LIAM MAI RAWH by Notei Sailo Mk

Story tawi te te emaw luanliamna emaw post na
Notei Sailo Mk
Posts: 21
Joined: May 10th, 2019, 8:07 pm

LIAM MAI RAWH by Notei Sailo Mk

Unread post by Notei Sailo Mk » May 16th, 2020, 7:46 pm

Ka fanu nen chuan bazarah kan inkai det det a, mi tamna karah chuan kan inzep ve tâl tâl a. Ning hmel emaw hreawm ti hmel pawh a pu lem lo. A toys duh ber ka leisak chu a pawm ve ran a, kensak ka tum paw'n a phal ṭhak lo.






Chutia kan kal lai chuan kan hmaa dawr kawtah chuan khawvela ka mi huat ber lo ding chu ka hmu ta tlat. Ka ding dat a, ka mitvai emaw tiin ka mit chu khap sakin ka en ṭha leh ngat a, ka mi hmuh chu a la ngai reng. Amah kha a ni, min phatsan a, ka fanu pawh a faa pawm duh lova, min kalsantu ngei kha!






Amah pawh chuan min rawn hmu ve chiah a, mak a tih hmel viau mai. Kei ang bawkin min hmuh a beisei bîk lo a ni ang, a meng deuh kawk mai. Chutah, ka bula ding ka fanu chu a en vang vang a.
Ka fanu lak ata a mit la sawnin hriatthiam harsa zet hian min en leh a, ka lo nuih sak. A fa ka pai thu ka hrilh hnu-in min kalsan a, amah mai ni lo, a chhungte thlengin a fa a nih an rin loh thu mite bulah an lo sawi chamchi a nih kha. A fanu hmel a hmuh meuh chuan a dawtsawi a hrechhuak pawh a ni mahna le! Ka fanu lah hian hmelah na na na chuan a pa a chhun fuh hle mai bawk si a.






Ka fanu chu kaiin ka kalpui daih a, kan piah lawk dawrah chuan ka luhpui a, ka lungphu erawh a pangngai hleithei lo.






Kan bazar zo kan haw a, in kan thlen chuan ka chauh deuh vangin khumah chuan ka tlu zal a, ka fanu erawh a pi te bulah a awm thung.






Mitthilh tumin ka mit ka chhing diar diar a, ka mitthlaa lo lang vang chuan ka meng chiang hle.







Tun hma angin a hmel chu a la ṭha takzet, mahse, a cher viau thung. A zu in in a taksa a tichhe deuh tawh pawh a ni mah na, hriat va ni suh!





Min kalsan hnu khan engtin nge a awmzui tak ka hre lo. Ka ngaihven ngai lo kha a nia. Ani paw'n min bia-in min ngaihven bîk hek lo. Ṭhenawmten a chanchin min hrilh zeuh tih loh phei chu hriat ka nei lo hrim hrim.





Kum nga liam hnuah kan inhmu leh chauh a ni a. Khang kum kal ta chhung zawng khan ka theihngilh tawh emaw tiin ka awm ve a, a hmel ka hmuh chiah chuan ka ngaihtuahna a luah leh ngut ngut mai.






Ka nunhlui zawng zawng, kan awmdan te, ka nundante ka ngaihtuah let a, nuthlawi mah ni ila ka nun hman dan zawng zawngah khan inchhirna pakhatmah ka nei hauh lo.






Ka nunhlui chhuanawm loh fahran vang hian ka tun hun hi tihchhiat ka phal reng reng lo. Khang nun kha hmang lo ta ila, hetiang nun hi ka nei thei dawn si lova.






Hei hi ka hringnun thawnthu chu a ni:




Ka pain chhang ka nei chauh tihin min boralsan a, naupangte ka la nih vangin ka pa erawh ka hrechiang lo. Ka pa awm loh hnuin ka nu chu ka pi (ka nu nu)te in lamah ka nau nen chuan min letpui a, kan cheng ve ta reng a.







Pipi (ka pi nu) in min la dampui a, ka pi leh ka pu, ka putea leh ka nu leh ka nau te zawng chu he khawvela chhungte ka neih ve chhun te an ni.







Hmangaih takin min enkawl seilian a, ka duh leh chak zawng apiang min tihtir mai thin. An bulah ka hlim ve em em a, tu dang ka ngai bik lo.






Tichuan, thing delh loh lung delh loh ta chu kan nula chho ve ṭan a, mahni intodelh duh mi ka nih vangin hna te zawngin ka theih ang angin ka bei chho ve a. Pathian zarah Hindi Teacher hna ka hmu ve hlauh mai a, ka thawk ve ta reng a.






Nula ni ve ta chu duhtu neuh neuh nei ve mah ila ngaihzawng ka nei ngai lo thung. Dinpuia erawh zantin a rawn leng a, be ṭha duh lo mah ila, rawn len a ṭhulh phah chuang lo. Chutia zantin rawn leng ta na na na chu biak duh loh reng theih ni hek lo le, kan inbe ve ta zeuh zeuh a, phone thlenga kan inbiak tak hnu phei chuan kan inkawp chu a ni ta ber mai.







Min ngaihtuahin min duat em em a, ka pangchangin a lakah chuan ka thinrim rei thei ngail o. Min thlem lungawi vat zel...min tihlim em em a, ka ring hle bawk.





Chutia, kan inzui chhoh takah chuan harsatna leh buaina kan tawng chho ta a. Ka chhungte chuan min duhpui ta hauh lo mai. A chhan pawh zu a in bakah hnathawh mumal a neihloh vang ani. A thiltih hi hre vek chungin ka hmangaih miau si a, ka kalsan thei bik lo. Duh duh hunah kan inhmu thei ta lo a, a lo len lah an remti hek lo. Phone kaltlanga inbiak chu kan tihtheih awmchhun a ni. Chu pawh an awm loh lai emaw an mut hnu lamah chauh. A hnuah phei chuan phone thlengin min kawlsak a, inbiak ngaihna a awm ta lo.







Kan inngaiin kan inthlahlel em em a, a rukin kan inhmu a, kan inhmu tih ka chhungten an hriatin kut hial min thlak ṭhin. Mahse, chu chuan kan inhmangaihna a dang zo chuang si lo. Awm hran hreawm kan tih tak em avangin awmdun dan tur kan ngaihtuah ta a. Palai tirha inneih dawnin kan chhungten an remti ngai dawn lo. Kawng hrang hrang kan ngaihtuah hnuin tlan dun mai chu a ṭha ber leh kawng awm chhun ni a ngaiin kan khaw ṭhenawmah chuan kan tlan dun ta a. Thla khat leh a chanve dawn kan awm a. Kan awm dun chhung hian kan hlim dunin tu dang kan ngai bik lo. Inhauh emaw inhnial pawh kan nei ngai hek lo. Min duat thiam em em a, ka tana nuam lo emaw hreawm ka tihna tur zawngin a awm ngai lo. Zu in zeuh ching mah se, ka tan harsatna min siam ngai lo. A inthlahrung em em a, chu chu hria-in kei pawhin ka sawisel duh lem lo. A in ṭhin tih hrereng chungin ka hmangaih miau si a, han sawisel ṭhat leh vel emaw ngheitir nghal ka tum lem lo. Nghei a harsatzia ka hriatpui miau a, chuti thut a nghei tur chuan ka beisei lem lo nâ-in engtikah emaw chuan a nghei ka ring tlat thung.






Ka chhungten chutia awmdun reng chu ṭha ti lo in kan awmna khuaah chuan lo kalin min hruai haw an tum a, Dinpuia'n haw phal lo viau mah se kan inneih an remtih dawn avang chuan a phal ve ta hram a. Ani pawhin palai a rawn tirh tur thu a sawi avang chuan ka chhungte rual chuan ka haw ta a. Kan innei mai dawn emaw ka tih laiin a ni ta hauh lo mai. Ka beisei loh leh rin loh lamah thil a kal ta daih. Palai hmel reng reng hmuh ni a awm ta lo. Dinpuia ka call in, a reject hmak hmak a, message lah a chhang duh hek lo. Amah hmuh tumin an inah va kal ila, a awm ngai bawk si lo. A lo haw hun nghakin an kawtah chuan ka thu reng a, a hmel hmuh tur reng a awm lo. Beidawngin ka haw leh thin.







Ka mangan a, ka thin a rim bawk. Bum ni a inhriatnain ka khat a, mawl ka intiin ka inchhir bawk. Ka chhungte thu kha lo awih ni ila hetiang hi ka chungah a thleng lo tur. Inchhirin awmzia a awm tawh si lo. Ka tihsual rah chu ka seng mai a niang chu!






Thla a ral a, Dinpuia nen chuan mi hrang ang mai kan ni ta. Kan inbe ngai lova, kan inhmu ngai hek lo. Eng nge a tih a, khawiah nge a awm pawh ka hre ngai lo. A chanchin ka ngaihven lova, biak emaw hmuh pawh ka tum buai tawh lo. Kan thenawmte ka aṭangin a rui ṭhin hle tih erawh ka hria.






Ka hmingchhiatna leh mualphona a reh mai dawn emaw tih laiin ka thlatin hunbi neih ṭhin chu ka awl ta tlat. Ka luak chhuak ṭhin leh luhai ka neih te, ka pum nuam lo deuh ṭhinte chu hrechhuakin, hlauthawng ru tak chuan test kit leiin ka han intest a, rai inring deuh ring ngam chiah si lovin ka en chu rin sen pahnih lo lang kulh chuan ka ruaklo tih a tichiang hle. Ka lawmna leh ka lungngaihna chu a inzat vel ang. Thaw halhin bathroom aṭang chuan chhuakin khum lam chu panin, khumah chuan thuin ka kut a test kit chu ka en reng a, ka ngaihtuahna erawh a ruak vek thung. Engtia tihtur nge ka hre lo a, ka â vek ni berin ka hria.






Ka pi chu lo kalin ka kuta test kit a rawn hmuh chuan thil awmzia a hrethiam nghal vek. A thiam ang angin min hnem a, chak taka awm turin min ti bawk. Ni e, an thu zawm lovin ka duhdanin ka awm a, hetiang hi ka chungah a thleng si. Ka hun liam hnu ka siam ṭha thei lova, ka hma lam hun erawh ka siam thei. ‘Hun kal tawh, siam ṭhat theih loh vangin engah nge ka indawm kun reng ang, chak takin ka awm anga, ka hma a thil awm chu huaisen takin ka hmachhawn tur a ni ti a mahni infuihin ka ṭhutna aṭang chuan ka tho chhuak nghal a. Ka thawmhnaw bawm lam panin ka thawmhnaw chu ka thlak a, chhuak tur chuan ka insiam a.





Dinpuia te in ka thlen chuan a nu leh pa chiah an lo awm. Amah ngei hmuh ka duh vang chuan ka nghak a, rei vak lo hnu chuan hmeichhe pakhat nen an rawn inzui lut a, min hmuh chu a ding chat mai. A mitmengah min beisei lo tih a lang chiang hle bawk.




"Biak lawk che ka duh a," amah en kar chuan ka ti a, min en reng chung chuan a lu a bu nghut. A ban vuantu a bula nula ding erawh a ngaihdan ni lo tih hriat zetin a lo ner zeuh thung. Rei ni lo mah se, ka hmuh hmaih lo chiang kher mai. A kianga ding mipa hi eng atan mah kan tih loh tehreng nen hian!





"Min lo zui rawh," tih leh kalsawn a rual a, a hnungah chuan ka zui ve nghal a. Room-ah lutin tukverh bulah chuan a ding a, pawn lam a thlir a, a hnung lawkah huan ka ding ve a, zamna emaw hlauhna ka nei lo. "Sawi tur i neih chuan sawi vat vat rawh," dawhthei lo zet chuan a ti leh hmuk. Ka aw chu thian hmasa te tein, ih."Ka rai a," ka ti sap. A lo hawi let chiang kher mai. A hmel ka en a, a hlim hmel aiin mak a tihzia alang chiang zawk.




"Chuan?" a ti sup. "Naute pa i nih angin ka hrilh che. Ti tla tur chuan min beisei lo la,a chhan chu he naute hian tihsual a nei lo. Ka pai tlang dawn a."



"Mawhphurhna la turin min duh tihna a ni em?" Ka ṭawnglai pawt chatin a ti hmuk.



“Ni chuang love,ka ti ve hmak." A fa a nih angin a hriat ve a ṭha ka tih vanga hrilh mai chauh ka ni. Mawhphurhna laktir ka tum reng reng lo.





"A ṭha, ka fa ni lo laka mawhphurhna ka lak a ṭulna ka hre lo," a thusawi chuan min deng dawt mai. Engtin nge a fa a ni lo a tih theih zawk?





"Mi dang fa ni lovin i fa ngei a ni e," tih leh kawngka lam panin room chu ka chhuahsan nghal a.





Rilru na tak chuan kan in chu ka thleng hram. Chak lo tak anga awm duh lovin ka intichak lui a, mi te min selna zawng zawng chu ka haider lui a, ka naute lo piang tur ringawt ngaihtuahin ka hlim ve hram hram ṭhin. Ka naute hi ka hlimna leh chakna a ni dawn tih hi ka chiang em em a, tun apangin chakna min pe si a.





Harsatna karah ka naute pawh a ṭhang ve zel a, nitin maiin hlimna min pe a ni hawt. Ka chhungte ka lamah an ṭang tlat a, anni vang hian ka ding chhuak thei hrâm hrâm a, min fuih reng a, chu chuan huaisenna leh chakna min pe si a. Naute piang tur min phurpui em em bawk. Chutih laiin Dinpuia leh a chhungte thung chuan naute an pawm lo tih hriat zetin naute chu Dinpuia fa ni lovin mi dang a ni, tiin thenawm khawvengah thu an thehdarh a, a tirah chuan na viau mah ila a hnuah erawh ka na duh ta lo. Chutia, mahni fa duh lo leh mahni tu ngei pawm duh lo chu an tu an fa a ni malek ang a ni mai lawm tiin rilru ka siam fel ta a. He mi hnu hian eng ang pawhin min sawichhe mah se ka na duh tawh lo. An thusawi chu menah ka thlaksak hmak hmak a, rei min sawi peih lo kher mai.





Pathian ka chungah a ṭha em em a, nau ka pai chhung zawngin ka hriselna lamah harsatna ka nei lova, fanu ṭha tak ka hring chhuak ta a. Ka fanu, ka khawvela a lo luh ni aṭangin hlimna zawng zawng ka nei a, ka chhungten an duatin, an hlimpui em em a, a nu ber hian ka khawih tlem ber thin. Pawmna hun pawh ka chang ve ngai lo. Hnute a hnekin ka pawm vea a ni mai. A mutin khumah kan muttir a, a mutthilh chhung ringawt pawn an khua a har hman ṭhin. A zun leh ek thlengin an thian vek a, engkim a mamawh zawng zawng an ngaituah vek bawk.




Hmangaih taka dawmin kum nga chhung chu min enkawlpui a, school-a ka thawh leh tak avangin ka school kal hlan chuan an lo awm mai ṭhin. A fel reuh a, a pi bulah a pangchang thiam hle. A pi bula a awm chuan tuman kan hau thei ngai lo.





A pa chungchang a sawi ngai lova, ka nau hi 'Apa' a tih mai ṭhin vang pawh a ni mahna. 'Apute' ti rawh tih pawhin zu han ti duh miah lo va. Luhlul ve ngit nget tak a ni.





Eng vanga rawn inlan thut nge a nih ang? Kum a liam fe tawh a ni si a. Ka nau neih hma lawkin veng dang daihah an insawn a, inhmuh chu sawi loh a chanchin tak ngial pawh kan hre ngai lo a ni si. Ka rai thu ka hrilh hnu khan tum khat kan inhmuh bak, vawiin khan kan inhmu leh chauh a ni si a.





Khum aṭang chuan thovin intihharh tumin ka fanu ka nu kianga thu kak chu panin ka va chhaih ta ringawt. A bulah hi chuan rilru hahna hi a bo vek ṭhin.




Zanriah kan ei kham a, room-ah lutin test paper ka check nghal. Ka phone ri chu en lem lo chuan ka chhang a,Hello, a reh vang vang avang chuan ka phone chu ka hmai zawnah la thlain ka en a, number hlang chiah a lang. "Hello," ka ti nawn leh ngat. Ṭawng a awm loh avang chuan ka dah a. Number ngai tho aṭang chuan call a rawn lut leh nghal.




"Hello," ka aw a chang lam hret tawh.Buai bawk nen zaidam lo mi nih nen ka dawhtheihna hian a tlin lo ṭhin.





"Zo-i..," ka khawng awt thei. Tu aw nge ka hre chiang lutuk tlat.




"Khawngaihin, ka hmu thei che ang em?" Ka chhan lawk loh avang chuan a rawn ti sup.




"In hmuh chhan tur kan nei lo," tih leh phone off ka rual a, a rawn call leh chu reject-in ka phone chu ka switch off hmak a, khumah chuan ka theh thla nghal a. Eng vanga min hmuh duh nge ni ang? Kum tam fe liam hnuah kan inhmu a, a zan la lain min hmuh duh thu a sawi lehnghal a ni a. Ngaihtuah buai duh lovin ka lu ka thing nawk a, ka paper check lai chu ka chhunzawm ta a.





He mi tuk aṭang chuan ka school banin kan in piah ah ka hmu ta ziah. Ka be ngai lo va, min be ngai hek lo. Ka fanu min chuhpui ka hlau rilru viau nàin kar hnih a liam hnu pawhin eng thil mah a tih chuan loh avang chuan ka rilru chu tlem chuan a hahdam deuh. Message min rawn thawn chamchi a, Zu a nghei tawh thu leh a hnena kir tura min sawmna a tam hle, pakhatmah ka chhang ngai lo. Min phatsanna khan amah ka rinna a tichhe hneh em a, kir tumna ka nei lo.




Ni khat chu bazar-ah kalin dawra ka lut tur chu tu emaw ni hian ka darah min rawn khawih a, lehhawi a kan en chu Dinpuia chu lo niin. Ka beisei loh leh ka rin loh lutuk a nih vangin ka hamhaih vek mai. Ani erawh a nui suk.




"In be lawk ang," duh lo viau mah ila ka zui lo thei si lo. Inhnialna hmun a ni lo a, chutiang bawkin en nawm chhuah lah ka duh hek lo. Thuawih tak chuan a hnungah chuan ka zui ve dat dat a. Hmun pakhat mi awm vak lohna laiah chuan a ding a, ka lam lo hawiin,




"Eng nge i an?" ti supin min en kar.




"Ka tha," ka ti hmuk. Biak ka chak lo a hmuh lah ka chak lo nasa.




"Zo, i laka ka awmdan zawng zawngah khan ka inchhir a, min ngaidam rawh, "a thusawi chuan min ṭhawng kher mai.




"Min ngaidam nghal kher lo mah la, a pawi lo. Mahse, khawngaihin chance vawi khat chiah min pe leh la, nang leh ka fanu hi ka tina ngai lo ang che u. Ṭha takin ka enkawl ang che u." Ka ngawih reng avang chuan amah bawk chuan a ti a. Mak ka ti hle. Ngaihdam bakah khawngaih te min dil a nia, mahni tawka pa inti ve tawk tak mai kâ aṭanga chhuakah chuan a mak bawk em a ni. Mahse, thinrimnain ka khat thung..




"Tu nge i fanu chu? Ka fanu hi i fa-ah chhal hlek suh. Keima fa chauh. I thisen a tel a ni maithei, mahse, mi dang fa i tih ni aṭang khan i tan chuan a thi tawh." Ka aw chu a nem lo khawp mai. Kut zungchal han hmuh êm chu ka ti a, ka insum hram hram a ni. Engtin nge ka fanu te a tih ngam zawk ni? Zak thei lo hi kan ti mai mai khawp a.



"Zo, khawngaihin, ka tihsual chu ka hria, ka pawm thlap. I thinrim pawn ka chungah engpawh ti rawh. Mahse, chance vawi khat chiah min pe leh rawh," ka kut rawn vawn a tum chuan ka lo la sawn vat a.




“Min phatsan a, hmingchhiat, mualphona ka tawrh lai khan min hnem aiin min kalsan a, chu mai duhtawk lovin nang leh i chhungte chuan min deusawh a, mi hnenah dawt sawiin ka mualphona in belhchhah a nih kha.Kha kha ka theihngilh theih i ring em ni?..."



"Zo..." Ka ṭawng lai chuan a ti sap..




"Ngaidam chu Pathian hnenah dil la, ka ngaihdam kher i phut tlat chuan ka ngaidam che. Mahse, chance chu a awm thei lovang. Ka rinna che i tihchhiat tawh miau avangin." Kal tumin ka inher chu ka kut a rawn man a,




"Kal suh," a aw a natna lang chu ka hai lo. Mahse, kir thei ka ni tawh lo.




"Beiseina beisei bo min siam a, thinlung kehsawmin min kalsan a, ser nung tihdam leh chu thil harsa tak a ni. Chuvang chuan min kalsan la, kan hmaah rawn inlan tawh suh. Ka ngen che nih chu! Khawngaihin, min kiansan rawh". Ka kut chu thlahin ka lam a rawn pan hnai a,




"Hlim takin awm ang che u, ka tihsual vangin ka dam chhung hian ka inchhir tawh ang. Harsatna in nei emaw min mamawh chuan lo sawi la, in tan ka awm reng ang". Min en vang vang a, a kal ta a. A hnung lam aṭang chuan ka thlir reng a, khawngaihnain ka khat, mahse, a rem tawh si lo.




Hmingchhiatna leh mualphona karah ka fanu a lo piang a, a lo pian chhuah ni aṭang vawiin ni thlengin hlimna tam tak min pe a, a lo piang lovang tih hi ka hlau ngawih ngawih. Ka hlimna a ni a, ka chakna a ni bawk. Ka khawvel a ni a, ka engkim a ni.





Hringnunah hian vanduai changte awm mah se kan lungngai reng kher lo. Tluk chang awmin tihsual chang nei ṭhin mah ila, beidawng lovin kan tho leh ngei tur a ni. Kan hma hunah eng hlimnain nge min hmuak dawn kan hre si lo.

A tawp ta..

(Based on true story)

[nshima]



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)