WAITING FOR YOU!

[Zualtei B Zualtei]

WAITING FOR YOU!


Zualtei B




Ruah a sur buan buan a, tun ang huna ruah a sur hi thil mak a ni. Tunlaiah chuan hunbi hian awmzia a nei ta meuh lo em ni aw tiin ka ngaihtuah fo thin. Ruahin sur hunbi a nei ta lova, fur,favang ,nipui te hian hun bik an nei ta meuh lo. Khawvel hi zawng a chhe tawh em a nih hi.


Ka hla duh em em mai ka ngaithla a, ka lung lah hi a leng ve em em ringawt a. Ngaih tur erawh ka nei hauh si lo. 'I will be right here waiting for you' tih lai tak chuan eng emaw tak hi ka feel tel thin a, hriatthiam theih loh rilru natna lian takin min fan vel thin. Mahse chuti chung pawh chuan ka hla duh ber a ni reng tho.

Ka pum a rawn rik chuan a hun tawh tih hrethiam takin ka nui huk a. Zan riltam hi tawrh har ka ti hle a, ei chak neuh neuh lah hi ka'n ngah thei mai mai khawp a. Ka tana hrisel lo tih hriat reng pawh ei chak hian ka tep ka tep thin chu a nih si hi. Ka khum atang thoin chokaah ka phei a, ka nu leh pain uluk takin Pu Vana special report chu an lo en mek bawk. Ka nau Tea erawh a leng a lo la haw lo anih ka ring, a reh em mai. Ka eitur dahna parcel te chu ka va hawng a, mak tiin ka ka hau mai alawm.

"Nu, khawnge ka thil? " a hmaah tak ka va ding a, min chhoh en ha chung hian "Eng I thil.. " a ti ve a.

"Hre lo der suh.. " kut kuangkuah zanin ka ti leh sup a. A TV en a laklawh bawk nen kalsawn rawh tihnan a kutin min vai a, ka lo hliah lui ve tlat thung.

"A awm tawh lo mi..? " Kha maw.. Ka ring reng-ah. Ka nu berin eng nge ka thil ka tih chu a hriat lohin tuin nge maw hre tehlul ang ni. A tawpah chuan a tawng chhuak ta mai alawm.

"Aw, a ruak vek.. " tiin ka tawlhsawn deuh hlek a.

"Ava mak ve.. Tukinah pawh an la awm reng kha" tiin a ding a, ka parcel awmna lam pan chuan a kal a. Keiin a hnungah a mei ang maiin ka zui phei dat dat a.

"Ava mak ve.. I nauin a ei ti dawn ila a ni thei bawk si lova.. " Mak tih hmel deuh hian a meng kual vel a. Ani aiin mak ka ti daih zawk.

"Eng nge a.. " Ka pa chu a remote hum lai nen a lo phei ve a, ka parcel ruak chu ka lo hmuh vat a.

"E.. Kha kha chhunah Mimii a lo kal a, ka lo pe vek alawm.. In awm bawk si lo a" a tih chuan ka nuin "Ava tul lo e aw.. " a ti hluk a. Kei erawh ka lo nui tawp.

Mimii chu ka nutei fanu a ni a, veng khatah kan awm lo a, a lo leng zing vak lo. Ka pa hi naupang ngaina deuh mai a ni a, Mimii phei chu a ngaina lutuk a, han chhaih deuh chiam dan tur lah a hre bawk si lo. A duatna a tihlan ve dan chu eitur pek a ni tawp. Mimii lo kal a lo lawm lutuk chu ka eitur lei khawl ho a lo pe zo leh vek a nih ngei dawn chu.

"A pawi lo, a dang ka va lei leh mai ang.. " Ka tih chuan rang fahran hian ka nuin "Ruah a sur hi.. " a lo ti leh a. He thil hi alawm ka nin chu, mi ngaihtuah over reng thin hi. Ni e, ngaihtuah awm tak chu ka ni ve chiang si a le..

"Keima'n ka va lei sak ang che.. " Ka pa chu ka melh a, ka ei duh zawng a hre awm tawp si lova.

"Ka va kal mai ang. In ho em mai,ka ei duhzawng pawh in hre lo ang.. " zawldawh hmel zetin ka ti a.

Ka nu chuan ruah sur laia ka chhuah chu a la remti ngang lova "Tea, kan chah zawk mai dawn nia.. " a tih leh chuan ka tum deuh hmuk a, ka pain ka nu chu a lo khap a. "Kal rawh se.. Nula a ni ve tawh alawm"


Ka pa berin chutia a tih takah chuan ka nu pawh chuan a phal ve leh mai a. Nihliap lain ka chhuak nghal a, nu leh pa rilru tihahtu nih reng hi ka va ning tawh tak em.. Engtikah tak tawp ang maw.. Ka riltam pawh ka hre tawh lo, ka ngaihtuahna chu ka nun hman dan ho lam takah a tang tlat a, ka nun dan mawl te chu nin chang ka nei ve thin mahse ka tan leh midang tana tha tur ber a ni bawk si.

Chu dawr chu pawn lam atangin ka thlek vang vang phawt a, ka naupan lai atanga ka kal fo thinna a ni. Sulhnu tam tak chu dawrah chuan ka nei ka ti mai. Tunah chuan building thar a ni tawh a, dawr lian tak mai a ni tawh bawk... A nghaktu te pawh ka hre tawh lo. School ban apianga eng eng emaw lei tura kan pen kawi thin laite kha ka ngaihtuah chhuak a, ka thian te ho kha khawiah nge an awm tak ang le.. Ngaihtuah chhuah fo duh lo hle mah ila ka ngai vawng vawng thin tho si a.

Naupan chhiat tak tak lai hun chu a liam a, puitlin lam kan lo pan ve ta zel a, mahni ramah ngawt a zir theih ta bik lova, mi ramah kan inliam chhawk zut zut mai a. Thian tha tak te pawh kha thian hlui an lo chang ve leh ta mai a. Kum khat liam taa ka zirna ka chawlh san atang khan thian tih tur tak ka nei tawh lo. Social media ka khawih tlem hle a, lehkhabu ka chhiar tam thung. Inah ka tawm tlut tlut a, ka ei a, ka in a, ka mu leh tawp a. Nula puitling tihah chuan a ho ve mah mahin ka hre thin...


Dawra ka luh chuan mipa pahnih hi an lo thu a, en lem loin ka duh awmna lam ka pan a. Basket-ah chuan ka duh ho chu ka khung khawm zel a, lei lai hian lei teuh mai tur.

"A sur duh buan buan hle mai a.. " Min bia anga lang lem loin dawr nghaktupa chuan a ti a. Ka lu ka bu zeuh a, pawisa ka pek fel hnuin ka chhuak a.

"Thiannu, khawngaihin saw laia car dinna thleng sawn min thlah lawk thei ang em..? " Ka nihliap kapparh ka tum mek lai chuan mi pakhat hian min lo ti a. Ruah lah chu a sur tam telh telh lehnghal.

Tha tein ka nihliap chu ka zawn phei a, a san zawk avangin ka keng sang deuh hlek a, nichina dawra lo thu ve kha a niin ka hria. A car awmna kan thlen chuan kawngka hawngin "Ka lawm lutuk e.. " a ti a, ka nuih zeuh ringawt. Inherin kan in lam ka pan a, car chu ka bulah lo dingin a chhunga thu chuan "Muttui aw.. " a rawn ti leh, a tlan liam nghal. Second rei lo te chu ka ding khawng a, ka harh chhuah rualin hmanhmawh lutuk takin ka tlan chhuk nghal, kan in hi kawngpui atanga step zawh thlak ngaiah a awm a.

In ka thlen rualin ka nuin hrukpuan min lo pe nghal vat a. Min hauh ka rin nen min hau miah lo. "Inthuam lum nghal rawh.. " Tih chiah a sawi. Ava lawmawm thin em...

Ka thil lei ka ei lai velin Tea a lo haw a, a ni pawh ruah a lo do haw a ni ang a huh hnuang mai alawm. A rawn luh rualin "Nu, towel.. " a ti hmasa ber.




"Eng nge kan lei ang... " Scooty a lawn pahin ka zawt a.

"Chocolate emaw.. Nangma'n i hria ang chu.. " A helmet khum that paha min rawn melh chuan ka lo nui tawp.

"Sherlock Holmes🕵 Bu pe la.. " ka tih chuan, "Chutiang birthday a inpek te chu a.. A chi loh em mai.. " tiin kan tlan chhuak nghal a.

Ka nau bialnu birthday present lei turin kan kal dawn a, midang hruai mai tura ka tih paw'n a duh tlat si lova. Ka zui ve ta ngei a, lei tur pawh ka hriat ka ring chuang lo. Hetiang lamah hian experience ka nei vak lem lo bawk a. Middle school kan kal laiin kan senior in min bem ve ngei a, ka thianten min lo yes sak pek alawm. Min hmu tura a lo kal apiangin ka biru a, min biak lahin ka chhang duh bawk si lo. A tawpah chuan ka hriat lohin min then aniang bialnu dang a lo nei daih.

"Hei hi a nalh.. " Silver thi mawi zet chu ka kawk a, dawr panga velah kan kal tawh a, ka duhthusam ka hmu ve chiah.

"I chiang maw... " Awih loh hmel zet hian min melh a. Ka duhah chuan ka chiang thin alawm, chu tak chu buaina a ni thin.

"Aw, la ang.. "

Chocolate man to zet kan lei leh hnuin kan inphur haw a. Haw kawngah chuan ruah a la sur zui.. A hit lo ngei mai. Garage kan neih loh avang hian kan in piah lawkah hian man chawiin kan dah thin a. Tea'n a park fel hnu chuan kan intlansiak a.

"Engah nge ruah in do... " Ka nu thinrim hmel kan tawng leh ta siah mai le. Hrukpuan min lo pe vat a. Ka room-ah inthlak turin ka lut nghal a "Tea, I u tlan pui tawh suh ka tih kha... " Ka nu tawng ri chu ka hre hman. Room kawngka ka khar rualin ka mittui a lo hnam a, keimah vangin ka nauin hauh a tawrh phah leh ta. A thiam loh pawh a ni tawp si lova, keimah vang vekin....



"Eng nge thleng a.. Tea, engngatinge" Ka nu te chul ri ka hriat chuan ka earphone ka dah thla a, ka room atangin ka chhuak nghal bawk.

Tea hmui sir thi deuh ser ser leh a mitko atanga thisen chhuak ka hmuh chuan ka khawng vek a, ka nu lah a te chul bawk a. Ka pa chu a vei thuak thuak a.

"Tea, tinge. Tunge ti che" Ka va ti thawr a. A lo nui suk thung.. Min chhang lem loin ka nu a be daih a "Nu, a tawk.. Damdawi te min hnawih sak zawk rawh".

Ka nu chuan harhchhuak thut niawm tak hian " Ni tak.. Aw Tea tunge maw kut lo thlak che le.. " ti buan buanin first aid box a va la a.

"U Ngaihawma hian min lo pui hlauh a, ka na vak lo zawk a nih hi... " a tih chuan Thuthlenga mipa pakhat lo thu ve reng chu ka va melh a. Chiang em emin min lo en ve reng zui. Ka hawi sawn nghal hmak.

"Eng thil nge thleng ta a..? Min hrilhfiah thei lo maw.. " Ka pain chupa chu a bia a. Hman zana nihliap ka zawn pui pa kha a ni tlatin ka hria.
A hmel landanah chuan kan inrual velin ka ring.

"Tleirawl rui hoin an lo tibuai a, ka pu, in fapa hi a fel khawp asin, khawih let ve duh se tihnat tawk kha chu a nei ve ngei ang mahse a bei let lo hrim hrim a, engtin tin emaw ka va thelh thei hram a nih kha.. " a sawi zawh chuan min rawn melh leh a, ka lo en ve reng chu niin a vawihnih nan ka hawi sawn leh daih.

"Tea, khawih let ve tur alawm.. Nep loh tur" Ka rilru a na em a, ka insum thei lo.

"A.. U, i ho em mai.. An rui buai mai mai alawm" tiin a thutna atang a tho a, a hliam chu ka nuin a tihfai sak a, a na lutuk lo a ni awm e.

"U Ngaihawm, lo thu rawh aw.. Ka va inthlak lawk ang e. " tiin a pindan a pan a.

"Ni e, I la thu ve reng ang chu.. Bawihi, thingpui lum la... " Ka pa a ni. Thingpui lum tur chuan ka tho a.

"A.. Tihtur pawimawh dang ka la nei a, kal nghal mai pawh ka pawi ti lo asin.. " a tih chuan ngaihven lo luiin thingpui bel chu ka chhuang a.

"Chuti tur em ni.. " Ka nuin a tih chuan " A pawimawh ang reng a, Tea kha ka lo thlah lawk ang ka tia, ka kal leh nghal mai ang e.. " tiin a tho hluai a, ka phone ka bih ngar ngar.

"Aw.. A pawimawh hmel sia, kan fapa ilo pui a kan lawm lutuk a nia.. "

"Ni e.. Lo awm lo ta la Tea hi engtin tak awm ang maw.. " Ka nuin a ti ve bawk. Chupa chuan "Ka tih theih tawk alawm.. " ti sapin kawngka lam a pan a, ka nu leh pain kawngka thleng an thlah a, nidanga lo leng leh tur te paw'n an tiin ka hria.

Ka rilruah Tea khawngaihna a awm reng a, tukinah khan a bialnu birthday lawmnaa kal turin phur takin a chhuak a nih kha. A present te lah chu a tuam uluk em em lehnghal a. A chhuah dawna a nuihmel mawlh kha aw.. Tlai chaw an ei nghal tur thu te kha a sawi luam a, khaw thim hnua a lo haw chu khawlaia leng tleirawl awm tha duh lo ho kut a lo tuar ringawt a, ka pai dam thei hlawl lo. Khapa khan a lo pui hlauh zawk a...


Zing chaw ei laiin Tea'n a bialnu nena an chance neih dan a sawi zut zut a, chaw ei lai mah nise kan nui nasa hlawm kher mai. "Tunge maw I chhun le.. Ka zei thin viau a, i nu hian min chang lo tep asin mawle.. " Ka pain a chaw thleng nena tho tharhin a ti a. Kan nui huk thung.

"Ngawi mai teh.. Nang anih kha min neih loh hlaua buai buai chu" Ka nu lahin a lo ti ve bawk.

"Kha maw, a tih leh kha ka ring reng a.. I nu tihthinrim hi chu a awl e.. " Ka nui ring ngei mai. Ka nu pawh a nui ve hak hak a. Chhungkaw neih hi chu ava nuam tehreng em...


"Tah hian maw.. " Scooty chu ka tiding a, ka nutei chuan "Aw, tah hian.. " tiin a chhuk a. Keipaw'n ka helmet la thlain ka sam ka chul mam a, JT press-ah chuan kan inzui lut a.

"'Beiseina' tih lehkhabu kha a lam theih tawh tih min lo hrilh a.." Ka nutein kan luh rualin a ti a, kei erawh ka lo hawi kual thung. Press satliah emaw ka ti a, lehkhabu a lo inrem thap mai. Sherlock Holmes tih inziak pawh ka hmu.

Step-a lo chhuk mek mipa chu ka lo en reng a, min lo hmuh ve chuan a mit a la sawn tawh miah lo. Ka nutei dinna lamah chuan ka phei a, khapa khan min rawn kal pelin hnathawk ho dawhkana laptop chu a en a.

"'Beiseina' bu kha... " Chupa chuan a ti sap a. "Lawk aw.. " ti lehin laptop bawk chu a khawih leh a. Ka ning tep tawh..

"Tah hian i hming leh i phone number lo ziak la.. " Tiin paper leh pen ka nutei chu a pe a. Ka nutei chuan paper leh pen chu min rawn pe chhawng ve lehin "Ka phone a chhia a, i no. ziak mai rawh.. " a tih chuan ngaih tha chiah lo in ka ziak ve mai a.

Hman zana ka nau a lo puih avang khan lawmthu sawi pawh ka tum ve hman a, mahse min hria ang pawha a awm loh avangin chulai hmun atang chuan ngawi rengin ka nutei nen chuan kan inzui chhuak leh ta a. Lehkhabu pawh chu kan la nghal bawk a, but tlem te a ni a, kan hawn ve thei mai ang.





"Tlankimi maw..? " Ka msg dawn chu ka en vang vang a, ka no. hriat loh hnen atanga ka dawn a ni a, a dp ka en chuan Khapa kha a ni. Chhan loh tumin ka out a, msg dang a lo lut leh nghal zat.
Msg chu open loh ka tum zet a, mahse thlalak a ni a, ka open a. Ka download chuan ka phu zawk.

"Min hre tawh lo a ni maw..? " a rawn ti leh a. Chu thlalak avang chuan ka harh chiang asin.

Kum khat liam taa thil thleng a ni a, ka lo theihnghilh hman der tawh alawm le. Ka roommate te hi hnam dang vek an ni a, mahse kan inkawmngeih hle tho. Zu in ve zeuh zeuh hi an ching thin a, kei erawhin ka in ngai lo thung. Kan thiannu Prisi tia kan koh thin chuan Group pakhat 'One night date' tia a awm thu leh kan palia date nei tura kan kal tur thu a sawi a, ka phur lo hle a mahse thianten an 'Aw' vek laia a hnialtu nih bik kha hrehawm ka ti a. Kan inzui chhuak ta hlawm a, kalkawngah chuan Prisi chuan hming inhrilh a ngai lova,zan khat atana date ve zuai ringawt tur tih te chu a sawi ve duah a.

A hmun kan thlen chuan mipa pali hian min lo nghak reng tawh a. Tichuan kan han in pair up vel a, khatih laia ka pair pa kha tuna thlalak min lo thawntu hi a ni tih ka hrechhuak chiah. Mizo a ni tih ka hre lo va, ani pawh khan min hriat bik ka ring lo. Kan hming kan sawi lova, kan hnam dang awm ve tawp a ni mai. NE mi vek kan nih vangin kan inang tlang hlawm hle a, chuvang chu aniang Mizo a nih rinna kha ka nei lo hrim hrim.

A pair te tea kan thut hran hma chuan thla kan la ho phawt a. Chu thlalak chu min lo thawn hi a ni. Kha zan khan a vawikhatna leh a tawpnan zu ka in a, khapa bulah khan rui takin ka tawng nawk nawk a nih kha. Mizo tawng erawh ka hman awm ka hre lo thung. Ka tlin rei lo kher asin darkar chanve em pawh kan inkawm hmain ka chahthlak san a, ka thiante paw'n chutia kei ber ka chahthlak tak siah chuan min haw pui ve mai a. A tuk zinga ka harh chuan zu ka in ve ringawt avang khan ka inchhir lutuk a, Pathian hnenah ngaihdam dilin ka tawngtai nghal mawlh mawlh a nih kha.

"I hre chhuak chiah em ni..? " Ka ngaihtuahna a hria emaw ni le...

"Eng nge i duh. "

"Naktuk zanah ka lo leng ang.. " a zak lo e a. Kha hun kha chu a liam tawh. Tunah chuan khang hun laia ka nun hlimna ang kha ka nei tawh hek lo.

"Engvangin.. "

"Nula ka lo rim dawn" ka ner sak a.

"Kan chhungkuaah rim tur an awm lo.. "

"Chu.. I nau angin Tlangval i ni ve i tihna em ni" Ava tawng thei tak em.

"Lo buai suh.. "

"Naktuk zanah ka lo leng ang, i thutiam te pawh kha hrilh nawn leh i ngaih hmel tlat.. " Thutiam ka neih ka hre lo. Ka type tan chiah a, ka thawk dan a rawn dik lo tan a, a rawn na ut ut nghal mai bawk si.

Ka khum atang chuan thawh kan ka tum a, ka au thei bawk si lo. Reilote chhung lek pawh chuan a na hman hle a, ka chau deuh hnawk a, ka khum bula dawhkan te chu engtin tin emaw ka titlu thei hram a. Ka nu leh pa hmel chu fiah lo zetin ka hmu a.... A thim ta vek mai.

"A harhin ka hria... " Ka nu áw a ni. Ka mit chu a rit hle a, ka zo meuh lo. Na ka nei tawh lova, zawi zawiin ka mit chu men ka tum a.

"Haw ang u.. " Ka men rual chuan ka tichhuak sap a. Ka nu leh ka pain hahdam sawng sawng hmel pu hian min lo en a. Tichuan kan inhruai haw ve leh phawt a.

"O Tlankim....ka lo kan dawn che" Ka room kawngka chu hawngin a lo tlan lut nghal a, min rawn bawh rawk bawk a. Ka lo kuah vat a.

"Mimi, i u kha a dam lo.. " Ka nutei'n a lo tih chuan Mimii chu khum atangin a chhuk a. Ka nutei hi chu senior lama pasal nei tih takah a fanu hi khuahkhirh hneh tak a ni. A strict lutuk a a bulah ka awm peih ngai lo.

"Ka dam vek tawh alawm.. Ka mu mai mai a nih hi" Tiin khum chu ka thawh san a, "Mu rih rawh.. " a tih pawh chuan ka duh tlat lo. Room atang chuan kan inzui chhuak hlawm a.

Nizan lama ka that loh thu an lo hria a ni maw e, reilo te an leng a, an haw ve leh mai. Ka pa office bang a lo haw chuan "Mimii chu min lo nghah tir tur alawm.. " a ti leh hram a. Naupang duh leh lutuk mai.



Zanah chuan room-ah Bible chhiarin ka awm a, kum khat liam ta atang khan Bible hi ka thian tha ber a ni tawh. Kan mangan tawpah hi chuan belh tur dang hi kan lo nei hauh lo mai a, Pathian chauh lo chu.

"U, U Ngaihawma a lo leng a, ka nu leh ka pa thenawmah an kal lawk bawk sia, lo thu chhuak ve la.. " Tea'n inthlahrun hmel takin min lo ko a. Ngaihawma chu a lo leng tak tak a ni maw... A lo kal tak tak ka ring miah lo asin le. Chhuah loh ka tum zet a mahse kha thlalak kha Tea a lo hmuh ang tih ka hlau bawk si. Ka nunhlui a ni a, ka zuin thu thleng khan hre mah se tun dinhmunah chuan min hau kherin ka ring lo mahse hre turin ka duh bawk si lo. Ka chhuak ta nge nge a.

"U, Tlana a accident a ni awm e. Ka va kal mai ang aw.. " Ka chhuah rualin Tea chuan a ti vut a "U Ngaihawm, tikhan lo leng mai rawh aw. Ka u nen hian lo Inkawm ula... " Tiin Ngaihawma lam a hawi leh a.

Ngaihawm lah chuan "Aw, kal rawh. A zia lo em mai" a lo ti. Tea chu ka chhan hmain a chhuak nghal a ni mai. Ngaihawma nen chuan kan inmelh ran a, a ni a thu a kei ka ding thung. Kan mit kan lasawn lo ve ve a, a hawisawn hmasa zawkah ka tang tawp. A thutna bula sofa-ah chuan ka thu ve a. Ka zam tlat. Tinge zanin ber kherah an chhuah vek le.

"I hmel kha tinge. ? " Ka va en chuan min zirchian tum ang hrimin ka hmai vel chu a thlek kual a. Ka meng kual rawih mai.

"Timah.. "

"I dam lo em ni? " A ti leh. Thil chik mi tak a nih dawn hi.

"Dam e. I sawi tur chu sawi vat rawh" Ka ti chang fak a.

"I dam chuan a that chu. " Tiin a nui suk.

"I thutiam kha i hre tawh lo em ni? "

"I lakah hian thutiam ka neih awm ka hre hauh lo.. "

"I nei chiang alawm. I awih loh chuan khatih huna awm ve ho pawh kha zawt ila.. " Tiin a phone a phawrh nghal. Rang fahranin a phone chu ka va chuh a, kan kut a insik rual chiah chuan tek chuai hi a awmin ka hria. Hnai set sawtah chuan kan inmelh a.

"Midang zawh i duh loh chuan thutiam i nei tih i pawm a ngai a nih chu.. " A tih rualin ka thu tha nghal a, ka khuh karh bawk. A ni erawh a danglam eih lo. Tinge ka zam bik tlat le.

"A tha e.. Sawi rawh" Midang biak ka duh lova, ka thiante nena inbiak thar leh pawh ka duh hek lo. Tihian keima khawvelah ka hlim tawk viau.

"'Ka nikhat hun ka pe ang che' Chu chu i thutiam a nih chu.. " A tih chuan ka ner sawk. Chutiang thu atthlak te ka lo chhak chhuak a ni maw. Ka nikhat hun maw? Mahse duhthlan tur dang ka nei chuang em ni? Ka nikhat hun chu ka pe lo a nih chuan eng nge tih a tum leh ang le..

"Tunah hian ka nikhat hun chu pe duh lo ta che ila.. "

"I thu alawm mahse i thiante biak pawh i duh lova ka bia ang a, i dam tha ver vawr tih ka hrilh ang. Chu chauh chu ni mai loin I chhungte hnenah he thlalak hi ka hmuh ang a, nang leh kei hi kan lo inngaizawng tawh a, kan thleng thui tawh hle bawk tih ka sawi bawk ang. Dawt var sawi chu ka pawi ti lem lo. I nu leh pa chu an zak ve khawp ang le.. " A sawi zawh chuan tifuh inti zetin a khi sak a. Ka nu leh pa chu hrilh ta se, ka sawi tawh ang khan min hau dawn lo, mahse chu chu an fanu an hriat reng dan ni turin ka duh lo. Mahse Ngaihawma hian dawt a sawi alawm, ni e, dawt a nia. Thudik ka hrilh thei mai ang chu.

"Dawt a ni tih hrilh chu tum buai duh suh. He thlalakah zu bottle a lang tel tih hria la. I nu leh pa lah kohhrana nihna pawimawh tak chelh an nih hmel bawk si. " ka melh rum em em ringawt. A bak tihtheih nei hek lo.

"A tha alawm. Engtikah nge ni ang? "

"I va hmanhmawh leh si ve.. " A vei nuih suk. A ngeiawm thiam riau.

"Sawi vat mai rawh. Ka thutiam chu tihhlawhtlin vat a, nang nena inhmuh tawh loh vang vang ka duh a nia.. " Ni e, thu ka tiam a nih chuan ka tihhlawhtlin a ngai alawm. Thutiam hi a hlu a ni lawm ni. Ka thutiam ka tihhlawhtlin tawpna pawh a ni maithei asin.

"Naktuk dar sawmah ka lo hruai ang che. " Chu zawng chu. Ka nu leh pa an lo haw a, Ngaihawma an hmuh chuan an be siam siam a, thingpui a in hnuin a haw a. Pawn thleng ka va thlah a.

"Ilo mut theih loh phah vel ang e.. "A tih chuan ka lei ka chhuah khum tawp. A sawi ang ngeiin ka muhil tha thei lo. Khawi hmunah nge min hruai ang tih mawlh mai chu ka ngaihtuah a, mutthilh a har lam hret a ni.


"A tha alawm. I chhuak harh lo ve em a, chhuah harh hi a tha a nia. Mahse Ngaihawma nen hian in lo inhre sa em ni? " Zingah chuan Ngaihawma nena chhuah kan tum thu ka sawi a. Ka nu lah chuan rin lawk ang ngeiin zawhna min zawt leh ta.

"Aw, nikum lamah khan Charity Event-ah kan inhmu tawh a. Ka lo hre tawh lova mahse amah khan min lo la hria a" Ka khur deuh hlek. Dawt ka sawi miau alawm.

"Um, in leng dawn nia. Mahse nuam hi i ti lutuk ang e aw.. " Ka pa. An vai chuan an khi tha a, Tea lah chuan "Leng vek teh u. Ka bialnu nen chance kan lo nei ang" a ti ve ngei. Kan nui zo vek. A ni tehlul hian kan inah a bialnu chance a neih pui tawp lo ang e.

"Tea, Tlana chu a na viau em ni? " Ka nu.

"A lu a sawh ve deuh a, thil dang chu na vak a nei lo.. Mahse a nu chu a tap reng mai, nu hlauthawng hma chi tih takah"

"A ni reng dawn asin. Nu leh pa te tan hi chuan ngaihtuah in na a, mipa ngat phei hi chu kan innghahna in ni ve a. Helmet khum lova bike khalh ve ngawt te hi pa na emaw in tia a ni teuh si lo. Nangpawh fimkhur viau ang che. Helmet khum lo te khan ilo tlan chhuak ve ngawt ang e.. " Tea paw'n dik a ti ve hle aniang. A lu a bu nghauh nghauh mai.




Ngaihawma chu Dar Sawm rik hmain a lo thleng a, ka la inpeih lo deuh. Ka thawmhnaw ka thlak zing em a ni. A tawpah chuan jeans paw dal leh shirt var bodyfit hain ka chhuak ta hram a.

"Tlankimi nen hian in lo inhre tawh reng a ni maw. In fel hle mai Charity Event-ah te tel nachang in lo hria a.. " Ka nu tawng ka hriat rualin Ngaihawma bulah ka va ding nghal. Mak tih hmel deuhin min melh a, ka nui lui sak.

"Kal tawh ila.. Ka hman tawh" Ka ti a. Phur deuh angin kan inzui chhuak a. Step-a kan chhoh lai chuan a rawn nui hak hak a. Ka melh haw thung.

"Charity Event-ah maw..? " Min nuihzat hmel deuh hian min en a. Ka thin tihrim dan hi a hria ka ti. Ka nu pawh eng nge maw a lo sawi chhuah kher le.

"Dawt sawi chu kei aiin ilo thiam daih a nih hi" a tih leh chuan "Tawng tawng lo khan kal vat ang. Tawng thei zeh zuah si.. " tiin ka pen chho nghal mawp mawp. Step thui tak a ni lo bawk a, kan thleng chho nghal a. Kawngsira car lam chu a pan a, a hnungah ka zui. Ka thutna turin kawngka chu min hawnsak thlap a, ka lo lai leh hman pek a. Luh lawk nachang ka hre leh lo.

"I hmanhmawh kha. Lut vat ta che" A tih rualin ka thu nghal chawrh. Nui sukin a kawngkhar a rawn khar a, car hma lama kalin a driver side lamah chuan a kal kual a, a rawn luh rualin a rim tui tak chu a rawn nam huk bawk. Mipa rim dik tak. Shirt var a ha ve a, kekawr erawh a dum a ha thung. A pian chu a dik vei thlap a, a sang over lova, mizopa dik tak a ni mai. Kei ai chuan a sang tho. A sam chu a thur deuh bam a, a tihthur luih ni maiin ka hria. Sana a bun thlap. Amah chu a fai tawp a ni mai. A pheikhawk pawh fai tak a ni.

"I nalh lutuk.. " Kan tlan chhuah hnu chuan a rawn ti thut a. Ka lai lutuk chu ka sen tawn tawnin ka hria. Ka sawi awm tak a sawi bawk a, amah hi a nalh lutuk zawk tlat. Eng thil nge ka ngaihtuah pawh hi ka hre tawh love.

"He lamah eng nge kan tih dawn.. " Khawpui chhung lun lai zawng zawng kan tlanpel zo tawh. Khaw pawn lam kan pan a, kan tlan rei tawh bawk si ka ngaih a tha chiah tawh lo.

"I thlen hunah I hre mai ang. " Tih chauh a sawi. A tawng dan vel hi a inlapa ve riau. Ka ngawi ve mai bawk. Ka ngaih chu ngam chiah lo mah se min tihnat duh bik erawh ka ring lo. Mak tak maiin amahah hian rinna ka nghat ve tlat.

Reilote kan tlan leh hnu chuan kawng peng a lo awm a, kan tlan chho a, tlan kual lehin kawng sirah chuan a ding dat a. A chhuk nghal a, keipawh ka chhuk ve. A hmun chu a reh hle a, thingkung thliin a chhem ri leh sava chiar ri nawk nawk thawm bak hriat tur a awm lo.

"Hei hi eng hmun nge.. " Tiin ka va en a. Car hnung atang chuan bag a rawn khai chhuak a. Min rawn hnaihin "Lo kal rawh. I inchhir lo ang.. " a ti leh tawp.

Ka hmaah a kal a, ka zui ve zel. Step te tak te hi a lo awm a, a hmun lah chu a hring dup a, chu step chu kan zawh chho a, ni a sa lo a a zia phian. Tlangah kan lawn a ni maiin ka hria. Step chu kan han zawh chhuak ta alawm, a hmuh kan thlen chuan ka chhungril thleng hian a fan raih raih thei hial. Tang zawlah chuan thingkung a ding thluah a mahse awmze neia phun an ni thung. Thingkung leh thingkung inkarah chuan kawng zau vak lo a awm a, chu chu kan zawh phei zel. A dai nuam bawk si. Tlang hmawr kan thleng phei chu ka zuang lo chauh. Khawpui chhung chu a lang chiang lutuk tlat. Thawm erawh a ring vak lo thung. Thli a thaw heuh heuh a, boruak a dai nuam a, khawpui ka hmu pha bawk si. A va han nuam tehlul em! Hei bak Mizoramah chuan a awm lo ang e.

"Nuam I ti em? " A rawn tih chuan lehhawiin ka nuih sang a, a nui ve tawp.

"Ka hlim.. " Tiin ka chhang. A dik, ka hlim takzet. Vawiin ni ang renga hlimna ka neih loh na hi a rei ta.

"I hlim chuan a lawmawm e.. Hawh, tah hian thu ang.. " Tlang hmawra thutna an siamah chuan kan thu dun a, tlakdanna a awm lova, chetsual palh chuan tlak thut a ni mai. A sang viau lehnghal.

"Ka hmu leh che hi ka lawm. " Ngawi renga kan thut hnu chuan a ti a. Min melh vung vung a.

"I ho" Ka nui tawi tak a.

"Ho lo. Hmuh leh che tuma ka buai zia I hre lo a nih kha" A tih chuan ka beng a verh ve deuh. Kei hi min hmuh leh a lo tum a maw.

"Engtinnge I buai a.? "

"Biakpawh dan tur che kawng tinreng ka dap a. Ka thiante lah khan a tu no. mah kha an lo nei bik si lo. Kha Group lah kha an lo delete daih mai bawk si. I hming ka hre bawk si lo. Zantin kha club-ah khan ka kal tawp. Mahse i rawn lang ve ngai bawk si lo. Ka beidawng tawh a, mahse ka thianpa dawra ka len zana i lo lan hlawl avang khan ka lawm asin aw. A tirah kha chuan nangmah ngei i ni tih ka chiang lova mahse nihliap kan inzawn kha chuan ka chiang ta a. Tea ka lo thlah tum khan a u ilo ni lehzel nen Pathian hian ka hmuh leh che a phal a niang ka ti ta a. A vawithum nana ka dawra ka hmuh leh phei che kha chuan I thutiam hlen tir che ka tum bura mai. I hming leh I no. te kha tul miah loah ka ziah tir che a nih kha.. " A sawi zawh thawl huai hmel hi a pu. Kei erawh a thusawi chuan min dek deuh zarin ka hria. Engvanga chuti khawpa min hmuh leh chak nge maw a nih ang le..

"Khawi thla ka lo lak ang che.. " A tih chuan ka inpose nghal a. Style hrang hrangin ka inpose a. Ka sam tawnna scarf chu ka pawt thla a, ka sam chu thliin a chhem phe lawp lawp a, a lo click ve zel bawk. Ka scarf chu ka kut atang chuan a thlawk thla thut mai le.. Rang fahranin ka scarf man hman tum chuan ka che nghal, ka kut lehlamah Ngaihawma'n a rawn vuan chat a, min pawt let nghal lawp. A awmah chuan ka bei rawk. A lungphu lah chu a rang em em a, keipawh chuti tho. Tunah khan min rawn chelh hman lo se ka tla mai law'ng maw.

"I mawl em ni? Engngatinge khatia I chet thut. " A ti vin hlak a. Ka darah chelhin a awm atang chuan min dah hrang a, ka mitah chiang takin a melh a, a mitmeng atang chuan a hlauhthawn hmel hle.

"Tihpalh.. " Ka ti zawi raih. Tinge ka chhehvela awm te hi ka tih mangan bik reng mai le. A va hrehawm em. Ka mittui lah chu a lo hnam ve bawk. Ka mittui hi a hmaah hian tlak tir ka tum lo bur. Ka khap let sak sak a.

"Fimkhur tawh rawh. Thingkung hnuaiah sawn thu ang. Helai chu a him lo.. " Ti lehin min pawt tho lawp a. Ka kut chu nghet taka chelhin thingkung lam chu min pan pui a. Ka zui mawl ve tawp. Ka tha a la khur der der tlat a. Thihna chu ka la hmachhawn tur tho ni mah se ka lo la thlahlel ve hle a nih dawn hi.

"Ka vin che a sorry aw. Ka hlauthawng lutuk a, ka inthunun hman lo alawm le" Thingkung hnuaia kan thut hnu chuan zaidam âw tak hian a ti a. Ka kut a vawn reng chu ka la thla a.

"A pawi lo. Keimah alawm, ka fimkhur lo thei lutuk a. " Ka ti ve sap. Kan boruak chuan a hma a tluk ta lo. A rit riau.

Ka bula thu pum a rawn rik thut chuan insum hman lovin ka nui chhuak vak a. A ni pawh a nui ve tho. A aia nasain a rawn ti leh. Ka nuih a za tulh tulh. Ka kawk a, ka nuih ta chiam a, a ni erawhin min en a a nui ve thung.

"Tinge...? " Ka pum dawm chungin ka ti a. Ka nuihnaah ka pum a na vek.

"Zing chaw ka ei lo a. A tam ve tawngkhawng tawh a nih hi"

"Tinge I ei loh? Chaw hi chu a hun takah ei ziah tur alawm" Tiin ka hawi kual a "Heng laiah eitur leina a awm si lo va"

"Ka keng alawm.. " Tiin a bag tlang hmawra thutnaa a dah chu a va la a. A bag chu hawngin ka bulah chuan a lo thu leh a. "Hei... " tiin momo leh chow, thil chi hrang hrang pack vek chu a rawn phawrh a.

"Ngaihtuah kim leh si ve.. " Ka ti.

"Dawn lawm ni. Kha ei ang.. " Tiin fian leh fork min pe a. Ka lo la ve mai. Mak deuh maiin a bulah chuan zak miah lovin ka ei teuh. Ka puar ul thei hial.

"I puar em. " Kan eina vel chu kan tifai leh a.

"Aw, nang.. "

"Puar lutuk. " Tiin a khi leh vur tawh. Kan boruak pawh a pangngai chho leh tawh viau.

"Saw lamah sawn pipu a awm asin. I uai duh em? " Reilote kan thut hnu chuan a ti a.

"Yes, kal ang. Helaia thut reng hi chu nuam tho mah se a nuam lo"

"Nuam tho mah se a nuam lo a? " A nui hak hak a.

"I sual e a.. " Ti supin ka ding a, ka kekawr mawng chu ka beng fai a, pipui awmna lam a tihah chuan kan inzui phei a.

"Chak deuhin..... " Ka sam thliin a rawn chhem rual chuan ka au vak a. "A aia chakin... "

"I kid ka ni ringawt alawm le.. " Ti supin a aia chak chuan min then leh a. Pipu ka uai lohna chin pawh ka hre tawh lo. Hetiang anga thinlung taka midang bula ka nuih lohna chin pawh ka hre tawh hek lo. Vawiin zet zawng ka tan ni chhinchhiah tlak a ni. He ni min hmanpuitu mipa nen hian ka theihnghilh tawh lo ang.




Tlai dar 3 velah kan haw a, kawng tluanin hla kan play a, kan zai pui a, kan rak chiam bawk. Kan inpawh thar sawt a, ka tan chuan thian thar tha tak a ni. Kan in pengah chuan ka chhuk a. A ni pawh lo lut kawi tawh loin a tlang ve nghal. 'Nidangah ka lo leng ang' a tih kha.

"Ilo va haw hma ve.. " Ka nu.

"Hma mi? A tlai tawh hi.. " Thutthlengah chuan zawi zetin ka thu a.

"A nuam em? " Tea chu ka bulah a lo thu nghal.

"Nuam hian a sawifiah zo lo" Tiin ka nui ver ver a.

"I thlalak ho lo show ve la. I intithei em mai"

"E.... " Ka thu ngil nghal. Mak tih hmel deuhin min en reng. "Eng nge.... "

"Ngaihawma phone ngawtin kan click a. Ka nei miah lo. Inthawn tir angai.. " Ka bag la kangin room-ah ka tlan lut nghal a. Tihtur a tam lutuk. Inbual fai, inthlak, dairy ziah. Dairy hi ka ziak ve thin a mahse ka nuna thil danglam thleng chiah ka ziak thin thung. A zawng zawng ka ziak lo.

Zanriah ei laiin ka hun hman dan report ka pe thlap a, kan thil ei tui zia te, a hmun mawi zia te. 'Khawvel mawizia ka hre thar' ka tih chuan an inmelh deuh hrek hrek hlawm a mahse ka hre lo der hmak. Ka tana an tuar ve reng hi ka ning. Keimah chauha tawrh theih nise ka ti. Thlalak ho erawh Ngaihawma hnen atanga ka neih hunah ka hmuh tir ve ang. An kal ve chak ang chu aw...


"Hey, ka pic ho kha min lo thawn ve aw"

"A man a to viau ang"

"Engkim hian man a nei emaw I ti mi? Bakah keima thlalak an nih kha"

"Khawvelah hian man nei lo a awm lo. Bakah ka phone ania" Ka tawngkam a hmang ve leh kher.

"I ninawm zet zut thei em mai. Lo thawn vat.. Chuan man nei lo thil hi a tam"

"Eng nge man nei lo thil chu? Nunna takngial pawh hian man a nei asin. He khawvelah hian man nei lo thil a awm tawh meuh lo"

"Awm chiang e. Hmangaihna, lainatna, khawngaihna te hian man an nei lo. A thlawna mitinin kan pek chhuah theih a ni. Tin, nunna pawh hi a thlawna kan dawn asin. Nunna chhan tur erawh chuan sum a ngai tehmeuh mai mahse a thlawna kan dawn hmasak zawk a ni. Chuan tui leh boruak hian man an nei hek lo. Pathianin a thlawna min pek liau liau a ni. "

"Chuti zawk maw..? "

"Aw, ni chiang e. Nunna hi a hlu teh a nia. Sum chu eng ang paw'n tam mah se a thlawna kan dawn nunna hi a lei zo lo fo va, a thlawna pek kan nih ang chiahin lak sak theih kan ni bawk. "

"I thusawi chu ka pawm e. Thlalak chu ka lo thawn nghal che.. Boss" Emoji nui lai a rawn dah tel bawk a.

"Um, ka lawm e. Vawiin avang pawh khan ka lawm e aw" Thinlung takin ka lawm.

"Keideuh hi ka lawm.. " Chhang tawh lo in a thlalak min lo thawn ho chu ka en a, a mawi hlawm takzet. Ka dp ka change nghal hmak. A nuam ve mai mai alawm. Ka phone a ri a... Joicy

"Joic, I dam maw? Min rawn be khat lutuk a" Ka pickup rualin ka ti nghal a.

"Aw, dam e. Tunlai tak hi kan buai zual deuh a mahse hei remchang hmasa berah ka lo be nghal che nih hi" A âw chu a la nem reng a, a âw atang ringawt pawh hian mitha tak a ni tih hi a hriat hliah hliah. A ni hi ka pa lama ka first cousin a ni a, Missionary a ni. Tunah hian Sonarai, Tripura-ah a awm mek.

"Engtik nge ilo haw dawn?"

"Pathian zarah kan dam a nih chuan tun thla tawpah hian ka tum ve deuh a..Karkhat vel ka awm dawn a, ka kal leh hun chuan lo zin ve mai mai la. Inlak thawvenna a ni ve mai lawm"

"Nia, lo haw phawt la. Kan sawi tha leh ang a.. Ka ngai tawh lutuk che"

"Keipaw'n ka ngai lutuk che"

Ka hnuk a ulh teuh hle. Joicy nen hian kan inrual a, nursery atanga zir dun char char kan ni. Ka unaunu leh ka thiantha ber a ni a, a tel lo chuan ka kim lo riau thin. Khawi hmunah pawh kal dawn ila kan inzui a, school khatah kan lut chho zel thin bawk. College kal dun tum kha kan ni a, mahse Frederick a sermon kan ngaihthlak atang khan a ni chu a danglam ta a, a tha zawngin a danglam. Missionary nih a tum nghet ta bur a, tichuan class 12 kan pass khan kan kawng chu a dang ta a. Tihian kan kal hrang ta a nih hi. A piangthar tha bawk a, a nunah hian Isua ka hmu fo thin. Ka inhriatchian tluk zetin min hrechiang a, a lakah eng thuruk mah ka nei hek lo. Tunah chuan tihian phone in kan inbia a, a hma kha kan pha tawh lo. Kan inngai em em reng mai a nih hi. A rem chuan zin ve ngei pawh ka duh.





Zingkar atangin ka nu nen a pangpar huan kan tifai a, phun sawn ngai te kan phun sawn a, a tiak thar te pot tharah kan phun a, inchhunga hun awma mawi chu kan hung lut bawk a. A hahthlak ve viau nain a nuam reuh phian. Ka pa office pawh a lo bang hma a, Tea erawh class banah a thiante inah chaw a ei nghal dawnin ka hria.

Zan dar 7 velah Ngaihawma a lo thleng a. Nilengin kan inbe miah lo a, hei tunah a rawn lang hlawl mai.

"Khawnge Tea hi.. " Ka nu bulah chuan a ti a.

"Hla zir turin a chhuak leh nghal a nih kha maw.. "

"Aw.. A ni hi chu a fel em mai" A ti vei sap a. Ka nau hi chu ka chhuang ru ve teh a nia.

"Ngaihawm, tihian Tlankimi nen lo Inkawm ula, kan mutsan mai ang che u aw. Vawiina kan pangpar khawihna velah khan ka kawng hi ka herh deuh tlatin ka hria... " Ka nu chuan a ti zung zung a.

"Aw, va mu rawh u. Tlankimi ka lo leng alawm, a ho lutuk" A sawi dan teh kher chu.

"Ni e.. Tihian lo Inkawm rawh u" Ka pa chuan ti ve lehin room lamah an inzui phei a.


"I induh" Kan pahnih chauha kan thut hnu chuan a ti sap a. Min melh vung vung lehnghal.

"Eng nge ka induhna? "

"Hre chuang lo" Ti leh hmuk si.

"I mawl e.... "

"Kei aiin i fing bik chuang lo"

"Nang ai chuan ka fing hrim hrim" Ka ti leh. Min rawn en a, a nui suk. Min hnial peih tawh lo aniang.

"Vawiin nilengin eng nge i tih a? " Kan ngawih deuh vang vang hnu chuan a ti a.

"Ka nu nen pangpar vel kan phun sawn a, kan tifai bawk a. Thildang vak chu ka ti lo, hmeichhe hna a ni leh tawp mai"

"Hmeichhe hna chu eng tak ni ang maw.. "

"Hmeichhe hna chu maw..... Hei, hmun phiah te, chhuat nawh te, insuk te, thil sil fai te... " A mita chiang kel kawla en chungin ka ti sak sak a.

"Nge chutiang te hmeichhe hna i tih kher.. Mipa paw'n an ti ve tho lawm" A nurnang a. Hmeichhe hna ka ti bik kher kha a lawm vak lo aniang.

"I ti thin mi.. "

"Ti thin e.. Mahse hmeichhia chu ka ni hauh si lo. Khawnge inendik ka ngai tihna em ni.. " Mak tih hmel deuhin a inenkual vel a, nuih hi a za thin e. Hepa hi chu ka tan thian tha tak a la nih ngei ka ring.

Thu dang kan sawi pawhin kan inhnial zel a, min hnial thlak dan hi a hre em a ni. Ka ngei zawk hial. Thu a thiamin rin ai takin thil a hre zau bawk a, tawngkam ho te anga lang awmze thuk tak neiin min hnial dang leh tlat zel. Tea a lo haw hnuin thingpui te kan in ho leh rih a, tichuan kan inthlah ta a.

"Mangtha"

"Mangtha tih ka duh lo. 'Muttui' min ti rawh" A va ho e aw..

"Nih Muttui" Ka ti leh nge nge a. Nui sukin "Nangpawh muttui le" Tiin step-ah chuan a chho a. Ka mutui reng mai a nih hi....


Ngaihawma chu a hman zan apiangin a lo leng thin a, ka nu leh pa te paw'n kawm nuam an ti a, fel an ti hle bawk. An sawi an sawi ve reng mai. A ni tak bawk a, an sawi duh zawng a hre em a tin ni. Keipaw'n ka ngaina a, ka sawi tawh angin ka tan thian tha tak a ni der tawh.

"Lehkhabu i ziak thin mi? " Ka tih chuan mak tih hmel deuhin min melh a.

"I hre reng maw ka tia"

"Hre nang.. I sawi loh te chuan engtinnge ka hriat ang"

"Min zawh loh te chuan engvangin nge ka sawi bik ang. " A ti nghut.

"Tunah ka zawt reng che lawm.. "

"Aw, ziak ve thin e. Nileng lengin eng hna nge thawk se min tih a. I mak ve e... Nang hi chu" Tiin a tho vut a.

"Eng nge i tih dawn.. " Tiin ka melh chho a.

"Ka haw dawn, a tlai tawh hi.. " Kawngka lam a pan nghal.

"Ka lo thlah ang che" Tiin ka zui a, kawngka bulah chuan a ding leh rih a.

"'A la hma alawm' tih tein min chelh der ve ta che. " A ti leh si. A chang hi chuan naupang a ang thin ngawt asin. Ka nui leh ringawt.

"Aw, a nih thu rih la. A la hma alawm"

"Ka duh tawh lo. " Ka nui raih raih a, a nui ve tawp.

"Takin a tlai tawh alawm, ka haw phawt ang e. Naktuk zanah ka lo leng ang aw.. Muttui le" Tiin min nuih leh sak a, a chhuak a "Nangpawh muttui le.. " tiin kawngka ka khar a. Ka kalh fel hnuin mu turin ka room ka pan a, kum khat liam taa ka nunna tihtawp ka tum laia min chelhtu ka bible chu keuin ka chhiar a, tawngtai lehin mumang ram nuam takah ka leng ta der der a.





"Tlankim, tunlai hi zan riltam i nei tawh ngai lo em ni? " Titu ka nu chu ka en a. Nia, tunlai hi zanah thil ka ei tawh ngai miah lo.

"Engtinnge riltam te a hriat tawh ang. Zantin inleng a nei a, riltam a lang tawh lo.. " Nui hawk hawk chunga rawn titu Tea chu ka bula cusion te chuan ka vawm a. A lo indang vel a, a dang la lehin ka vawm leh, a lo man chat. Kan inum kual leh rih...

"A tawk.. Naupang pawh in ni tawh lo" Ka nuin a tih takah chuan kan tawp a.

"Nu, naupang ka nih tawh loh chuan nupui min neih tir tawh mai ula.. "

"Kan neih tir tak tak mai dawn che mi? I pa lo haw se ka lo sawi pui ang aw... " Ka nu chuan a tilui let ve a. Tea lah chuan an neih tir tak tak ang tih a hlau leh si. Aw.. Kan chhungkua tak hi chu(h).




Ngaihawma nen chuan kan Inkawm zui zel a, amah hi mipa vantlang tak, mizoah pawh a sang ve pawl tak a ni a. A ngo lo naa a hang chhe chuang hek lo. A hmai fang te hi a dik reuh a. A mizia lah hi pa churh ni si lo hian a pa mawi tawk em em a. A luck ru zekin ka ring.


Thawhtan zan a ni a, ka nu leh pa kan thenawm pitar dam lo kanin an kal a. Tea a bialnu te in lamah a thlawk phei leh tawh bawk.

"Kan group kan meeting dawn a, banah ka lo bia ang che. Lo muhil suh aw.. Kan nawi dawn nia"

"Yep yep.."

"Ka lo leng... " Joicy a rawn lang hlawl.

"Awi, ka duat. Ka ngai lutuk che" Kan inkuah nghal chung a. A la hmeltha reng e.

"Ka rawn lang nghal chat a nih hi. " Tiin a nui sen sen a, kawngka kan kalh a, ka room-ah kan inzui lut nghal. Ka khumah kan thu thak.

"Ka ngaihbel nge i danglam tlatin ka hria.. " Min melh vung vung a.

"Joic, sawi tawp ila, a sawi dan pawh ka thiam lo" Ka ti nuai a. Ka rilru buai ruk fo thinna hi a ni bak hrilh tur an awm bawk si lo.

"Ngaihawma kha em ni? " A tih chuan ka lu ka bu zeuh a. Ngaihawma chanchin hi phone-ah ka hrilh thuak tawh a.

"I duh tiraw.. " A tih chuan hnuai lam ka bih ngur a.

"Joic, ka inhrethiam lo. Duh chu ka duh lo, duh thei pawh ka ni lo tih ka hria mahse ka rilru puthmang hi ka thlak theih a ni si lova. Thian tha tak anga en reng chu ka duh. Ka inhrethiam lo. " Ka rilrua ka vei ruk reng chu ka sawi ta tawp. Ka thawl huaiin ka hria.

"Mihring I ni a, duhzawng I nei thei alawm. Ngaihtuah chiang la, i duh hi thil mak a ni hleinem. Kha leh chen nangmah i inhawng lova, i nunah midang i lalut duh ngai lo mahse Ngaihawma chu a danglam bik a ni ngei ang. Tinge i duh thu chu i hrilh mai loh ang? "

"Aih, a theih loh. Mipa fel tak a ni a, hmalam hun eng tak a nei bawk. Kei nen chuan a theih loh tih i hriat chian kha" Ka sawi zawng paw'n ka hnual nghal rawih thei nia mawle. Ka chunga thleng tura ka rin ngai loh thil tam tak ka tawng a, pasal fanau nena chhungkaw hlim tak din te kha ka suangtuah ve nasa thin a mahse tunah zawng mumang ramah pawh ka chang phak tawh si lo. A na ve thlawt alawm, pawm thiam hi a har takzet. Mahse ka siamthat theih a ni bawk si lo.

"Tlankim....Nih amah hian I rilru put ang tho hi a put ve I ring em? " Hrehawm tih hmel zetin min melh a.

"Ring lo, kan inbiak paw'n thu pangngai tak kan sawi ngai mang lo. Thian angin a ni paw'n min en... " Chu chu ka duh dan a ni. Thian angin min en se tih hi.

"Tihian thian ni reng ila, kan hlim zawk ang.. Thil dang sawi ang. " Ka nui lui a. A ni pawh a insiam tha vat a, a nui ve mai. Ni e, Ngaihawma nen chuan thian tha tak chauh kan ni reng ang.

"Takin, lo zin ve rawh aw. Nutei te i dil tawh em? "

"La dil lo. Zin hi an phal vak lova. Min ngaihtuah over thin tih i hriat kha" Tiin ka nui sak a.

"Dik ve reng.. "

"Tlankim.. Kawngka lo hawng la" Ka nuin min lo phone a. Joicy nen kan inzui chhuak a. Ka nu te pawh Joicy an hmu chu an lawm khawp mai. An chhuang bawk a, keimah ang thoa an fanu duat ve tho a ni bawk nen. Kan inkawm ho a, Tea lo hawa hnuin Joicy chu a va thlah a. Muthmunah Ngaihawma nen thu ho te sawiin kan inhnial leh char char a. 'Thian.. ' tia phun sepin ka mangtha a.




"Naktuk tlai dar 3-ah.. " A msg chu ka en a. Ka hre thiam lo. Eng nge naktuk dar thum chu.

"Eng nge a awmzia? " Tih hi ka thawn let a. A seen rualin min rawn call nghal.

"I hre lo der tiraw? "

"Eng chu maw.. " Ka bo tulh tulh mai.

"Tlankim, I harh chiang maw? " A rawn ti leh kher.

"Sawi vat mai rawh.. " Ka ti vin hlur a. A rawn nui hawk hawk nghal.

"I birthday mawle.. Eng hi nge I ngaihtuah thin ang aw. Mahni birthday hial theihnghilh chu" A nui vak vak a. Calendar ka en chuan ka birthday a lo ni reng mai. Ka nui ve tawp. Ka birthday te ka theihnghilh thei a nia, ka va han ho sawt ve aw..

"Nalh deuhin lo inchei la aw.. Zanriah kan ei chhuak dawn nia. "

"Chutiang a ngai hleinem. Birthday lawm rual pawh ka nih tawh loh hi. Zanah ilo leng zawk dawn nia.. "

"Ni love, I birthday hi kan lawm ngei tur a ni. Bakah thil hrilh tur che ka nei a, I nu ka dil fel vek tawh bawk. Dar 3-ah sawi buai lovin lo in ready ang che. I hria maw? Ka dah a nia.. " A off hmak. Ka nuin engmah a sawi si lova..

"Nu, Ngaihawma nen in inbia em ni? " Ka nu maian hih lai chu ka tihpui nghal a.

"Aw, naktuka hruai chhuah che min lo dil a, I pa nen kan remti a nih kha. "

"Birthday lawm rual pawh ka ni tawh lo asin le.. " Ka ti nang nang a.

"Lawm sak che a duh ve tlat sia bakah mi fel tak a ni a, I chhuak khat tho bawk a, kan lo phal mai a nih kha. Nuam I ti leh phian maithei asin.. " Maian chu a belah a thlak nghal a. Keiin tihfai ngai ka tifai a.




Khua a vawh ve deuh tawh avangin half neck bantlawn var ka ha a, kekawr parallel ka ha mawl leh tawp. Pheikhawk bunin bag ka ak a, ka half neck chungah chuan jacket ka hak thuah leh hram. Khaw vawt hi tuar har ka ti thin a, lum lam hi chu ka tuar thei viau.

"Ka u hi chu a va chhe lo em" Ka insiam peih hnu chuan Tea'n kut bengin a ti a. An vai chuan an nui vur vur a, Ngaihawma'n kawngpuia min nghah tawh avangin in chu ka chhuahsan a.

"Damdawi I ei maw? " Ka chhuah tawh hnuin ka nuin min rawn au zui a. "Aw, ei... " tiin step-ah chuan ka pen chho nghal mawp mawp.

"Wow.... " a car nghengin min en vung vung.

"Kal vat ang.. " Min melh dan avang chuan ka lai lutuk a, a mitah pawh melh duh lovin ka kal pel a, car kawngkhar min hawnsakah chuan ka lut a.

"Khawi lamah nge.. " A rawn thut luh ve rualin ka lo zawt a. Min rawn nuih zeuhin "Thuruk... " a ti sap. Kan tlan chhuak nghal a, a hma ang bawkin kan tlan rei leh vang vang hle. Hla a play chuan ka thu ngil nghal awk.. Ka insiamtha leh vat a, nghenchhan chu nghengin ka mit ka chhing vang vang a, hla chu ka feel veng veng thei hial.

~Oceans apart day after day.. And I slowly go insane. I hear your voice on the line but it doesn't stop the pain. If I see you next to never how can we say forever.. Wherever you go, whatever you do, I will be right here waiting for you. Whatever it takes Or how my heart breaks, I will be right here waiting for you~


"Kan thleng e.. " Car a din dat chuan ka meng a, ka hawi kual nghal vat. Car kawngkhar chu ka hawng a, Mizoram chhung ang lo maiin a zawl dap a, kan piah lawkah chuan in lian vak lo mahse en tawp pawha changkan hmel zet hi a awm a. A thlang lawka phul hring dup hmunah chuan tower sang zet a ding bawk.

"Saw lai hmun atang sawn ni tla tur kan thlir ang a, chuan hetah hian zanriah kan ei dawn nia.. " Ka bulah a lo ding a. Tower lam chu a kawk a, In chu kan zanriah eina hmun tur a nih chu.

"A sang si.. Ka lawn ngam teuh lo"

"Khi a sang lai takah khian thutna tur a awm alawm. Tlakdalna pawh tah khi chuan a awm thlap. Khawi hmun pawh nise ka awm phawt chuan I him zel ang.. " A thusawi chuan ka thinlung chhungril ber thlengin min khawih che dawt a. Ka ngaihtuahna pawh nidang ang bawkin a kal thui leh hman viau. Ka ngaihtuah duh ngai loh thil te kha a thleng dik mai ang tih hlauhnain min rawn tuam a, ni lo, a ni lul lo ang. Ngaihawma hian thian ang bakin min en lo hram se...

"Dreamland-ah hian min chen san ziah suh. " A phun hluk ri avang chuan ka harh nghal awk. Ni e, chutiang ngaihtuah hun pawh a ni ber love. Vawiin hun hi hlim takin hmang dun ila, a tawk a ni mai.

"Kal ila.. " Tiin ka banah min kai a.

Tower lam pan chuan kan inzui thla a, min kaih ang ang chuan ka awm ve tawp. Kan zanriah eitur chu a order nge siamtu tur an awm pawh ka hre lo. A ngaihtuah kim thei bawka ka ngaihtuah zui lo ta vel mai. Ka lawn hmasa a, ka hnung a lo dawl a, a sang tawh chinah phei chuan ka lu a hai tlat. Hnuailam en duh miah lovin hmanhmawh tawkin ka lawn vat vat a, ka thleng vat a nih loh chuan ka tla thut palh ang.

"Hui.... " Kan thlen rualin ka thaw hlawp hlawp. Ka khur ru der der lehnghal. Thutna an siamah chuan ka thu a, hnuai lam atanga a lan dan aiin a zau reuh a, tlakdalna an siam te lah chu a rintlak hmel viau bawk nen ka hlau ta lutuk lo.

"Ka hruaina hmun che hi chu nuam i ti ve thei ngawt mai" A khi suk a.

"I intithei em mai a.. " Thli a thaw heuh heuh a, ni chu a tla dawn hnai tawh tih hriat tak hian a eng sen put a. Kawngah kan thang rei hle aniang hei ni tlak a lo hnai leh ta em mai.

"Ni tla tur eng sen put hi chu thlir nin a har.. "

"Ni tla tur aia thlir nin har zawk ka hria.. "

"Eng..? " Tiin ka nuih a. Mitmeng zim taka min enin "Nangmah.. " a ti sap. Ka nui lui hak thung. Hmalam ka hawi daih a, min la en reng tih chu ka chal zat mer mer danah ka hre thei a, ngaihsak loh luih hram ka tum bawk.

"I ril a tam tawh em? "

"Aih, tam rih lo.. Dar 2 velah khan thil ka ei a"

"Eng thil.. "

"Thu I duh.. "

A nui hak hak a, keipawh kan boruak rit ru tak tang at chu tihbo tumin ka nui ve vak vak a.

"Ni tlak hnuah ei mai ang aw.. " A tih chuan ka lu ka bu vat.

Kan ngawih veng veng hnu chuan a rawn tawng chhuak leh a. "Tlankim.... "

"Um.. " En lem loin ka ti mai.

"Tlankim... "

"Eng nge... " Ka vin vak.

"Thinchhe nu.. Happy birthday" Ka va en chuan silver thi simple zet hi a kut dinglamin a lo keng kang a. "I duhzawng a ni em? "

"Ih.. Ngaihawm, a mawi lutuk mahse a ngai lo. Vawiina min hruai chhuak pawh hi Thilpek a tling tawh lutuk. Ka la thei lovang.. " Ka tih chuan a nui suk a.

"I lak ngei angai. Vawiina ka bula I awm duh te hi ka tan a lawmawm daih zawk. Mi thilpek hnar chu a tha lo, Upain an tluang lo duh an ti" A ti nghut. "Khawi ka lo awrh tir ang che. " Tiin thi chu ka nghawngah a rawn hmehbel nghal a. Ka inrin hman hmain min awrh tir fel der.

"Mahse... Ka lawm e" Ka thi awrh chu ka khawih a.

"I inhmeh lutuk.. " Min en reng a, ka lai chhe zo dawn.

"Tlankim... " A rawn ti leh sap.

"Ka hmangaih che.. " Ka che lo. Zawimuangin ka hawi chhuak a, mitmeng nung sara min melh ngawih ngawihtu chu ka en a. A mitmeng leh a hmelah chuan a tider mawlh si lo.

"Inpuan ka duh a, lo ngaithla rawh aw. Kan inhmuh hmasak ber zan atang khan ka duh daih tawh che. Khati khan I bo hmak mai bawk si a, zawn vak dan tur che pawh ka hre lo. Ka sawi tawh ang khan karkhat tawp chu bar-ah khan ka va thu leh tawp zel. Ka vei bur che a, hmeichhe dang hi ka melh thei lo hrim hrim. I nuihmel, I pian, I âw, I engkim mai khan min hip a, ka thinlung hi i inhriat hma hauhin i nei daih tawh. Pathian hnenah nang hi min hmuh tir leh turin ka dil thin a, nang hi ka nei thei dawn che a nih phawt chuan khawvel nawmna lama tlan miah lo turin ka intiam bawk. Mipa tan chuan a harsa thin viau naa mahse nangmah vang chauha vawiin niah hian ruihtheihthil laka fihlim ka inti ngam.

"Ka hmu leh che a, ka nunah a vawihnihnan i rawn lang leh a. Pathian hnenah khan vawi engzat nge lawmthu ka sawi pawh ka hre seng lo. Bul tan dan tur erawh ka hre hlawl lo. Mahse a hun taka che thin Pathian a rawn che a, tikhan ka biakpawh theihna tur chein hun remchang min siam sak a. Mahse ka duh em em chung che hian hrilh tawp che erawh ka tum hran lo. A chhan chu ka duh thu che ka hrilh mai che chuan awlsam taka min hnar mai ka ring a, nang lah mi inhawng tak i lo ni lo bawk nen. Mahse tunah chuan ka zep reng thei tawh lo, Kei hian ka hmangaih takzet che a, i tel lo hian ka awm theih ka ring tawh lo hial. Ka inpuang thei hi ka lawm a, chu aia ka lawm lehzualna chu maw nangpaw'n min hmangaih ve tho tih hriat hi a ni.... " A sawi zawh chuan thawl hawk hmel a pu. Kei erawh ka thil ngaihthlak zawh chiah avang chuan mak tiin ka kâ hau ringawt. Awih a va har em.. Min lo hmangaih reng a maw?? Ngaihawma hian min hmangaih a maw... ?

"Ka sawi dik tiraw.. Nangpaw'n min hmangaih tiraw? " A tih chuan rilru buai takin ka melh a.

"Ih.. Aih.. Hmangaih ve lo. " Ka ti chhuak sap.

"Tlankim, dawt sawi i thiam loh zia hi inhria la i nuih a za zawk ang.. " Tiin a nui a. A hmela hlim hmel lang chhuak te lah chu a der a ni hauh si lo. Engtinnge ka tih tak ang. Lalpa, min pui hram rawh.

"Haw tawh ang.. " Ka ding hluai.

"Tinge? Tlankim.. " A ding ve nghal a.

"Haw ka duh tawh.. Haw vat ang, kal ang.. " Ka ti tawi tak. Ka kut vei lam chu a rawn chelh a.

"Tlankim.. Min hmangaih ve tho tih chu pawm a harsa viau em ni? Engvanga pawm mai thei lo nge i nih? "

"Min thlah rawh.. Haw ka duh" Ka kut a vawnna thin thlak tumin ka tal aih a mahse awmzia a awm lo. Ka taksa rawn na ut ut chu ka hre thei a, ka thawk a sak talh a, ka awm a nuam ta meuh lo. Ka mit atang chuan luan chhuah inring rengin mittui a tling pam a. Ka thinlung chu hmangaihna ka dawn tak chhan let chakna avangin a rum a mahse chu chu thil theih niin ka ngai si lo. Pathian pawh hian min khawngaih ve em em tawh lo em ni?

"Tlankim.. " Ka biang tawn tawnah a rawn dawn a, amah en turin min kuai dak a, ni a tla fel tawh bawk a khua a vawt raih a. "I tap elo... " Ka mittui luang chu mak tiin a thlir a, a kut lek kangin ka bianga ka mittui luang lum pap pap chu a rawn hru hul a. "Tinge I tah... "

"Khawngaihin.. Haw.. Ang" Ka hrawka hnawhtu awm ang mai hian ka tawng chu a sak talh a. Ka mittui lah chu a rawn luang chhuak zel bawk si. Ka hmaa mangan hmel zeta min melh ngawih ngawihtu mitmeng chu hmuh hrehawm ka ti a, a duh ang chhanna pek theih a 'Keipaw'n ka hmangaih che.. ' tih theih ka va duh tak em.




Ngawi rengin car-ah kan chuang dun a, ka mit chhingin ka suangtuahna khawvel awmze nei lo tak chu ka fang kual a. Kil tin atangin ka chhut a, Ngaihawma nena kan awmdun theih dan tur a awm mial lo maw tiin ka chhut kual thin a mahse a tawpna chu a ngai reng. Thih chauh hmabak, cancer hrikin a ei chhiat mek, hmalam hun beisei tur engmah nei lo kei mihring hian eng nge ka pek theih tehlul ang? Natna chauh...




Khumah chuan ka let tawn chhen a, ka muhil thei hlawl lo. Ka tahnaah ka mit chu a bui luk tawh a, ka biang a sa hat hat bawk. Ka lukham pawh a huh hneh hle a, ka lukham bula ka bible chu vawi tam ka keu tawh bawk. Pathian ka au a, a chhanna nghakin ka rum a mahse chhanna ka dawng si lo. Ngaihawma ka ngaihtuah a, a thusawi mawlh kha ka ngaihtuah a, ka va hrehawm tehlul em..

"Ka danglam dawn lo tih hi hria ang che. Ka hmangaihna I chhan theih loh chhan hi ka hre lova mahse eng hunah pawh I tan ka awm reng ang. Nang chauh hi ka hmangaih che tih hria la, nang hi Pathianin ka tana a ruat I ni tih hi theihnghilh hek suh. Ka hmangaih che.. Tun atan chauh ni lovin damchhung atan.... " Tiin min thlah a nih kha.

Kei hi Pathianin a tana a ruat ka ni ang maw.. A theih loh. Pathian hian keichu mal turin min ruat alawm, tunah pawh ka au, ka zawt a, engvanga Ngaihawma beiseina awmze nei lo pe nge a nih ka zawt a, a reh tlawk tlawk ringawt si. Damchhung hun hi ka tan chuan a rei tawk lo, ka dam hun hi naktukah pawh a tawp thut thei a, ka hmaah khian thihna chauh lo chu hmuaktu ka nei hek lo. Ka hmangaihna hi pawmin hlan let ve ta ila, kan hlim ngei ang mahse chu chuan eng chen nge a daih ang. Rei tawk fang ka ngaihtuah hnu chuan thutlukna ka siam fel hmak.

Side table a ka phone chu la kangin ka hmet eng a, Joicy number chu ka dial nghal. A tlai tawh naa a lo mut loh hram ka beisei.

"Aw.. "

"Naktukah tiraw i kal dawn? Ka lo kal ve dawn, ka insiam anga ka lo phei nghal ang. " Thil dang vak sawi lovin ka dah nghal. Ka khum atang tho chhuakin ka drawer ka hawng a, wardrobe a ka luggage chu la chhuakin ka thawmhnaw ho chu ka khung a. Ka mamawh zual tur ho la khawm lehin ka pack fel thlap.

"Nu, pa... " An room kawngka chu ka kick a. Tunah zinglam dar 1 a ri tawh a. A reh ruih tawh.

"Aw.. Na i nei em ni? " Thophang âw awm miah loin ka nuin a rawn ti nghal. An rawn tho chhuak a, an room atanga an lo chhuah chuan ka luggage nen ka lo ding vang a.

"Nu, pa.. Khawngaih takin ka thusawi tur hi min ngaihthlak sak ula, min pawm sak hram bawk rawh u. Ngaihawma hi ka hmangaih a a ni paw'n min hmangaih. Mahse ka natna avang hian keini chu a rem chuang lova, amah hlat thei ang bera kal bo rih hi tun atan chuan tha ka ti a. Joicy awmna hmunah ka kal ve dawn a, Ngaihawma pawh ka be tawh hek lovang, min hmuh loha biak theiha ka awm loh miau chuan min theihnghilh ve vat mai ka ring a, nakina natna thlen sak ai chuan tunah engmah kan Inkara a thlen tak tak hma hian tihtawp fel nghal ka duh a ni. Ka kalna hmun Ngaihawma hnenah lo hrilh lo turin ka duh che u a, khawngaih takin ka thutlukna hi a tawp nan tak tak min pawm sak hram rawh u... " Ka thusawi chu ngawi rengin an ngaithla a, ka sawi zawh chuan an inmelh hrek hrek a, ka nu phei chu mittui tling pamin a ding a.

"Bawihte... Khawvel hi chu aw... " Tiin min rawn kuah vawng vawng a, a insut hlap hlap a. Kei erawh ka tap tawh lo thung.

"A tha e. Ngaihtuah viau che mah ila i thutlukna chu kan pawm mai aniang chu. Ka fanu, heti tak maia nun hrehawm i hmang bik hi pawi ka va ti tehlul em.. " Ka pa.

"Mahse Ngaihawma'n a hre tawh em? A lo hmangaih ve takzet che a nih chuan hrehawm a va ti dawn ve le aw.. "

"Hre lo. Hre tur paw'n ka duh lo. " Ka ti nghut. Kan thawm hriain Tea a lo tho a, kan awmdan a lo hmuh chuan a hrethiam lo viau a mahse ka pain a hrilh fiah zung zung a, an tan pawh an fanuin hmangaih ka nei ve ngam lo te chu tah pui ngawih ngawih tham a tling hialin ka ring. Tea'n min va thlah a....

"U, tinge kalsan kher i tum? In awmdun thei tho alawm"

"A theih loh alawm. Ka dam rei dawn lo tih i hriat kha, tunah lo pawm ta ila reilote hnuah ka kalsan leh tho angai ang a, chutih hunah chuan a tan a hrehawm zawk mai mai ang. Tihian engtin vak mah kan la awm hman lova, tuna inthlah fel hmak hi a tha zawk.. "

"Mahse U Ngaihawma a khawngaihthlak e.. Keichuan hman atang khan a duh che tih ka hre daih tawh. A en thin dan che kha thian satliah en chuan a en lo tawp che alawm.. " Ka chhang tawh lo. Joicy te in kan thlen chuan pawnah min lo nghak a. Tea ka mangtha hnuin Joicy room-ah kan inzui lut a, tawng lovin khumah chuan kan mu a, ka ngaihtuahna ata Ngaihawma paih bo tumin ka lu ka thing leh nak nak thin. A tuka kan zinkawng tur chu ngaihtuahin ka chhing lui a...













Sonorai lam pan chuan kan chhuak ta a. Kawng tluan deuh thawin earphone ka vuah a, hla ka ngaithla char char.. Ngaihawma ka block a, ka number hriat loh call chu chhan ka tum hek lo. Joicy nen pawh kan inbe vak lo, passenger dang ho nen chuan an titi siam siam a, kei erawh ka mit chhingin hla ka ngaithla tawp.

Darkar 12/13 vel hnuah chuan kan tum ram chu kan thleng ta a. Pastor quarter-ah chaw ei min lo siam sak a, Joicy nen chuan kan ei a, kei chuan ka ei tha thei vak lo. Ka thluak a chawl lo bawk a, chaw ei chakna reng ka nei lo. Joicy in chu zan dar 9 bawr velah kan lut thei a. A in ti ila Quarter a ni. Lei atanga sak hi a ni a, choka lamah chuan khum a awm a, eirawngbawlna hmun dang a awm leh daih bawk. A lian lutuk lo naa a fai vung reuh a. Joicy chenna hmun a ni tih a hriat hliah hliah. Khua a vawh tawh em avangin inbualna tur tui kan lum a, mei kan tuah a.

"I inpeih hunah min la hrilh ve dawn nia.. " A ti sap a.

"A hmuh phak loh leh a biak phak loha awm ka tum a nih hi. Hmangaihna vang hian mihring hi a lo nat theih khawp maia, thinlung te hi a rum vawng vawng thei hial mawle. Tunah te hian ka ngai a, eng nge a tih ang tih ka ngaihtuah a mahse chu ngaihtuahna chu dah bo hram ka duh bawk. Min hmangaih thu a sawi khan a tider mawlh si lova...
Huh..... Beiseina hi ka duh tawh lo. Tihian ka ral hun nghakin mahnia rum vawng vawng hi ka tih theih tawk chu a ni rih mai e... "

"Pathian hian a rel sual ngai lo asin. Ka tawn ve loh avangin ka hrethiam pha lo maithei a mahse Ngaihawma nen hian Pathian ruat te pawh in lo ni maithei asin"

"Engtinnge a nih theih ang? Keichu cancer natnain a tlak buak, thih chauh hmabak ka nih hi. Keipaw'n Ngaihawma nena hun hman duh hi ka chak asin, keichu ka hlim ang a, ka thih dawn pawhin hlim takin ka kal thei ang mahse ka kalsan tur chu Ngaihawma hi a ni a. Thihnain min then hran hun chuan a tuartu tur chu Ngaihawma a ni a, ka thih hnua a hrehawm tur chu ka ngai ngam lo.. "

"I thlirna tlang atanga thlir chuan a dik e. Ngaihawma I hmangaih em vanga a hmangaihna chhang thei lo zawk i ni a, ka hrethiam che. I tan hian tihtheih neih ka chak takzet. Mahse Pathianin i tana kawng dang ruat a nei a nih chuan khawngaihin pawm ang che.. Ka va inbual ang e.. " Tiin bathroom lam a pan a. Ka phone chu ka tieng a, ka nu leh pa ka biak hnuin ka phone chu ka off hmak. Pawimawh a awm a nih chuan Joicy phone a min lo be mai turin ka chah bawk...




Joicy school-ah a kal a, keimahin inah ka awm a. Tihtur a awm bawk si lo. Ngaihtuahna kawm zui veng veng a awl duh khawp mai. In vel chu a theih ang angin ka tifai a, chhunah kan awmna thlang lawka Dawr teah chuan eitur eng eng emaw ka lei a. Ka ei tui thei hlawl lo.

In bul vela pangpar ho chu ka thlir dauh dauh a, tihtur a awm lo bawk a tiin pangpar bul vela hnim ho chu pawh fai ka tum a. Chemkawm chu la chhuakin ka ti tan ta a.

"Min tlanbosan te ilo tum vel a... " Ka thil tih lai ka tawp nghal chawt. Ka bul lawka hlimthla chu ka en a, ka rim hriat than tak a rawn nam nghal chem chem bawk.

"Ka number block a, helai hmuna hnim pawh fai chauh hi mi min hnar nana i tihtheih awmchhun chu... " A ti chang fak a. Ka chemkawm ken lai chu ka kut atangin a tla nghal. Zawimuangin ka ding a, thawk la vakin ka inher ta a. Ka hmaa mipa mitmeng zam eih lo ding chu ka melh tha ngam lo. Hnuai lam ka en ka daih a.

"Ka thusawi kha i va theihnghilh hma ve. Ka rawn zui loh che i ring reng reng em ni? "
A ti leh nghut.

"Tinge i lo kal.??" Ka ti sap.

"I kalna apiangah ka kal ve zel dawn. Inhmangaih te chu an inhlat ngai hleinem.. " Tiin a nui suk. A inher a, hnunglam a pan nghal. A kalna lam ka en chuan kan in piah lawka a car ding reng chu ka hmu nghal a. Car kawngkhar chu a hawng a, bag lian vak lo hi rawn phawrhin ka lam panin a rawn kal leh a.

"Lut ila.. I thawk nasa tawh alawm" In chhungah chuan a lut zui nghal a. A chezia chu mak tiin ka thlir reng ringawt. Ka chhungten ka awmna hmun hi an hrilh tihna em ni? Engtinnge an theih zawk... Hmanhmawh deuhin ka lut ve nghal a, thutthlenga thu chu ngaihsak lovin ka kut ka sil fai vat. Khuma ka phone let reng chu ka la kang nghal vat.

"I phone i on ve dawn ta maw..? " A thusawi chu ngai pawimawh lovin ka phone chu ka on a, Tea ka call nghal.

"U... Min ngaidam rawh. I tana a that beiseia engkim hrilh ka nih kha, U Ngaihawma kha maw hmu ve la nangpaw'n ka tih ang hi i ti ve tho ang. A ni khan a hmangaih takzet che a, chuvang chuan khawngaihin in pahnihin hlim takin awmdun rawh u. Hlim hi in phu.. " A sawi zawh rualin ka off hmak. Ka phone chu khumah ka vawm thla thuai.

"I phone kha a chhe palh ang e... " A ipte zen atin a ding a.

"Haw rawh.. "

"Helai hmun hi chawlh hman nan a nuam riau mai. Hun nuam deuhin kan hmang ang a, chuan kan haw dun dawn nia.. " zawldawh taka a rawn tih chuan sawi tur hre lovin ka melh ngawt ngawt.

"Ngaihawm.... Tea'n engkim a hrilh tawh che. I hre vek tawh. Kei chu i tan ka tawk lo. Ka hun neih ve hi a tlem em mai.. Tunah hian kal zawk rawh. "

"A teuh lo. Ka kalsan ngai dawn lo che, min kalsan tumin khawvel hi fang mah la ka rawn zui zel tho ang che. "

Tawng leh tuma ka kâ ka an rualin Joicy a rawn lut hlawl a. Mak ti hmel a pu lo chu mak ka lo ti viau zawk. "Ngaihawma i ni tiraw? " Tiin a kut a phar chhuak a.

Ngaihawma chuan Joicy chu chibaiin "Joicy maw.. Min thlen dawn avangin ka lawm e" A ti let ve sap.

"A ho lutuk. Tea'n min rawn bia a, i duh duh chen i awm thei ang.. " Joicy

"A theih loh. Haw rawh se. Helai hmuna awm ve nachhan tur a nei lo. " Ka ti ve nghut. Ngaihawma chu nui hakin min rawn melh a "In neitunu i nih loh kha. A neitu berin a phal chuan ka awm khawp ang. Chuan kan haw rual dawn ka tih kha theihnghilh lo la... " Joicy melh zawkin "Ka'n inbual ang e.. " A ti a, bathroom-ah a lut nghal. Joicy nen chuan kan inen reng a, rilru hah thawpik lutuk vangin ka thaw chhuak hawk a.

"Mahnia awm ka mamawh... " In atang chuan ka chhuak a, kalna tur ber pawh ka hre lo. Ka hmaa kawng awm chu ka zawh mawp mawp tawp a, eng nge ka tih tak ang...

Kawngsirah chuan ka thu a, ngaihtuah tur ber pawh hre loin ka thu vang vang a. Ka rilru a chawmawlh vek a, ka bing mup mup ringawt bawk. Ngaihtuah mumal nei lova darkar khat vel ka thut reng hnu chuan khua paw'n tlai lam a pan a. A rawn thim deuh khuih a.

"I tel loin ka awm thei tawh lo ka tih kha. " Ka bula rawn thut paha a tih chuan ka hmui hnuai lam ka seh vak.

"I thei ang. Mipa i nih kha.. "

"Mipa a?" A âwkiah chuan thinrimna a ri tel a.

"Mipa ka nih vang ngawt hian ka chak bik tihna a ni lo. Mihring ve tho ka nih hi. Hmangaihna mamawh ve tho ka ni. Mipa ka nih vang ngawt hian min kalsan thei ang a, i tel loin ka awm thei mai ang maw.? A teuh lo. Mipa ka nih vang hian mittui nei lo turah min ngai em ni? Hei hi hre rawh, mipa mah ni ila ka chak reng lova, hmangaihna hi ka tah pui ve tho asin. Nang anga hmasial erawh ka ni lo hloh a nih hi.. "

"Hmasial min ti a maw...? " Kan inmelh rum al a.

"Aw, mahni hmasial tak i ni. "

"Ka hmasial vanga tun dinhmun hi thleng niin min hria a maw.. I hma ka sial vanga tun dinhmun hi thleng zawk asin ka nih. He cancer hrikin min ei zawh vek huna na i tuar tur chu ngai ngam lovin tunah hian thlah che ka tum a nih hi. . " Ka theih anga ringin ka tawng a.

"I natna ka lakah I zep a, nangmah chauhin I tuar a. Kan pahniha hmangaihna chu nangma thuin pawh chah mai I tum a, tuin nge ka hma min sial sak turin ti che. Kha cancer hrik ai khan kan hmangaihna hi a chak zawk lovem ni? Hmangaihna hi engvanga thil dang zawng zawng aia ropui zawk nge a nih hi I ngaihtuah ve tawh ngai em? Engkim hneh theitu a ni asin, natna pakhat vang maia kan inhmangaihna pawh I pawisa zo lova, ka duhthlanna ni miah lova nangma thua thutlukna ilo siam ve ngawt hi mahni hmasial tak I ni.. " A tawng zawnga a mitmenga natna rawn lang tel chu ka en rei ngam lo.


"Tlankim, khawngaihin ka ngen a che. Ka hmangaihna che hi pawm la, min hmangaihna pawh kha pawm hram rawh. Min thlah tum lo la, ka kut hi vuan tlat zawk rawh. Cancer avang khan ka hmangaihna hi a kiam lova, a pung zel zawk asin. Thihna chu tu tan pawh ruat a ni a, kan la thi vek dawn. Hmalam hun hi kan pahnihin thlir dun ila, a eng lam chauh thlirin bul i tan zawk ang. Kan hmangaihna thianghlim tak hi chen dun ila, ka tan nung la, I tan ka nung bawk ang... " Mittui tling kiaua a tih chuan insum zo lovin ka tap chhuak hlap hlap a.

"Mahse.. Ka kalsan hunah che engtinge i awm ang? " Tap tuau chunga ka tih chuan min rawn kuah bet thlawp a.

"Thihna chu ka dan theih loh tur thil a ni. Mahse dam reng chunga min kalsan a nih erawh chuan.... " " Shhh... " A sawi zawh hmain ka pawt chat a. Ka ngaithla zo ngam lo.



Ka taksa chu natna hrikin a ei ral mek a. Ka thunun theih a ni tawh lo. Mahse ka thinlung erawh ka ta a ni a, ka neihchhun a ni. Ka thinlung chuan he mipa hmangaih tawp lova min hmangaihtu hi ka hun tlem te neihchhun hi pek a duh a, ka hun neih zawng zawng a kianga hman ral a duh bawk. A vawikhatnan ka nunah hmangaih ka tawng a, chu ka hmangaih avang chuan thih ka hlau a, damchhung hun rei tak hman pui ka duh bawk. Kan neihchhun hi a hlu a ni lawm ni? Ka pek theih chhun chu ka vawiin ni atanga Pathianin 'A tawk e. ' a tih thleng chauh a ni si a.




Zan dang zawng aiin ka mutui a, ka thawh chuan zing dar 8 a pel tawh. Ka hawi kual a, Ngaihawma mutna pawh alo inthlep fel thlap tawh bawk. Ka tho a, ka mutna chu ka thlep fel a. Ka sam ka tawn hnuin bathroom-ah insil fai turin ka lut a. Ka chhuah leh chuan Ngaihawma zai ri rat rat ka hre zui nghal.

"I mutui em? " Min nuihsang a. Ka nuih let ve sak.

"Um.. Nang zawk? I mutna kha a hrehawm lo maw.. "

"Hrehawm love. Zan dang zawng aiin ka mutui.. "

"Chhunah Chambak-ah kan kal ang a, kan bazar dawn nia aw.. " a tih zawm leh a.

"Kan haw dawn lo em ni?? " Ka lo ti hu. Nizanah khan 'Haw vat a tha ang, helai hmunah chuan eng emaw thutah inenkawl ngaihna a awm dawn lo tlat. ' a ti a nih kha.

"Kan kal leh tawh lo maithei a, bazar ve hrim hrim ang. Joicy-in darkar khat vel kal a ni a ti a, amah a hman dawn bawka eng eng emaw tal kan lei ve dawn nia. " A tih chuan ka lu ka bu a. Helai thleng kan kal ve a, bazar ve hrim hrim chu a tha alawm.


Chambak chu darkar khat vel kal a ni a, a khua a lian lutuk lo naa Sonorai ai chuan a lian ve deuh zawk. Bazar pawh chuti teh lua a ni lo a mahse a nuam reuh phian. Kan pathumin kan inzui tak tak a, Joicy-in an thil zawrh chu a dil tlawm zel a. Fiamthuin 'Missionary i nih hi. ' ka tih chuan 'Thil dil tlawm chu Pathian pawhin a phal.. ' a ti vei thlap. A nui kerh kerh lehnghal.

Kan duh kan lei ngah hnuin kan haw a, in kan thlen rualin rawng kan bawl nghal. Current a tha lo em em a, zan tlaiah phei chuan a thim zing malh malh hle. Tui a tha vak lo bawka inren takin ka khawsa a. Kan pathum chuan chu inah chuan hlim takin kan che ve rak rak a.

"Tei chhuak mai mai ang.. " Ngaihawma nen kan inzui chhuak a. Ka kut chu a rawn hum lum vang vang a, a nuam takzet.

"Min kalsan tawh lovang tiraw? " Ka kut chu a hum nghet vak a.

"I hriat kha.. " Tih chiahin ka chhang.

"Ni e, ka hria e. I kal ka phal ngai dawn lo tlat. " Min rawn nuih suk a. Kan rilru erawhin thil thui tak a ngaihtuah tih hre ranin kan inmelh vang vang a, a rawn kun hniam rual chuan ka dak chho ve a. A hmui lum ther therin ka hmui a rawn deh rual chuan ka taksa a za chhuak vek a, ka kut a chelh lohna lam a kut chuan kawngah kuahin a lamah min pawt hnai a, duhthaw fahranin kan infawp vawng vawng a.



Nakin hun tur ngaihtuah vang ngawta ka tun hun hi ka tichhia a nih ngai chuan ka hringnun hian awmzia a nei dawn si lova. Nakin hun chu nakinin hril sela, vawiin hun erawh vawiinin hril rawh se. Tunah chuan ka hlim a, tuna ka hlimna hi a chhiat ka phal tawh lo.He cancer hi ka hmangaihna kawnga a inrawlh ka phal hek lo. Engkim zawng zawng aia ropui chu hmangaihna hi a ni si a.




________________________________________________

TLIPNA:





A nupui thlan lung nghenga thu mipa chu a kun tlawk tlawk a, a mit a bui luk bawk. A hmel en chuan zan tam a mu tawh lo tih a hriat hliah hliah bawk. A changin a dak chhuak a, van lam hawiin a thaw leh hak thin a. A khawsak dan chuan mu leh mal a nei hauh lo. Thihna hi zawng a rawng em a nih hi......

"U Ngaihawm, haw tawh ang. Hetia awm reng chu a dik love. I fapa tan chhel taka awm tum hram rawh" Tia a dara lo chelhtu Tea chu en loin a kun reng a. Ama khawvelah chuan a cheng reng ringawt mai a ni. A fapa.. A fapa chu a hrechhuak zawk a. A fapa neihchhun pawh duat takin a la pawm hauh lo tih a hrechhuak nghal zat.



Kum thum chhung chu hlim takin an khawsa a. Nupa azawnga a hlim ber an ni ngei ang. Eng emaw intihthiam loh deuhna pawh nei se a tlawm zawka tan an inchuh thin a, zankhat mah lungawi lova mutthilh an nei ngai lo. An nupa chuan an inngai a, an inpawh hle bawk. Tlankimi pawh a dam tih theih ni si lovin a tha ve zel a, a chhiat lai ber pawha a kut chelh tlattu tur mipa a kiangah a awm a, a thla a muang hliah hliah bawk. Tichuan, an inneih atanga kum li naah chuan nau an pai ta a. A rai tih a hriat tirha Tlankimi lawmna san zia kha aw.. Pathianin a tawngtaina a ngaihthlak sak avang khan lawmthu a sawi mawlh mawlh a nih kha.

Ngaihawma erawhin a nupui rai thu a hriat chuan a lawmna leh lungngaihna chu a inzat vel awm e. Thil thui tak a ngaihtuah a, a nupui hian naute chu hring ta se a nunna hial hian a tawrh phah ang tih mawlh chu a hlau a. A nupui tel lova khawvel hmachhawn chu a zuam tawh meuh lo. Mahse, a nupuiin ngenngawl taka fa neih ngei a duh chhan a hrilh takah chuan Pa ni turin a inbuatsaih ta kha a ni a...

"Ka hrethiam che alawm mahse han ngaihtuah chiang la, ka hun tawn tur hre sa chungin a ni lawm ni pumkhat a kan insiam. Tunah Pathian khawngaihna kan chang a, a lawmawm asin. Ih maw, Ngaihawm, min chan i hlau tih ka hria alawm. Keipaw'n thil thui tak ngaihtuah chungin i fa hi hrin ngei ka duh asin. Ka kal hun chuan i tan khawvel hi a ruak dawn lutuk a, nangmah lo chelh a, hlimna lo petu tur chein kan pahniha fa hi hrin ngei ka duh a ni. Khawngaihin ka duhthusam hnuhnung hi min pawm sak hram rawh aw... " Ngaihawma hmangaihna nasat zia hretu a nupui chuan ngen tak tein a ngen a. A tawpah a pasal rilru chu a hneh ta a nih kha.

Tichuan fa nei turin an inbuatsaih tan a, an chhung te ve ve atangin thil an dawng nasa a, duat rawn an ni bawk a. Tlankimi pawh a thauin a hmeltha zual em em a. Ngaihawma phei chuan a nupui raipuar chu a thlahlelin a ngai thei hle a, hnathawka a chhuahsan tih lohah chuan a chhuak ngai lo.

Thla kaw hnuah chuan fapa hmeltha tak an hring ta a, mahse an lo hlauhthawn ruk ang ngeiin Tlankimi chu a harh chhuak zo ve ta lo. Ngaihawma chuan a tuar thiam lo hle a, a nupui taksa dai riai chu a kuah ngawih ngawih a, laksawn an tum chuan a phal lo bur a. Mipa na tuar rum ri chuan thinlung hi a fan raih thei hial asin. A nupui hmui dai thler chu a fawp ngawih ngawih a, a kutah nghet takin a chelh tlat bawk. A mittui a luang a, a na tuar hmel chu tuma'n an hmu ngam lo.

A nupui ruang kuanga zalh an tum laia a awmdan avang chuan mittui tla lo hi an vang asin.

"Ka phal lo.. A theih loh. Ka nupui a nih hi.. In hruai thei lo ang. Ka bulah chauh a awm dawn.. Min kalsan a duh ngai lo" Tiin a nupui ruang chu a bawh ngawih ngawih a. Tihngaihna hre lo in an thlir reng ringawt.

"Bawiha, hriatthiam tum hram rawh.. Bawihtei hi a kal a hun tawh alawm" Titu a nu chu a haw hlur a.

"A teuh lo. Ka ta a nih hi.. Keima ta chauh. Engvangin sawtiang hmunah sawn a awm ve ringawt ang. Tumah ka mamawh lo che u, tihian kan nupain kan hlim tawk. Kal bo vek rawh u" Tiin a rak tuar tuar a.

"Bawihi, kan pahnih paw'n kan hlim tiraw? Ka bula awm ve reng i duh tih hi midang pawh hi hrilh ve rawh. Min kalsan i duh lo tih sawi rawh.. "


"U Ngaihawm... " Tea paw'n mittui tla teuh chungin a u pasal chu a en mawl tawp.

"Le.. Ngaihawm, patling takin le.. Ka fanu rilru naa siam i duh ngai loh kha. Tunah hian i nupui hi a chau zo tawh ang. He khawvel hi zawng a tan chuan a rawng em mai a. Van hmun nuamah natna te a neih tawh lohna tur hmunah kal tir tawh ang aw. Chu hmunah chuan a dam tawh dawn a, a hlim tawh dawn asin.. I nupui hmangaih bertu i nih kha, kal tir tawh hram rawh aw.. " Tlankimi nuin pachang taka a rawn tih takah chuan Ngaihawma chu a thu hnawk a, a tap zawih zawih a, a nupui kut chu a fawp ngawih ngawih a. Phal lo mah se a nupui chu a thlah a ngai si. A va harsa dawn tehlul em.....




Thihna chu tu tan pawh a ni a, chu chu Ngaihawma leh Tlankimi khan an hrechiang ber awm e. Tlankimi chuan engtik niah emaw a la kalsan dawn tih hre reng chungin a kut a vuan a, mahse a taka a han thlen takah chuan thihna nat zia chu a sawi fiah thiam hlawl lo. A nat zia sawi fiah tur hian mihring tawng hian a daih zoin a ring lo bawk. An hre lawk alawm, an inthen hun a la awm ngei dawn tih te chu.. Mahse ngaihtuah ringawt leh a tak zawng thil hran hlak a ni tlat.


"Tlankim... Ka ngai takzet che" Tiin van lam a hawi a, a mittui chu a biangah a luang ngiai ngiai a.



A lo haw tawh ngai dawn lo tih hre reng chunga nghak tlattu thinlunga beiseina meichher chu a alh hlep hlep reng ang a, engtikah mah a mit hek lovang.





~Wherever you go, whatever you do. I will be right here waiting for you. Whatever it takes Or how my heart breaks. I will be right here waiting for you~




(Thawnthu mai a ni e....)