Thank You For Loving Me (Short Story)

Moderator: writers

Rodingliani
Posts: 196
Joined: February 26th, 2018, 8:27 pm

Thank You For Loving Me (Short Story)

Unread post by Rodingliani » October 21st, 2020, 6:58 pm

Darthlalang hma ah thu in ka bialpa in min khawihna ka hmai duk raih mai hliah khuh tur in make up chu ka in hnawih mawlh mawlh a. Ka hmai te chu la na thum hian ka hria a. Ka chau ngawih ngawih a, class kal te chu ka peih lo ngawih ngawih mai a ni. Mahse ka thiannu Manuni'n min rawn sawm a tum vang chauh chuan kal hram chu ka tum a.





Khum chung ah chuan ka bialpa che fel lo ve tak, Naga tlangval hmeltha veng vawng Max-a thawmhnaw chu a awm hnawk nuai a. Khum hnawk nuai mai ching fel tur pawn phurna leh chakna reng ka nei lo, ka chau ngawih ngawih a damlo mai dawn ni hian ka in hria a.





Max nen hian apartment khat ah kum khat dawn kan cheng dun tawh a. A hmeltha in a pian a nalh a thiante zing a len pui pawh zahthlak lo tak a ni. Kan in ngaihzawn tirh chuan a fel in a tha em em a, ka tan eng kim a engkim hi a ni ringawt a. Min duat thiam in kan in hmangaih tawn em em bawk a, ani ang tlangval hmeltha leh fel ka lo tawng chu vannei ka in ti in thiante lak ah pawh ka inchhuan ve phah thin.




Mahse in khat a kan chen dun hnu chuan a mize dik tak chu a langchhuak tan ta a. A chet fel loh chu thu hran a thikthu a chhia in ho te te ah kut min thlak a ching tan a. Mizo mipa reng reng ka biak a phal lo a, a awm lai in Mizo tawng ka hman hlek pawh a phal ngai lo.




Ka tuar peih tawh ngang lo a, chhuahsan ka tumna a rei tawh. Mahse in luah tur remchang a awm bawk silo a bulah ka la awm hram hram ani. Thla thar ah khian Susanna-i te in luah ah ka in suan lut ve thei dawn a ka lawm hle ani. Thla thar hun ka nghakhlel ngawih ngawih mai a ni. Min dan ngei dawn a vang in Max chu engmah ka hrilh duh lo a.





Sam ka khuih malh malh lai chuan Manuni chu a rawn thleng ve chiah a. Min en vang vang a, a chek tlak a, "Max-a punching bag ah i tang leh tawh ani maw?" lungawi loh hmel tak chuan a ti a. "Eng tin nge a bulah hian ila awm reng theih zawk? Then la chhuahsan daih rawh. Hmeltha eng ang mah se a care tak tak chuan loh che chuan eng nge awmzia a neih?" a ti a.





"Nia, ka chhuahsan dawn a lawm. Susanna-i in luahpui Nepali nu kha thla thar ah a haw dawn a. Thla thar ve leh ka in suan lut ang."






"Tha lutuk !" tih pah in Manuni chuan a bag a tang chuan chocolate bar hi rawn phawrh chhuak in a ei hmarh hmarh a. "Kha... duh ve em? Ka pai nual a nia" tiin ka hmai bul mai ah chuan a rawn lek hnai a.






Chocolate rim ka hriat chuan ka pum chu a ti deuh nghulh a. Ka insum hman ngang lo ka uak tuarh a bathroom ah tlan lut in ka va luak ta bawrh bawrh a.





Ka chhuah leh hnu chuan Manuni chuan mak tih hmel tak hian min lo melh phawk hra a, "Chocolate chu i ngaina thin hle si a." a ti a.







"Ka hrethiam bik lo. Tunlai chu ka pum a diklo a, thil ngei leh huat hi ka ngah lutuk a."



"Oh... nang hi..." min kawk a, a meng phawk hra a, "I rai a ni lo maw?"





"Maw? Keimah maw? Ka rai ang maw?"
"Umm.. i period hnuhnung ber ila hria em?"
"OMG !" Tun thla ka la period miah lo tih ka in hrechhuak a. "A ni thei lo ang !" tiin ka rum hak a.




Ka zawi nghal hnawk a, ka lu te chu a hai muai muai a. Rai ka duh lo... Max hi pasal ah ka duh lo, neih tlak a ni hek lo... a fa pai pawh ka duh bawk lo.





Manuni nen chuan Drugs Store pakhat ah pregnancy test kit kan lei a. College zunin ah kan test a. Ka thil duh loh ber a thleng ta. Ka rai ani. Max-a fa ka pai mek ani. Ka rai tih ka in hriat chuan min shock hneh hle mai, ka rilru chu a tawt up up a, awm zel dan tur pawh ka hrethiam tawh lo. Pasal atan neih tlak loh fa chu ka pawm dawn nge ka ti tla mai dawn? An fanu duat lai chuan hnam dang fa a pai tih hria sela chuan ka nu leh pa thinlung chu a keh sawm vek ngei ang.





Manuni chuan min lainat tih hriat tak chuan min en vawng vawng a, "Eng tin nge kan tih dawn, Kim? Pasal ah i nei mai dawn em ni ang? " a ti zuai raih a.





"Aih... ka hre lo. Ka buai nuai mai. Pasal a neih chu ka duh lo bur."
"A nih ti tla mai la."
"Ka rap e..." ka ti sap a. "In ngaihtuah a rilru siam fel ka duh ani." ka ti halh a.





Ka rilru tawt lutuk chu class ah pawh ka awm hlei thei lo a. Rilru hah em em kan in luah hnawk nuaih lam pan chuan ka haw ta ringawt a. In ka thlen chuan chuan ka rilru hah chu a zia awm hlawl lo, a zual tulh tulh zawk. Max-a whiskey um khat chu la chhuak in ka i pawp pawp a min chhawk chuang lo.





Max-a class bang chu tlai tak ah a lo haw a, a bike ri ka hriat chuan ka tho vat a. Thil diklo a awm rih a hriat ka hlauh a vang chuan pangngai tak a lan ka duh ani.






A kut leh lam in fullface helmet a keng a, leh lam in a bike chabi vawr vir chai chai in a rawn nui lut var var a, a hmeltha fuh thlawt a ni. Ka hmui ah min rawn fawp zauh a "Hows ya day, Hon? Miss me?" a ti zang vah a. A helmet chu dawhkan ah a dah leh tawp a, ka hmai duk raih chu chul in, "Am so sorry, Hon... believe me.... it will never happen again." a ti sap a.





Ka tum bar a chhan pawh ka chhang let peih lo. Min khawih hrep hnu ah ngaihdam min dil in eng tik ah mah a thleng leh tawh lo ngai lo ang tiin min tiam ziah a, a sim ngai chuang lo. A thikthu chhe lutuk hi piansualna chi khat a ni.





Ka thin a la rim in ka hlim lo hle tih a hriat chuan min tih hlim tum in a phi cheng te chuan ka thin a ti ur zual a. Eng mah hre lo a ruih chhum hmawk ka duh a vang chuan rawng a bawl hlan chuan whiskey chu ka in leh a. Ka duhthusam ang ngei chuan chaw pawh ei peih lo in ka chahthlak san ta daih a.





A tuk ka harh chuan rawng a lo bawl peih diam tawh a, "Morning, Honey. Class kal i tum em?" a ti nghat a.
"Aih, tum lo."
"Eng nge nang mah ah hian diklo awm a? Nizan khan eng vang a zu rui nge i nih?"
Tuboh a chhut ang mai a Ka lu na tluk tluk chu ka dawm vang vang a, "Eng kim a tha vek e." tiin bathroom ah ka luh san daih a.





Max-a class kal tur chuan min fawp zauh a, "Take care baby. I love you... I really do.." a ti sap a, a in khalh liam leh hnu chuan ka mu char char a.





Ka rilru a in sual buai nasa mai a, mahni in tih hlum hial ka duh rum rum a. Ka naupai hi ti tla dawn pawh ni ila pawisa ka nei si lo. Ka chhungte hnenah dil dawn pawh ni ila eng nge ka chhuanlam tak ang? Hmani mai khan ka Lap Top a chhia a a thar lei a ngai tiin dawt ka hrilh tawh bawk si... thih daih mai ka duh.





Rilru hah chhawk nan tum loh deuh in zu chu ka in pawp pawp a, min chhawk chuang lo hle a, rilru hah a ti zual zawk ani. Ka rilru hah mangang chuan ka phone chu ka hmet kual chhen a. Max vanga ka then tak ka ex, tuna Chennai a lehkha zir mek Jake-a messages thenkhat chu ka hmet chhuak nawlh a, ka chhiar nawn leh a.





"Min Kalsan Pawh Nila Engtik Lai Pawn Ka Hmangaih Ang Che. Min Mamawh Hun I Nei Emaw Ka Lam a Rawn Let Leh Duhna Thinlung I Nei Anih Chuan I Tan Engtik Lai Pawn Ka Awm Reng Ang"





A messages hlui ho chu ka chhiar nawn tlut tlut a, ka mittui a tla zawih zawih a. Jake-a hmel paa chu ka mitthla ah alo lang a. Ka i chhir tak zet ani. Jake then a Max bula ka in suan lut hi ka nun a ka thil tih sual lian ber a ni. Amah ang kha chu an awm leh tawh lo ang. Mahse inchhir hian eng nge awmzia a neih? A tlai lutuk tawh... inchhir nan a tlai lutuk tawh ani. Mizo tlangval dik tak, ruihtheih thil a fihlim, lehkha thiam thei leh rilru puitling, Kohhran Upa fa anihna ang ngei a Pathian tih leh fel Jake ai a Naga tlangval hmeltha lutuk satliah, thikthu chhia leh kut thlak hmang Max chu eng vang teh kher in nge ka lo thlan le?






Mamawhna ka nei anih phawt chuan amah pan tur in min ti a... Pawisa puk dil ta tawp ila a tlawm thlak lutuk ang em? Dil ta ila chuan ka dil zah zah chu min pe ngei ang tih ka chiang ani. A ni chu a Nu leh Pa te sarkar hna sang tak thawk hlawh tam tak nei an ni a, a U mipa Chennai Bank pakhat a hnathawk mek nen an awm dun bawk a. Sum leh pai ah chuan harsatna a nei awm hauh silo. An chhungkaw zing a naupang ber leh an duat rawn, a hming pawh a an koh phal lo 'Naute' tia an koh duat thin kha a ni si a.





"Hello? Hello?"
Chu thawm chu ka phone a tanga lo chhuak ani tih ka hriat chuan ka wn vat a. Ka ti ani tih in hre miah lo in Jake chu ka lo zuk dial reng a lo ni a. Muangchang in ka beng bulah lek kang in ka thaw hawk a.





"Hello..."
"I dam thin maw, Kim? I va reh thei veng veng ve a... Max-a a dam maw?"
"Umm..."
"Nang i tha em?"
"Ummm..."
"I tha chiah lo ani ti raw? I damlo em ni? Eng tin nge i awm a?"
"Aih... ka tha...! Engkim a tha vek."





Min ngaihtuah tih hriat tak chuan, "Eng kim chu a tha chiah lo anih kha. I tap a ni ti raw? Eng harsatna nge i neih a? Engkim min hrilh teh, puih theihna che ka nei em?" a rawn ti mawlh mawlh a.





Chiai tak chuan, "Aih, ka tha a lawm. Rawn call hauh lo tur che ka ni a sin. Ka tih palh ani." tiin ka phon chu ka dah hmak a.





A aw dam duai leh min ngaihsak tak tak ani tih ka hriatna chuan ka lung a ti chhe thar a, ka tap ta hlawp hlawp a. Ka fa pai lai hi Jake-a fa ni ta zawk se engkim a fel vek mai tur... Mahni in khawngaihna leh inchhirna chuan ka khat a.






Jake chuan a rawn call let thuai a mahse ka rui lungpuam deuh nen ka tah khum chiam ka hlauh a vang chuan ka pick up ngam lo a, ka reject hmak hmak a. "Pick up hram teh.. khawngaih in.." tiin message a rawn thawn a. A rawn call nawn leh chuan zam tak chung in ka pick up ta hram a.






"Min ngaihtuah suh. Ka tha ka tih kha." ka ti vin hlar a.
"Aih,i tha lo. Ka hre chiang tawk che."
"Nilo..ka tha tak tak a lawm."
"Anih...ti nge i tah? Engnga tinge zu i ruih? Max vang em ni?"
Ka insum buai peih tawh lo. In sut hlawp hlawp chung chuan, " Aw... Max vang ani." ka ti ta a. "Kut min thlak thin a.."





A thaw hawk a, "Kut a thlak thin che maw?? A va ngam zawk ve a... kan Naga ××××-a chuh!" thinrim tak hian a ti ngal ngal a. "Kut a thlak thin che chuan eng ah nge a bulah i la awm reng?" a ti vawt raih a.





"Ka thei lo a lawm"
"Eng chu maw i theih loh? I hmangaih hle a ni ti raw?"
"Chu tiang a ni lo, Jake."
"A nih chuan tunah khan chhuahsan nghal rawh."
"Thla thar hma chuan ka chhuahsan thei lo."
"Eng vang?"
"In luah tur a awm hrih lo."





Thinrim tih hriat tak chuan a thaw kawk a, "Awle, tah khan Mizo thian fel tak ka nei a, ka'n call anga ka rawn hruai tir ang che. In luah tur i hmuh hma chu an kiang ah i awm thei ang." a ti a.





"Ti suh, Jake. Ka thei lo ang..."
"Eng nga ti nge i theih loh?"
"Jake, Max-a fa ka pai mek a... nimin khan ka in hre ve chiah a ni." tiin hreh zet chuan thil awmzia chu ka hrilh ta a.





A reh vang vang a, a thaw hawk ri chu ka hria a. Anchhia min lawh bawrh bawrh in phone chu dah hmak mah se ka dem lo ang. A tawng dawn ta lo emaw ka tih hnu chuan, "Lalpa !" tiin a rum kawk a.





"Pawi ka ti lutuk, Jake. Rawn be lo che ila tha tur a nia." ka ti bah niai a.
Aw bung vut leh nelawm loh tak hian, "Eng tin nge awm zel i tum? Inneih in tum em?" tiin min zawt a.
"Aih, ka nei dawn lo. A fa ka pai tih hi Max pawh ka la hriattir lo."
"A fa i pai si a lawm."
"Naute hi ka ti tla dawn."





Thinrim lutuk chuan, "ENG A??!" a ti tuarh a. Ka kiang ah awm se chuan ka dar tawn tawn ah vuan in min thing nawk nawk duh ngei ang. "Nau tih tlak hi sual lian tak a ni a sin. Eng tin nge thu satliah ang mai a awlsam a i sawi theih zawk ni? I tawngkam kha fimkhur rawh." a ti a.





"Tih tlak ka tum tak tak a lawm."
Lungawilo tih hriat tak chuan, "I pum chhung a naute awm kha mihring a ni a sin. A nunna ti tawp tur in dikna i nei em ni? Nau tih thlak hi tualthah nen eng nge danglamna? Naute chu i ti tla tur a ni lo, i pai puitling tur a ni." a ti fak fak a.





"Ka pai puitling thei lo ang, Jake. Kum 19 chauh ka la ni a,... nu ni tur in ka la in peih lo. Ka zirlai hi zir zawh phawt ka duh a ni."
"Awle... awle.. min ngaithla teh, Kim. Naute chu ti tla lo la min rawn pan rawh."





A thu sawi chu ka bengchhe ri emaw ka ti hial a, " Ka rawn pan ang che maw?!? Max-a fa pai chung hian maw? I ti tak tak thei lo ang." ka ti hluai a.





"Ka ti tak zet. Ka fiamthu miah lo. Naktuk ah rawn thlawk thla nghal rawh. I fa pai lai chu ka fa ang in ka pawm thlap ang."





Ka zak ngawih ngawih a, amah chu ka zah a ka lungchhe bawk nen ka in sut hlawp hlawp a. "Ka lawm e, Jake. Ka rawn chhuk dawn a nih chuan train in ka rawn chhuk ang."
"Hmeichhe tan mahni mai a train a zin hi a him lo. Flight in rawn chhuk rawh."
"Flight man ka nei lo." hreh zet hian ka ti a.
"I account number min rawn thawn la pawisa chu ka rawn dah ang. Rawn chhuk ngei ngei ang che."






Ka bank account number chu ka thawn nghal vat a. Ka tana Jake-a thatna hi eng tik ah mah ka rul zo thei lo ang..... a mi khawngaihna dawng tlak pawh ka ni lo ka phu hlawl si lo. Ka tih nat hnem tawh teh reng nen min haw ngawih ngawih tawh tur zawk a ni a sin.





"Kim, pawisa chu ka rawn thawn nghal ang. Ka dah phawt anga ka rawn be leh ang che. Lo in enkawl tha rawh aw." tiin a phone chu a dah ta a.






Ka inbual harh a thawmhnaw te ka suk zawh chuan chaw te ka ei a. Rilru engthawl tak in ka awm thei ta - Jake vang in. Darkar hnih hnu chuan a rawn call leh a, pawisa a rawn thun tawh thu leh flight ticket pawh min lo lak sak vek a rawn sawi a.






"Jake, tinge... enga ti nge ka chungah hian i that em em a? Ka phu thlawt lo." ka ti a.
"A chhan i hre lo tak tak maw?"
"Aw, ka hre lo."
"Khawvel a ka hmeichhe hmangaih ber i nih vang a ni."






Ka tek chhawk a, Jake-a hmangaihna hi ka phu lo tih ka hriat chian em a vang chuan ka zak ngawih ngawih a. "Ka lawm e, Jake." tap tiau chuan ka ti a.





"I rawn thlen ni la la a kan inneih nghal a ngai dawn a nia. Kan in luah hi kawngpui bul mai veng laili a awm a ni a. Nupa ni si lo mipa leh hmeichhia cheng dun hi police ho hian dap leh zauh an hrat a. Inneihna certificate tel lova kan chen dun a rem dawn lo ani. Chu lo ah ka chhungte pawn innei lo a kan chen dun hi an rem ri dawn lo hrim hrim ani." Jake chuan a ti a.






"I sawi awmzia chu... i nupui a tan min la pawm cheu a maw?"
"Aw.. ka nupui tak tak ni tur in ka duh che a, i pum chhunga naute pawh kha ka fa tak ni tur in ka pawm thlap ani. Kim, min nei duh ang em?"






"Aw.. ka..." ka sawi zawh hma in Max chu pindan ah a rawn lut a, ka tawng lai chu ka tawp chawt a. A bike ri pawh engmah ka hre silo a, ka phu zawk a ka hou hian ka lo en a. A hmel chu a tha chiang a ni. Helmet a phelhna lam ah chuan a sam chu a pawr phang a,a in hmeh phian mai leh nghal a. Ngaihsam zet hian a zirlaibu chu khum ah a theh thla tawp a. A mitmeng tih zim san pah chuan min rawn melh a, "Tu nge i biak a,Honey?"






Ka che lai vek, han chhan mai dan tur ka haihchham ta pek a, "Ummm... tumah... ka thian mawle..." ka ti nawi nuai a.







Ka phone chu min rawn lak sak a tum a ka phal bik si lo a, kan in chuh ta a. Ka hmai ah chuan min rawn beng thuai a, ka te thawt a. Tawngkam chhe theih tawp in min an khum a. Ka phone ka la hang up silo kan thawm zawng zawng chu Jake chuan a lo hre vek tih ka hriat chuan ka zak lutuk chuan kan in biakna chu ka hmet tawp ta a.






Ka phone chu a rawn ri leh rang kher mai a, Jake ani tih ka hriat chuan hmeh tawp mai ka tum a. Aw fiak thak hian Max chuan, "Pick up rawh!" a lo ti tuarh a.
Max en zak zak chung chuan ka pick thuai a., "Enga ti nge i rawn call leh? A awm tih i hre vek sia." ka ti a.






Thinrim lutuk hian Jake chuan, "phone kha pe rawh ka be dawn. Thil engkim hrilh ka duh. Amah kha hmachhawn a ka kut ngei a khawih ka duh a ni." a ri rum ul a.




"Nilo. Ti suh. Ka thil tum a hriat chuan min kal tir phal lo ang. Eng mah hrilh suh... khawngaih in."





Max chuan rum lutuk tak mai chuan min melh a, min ben tum chuan a kut a lek uaih a, "English in be rawh. Mizo tawng ka thiam lo tih i hria. Ka bul ah tawng dang hmang suh." a ti tuarh a.
"Ok.. ok.. Max, kha nang man be rawh."





Ka phone ken lai chu a rawn phih thla thuai a, an in biakna pawh ngaithla duh lo in pindan atang chuan ka chhuak daih a. A mi benna ka hmai chu vur in ka dep a, vur a deh vat chuan a duk tur pawh a veng ve deuh a.





Ka hnung lam atang in ka kawng ah a rawn kuah in ka beng kawm chu a rawn seh ner ner a, "Ka tihpalh ani... min ngaidam rawh. Ti nge i unaupa i bia tih min hrilh loh?" dam duai hian a ti a. "Ka hmangaih che, hon... nasa tak in." a ti a inbual tur chuan bathroom ah min luh san ta a.





"Max, i inbual chhung in dawr ah ka kal lawk dawn a nia aw." tiin ka au a.





"Ok, hon. Rei lo la aw... ka ngai che a nia."
In ka chhuahsan rual chuan Jake chu ka be nghal a. Eng mah ka sawi hma chuan, "Kha Naga ****-a bul ah khan zan khat pawh i awm ka phal tawh lo. In sawn chhuak la hotel ah pawh riak mai rawh." a ti bur mai a.





"Awle, Jake. Zan a len chhuah hlan in Ghy ah ka cousin bulah ka riak phei mai ang."
"A that nasat chu. In enkawl tha nasa rawh aw. Ka hmangaih che."





Zan dar 8:00 ah chuan Max chu a leng chhuak a. A chhuah hlan chuan ka thawmhnaw ka pack zung zung a. A lehkha tur ka hnutchhiah a, taxi hire in Guwahati lam pan in ka tlan ta nghal a.





Dear Max,
Engkim vang hian pawi ka ti. Nang nen hian Pathian ruat kan ni lo a, kan in mil kumkhua dawn chuang lo... i bul a awm zel thei niin ka in hre tawh lo. Min theihnghilh la min rawn zawng buai duh suh - a chhan chu min hmu tawh ngai dawn si lo.
Dam tak in le.
K.





Ni hnih hnu chuan Air Sahara ah chuang in ka fa pai lai pa tur Jake-a Awmn Chennai lam pan in ka thlawk ta a. Ka dul la thep zaih chu zut in, "Bawihte, daddy hnen ah kal ang aw..." tiin hlim tak chuan ka nui ta ver ver a.



🍁🍁 Naktuk zan atangin ka Story thar Lingering Memories chu ka rawn ti chhuak dawn a min lo chhiar sak theuh tur in ka sawm pah a che u 🍁🍁

EENNDD


Dingdongi

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)