MASI KAN URLAWK ALAWM LE..!! By M Lusei Palian.

[TMAWII]

MASI KAN URLAWK ALAWM LE!!!

M.Lusei Palian

Episode -5 ( Last)


" Che tawh suh u" chu chu kan aw hriat chu a ni.

I hi le....Jacoba...peter...khring khrang.....


Mit men a har phian mai, Pu Hnuna ( Hnun thinchhia a) leh Pu Kapa ( nuthlawi hre theia)te chuan min dinchilh nghal a. Chutah inla Sherlockians tawkin Pu Hlira chuan a hnar chu an phit dat dat a. Chutah le, kan plastic, engine oil bur hlui, fai tawka ṭhuah chu arawn khai chhuak ta nalh mai...

Zia lo tak ani, zia lo tak....

U Hranga chu rum tawkin an melh ang khe khaw a....

" Hranga, hei hi khawi a mi nge? Thanpuii ta a ni em?" A ti ta chheu chheu mai a.

Thin chu a in phut rawn dup dup mai a, tlanchhiat thut policy chu a apply chi tawh si loh...Aw....eng tizia nge kan lo hmuh hmasak loh le aw....

Savawm bawmah min dah a ngem le? ???

Zai tui nak alaiin boruak dangin min rawn chim chu a hrilhhai thlak hle a, ngam zawng ni se chum hrep mai chu ka duh a. Mahse chum hrep chi an ni der mai si lo.

U Hranga chu a ngawi reng a...

" Hranga he thil hi khawi a mi nge? Thanpuii ta a ni em? Min chhang rawh" U Hranga hnaih sawt chuan Pu Hlira chuan a ti ta a.

Chutah le, a hun te a rah ṭhin kan Boss U kunga a rawn ṭawng chhuak ta a.

" Kan chhar a nih kha....kan chhar....Pi Thanpuii chuan ata a ti bo em ni?" A ti ve ta sak mai a.

An ngawi deuh vang vang mai! Kan Boss hian a chhang thiam em a tin ni! An awih loh hmel kher mai lehnghal a, an mitmeng chuan an in rawn a.

" Hranga hi alawm kan zawh Kunga lo chhang suh...." Pu Hlira chuan an ti leh ngat a.

U Hranga pawh a ngawi thei ta lo!

" Aw....an sawi tawh kha, an chhar a nih kha...ka leng chhuak in ka nang fuh ve a nih hi..." aw pangngai deuh chuan a ti ta a.

Pu Kapa chuan, " Khawi hmun a inchhar nge ni a? " ala rawn ti fan a.

Kan Boss U kunga chuan,"in sihdet kha hmet thim teh u, kan mit avai nasa tawh lutuk" a rawn ti chhuak a. An ni pawh chuan kan hmai chu chhun tawh lovin tual vel chu an chhun ta zawk a.

Thanghminga chuan, " Saw lai, hmana Pu Hnuna'n nula Saii a keuhna hmunah sawn" an rawn ti chiah mai chu kan vai chuan kan ri hat a.

Pu Hnuna mit meng chu zia lo tak a ni, Thanghminga chu a beng lo chauh a ni. A ṭhiante chuan an dang laih laih a. Mahse Thanghminga hian dawt a sawi tlat lo! Nula Saii nen hian an thang hat a, an inkeuh lai a lo hmu ru a ni chek ang chu....

" In mi tih dan chu min zah lo zo zai hle mai, zilh hlak in ngai a ni!" Pu Hlira chuan a rawn tichhuak ta a.



Chutih lai chuan Ruala chu a zi mar vel a, hui ha....kan boruak a khaw lo zo vek tawh a ni. Ruala chuan a ke chuan Pu Hlira bula kan plastic chu ava pet zeuh a, muang chang chuan a tlu ta a. Chu thil zet chu, Ruala leh keimah bak chuan kan hmu miah lo. Ka lawm hle a ni.

Kan thawm hria chuan mi an rawn kal khawm ṭak ṭak a,thil tisual lai tak man a denhlum mai tur melh hian min melh a. A zahthlak dawn chauh, naktukah chuan khaw pum ti ti kan ni tawh dawn.

Chung lo pungkhawm zingah chuan Sipai Chhuṭi Ramlawma a rawn tel ve a. Thil awmzia a rawn zawt a, mipui ho chuan an lo en ha a, Pu Hlira te pawh chuan chuti ve tho...

Pu Hnuna chuan thil awmzia alo sawi zung zung a. Chutah ring deuh chuan,

" Khaw nge in thil man chu...(h)" a ti ta thut mai le...

Pu Hlira chuan an en a le...
A lo tlu bal a, tin heti hi a ni a, a chhungah eng mah reng alo awm lo.Pu Hlira hrilh hai hmel kha aw...

Chutah ring leng lawng hian Ramlawma chuan, " KUCH NAHI HAI....NO EVIDENCE" an ti ṭhak a, eng thil tak chu sawi ni maw...! ?


Mipui leh keini ngei pawh chuan Duhlian ṭawnga a sawi hun tur kan nghakhlel hle,eng tihna tak chu ni ang maw....

Mi dang ang bawk khan thiam loh min chantir ve ta nge ni?

Pu Hnuna chuan, " Eng nge Rama a awmzia..?" An ti he haw a. Chutah le, Ramlawma kan lama rawn hawi pah chuan,

" Finfiahna a awm lo, man theih an ni lo...." ring leng lawng chuan an ti ta a le...

Boruak chu sosang tak a ni.


Chutah ring leng lawng hian a hma aia ring mah hian,


" Dan hma ah reng reng chuan finfiahna awm tur a ni. He bur ruak ngawt hi finfiahna a tling lo" a ti ta a.


A ni Sipai chhuṭi nge nge, a thusawi chu pawm a ngai tlat si a. Pu Hnuna te Pu Hranga te ho chu an lung ala awi tlat lo!

Chutah le, val u lam deuh kan kawmthlanga Biaka, Biakbairawka chuan ring leng lawng hian,

" Finfiahna awm lo na na na te chu, ti ru leng ang u" a rawn ti ta daih mai a.

Lo pung khawm ho pawh an thum hak a, an tlem tial tial a, kei ni pawh chu kan in melh zak zak a, U Hranga a kal hmasa ber a, kan zui liam ta daih a. Kan kalsan vek chu a ni ta mai.


Kan zan lam office hi kan sawn ngei ngei a ngai dawn a ni. Sipai Ramlawma chungah kan va lawm ve le, Ruala huaisen zar kan zo a ni. Masi kan urlawk tak tak hunah sawm ve ngei ni se kan ti ta hial mai reng a.


Chu zan chu eng tin tin emaw chuan kan kan hmang ral a, ka hre seng tawh bik lo, kan boruak chuan kan khua chu a al hneh ngang mai, tin, chhungte beng a luh hneh ngang mai a. Kan inchhungah chuan Atom Bomb ang mai in a tla a,Tukṭhuan kan ei lai ngei mai chuam ka pa chuan zan hnih min karfiu thu min hrilh ta a le....


A va na ngai ve le, hmana Vahrit ka um ṭum a, ka ke zungpui ka chhuih kha a na viau a, thla thum vel a na a. Kha ai khan zu han thawkna zawk a! Ka nun ram hi zu han chau vek thei a.Hrehawm tih hian a sawifiah pha lo....

A zia lai deuh ber chu Urlawk zan tak takah ka leng chhuak thei dawn chu a ni. Chu chu ka innghahna a ni.


Chhun lamah chuan ka pa nen a thangkam leh ka kam chu kan en a, a lo awk ṭha phian a. Ni te chu thlasik ni mah ni se rei riau hian ka hria a. Pu Hlira te ho chu ka haw hle tawh a ni.

Ka thinlung hian zalen lo riau hian a inhria a, ka tawt up up hian ka inhre hial a.

Zanriah ei kham a, kan inpiah a zawhte a ngiau meuh chuan a va han hrehawm ngai em aw! Miau ve ngam miau hek lo le..Thil dang kha chu ka tuar thei, mahse ngiau theih loh hi a lo hrehawm ber alo nih hi....

Rei deuh hnu chuan vin tawk tawkin a ngiau ta a. A tham ral ta....

Ka u inlengte a ngai te in an lo chuangkai leh ṭak ṭak a, ka pa lah a leng daih a! Duh ila chuan a rukin ka leng thei ang maw le...

Ka u inlengte chuan min fiam sap sap a. Kei lah tum burin ka mu hmak thung....

Ka awm si lova, Zaikhawm ho hmarcha chu a ur hnan em ka hre ta lo.


A hun a thleng ta....


Urlawk ni ngei mai chu kan thleng ta. Tin, zalen ka ni leh tawh. Zan in na na na chu a siruk la in che teh ang. Mahse, thil pakhat ka pa in inkhawm phawt tur a ti a. Phur lo zet chuan ka inkhawm ta a.



Hman zana nula Ropuii inleng pa ngei mai khan thu a sawi ta a. A va han sawi thiam kher em! Ka inhmu chhuak ruak ruak in ka hria a. Kan thinlunga Lal sual pian tir lo tur leh Lal thar Krista ngei pian tir turin min chah thlap a. A va sawi rei lo ngai em! Mahse darkar khat chuang alo sawi der tawh a lo ni. Kei mi sual pawh hi eng tin emaw tak ka awm nia.


Inkhawm kan bang ta a, ka ṭhiante ka fin ang nge ka zaikhawm ang aw?ka inzawt sek a, chutah Ruala ka hmu hlauh a....

Ka lo au a, a ni chuan min melh ang he haw a..

" Kan Boss in kan Pawl aṭangin a ban che !!!"..



( A TAWP TA)