HELMET VANGA ENCHIMLOH DINGTEI

Story tawi te te emaw luanliamna emaw post na
harmachis.arman
Posts: 4
Joined: May 1st, 2016, 11:13 pm

HELMET VANGA ENCHIMLOH DINGTEI

Unread post by harmachis.arman » May 9th, 2016, 10:33 pm

HELMET VANGA ENCHIMLOH DINGTEI


Traffic Police awmlohna hmunah hi chuan helmet hi ka khum peih nganglo a ni. Lu leh hmai an khuh hlup mai hi a thawpik thlak ka ti a. Ka khum pawhin Traffic Police in min manloh nan ka khum ve mai mai thin a, dik tak chuan keima tan ni lovin Traffic Police tan ka khum a ni ber. An awmlohnaah tawh phawt chuan tawite pawh nise ka hlip thuai thuai mai thin a ni.

Durtlang Leitan leh Bawngkawn inkarah Traffic Duty an awm ngai lo bawk a, Leitan ka pelh veleh ka ding a, ka helmet ka hlip a, engthawl fahranin Zawlkhawpui lampanin ka tlan thla par par a. Thlifim lo thawin min han chhem te chu nuam ka ti a, tlan paha Lengpui Airport vel kan thlir zauh zauh thei te chu nuam ka ti hle a ni.

Mahse, ka vanduai nge ni, motor silna hmun ka thleng tihah chuan Traffic Police uniform ha nula ni ngeia ka rin pian nalh zet hian min lo phar ding a. A scooty a sil tir avanga chu laiah chuan lo awm ve a nih ngei ka ring a. A bulah chuan ka ding a, nui deuh sang chung hian, “ Helmet kha khum hram ta che. Helmet khum tura dan awm hi a khumlote man a, sorkarin pawisa a tuakna a ni lo va, two wheeler khalhtute hi him ngei se tih duh vanga dan hi siam zawk a ni si a. Chuvangin, midang tan ni lovin, NANGMA TAN helmet kha khum la, i in hmeh bakah eksiden i tawk palh a nih pawhin i tan a tha dawn a ni. I thei angem?” a ti a.

A hmelah min hmuhsitna emaw, thinrimna emaw a lang lova, duhsakna lo lang zawkin ka hria a. Chhungrilah ka zak chem chem a. Diktak chuan mipa chu nise ka meng rum ang a, pawr deuh hlekin ka chhang ang a, “Midang pawn an khumlo fo alawm, engvanginnge kei hetianga min tih bik?” tiin ka chhang ngei ang. Mahse min titu hi mipa a ni lova, chubakah a hmelah thinrim hmel a lang bawk si lova. “Ni e, i sawi chu a dik alawm. A thawpik thlak tiin ka hlip leh mai thin a ni. Kan khum nghal ang e,” ka ti a. Ka khum ta nghal a. Ti khan tluang deuhvin i tlan dawn nia aw. I fel lutuk,” min ti a, ka tlan ta nal nal a.

Chumi ni atanga chhiara hapta hnih a ral hnu chuan kan khua Sihphir atangin Nisapuiah ka thianpa nen kan kal a. Mahni bike ve ve kan khalh chhuak a. Ka thianpa Vula chuan a fullface helmet chu a khum nghal a. Kei erawh chuan ka khum peih lova, tumah min mantu tur pawh an awm lo tih rilru pu chungin a ken pawh ka keng peih ta lo a ni. Vula hi a speed a sang fu zel mai a, ka um phalo lam deuh thin a. Lungdai thlen thlak hma kawng kawia ka tlan mek lai hian ri deuh sawk hi ka hria a, ka hriat rual chuan kawngkawiah chuan ka dak chhuak a. Kawnga oil lo bua dum zul mai chu chawpchilhin ka hmu a, chutah chuan thianpa Vula chu a tlu a, kawng chhak lam tuihawk luankawrah a lo tlu mek a, “Fimkhur rawh,” a lo ti tuarh a. Ngaihtuah chiang hman lovin hand brake leh foot brake tang kawpin din ka tum a, oil bua ah chuan ka tawlh ta a, kawng thlangah ka tawlh liam a, thing pakhat ah hian ka lu ka sawh a, a thim mup a, engmah ka hre ta lo a ni.

Ka han harh chuan Durtlang damdawiinah ka lo awm a. Ka chhungte leh ka thianpa Vula te chu an lo awm a. Ka lu chu an lo tuam bur mai a, chet ka tum a, ka taksa chu a lo na hle mai a. Vula chuan min rawn hnaih a, “Thianpa, engnge i an? I taksa lamah chuan pem engmah vak a awmlo,” a lo ti thuai a. Ka nui sak a, ka lu chu a na hle a ni tih ka sawi hman chauhva, ka muhil nge nikhawhrelovin ka awm zui pawh ka hre lo. Ka han harh leh chuan ka nau Mapiana chauh a lo awm a, banga sana intar ka en a, zan dar 12:05 a lo ni a.

Ka aw ka han thian a, Mapiana chuan min rawn ngaihsak vat a. Ka beng dinglam hnung chu inchi thum vela thuiin a kak a, thisen pawh a chhuak nasa hle a, mahse ka luruh chu engtinmah ka sawh pawilo hlauh niin Mapiana chuan min hrilh a. Damdawiin atanga ka chhuah hnuah pawh chawlhkar thum zet inah ka la awm zui a. Ka lu hi chawpchilh hian a rawn na vak a, minute thum vel hnuah hian a zia awm leh mai thin a. Mahse a rawn nat lai chuan engdang mah tih theih chi zia zang a ni lo a ni. Class pawh ka kal lo rei ta fu mai.

Nikhat chu inah keimah chauhvin ka awm a, Nausel khua leh a chung tlang vel te, Chalfilh tlang dung velte ka thlir vang vang a. Ka lung te chu a leng ta viau mai a. Chutih lai tak chuan Traffic Police nula ni ngeia ka rinin, “Midang tan ni lovin, NANGMA TAN helmet kha khum la, i in hmeh bakah eksiden i tawk palh a nih pawhin i tan a tha dawn a ni. I thei angem?” a tih kha ka bengah a rawn ri a. A aw nem leh ngaihno bei tak chu tunah chuan a vin ta riau hian ka hria a. Helmet hi midang Traffic Police tan emaw ka khum ka lo ti thin a ni tih ka inhmuchhuak a, keima tan ngei ka khum tur a ni tih chu fiah takin ka hre ta a ni. Ka khum avangin Traffic Police tan hlawkna leh thatna engmah a awm lo, ka khum loh erawh chuan dan ka bawhchhia a, Traffic Police ka tibuai a, keima taksa leh nunna chu ka ti derthawng a lo ni a. Tul lo zetin pawisa ka chawi phah zeuh zeuh bawk a. “Umm, tun achinah chuan keima tan ka khum zel tawh ang,” tih chu ka thu tlukna a ni ta a ni.

Kan khua leh khawdang dangah pawh Helmet khumloh vanga eksiden a boral ta te, piangsual hlen ta te, na taka inhliam te an awm fo a ni tih chanchinbu atang pawhin ka chhiar fo va, mah se ka lo harh chhuak thei reng renglo mai a lo ni a. Two Wheeler khalh chunga khumloh kha engemawti tak hian chakna leh nuam tihna ka nei tlat thin a, intihpa-na chi khat a ni em ka hre lova, a chhan dik tak ka hre chiang chiah lo a ni. Tichuan, kha traffic police hmeichhia kha ka tlan chhuah theih hmasak berah chuan ka zawng chhuak ngei ang a, a hnenah ka sualna ka puang ang tiin rilru ka siam a. Mak ang reng tak a ni, a hnena ka inpuan rual in engemawti taka thawveng tur ni a inhriatna ka nei tlat a nih chu mawle.

Ka eksiden atanga thla thum a ral hnu chuan ka in fit tha ta viauva. Class ka kal lo rei tawh a, chuvangin class kal chu a tul tawh bawk a. Ka hliam te chu a dam chiang tawh a, ka lu na vak thin pawh a na a rawn chhuah chang chu la awm mah se a zia awm viau tawh a. Helmet chu khumin rilru engthawl takin Aizawl lam chu panin ka tlan chhuak ta a. Chumi ni chuan ka rilru ah thildang vak a awm lo. Kha traffic police mawlh mai kha.

Class kan bang a, Kulikawn lamah A-4 paper (xerox paper) ream thum lei turin ka kal a. Ka lei hnuah Kulikawn ka tlan thleng thla a, chutah chuan ka hmu lo va. Ka tlan let leh ta a, Bawngkawn ka thlen pawhin ka hmu ta miah lo mai a. Han letin kawng dangah tlan kual vel dawn ila, a tlai tawh bawk si a. Sihphir lam pan chuan ka tlan chho ta a. Leitan thlen hmaa motor silna ka thlen chhoh chuan ka ding a. Motor lo sil mektu, han ena rorum hmel zet mai chu ka pan a, a motor sil lai mek chu ka be ta a. Biak a lo nuam fu roh leh nghal a. Khami nia traffic police hmeichhia kha tunge a nih a hria em tiin ka zawt a.

“ Hriat ava har awm ve. Nitinin rawn sil tir hi an awm reng a, chutiangin a mimalin tumah ka lo chhin chhiah bawk si lova,” a ti a. A nui deuh suk a, a motor sil lai chu a chhunzawm mial mial a. Han zawh zui zel chi niin ka hre lova, a thusawi chu a dik tih ka hre bawk a. Ka Bike lampan tura ka inher chiah chuan, “I star deuh em ni?” a rawn ti a. Kei chuan, “A...star deuh chuang love. Hmuh duhna ka nei a ni,” ka ti a. A aw a han thian a, a kut chu puanchhiain a hru hul a. A ipte atangin a mobile phone chu a phawrh chhuak a, hmet nuap nuap chungin, “Traffic Police hmeichhia, a scooty min rawn sil tir thin chu pakhat chiah a awm a, a hming chu..ih..ngawi rawh aw.....a...Dingtei a nih hi. A hun awl neih hi darkar chanve te a ni a. Kan awl lai a ni nge nilo tih min rawn zawt hmasa phawt thin. Amah hi a ni ngei ang,” a ti a. Dingtei number chu ka phone ah chuan ka dah lut a, lawmthu ka sawi zawh hnuah ka tlan zui ta nghal a.

Chumi zanah chuan chawei kham atangin phone tumin ka phone chu vawi tam ka tin a, mahse ka thulh leh thin a. Zan dar riat ah chuan kan bathlarah thu chungin thih leh thih tiin ka phone ta a. A la har zek lehnghal a, ka beidawng hman tep a ni. A pik up a, “Hello,” a rawn ti nghal a.

“Pi Dingtei i ni em?”

“Aw ni e. Engnge ni ta?”

“Ka hming chu Lalramnghaka a nia. Ih Pi Dingte, naktukah khawiahnge i duty ang?”

“Office lamah ka awm ang. Khawlaiah chuan engemaw chang chauhvin ka chhuak ve a.”

“Tlai dar engzat thleng nge office ah i awm ang?”

“Dar 5.”

“Naktukah ka hmu thei che a ngem?” tiin ka hmuh duh chhan te chu tawi fel takin ka hrilh a.

Chumi tukah chuan class kan ban velah a awmna office chu ka pan ta a. A thutna bul ka thlen rual chuan ka insawi ta nghal a.

“Ka ngaih te a thalo rum rum a, min hmuh duh chhan kha i sawi chiang si lova..” nui sen sen chungin a ti a. Thutna min kawhhmuhah chuan ka thu a.

“Pi Dingte, i hnenah thil sawi ila, i ngaithla hman angem?”

“Hman e, i duh chu sawi rawh. Licence chungchang nge document lam zawk?”

“Ni lo,helmet chungchang lam a ni.”

Durtlang kawng chho motor silnaa min lo tih din dan te, helmet khum tura min tihdan te, a hnua eksiden ka tawh dante leh ka inhliam dan te, ka rilru leh thinlungah helmet hi traffic police tana khum nia inhriatna ka neih tlat thin thute, khum lova ka tlan hian pa deuh riauva inhriatna ka neih thin dan te leh tunah chuan keima tan helmet hi khum tur ka ni tih ka inhriat chian takzia te, a thu min hrilh avanga chutiang chu lo hrefiah ta ka nih thute, thingtlang hmun khawiah pawh, traffic police awmlo mah se helmet chu keima himna atana khum tur ka ni tih ka inhriatchian tak zia te leh chung chu ama tawngkam tawite vang a nihzia te ka hrilh a. Ka sawi chhung chuan khawdang hawi lovin leh thildang pawh ti lovin ka mit takah min enin ngaihnawm ti takin a ngaithla a. Ka sawi zawh chuan a thaw halh a.

“A va lawmawm ve. Ni e, mi tam tak hian traffic police tana helmet hi khum niin an inngai tlat a. Mahni tan ngeia khum tur kan ni zawk si a. I thil tawn leh sawi chuan min van ti lawm ve. Hawh, thingpui ka khilai ang che. I duh duh i hmeh dawn nia,” a ti a. An hotute hnenah engemaw a sawi zawk a, an canteen ah chuan min hruai ta a.

Keiman ei leh in man chu ka pe vek a, a phu a ni. Mahse,chumi zan atang chuan Dingtei chu ka ngai ta riau mai a. Thil ka sawi lai ka mit taka min en chunga ngaihnawm ti taka a ngaithla lai te kha.....a kianga ka awm lai khan a hmelthatzia ka lo ngaihtuah miah lova, zaninah hian ka mitthla ah a hmel a lo lang leh a, a zunah ka uai ta deuh der mai niin ka hria a.

Biak a, hmuh leh ka chak a, mah se ka ngam chiah bawk si lo. Chawlhkar khat liam hnu chuan zan dar 7:30 velah ka risk leh ta tawp mai a.

“Hello Pi Dingte, Nghaka, Lalramnghaka kha ka nia, min la hria em?”

“Hria e. I rawn inpuanna kha ka ngaihtuah nawn fo thin asin. Engnge ni ta? Puan tur i nei leh tawh em ni?”

“ Ih, a ...nei a ni mai thei...”

“Dingte tiin min ko mai thei em? Min Pi hian engtin emaw tak ka awm a, nuam ka ti chiahlo a...”

“He he. I inhmeh ka tia. Mahse Dingte tiin ka ko zawk tawh mai ang che.”

“Chuan.....min rawn biak chhan chu..?”

“A...ka hmu leh chak che.”

“Chak tak tak chuan min hmuhna tur hmun chu i hria tiraw?”

Ka mut hnu te chuan kan inbiakna te chu ka ngaihtuah let a. A hmel duhawm tak maite chu ka mitthla ah a lo cham a, kan inbiak laia a nuiri te chu ka bengah a cham bawk a. Ka lung chu a leng ta viau mai a. Dingtei chu ka ngai a ni.

A tukah chuan class banah ka pan ta nge nge a. Hna a lo ngah deuh avangin a hma ah thuin ngawi rengin ka lo nghak a. Minute 20 hnu ah chuan a zo thawkhat ta a niang, a thaw halh a, a rawn hawi chhuak a, “I ril a tam tawh em?” a ti a. Kei chuan, “Tam love, kan college canteen ah ka ei a. Ka rawn tibuai chein ka hria a, ka haw mai zawk dawn emawni le?” ka ti a.

Dingtei chuan, “Tihbuai loh kha. Ngawi rengin i lo thu a ni lawm ni? Kei chu vawiinah engmah ka la ei lova, ka ril a tam tawh. Tirawh canteen ah kal ang aw,” a ti a. Kan pahnih chuan canteen ah chuan kan inzui lut leh ta a.

Dingtei chu ka bel chiang tial tial a, ka ngaina tial tial bawk. A nu leh pa hi kum khat chauh an in nei a. Mahse a nu nu leh pa te chuan a pa chu makpa atan an pawm thei ngang lova, palai vawi tam tak an tirh pawhin an inrem thei lova, chutiang taka iai tute lakah chuan Dingtei pa pawh chu a tlawm ngai ve a, tichuan Dingtei nu chu a kir leh ta a. Nau a lo pai hman a. Pasal pawh nei leh tawh chuang lovin Dingtei chu a pawm tleiin a enkawl chho ta a. A nu sorkar hnathawk a ni a, eng department berah nge a awm Dingtei sawi chu ka hrechiang tawh lo, Assistant a ni tih erawh chu ka hria a ni.

An inah te pawh ka chuang kai ve ta zauh zauhva, a nu chu nunnem leh zaidam tak, nelawm leh zahawm tak a ni a. A kianga awm a nuam viau na a, a zahawmna chuan engemawti tak hian min thunun deuh tlat hian ka hre thin a. A hmel a tha a, tlemin a thau ve lek lek a, a la upa vakin a rinawm loh.

Dingtei tak pawh hi a zahawm. Ama sawidanin pawl sawm an zir laiin an Headmaster chu a ngaizawng ru viau thin a, a fanute nen an inkawmin class khatah an awm a, a rilru chu a thiannu chuan a hria ang tih a hlau hle thin. Mahse ngai zawng ve satliah mai a ni a, an Headmaster pawh chuan a hria pawhin a ring lo. Chumi bak chu hmangaih chu sawiloh ngaihzawng pawh a nei ngai lo a ni awm e. Mi ti zawk zawk lem lo, nungchang tha tak, mahni hna nuamti leh taima taka thawk mai mi a ni. Hmeltha tia han sawi uar vak tur chu a ni lo va, keia mitah erawh chuan a tluka tha an awm miah lo a ni.

Tlai khat chu Millenium Centre ah kawr lei a duh avangin kan kal dun a. ATM ah pawisa a la chhuak dawn a, a kianga lut ve turin min ti a. Pawisa lachhuak tura a hmeh vel lai mek chuan, “Dingte,thil pakhat ka hrilh duh che asin,” ka ti a. Chutih lai tak chuan a pawisa lak chhuah tur zat a hmeh lai tak a ni a. Hawi pawh hawi sawn chuang lo chuan, “Min hrilh ta che,” a ti a.

“Ka hmangaih che Dingte.”

A hnung sir dinglam deuhva ding ka ni a, min rawn en a. Kan hmai chu a insi lo chauh a ni.

“Nghaka, i ti tak tak em ni?”

“Ti tak tak. Ka hmangaih che. Ka ngai takzet thin che Dingte.”

“Min hrilhna hmun hi..........” a nui sen sen a.

“Ka sawi ngamna hmun a ni miau si a. Dingte, min ngaina ve tiraw?”

“Ngaina lutuk. Nichina mi kha han sawi nawn leh teh.”

“Ka hmangaih che Dingte.”

Kan in en a, a mitmeng chu a nung sar mai a, chutah chuan sawifiah theihloh mawi tak hi a lo lang a,
.
“Kha....in pawisa lak tur kha a lo chhuak tawh a nia,” nu pakhatin a rawn tih veleh Dingtei chu a hawi sawn vat a. Pawisa chu a la a, a nui har har a.

ATM atanga kan kalsawn leh chu ka ngaihbel vang emawni, a pen te chu a zang khaiin a hlim hmel hlein ka hria a. Min hmangaih ve tur chuan ka duh takzet a, mahse ka phut ngam lo va, ka beisei ngam bawk heklo. Diktakin a nu nen hna an nei ve ve a, an khawsak a nuam tawk a, keini Sihphira awm, thlai leh bawng nena ei zawng mai mai chu engahmah min ngaih ka ring lo.

Dawrpui phei ah te kan kal dun a, khua chu a lo tlai ta a. “Nghak, kan inah chaw ei mai ta che,” tiin min sawm a. Mahse kei chuan, “Khai, ka haw zawk ange. I hnena ka thusawi kha i huatloh hram ka beisei,” ka ti a. A nui a, “Hua ila i sawi zawh rual khan ka awmdan atangin i hre nghal vek dawn lawm ni?” a ti a. Ka bike awmna kan thleng a, “Ka thlah dawn che nge nangmahin i haw dawn?” ka ti a. Ani chuan, “A hla lo bawk a, keimahin ka haw mai ang e. Lo leng leh vat ang che aw,” a ti a. Bike ka tinung a, ka tlan dawn tep tih ah a rawn tlan let a, ka helmet chu tlema rawn keu deuh chungin ka beng bulah chuan, “Nghak,keipawn ka hmangaih che asin,” a ti a. Hawi pawh rawn hawi let tawh lovin a kal a, a kal ta zel a. Ka thlir zui vawng vawng a.

Mi kal vel te chu ka thlir a, an hlim em em vek hian ka hria a. Hauva building te pawh chu a mawi ta riauvin ka hria a. Dawrpui phei te...a..engkim chu a mawi a ni. Dingtei nena kan intawnna bul ka ngaihtuah let a, HELMET vang liau liau a ni. “HELMET VANGA ENCHIMLOH DINGTE” keima hriat tawk lekin ka ti a. Ka kianga traffic police chuan min nuih pahin, “I va hlim hmel ve, nula khan engnge a hrilh che?” tiin min rawn fiam a.

“Hlim, hlim takzet. Min rawn hrilh chu midang tan ni lo, keima tan chauh a nih avangin ka hrilh lo mai ang che,” nui chungin ka ti a. A hrethiam ve khawp mai. Chumi tlaia Sihphir lampana ka tlan chho chu, engkim hian duhsakna min hlan niin ka hria a ni. Khawvel hi a thar vek a, engkim hi a mawi a ni.

Kan inneihni a Pastor thusawi hi a mawiin a tha em a, tlem te kan tarlang ve teh ang.

A thupui ah, “Nangmah i in hmangaih angin i vengte hmangaih rawh,” tih a hmang a. A tawi zawngin ti hian kan sawi mai ange.

1. Mahni inhmangaih thiamlo leh inhmangaih nachang hrelo kan tam ta. Ruih theih thil hmangtein kan taksa kan ti chhia a, sualna hmangin kan thlarau kan ti rethei mek hlawm a, chatuan hremhmuna kal turin kan taksa leh thlarau chu kan awmtir mek a ni.

2. Mahni inhmangaih dan diktak chu Nunna hnar Pathian Isua Krista vuan a, amah chu zui a, a duhdan anga nun hi a ni.

3. Kan vengte chu pakhatnaah chuan Isua Krista a ni tih samari mitha tehkhinthu atangin kan hmu. Pathian kan hmangaih hmasa ber phawt tur a ni a, chu chu mahni inhmangaihna dik ber a ni. Tichuan, kan vengte pahnihna kan mihring pui te chu kan hmangaih thei ang.

4. Mahni inhmangaih nachang hria chuan, a nupui pasal chu a hmangaihlo thei lo vang. Hmangaihna hi a ropuiin a hlu asin. Hitlera kha khawvelin an dem rawn luai luai a. Mahse Eva Braun-i tan chuan khawvelah Hitlera tluk tur reng an awmlo. Thih dawn darkar thlengin Eva Brauni chuan Hitlera a zui a, a hmangaih a, a thlang asin. Hitlera awmlohna khawvela nun zel kha Eva Brauni chuan a thlahlel lo. I kawppui hi hmangaihna diktaka i hmangaih chuan i tan malsawmna a ni ang a, lungawina leh hlimna a thlen sak che ang a, chu chu i tan a ni zel dawn a ni.

5. Hmangaihna chuan midang tan thiltha tih nuam a ti a, chu chu ama tan a lo ni zel thin. Mi tam tak chuan helmet hi traffic police tan an khum emaw an ti a, chutiang mite chuan traffic police awmlohna hmunah an khum lo va, an tan chhiatna leh thihna hial thlentu a ni thin. Mahni tana khum nachang hria erawh chu an him thin a ni. I nupui pasal hi hmangaihna avangin ngaihsak nachang leh duat nachang hria la, chu chu nangma tan a ni. Two wheeler khalh tan midang tan ni lovin mahni tan helmet hi khum tur a ni, chutiang chiah chuan midang tan ni lovin i nupui pasal tan nung ang che. I tan lawmna leh malsawmna a ni ang.

A dikin ava tha em. Dingtei nen chuan Pastor thusawi chu mak kan ti a, kan pahniha inkara thil thlengte chu a hre vek emaw kan ti hial a ni. Helmet avanga intawng a, in hria a, nupui pasalah hial in nei ta kan ni si a. Tunah chuan fa mipa 1 leh fanu pahnih neiin chhungkua kan lo din ve ta a. Kan nupa inhmangaihna chu a pung deuh deuh ni hian ka hre thin. HELMET VANGA ENCHIMLOH DINGTEI kiangah zawng ni leh thla leh kum hi a rei zo mawlh lo a nih hi.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)