ENGAH NGE MAW MUT HI A CHHUAH LOH ZANKHUA MAI LE

Story tawi te te emaw luanliamna emaw post na
LT Muana
Posts: 9
Joined: June 10th, 2018, 8:47 am

ENGAH NGE MAW MUT HI A CHHUAH LOH ZANKHUA MAI LE

Unread post by LT Muana » October 29th, 2020, 9:34 pm

ENGAH NGE MAW MUT HI A CHHUAH LOH ZANKHUA MAI LE
- Surendra Varma

(Dawhsan chu hmun hnihah a inping dang a. A pahnih hnih chuan rangkachak pindan ni maia mawi hi a ni a. Hla taka zan dar vuakna in a?anga zanlai dar sawmpahnih a inkhawn rik bawl bawl lai chuan dawhsan pindan vei lam chu a lo eng a. Khumah hian nu valai tak pakhat hi a inlet a inlet a. Rei lo te hnu-ah chuan a rawn ?hu chhuak hlawl a, han zik mar ar ar pahin a lo tho chhuak a. A hmel a nguiin a muk hle a. Rei vak lo chu a lu an hai deuh miai miai a. Eng thil emaw hi a khawih niap niap a. Dawhkan a?angin sana chu a la kang a, a han en a.)

Nu valai: Darkar thum a lo tling ta der mai ka let ka let a mut lah chu a chhuak thei chai chuang bawk si lo. (An chawl det a) Mut a chhuah miau si loh chuan mihring fanu hian eng a tih chuan ang le! (Thlalak pakhat hi kawk chungin) Ravindranath Thakur, nangin min han hrilh la maw le? (A chawl leh det a. Lehkhabu pakhat hi an la a. A keu thuak thuak a. A theh thal leh tawp a. Radio a han herh nung a. A rawn chiar nawk nawk a. A herh hlum leh a. Phiarfung a han la leh a. A thlek thuak a, a dah leh daih a. Telephone lam chu a han hawi thut a. A biakfung chu a vuan ta chat a. A la kang a. Maimitchhing chung hian eng number emaw ni hi a han rin hmeh a. Phone rik rual chuan dawhsan pindan lehlam chu a lo eng a. Rei lo te hnu-ah pa pakhat hi a lo lut a. Phone chu a rawn la a.)

Nu valai: Hello

Pa: Hello!
(A reh vang vang a)

Pa: Tu nge i biak duh a?

Nu valai: (A han chawl deuh a) Nangmah.

Pa: Keimah maw? Tu nge i hming?

Nu valai: (A han ngawi leh deuh phawt a) Tu nge i hming?

Pa: Arvind.
Nu valai: (Muang fan raihin) Arvind mawi hle mai.

Pa: (Lungawi hmel zetin) Ka lawm e. Mahse, i hming min la hrilh ve lo tlatin ka hria?

Nu valai: Ka hrilh lutuk ang che. Eng hna nge i thawh a?

Pa: Ka sumdawng. Plywood lam a nia. Hna ṭha thawkhat ve tak a ni. Mahse, he number hi eng tin nge

Nu valai: A, eng tin emaw te te. Eng nge i lo tih mek a?

Pa: Lehkhabu ka lo chhiar mek a.

Nu valai: Eng bu?
Pa: Thawnthu bu a nia.

Nu valai: Khawiah?

Pa: Ka pindanah.

Nu valai: Nangmahin maw?

Pa: Lehkhabu te chu mahnia kan chhiar loh nakah, mi dang nen an chhiar dun ngai em ni?

Nu valai: Eng aiah ngawt maw? An chhiar dun ngai lo em ni?
(An ngawi dun vang vang a.)

Pa: Min hre thiam la, khawi aṭangin nge min rawn biak?

Nu valai: Mi a dah khawmna in a?ang chuan a ni lo phawt a.

Pa: Chuti zawng pawn ka ti lo a.

Nu valai: I chanchin min hrilh teh.

Pa: (Mak ti zet hian) Engtin a?

Nu valai: Eng nge i lan dan?

Pa: (Lawi deuh rutin) Mahni chanchin sawi te chu a.

Nu valai: Mah reng reng se...

Pa: Mi sawi ka hriat dan chuan...

Nu valai: Miin an sawi dan che chuan?

Pa: Ka chhe lo thawkhat a ni awm e.

Nu valai: Chiah maw? I vun rawng?

Pa: A ngo.

Nu valai: San zawng?

Pa: Sang zeih zawih.

Nu valai: Hriselna lam te.

Pa: Ṭha ṭeng ṭawng.

Nu valai: I sam?

Pa: A dum.

Nu valai: A ngil?

Pa: A kir.

Nu valai: I mit?

Pa: Bial kel kawl.

Nu valai: Meizial?

Pa: Zu ve ṭhin e.

Nu valai: Zu?

Pa: In zeuh zeuh.

Nu valai: Nupui?

(Ngawi rengin a nupui chu a hnungah a rawn ding ve reng a.)

Pa: (A'n chawl deuh a.) Nei tawh e.

Nu valai: Fa?

Pa: La nei lo.

Nu valai: 'Ngati nge?

Pa: (A'n ngawi leh deuh det a. Chutah ring deuh zawkin) Engati nge chu'ng chu min zawh vak vak a? (Thu pe aw deuhin) En teh, i phone number min pe la, naktukah office aṭanga rawn phone chein engkim ka hrilh zawk dawn che nia. I duh zawk phei chuan khawi hmunah emaw te pawh kan inhmu thei ang chu.

Nu valai: Teh reng mai.

Pa: (Phur zetin) Kan inhmu ang maw?

Nu valai: (Ning zetin) Ni e le, khawiah?

Pa: I tihna apiangah a ni mai alawm. Volga-ah em ni ang? Nge La Bohim-ah? Yorks-ah zawk em ni ang?

Nu: Yorks-ah.

Pa: Rose par lo tlar putna hmun kha i hria ang chu maw?

Nu valai: Rose par lo tlar putna.

Pa: Dar eng zatah? Dar ruk?

Nu valai: Dar ruk.

Pa: (A chawl det a) Mahse, rose par lo tlar put dang pawh a lo awm thei a, chu vangin eng code emaw...

Nu valai: Code a?

Pa: Aw, kan inhriat hran nghal nalh theihna tura inbiakna ṭawngkam...

Nu valai: (A han ngawi vang vang a. Phone biaknfung a?ang chuan a han hawi sawn a) Engah nge maw mut hi a chhuah loh zankhua mai le aw...

Pa: (Mangang takin) Hello...hello...hello...hell...

(A phu zuk a. A hawi let riai riai a. A hnunga a nupui lo ding nen chuan che lo chang loin an inmelh ta ran a. Dawhsan pindan ding lam chu a thim a. A reh tlawk tlawk a. Nu valai chuan maimitchhing chung hian number dang a han hmet chhuak leh a. Dawhsan pindan ding lama phone a rik ral ral rual chuan chu pindan chu a rawn eng nghal a. Rei lo teah mipa pakhat hi hmanhmawh takin a lo lut a. Awmhmun rawt kawrfual a ha a. Meizial a pet a, zu no a hum bawk a.)

Mipa: (Phone biakfung chu la kangin) Hello...
(Nu valai chu a la ngawi reng a)

Mipa: Hello... Tu nge aw?

Nu valai: Keimah... keimah ka nia.

Mipa: (Phur zetin) Nawhchizuar pakhat, Khanna-a'n a address min pek kha maw?
(A reh leh deuh vang vang a)

Nu valai: (Chil a han lem khalh a) Aw.

Mipa: A nih chuan lo kal ta vat che maw le. Darkar chanve zet ka nghak tawh che a. (Ngeiawm zeta nui sawng chung hian) Ka lo lem hnem hman lutuk chuan i buai teh tur asin.

Nu valai: (A'n chawl deuh a) En teh, ka...

Mipa: (Thinrim rawl lek lekin) Ehiau! Ngaihtuahna lungmawl bawk maw ni leh! Khanna-a khan sumah buaina tur a awm lo tih a hrilh lo che em maw ni... Hlim takin min rawn siam la, chu zawng chu a ni mai. Lungawi takin ka lo hawtir ve thung ang che. 'Hre thiam em?

Nu valai: (A'n ngawi deuh vang vang a) Thiam e.

Mipa: A nih chuan i lo kal mek ang ti raw?

Nu valai: Kal mek e.

Mipa: Minute sawmpangaah?

Nu valai: Aw.

Mipa: Address kha i la hria maw?

(Phone biakfung chu a dah a. Mipa chuan ama phone biakfung chu a thlek vung vung a. A dahna hmuna dahin a nui suk a, a kal sawn ta a. Dawhsan pindan ding lam chu a thim leh nghal ?hiap a. Nu valai chuan eng emaw hi a han ngaihtuah vang vang a. Maimitchhing chungin eng number emaw ber hi a han hmet chhuak leh a. Dawhsan pindan ding lam chu a rawn en rualin phone a ri ral ral ral a. Inhnit hlawp hlawp chungin hmeichhe tleirawl pakhat hi a lo lang a. Mut kawr a ha a. Saidawium te reuh te hi a hum a. Phone chu a melh tlawk tlawk a. Phone biakfung chu a la kang lawp a.)

Nula: (Ring deuhin) Rajan...! Farebi...! Jalim...! Minute nga hnu-ah rawn phone leh la, chanchin thar i hre mai ang. Muthilhna damdawi ka hum mek a, ka bar vak ang a, chatuan atan thihna ang chhungah ka muhil tawh dawn a ni. (A ipte a?angin lehkha phek a rawn phawrh a) Thu hnuhnung pawh hei ka ziak fel vek tawh. (A'n chhiar a) Kei Rishma Mathur hian rilru fim taka ka ngaihtuah hnu-ah mahni intihhlum mai turin thutlukna ka siam fel a. Ka thihnaah hian tu ma'n mawh an phur lo ang. Ka nu leh pate u, min ngaidam hram ang che u.

(A reh deuh vang vang a)

Nu valai: Mahse, ngaihdamna chuan an thinlung hliam a tuam dam thei dawn em ni? Ngaihdamna hian mihring tlakchham a phuhruk thei dawn em ni?

Nula: (A phu zawk a) Karei leh! Tu nge i nih? Nina?

Nu valai: (A'n ngawi deuh a) Aw, Nina ka nia.

Nula: Rajana'n rawn phone turin a ti che em ni?

Nu valai: (A han ngawi leh deuh a) Aw.

Nula: (Vin zetin) A thu chu i lo awiha maw? Ka lak a?anga amah min chhuh luih hnua hetia mi la rawn diriam zui zel hi dikin i hria a maw?

Nu valai: La hrual fip loh tan chuan chah vat mai hi a ?ha zawk fo zu nia.

Nula: Eng nge a awmzia?

Nu valai: Eng nge nia i hriat? I tawrh ang hi ka la tuar ngai lo bik em ni? ?um hnih ka tuar tawh asin. Mahse, chu avang chuan hringnun hi tlanchhiatsan dan kawng ka dap tur tihna lam a ni lo.

Nula: I ngaihtuahna chhungrilah chuan kim lo zawng a awm mawlh dawn chu.

Nu valai: Kim biai chu mahni hnuk inchhah chhan tlak a tling tihna em ni?

Nula: Ni chuang lo e, mahse...

Nu valai: Mahse...mahse... tih mai mai a ho lutuk. Hringnunah hian beiseina kan neih reng a ṭul asin. Tun ṭumah a nih loh chuan a lehpekah, a lehpekah a nih loh chuan...

Nula: Nia, hetia zah theih loh viau ai chuan thih pawh...

Nu valai: Zah theih lohna lam a ni lo, hip theihna, hringnun zun hi maw le. Nang phei chuan dam chhan tur hi i nei ṭha asin. Tunah mai pawh i tih kha - ka nu leh pa.

Nula: (A'n ngawi deuh a) Nih chu a ni khawp mai. An neih chhun ka nih avang hian duat chu min duat thei khawp mai.

Nu valai: (Aw nem diaiin) I nu tan chuan dam zel pawh phurrit a ni ngawt ang chu.

Nula: (Zawi sapin) Nia.
(An ngawi dun vang vang a)

Nu valai: I thil tum chu thla khat lekin han sawn hla rih phawt teh. ?um khat na reng reng chu hun duhawm zawk han nghak leh rih teh.

Nula: (Chiang lo riai hian) Thla khat chuh...

Nu valai: Ni e, khawi aṭangin emaw malsawm ruah te i la tawngin, khawi aṭangin emaw beiseina eng zung zam duhawm tak te pawh i la dawng fuh maithei a, khawi aṭangin emaw lawmna par rim tui tak te pawh i la chhar fuh mial...

Nula: (A sawi dan dungzuiin) Maithei...

Nu valai: Mahse, chumi hmaa pawimawh ta ber zawk chu - kut dah awl mai mai loh tur. Inngaihtuah muk ren run loh tur. Mut dawnah chau hnap chunga mut hmun pan thei turin mawng hung hman lo leka phet buaina tur zawn hram hram tur a ni.

Nula: Eng vang chuan maw?

Nu valai: A chhan chu maw, hringnuna hun hlauhawm lai ber chu khuma mut hnu, muthilh hma si hun chhung hi a ni. He hun chhung hi a tawi zawh poh leh hringnun hi a sei a ni mai.

(Thawk leh khatah phone biakfung chu a dah ta daih a.)

Nula: (Mak ti takin) Hello...hello...hello...hello...

(Vawi thum vawi li vel a tih hnu-ah zawi muangin phone biakfung chu a dah ta riai riai a. Dawhsan pindan ding lam chu a thim leh ?hiap a. Nu valai chuan number dang hi a han hmet chhuak leh a. Phone rik rual chuan dawhsan pindan ding lam chu a lo eng a. Hmeichhe naupang hi lo kalin phone chu a rawn la a.)

Nu valai: Hello...

Naupang: Hello... Anu i be duh ti raw? Inah a awm lo a. Damdawi inah a kal daih a.

Nu valai: Damdawi inah a? Engati nge?

Naupang: A duty zan a nia. Thawhṭan zan...

Nu valai: Aw, a ni tak maw kha... Nangmah chauhin em ni i awm a?

Naupang: Aw, ka lo awm ve mai ṭhin alawm. Mahse ka hlau ve deuh a.

Nu valai: Tak tak maw?

Naupang: Hlauh loh ten... Nang i hlau ve em?

Nu valai: (A'n ngawi deuh a) Aw, lutuk.

Naupang: Eng nge i hlauh? Sakei maw?

Nu valai: (A'n thaw deuh kawk a) Aw, sakei.

Naupang: (A hmui tep ri chek chungin) Naupang fel chuan an hlau vak ngai lo.

Nu valai: (Kiai deuh sak chungin) Nia, naupang fel chuan.

Naupang: A nih, naupang nge i nih puitling?

Nu valai: (A'n ngawi rih deuh a) Naupang.

Naupang: Mahse i aw aṭang chuan nu i va ang tawh ve.

Nu valai: Nu chu naupang nge an nih puitling?

Naupang: (A nui a) A! Nu te chu naupang an ni ngai em ni?

Nu valai: Ni zeuh zeuh e, hei, tuna keimah ang chiah hian.

Naupang: Nang pawh nu i nia maw?

Nu valai: Ni e.

Naupang: In inah Pinky an awm ve em?

Nu valai: (A'n ngawi deuh vang vang a) Awm tawh lo, a hma chuan awm ṭhin.

Naupang: Engati nge? Khaw'nge a kal a?

Nu valai: (A'n ngawi leh vang vang a) Pathian hnenah.

Naupang: Engtikah?

Nu valai: Thla khat a ni tawh.

Naupang: Pawi hle mai.
(An ngawi dun vang vang a)

Naupang: I ṭap nasa thei awm mang e.

Nu valai: Engtin nge i hriat?

Naupang: Hmanni khan ka damlo vak mai a. Anu chu a ṭap vak vak mai a. Ka thlem bang thei ṭawk ṭawk alawm.

Nu: Engtin?

Naupang: A nghawngah ka kuah a. Ka duat bawk a.

Nu valai: Engtin nge i duat a?

Naupang: 'Tian (A hmui tikumin 'muah' a ti a).

Nu valai: (A'n ngawi leh deuh a) A khawi laiah?

Naupang: A khawi laiah pawh... A chalah te, a biangah te. Tuin nge thlem bang ve ṭhin che?

Nu valai: (A'n ngawi leh rih a) Tu ma'n.

Naupang: I ṭap char char mai ami?

Nu valai: Aw.

Naupang: Rei deuh deuh maw?

Nu valai: Aw.

Naupang: Engtin?

Nu valai: 'Ti hian (Vawi hnih-thum vel a han inhnit a).

Naupang: 'Chuan i ṭap muhil ṭhak ṭhak zel ami?

Nu valai: Aw.

Naupang: (A'n ngawi vang vang a) I bulah chuan awm i la, ka'n thlem bang ṭhin tur che a nia.

Nu valai: (Nem diaiin) Ka lawm e.

Naupang: In inah chuan mi dang an awm ve miah lo ami?

Nu valai: Awm nang.

Naupang: (A han ngawi leh det a) Pinky pa chu?
(An ngawi dun leh rih a)

Nu valai: (Ngaihtuah vak mang loin) Kan bulah a awm ve lo a.

(An ngawi leh rih a)

Naupang: Mahni chauha awm chu engtin nge a awm?

Nu valai: (A han hawi kual vel a) A khawharthlak lutuk.

Naupang: Nilengin eng nge i tih ṭhin?

Nu valai: Zing lamah ka office a, tlai lamah ka lo haw ṭhin.

Naupang: 'Chuan?

Nu valai: Chu zawng chu a ni mai.

Naupang: Khawiah mah i leng ngai lo ami?

Nu valai: Leng ngai nang.

Naupang: 'Ngati nge?

Nu valai: Tu bulah nge ka len ang?

Naupang: Ṭhiannu i nei miah lo ami? Anu chuan a nei asin, Dr Chatterji a nia.

Nu valai: Nei miah lo.

Naupang: Ṭhianpa tal i nei em? Anu chuan Dr Sehegal a nei asin.

Nu valai: Aih, mihring chu ṭhianah ka siam duh lo.

Naupang: Engati nge?

Nu valai: (A'n ngawi leh rih a) Ka hlau a.

Naupang: Engah maw?

Nu valai: Min tina ang.

Naupang: (Hre thiam lo zetin) Mi tuin emaw a tina tawh che ami?

Nu valai: (A'n ngawi leh deuh a) Aw.

Naupang: Tuin?

Nu valai: Ka Pinky-i pain.

Naupang: I khawi laiah?

Nu valai: Ka thinlungah.

Naupang: Maw? A na viau em?

Nu valai: Na lawtawkkkk!!

Naupang: Tu hnenah mah i sawi lo ami?

Nu valai: Sawi e.

Naupang: Tu hnenah?

Nu valai: Court-ah.

Naupang: Engtin nge an tih?

Nu valai: Inṭhen mai r'u an tia.

Naupang: 'Chuan, tunah chuan i bulah a awm tawh lo a.

Nu valai: Awm tawh nang.

Naupang: Chuti chu i rilru a na tawh dawn lo tihna a nih chu.

Nu valai: (A han ngawi leh a) A hma ang tho khan a la na.

Naupang: (Mak ti takin) Tak tak maw?

Nu valai: (Hmel ngui tak chung hian a han nui lui sak a) Aw, thil mak leh hriat thiam har deuh chu a ni.

Naupang: (Phur zetin) A nih chu, a nih leh thil hriat har deuh ka zawt ang che aw?

Nu valai: Min zawt la.

Naupang: (A han ngawi deuh a, chutah a zai ta a) Ka pu chu in pakhatah a mu a, in dangah a ke a thluang a - chu chu eng nge le?

Nu valai: Eng zung.

Naupang: (Phawk hra hian) Chuti maw? ?ha lutuk. A dang leh aw?

Nu valai: Min han zawt leh la.

Naupang: Lal fapa te reuh te, thawmhnaw sang tel hak thuah.

Nu valai: (A nui sak a) Kha, chawhmeha an telh ṭhin ang kha.

Naupang: Chu chu eng nge?

Nu valai: Purunsen.

Naupang: (A'n ngawi vang vang a) A ṭha e. Ka zawt leh ang che.

Nu valai: Min han zawt leh la.

Naupang: Lalnu pakhat, ṭhutthlenga ṭhu, mei alh hmuam, a bula tui awm.

Nu valai: Tuibur.

Naupang: (Beidawng takin) A..., i lo hre vek a nih hi. Tuin nge hrilh che? Pinky-i'n ami?

Nu valai: Aw.

Naupang: Hetiang thil har deuh deuh hi a hre ?euh ami?

Nu valai: Aw, a hre hnem lutuk.

(An han ngawi dun leh a)

Nu valai: A nih, ka zawt ve ang che aw?

Naupang: (Phur takin) Aw le.

Nu valai: Hmun lia ṭhena hmun thum thi vek, hmun khat chiah dam eng nge?

Naupang: (A han ngaihtuah ngial a. A phun mial mial a.) Hmun lia ṭhena hmun thum thi, hmun khat nung chu... (a han ngawi vang vang a) Ka hre ngang lo. Ka tlawm e. Nangma'n min han hrilh mai teh.

(A reh deuh vang vang a)

Nu valai: Hringnun hi maw le..., chuan a tawp tawh mai a ngai a ni.

(Phone biakfung chu a dah ri nghal rak a. Naupang te chuan mak a ti em em a. Dawhsan pindan pahnih chu a thim ve ve a. Dawhsan hnung lam pindan chhungril aṭang chuan traffic-ho thawm a lo chhuak a. Chanchinbu zuartu pakhat aw chuan lemchanna in chhung chu a khawk rum rum a - "Vawiina chanchin thar chu - nu valai pakhat chu muthilhna damdawi eiin amah a intihlum. Vawiina chanchin thar chu - nu valai pakhat...,") (29th Oct., 2020 LTM)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)