WHY?

[Zualtei B Zualtei]

WHY?



Zualtei B




"Ehe.. Khawnge Sir Sama? " Kan lut vei rawk a. Kan ri hluai lehnghal. Lawn chair a mipa pakhat lo thu kur kan hmuh chuan kan hawihai teh e. Sir Sama lah hmuh tur a awm tawp si lo.

"Lo kal r'u.Sama chu a thiannu damdawiina awm a va tlawh lawk a, a lo let tep tawh ang. " A phone khawih lai dah thlain min lo nuih a. Kan pathum chuan zahzum hmel takin lawn chair pakhatah chuan kan thu ve a, kan zah loh tehreng nen.

Kei hi Tei ka ni a, tar lam fa ka ni a, u pahnih mipa ve ve ka nei bawk. Kan upa ber hian nupui nei tawhin Kolasib lamah an inbengbel a, chuan kan milai Au Mama hi Doctor niin private hospital-ah a thawk ve bawk a, kan bulah a la khawsa ve reng bawk. Kei erawh class 12 ka la kal mek thung.
Kan thian pathum kei, Seni leh Mali hi naupan lai atanga Inkawm tawh kan ni a, veng khata awm kan ni bawk a, tihian kan la inkawm chho zel anih hi. Lehkha kan zir peih lo lutuk hi kan chhungte an mangang a, tuition min kal tir tawp. A tirah kha chuan tutor rawih mai an duh a mahse kan pathuma kan kal ho theih dawn loh chuan kan ti ve tlat sia, tihian Sir Sama min biak sakin a inah tlai tin kan va kal thin zawk a, kan ngaina tawh viau. Amaha khawsa a ni a, Shillong-a awm thin a ni awm e. Amah hi mipaah chuan a ngo mah mah tih theih a ni a, a nu deuh hlekin ka hre thin bawk. Ka thiante chuan pa an ti thung.

Ka inrin loh laiin lawn chair pakhata thu chu ka va melh leh zeuh thin a, a mak lutuk, engtin emaw ka awm. Ka sawi thiam si lo. Ka va melh leh chuan ka meng bial kawk nghal, min lo melh ve run chu niin. Ka kun nghal daih. Ka awm a nuam thei ta reng reng lo mai. Darkar chanve vel chu ngawi rengin kan thu a, kan tawng ve paw'n kan phun sar sar a ni mai. Sir Sama a lo thleng ta. Ka lawm zia chu aw....

"Sorry lutuk aw.. Ka thiannu a nia, a serious deuh a" Tiin a nui a, ka thiante pahnih chuan min sik leh nasa tawh viau. Lehkhabu a phawrh nghal a, dawhkan a siam rem bawk a.

"E, chuan hei ka cousin ania, a lo insawi tawh em..? " Zawhna mitmengin min melh kual hlawm a, kan lu kan thing ringawt.

"Bro, lo insawi ve tur che lawm. " Ti lehin chupa chu a va en a, chupa nui ri huk chu ka hria mahse ka melh ngam tawh lo hrim hrim.

"Muana a nih hi. U Muan in ti mai dawn nia, hei min ngai tawh a min lo zin a nih hi. Shillong a khawsa a ni a, chawlh a lo hmang ve dawn a nih hi. " Tiin a cousin chanchin chu a sawi a, ka lo ngaihthlak uluk tehreng nen a sawi tlem lutuk a.

"Vawiin chu bang tlai deuh mai ang u aw. Duh leh Muana hian ava thlah mai ang che u.. " A ti leh zung zung a, ka thiante lah chuan 'yes' an lo ti hmanhmawh pek a. Sir Sama bula hun hman tam tluka chak nei hek lo.

"Mahse Sir kawng a hre dawn mi.. " Ka inrin hmain ka sawi thut.

"Lungngai suh. In in chu him dam takin ka thlen ang che" Ka hnunglam atanga U Muana'n nuih za âw deuh taka a lo tih chuan ka phu zawk. Ka zak leh hnuhnawh. Vawikhat mah ka tawng leh tawh lo.

Kan haw dawn chuan a thim tawh a, kan haw tlai thin hrim hrim a, mahse vawiin chu nidang aiin Sir Sama'n a duhthaw deuh a, ril a tam duh khawp mai. U Muana car-ah chuan kan chuang ve ta alawm, a hnungah kan thu a, nidanga car leh taxi vela a hmaa thut inchuh thin kha tumah zuk thu duh tlat lo a. A bikin ka duh lo lehzual. Tawng miah lo in kan tlan zel a, U Muana chuan kawng chu map hmangin a hre ve zel a, Seni te in kan thleng hmasa bera, a chhuk nghal. Ka khur titih ringawt, a chhan chu Mali a chhuk ve leh ang a, keimah chauh ka ni tawh dawn. Kan in lah ava hla ve deuh bawk si. Lalpa!

Mali a chhuk ve leh ta. Ka thaw tha thei tawh lo hialin ka hria, a lum pup pup a, ka kun tlawk tlawk tawp. A khuh kharh a, ka va melh thut, darthlalang atang chuan chiang em emin min lo melh ve reng. Hawi sawn nachang pawh ka hre tawh lo. A ding dat a, a rawn hawi a.

"Kan thleng tawh.. Hei lai hi a ni lawm ni? " A rawn ti thum chhap. Ka'n hawi chhuah chuan kan in kan lo thleng der tawh. Ava mak em! Hmanhmawh deuhin kawngkhar chu ka hawng a, ka tlanchhuak nghal.

"Lawkin.. " Ka ding chat.

"Hei i bag.. " Ka inen chiang a ka bag ka ak reng reng lo. A car-ah khan ka theihngilh a nih chu. Hreh lutukin ka va let a, car tukverh atang chuan ka bag chu ka la a, "Muttui aw. Naktukah kan inhmu leh dawn nia"

Tawng tawh lovin ka kal daih. Inchhung ka lut chiah chu ka thaw chhuak hawk. Nichin khan ka lo thaw chhuak miah lo tih na em ni? Ka room-ah ka tlan lut nghal a, ka lungphu lah chu a ri dup dup lehnghal. Ka awm chu ka dawm vang vang a, ka khumah ka mu zal nghal.. Ka ngaihtuahna chu a bing mup a, U Muana ka mitthla zel lehnghal. Kei hian ka vawikhat hmuhnaah ka duh nghal tihna em ni dawn le?

Ngaihzawng ka la nei ngai lova, star pawh ka nei chuang lo. Mipa hian min hneh tehchiam lo ka ti mai. Bemtu neuh neuh hi chu ka nei ve thin a, mahse ka ngaihsak thlawt lova, thianah kan inchan leh nge nge thin. Min bem ve thintute lah chuan pawisa puk te min rawn dil leh nawlh thin a, a then lahin min rawn 'Bro' leh ringawt zel. Hmeichhe mawlmang ve tak, mipa ngaihsak lo kha ka ni tawp. Tunah erawh darkar tlem te chiah ka la hriat U Muana laka ka rilru puthmang hi ka hrethiam tawh hlawl lo.

Nidang aiin ka insiam te chu ka rei a, ka sam lah ka tawn tha zing malh malh khawp mai. Sana ka en rualin ka tlan chhuak nghal a, kan innghah thinna lam pain ka pa nen kan inphur chhuak a, ka thiante chu an lo ding reng tawh.

"I va rei ve." Seni. Seni hi kan pathumah chuan a zei ber a, a lerh ber bawk. Sir Sama pawh hi a star.

"Ehe.. Khawi maw I hmai kha" Mali thil man chak lutuk hi chu aw.. Ka hmai chu a rawn khawih a.

"Powder I hmang elaw. " A ti thawt. Ka rin aiin a tawng ring lehnghal. An tawng leh hmain Bus a lo thleng a, ka nawrlut vat a. Bus a chep bawk a an sawi zui leh ta lo. Mahse zawhna tam tak ka la dawng dawn tih ka hre ve kur thung.

Make up hmang ngai miah lo ka ni a, mahse ka vun erawh a nung sar thung. Ka hmel erawh a tha tehchiam lo naa ka vun avang hian tuma'n hmelchhia min la ti ngai lo thung. Vawiin hi a vawikhatna tak tak a ni. Ka nu powder ka hmang a, lan that loh ka hlau ta lutuk te hi ka zak zawk hial mahse nizan lama mutmu ka tuah theih loh chhan mipa hmeltha tak vang a ni.

Rin ang ngeiin class kan thlen rualin min zawt nghal a, ka sawi zak bawk si mahse sawi loh theih a ni bawk si lo. U Muana bula ka awmdan dang vek leh kan inmelh dan vel chu ka sawi ta a. Kha hun kha darkar tlem te ni mah se kum khat chuang angin ka sawi thei tlat a nih chu mawle. Anni lah chuan ngaihnawm an lo ti em em a.

"Um, U Muana chu i taah ngai hmak rawh" Seni teh tlawng chu. U Muana hi kei aia upa daih a ni a. Master degree hial a nei tawh lehnghal, bakah a chhe lo a, a palian reuh lehnghal a, engtinnge ka taah ka ngaih hmiah theih ang ni.

"I mawl e a.. " Ka ti tawp.

Ka thiante chuan chutia a vawikhatnana mipa ka ngaihven ve tih an hriat chuan an lawm lutuk a, min neih tir an tum em em lehnghal. An mawl ania aw.. A ruk tak chuan ka ta nise chu ti ve viau mah ila ka neih phak a niin ka hre bawk si lo.

"Sir, hei hi ka solve thei lo.. " Mali leh Sir chu an inhrilhfiah leh mawlh mawlh a, kei leh Seni erawhin kan chawh lai ngawt chu kan buaipui a. Thawm a rawn awm thut chuan ka hawichhuak nghal. U Muana chu helmet nen a lo lut a, min rawn nuih sukin room-ah a tlang nghal.

Phur deuhin kan kal a, kan phur chhan ber lah a lo awm si lo. Ka hnual nghal rawih a mahse zirlaiah chuan ka rilru pek luih hram ka tum thung. Kan bang tep tawh tihin U Muana a lo lut ve chiah a. Ka lawm asin aw..

"Ka va thlah leh dawn che u em? " Room atanga a lo chhuah chuan kekawr bul leh shirt a ha a, chapal a bun leh tawp. Fridge atanga tui bottle la chhuakin a in khawlh khawlh a, kei lah chuan hmuhnawm ti takin ka lo thlir leh dauh dauh thung. Mali'n min rawn sik zawk a, ka insiamtha nghal.

"Va thlah rawh. Tihtur i nei chuang lo. Chhawr ve deuh i ngai" Sir Sama chuan nui hak hak chungin a ti a. A car-ah chuan kan chuang leh ta. Hla a play a, nimin ai kha chuan boruak pawh a zia deuh tawh.

Kan pahnih chauh kan ni tawh a, kan hla ngaihthlak pawh ka hre mumal thei lo. Hepa huhang hi ka zo meuh lo a ni. Ka thiante lah khan an chhuk dawn khan min fiam deuh zuk a, a lo hre thiam ang tih ka hlau asin aw.

"Nalh i ti ve em? " A rawn ti thut.

"Eng? " Ka lo ti hu a. A nui ri hak.

"Hla hi mawle. " A ti leh a. Eng hla nge kan ngaihthlak pawh hriat loh lai a. "Aw.. " Ka ti ve tawp.

"Kan hla ngaihthlak hi i hre miah lo em ni? " A ti leh.

"Hre tep" ka kut ka hum ruh vak a. Ka lungphu lah hi a ri dup dup mai bawk si. A ri ring lutuk a a lo chhuak dawn hialin ka hria...

"Naktukah inhmu leh ang aw.. Muttui le" Tiin min thlah a. Keipaw'n "Nangpawh le.. " tih kha chu ka sawi vein ka hria. Hetiang em em maia a bula awmdan ka thiam lo hi ka inhrethiam lo.

Karkhat lai chu min thlah ta ziah a. Lehkha kan zir laiin phone a khawih char char a, kan ban rualin min thlah haw nghal a, vawihnih eitur min lei tawh bawk. Haw kawngah pawh a tawng duh ve deuh tawh a, ka thiante nen pawh an inbe thei phian. Kan pahnih chauha kan awm hnuah erawh zawhna ho deuh deuh min zawt teuh zel. Min biak chuan nuam ka ti a, ka hlim veng veng thin. Tuition kal ka phur em em a, a chang hi chuan min duh ve thoin ka hre thin mahse ka chiang ngam chuang lo. Ka thiante lah chuan 'A duh ve tho chein ka hria' hi an ti deuh reng a. Mahse min biak ve pawhin zawhna ho te te bak min zawt bawk si lo. A zawhna thin lah chu 'He hla hi a original I ngaithla tawh em? ' 'A satu hi tlangval nge pathlawi I hria em? ' 'Hmeichhia hian a sa thiam zawk tiraw? ' tih vel mai mai a nia. Music a ngaina hle a nih ka ring.


Seni a dam tha lova, Mali lah an chhungte innei an awm avangin Thingtlangah an zin daih a, nihnih vel chu an cham dawnin ka hria. Keimahin ka kal hna hna a, ka peih lohna leh ka kal chakna chu a inang vel ang. Ka thiante tel lo va kal chu ka hreh a mahse U Muana ka hmuh chakna lahin min tur ut ut bawk si.

Sir nen chuan kan zir nghal mawp mawp a, U Muana phone be ri chu ka ngaithla ru kar bawk. A chhungte a bia a niang 'Ka la cham rih dawn.. ' a ti ri ka hriat chuan ka lo lawm ve em em ringawt.

"Aw.. Ka lo kal nghal ang" Sir Sama chu ka melh reng a. Kan zir tan deuh chiah a, call a dawng a.

"Tei, vawiin chu tihian kan duh tawk mai ang aw. Ka thiannu kha a zual deuh a ni awm e, ka kal angai bawk sia" Inthlahrun hmel taka a tih chuan nuisangin "A pawi lo. Va kal rawh" ka ti ve vat a. Natna te chu kan duh vanga thleng ni hek lo.

"Muan... "

"Lo ngaihtuah suh. Ka va thlah dawn nia, va kal phawt mai teh.. " U Muana chuan a lo ti zung zung a, Sir Sama hmanhmawh che vut vut vang chuan chet ve ngaihna pawh ka hre lo. A chhuah hnu chuan U Muana nen chiah kan awm tih ka hrechhuak leh hnuhnawh a, ka lehkhabu ka khung vat vat.

"Tei, thingpui in phawt ila chuan ka thlah dawn che nia"

"Aih, a ngai lo. Keimahin ka haw mai ang bakah ka ril a tam lo"

"Ka thlah ang che ka tih tawh kha. Ka ril a tam alawm, in lawk ang" a ti deuh talh a, ka hnial hreh ve ta deuh. A bula awm chak viau mah ila kan pahnih chauh kan nih chuan nuam ka ti miah lo mawle, boruak hi a tang ak a, a mitah ka en ngam bawk si lo.

Thingpui chu aman a siam a, ka thu reng tawp. Dawhkanah chuan Momo nen hian a lo chhawp a, a tuihmel phian lehnghal. Ka ril tam lo ka ti ve ngawt a chhunah engmah ka ei lo tih ka hrechhuak leh chiah. Seni leh Mali an awm si lova, canteen a kal kha ka peih ta lova, ka ei lo tawp.

"Ei teuh rawh" Ka bulah a lo thu a. Ka lai lutuk chu ka sa hat hat mai. No chu keng kangin ka lem hlak a, a tui lutuk. Momo plate leh fork chu min pe a, zak deuhin ka la ve mai. Ka ei chuan tui ka ti bawk si mahse ka ei tha ngam bawk si lo. A va hrehawm tak aw...

"Ka zawhna zawh thin che hi ho i ti ve em..? " A no dah thlain min en a.

"Aih... " Sawi tur hre hek lo. A zawhna te chu ho ti viau mah ila keipaw'n a aia tha sawi tur ka hre bik lo tlat a.

"Ka be duh bawk si che a, sawi tur ka hre bawk si lo a. " Ka momo thial lai chu ka phuh chhuak tep. Kan inthut hnaih tawh tehreng nen a lo tawlh hnai leh hret a, kan insi tawhin ka hria. Ka mitah tak chuan a melh kal a, keipaw'n ka melh ve tho. Ka lung phu pawh a rang leh tawh hle.

"Inngaizawng ve tawh mai ang" Khawvel chu a tawp ta em ni? Zantin mu tha thei lo khawpa ka suangtuah thin mipain chutiang tawngka a chhuah ta mai chu ka lawm a, ka lawmna hi a so bulh bulh thei hial.

"Aih.. " Ka inring hman lo. Ka kâ ka hup chawt. A nui suk.

"Min duh ve tho tih ka hria" A ti leh.

"Mahse.... "

"Mahse a ngai lo. Ka bialnu i ni tawh. Keipawh i bialpa.... " Lalpa!

Ka tawng tawh lova, ka kut a lo vuan lehnghal. Ka chhang lem lo naa keipaw'n ka pawm hmak tho. Nilo, ka hnawl phal lo hrim hrim. Ka mipa duh ber chu ka bialpa a ni ta, Seni leh Mali hrilh hlan ka va nghakhlel tehreng em. Kan thil ei pawh a tui tawh lo, kan ngawi dun reng a, ka kut chu a hum nghet em em lehnghal. Kan inmelh fuhin kan nui leh tawp a. Chutia kan thut veng veng hnu chuan "Ka va thlah tawh ang che.. " tiin a ding a, ka kut erawh a la vuan reng. Keipawh ding vein ka bag ka ak tha a, car chabi la turin room-ah a lut zawk a, a lo chhuah rualin kan inzui chhuak nghal.

Car a ka chuan dawn chuan ka buai ta tlat. A hnungah nge a hmaah ka thut ang? Ka lai lutuk chu ka ding tawp a, nui suk hian ka kut chu rawn chelhin a hma kawngkhar chu a hawng a, min thut luhtir nghal. Awi, a mak vel e.. Kan inngaizawng tan ve chiah sia. Hla kan ngaithla leh a, kan tawng lo. Kan in kan thleng a.

"Nihphawt aw.. " Ka ti sap a.

"Um, zanah ka lo bia ang che.. "

Zanah chuan Seni leh Mali nen rei tawk kan inbia a, kan awmdan chu chawl map lovin ka sawi char char a, min lawmpui asin aw. Seni lah pek chuan "A upat tawh nen ka rin aiin a zei lo.. " a ti deuh kher a. Kei erawh chuan a zei loh dan leh a zei dan kha ka duh chi a nih thu ka sawi ve hmiah. A nui kur kur lehnghal.

"Ti daih ila, i no. a nei mi" Mali.

"Ka hre lo. "

"A nei ve mai ang. Sir Sama tang paw'n" Seni.

Kan inmangtha hlawm a. Ka phone ka charge rual chiahin msg ka dawng tlat. Ka phurna chu nasa tak a ni. Charger chu ka phawi leh nghal a, msg chu ka open nghal. Amah a ni. A no. chu 'Him' tiin ka save deuh ngei a. Awi, ka zak lo e...

"Lehkha i zir em..? " A ho thei e..

"Zir rih lo.. "

"Nih eng nge i tih a"

"Ka thiante nen kan inbe zo chiah a.. " Ka nui leh ringawt zel.

"Um, in ingai ve thei sia"

"Ngai ve e.. "

"A tawi thei e.. "

"Sawi tur ka hre lo lawm" Ka zak deuh.

"Pawi lo. Ka lo call... " Min lo call nghal.

"I âw ka hre chak a" A ti sap. Ka za chuai chuaiin ka hria.

Rei inbe loin kan inmangtha vat a. Eng dang a ni lo sawi tur kan hre thlawt lo a tin ni. Mahse min mangtha dawn chuan 'Ka naute' min ti. Ka zak.


Vawiin atang chuan school kan chawl tawh a, exam a hnai tawh a, mahnia in lama zir tur kan ni tawp tawh mai. Mali a lo la haw lova, Seni lah a lo la kal peih bawk si lo keimahin chawhnu lamah tuition kal turin ka chhuak a. Ka nuin vawiin chu chawl mai turin min ti a, bazara min hruai a tum a mahse ka hnial tlat. Kawr thar min lei tur thu a sawi chung pawha ka duh tlat lo chu mak an ti viau lehnghal. Ka pa phei chu a nui tawp. Exam zawh hunah U Muana chanchin hi chu ka la hrilh ve ang.

Taxi-in ka kal a. Ka thlen chuan U Muana chiah a lo awm. Min lo nuihsang a, thutna tur min lo kawhhmuh vat bawk. Kan boruak dang ta lutuk hi ka la awmthiam chiah lo.

"Nichin lawk khan a thiannu kha a boral a, a buai phili vel nen chanchin a lo hrilh hman ta lo che u aniang. "

"Um, chuti chu ka haw leh mai ang.. " Ka ding a, min pawt thu leh nghal.

"Ngai lo. Tihian awm ve rih rawh. Nakinah ka va thlah dawn che nia" A ti leh. Ka kut chu a hum nghet leh tawh lutuk. Ka thu tha ve leh mai.. Insi rialin kan thu a, ka zam lutuk tho nain nuam ka ti ve tho bawk si.

"U Muan, tinge min duh a" Ka huaisenna zawng zawng sawm khawmin ka ti tawp.

"Ka hre lo. Ka duh ve tawp che. Nang? " Ka kut khal niah niah chuan a ti a.

"Ka hre bik lo" Kan nui rual. Kan induh ve tawp a nih chu. Tichuan kan tawng ve sep sep a, thu puitling leh khunkhan tak phei chu kan sawi lo. Kan nui leh hak zel. Nimin maia inngaizawng tan kan ni a mahse tunah chuan rei tak ni tawh ang maiin kan inkawm ve thei tlat. Pathian thilpek a ni ang e.

Ka haw dawn chuan kawngka bulah kan infawp. Kan infawp ti ila min fawp a ni zawk mah. Keichuan ka thiam ve lo. In ka thlen hnu chuan ka lehkhazir awm ve hmiah. Ka vawiin hun hman dan zet zawng a nuam em a ni. Ka thiante bawk chu ka hrilh leh vek a, a nuam a nia aw.

Zanah Sir Sama'n min lo bia a, naktuk chu a hman dawn loh thu a rawn sawi. A thiannu thihna chu pawi tihpui viah mah ila U Muana ka hmu lo tur chu hrehawm ka ti nghal tawp.

Nilengin ka mu a tih theih ang. Ka nuin engmah tih phal ve hek lo. Hla ka ngaithla a, U Muana ka ngaihtuah reng bawk. Zingah khan min lo bia a, Sir Sama thiannu te inah a kal ve dawn a, a sawi danah chuan Sir Sama chuan a tuar viau a nih hmel.

"In in piahah ka awm.. Lo chhuak rawh" Zan dar kua velah chuan "Nu, waiwai ka lei dawn.. " tih leh tlan chhuah ka rual nghal.

Ka hawi hrek hrek a, kan in piah deuh hleka thingkung lian deuh hnuaiah chuan car ka hmu a. Car bul ka thlen rualin kawngka a lo inhawng a, U Muana a lo chhuak. Kan innuih tawp.

"Ka ngai lutuk che" Ka inrin hmain min kuah thlawp. A thaw ri sak sak a, keipaw'n ka ngai. Kan inkuah vang vang hnu chuan inthlahin car-ah kan thu a. Hun kan ngah bawk si lo.

"Rei deuh ni tawh kan ang e.. " Ka ti sap a. Min enin a nui suk.

"Rei deuh kan ni dawn tho lawm"

"Mahse, i haw tep tawh sia.. " A haw leh hun tur ka ngaihtuah hian ka hnual nghal rawih zel. Karhnih vel chiah hetah a awm ve tawh dawn si a.

Ka biangah a lo dawm a. "Lehkha tha takin I zir ang a, chuan Mumbai-ah college i kal ang a, keipawh Mumbai-ah hna thawkin ka awm dawn a. Tichuan hmalam hun tur chu kan ngaihtuah chhawm zel mai dawn alawm.. " a ti a. Lungawi takin kan inthlah ve leh mai. Mumbai a college kal tura theihtawp chhuah ngei ka tum bawk.

A tukah chuan kan thian hoin kan kal leh tawh a. Sir Sama pawh a mit a bui luk mai. A thiannu thihna chu tuar viau mah se thahnem min ngaih pui ve tho bawk sia, min zir pui ve zel. Mahse a hma ang kha chuan kan ri huk tawh lo. U Muana ho a kan zir chang pawh a awm zeuh zeuh. Ka thiante chuan U Muana zirtir dan chu hriatthiam awlsam an ti zawk a mahse keichu ka ni ve lo. Kan inkar a dang tlat.

Ka thiante lah chuan min fiam reng zel a, ka ngei lek lek thin. Sir Sama erawhin a hre ve lo nge eng a sawi lem lo. Sir Sama pawh a tha ve tawh viau a. A nuam leh tan tawh.

"Sir, i bialnu mi? " Lalseni a ni. Sir Sama hmel chu a dur nghal khup a, Mali nen a rukin kan sik ngawt ngawt. Inrinni chhun a ni a, chawlh kan duh lo bawk a Sir Sama hovin kan zir leh a. Kan titi tui lai takin Lalseni'n Sir Sama chu a thiannu thi kha a bialnu a ni em tih a zawt leh pek a. A buaithlak thin.

Sir Sama chu mipuitling ngang a ni a, a hmel chu a pangngai leh vat a. "Ni tep.. " tih chauh a sawi. U Muana'n min thlah leh a, kawng tluanin Lalseni kan hau. A ni lah chuan "Ka khawngaih ve alawm.. " a ti ringawt lehnghal. A khawngaih vang maia khatiang zawh te chu a.

U Muana haw hun a hnai tawh a, exam a hnai tawh bawk si. Ka rilru hi a buai nuaih zel. U Muana chuan ka zirlai chauh ngaihtuah turin min ti fo thin a mahse ka thei ikhaw lo mai. Amah ngawt ka lo ngaihtuah leh thin.

A haw hma ni chuan inthlahna ang reng deuhin chhunah thil kan ei ho a. Sir Sama paw'n a ui ru ve viauin ka hria. Ka thiante lahin ka hrehawm ti hmel an hmuh chuan min nuihzat em em mai lehnghal a. An va sual tak. Movie kan en ho laiin msg min lo thawn a, ka hmuh veleh bathroom lam panin ka kal nghal. Bathroom hi room-ah a awm daih a, kan lut ve hmiah mai zel. Bathroom atang ka chhuak chiah chu min lo pawt dawrh a, min rawn fawp nghal. Zah pawh dawn lovin rei tawk kan infawp ngar ngar a. Ka ngai dawn lutuk hi a hrehawm ka ti takzet.

"Ka hmangaih che.. " Ka beng bulah chuan a ti sap a.

"Keipaw'n.. "



A tukah chuan ka va thlah ve tawh lova. Inngai em em mah ila kan inthen a tul rih si a, kan inthen hlenna tur a ni dawn lo bawk a, hlim takin kan inthlah ve thei mai. A kal dawna min chah ngun ber chu "Lehkha lo zir tha rawh aw.. Kan thil tum kha hre reng la" tih chu a ni.

A haw atanga karkhat a liam leh hnu chuan exam pawh kan tan nghal der a. Ka zir nasa bawk a, ka chhang tha thei viau. U Muana nen pawh kan la inbe reng a, kan inbiak apiangin lehkha ka zir tha em tih min zawt ziah bawk. Ka ning lek lek thin a mahse kan awmdun leh theih nana min nawr ve a ni bawk si.

Subject hnih kan la nei a, practical nen. Ka huphurh lo a mahse rilru buaina dang ka nei tlat. Nizan hmasa tang khan U Muana'n min rawn be tawh miah lova, ka va be hmasa a nih loh chuan a reh tlawk tlawk mai. Ka va biak lahin a hma angin a tawng duah tawh bawk si lo. Ngaih tihthat luih hram tum mah ila a har lam hret chu a ni e. Tichuan mahni inhnem chung zelin exam chu ka tling tla ve mai a. In ka thlen hnua ka msg dawn erawh chuan min ti phu chiang kher mai.

"Te, a pawi ka ti, kan inkar hi tihian tawp mai rawh se. Lo inenkawl tha rawh aw. Keichuan midang duh ka nei a, ka theihnghilh thei thlawt lo a ni. Ka tihpalh" tih hi. Chu thu tawi te chuan ka thinlung chu sang tam takah a phel darh ni mai hian ka hria. A tirah chuan ka awih lo a, ka va call thin a, mahse chhanna erawh ka dawng si lo. Fb-ah leh WhatsApp-ah biak ka tum a, mahse min blocked ve ve. A mak ka va ti tehlul em..

Na ti viau mah ila tah ka tum lo bur. A chhan chu U Muanan min then ka la rin loh vang a ni. Min hmangaih thu a sawi a, awlsam te chuan min kalsan hauh lovang. A no. chu ka dial nawn tlut tlut a, a tawpah phei chuan chu no. chu a awm lo a inti tlat. Awm ngaihna ka hre tawh lo, ka phi ruai a, ka room-ah chuan ka tei kual chhen a, a/c thar hawngin biak dan kawng ka zawng leh a, mahse U Muana a/c chu a lo bo daih.

Ka khumah ka thu hnawk a. Vawiin nia ka hlimna te kha ka ngaihtuah let a, U Muana nen kan inhmuh theih nan tiin theihtawpin lehkha ka zir a, zantin amah ngaihtuah chungin ka muhil a, a âw hriat chak reng rengin ka buai thin a. Mahse tunah erawh eng nge thleng ta hi. A msg chu ka chhiar nawn leh a, midang duh a nei a maw? Ka ring phal lo bur. Vawikhat te mah rinhlelhawmin a awm ngai lo tlat alawm. A kal dawna a thuchah te kha engtinnge ni dawn.. Ka phone chu ka vawm darh thuai a, ka insum zo lo. Ka mittui erawh a la tla lo cheu....

"Midang thil tih a ni ang.. " Tiin chu zan chu U Muana rinna nen ka hmang ral. Ka thu tlaivar thak. A tukah pawh ka la che sawn eih lo. Chaw ei chu sawi loh 'Chaw' tih ri ringawt paw'n ka luak a tichhuak. Ka chhungten min ngaihtuah tawh viau, tawngkam khat mah ka chhak chhuak bawk si lo. Ka thiante an va be pawp thuai a, an lo thleng ve nghal. Ka thiante chuan hetianga ka awm chhan hi rindan an nei nghal mai a, mahse engmah ka sawi loh miau avangin an ngawi ve mai.

Ka rilru chuan min then ka ring lova. 'Naute.. ' tia min lo biak hun ka nghak tawp. Ka phone darh nuaih chu ka melh leh zawk thin a, engtinnge min lo biak theih ang tih chu ka ngaihtuah chhuak nghal.

"Pa, phone ka duh.. " Mak tiin min en thap. Ka mit a sem ram a, ka pum a ri ruk ruk a, riltam erawh ka hre hauh lo. Nilengin chuti chuan ka thu tlut tlut a, ka rilru hi a mang vek ni maiin ka hria. Ka harh thut. Ka tho nghal a, ka thawmhnaw pawh thlak lem lovin ka wallet ka la vat a. A ruk thei ang berin ka chhuak nghal. Taxi pharin ka kal duhna lam chu ka sawi a, ka thlen rualin pawisa ka pe vat a.

"Tinge U Muana hi..? " Ka ti nghal. Sir Sama chuan min khawngaih hmel deuh hian min en a, ka ke atanga min en chhoin ka mit sen ramah chuan chiang zetin min melh a. A thaw hak..

"Tei, sawi ka hreh viau naa.. "

"Sawi vat rawh. Ka phone a chhia a ka be thei bawk si lo. Min ngaih tawh ngawt ang min biak sak rawh.. Mawh" Ka ti deuh nuaih a. Sir Sama chu vanvadakin a thaw leh hawk a. U Muanan min then hi ka la ring lo. Hriat sual a awm a nih ka la ring nghet bur.

"Muana khan nupui hual a nei reng alawm. A play vel mai mai che a, nang lah khan i duh em bawk si a, tikhan a tikual vel ta mai mai che anih kha. Ti lo tur pawhin ka hrilh a mahse min ngaithla duh lova, naktukah nupui a nei dawn... Tei, a pawi ka ti lutuk" a kun lap a. Kei erawh thir zum taka chhun angin ka na thung.

"Dawt a nih chu.. Min hmangaih alawm" Ka ti hrawk.

"Hriatthiam tum rawh. I la naupang a, hmalam hun eng tak i la nei reng a nia.. "

Taxi-a ka luh rual chuan ka insum zo ta lo. Ka puak keh ta rup mai. Awrawl chhuah meuhin ni ka tah ni. Driver pawh chu ka pawisa zo tawh lo. A va na tehlul em.. Phatsan ka ni a nih chu. Ka rinawmna kha engtinnge ni ta ang? Rinawm takin ka nghak asin. Min hmangaihtu angin a inchhal a ni lawm ni. Tinge hetia min tih mai le.. A tan chuan a hunawl hnawhkhahna ang lek maw ka lo nih a. A theih loh.. A theih loh.. Ka mit chu a phe ruai a. A thim ta vek mai.


Ka harh leh chuan damdawiin khumah ka lo mu a, khua a thim tawh bawk. Ka kut vuanin ka nu a lo thu reng a, ka tho chhuak a. Ka hmui chuan 'U Muan' a ti sap. Ka thil tawn rapthlak zet chu ka chhui kir a, ka hmangaihna kha a tan eng ang nge a nih ve ang le.. Ka awm chu dawmin ka'n tap tak tak mai a, ka nuin min kuah bet a, ka tap khur hlawk hlawk.

Ei leh in ka thlah hmak a, ka taksa chu a cher kuang a. Drip kan khai tawp. Ka thianten thil awmzia an hriat chuan an thin a rim lutuk tlat. Ka chhungte paw'n an fanu duat rilru tikehsawmtu chu hmu ngat se chuan an ngawi mai mai hauh lo ang. Kei erawh ka chau a, ka taksa na chu ka tuar dam thei mai ang mahse ka thinlung bang chim mek chu rem that ngaihna ka hre hlawl si lo. Huat ka duh a mahse ka thei lo. Ka hmangaihna chu ka nat pui ngawih ngawih tawp.







Karkhat tal tawp ka mut tlawk tlawk hnu chuan rilru thar ka pu ta a. Phatsantu vang maia hetia ka lo na ve em em ringawt hi ka duh lo. Ka intiharh tan ta a. Ka thian te pawh an lo lang zing khawp mai. Mahni intihhlim tumin theihtawp ka chhuah a, ka chhung te leh ka thian ten min pui bawk. Tichuan ziaawm lam ka pan ve zel a. Engtikah mah hliama ka awm tawhna chu theihnghilh dawn lo mah ila ka nun ka hman chhoh zelna tur daltu nih tir erawh ka tum lo bur. Ka inngaihtuah chian hnu phei chuan ka lo intihrehawm rei lutuk kha pawi ka ti thar a, ka zak ngawih ngawih bawk.



Tichuan kan result a lo chhuak a. Ka pass tha ngang mai. Ka nu leh ka pa lawm hmel chu hmuh nuam ka ti takzet. Sir Sama pawh chu ka result te hrilhin ka va be ve a, a ni paw'n min lawmpui thu a lo sawi ve liam liam a, mahse a hma anga inpawh tak kha chuan kan inbe thei tawh lo. Ka chhungten Mumbai a college kal turin min ti a, a hma khan keima'n Mumbai a kal ka duh thu ka lo sawi tawh vang a ni. Mahse tunah chuan rilru dang ka pu tawh. College kal tumna ka nei lova, Mizoram chhuahsan ka tum hek lo.

Designing zir ka duh thu ka sawi chuan an remti vak lova mahse ka thu sut ka tum miau loh avangin ka duh ang chu an remti ta a. Mizoramah ngei zir ka duh tlat avangin Mizorama Designing Institute tha berah admission kan la ta a. Ka thian te erawh chu phai lama college kal turin an liam thla a, anni pawh hmun khatah an lut thei tawh bik lo. Kan thian ho chu kan kal hrang ta vek a, mahse zantin kan WhatsApp group-ah kan la nawi reng thin.

Ka nu lah upa lam a lo ni ve tawh bawk si. Awmpui kan la ta ngawt a, hmeichhe tleirawl fel deuh mai hi a ni a, kan inngaina nghal khawp mai.

A tawi zawngin sawi ta ila, designing chu ka zir chho ve zel a, nuam ka tiin ka thiam hma bawk. Tichuan course ka zawh hnuin ka zirna neitunuin a hnuaia thawk turin min sawm a. Lawm takin ka pawm. Mahse nakinah erawh keima pualin dawr lian tak la neih ve ngei ka duh. Ka thian te pawh a kum khatnaah chuan mas hmangin an lo haw a, urlawk zan te pawh kan hmang ho thlap.








Hun a kal ve bek bek a. KUM THUM a vei leh meuh chuan ka nunin bung thar a kai dawn ta. Pasal ka nei dawn.

Mipa lamah hian ka inhawng lutuk ta lova mahse ngaizawngtu neuh neuh erawh ka nei ve reng thin. Nula puitling han nih ve takah chuan ka taksa ka uluk a, ka incheina ka uluk bawk a, mahni tawkah ka luck ve viau. Mahse ka hun kal tawh duhawm lo tak avang khan mipa hi ka ngaihsak hlei thei lova, Seni'n mi theihnghilh dan tha ber chu a thlaktu an awm hian a tih kha ka apply ve chhin a. Mipakhat chu bul ka tan pui ve hman a mahse ka kal thui thei thlawt lova, inthlahrung takin kan inkar chu ka titawp tawp. Mahse Rindika a lo lan atang erawhin ka danglam ta tlat.


Kan dawr hnuaiah hian cafe thar an hawng a. Chu cafe neitu chu Rindika hi a ni. Kum lamah chuan kei aiin a u hret a mahse a naupangchhia thei viau.
A cafe hawn niah chuan leng lut turin min sawm ve a, kan vai chuan kan inzui thla hnak hnak a. A chhung chu a changkang tawp. Amah Rindika ngei chuan thutna tur te min lo kawhhmuh a, chhe lo kan ti tlang hlawm hle.

Tlaiah chuan ka scooty bulah a lo ding reng a. Min hmuh veleh chuan "khawngaihin Civil Hospital thleng min lo phur ve mai. Ka bike hi a nung thei tlat lo a.. " a ti a. Keipaw'n tha takin ka phur ve mai. A chhuk dawn chuan 'Ka lawm e' a ti sap a. A lut nghal.

Zanah chuan a hnen atangin msg ka dawng nghal zat a. Vawiin ni thleng hian tu hnen atangin nge ka no. a neih tih ka la zawt chhuak zo lo.

"Zak thei lo pawh min ti maithei a mahse ka duh chein ka hria.. " A rawn ti nghal phawng mai. Ka nuih lam a za a, vawikhat kan inphur ve dek dek a. Chhan enah pawh ka en lo.

"Tinge nizan khan ka msg i reply loh a.. " A tukah chuan dawrah lo chhoin mi zawng zawng awm laiin a rawn ti ta mai. Ka hamhaih lek lek zawk hial. A ngampa hi ka'n ti khawp a.

"Nakinah kan sawi dawn nia.. " Ka ti tawp. Tha takin a chhuk ve leh mai a, ka thiante lah chuan min zawt chhen. Chhan ngaihna ka hre lo ka nui ka nui ringawt. A ruk tak chuan ka ngei hle.

"Ka lo phur ve ang che.. " Ka hawn dawn chuan ka scooty ke a lo thep vek. Nichin lawk pawh khan a la tha reng sia. A van mak em em.

"Ka lawm mahse ngai lo mai rawh se.. " Tiin ka kal pel a. A nui ri huk thawm chu ka hre pha tho. Taxi changa ka din laiin ka hma zawnah tak chuan bike hi a lo ding dat a. Ka ner sak thung.

"Lo lawn rawh"

"Taxi-in ka haw ve thei.. "

"Lo lawn vat rawh. A nih loh chuan.. "

"Eng nge a nih loh chuan.. " Rum eltiangin ka melh a.

"I thawhpui te hnenah khan min bem thu ka sawi ang"

"Ka bem thlawt lo che.. " Ka rin aiin ka tawng ring.

"Mahse ka thusawi chu an awih zawk ka ring" Tei vet chuan. A hmelah chuan a tihtak hmel bawk si. A tawpah chuan ka lawn ve ta a. Nimina ka phurh vanga a lawmthu sawinaa ngaihsak tur angin a bulah chuan ka sawi. Bakah ka thian te bula ka bem anga a sawi a nih chuan ihe lovin an lo awih hmak ka ring. Hmeichhia hi chu kan heti tlat alawm.


"Naktukah ka lo hruai leh ang che" Kan in kawtah chuan ka chhuk a. A tlan leh nghal. Min lo hruai pawh nise ka chuang tawh awm lo em mai.



A tukah chuan Au Mama rualin ka kal daih. Zanah lah khan msg min rawn thawn chhen a, a thu a nawi ropui si. Pakhat mah ka chhang lo.

"Ka lo hruai ang che ka tih kha. Tinge min kalsan" Hmeichhe pakhat measurement ka lak lai chuan a rawn ti lut leh hmak. Hepa hi a mak e.. Ka zak lutuk chu ka sen tawn tawnin ka hre hial. Midang ho lah chuan zawhna mitmengin min melh ngawih ngawih mai si. Tihngaihna tak pawh ka hre ta lo.

Ka chhuak a, min rawn zui chhuak ve nghal.
"Hey, tunge nia i inhriat a.. " Ka vin nghek. Inchung zawlah kan awm a, tumah zah tur an awm lo.

"I bialpa hual.. "

"I zak lawm ni.? Ka engmah I ni lo. Min tibuai tawh suh" Ka melh hrep a, kalsan mai ka tum chuan ka kutah a lo vuan chat. Ka thing a, mahse a thlah lo. Min rawn din hnaih a.

"Tei, ka duh lutuk che.. Inngaizawng ang" A rawn ti sup.. Ka inrin hmain ka nui chhuak huk.

"Ka duh ve lo che. Min rawn be tawh suh" Tiin ka kut chu ka thing leh vak a. A thlah.

Khatiang mipa an duh apiang nei thei tura inngai ho kha ka ei thlawt lo. Ka thian te lah chuan kan ni emaw an lo ti khanglang a, an lawm zawk hmel tlat. 'Free coffee.. ' te an ti vak a. Kan ni awm lo em mai.

Tlaiah chuan ka scooty ke chu a lo puar leh vek tawh. Mak tiin ka en vel a, a thar a ang zawk mah. Tunge lo thlak ang le?

"Ka thlak tir a nih kha. " Chu âw neitupa chu a bike-ah a lawn a.

"A ngai hleinem. Pawisa ka pe ang che" Tiin ka wallet ka phawrh a.

"A ngai lo. Hei hi hre rawh, ka beidawn san dawn lo che. Nang hian min la duh ve khawp ang" Ti nghutin chak tawkin a tlan chhuak nghal. Kei erawhin mak tiin ka en zui vawng vawng thung. Khati khawpa chianga ka hnawl hnu pawha min la duh chu mak ka ti zawk hial. Ka scooty ke man erawh pek ka la tum ruh hle.


Zantin mai hian msg ngai min lo thawn tlut tlut a, ngaih khatah ka ngai hmiah tawh. "Ka zunah i la uai dawn.. " Tih hi a rawn thawn ngat ngat zel. Ka nuih lam a za a, keimaha nuih vur vur chang pawh ka nei ta zeuh zeuh.

"Te, min duh lo takzet a nih dawn hi. Ka beidawng ve ta e.. " Tih a rawn thawn zan chuan mut har ka ti kher mai. Rei tak chhung min tibuai a min zar buaitu a kal bo tur chu lawmna aiin lawm lohna ka nei zawk tlat.

A tukah chuan a lo kal hun nghak niawm takin kan dawr tukverhah chuan ka va dak chhen a, a rawn lang thei bawk si lo. Kan dawr tukverh atang hian two Wheeler park-na hi a lang thei a. Ka chawhma hun chu tum burin ka hmang ral tihtheih a ni. Chawhnu lama tukverha ka va dak leh zet kha zawng ka inchhir vawng vawng. Rindika leh hmeichhe pakhat hi an lo inphur a, bike atang chuan nuisangin chu hmeichhia chu a chhuk a. Rindika'n a kawngah kuahin cafe lam pan chuan an inzui a, Rindika rawn hawi chho nen chuan kan inmelh fuh chat. Mak tak maiin ka na ngawih ngawih a nih chu mawle. Ka thinlung a na. Mak ka ti asin aw.

Ka tawng tawh lova, midang an nuih dar dar pawh chuan ka nui ve thei tawh lo. Tlai banah chuan hmanhmawh ru takin ka scooty ka tinung a, ka hlauhthawn ang ngeiin Rindika leh kha hmeichhia kha cafe atang chuan an lo inzui chhuak a. Ka va hawi lai tak chuan Rindika'n min lo melh ve run bawk. Rang theih tawpin ka phit chhuak nghal.

Zanah chuan ka phone ka bih chhen a, a ni lah a reh tlawk tlawk si. A last seen ka en ka en ringawt mai. Mimawl ang maia ka ngaih thin kha ka duh ta mai em ni.? Chu zawng ka ring phal bawk si lo mahse ka awmdan hi dik mawlh hek lo.


"I tha maw.. " Ka scooty park lai chuan a lo thleng ve a.

"Tha e" Tiin ka bag ka ak tha a.

"Hetia min pehhel zel chhan hi ka hria" A tih chuan ka ding tawp. Ni e, kei hian nithum chhung chu ka pehhel char char tawh.

"Chutiang a awm lo. "

"Nang hian min duh a ni" Ka lungphu a rang lutuk.

"Awihawm loh.. " Chak tawkin Stepah chuan ka pen chho nghal mawp mawp. Kan dawra luh ka tum chuan min rawn kaiin inchung lamah min hruai chho a. Ka lo tang eih lo a nih chu mawle.

"Tei, intihrehawm tawh suh. I laka ka rilru put dan a la ngai reng. Nangpaw'n min duh ve tho kha" nelawm thei ang berin a sawi a. Kei erawh ka kun tlawk tlawk thung.

"Mahse.. Hmeichhia kha" Ka tih chuan a nui huk a. Ka biangah dawmin amah en turin min kuai dak a.

"Ka fiahna che a nih kha. Fiahtu che I mamawh alawm" A nui suk a. Keipawh ka nui.

"Misualpa.. "

"Sawi ve tawh rawh le.. "

"Eng maw"

"Min duh thu.. " A tih chuan ka lai tlat a.

"Um, ka duh che" Ka ti ve tawp. Ni e, hepa hi ka duh chiang alawm. A tel lova nithum hman pawh kha hrehawm ka ti lutuk tlat.


A tirah chuan ka hnaih tha ngam lova. Hlauhthawn ruk ka la nei tlat a tin ni. Mahse ka tan a awm reng a, kum khat zet zawt kan inzui ve hnuah chuan ka thinlung zawng zawngin ka ring nghet hmak tawh.
A tawngkam ka theihnghilh theih ngai loh tur chu "I tan mipa hmasa ber ka ni lo pawh a ni thei e mahse a tawp ber erawh ka ni dawn tih hria la. Rinawmna ropui zia ka hnen atang hian I hriat ngei pawh ka beisei. Ka phatsan ngai dawn lo che a, thihna chauh lo chuan kan inkar a tihchhiat ka phal hek lo. "

Tichuan inngaizawng nghet tak kan ni chho ve zel a, Mali leh Seni pawh ka hrilh tawh a, min lawmpui lutuk. Ka thikthu chhe lutuk erawh keimah ngei paw'n hriatthiam harsa intih chang ka ngah ta mai.


"Te, i thikthu chhiat dan hi ka duh chi" Tih vel mai mai te hi sawi a ching a. Ka hlim pui leh thin si. Ka thinrim rei tak tak ngai lo bakah thik tur tak tak ang hi an awm ngai meuh lo keimah hi ka kawi a niang.

Inneih a sawi ri ta fo mai. Eizawnna a nei a, min neih paw'n min chawm zawh tur thu a sawi chamchi thin. A tirah chuan ka ngai thutak ngai lem lova mahse a sawi a sawi takah chuan ka inngaihtuah chiang a, a ni aia duh leh hmangaih hi ka neih leh tawh kher pawh ka ring lo. Ka chhungte ka sawi pui tur thu ka hrilh chuan lawm lutukin min fawp vawng vawng. Ka chhungte chu ka sawi pui ta a, ka la naupang deuh naa an lo pawm thlap. Ka pa phei chuan

"Kan upa tawh a, nei vat rawh. Ka fanu fate hi ka pawm hman lo ang tih ka hlau viau a nia. Bakah I u lah hian 'Tei'n a neih phawt loh chuan ka nei dawn lo' a ti deuh tlat si a. I neih phawt chu a ngai a nih hi" A ti deuh dap a. Kan pawm tlang ta.

Palai hmel kan hmu rang kher asin aw. Kan inrem thlap hnuin ka thiante ka va hrilh nghal a, Lalmali a lo thlawk haw nghal dawn. A nuam a nia. Ka mokawr tur chu keimah ngeiin ka thui ta alawm, ka buai zia chu pui tak hi a ni tawp. Mali nen bazar lah kan hrut ngun bawk.

"Nikhat lek i hak tur buaiin i buai a, i damchhunga i kawppui tur pawh min ngaihsak hman lo. " A lo vui ve bawk.

"Nang chu ngaihsakna hun che ka la ngah dawn alawm" Ka tih chuan a lungawi ve leh vat mai.

Hun chu a kal ve zel a, inbuatsaihna a kal mup mup a. Thianghlim taka innei tur kan ni bawk a nun pawh a hlim. Rindika hi amaha khawsa a ni a, Lunglei khua an ni. A chhungte chu Lungleiah an la awm vek a, amah erawh hi chu naupan lai atanga Aizawla awm tam zawk a nih hmel. Kan inneih hnu paw'n hrawn tur vak an awm dawn lova a zia phian. Ka nawi ve ang reng bawk sia, tumah hian mo atan min duh tak tak ka rin loh vang a ni pakhat a, eirel te pawh zir ve fe ka la ngai ang.



Ka pasal neih dawn zanah chuan Mali leh Feli nen kan riak a. Thawh hmat a ngai dawn si a an mu hma ta hlawm a. Kei erawh tu emaw phone call nghakin bathlarah ka la ding reng thung. Ka phone a rawn rik chuan phur fahranin ka en a.. Seni a ni.
Seni hi an exam hun an sawn hlat leh thut avangin a lo haw thei lova, amah pawh a inthiam lo lutuk a mahse a pawi loh thu ka hrilh ve thung. Kan siam that theih loh thila lo thinrim ve vak khan hlawkna a nei tlat lo alawm. Mali'n min din pui dawn tho a, ka pawi ti vak lem lo. Mahse ka ngai tho..

"Yes, inthlahrun a ngai lo a nia.. " Ka ti nghal a.

"Te.. Chu lam pawh a ni lo" A âw chu a dul deuh raihin ka hria.

"Eng nge a.. Hrehawm ilo ti palh ang e aw. A ho lutuk"

"Te, ih maw.. Vawiin U Muana ka hmu" Ka thin phu zawk chu ka hriat hmaih hauh lo. U Muana maw.. Engtia rei nge a hming ringawt pawh hi ka hriat tawh loh.

"Te, hrilh tur che a ni em ka hre chiah lova mahse a mak ka ti em a ni. " A âw a thian karh a, kei erawh ka ngawi reng thung.

"Cancer hospital-ah a nia.. " Bang ka ngheng dawt.

"Te, vawiin khan ka thiannu pa cancer kan turin kan kal a. Chuan room pakhat kan kalpelh lai khan kawngka a lo inhawng zuai a, ka hawkdak vang aniang khuma mu kha ka hmuh hnu ang ka ti leh tlat pek a. Ka kalpelh tawh hnu chuan eng emaw hian min mawlh a, kha room a awm kha hmuh chian ka chak ta tlat a. Ka let leh ta nge nge a, room kawngka ka hawn dawn lai tak chuan hmeichhe pakhat hi a lo chhuak a, mak tih hmel deuhin min en bawk. Kei chuan khuma mu chu ka ve en a, ka ring dik chiah. U Muana ngei a ni. Mak ka ti lutuk a, tawng nachang ka hre lawk lo. Hmeichhia chuan 'Puih theihna che ka nei em' sap tawng hian min zawt a. Kei lah chuan Mizo tawng bah nuaiin 'U Muana nupui em ni i nih? ' ka ti tawl a. Ka inring hman bik lo. Chunu chuan 'Aih, a nau ka nia. Ka u hian nupui a la nei hleinem.. ' Mizo tawng bawkin a rawn ti ve leh a. Nupui a lo la nei lo a nih chu. Mak ka ti lehzual. Ka hamhaih lutuk chu sawi tur ka hre tawh lo. 'Ka u thian em ni i nih? Khawi lam mi nge i nih a? ' min tih chuan 'Thian chu kan ni chiah lo mahse Aizawla a lo zin lai khan kan inhre ve a. '. Chunu chuan hlim hmel a pu chawpchilh nghal a. 'Aizawl maw..? Lo lut rawh' tiin min sawm nghal a. Aizawl atanga hria ka nih thu ka sawi chuan a lawm ni maiin ka hria.

Ka zui lut ve ta alawm. Khuma U Muana muhil thaw sak sak chu ka thlir a. Hmana U Muana kha a ang tawh lo. Ruh hlang vunin a tuam ve mai ang chauh a ni. 'A cancer tih hi kum li liam ta khan kan hrechhuak a. Kha Aizawla a lo zin a, a lo haw khan a insawisel zeuh zeuh avangin a inentir a, tichuan kan rin loh lutukin cancer a lo ni ta si. Mak kan ti a nia aw.. ' U Muana nau thusawi chuan min ti nghing lawih thei hial asin. Aizawla atanga a haw hnu khan a cancer tih a hria tihna a nih chu. U Muana cancer aia mak tih ka la nei cheu. A khum bula photo frame a thlalak chu a ni. Te, in pahnih thlalak ngei kha a lo inhung tlat. Mak ti takin ka en a. A nau tawngkam ka hriat leh phei kha chuan ka mittui a tla hial asin. 'E, taka, Tei a nih kha. Aizawl khua a nia i hriat zawng a ni em? Ka u khan a cancer tih a hriat khan kum khat bak a daih tawh loh tur thu an lo hrilh a mahse Tei vang hian kum li chu a dam ve ta reng mai. Vawiin ni thlenga ka u nunna chelhtu chu Tei a hmangaihna hi a ni. A harh apiangin thlalak hi a en a, a nui thin. 'Tei' tiin a phun sep thin a, a hmangaih hle a nih ka ring. Mahse Tei ve thung hi chuan vawikhat mah a rawn be ngai si lova. ' "



Ka tlu hnawk. Kum li liam taa min phatsantua ka ngaih khan min lo phatsan reng reng lo tihna em ni? Ka mittui a lo luang a, ka chawmawlh vek bawk. U Muana hmel ka mitthla a, Seni'n a thlalak min lo thawn ka en rual chuan ka tap chhuak nghal. Ka kâ ka hup a, ka tap khur zawih zawih. U Muana na tuar hmel chu ka hmu thei thlawt lo. Kum li chhung a tan huatna ka lo khawl khawm tawh a mahse ka hmangaihna kha a lo dai ngai reng reng lo tihna em ni? Mahse Sir Sama thusawi kha....

"Aw, Sen, Sir Sama no. min lo thawn" Ka âw chu a lawi deuh a. Theihtawpin ka insiamtha a. Ka mittui lum pap chu ka biangah a lo luang ngiai reng a. Ka dang zo lo.
Sir Sama chu vawi thum ka call a, a ring ral thak. Ka call nawn leh a, a ring ral leh. Ka dawhthei ta lo. Ka room-ah tlan lutin ka scooty chabi ka la a. Hmaichhanah ngei engkim ka va zawt mai ang.



Thin phu dut dutin ka kal a, kawngka ka hawng chiah tihin ka phone a rawn ri. Caller ID ka en chuan ka ding chawt. Rindika.



Duhthlanna ka siam a ngai ta. Mahse a va harsa si em.. U Muana nge Rindika?









(Tawp mai rawh se.......)