Dolores By Felony Heartfillia Renthlei

Story tawi te te emaw luanliamna emaw post na
Jaredmommy Lrs
Posts: 2
Joined: April 30th, 2020, 10:44 pm

Dolores By Felony Heartfillia Renthlei

Unread post by Jaredmommy Lrs » October 4th, 2020, 10:55 pm

VOLUME—2


Ka pa thih a tang pawh thlakhat a ral tawh a,ka zia a zawi in zan ka mu mumal lo em em min la nghawng lutuk. Kan unau chuan awm ngaihna awm lo a,ka pi te bulah kan insawn thla a kan in chu ka pa awm loh a tang chuan a hmu chul rup a chhung ka luh a piangin ka rilru a thar a,ka pa hmel ka mitthla a ka tap leh nge nge thin. Lehkha zir ngai bawk nun hlim lo nen a hahthlak takzet,lehkha zir peih ve tak khan ka hne ngawih ngawih tawh tunah rih chuan nutei bula awm pawh a la nuam viau a,engmah hrehawm ka la tuar lo. Rei a daih a nge maw chu!


Ka pa min fuih tur a awm tawh si lo keimah leh keimah ka in fuih a,ka zir that peih loh hian “ Bawihi tihian awm suh lehkha I zir that peih loh chuan I pa thlarau a hahdam dawn lo asin. I zir tha lo tih a hriat chuan a thinrim anga”tiin ka zir phah leh thin.

Hun a kal ve zel a,ka lusun khawharna pawh ni in a liampui ve telh telh a,ka pa ka ngai tawh lo in ka hre tawh lo tih na lah a ni lo. “ Fam ngaia indawm kun reng tur a ni lo. Mi pawhin an tawng a an tuarchhuak ve leh mai,nangpawh I tuar thiam lo viau tih pawh kan hria mahse hmalam pan I tum ve tur a ni. I pa pawh khan hmalam pan turin a duh ngei ang che,I in dawm kun reng in zawng I pa thlarau a hahdam thei lo a nga si” ka chhungte min fuih na thu hi dik ka ti lutuk mahse,a chang hi chuan hmalam pan hi a har ve thin em asin!




Hunpui krismas hmang turin tu te mai pawh chu an in buatsaih hlawm. Mahse keizawng ka va phur si lo em! ka pa tello a ka hmanna hmasa ber a nih vangin ka huphurh a ni. A theih ang tawkin thil min tih sak ve thin a,kan chhungkua te khan kan hlim ve thei em a sin. Ka thian te pawn a thiam dan ang tawkin min tihlim dan an zawng ka tan a an hlutzia ka hriat thar phah a ka pa thih hlim chhawn phei kha chuan ka bulah an awm chawt a ni deuh mai. Oruati pawn min ngaihtuah em em a,min rawn tlawh awl lo,ka cousin te ah chuan ka pawh ber a ni a thu pawh min hrilh nasa thin.


Ka pa thlan pawh kan thian ho in kan chei ve a,krismas a ka tihsak theih chhun a ni si a van na tak em! chhungkaw dang chuan hlim takin an nu leh pa ten en an hmang ho a kei chu krismas thuchah sawi tur pawh thlan ah ka kal a ngai tawh a, chang chuan PATHIAN hi dem rum rum a awl thin; ka chunga a rorel dan hi a fair lo tih chang pawh ka ngah !



Krismas ni a ni a inkhawm banah chuan ka thian te nen thlan kan kal a “Pa Merry Chirstmass ka lo kal har i ti em? kumin krismas chu I awm tawh si lo a,a nuam lo lutuk ka ngai lutuk che” ka thaw hak a,ka thian te pawhin ka pa an ngaihthu an sawi siar siar a,an in pawh ve em bawk a ni min duat ve thei a ka pa khan kan thian hi! Ka damchhung a krismas ka hman dan chu a ni tawh si a maw!






Ni a ral a,thla a vei meuh chuan board exam pawh naktuk mai a lo ni ta. Ka huphurh ve khawp mai kan khaw thenawm ah kan exam dawn a,lehlang in kan exam dawn a ni. Keima tawk chuan ka zir nasa ve viau a,mahse a hma ka zir dan kha chu ka pha lo! Ka pa ka sun na khan keimah hian nghawng a nei nasa lutuk kei ngei pawh hian zir lai pawh buaitir chu ka duh hauh lo mahse,ka rilru hi ka thunun thei thlawt si lo a le! Ka pa thih na pawh thla thumna ni ve leh ta der mai ka ngai tawh lo a,na ka ti tawh lo chu a ni miah lo mahse,hma ka sawn hret hret a ka nun pawh a pangngai leh chho tan viau tawh. Ni 28 febuary—24 march hi kan exam hun chhung tur a ni. Patea te nupa pawh in ka exam tur chu min ngaihsak in min buaipui hle a,an theih tawk in a tui tui leh taksa chakna pawh min ei tir nasa mahse,ka tan a hlimawm rualin in thlahrun na chhin ka nei lo thei lo. Ka pa in kan exam tur hi min buaipui nasat theih em vang khan a awm lo erawh ka khua a harin ka kim lo viau thung!
Kan exam dawn tuk chuan hma takah tho in kan in ka pa ho a kan lo chen na in ngei ah chuan ka kal a,inchhung ka lut chu lunglenna,khawharna nasa tak hian min tuam a,ka awm ah in hnawh tup tup hi a awm ka in sum thei lo chu ka tap leh nge nge! Tha takin ka pass anga ka pa duhthusam ang a hna nei thei tur in theih tawp ka chhuah ang chu chu ka pa tan a ka tih theih hnuhnung ber pawh a ni.









Board exam kan zo tawh a,ka theih tawk in chhungte hnathawh ka pui ve thin. Ka pass ve ngei chu ka beisei a mahse,ka pass that erawh ka ring lo thung! Ka rilru a kal sual chang hian in ngaihtuah puam in tah leh vak hi ka chhing thin a ruk in! Mihrang awm tlang na fam chu Nutei nen pawn in bah sual chang kan nei ta fo mai a,hei vang tak pawh hian hrehawm ka ti zual thin. Patea hi chu a fel lutuk mahse,Nutei hi a fing si a Patea hi dawt a hrilh hneh lutuk mah mah! Ngaihtuah tur ka ngah si class 10 hi lo pass pawh ni ila ka tan chuan rilru hahna tur pakhat a ni lawi a! Khawpui lamah school ka kal a ngai anga,engkim lei chawp vek ngai a ni dawn a,Patea te ko ka ti rit dawn em em a,ka hautak tawh anga kei ka hautak tawh chu thuhran ka nau ngaihtuah tel zel a ngai dawn si. Thingtlang ah phei chuan sum lakluh a harsa a, ka tibuai dawn lutuk tih ka hrethiam ve kur bawk si ka tan hi chuan khua hi a var lo ngawig ngawih. Nutei phun an na tam tak pawh hi awm ka tih pui lutuk a tan phei chuan mihrang kan ni a, chawm kan hautak ve bawk si sum lak luhna neih that loh nen phei chuan dem ringawt tur pawh ka ni lo. A chang leh ka kal zawm lo mai dawn mi mawni ka ti hial thin mahse,han kal zawm dawn lo ringawt ila ka hma hun a thim bawk si! Class 12 em pass loh chu tha ka bik chiah bawk si lo. Fahrah dinhmun hi chu a van hrehawm tak em! kan awmna te an sual leh hrehawm kan ti a,an that leh kan in thlahrung zual thung ting bawk a. Aw….pa ka van ngai tak che em I tello a paltlang tur tam lutuk hian min pawt chau zo tawh.

Ka nu nen pawh kan in biak loh na a rei tawh ka be lo a,min lo be bik hek lo. A ruk tak chuan ka ngai mahse,biak huphurhna deuh ka nei eng nge a chhan erawh ka hre bik lo! Kan thian ho in Sunday tin deuh thaw thlan pawh kan tlawh reng school chawlh ni bawk nen kan inkawm nasa a,zanah pawh an lo leng ziah thin. Patea hi a strick a len a phal ngai loh vang hian min lo pan zawk mai thin len chhuah ve zeuh chang chu ka nei vet ho bawk mahse,hrehawm ber lai ka tih chu ka thian te lo leng thin hian nutei an hla a ti tam a,ka len ve deuh leh leng ngun min ti leh bawk si! awmdan tur pawh ka hrethiam thin lo a nihna takah chuan ka leng khat lutuk. Ka thiante awm lai chuan biak chu a lo be tha thei lutuk a tukzing vel ah emaw hian an hlaah a hmang leh nge nge thin. Ka thian te pawh hian a zia an hrechiang a a rel thin dan te pawh an hre leh thin a mahse engvak ah an ngai ngai lo,an lo len pawhin an be tha thei lutuk an fing ve em ka thian te hi chu!. In lamah ka theih tawkin ka awl ve ka tih tur reng a ni bawk ani in hah takin ram hna a thawk a,in lam a che tur chuan ka phut bik lo. Mahse,lawmna tur a hmu chuang thin lo sawisel lai tur hi a hrethei lutuk ,ka tih anih vang hrim hrim hian sawisel tur a zawng bik a nih ka ring hial zawk! Sawi mai hi chuan thil ho lutuk a ang thin a lawm mahse,a tawng tu leh tuar tu tan chuan a hrehawm lutuk mahni in a ni lo inthlahrun sa nen chutih lai a,kan thil tih min sawisel sak phei hi chu thil nuam a ni fahran lo! ka dinhmun a I din ve hunah chiah hian I hrethiam ang.


Kan result a chhuak a vanneihthlak takin first division ah ka pass tawk a,ka tan chuan a tha lutuk ka lawm khawp mai a ka chhungte pawh an lawm hle. Khawtlangah min lawmpui na thu min hrilh pawh ka phu lo in an tam. Kan thian ho kan pass vek bawk.

Thlanah ka thiante’n min kalpui a,ka tan an hlutzia hi ka sawi fiah thiam lo! buaipui ngai leh hnem ngai a ka awm pawn ka kiangah an awm reng thin hetiang thian tha ka nei hi ka vannei takzet. Ka pa thlan sir lam ah chuan ka thingthi thla a,ka kun lap a “Pa van a tang khan min lo hmu em I fanu hian ka pass hun I nghahhlelh em em chu ka pass a nia,min lawmpui lutuk tiraw mahse,tinge min lawmpui na thusawi turin ka bulah I awm loh..? Mi min lawmpuina ka hre teuh a,min lawmpui ber tu tur awka ka hriat chak ber hnen a tang lawmpuina hriat tur ka nei lo erawh ka lung a chhia in ka va hrilh hai tak em! Ka ngai takzet che pa vawin ni hian ka ngaizual che. I fanu mi tana chuan tlak ni lo hi min chhuang ve ngawt ang tiraw..?” ka mittui a luang leh zung zung tawh,mittui titla khat ve tak ka ni thin mahse,ka pa thih a tang tah hi ka ralthuam emaw tiin ka tap reng mai a nih hi! Ka pa khan tah te mittui tih tlak reng te kha a phal ngai lo “ tah hi chak loh na chu a ni vek lo mahse,mi chak tak chu a tapin a muttui a tla mai mai tur a ni lo. A hun leh hmun hriat tur a nia,chuti lo chu mi in I muttui tla leh tap an hmuh reng che chuan an zuam phah mai ang che” tiin min hrilh thin mahse,ka tah phal lo em em tu hian a ni min tap ziah chu!

School luh hma in Patea te chuan ka pa lungphun tha an ti a,a sarhu lai a phun hi a tha zawk e an ti a ni.Mahse kawng leh lam zawng tak a ngaihtuah chuan a hun tawp ber a nih tawh a vangin a lung han tun chuan a thi vang vang tawh a ang ka ti mai ka sawithiam chiah lo! Ka pa neihchhun a ni a,engtik lai pawn ka thinlung chuan a hming hi a lam reng thung ang.Chhungkhat laina in rawn khawmin May ni 17 a lungphun chu an ti tlu ta a. Ka ni hnuhnung ber leh a puala thil kan tih tawpna tur a ni ta mai chu a ni sia,mumang lam pawh a ang rum rum dawn lawm le!



Kan theih tawkin kan in ruahman tan a,chhunah buh kan thlei khawl a ka thian te leh unau hnai tak tak ten min lo pui bawk a. Ka phone a ri a,ka en chu a screen a hming lang ka hmuh chuan mak ka ti angreng zawk! ka pi (ka nu nu) a lo nia,ka la vat a
“Bawihi kan in be khat hle mai a,i buai em “ a ti a,buai lem loh thu ka sawi a,thu pawimawh min hrilh tur a neih thu a sawi a,room ah ka lut a khumah chuan a vang zawngin ka bawk thla a
“Kan hnung kar thawhtan khan i nuin pasal a nei a” lehlam a ka pi thusawi chuan min thawng takzet sawi mai tur pawh ka hre lo ka ngawi vung vung a,ka pi chuan a lungchhiatthlak zawnga la lo turin min hrilh a,kan puitling ve tawh a ngaituahawm kan nih tawh loh thu te leh thildang tam tak a sawi luam a,a thenah chuan min fuih phah a ni zawk. Ka biang rawn lum pap danah chuan ka mittui a luang tih ka hrethei ni e,ka nu nen hian in be khat tawh viau mahila,ka nu a ni a pasal a neih thu han hriat meuh chuan min thawng lo thei lo.
“Pi tun thla ni 17 hian ka pa lungphun kan tum a,lo kal ve in tum dawn nia aw,ka nu chu lo kal thei kher lo ang mahse,nangni tal chu ka beisei che u nia” aw lawi deuh rat chuan ka ti a,harsatna a awm loh chuan lo kal ngei an tum thuin min chhang a,kan in biak na chu kan ti tawp a.
Tlai chaw kan ei lai chuan ka nu pasal neih thu chu ka sawi a,mak an tih hmel lem loh mahse,ka nau erawh chuan a hmel lan dan ah chuan mak a ti ve deuh a ni ka ring. “A awm ve tawh tho a lawm kum 4 ngawt a liam ve tawh a” ka pi chuan a ti a. Midang chuan engmah an sawi lo.


Ni e,ka nu pasal nei hi thil awm lo a ni miah lo,kum 4 ngawt ka pa nen an then a tang pawn a liam tawh a,ka nu lah a la upa lo a,kum 38 chho vel chauh a la ni bawk nen a awm lutuk mahse,fanu tan chuan a dan hi a dang em a ni.Ka rilru a na lo ka tih chuan dawt ka sawi tih na a ni ang,a chhan chu ka rilru a na miau a lawm kan bulah awm lo mahse,NU a nih ang khan ka la thlamuan pui tho thin. Mahse tunah chuan a danglam tawh dawn kan inkarah mihrang an awm tawh dawn tlat a tin ni! A pasal thlan chu a thlang fuh lo ang tihngawt ka hlauhthawn pui.
Ka pa hunhnung ber kan hman ni chuan thenrual chhungkhat laina hnai pawh kan kim viau ,thlan ah chhungkua a kal in thlalak ho na te kan nei a,tap tawk kan awm bawk a!Mi tam tak thinlungah chuan ka pa chu a thi vang vang tawh anga,kei chuan engtikah mah ka thinlung a tang ka ti thi ngai lo ang.
Zirna bul tan tur in ka pa u fanu te in a awm turin champhai lam ah chuan patea nen kan phei ve ta a.
END OF FLASHBACK

Tuna ka awmna ka cousin te hi an fel em em a,an nupa leh an fapa nen kan cheng a ni. Unui ai mah hian Ukima hi a fel zawk a maw tih tur zawk a ni mihrang zawk ni si. Patea te chuan ka zir na senso hi an tum a ni mai,ka chunga an tha leh lutuk hi nuam lo ka ti letling thin. Anni in ka inthlahrun an hlau a,min zawt hmasa lo te hian ka mamawh tur a an rin hi min lo lei sak tawp zel thin lak loh theih pawh a ni ngai lo. Keipawn an bula awm hi nuam ka ti a,a hahdam thlak a kan khuaa awm ai pawhin nuam ka ti. Kan khuaah chuan inthlahrung reng reng in ka awm a,chumi chu ti ila,a lung a awi a ngem awi lo a ngem tih ngaihtuah reng reng in ka awm thin si a,ka pi awm loh phei chuan nuam tih na ka nei lo. Ka nau chu mipa a nia, a tan chuan thil hi a awlsam thin chubakah patea hian a duat bik lutuk tih nutei pawhin a hria a,a lakah a sual chimawm a chhuah ve ngai lo! chu tak chu ka tan a lawmawm ka nau hian hrehawm a ti ang ka tih ka hlau hluah hluah.


Class 11 pawh pangngai takin ka pass chho a, Lawmi nen deuh chawt kan in kawm a,thian dang zingah kan tal khat hle! Champhai ka awm dawn vang in a chhungte bulah champhai awm ve a dil tlat pek a,a chhungte lahin an duat sia,an lo phal ve leh mai bawk a! Ti khawp a min ngaina tu thian ka nei hi lawm,min ngainat tluk zetin keipawn ka ngai na.

Weekend a ni tho tiin lehkha ka zir peih lo chu balcony ah chuan ka thu a,thlang lam a phaizawl in pharh zau duai chu ka thlir a hla ka play a, ka hla duh em em ka tah pui thin chu ka ngaihthla leh a,zan boruak thiang kak nen chuan lunglen nasa tak in min tuam a!

Sial ang ka tuai,zuapa run chhungah, Zirna runsang min kai tir; Mahse,lenrual ka ban hma in, Tapin famkhua min liam san.

Thiam tak mai a,K.Lalthlamuankimi’n a sak chu zawi tete in ka sak pui a,ka khaw hmuh a phe leh riau tawh. Ka ngaihthlak a piang hian ka tap deuh ziah,hemi chang lai tak te hi keimah chan chiah a ni. A phuahtu hian ka hla tura a phuah a ang hial zawk a lawm,a chang tin mai hi ka nun nen a inhmeh vel vek!


Ka ngaituahna a kal thui zel a,ka nu leh pa in then chhan awm ang tur ka ngaihtuah a,an inthen khan ngaihthat loh na pawh ka nei lo a,mahse a mak lutuk ka puitlin deuh hnu hian an inthenna ah khan eng emaw thil in thup a awm ka ring tlat. Ka pi ten ka pa boral hnu pawh a ka nu bula awm an phal loh chhan te ngaihtuah let chuan ngaihthat lohna tur a tam lutuk. Ka pa boral hnu khan ka nu bulah awm ila,kan tan pawh a nuam zawk ang ka nute hi an harsa lo a,tiang a patea te bula awm a nutei hrawn ngai lo hian mahse,ka pi ten an phal tlat lo. Ka pi bulah ka nu leh ka pa kha tinge an in then le ka tih lahin ka pi chuan ka pa in zu a in vang a nih thu angin min chhang thung. Ka pa khan zu chu a in na meuh mai mahse,ka nu nen an in neih lai kha chuan a in nasa lo hna pawh a thawk nasa a,ka nu hauin kut a thlak ngai lo bawk a zaidam em em a ka nu a phun deuh pawn amah zawk a ngawi mai thin. Chuvangin a zu in kha inthen chhan tling ka ti thei lo inchhungkhur a kan chenho dan ka hmuh a tang chuan! Engpawh lo nise ka la hrechhuak tho ang tuman min hrilh duh lo mahse,in phum ru a lo awm ngat a nih chuan thudik chu a phum ruk reng theih ngai loh.



First term exam kan zo a,karkhat chawlh kan neih a vangin ka haw a. Zanah kan kawmchhak nu nutei thiannu a lo leng a,room ah phone khawih phahin ka mu zal a.Anni in t.v an en thung an thusawi ka hriat chuan ka beng a verh zak mai! “ Usangi (ka nu) khan pasal a nei har zawk ngawt mai ka ti” kawmchhak nu chuan a ti a. “keipawh ka ti. A uire na thup a tum vang pakhat a niang a neih lawk loh” nutei chhan na chuan min deng dawt mai, ka vai ruai mai. Ni lo,ka nu kha a uire thei lo ang thil theih a ni lo. Zan pawh ka muhil hleithei lo nutei te thusawi ringawt kha ka ngaihtuah a,ka nu kha lo uire tak tak ta se ka thinphu a rang dawt dawt a keimah ngeiin ka fiah ang ka rilru natna tur pawh nise thudik chu ka zawng chhuak ngei ang.



Tih tur em em a awm loh a vangin kan in ah ka kal a,bungrua kan la dah ve nual avangin ka ti fai a. Ka pa kha che fel thlip thlep mai a ni a, a thil pawimawh deuh chu a thingremah a rem tha thlap thin. Tih ngai ka tih zawh chuan ka pa thingrem chu ka hawng a,a chhunga thil awm chu ka en kual dan dan a lehkhabu pakkhat chuan ka mit a lak em avang chuan lakangin ka en chiang a,ka pa dairy hi a lo ni a keu in ka chhiar a!


“ Ka rilru na hi engmahin min hnem zo lo a nih hi zu a tih reh ka tum a mahse,kha thil tenawm tak kha ka mitthlaah hian a cham reng. Ka nupui, ka fate nu kum 10 chuang ka chen pui tawh in min phatsan a,a uire lai ngei ka hmuh zan kha! ka hmangaih ka nupui in min phatsan thei kha a mak ka ti. Zu chu ka in thin ngei a lawm kutthlak leh inchhungkhur tibuai zawng a ni emaw nun tibuai tur khawpin ka in ngai si lo,ka rilru na tur a ngaihtuah lo a nih pawhin kan fate tal hi a ngaihtuah ve lo em ni le! nge a hrin a fa te pawh hi hmangaihna a nei lo zawk ni ang. Ka fate hian ka zu in vang a inthen ah min ngai a mahse,thudik ka hrilh thei lo a ni kan inthen mah hi hrehawm an tia chumi belh chhah leh tur a thudik hrilh chu ka thei lo a ni. Naupang rilru thianghlim tak an la ni a,an rilru hi ka hliam nawnsak thei lo a ni mahse,thudik chuan herchhuah hun a la rawn nei anga marawh chu chutih hunah chuan an rilru a puitling tawh in thil a engzawngin an thlir thiam tawh anga,pawm dam dan an lo thiam tawh ngei ka beisei. Thu lian tham tak an lak a ka zep vang hian min dem bik lo ang,thudik sawi dawn pawh ni ila engtin nge ka sawi chuan ang “I nu in i pa hi phatsan in ngaihzawng a nei a sin” ka ti ang maw? nge “I nu uire lai ka mit ngei hian ka hmu a ni.” “I nu kha a uire a ni” ka ti zawk dawn mi ? ka fate bula sawi turin huaisenna ka nei lo a ni.

Ka fate tui tak a mu ka thlir thin te hian ka khawngaih ngawih ngawih pa tha tak chu ka ni lo teh lul em! An rilru tihah zual turin zu ka in a,khawvela pa laktlak lo ber ka ni hial ang mahse,ka fate hi ka khawvel an nia ka hmangaih takzet a ni. An nu hi haw turin ka duh lo,engtin pawn lo awm se an nu a nihna a bo chuang lo mihring tisual thei a nia,a tisual palh ve a ngai turin ka duh an nu hi engkim an lo hriat hunah an huat erawh ka hlau a ni. Phatsan nih hi a na lo ka ti lo patling pawh patling ka ni hleithei lo ka nupui pawh kha ka haw ngei mahse,ka fate thinlungah an nu huat na ka tuh tur a ni lo.Nakin zelah erawh ka fate nun hi an nu vang hian miin an en dan a dang ang tih erawh ka hlau! a bikin ka fanu hi ka ngaihtuah hmeichhia a ni si a “a nu a tang rengin hmeichhe tha a ni lo ang uire fa chuan tudang nge a chhun chuan ang” an la tih hi ka hlau a ni a nu tihsual rah hi a tuar ang tih mawlh ka hlau. Nu leh pa kar a ka fate seilian lo tur hian ka rilru a tina vawng vawng!” ka hriat duh em em chhanna ka pa kutziak ngei mai a tang a ka hriat chuan min thawng a ni ka na lutuk hi ka thin zawn a na vawng vawng! ka mittui in lehkha phek chu a far huh niai a,chu dairy a in ziak chu ka chhiar chhuak vek a!


Ka pa chuan phatsan nih na a tihzia te,ka nu haw lo turin leh pa tha a nih loh thu te kan laka a inthiam loh thu phek tinah chuan a ziak tlang pui. A thu ziah ah chuan a rilru natzia pawh a hriat theih! “pa tha lo i ni reng reng lo khawvela pa tha ber i ni a sin” ka rilru chuan a ti mawlh mawlh. Hetih hunlai a ka pa rilru hrehawm dan tur hi ka hriatthiam pui min ngaihthuah vangin thudik min hrilh thei lo a,lehlam ah a in thiam lo bawk a,ka dem re re lo keipawh ni ila a tih ang hian ka ti ve tho ang. Ka nu nen an inthen atanga zu a lo in nasa te kha phatsan,uire san a lo nih vang a nih hi. aw,,,ka pa kha rilru na leh rethei reng reng a awmin khang zawng zawng kha a thihpui chu ni si a!




Ka nu hi ka hua a ni. Ka pa in ka nu ka huat a hlauh zia ka hria a hlauh ang ngeiin ka haw ta reng bawk. Ka pa duh loh ber nimahse pasal phatsan thei,a ril a rah a fate la naupang tak uire san thei mihring chu ka haw lo thei lo. “ I naupan lai pawhin thil tam tak a tihsak che a,a hmangaih lutuk bawk che. A daisual ve palh a nih hi” ka rilru thenkhatin a ti a,mahse ka rilru natna hian min hneh sak leh thin a uire na kher hi chu pawm dam a har a ni. Ka ngaidam dawn lova,ka haw reng dawn ka ti lo mahse,tunah mai chuan ka huatna hi a reh ngai dawn lo. A uire vang a nih hi ka pi te pawhin ka nu bula awm an lo phal loh ni! keini thingtlang khua a thu ho te pawh sawi peih em em in a ka nu chungchang an sawi ngai lo hi mak ka ti. Nge an sawi thawm ka hre lo zawk ni dawn ni. Ka nu zia leh nunchang ka ngaihtuah let hian a uire hi mak ka ti lo thei lo!!

“Oruat ka nu kha a uire tih i hria em.?” u tak tak ka neih a nia,a bulah engmah ka zep ngai lo amah a lo fel bawk nen

“Khawi atang a i hriat nge.. Tunge sawi.?

“Niminah kan in ah ka kal a,ka pa dairy ka chhiar a” sawi buai ngaihna a hre lo a ni ang a ngawi vang vang a

“Ka nu in ka rilru a tihnat zia hi ka haw takzet” a ti chiam a

“Nu te huat tur a ni ngai lo,a malsawm lo. A na dawn lutuk tih ka hria mahse thil kal tawh a nia i huat vang khan engkim a tha leh dawn tih na pawh a ni lo a,mahni nun uluk phah nan hman zawk tur” a ti dam leh dap a

“Tinge Pathian pawh hian ka chungah tiang hi a thlen tir bik le? ka chung a a rorel dan hi chu a fair ka ti hlawl lo eng nge ka tihsual bik ni”

“chutiangin an ngaihtuah ngai lo. Pathian hian kan thatna turin ro a rel thin” eng nge tuna ka chunga thleng hi ka that na tur a nih pawh ka hre lo e.

“Kum naupang te a ka pa min laksak te,ka nu uire te hi eng nge ka tan a that na tur awm? rethei leh hrehawm ti reng rengin ka awm a chu zawng chu! ka tan chuan ka hun tawn hi a ritin a rapthlak mah mah a ni.” ka rilru na lutuk hian Pathian pawh hi ka dem tawh a nih hi!

“Pathianin kan tawrh zawh loh leh paltlang theih loh tur khawp a harsatna kan chungah a thlen tir ngai lo. I natna te,i hrehawmna te leh i harsatna zawng zawngte hi paltlang turin i chak tawk tih a hria a,bung thar i kai na turin hmanruaah a hmang a nih hi! hlimna chu a rei lo in kan ngai thin harsatna te,hrehawmna te hi chu a hrehawm em a vang hian a hun chhung rei bik a hian kan ngai thin a lawm” Oruati nun hi chu a awh awm bik thin a nia,min fuihtu ber a ni bawk.

Chhang lo a ka ngawih reng vang chuan a mah bawk chuan “ Chhe ber ni a kan ngaih pawh hi malsawn na a nih chang a awm thin” a rawn ti leh a,mahse a thusawi awmzia erawh ka man lo thung

“Ka hrethiam chiah lo” ka ti a

“Liandova te unau kha an duh loh saphai pumpui chiah an pe a,mahse thi leh dar tha tak tak a lo awm a,miin chhe ber a an ngaih an pek kha an tan chuan malsawmna a ni ta a. Chutiang chiah chuan nangpawh tun a i hrehawm tawh hi nakina malsawmna kailawn hruaithleng tu che a ni thei ka tih na nih chu!” a ti a. Mi tam tak an piantharna in a biak In pawn pel thei lo ai chuan a nunah hian entawn a tam fe! hetianga u fel min fuih tang tang thin tu ka nei hi ka lawm a ni.


Champhaiah ka phei leh tawh a,ka chhungril nun hi a nguai ngawih ngawih. Ka pa ka sunna na a ziaawm chauh a,ka nu uire thu ka hre leh a tinge ka hlim ve theih reng reng loh ni;ka hlim dawn chauh a thu dengkhawng tak ka hriat leh bik thin ni! Ka chhungten ka nu uire thu ka hria a ni tih erawh an hre lo; Oruati tih loh chuan ka hria tih hriattir kher pawh ka tum lo. Ka pa in a dam loh a tawng theih tawh si loh a sawi duh nei ni awm tak a min melh tlawk tlawk thin kha ka ngaihtuah let a,a thihhma khan thudik engkim min hrilh a duh a ni ngei ang. Pa rilru tha tawpkhawk ka ti lo thei lo,dik lo tak a phatsantu kha kan huat a hlau ngawih ngawih a,kan pafa za a kan chen ho chhung zawng pawh khan ka nu hi a chhe zawngin leh kan thiam loh na tur thu engmah a chhakchhuak ngai lo. Ka van chhun lo tak em! fanu tha chu ka va ni lo tehlul em ka nu kan huat a duh loh thu ka hrereng chung pawn ka zawm lo chu ni sia,pa I fanu hi min ngaidam rawh aw.
Zankhat chu ka mumangah ka pa ka lo hmu a,a cherin a dawldang em em a ka khum bula dawhkan te ka hun bul atang hian min lo thlir reng a,engmah pawh sawi loin sawi muang hian a ral riai riai a! ka thangharh a ka pa chuan min thlir ni hian ka hre tlat a,ka sir a dawhkan te ka hun chu ka en phei a mahse engmah hmuh tur a awm lo. Ka mittui a hnam tiam tiam a, “pa kan unau hian min ngaihtuah lutuk tiraw.? Ngaihtuah awm kan ni lo a nia,thlamuang takin chawl rawh aw. Mahse kan ngai che,kan ngai lutuk che” ka rilru chuan a ti a mahse,ka rilru chhungril leh lam bawk chuan ngaihtuah kan ngaihzia leh tuna kan harsatna hi min paltlang pui turin a ti thung!
Lehkha zir a harsa ka ti a,ka zirlai te hian ka lo ngaituah leh ngut ngut zel. Ka thian tha tak Lawmi pawh ka nu in min uire san a ni tih ka hrilh lo,ka hrilh thei ngang lo a ni;keimahin ka tuar tlawk tlawk a,a ruk a tah chang pawh ka ngah. Mizia in hrechiang na fam chu Lawmi chuan min hrethiam vat reng a a chhan pawh min zawt ngei mahse,chhuan lam eng eng emaw ka siam mai thin a ruk tak chuan ka inthiam lo ve thin! Ka ngaihtuah let a ka nuin an inthen dawn zan a thu tha min hrilh a “I puitling anga thil awmzia chu i la rawn hrethiam mai ang” a tih kha he thil inthup uire na tenawm tak hi a lo nih hi!

“Nu min lo hmangaih miah lo a mi.?”

“Engah nge ka hmangaih loh ngawt ang che u”

“Nih ngati nge ka pa phatsanin fahrah ah min siam” ka ti zuai raih a.

“Eng nge i sawi awmzia.?” rawn hre lo vel a tenawm in a!

“Engkim ka hrevek tawh. Ka rilru tina takzet a ni hman a naupang a nu chuang tak thin thinlungah hian huatna i tuh ta a ni. I tih sual tenawm tak hrereng chung hian engtin nge chhuang takin ka sawi theih tawh ang che. Ka pa kha lainatna,hmangaihna leh khawngaihna chhe te pawh i nei miah lo a mi.? Tinge kha ti tehthlawt a rilru na khan i siam .? I fate naupang te pahnih nu leh pa mamawh ngawih ngawih te pawh kha min ngaihtuah miah lo em ni.? Tinge ka pa kha phatsan a rilru na thei ang ber a i kalsan.? Maw tinge.? ka pa khan eng nge tihsual a neih.?” leh lam a ka nu chu a ngawi vang vang a in sawithiam na tur a ngaihtuah a ni mahna; kei erawh zawhna hlirin ka khat thung.

“Engkimah thiam loh min chan tir vek tihna mi.? I pa kha ngaihtuah la zu a in thin kha zu in bula awm ka peih tawh lo a ni mai. Ani ai duh ka nei tih na ni mai. Eng nge dem tur ka awm na.?” ka nu min chhan let na chuan ka thin a khei zak mai. Inthiam lo a ngaihdam min dil a hnek in zak map lo in min dem zawk za mah nih chu ka nu ngei kha a ni si a maw!

“Ni e,ka pa khan zu a in ngei ka hria e. Mahse,vawikhat pawh kut a thlak che em a teuh lo! chutiang a in nasa pawh a ni lo inchhungkhur tibuai in vawikhat pawh a awm ngai lo a nih kha ka pa dem na tur rawn zawng buai duh suh. I thiam loh hulhual a ni ka pa thlarau tal chu zah ve rawh. Khawnge hman a ka nu nu tha tak kha a awm tak.? Nge khang kum liam ta chhung zawng a i that nate kha lemchhan na vek a lo ni zawk a mi.? Ka pa khan i uire lai a mit ngei a ahmu chung khan a fate hian kan huat che a hlau ngawih ngawih a sin. I chanchin hi vawikhat pawh a chhe zawngin a sawi ngai lo a sin; nangmah vangin zu a in nasa a a taksa in atuar a nang inthiam loh na pawh nei lo in i awm thei hi i fakawm letling ngawt mai. Rilru na reng reng in a awm a, a fate rilru hliam a duh lo a a rilru na chu a thup tang tang a, ka pa kha rethei leh rilru na reng reng in a sin a thih chu chu engvang nge i thiam loh vek a ni. Ka pa in haw lo tur che in min duh mahse,ka hua che ka haw ngawih ngawih che; a vawikhat nan i fanu nih ka zak a,ka nu tia koh che pawh ka zak zawk” ka aw chu a zawi lo khawp mai; ka sawi hnem bawk a,ka sawi zo chu boruak ka hip vang vang a,ka mittui luang ngiai ngiai chu ka hru bawk a! ka chhungte awm lo chu tihzia tak a ni ka duh tawkin ka tawng thei a.

“Lalrinmawi i zak chai nange i tawngkam hman fimkhur rawh. Tawngkam vin min la hman khum ngam zui i nu ka nih hi” ka nu awki pawh a zawi lo khawp mai. Hmun leh hmun a awm chu ni ila kut min thlak duh hial pawh ka ring!
“Duh lo a i uire san te bulah hian zam map lo in nu ka nih hi i la ti ngam hrim hrim pawh hi nu ropui tak chu i ni. Chuan zak lo min ti maw tunge chhun se min tih a nangmah hi i ni mai a lawm. Zak lo chu min ti tak na in pasal te uire san a, fate fahrah a siam thei mihring hian zahna a nei lo a ni lawm ni chuvangin keipawn ka zah na tur ka hre lo.” ka thinlung chhung na lutuk hi ka tawt up up! Uire san kan ni tih hriat a tawt tawh naklai in ka nu in zak map lo va min tawngkhum let zawk te hian ka rilru na tizual.

“Ka pa ai a i thlan zawk leh i fate ai pawh a i hmangaih zawk nen chuan i duh ang ngei chuan hlim mawlh ang che u. Engtik niah emaw chuan i inchhir thu ka hriat ngei ka beisei ! Nu tha ber awm ang zia zang a min ngaihtuah pawh kan ngai tawh lo a nia. I duhdan ngei leh nuam i tih ang ngei chuan i nun chu hmang mawlh ang che. Mangtha!” min chhan let na pawh nghak lo in ka phone ka off hmak a,mittui nen thawk ka la vang vang a! ka tawngkam hman chu a na tih pawh ka hria mahse,ka rilru ti ippik tu ber a ni bawk nen ka insum zo tawh thlawt lo a ni.

A ni telin ka nun hi a ruak ni mai,pawn lamah hlim awm in ka awm a mahse ka nun chhungril chu a na in a ruak ngawih ngawih. Ka pa tal awm se chu ka zia awm mai tur ka pa ka ngaih a zual a, ka bansan tan mek tah ah bawk ka let leh a!

“Pa van a tang khan min lo hmu em i fanu hi ka chau takzet a nia,i thlarau talin min rawn hnem rawh. Keimaha tawrh a tan chuan a lian lutuk mah mah ka paltlang thei lo anga, ka dinhmun hrehawm tak ah hian ka ding reng tih ka hlau;chuvang chuan lo kal la,min rawn fuih leh rawh a nih loh pawhin Pathian hnenah khan min lo ngensak la, tiang rilru natna nun hrehawm tak hi min lak kian sak turin Pathian kha lo hrilh rawh. I bula lo kal ve daih kha ka chak mahse,ka awm loh chuan ka nau hi a mal dawn bawk sia tiraw.? Pa ka ngai che ka ngai takzet che,ka nu erawh ka haw ngawih ngawih thung!” ka pa thlalak en chuan ka phun mawlh mawlh a!


Ka nu leh pa inthen dawn zan a ka nu thu min hrilh ka ngaituah let hian kha ti khawp a min ngaituah leh min hmangaih angin thu min hrilh a nih kha lem channa vek a nih hial ka ring. Pasal pawh kha a nei nghal anga mahse, ka pi ten an zep pui anga tun hnu lawk a nei angin min rawn hrolh a nih te ka ring hial! Hlim na hi ka tan a siam a ni ve lo a nih te ka ring rum rum thin; a hmasa ber ah nu leh pa kara seilen mamawh rual lek ka nih lai in ka nupa an in then a,a dawt a thihna in ka pa min laksak leh a,chuan ka nu a uire a ni tih ka hre leh a, hmeichhe chak tak ka ni lo a ka tawrh a tan chuan a lian mah mah a ni. Nu emaw pa emaw in a uire san tawh chuan a natzia hi in hrethiam ang a na mai ni lo in a zahthlak bawk.

Lehkha tha tak in ka zir anga,ka nau tan khawvela u tha ber leh nu leh pa nih ka fawm anga,kan unau in chawmna khawp chu ka thawk chhuak ve thei em em ang ; hei leh chen min enkawl tu Pathian hian hlim na kailawn chu min la hruaithleng ngei ang tih hi ka in hnemna a ni.

Oruatin min fuih nasa a,tunah chuan tlem in a engzawngin thil pawh ka tlir thiam ve tan! Ka tawngtai tam phah bawk a,Pathian hi ka in nghah na awm chhun leh min phatsan ve ngai lo tu a ni. Midang hian ka tawn ang hi lo tawng ve lo tur in ka duh a na emai;nu leh pa te pawh hi fimkhur se tumah in phatsan awm lo se tih hi ka tawngtai hla a ni. Tuna ka hmachhawp chu class 12 hi tha taka pass a ni;ka hmalam hun zel tur erawh Pathian kutah ka dah tawp.

Lalnunpuia kum – 45 tih in ziak chu ka melh ngawt ngawt a! khawvel ngaiha a vanglai nun em pawh ala hmang ral lo asin. Mahse,kan chunga thilthleng ah hian kan thu lo em a ni. Mihring kan ni si a,thil tha leh kan duh zawng chiah kan tawng thei miau si lo a!

“ Pa tunah chuan min ngaihtuah kan ngai tawh lo tak tak a nia, Pathian ka nei tawh a min tanpui tur in; engkim ani nen chuan kan hmachhawn tlang zel tawh dawn a, chuvangin thlamuang takin chawl tawh rawh aw. I duh ang ngei in zirna a hlawhtling nih ka rawn tum fan fan ang. I fanu hi ka puitling ve tawh lutuk a nia,nangpawn mak i ti hial zawk ang!chuvang chuan min lo ngaituah lutuk suh aw; ka nau pawh tha deuhin ka lo enkawl ang,mahse pa kan ngai che,kan pa neihchhun i ni a,kan ngaih che erawh hi chu a reh lo ang” lungphun a ka pa thlalak chuang melh chung chuan ka be siam siam a,tun tum ka thusawi chu a nuam takzet rilru thawveng tak in ka sawi a, ka lung pawh a chhe tawh lo. Keimah hrim hrim pawh ka zang huaiin ka hria, marawh chu ka ngaihna hi chu a la awm reng engtik ah nge a reh ang erawh ka hre lo! upa ten ‘khuareiin lunglen a hnem ‘ an ti a. Keipawh ka pa hi theihnghilh ni lo in ka ngaihna hi khuarei hian min hnem ve ngei ang.



Saisen tet a chun tang belh laiin, Thenna kawl a lo eng a; Ka chun leh zua sam ang an inthen, Kan run rial ang a lo dai.

Aw chungkim lai ka ngai mange! Kan run inchung ka ngai mange Aw chun leh zua,aw chun leh zua

Sial ang ka tuai zuapa run chhungah, Zirna run sang min kai tir; Mahse lenrual ka ban hma in, Tapin famkhua min liam san.

Cho loh awmlai lunglian a hrang e, Ka chun nunnem min then tir; Ka riang hluan e,hringmi zawng zingah, Riakmaw iangin ka lo vai.

The End

Nupa in then na hian nangmah ni ai mahin fate nun a nghawng zawk tih hriat a tha. I fanu i fapa kha nangmah vangin a nun zawng zawng a chhiat phah thei. Chuan he story a naupang dinhmun ang a ding pawh in lo awm ve mai thei beidawng suh u aw. He story atang hian thil pakhat tal zir chhuah in tum theuh dawn nia. Fahrah dinhmun hrehawm zia hriat phah nan hmangin, i nupui/i pasal fa hmasa leh laina hnai te kha hmu thei lo ngawih ngawih suh, he naupang ang a nun hrehawm pawh a ni thei a nia.

Min chhiarsak tu te chungah thinlung leh tih tak zet in lawmthu ka sawi a, like leh comments min lo pe ve hram hram dawn nia. Like leh comment hian nasa tak in min ti phur ve a, story dang nen in hmuh leh kan tum dawn nia.
In duhthu a sam lo ngawt in ka ring a, True story based a nia, mahse mi pakhat tawn vek erawh a ni lo. Ka lawm em em vek e💜💜



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)