MASI KAN URLAWK ALAWM LE..!! By M Lusei Palian.

Story tawi te te emaw luanliamna emaw post na
TMAWII
Posts: 417
Joined: May 18th, 2018, 8:29 am

MASI KAN URLAWK ALAWM LE..!! By M Lusei Palian.

Unread post by TMAWII » December 15th, 2019, 10:22 pm

MASI KAN URLAWK ALAWM LE!!!


M.Lusei Palian


Episode -2

U Hranga a ṭawng nuam ve ṭan ta. Kei pawh ka sa phat phat a, mahse ka insum hram hram a. Rawlthar nun kan tem chho ṭan chauh a ni si a, ka thil in ka tuisik pangngai in ang ni hauh si lo chuan duh loh danin min awm tir dawn tih kha hre lawk bik si lo hian kan lem sa ve hat hat kha a ni si a. U Hranga chuan a aw a thian kharh kharh a, a thil ah lai chu thuhruk a tum a ni. Thuhruk ngei ngei a ngai, Hruaiphakari khan a xerox vek tawh ang a, a copy chu a darh nasa tawh ang tih chu kan hresa a ni. (Nu Hruaii pawh ka ti peih lo, a phakar em) Kawng aṭanga chuan a peng zeuh a, rei lote ah chuan a rawn let leh ta mai a. A thukru fel a niang.



Imnn...thukru fel se a ṭha zawk, Pu Hlira leh a ṭhiante ho tawh palh phei chuan min dap emaw a ni ang a. Tin, U Hranga chu an man emaw a ni si ang. Tun dinhmun ah chuan U Hranga hi man hman a ni lo. Man chi a ni lo, kan ṭhian ho tan mi pawimawh tawpkhawk a ni, a thil thiam hi kan zir ve phawt a ngai!!!

Tui ṭin, ṭinpui kan kawt leh chu le, kawng chu ka hmu phe ruai mai a. Kan pai khat khat ta mai!

" Haw rual lo ila a ṭha zawk ang...Tin, Taia kan thil in kha sawi chi a ni lo a nia..." a ti a.

Ka kalsan ta a.

Tin, heti hi a ni, kawngpui lian zawk leh zau zawk ka han pawh leh chuan le... Pu Hlira leh a sangawizawnpui te Pu Hnuna ( Hnun thinchhia a) Pu Kapa( Nuthlawi a ruka rim hrat, kan sava vehnaah pawh nuthlawi thing a phurhpui lai kan hmu tawh) Pa Sangzuala te chu min tawk zawngin an rawn kal nghal mai reng kha a ni. Nu Hruaiphakari (kum tin fa neii) a che a ni chiang tih chu hrilh hriat kher ka ngai lo.



An ni ho chu biak loh hram ka duh a, kei pawh ka inthunun vat a, ka kal ngil nghal awt awt a. Ka pel fel ta, an ni pawh chuan min en ang he haw a, mahse ka thawveng huai mai. Hnai te ah inbia ila chuan pi leh pu hunlai aṭanga huaisen lawmman, huaisen vang ni lova ka lo in ve ngawt hi an hnar khan a hre ngei awm si a.! Kei lah ka phur tawh phian si a, phur mai a ni lo, ka so hialin ka hria!


Mahse kan inpel fel chiah tih chuan, " Taia, Hranga ilo hmu em?" Vin zet ring angreng tak chuan Pu Hranga chuan a rawn ti ta mai a. A van zia love aw...


Thei leh thei lo chuan tui kawt chung chuan ka hawi let a, dawt sawi ka hreh si.
" Aw....a haw daih tawh."

" A haw na a rei tawh em? A iptepui a puar em?" Pu Kapa chuan a rawn ti ve leh thung a.

" A ipte a puar leh puar loh ka hre hauh lova, mahse a rei ve leh tawh..."

An ngawi ṭhap a, kei pawh kan inlam panin tui fawk zawk zawk khawp a kalin kan inlam ka pan ta a.


Ka lo thang rei deuh nge ni, ka chhungte chuan zanriah an lo kil der tawh a.Thlasik ni hi chu a rei lo ṭhin em atin ni! Chu lovah tuikhur kawngah khan ka muang phian si. Mahse....mahse a ṭha zawk daih! Ka rim hi an hria anga sin.

Ei ve nghal tur chuan min ti tak na a, ka la hah rih tiin chhuan lam ka siam ve tlat a. Mi sual vanneihna a ni. An eikham hnuah ka lim hrep mai dawn a ni.An kham laih laih hnu chuan ka ṭhu ve ta a, Zawngṭah leh chhawhchhi chawhpawlh, Bal kan ngei mai nen, ava han tui ngai em!

Chaw eituina ka lo tikheuh bawk si, a va tui tak em! Anṭam hang nen, ka ri biah biah mai! Ka pa lah chuan mi rawn thlek ang vung vung a.

" Ṭam hle si....kan rual khan ei nghal mai tur alawm" ala rawn ti ta deuh deuh a.

Ka chhang duh lo... ka ngawi hmak a. Ka puar hle mai.


Kan hun tiam ala thleng lo deuh a, chu zan chhawrthla eng chu Pu Khama (Dawrkai Khama mi uikawm) te Suk hlo zawrh( insukna sahbawn) alai taka ama phel, a lian lam chiah ang tia vel ni mai hian ka hria a.(Pu Khama hian a sukhlo zawrh hi aman alai takah a phel a, chu chu patla hian a buk leh ziah a, a rit lam chu a duhsak zawngte a pe ṭhin an ti) A chanve chauh pawh khian a eng hle a.

A en zia tifiah a, tichiang turin Karen( electric) ala awm lo zui a. Thimhlim chauh mah ni se, a eng ṭan hle a ni. Kumin zawng kan kum ṭhat kum a ni mahna, Masi laiin thla a eng dawn a ni.

Ui bauh chiah chiah leh.... kan kawmthlang tlangval Biakbairawka zai chu a inhmeh hle a, luhkapuiah ṭingṭang hrui kim lo nen a zai a. T. Lalengzauva ka hre chhuak vawng vawng nia. A zai thiam vang ni hauh lovin...Masi a hnai a ni tih a boruak aṭang hian a hriat hliah hliah atin ni!


Chutih lai tak chuan....

Kan inpiah a Thirhrui ban chu vawi thum a ri ta a. A ri kal raih raih a, awm hle hle thei ka ni lo, chhungte hnenah ka len tur thu ka sawi zo hman hram a. Ka tlanchhuak a.

Ring fiah zet chuan ka ngiau ta a. Fiah zet zet chuan min rawn chhawn a, zawhte rual an awm emaw tih tur chuan kan ngiau ta sup sup a.


Chutah le, ka ṭhiante chu kan Humepipe hman thiam aṭang chuan intha zo fe fe hian an rawn inkhawh chhuak nalh nalh a. Khuh puak deuh leh insut leh hraih ṭhin chu kan awm zeuh zeuh a. Kan Boss U Kunga pawh inti puithu tak, inla boss em em chuan Parapet chungah a ṭhu ta vang a.Ring fiah zet thu pe aw tak hian le...

" Ṭan ru le" a rawn ti a.

Rina chuan " I thil ah kha...khawi le.." a rawn ti a.

Bawngkai Sikret chu ka pe nghal var a, Rina chuan an en a ,

" A va tlem tawh ve" ala ti zui a.


" Nia..."

Chubak chuan ka chhang lo, tlai lama U Hranga nen a kan thil tih, mau thei ngeia kan in kha a la thawk dawn ṭan chauh a ni. Ka ni haih mai a, ka phur a, ka zam miah lo, ka huai sawt hle a ni. Ka ṭhiante bulah chuan tlai lama U Hranga nena kan intawn thu chu ka sawi ta nge nge a. Mahse engmah ka sawi tlang lo tih chu kan sawi leh a, Ruala te chuan vannei hi min ti em em khawp a. Ka vannei em bawk a ni.An sawi zui nuah nuah a.
Kan Boss U kunga chuan van lam chu a thlir vang vang a.

" Ti ru le....va kal ang u hmiang, mi leng an tam hma in kal ang u..."

Meizial kan zu ṭan ve chauh asin maw le, mahse kan Boss ber a ni tlat! A thu hnial chi a ni lo.

Biaksailovi in lam chu kan pan ta ṭham ṭham a. An in awmna hi a zuk fal deuh na a, kan veng kawn ai mah hian a lun hialin an sawi ṭhin a. Karen a awm hi chuan Masi hla Siampuii Sailo te, T.Lalengzauva hla te ring fahran hian an tape Dek( an ti emaw ni) ah an zai tir ṭhin a. Kan tual mei aina aṭang hian kan lo ngaithla ṭhin a. Sap Masi hla 'Lawngtlai ago in Bethlehem' tih leh Lar em em mai 'Police Davida' tih pawh kha an zai tir ngun ṭhin tlauh tlauh khawp mai! Zanin pawh hian karen chu awm se an zaitir leh tawh ngei ang..


An kawt kan thleng thla a, huphurh ang aiin mi an tam hmel loh, chutah boss tih tur a ni tih hai miah lovin U Kunga chuan Kawngka chu a kik ta kauh kauh mai a.

Biaksailovi aw ngei mai chuan,

" Lo leng lut rawh..."

Kawngka chu an rawn hawng a,kan inzui lut ta ṭham ṭham a.

" E khai a! Kunga leh a ṭhiante ho an nih hi...lo ṭhu rawh u...."


Kan ngawi ṭhap hlawm a, ṭi ru angreng deuh chuan kan ṭhu ve ta a. Pahnih chu dawhkan bulah an lo ṭhu a, Saidawium hian an lo inchhawp a. Min en chuang lem lova, Pa Chhuana te ṭhian dun ni ngeiin ka hria.

Kan Boss chuan engmah sawi a tum ta lo emaw ni, a ngawi rei riau va, ka va melh ṭhin a, Ruala pawn a melh ve vak vak a. Eng mah ala sawi chuang lo.

Nu Biaksailovi chuan, " Eng nge in duh ve teh mial a?" A ti ta a.


" A falin kan inbe lawk thei angem...Nu Biaksailo..." U kunga'n an ti chu le....

Midang chu an lo nui huk a. Asawi zawh rual chuan, vin leh thinrim tih hriat tak hian....

" Naupang te te....inva zak lo ve.... Biaksailovi ka ni lo aw.... Thanpuii ka nih hi... eng vanga Biaksailovi min ti ziah nge in nih ? Chhuak nghal r'u....ka um chhuah hma che u hian.." a ti nghal tawn tawn mai a.

A inleng te chu an lo ri huk a...U kunga hnim bawh en min zirtirtu , kan Boss hmel chu a hmuhnawm fahran loh...Kan lenna nu ber lah chu thlun phelh ang zar zarin ala ang tun tun a.Boruak a rit dawn chauh....ala lungawi tlat lo.

A hming tak kha keini pawhin kan hre ve chiah...

" Ka tihpalh a ni..ih nu Sailo..."
Ala ti zui....hram hram chuan leh... ava fuh lo em aw.....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)