

I hi le... i hi le... a pui dawn e...

A fuh dawn ṭan tlat...

U Hranga chempui hriam hmel em em fahran loh chu ka la a, mau sat tur chuan kawng thlang lam ka pan ta a. Mautak chu ka zuk sat ta a. Ka rilru chuan ka hrilh tlang angem aw...ka ti a, mahse la hun lo deuh chuan ka hre si a. Kawngpui ka chhuah chhoh leh chuan U Hranga chu alo nui var var a. Ka mau hawl chhoh chu hnehsawh zet chuan U Hranga chuan mauthei ah a siam ta a. Plastic litre 20 chhunga buhtui umṭawih thlawrfim tui chu kan bun chhuak ta a. A sawi dan chuan ram cial a ni a. Tui kan pawlh belh a, kan han dawt ta ale....pum lamah chuan asa thla ham ham mai nia. Ka va han vannei tehlul em! A vawihnihnaah chuan ka huai ṭan sawt a, ka bawngkai sikret ah pawh chu a hek ham ham viau mai! Mahse a pawi miah lo, kan ṭhianho kawmiti thu kha ka sawi teuh tawh hle mai. Tin, U Hranga pawh a ṭawng nuam ve ṭanin ka hria a....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)