MASI KAN URLAWK ALAWM LE..!! By M Lusei Palian.

Story tawi te te emaw luanliamna emaw post na
TMAWII
Posts: 417
Joined: May 18th, 2018, 8:29 am

MASI KAN URLAWK ALAWM LE..!! By M Lusei Palian.

Unread post by TMAWII » December 17th, 2019, 6:06 pm

MASI KAN URLAWK ALAWM LE!!!

M.Lusei Palian

Episode-4


Ngaihthlak chian tumin ka inher rem ta ale....ka ngaithla chiang thei ta....E khai aw.....

Tu emaw nen chuan an lo inhnial deuh a lo ni! A bialpa a ni chiang mai...mahse Nula Ropuii hi kan Sande Sikul zirtirtu a ni si a. A ni te ang chuan ngaihzawng a nei dawn em ni?
A hma zawng khan ngaihzawng a neih ka hre bawk si lo,....thawm dim fahran chuan ka ngaithla zel a. An ni lah chu inchhunga tapchhak zawn vel aṭang chuan an phun leh ṭhin a.

Ka hre thei ta....ka rin loh lutuk thil a ni...mipa aw chuan fiah deuh hian....

" Kaldai ho finna kha a thuk em em a, Lal Isua lo piang tur kha an lo hre thei ta a, chu pawh arsi aṭangin a ni. Pali an ni nghe nghe a, pakhat kha an kal san a, mi pathumin nausen kha chibai an rawn buk ta a. Rangkachak leh beraw te leh ih....an rawn hlan ta a. An rawn kalsan pa khan a rawn umzui a, mahse an innang hman ta lova. Chibai buk tumin a zawng ta reng a, Kraws a an khenbeh hma khan a hmu ta a ni."


" Ui...karei...chutiang lamin ka lo la hre ngai reng reng hlei nem..aw nang nge nge....a zir a zir in ni bawk a,...."


Chung thu vel chu a ni. Ka beisei loh loh thil a ni. Mi in sirkhen leh se se thu ka ngaithla dawn emaw ka ti a. Kraws thu an lo sawi daih mai a! Nula Puii te in ah hian tu nge maw leng le.. Tirhkoh Lalthara alo zin emaw ni aw,? Lo zin se chuan a khaw khahin a khat awm si a.A tu chu nge maw ni aw! Kal mai tuma ka inher lai chuan mipa aw chuan,


" Kraws a khengbettu Rom Sipai ho pawh kha an piangthar ta vek a, a puan ringawt pawh kha an dampui a, hling lukhum te kha aw... kha hling Rhamnus hling khan mi tam tak a tidam asin! A chin chhuaka sawi ka va han chak tak em!"



A chhunzawm ta a. Ka beisei ang a ni ta hauh lo mai. Mahse ngaihnawm ka ti ve tlat, va luh ve mai chu ṭha in ka hria a. E...a chi loh, buhtui umṭawih rim ka nam a, min hmu piangthar lo mai ni lovin, sual ber hmuh khan min hmu leh awm si a, mihring mihrinna ah ṭha inti ve viau mah ila min hmu tling leh chuang lovang. Umnnn....pawi lo, an thusawi kha nakinah Upa Chhingkawnga la zawh tur a ni. A ni hi, tih ziak a ni ti thlap thlap theitu a ni. Kan khua hian Pastor kan nei ve lova, khaw ṭhenawm aṭangin min rawn hmui ṭhin a. Kan kohhran khaipa hi Upa Chhingkawnga a ni, an duh khirh mai mai khawp a, a hriat lai chuan love song pawh sak chi a ni lo. Min phuar a ni deuh mai!


Thawm dim deuh chuan kan inlam ka pan ta a, an thusawi chu rilru a dek angreng hle a. Mahse khatiang sawi thei kha tu nge ni ang aw.....?
La zawnchhuah tur a ni.


In ka thlen chuan ka U Inleng te chu an lo la ri laih laih a, kan in hi tlangval ho chuan khawmna ngang hi a ni a, kan thingpui pawh a hek ṭhin hle a ni. Mahse ka pu hian thuksir ah hian englai pawh hian a dah tir reng ṭhin a, thingpui sen hang hi kei zawng ka lawm ve hauh lo. Kan thangkam rah chhuah kha an lo sawi hat hat a, kan thangkam a ni tih an hre si lova. An nui nasa hlawm ngang mai. Mahse a ball a kha an hmu chuang lova,
" Ball changtak an pet a, a ball lah chu an hmu zo mai lo lehnghal a .. ." an ti mai a. Kei lah chu kil thim lam hawi a, ka nui nasa ngang mai...


K'U Bualchhuaka'n an sawi tak tak a, a hmuna awm ang chiah a ni. Kan khaw mi zut thiam Pu Ropuithanga chuan an ke a ulh ve ve a ti e, an ti a. Kumin chhung chu an bai ve hmel e! Tu thiltih nge tih Pu Hranga ten an chhui dawn an ti, tih te a ri nawk mai! Ka hlauthawng leh angreng hle mai!



Hlauthawng viau mah ila min man chhuah ka ring chuang lo. Zingah va dah bo daih tur em maw ni aw...


Ka saihlum hrual chu tapchalah chuan alo la inrem ṭhat a, kan nem chhin a, a la ro lo deuh a. Zankhua a awm chuan a tliang mawi tawkin zing lamah a ah theih mai ang. Kan buh chhekna bula Hmawng kha zingkarah chang ila ka ti a, hlum pawh ka hrual lawk diam a. Zingah haw pahin buh phur haw leh ila...

Kan kum ṭhat kum a ni a,buh hi phur 100 chuang kan nei a, hmarcha ramah kan lo pho ṭeuh bawk nen, kum thar lamah chuan vai sumdawng an rawn lut leh mai ang. Kan khuaah hian Middle School thleng chiah a awm a. High School hi khaw ṭhenawmah a awm thung a, kan va kal ṭhin a ni. Chhungte hnai vai awm ta lo nen, leh langa kal kan ni si a, kan tlai fo mai a. Kan Zirtirtu lah chuan min ṭhingṭhit tir fo mai. Chhuanlam siamin ka kal zawm ta lo a ni. Hrem tur bawka khaw lehlam kai reng hi ka ning tawh a ni.


Pindan ah ka lut a, ka mu ta daih a. Ka rilruah chuan Nula Ropuii te thusawi kha a cham reng a, khatiang thu sawitu kha tu chu ni ang maw!?



Vai Pathian thawhhma in ka tho va, ka pu a lo tho tawh a. Thingpuisen min lo thlit var a, ka inpah chuan ka insiam a. Buh phur paha sava veh tur ka nih thu sawiin ka nu bal chhum chu ka keih tawn tawn a, kurtai nen kan ṭhei tak tak a. Ka zia huai mai....hmanhmawh tak chuan ipte pui nghawngkawlte nen chuan ka liam ta a. A vawt angreng hle...


Kan buhhum thawhkhawm kha Ruala'n vai buhin Pu Hnuna te hnenah a thleng a, kha kha kan Boss nen an ken tur chu a ni. U Hranga bulah class an kal dawn chu a nia....



Ka buhphur nen in ka thlen leh meuh chuan fehreh san a ni tawh a, ka u chuan min lo chawi thlak a.

" I zing chhuak hi i rei thei lutuk mai, " alo ti vin hlur a.

Chaw eiin min lo nghak chu lo niin, ka nu pawh chuan alo tui hnih a.


Ka ipte pui aṭanga Vahrit nupa leh Vahui te kan phawrh chuan min hau zui ta miah lo. Hlawhtlin leh tlin loh azir hian chhungte hian min hau mai mai a ni.


Buh chu vawi thum vel ka phur leh a, buh phur khat hi ṭin thum a ni a, zo takin ka phur ve zo tawh a. Chawhnu lamah chuan ka Sahdal thang kam ka en a, Ramparva panga lai a lo awk a. A zia phian mai, a tui leh pek dawn ma nge aw!


Ka nghahhlelh vang emaw ni zan hun a thleng har viau mai! Tlai lamah chuan tui chawi turin tuikhur lam ka pan a, Beisei nei deuh, nei lo deuh chuan ka awm a, mahse tu mah ka hmu chuang lem lo! Nimin khan ka tawng fuh a ni. Ka haw lamah Thanghminga tui kawt ve tur nen kan intawk a, ka lo nghak ta a.Ka rin aiin a thang rei a, a ni hi mi muang chi a ni ve hrim hrim a, tuibur hmuan da vel ka nghah hnu chuan a rawn chhuak ve hram a. Zan lam pawkram tur kan sawi dun ta mai mai a..Kan phur tawh a ni.


Eng thil chiah zuk zir chhuak ang chu ni...! U kunga kha a zuk inla Boss viau thei a ngem aw.! An intir kual nasa ang chu aw...


.......


Zanriah eikham thimhmul ah chuan kan inpiahah chuan zawhte a rawn ngiau leh ta raih raih mai a. Ka tlanchhuak zui ta a. Hmanhmawh vak lova kal pah chuan ka ngiau ve ta a. Kan ṭhian ho zawngṭah man ka la kawl chuan Bawngkai Sikret hi tlaiah ka lei lawk sa a. Ruala leh Thanghminga chuan min rawn fin ta vat a. Kan office kan pan ta a. Bukte kha kan lo sa lo a ni, a ṭha phian asin le...


Kal pah chuan kan ti ti a, Ramlawma Sipai vairama awm lo haw thu kan hre zui a. A insawi thei leh ang chu aw! Thlasik laiin khaki kekawrbul nen Radio khaiin a leng kual leh dawn a ni awm a. Kan nula ho lah hian an lo bawr leh chiam anga....(h)..! Nula ho bakilh mawi a hawn leh nasa ang chu aw...Ruak lo te pawh an awm leh mai thei a ni, a hmel te lah kha a ti ve puak reuh si.....Naupang ho vai ṭawngin an rak leh chiam dawn a nih hi!


Kan office chu alo eng pap tawh a, zanin chu karen a awm bawk a, ral leh lam Nu Biaksailovi in aṭang pawh chuan 'Lawngtlai ago in Bethlehem' tih hla an play leh tawh a.


Ro pui kan rel leh a, hetiang thu hi a ni, Pu Liana te'n Masi an thleng dawn a, kan ṭhian ho zaikhawm na a tel an phal loh chuan Hmarcha in an inhnuai aṭangin kan ur ang....mahse min hrechhuak tur a ni lo.....


Kan Boss chu a chauh hmel hle a, an thangna chin ka zawt ta a..
Muang raih hian...

" Kan ta kha vawiin khan kan up ve chauh a, tin heti hi a ni a, ni thum ni ah chauh a tho vang.... Tapchhak tia lekah kan vei ni leng ṭhak a....U Hranga'n ata a Sial min puk tir a...."

Saidawium um hnih ngawt a rawn phawrh a...

Meilum ai pah chuan kan han in tem chhawk a. Kan ta a thawh hun kan nghakhlel hle a ni. Ka lem hnem deuh nge ni, ka a hui mai a....

Kan haw lai pawh ka hre mang lo.....


.......



Kan ta a tho ve ta.....


Kan ṭhian ho aiawhte an rammut leh hun a ni a, a ni zanin hian kan thil ngei chu an rawn hawn dawn a ni. Chuan, a chhut thiam U Hranga sawi danin Masi hma urlawk ni in vawikhat kan dek leh hman chiah ang, an fuh dawn khawp a.

Lo lam kan zo fel khat bawk a tihtur a vang ang reng tawh a.Ka thangte ka en a, thing ka ek bawk a, tui te ka chawi a, tui hi vang ve viau mahse a dahna hi kan nei ṭha lem lova....
Zan lam hun ka nghakhlel lutuk chu mawnghawlh ang mai ka ni a. Sana te hi a kal chak lo viau hian ka hria a. Ni danga a kal chak nen, nizan lama kan inchah angin seh hmeh pawh kan lei lawk tawh..! Thil reng reng nghahhlelh hian alo thleng har duh bik a nih hi.... Lalmanga nu lawm rawih ni aiin a rei daih mai ....

A hun a thleng ta..




Kan ṭhian ho chu kan ṭhu kual pet pawt a, kan nghakhlelh buhtuium ṭawih chu zanin hian kan aite chhin dawn a ni. Mahse Head Mistiri U Hranga rawn tel ve a tum tlat a, hnial mi a ni si lo.Kan va han phur tak em! Seh hmeh tur Buzia leh Dalmut pawh cheng 5 man lai kan lei a. Mau thei kan siam sa vek bawk a. Changel hnah chungah kan buzia leh Dalmut chu kan chawhpawlh a. Khun kha fe hian Thanghminga chuan chhampual an chham a. He chhampual chham lai hian nuih thiang a ni lo.Eng thu nge a chham tih phei chu a mah pawh hian a hre kher hian ka ring lo. Mahse kan Dan a ni miau mai si a.



Kan Boss U Kunga chuan, " Khai le....naute u" an tih chuan leh.... kan plastic hawh chawp chhunga thil, thil power nei chu, Ruala chuan an thli ta ale....A sem nghal zel a, no khatna hi tlak pawp tur a ni. Chuan chhin nghal hmak tur a ni bawk. Ka chhung a hiar mam mam a, pum lamah a sa thla hat hat bawk a. A va manhla tak em, a thukin a ril a ni.



Vawi thum an kual chhuah meuh chuan sawi tur hi kan inchuh ta sup sup mai a. A engti zia chu ni maw! Tihdanglam hian kan awm tlang a ni. Kan rawl pawh a ring ta phian mai a.
Chutah le.....

U Hranga, belzawm lama Head Mitiri,' U ama ' hmang tam tawh chuan zai a rawt ta tlat mai! Kan hnial ngam meuh si lo, kan han zai ta aleh..... a tirah chuan kan nui mai mai a, alo rei ta deuh a, kan tui em em ta mai.Lam kan inchuh a, a ri thei thei kan khawng ri a, kan hla sak te chu inzawm miah lote kha kan sak zawm ta vek a. Nuam tak a ni nuam tak....




Ka lo bengchheng ta deuh nge ni! Sihdet chuan Kan Pu Hlira leh a hote chuan min rawn chhun ta sap sap mai le...


" Che tawh suh u" ......chu chu kan aw hriat chu a ni.


I hi le.....



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)