Best Friends?

[Lost Girl]

Warning: Grammar leh spelling dik lo te a awm nual ka ring a. Thupa ka lo chawi lawk e.
_________________________________________

"Engtik ah mah in ka kalsan lo ang che" iti tiraw. I tan chuan thuthiam pakhat ve mai mai pawh ani mai thei mahse maw Dirac, ka thinlung zawng zawngin ka ring asin. Dawt mai ani ang tih ngaihtuah na reng ka nei ngai lo. I lakah zep ka nei ngai lo tih pawh i hria. Thuthiam hi ka tana a pawimawh zia leh ka ngaih thutak zia pawh i hria mahse i thuthiam erawh chuan hunbi a nei si.

-----------------------------------------------------
Kum 3 lai alo ral ve ta mahse keimah a ka awm hian ka ngaihtuah let fo thin. Ka hriat tirh che kha chuan hnaih en ah pawh ka en ngai lo che. I nghal em vangin kan class ah tumah in an nel lo che anih kha.
Mahse nang lah chuan enga tan vak mah iti bik lo a, thian siam pawh i tum lem lo. I smart em em a, kan teacher zirtir dik loh thleng i hria in, zak rak khawpin i zawt ngam thin kha nia. Kan class a tam zawk chuan a rukin an hlau che a, a bak zawng in an ngei che.
A hlau zingah ka tel ve hlauh mai.
Engvangin nge ka hlauh loh ang che. School tan atanga kar khat lekah Deborah i ti trap anih kha.
Class in over kan tih ang kha ani a. Kan en liam mai zel a, nang chuan class test tur i zir laiin tawng leh nui ring uar lutuk kha, class hmaah i khak hlak anih kha.
Kan reh thuap a, kan en vek che a. Mahse nang lah chuan enga tan mah ngai lo in lehkha i zir san leh malh malh a.
Deborah chu a no ve bawk nen, a tap ta mai.
Ka tawn ve chu ka hlau ru reuh hle ani.
.....,.......................................................
Kan in biak hmasak ber-

Loh theih loh vangin kan school diamond jubilee hman turah chuan class tin in performance neih compulsory an ti a.
Kan hotu te pawh chuanin min chah uluk hle a. An ngaih thutak em vang chuan Saturday ah chuan ka thiannu Dingte-i te inah chuan in hmuh khawm kan rawt a. Dingte-i hi class zawng zawngin an ngainat, hmeltha, smart, hausa mahse tlawmngai leh fel bawk si ani a.

An inah kan va thlen pawh chuan alo thleng piang chu alo be zung zung a. Kan inhmuh khawm chu dar 1 mah nise kan tih tur ber chu soi ho nan ringawt chuan hun chu kan hmang hnem ngei mai. Kan thlan fel meuh chuan tlai ani der tawh.

Dingte-i, Leo leh Sangte-a te chuan kan performance tur hla an siam lai chuan kan thu in kan ti ti ho a. A then choka ah a then sitting room ah. Kan thu darh nuai a.

Keichu class a ka thutpui Zuali leh msi bulah chuan ka thu a. Kan zingah chuan Deborah chu a tel ve a. Mipa ho hian Deborah hi chhaih nuam an ti em em a. An fiam an fiam a.

Chutih lai chuan Freddy chuan "Deborah, hmani a ka sawi kha tak tak nia aw" Ati hlawl a.
Deborah chuan lai deuh hian "ka awih lo e" Ati a, kan bulah chuan "Lal Freddy hian Dirac an min star ati char char nih chu. Awih awm loh e tiru" Ati ta mai a.

Keichuan mak ka ti hle. Dirac pawn star lo nei ve thei tho anih hi ka ti mai a.

Dirac an a tih trah hnu ah haw lo a hetia a laih vel pawh hi mak ka ti lem lo. Dirac zawng sual thiam reuh hle tih loh ah chuan a sang tha em em a, a hmeltha reuh phian a, star tu pawh hi class dang trang a nei ve nual.

An ti ti chhunzawm zel a, ka ke kham ve deuh tawh vang chuan ka tho a, an varenda lamah chuan ka va chhuak a, khua chu a thim ta hle a, ka zai el el a inla lungleng deuh chuanin.

"Hriatpui"

"Awi awi awi" Ka phu nasa lutuk.

Ka hawi let chu kawngkhar bulah chuan Dirac chu alo thu ngul mai.

"Ramhuai maw ka ti don che lawm!" Ka ti tak na a, ka rilru ah chuan in chhunga kan thusawi kha a hre pha ngem le tih a rawn lang hmasa ber a, a hnu ah a rawn kal ve reng tih chu!!

A phone chu min hmuh ta ringawt a. Ka hrilh hai hle.

Ka va bih hnai a, Deborah chuan alo text chu niin. Pakhat chauh pawh nilo. A bialnu ni awm tak hian message a hnutchhiah nasa hle a. Mahse Dirac reply na reng chu awm lo.

A hmel ka en chuan Dirac, miin an hlauh maw an ngei kha ka hmu lo.
Dirac inno tak leh hrilh hai tak chauh ka hmu.

Tianga min hmuh mai chu keipawn mak ka ti em em a. A hmaa in be ngai miah si lo kha ngati nge le min biak thut le ka ti rum rum a. Mi biak tur a mamawh laiin ka lo awm hmasa ber nge nelawm hmelh min ti hrim hrim ti chuan ka ngaihtuah a. A bul ah chuan ka va thu a.

"Ahh. Ngati nge i reply loh" Ka ti ta ringawt a.

"Ngati nge ka reply ang"

"I star ni lo mi"

Min melh rum dan chu ka sawi hma min ti ngai rum rum, "Tichuan a sawi mi?"

"Aih sawi lo e..mipa ho khan an fiam a. A tak maw ka tia"

"Ani lo"

"Ahhhh awle. Deborah hi a naupangchhia ve sia. Ani pawn a awih anih ka ring. Ani lo tih i hrilh thei mai lo mi"

A ngawih reng vang chuan ka va en a, lei chu a en ngar ngar a. Deborah chu a thutak tawh em vang chuan a hrilh hreh tawh chu alo ni.

"Ka lo sawi sak dawn che mi. Tha deuhin ka lo soi fel dawn nia"

Engvangin nge ka in sawi luh ve ringawt chu ka hre lo mahse Dirac miin chapo an tih thin bo hmel tak ka hmuh chu ka pui chak aniang.

A bu ringawt a.

Khami ka chinfel hnu trang khan kan in be ngun tial tial a, bik takin ka sawifel nan number kan in pek tak hnu chuan kan in text nasa em em a. Mizia in opposite tak si chu kan in mil hle si!

Kei lah che chhe thei deuh ka nih laiin ani chu a fimkhur em em a kawng engkim ah. Ka ngaihsam em em laiin ani a khirh hle bawk.

....,...................

Nikhat chu kan class chuan lenna tur ngaihtuah in science center ah kal kan rawt a, Dirac chu ka sawm a atir chuan a kal peih lo a.

"Lo kal ve rawhh"

"A ho em mai. Hmuh tur awm lo"

"Mahse chhuah ho ve ang kha ani mai a. Keipawh ka vawithum na ni dawn"

"I kal chak viau mi"

"Aww. Class pawnah in kawmna chance ania. A nuam ve mai mai lawm. Ka treat ang che. Lo kal ve rawh. Pleaseee" Fiamthu chu ka hmui ka ti pawrh a,

"Anih leh le"

"Yessss"

Khami ni khan ni a sa em em a, a hmun kan thlen chuan kan thlan deuh hluam a, thla chu kan la sup sup a, kal ngun tawh mah ila phur tak chuan ka tlan kual a, Dirac chu ka phone pe in ka camera man ah ka hmang a, pipu lam kan pan lai chuan ka ban ah min pawt a,
"lo kal teh" Ti pah chuan ka tlan leh tur lai chu min chelh ding a,

"Enge" A san em vang chuan ka en chho vah a,

A lukhum chu phelh in min khum tir a, "um tlan leh tawh rawh" Min ti a,

"Hmm. Sawlai ah sawn la dun ang"

"Thlalak ka duh lo"

Kan thlen tirh trang vawikhat mah thlalak ah a tel duh lo a, aw a tih ring lo chuan,
"Vawikhat chiah pleaseee" Ka ti hram a,

Ngawi vang vang hian min en a, "nih leh" Tih chuan a phun a. A phur hmelh lem lo khawp mai mahse mak deuh chu enge maw ti tura ka tih hian aih ati ngai lo. Ka inthiam loh deuh vang chuan, "ka ti mai mai nih kha. Fountain bulah sawn thu ang. Kan nghak anga midang" Ti chuan kan va chhuk a, kan thu a.

Kan nghah lai chuan a bag tang chuan tui hi alo phawrh a, "in rawh" Min ti a. Tui min pek velah chuan tui ka mamawh zia chu hria in ka in treuh a,

"Ka ril a tam. Ei tur kan lo keng lo a" Ka ti a.

"I haihawt em lawm. Engmah i hre ngai lo. Tah hian lo thu rawh" Ati a, a kal daih a.

"Khawnge ikal dawn?" Ka tih chuan min chhang lem lo.

Ka nghah deuh vang vang hnu chuan alo let a, a kut ah chuan Wai wai leh lays hi a keng a, ka nui vur vur a, "khawi trang nge a"

"Midang ka va zawt a. Sangte-an alo keng hlauh a"

"Yess i van fel tak e aw" Ka nuih vur vur a.

"Ei mai mai teh" Ti chuan min pe a.

Midang kan nghah lai chuan hla ngaithla chungin kan ei a.

An lo let hlawm hnu chuan haw kan rawt ta a, khaw thim hma a hlaw fel kan duh si mahse motor hman tur kan hmuh loh vang chuan ke chuan kan let hnek hnek a.

Kalkawngah chuan mizo hla hlui te chu sa in kan nui vak vak a. A rei deuh hnu chuan ka hah ta hle a, ka kal muang deuh a, an hnungah ka awm ta der mai. Dirac chuan min nghak deuh vang chuan a kal muang lui a,

"I hah tawh mi pitarte" Min ti a,

"Ti khan min au tawh suh, lal putar" Ka ti a,

Midang chuan ka ding chu hmuin an lo hawi let a, "tinge?" An lo ti a, kawng sir a lung awm chu ka pan a, "ka thu lawk. Kal ru ka lo um ang che u" Ka ti a, an kal mai a. Dirac chuan ding chung chuan min en reng a, "lo zu kal rawh" Ka ti a.

Alo phei a ka hma ah chuan inher in a thu a, "lo kal rawh. Ka lo pua ang che" Ati a.

"engaa. Min zo lo ang"

A nui a, "Kg 40 pawh i tling lo ang. I toi si" Min ti a.

A hnung chu ka chum a, "ka toi kher lo aw" Ka ti a, "Nangmah I sang vang mai mai"

"Hmanhmoh. Khu min kalsan vek ttaw"

"Anih. Phun miah suh aw" Ti chuan nui vur vurin ka in puak tir a.

Kan chhuk pah chuan kan thiante chuan min lo hmu a, min lo chheih luai luai a, "In hmelchhia" Ti chuan ka nui liam mai mai a.

......................................................
School lamah pawh chuan kan in zui hnem ta hle a. Ka thian kawm ber Dingte-i, Nunpuii, Zohminga, Rema leh Leo te chu ka hmelhriat tir a. Kan bulah chuan a peih lo chung chung te hian ka hruai ka hruai thin. Ka thiante chu a hnaih lem lo mahse ka auh chuan alo kal ve mai zel bawk a. Ka kawm thin te ai pawh chuan kan in pawh in ka hnaih ta hial a. Ka mamawh na ah min pui a.Kawng engkim ah min pui hreh lo. Ka mamawh piang chu puih dil ngai lo hian amah hian min tih khalh ziah zel. Thil ho te a ka rilru buai tanga lian ber thlengin min pui vek zel. A caring em em a. Tlakchham ka neih a phal lo ani ber mai. Ka bialpa ni chuang miah si lo in min duat sual ka ti lo thei lo.

A rintlak em avang hian pui tura min mamawh na hi a nei tlem em em a, nuam lo ka tih phah fo thin. Mahse ka pek theih ve erawh chu a mamawh em em pakhat- a tana awm reng. Ngawichawi chhuak tlem tih takah mi biang biak vel hi a thiam lo em em a, miin sual thiam an tih chhan pawh hi niang, a rilru a awm a sawi phawng phawng a.
Mi hian an ngei phah fo mahse a mizia hre thiam tu thian a mamawh em em a, chu chu a tan ka ni.

Mi chuan a tawngkam vang hian an lawm lo ni mai thei mahse keichuan a mahah ka lungawi na lai ber ani. A chhan chu dawt min hrilh ngai tlat lo.

Dirac chu ka hriat chian pauh leh mi sawi ang leh an lo hmuh thin dan chu alo dik loh zia ka hre tial tial a. A rilru a zauin a tha a, a chhungte leh a mi rin te tan chuan engpawh a huam a. Chapo chu khawilam. Amah a in dah hmasa ngai lo.

Mi hian a mizia hi hre ve se ka ti thei kawp mai. Thla hnih liam meuh chuan best friend kan inti ta. Midang pawh nen kan inkawp hi an ringhlel fo mahse kan nui mai mai zel.

Kan chhuah ho na maw, movie en na maw, bazar na ah thleng chuan ka hruai a. Ning ve hle mahse a biangsum chu kan hmuh phah fo. A nuih tawh hi chuan ka en tawp a, ka lo hlim ve veng veng zel.

Dirac nena kan hun hman dun thina ka ngaih thin ber chu school bana kan haw dun thin chu ani. Sawi tur hi kan tla chham ngai lo. Khaw thlirna rem takah thu in kan zai dun nasa thei hle.

Kan hla duh ber, nitin a kan sak dun thin chu "James Authur- say you won't let go" kha ani.

Theite leh acid mix ei chung chuan hlim takin kan zai thin. Kan zai lai thei hle thung. Mahse min ti ngaizual tu ani.


...............................................................

Thil inthlak ni-

Exam chu a hnai ta hle mai a. Final exam anih vang chuan kan school chuan karhnih lawih chawlh min pek an tum ta a. Kan school kal hnuhnung ni ber chu ka birthday anih vang chuan ka kal duh lo a. Inah awm a ice cream leh eitur nena hman tawp chu ka duh dan ani a. Ka nu leh pa pawh chuan chumi ni chu min hrethiam ve mai a. Ka class kal don loh hriat velah chuan Dirac chuan alo len tur thu min hrilh a. Class chu thulh ve ringawt a, alo leng a.
Teddy bear leh chocolate min lo ken sak ngei bawk a. Kan pa2 chuan nilengin movie enin thil kan ei a. Kan ti ti a ka nui uar uar a.

Tlai lam deuh chuan Dirac chuan a phone ah chuan games a khel a, kei fb feed chu ka en mai mai a.

Ka rin loh deuh tang Message ka dawng hlawl mai!

Thawk khat laia ka star thin em em marin-a trang alo ni!!!

Min star thu a rawn soi ta!

"Ehe!" Ka thu ngil vat a,

"Enge?" A games khelh lai chu a dah thla a, min ron en vat a,

"Marin-an min star thu a rawn sawi mawle, avan mak" Ni e. Mak ka tih chhan hi pahnih ani. Pakhat na- min star vang. Pahnih na...ka lawm em em lo ka lawm tur angin. Ngati nge ka hre lo.
Chutia ka soi vel ah chuan ka hmuh sual nge Dirac chuan ka phone chu a melh rum a. A thinrim hmelh hle a. Chu chu a pathum na ni chiah.

A phone chu a chhar leh a games min khelh san leh daih a.
Ka ngaih chu tha ta lo. "Hey, ngati nge ka ti a"

Ka thu sawi chu hre lo ni awm tak hian games chu a khel leh a.

A biang ah chuan ka piai a, "heyyy"

Ka kut chu a man a, min thlah mai dawn maw ka tih laiin a vuan a, a kut leh lama a phone khoih lai chu dah thla in min en a.

"Mak ka ti lem lo" Ati a.

"Ngati maw"

"Keipawh ka star thin che lawm" Ati ta mai!!

"Engaaa!? Fiamthu na chi ani lo. Mawl mi" Ka ti thuai a.

"Nangmah lawm mawl. Engmah i hrethiam ngai lo. Star i ngah thei ropui si" Min ti ta.

Ka nuih za bawk si. A in puanna chuan min thawng bak si. Ka en heu ringawt a.

"Ka thutak ngai chuang hlei nem" Ka ti a

"Mahse ka thutak lawm. Ka thik thei lutuk. Diktak chuan tunah pawh ka la duh reng che" Ati sam et a. Ka thin chu a phu rang hle.

"Awi awi awi. I van â tak. Engvang in nge min lo duh. Kan inkar a chhe vek dawn asin. Ka chan duh hlei nem che" Ka thin chu a rim tial tial a.

"I rilru chu ka hre tawh lom"

Ka thinlung chu ka khawng zawk mai. Sawi tur hi ka hre lo. Ka thian ve ngawih ngawih, ka tana hlu em em ani a. Tiang zawng chuan ka la en ngai lo. Ka tan chuan in ngaih zawnna hi chu a ho ve thlawt. Engtik ni ah maw In then ni a awm tho tho tia ka ngaihtuah thin vang chuan ka la thutak duh ngai lo. Chuvang pawh chu niang Dirac pawh hi ngiahzawng enin ka en phal ngai lo.

"Hriatpui"

Amah ka en meuh chuan ka mittui chu hlauhna vang chuan a tling pung a. Dirac nen kan in kar chu a chhe dawn tih hriatna ka nei tlat ani.

Ka kut chu thlah in ka mittui chu min hruk sak a.

"Tap ringawt suh aw. I tah hian i hmeltha maw i inti mi" Ti chuan min fiam zui a. Kan nui dun a.

Ka hmai chu a vuan a, "ka thiam a che" Ati a "Engtik ah mah ka kalsan ngai lo ang che. Engpawh lo thleng se, ilaka ka rilru put hmang hian kan in kar a thlak lo ang"

A thusawi chuan ka thinlung a kawih em em a. "Tak tak?"

A bu ngut a. A thutiam chuan min ti lawm hle a. Ka thaw huai mai a. Ka in ngaihtuah nasa mah mah ani. Dirac ania lawm. Ka ring a. Dawt min hrilh lo ang ka ti a.

Khaw thim thet thet ah chuan haw chu a tum ta a, ka nu te chuan chaw ei ve nghal turin an sawm a mahse ani chuan tha takin a hnial a.

Pawn a kan din chuan enge ka hriat ka hre lo, a haw tur chu ni dang lo ang lo takin ka lungchhe hle a. In hmu tawh lo tur ang mai hian. Ka hmelah a lang bawk aniang, nui chung chuan ka sam chu a tuai a, "in ka thlen hunah kan lo text ang che" Ati a.

"Hmm" Ti pah chuan ka kal liam tir a.

In a thlen chuan min lo text ta ngei a. A thuthiam ang ngei chuan a hma ang bawkin, engmah thleng lo ang mai hian kan in be ta ngei a. Awmze nei lo a ka hlauthawng chu ka nuih za hle a.

Mahse... Chhan tha tak alo reng nei si a.

Study leave chu a in tran ta. Lehkha zir ngai nen, kan inhmu hman meuh lo. Mahse a hun awl piang chuan min rawn text in min rawn call ve thin. Kar1 ngawt chu kan hlim ngai chuan kan hlim a mahse karkhat chauh.

Mobile legends ka khelh lai chuan Dirac trang message ka dawng hlawl a.

"Hriatpui, thil hrilh tur che ka nei"

Ka noti chuan ka game khelh lai a ron hliah vang chuan ka swipe mai a, game zo trep tawh nen, ka khelh zawh chuan ka va reply vat a.

"I noti vangin ka thi trep haha. Enge enge" Tih chuan ka va reply a

"Teressa nen kan inbia a tunlai"

Ngati nge ka thinlung chu a tawt tak thut ka hre thiam ta tlat lo. Teressa hi kan classmate tho ani a, kan in hnaih lutuk lo na a, kan in kawm ve zeuh zeuh a. Ze zawi tak fel deuh hi ania. Chuan Dirac hi a star na a rei tawh hle.

"Chuan?"

"Min duh thu min hrilh leh a. Engtin nge ka tih ang"

Ka rilru te te chuan min duh thu min hrilh ni trang kar khat pawh liam lo a thleng a nih vang chuan Teressa chu min theihnghilh nan hman a tum tih chu ka hre thiam mai a, mahse chutiang zawnga han sawi tawp chu ka zak ve deuh si. A duh thin kha midang ni ta sela chu la nghak turin ka hrilh ngei ang mahse keimah ka lo ni nen, insawi luh a ngai leh ta. Teressa chu a hmang ang ani dawn bawk si ka sawi loh chuan.

"I duh lo ni lo mi"

"Ka hre lo le. Midang duh ka nei a, ka thinlung ah hmun awm hrilh lo ka tia ani chuan ka te tho lawm, a awl lai te ah ka leng ang ati a. Ka rilru a khawih reuh lutuk a. Chance ka pek hun ve tawh in ka hria"

Chutia a tih vel ah chuan thikna sualin ka khat deuh tlat a.

"I thu thu lawm" Ka ti ringawt a.

Nui chung chuan, "Nangman min duh chuang lo a" Ati a.

"A chhan i hriat kha. Kan inkar chhiat phah ka duh lo" Ka ti a.

Ani chuan "ka hria lawm" Tih phah chuan a thaw huai a.

"Mahse i hmang ang ani dawn sin, nghak ve deuh la..."

"Ni e"

Chumi hnu chuan pangai deuhin kan in be chhunzawm a. Pangai taka kan inbiak hnuhnung ber zan ani dawn tih ka hre si lo.

A tuk atang chuan kan in be tlem tial tial a. Min rawn be hmasa khat ta hle a. Ka va biak ve chhun lah in Teressa nen an in biak lai alo ni ve ziah leh nghal a, va tihbuai a nuam ta si lo. Nikhat ah hian i dam em tih hi kan in zawt ta tawk hi ber e. Han thik tur lahin a duhâm thlak bawk si. Mahse ka thianpa chu ka ngai ni. Kum chanve dawn kan in zui char char a, ka nunah a awm ta lo thut chu ka ruak hle a. Amah ka kawm nasat zia pawh ka hre chhuak reng bawk. A hma a ka thian kawm ve thin te ka kawm lahin titi a rual thei ta lo. Dirac bula ka hlim ang em em khan ka hlim ve ta reng reng lo.

Ka phone hman nasat lutuk in ka lehkha zir tihbuai vang chuan Dirac chu exam zawh hma chu phone ka hmang tawh hrih dawn lo tih thu ka va hrilh a. Ka phone chu ka dah bo a. Exam laiin kan in hmu zeuh zeuh a amaherawh chu ban ah chuan kei nilo chuan Teressa nen chuan an haw dun thin. Hmuh kha hrehawm ka van ti thei tak.

Exam a zawh meuh chuan ka phur em em a, exam zo nuam ti em em pawh ni lo, Dirac nen kan in be leh thei tawh ang tih rilru ka put vang zawnkin. School chawlh ni bawk nen, kan chhuak ho leh nga, engkim a pangai leh tawh ang tih ngaihtuahna leh hlim rukna chuan ka khat a.

Mahse ka suangtuahna chu takah chang thei ta lo.
Dirac chuan vawikhat mah min lo be lo.
Keilah ka in ngaihtuah thinrim, a thian ka ni a, a hma zawngin min bia a, bialnu a neih velah min theihnghilh hmak a, engvangin nge ka text hmasak bik ang ti chuan ka be hmasa duh ta bik lo a.

Dirac nen kan inkar tawpna chu ani ta reng mai.

Ka nunah a awm loh hnu hian Dirac chu ka lo duh reng ani tih ka inhre chhuak a mahse a tlai zo tawh. Hmangaihna ka hlauh luat ah, awmze nei lo a ka chan ka hlauh luat ah ka Dirac chu chan hlen ta ani. Teressa nen an awm dun ka ngaihtuah hian ka thik lo thei lo, Dirac an min care thin ang khan a care awm sia, ka tana a awm reng thin ang khan a tan a awm reng awm si a. Teressa chu kan tan chuan khawvela hmeichhe vannei khawp ber ani ta, a chhan chu Dirac an a ngaih pawipawh te lakah a caring zia hre chiang em em tu ka ni si. Keimah angin mawl lo sela, engtik ah mah a thlah loh ka beisei.

Tun hnu hian ka contact ah awm reng in, kan status pawh kan in en sak fo. Mahse kan la in be leh tawh lo hrim hrim ani. Teressa nen chuan an la hlim zel aniang. Ka theihnghilh ve thei tak hnu ah chuan thinlung leh takzet in Dirac hi a hlim zel ka beisei.

-end-

_________________________________________
I chhiar vangin la lawm e. Thil thleng tak tak beh chhana ziah ani a. School chhunga ka thlen tir etc hi chu thup nana ka siam danglam ani e:)