LUCY----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

LUCY----Zualtei B Zualtei

Unread post by Zualtei B Zualtei » November 27th, 2020, 10:18 pm

LUCY
(Thawnthu tawi)

"Ka ngai lutuk che... " Tiin ka bulah chuan ka thut tir a. A darah kuahin a kut chu ka hum vang vang a. A taksa chu a vawt thler a..

"Min lo hmuah ka ring a nia.. " Titau âw lek leka ka tih chuan a nui suk a. Ka mitah tak rawn melhin a kut vawt thler chuan ka biang a rawn dawm a.

"Tihpalh aw.. Vawiin chu ka buai lutuk a. " A ti zawi sap a. A âw chu ka hriat fo hnu ni mah se mawi ka la ti reng.

"Min lo call thei a, nih loh paw'n msg tal pawh mahse engmah I rawn sawi bawk si lo. " Ka ti leh a. Vawiina a awmdan avang khan ka lungawi zan lo a ni.

"Pawi ka ti lutuk. Harsatna sawi chhuah theih si loh ka nei a.. "Tiin ka darah a lu a nghat a, eng nge a harsatna chu zawt chiam mah ila 'Sawi chhuah theih loh.. ' a tih tawh chuan a sawi chhuak dawn lo hrim hrim. Social worker a ni a, a hna hi hahthlak ka lo tiru hle thin.

"Min duat lo si.. " Ka tih leh chuan ka biangah a rawn fawp thut a. Ka nui sak. A ni pawh nui hak hakin ka darah bawk chuan a lu a nghat leh a.

"Ka duat tawh viau ang che. "

"I dam tha tawh chiang maw... " Tiin ka ban chu a chul heuh heuh a.

"Âw, khatiang accident tenau avang mai maiin ka na thei hleinem. " Kan in chung zawl atangin ka tla sual palh a, keimah tak phei chuan ka tlak dan leh ka tlak lai ka hre thei lo mahse ka chhungten inchung zawl atanga ka tlak thu an sawi miau sia. Ka ke ruh a khi deuh tih loh chu na dang ka nei lo. Ka lu erawh a na thin a, a nat lai tak hian a na ut ut a, a reh leh hmak zel thung.

"Mahse tinge I phone I off tlat a. Nichin lawk pawh khan ka rawn call nasa lutuk che. "

"E, ka sawi theihnghilh tep alawm le. Ka phone ka tibo daih alawm.. "

"Ava zia love... " Tiin ka kuah nghet sawt a.

"Engtinnge helai hmunah hian ka awm dawn tih i hriat a.. "

"Ka hre bik lo. Ka muhil thei lo a, ka ngaihtuah reng che a, chuan helai hmun hi ka mitthlaah ka hmu sek bawk a. Mak deuh chu maw.. Nangmah hian min ko tlata hriatna ka nei bawk... " Ni e, a mak a ni. Lucy âw kha ka hre chiangin ka hria.

"Khawnge i bike..? " Lucy chu a hawi kual a.

" Ka bike ka hmu zo lo. Ka nu leh pa kaihthawh chi an ni si lova, tun ang zan tlaia ka chhuah an phal dawn lo hrim hrim. Taxi in ka lo kal tawp alawm... "

Thu ho mai mai sawi dunin chu lai hmunah chuan kan thu reng a, October Thla eng fiah kak hnuaiah chuan ka bula hmeichhe thu kut vawt thler chu ka vuan nghet hle a. A bula ka awm reng chung hian kim lo riaua inhriatna ka nei erawh mak ka ti viau.

"Ka fawp chak che.. " Ka ti sep a. Min rawn melh chhoin a maimitchhing a. Kun hniamin a hmui chu ka fawp ta a, vawi tam ka fawh tawh thin hmui kha a ang tlat lo. A vawt thler a, thlasik khaw vawh lai pawha lum reng thin kha a ni si a mahse ka tan erawh ka hmangaihi hmui a nih ang takin a hlu hle thung si.

"Nu, khawnge ka bike hi.. " Chaw ei lai chuan ka nu ka zawt a. Ka bike ka sawi rik ruala ka pa a va melh zawk chu ka hmu hman. Anni hian min thuhruk sak em ni le. ? Chu zawng ka ring chiah bik si lo.

"A chhia a.. " Ka nu chuan a ti sap a. Min en loin a kun daih a.

"A eng nge chhia. Ka bike chhia engtinnge ka hriat loh theih... " Ka ti chang fak a.

"Khalh ka zir ve chhin a, ka tluk pui alawm mawle. Ka thianpa workshop-ah ka dah ta ngawt a nih kha.. " Ka pain a tih chuan ka nui huk. Zirtir ka tum laia duh ngai lo kha ka awm loh lai kherin a lo zir vel a. A va ho tak e âw...

"Chutiang te chu tha deuhin sawi mai tur alawm. Keipaw'n ka zirtir thei reng che a, nakinah kan zir tha dawn nia.. " Tiin Behlawi chu ka suak a, ka nu bai chu tui tak a ni. "E, Nimin khan Lucy kha a dam tha lo in ti sia, a dam tha reng alawm. "

"Maw... Lucy I hmu em ni? " Ka nu mitmenga mak tihna leh a âw lawi zet chu mak ka ti ve lehchhawng a. Ka pa pawh chuti tho.

"Âw, nizanah kan inhmu alawm.. A hnaah a buai deuh thu a sawi a. " Ka nu hmel chu a var nghal pap pap a, engvanga chutiang hmel chu pu nge maw a nih le..

"Âw a nih chu. Kan lo hriat sual aniang e.. " Tiin ka pa chuan ka nu chu a nuih a. Ka nu pawh harsa tih hmel takin a rawn nui ve sen sen a. An awmdan hi ka hrethiam lo e a. Chaw eikham chuan ka room-ah lutin hla ka ngaithla a, ka guitar nen ka zai tlut tlut bawk.

Ka taksaah na sawi tur ka nei tawh lo a, mahse Doctor thurawn angin ka hna erawh ka la zawm ta rih lo. Inah ka tawm tlawk tlawk a, ka nuin min vil deuh chawt bawk. Lucy erawh ka hmu khat hle a, hman zana kan inhmuh hnu khan vawikhat chiah kan inhmu leh a, kan inah ka nu bazar hlanin a lo kal a, a awm rei lo lutuk kha ka titau lek lek a ni.

"Zanah ka lo leng ang.. " Ka tih khan min hnial tlat a.

"I dam tha rih lo em mai.. " A ti deuh tlat a, chhuak tam lo tura min duh thu a sawi chhen bawk. Ka ngaih ang hian min ngai ve lo nge maw ni...

"A tha alawm... "

"Bawiha, tau lo la. Dik tak chuan chhungkuaah buaina neuh neuh kan nei a, lo kal rih lo la tih ka duh vang a nia. " Inthlahrun hmel taka a tih chuan a pa a rui buai leh tawh a nih ka ring a, kal luih ka tum ta bik lo.

"Biakpawh theih I ni bawk si lo. Ka ngaih hunah che engtinnge ni ang..? "

"Min ngaih hunah emaw min mamawh hunah pawh nise min hmu zel ang... " Tiin a nui sen sen a, kawngka thleng ka thlah a. Engtinnge ka mamawh hun chu a hriat ang tih lam ka ngaihtuah lova, a insawi ang takin ka mamawh hunah leh ka ngaih hunah chuan a awm zel dawn tih erawh ka hre chiang viau lawi si.

Ka nu hnena Lucy lo kal thu ka sawi chuan mak a tih leh hmel hle a mahse a rei lo thung. "Tinge min lo nghah loh a.. " a tih chuan "A hna hi lawm... " ka ti let vat a. A hna a hmangaih lutuk hi chu ka hua a ni.

Zan khat chu ka khua a sik bawrh bawrh a, ka lu a na ut ut bawk. Tlangval puitling ka ni ve tawh a, ka nu leh pa tibuai lem loin nachhawkna ka ei a mahse min chhawk thei lo. Ka sa hat hat a, ka khur beuh beuh tho bawk si. Ka awmdan chu a hrehawm lutuk a, chil lem pawh harsa tak a ni. Ka puan sin lai chu ka hmer ngawt ngawt a.

Ka room kawngkhar ri rek ka hriat chuan harsa tak chungin ka meng lui a. Lucy hmel ka hmu zawm nghal zat.

"Bawiha.... A na viau em? " Tiin ka lu chu a rawn hmet a. Ka khumah chuan thuin puan pan te hian ka chal chu a rawn dep a. Engtinnge a rawn luh a, engtik khan nge puan pan te hi a rawn ken luh ka hre lo a ka ngaihven hman hek lo. Ka bula a awm chu ka lawm a, tawk ka ti viau. Thil tam tak ka ngaihtuah peih vel lo e..

"Na lo e... " Ka ti chhuak hrawih a. A kut chuan ka lu chu a hmet kual vel a, maimitchhingin ka dawh mawl tawp a. Reilote hnuah chuan ka na zawng zawng chu a reh nghal hmak mai.

"Ava mak ve... " Ti sapin ka meng a, ka bula thu hmeichhe hmeltha zet chuan min lo nuih sen sen reuh a. A inrin hmain ka khumah chuan ka pawt thlu thlawp a, a kawngah kuah nghalin puan chu ka sin tir nghal a. A taksa vawt thei lutuk hi a mak.

"Hei... I nu te an lo chho thut ang e. " A tih chuan pawisa lo zetin ka kuah nghet zual sauh a. A rim tui tak chu ka hip veng veng a.

"Lawk, engtinnge I lo kal a.. " Ka kuahna phelh chuang lo chuan ka tizawi sap a.

"Zawhna min zawt loin min kuah tawp rawh.. " A tih chuan ka nui suk.

"I dam tha lo em ni..? " Minute sawm vel ngawi renga kan mut hnu chuan ka zawt leh a. Ka mitmengin a hmel chu ka en a, a maimitchhing reng a, muhil tih hriat tak hian a thaw sak sak a. A mit bul vel chu a dum deuh a, a biang te lah chu a ki lek lek bawk a, a vun lah a dang lep reng bawk si. Kei ai mahin a dam loh hmel zawk. A hmui sen hiam thin kha a duk deuh ruih a, a taksa pawh a la vawt thler reng tho. A biang chu khawihin a hmuiah ka fawp zeuh a....

Lucy nen hian thianghlim takin kum 2 kan inngaizawng tawh a. Khum khatah pawh vawi tam kan mu dun tawh a mahse kan la chesual eih lo thung. He hmeichhia te reuh hian Biakinah Nupa kan nih hma chu Nupa nun hmang lo tur in thu min tiam pui a, chu kan thutiam chu kan la vawng reng a nih hi. Engtikah emaw chuan ka nupui a la ni ngei ang...

Ka mit ka men chuan ka room chu a lo eng uar tawh a, ka bula mu pawh a lo awm tawh lo. Ka nui suk a, zankhuain ka bulah a mu a, zingah min kai tho loin a kal leh daih si. Mi hi a thawng reng mai a.. Tho chhuakin ka inphih fai a.

Phone thar leina tur a khawl ve mek thu a sawi a, biakpawh theiha a awm lo hi ka tuar ber. Puih ka tum lahin a duh der bawk si lo. Inah ka awm tawp a, thian ka nei vak lo bawk nen mahnia awm tlawk tlawk a ni tawp mai a. Ka ning tawh takzet. Kan inah amah zawk a rawn kal zeuh zeuh, keimaha ka awm lai tak hi a hre thei ka ti viau bawk. Ka ngaihtuah veng veng lai tak te hian a rawn lang a, a insawi ang takin ka mamawh hunah a awm chat zel. A mak zawk ngawt mai.... Khuanu ruat dik tak kan lo nih ngei dawn hi.

"Ina awm a tha zawk asin.. " Ka nu chuan a la ti ngang ngang a, mahse zui luih ka tum tho. Kawrlum ka ha a, kawngka bulah chuan ka ding ran a. A bazar bag ak chung chuan choka atangin a rawn chhuak a..

"Khawi hmunah mah pen kawi a theih loh ang... " Ti nghutin a chhuak nghal a, a hnungah ka zui ve nghal bawk. Tlangvalina nu te bazar zui daw daw chu ka zah tho rualin ina awm ka nin tawh em avangin ka zak duh lo lui ta zawk a. Mahnia chhuah an phal tlat hek lo. Hahthlak hian...Bazar boruak te pawh ka hip khat ta alawm.

Chawhmeh chu a en kual vel a, a lei apiang chu a bazar bag-ah chuan a khung zel a, keiin chu bag chu ka khai ve thung. Bazar hnuai lamah chuan chhuk leh a tum a, ka kal ve peih tawh loh avangin gate bulah chuan ka lo nghak thung a, boruak ka zo meuh loin ka hria...

Chutia ngawi renga ka din lai chuan Phaia ka awm laia ka thianpa Vla ka hmu thut a. Bazar a ni tih ka ngaihtuah hman tawh lo.. Ring tha tawkin "Vl.. " ka ti vak a. Min rawn hmu ve nghal zat bawk. A nui sawng sawng a, kawng kanin ka dinnaah chuan a rawn ding chawpchilh ve nghal a.

"Kha i tha maw....? " Tiin kan inchibai a. Kan inhmuh lohna a rei tawh hle mai.

"Aw, tha e.. Nang zawk? Engtikah nge i rawn haw chhoh a.. "

"Kar hmasa khan ka lo chho a. I accident tih te ka lo hria a, i tha tawh takmeuh maw.. " Tiin min melh vung vung a.

"Aw, tha e.. Accident tenau alawm. "

"I fiamthu em ni..? " Tiin min melh a. A hmel lah chu a thutak run lehnghal. A eng ber chu nge ka fiamthu anga a hriat le..

"Eng chu maw.. " Ka ti sap a.

"A.. I that chuan a tha e. Ka kal a ngai tawh a.. Kan inhmu leh dawn nia. E, chuan Lucy chunga thil thleng kha pawi ka ti lutuk.. " Ti nghutin a in her a, a tlan nghal daih a, eng nge maw a hriat ni... Lucy a sawi tel lehnghal a, a a thil tha lo tih a la sim lo aniang e...

"Kan haw thei e.... " Ka nu. Taxi pharin kan in lam panin kan haw ta a, ka chhuak ta kher kher chu ka inchhir ru viau. Ka lu a na bur mai. In kan thlen rualin ka khumah ka let thawk a, ka maimitchhing vang vang a.. Vla thusawi ka hriat chhuah rualin ka meng kawk a. 'Lucy chunga thil thleng kha pawi ka ti lutuk.. ' a ti a nih kha.

Ka taksa a na ut ut a, ka ruh te thleng hian a na mai. Ka mit chu a rit bur a, ka meng hlei thei der lo. Ka chhevela thawm ri nawk nawk chu ka hria a, ka hnar fing zet chuan damdawiin rim chu a hai lo kher mai.

"Kan hrilh mai dawn em ni...? " Ka pa âw thum bul chu ka hre thei a.

"Ni love, a hre tan mek e... " Chu âw neitu chu tunge a nih ka hre lo thung. Ka taksa chu a zawi ngiai a, ka mut a chhuak em em a, reiloteah chuan ka muhil leh ta veng veng a.

Ka harh leh chuan ka meng fiah thei tawh a, ka bula thil ngaihtuah muk hmel taka ka nu thu ngawi kar chu melh zeuhin tui ka duh thu ka sawi a.

"Bawiha... " Ka harh tih a hriat rualin tui min rawn pe vat a, min thut tir hnu chuan tui chu ka in khawlh khawlh a. Tui tui tak a ni. Cabin-ah ka awm tih ka hre zawm nghal zat.

"Engtinnge ka awm a.. " Tiin ka no chu ka dah thla a.

"Chaw ei tura rawn koh che ka tum a, mahse ka kaitho thei lo che a... Bazara ka lo hruai ve kher kher che chu a pawi ngawt mai. " Hrehawm tih hmel fe hian a ti sap a.

"Keimah alawm... " Ti sapin ka mit chu ka nuai a. Ka pa pawh a rawn lut ve nghal a. "Kan riak dawn em ni..? "

"Âw, zanin chauh a ni ang. "

"Nu, Lucy nu no. min lo pe.. " Ka khum bula ka phone chu banin ka ti a.

"Engatan nge... "

"Lucy biak ka duh. A phone a chhia a.. A nu no. kha ka nei thin reng sia, a bo daih. " A hma khan ka nei thin ngei alawm. Ka phone hi ka hmang rei ve tawh em a tin ni.

"Ih.. Bawiha, Lucy chu ka hrilh tawh alawm. A la buai.. deuh a. " Ka nu chuan a ti bah nuai a.

"Âw, a that chu.. "

"Nih, lo mu hahdam la.. Kan lo va chhuak lawk ang e.. " Ka pa chuan ka nu thu kun ngar chu kai thoin a chhuah pui a.

"Bawiha..... " A nui sen sen a, ka khuma thu turin ka mitmei a, a rawn thu ve mai bawk. A thawmhnaw hak chu uluk takin ka en a, ka mumanga ka hmuh tuma a thawmhnaw hak ngei kha a ni. He kawr mawi takah hian thisen a kai nuai a nih kha.. Ngaihtuah duh loin ka lu ka thing a.

"Dam lo tawh suh... " A mitmenga manganna rawn lang chhuak chu ka hmu thei.

"Um, ka bula i awm chuan ka dam.. " Tiin ka kuai mu a. Inhawitawnin kan inmelh kar a.

"I bula ka awm loh paw'n dam lo tawh suh... " A ti leh sap a. A mittui luang ngiai ngiai chu mak ti takin ka thlir a. Ka hruk hul sak nghal vat bawk.

"Hei... Tinge i tah a. " Ka tih chuan a thu chhuak thut a, a hmai hupin a tap khur ta hlawp hlawp mai. Hrilhhai zetin keipawh chu ka thu ve a.

"Lucy..... " Ti sapin a hmai a hupna kut chu ka lak thlak sak a, min en turin ka kuai dak a.

"Tinge.. Tinge a.. " Tiin a biangah ka dawm a, a mit chu a sen deuh ram a. A inhnit hlawp hlawp a. A biang ka dawmna kut chu rawn hum hnanin min en a.

"Khawngaihtakin, na tawh suh. " Ngenngawl zeta a tih chuan ka awmah ka kuah bet hle hle a, a lu chu ka chul heuh heuh bawk a.

"Ka na tawh hleinem... "

"Engtinnge hetiang chuan ka kalsan theih ang che.. " A tih chuan hre thiam lo zetin ka la hrang a.

"Min kalsan maw.....? " Tiin ka melh a.

"Âw, ka kal a hun tawh a ni. " Rilru nat hmel taka a tih leh chuan ka hrethiam tawh hlawl lo. Lucy hian min kalsan a tum em ni?

"Khawiah nge i kal ang a? Eng nge i thusawi hi a awmzia.. "

"Bawiha, mumang ram atanga i harh hi a hun tawh takzet... " Tiin a tho a, vawikhat mah rawn lehhawi tawh lovin room chu a chhuahsan a. "Lucy.. Kal suh. " "Lucy... " Tiin ka au zui lawm lawm a, thawh ka tum chuan ka thei der si lo. Ka khumah chuan char beh ang maiin ka tang nghet hle a. Mittui tla zawih zawihin Lucy chu ka au lawm lawm a.. "Lucy..... "

"Bawiha... " Ka luah chuan tu emaw hian a rawn sawi dat dat a, ka harh rualin ka nu hmel ka hmu nghal zat. Ka nu chu mak ti takin ka en reng a, Lucy kha... Ka thu chhuak hlawl a. "Khawnge Lucy..? Khawnge a kal..? Khawnge Lucy kha..? " Tiin ka nu chu a banah ka chelh a. Ka sawi deuh nawk nawk bawk.

"Bawiha, inngaihtuah chiang rawh.. "

"A awmna chu min hrilh mai rawh... " Thutthleng seia Lucy nu thu ka hmuh rual chuan tho vutin ka va pan a.

"Khawnge Lucy a awm...? " Ka ti vin hrawk a. Ka nu âw vin tak ka hre nghal bawk. Lucy nu chu a hmui hupin a tap khur hlap hlap a, a awmdan tehhrep chu...

"Nizanah Lucy a lo kal a, chuan min kalsan daih. Khawnge a awm...? " Ka ti leh nghut a. Lucy nu chu a tap nasa zual sawt a.

"Bawiha.. Duhtawk tawh rawh. I chhun mu i harh chiah a nih hi.." Ka nu chuan ka banah hmer vakin min vin thak a. Hetiang em ema ka nu thinrim hmel hi ka la hmu ngai lo.

"Ka kal phawt ang e... " Lucy nu chu a chhuak nghal a. Ka nuin a au zui a, a zui chhuak ve nghal a. Keimah chiahin ka ding ngawi kar a. Khawnge Lucy a awm..?

"Lucy.... " Tiin ka au lawm lawm a. Ka room chhuahsan tuma kawngka ka pan lai chuan Doctor leh Nurse hi an rawn lut a, ka nu leh pain an rawn zui bawk a..

"Lucy ka zawng dawn... " Ti nghutin room chu chhuahsan ka tum a. Ka pa chuan min rawn chelhbet a, tawng tuma ka an zuau lai chuan ka ban a thip zawk a, ka taksa a zawi hnawk a. Ka mit chu a rit bur a, ka meng peih ta meuh lo... 'Lucy.... '

~Anywhere you are, I am near.
Anywhere you go, I'll be there.
Anytime you whisper my name, you'll see.
How every single promise I keep.
Cuz what kind of guy would I be.
If I was to leave when you need me most.

What are words if you really don't mean them when you say them..
What are words if they're only for good times, then they don't.
When it's love, yeah, you say them out loud, those words. They never go way.
They live on, even when we're gone.. ~

"He hla ka ngaihthlak hi chuan ka na vawng vawng zel... " Titu Lucy chu hnaih ruakin ka fawp zeuh a.

"Tinge a... " Tiin a kut chu ka hum a.

"A phuahtu hmangaihna ril zet leh rinawm tak hi a mak em a ni. Mihring hmangaihna atan chuan a ropui mah mah... "

"Ka hmangaihna pawh hi a nep bik chuang lo ang.. " Tiin a kawngah ka kuah a.

"Lo intehkhin leh ta.. " A pen ken lai chuan ka chalah a rawn kuk fawk a. "A na.... " Ti hlukin ka chal chu ka khawih a.

"Min kalsan ang em? " Chhanna beisei tih hriat takin min melh kar a.

"Engtikah mah... " Tia ka chhan chuan a nui sak a. A ha var rual thap chu hmuh nuam tak a ni.

"Keipaw'n... " A ti ve sap a.

"Tiam rawh. Engtikah mah min kalsan ngai lo ang tih hi. Mangtha ti lo phei chuan i kal tur a ni lo tawp.... " Ngenngawl zeta ka tih chuan a lu a bu nghauh nghauh a.

A thim mup a, a vir muai muai a, boruak hahdam zet chu a lo inthlak ta hlawk a.

Kawngpui zau nuam takah chuan bike chak zetin ka khalh a, ka hnunga thu chuan ka kawngah nghet zetin min kuah bet tlat bawk. Kawng a mam tha bawk a, nuam fia fia tak a ni. Ka hnunga thu chuan "Bawiha, tlan muang deuh rawh.. " A rawn ti lang lang a. A thusawi chu ngai pawimawh lo zetin ka speed chu a ngai reng a. "Bawiha... " A rawn ti leh a. Ka la ngaihsak chuang lo. A aia chakin ka tlan pui thut a, a rak ring teh e... Ka nui hak hak a, kan din hunah engtin tak min ti ang maw...

"Bawiha... " A rawn tih leh chuan ka va lehhawi zeuh a, chutah "Kawng en rawh... " Hlauhthawn hmel zet hian a ti vak a. Hmalam ka hawi rual chuan Truck chak zeta rawn tlan hi ka hmu nghal a, horn a ri tuar tuar a, thil ri chawrh avang chuan ka harh chiang hle....

Kawngpuiah chuan ka mu hlawm reng a, ka mit chu harsa takin ka meng a, ka thut chhuah rual chuan ka bike sawi chhe vek chu ka hmu hmasa ber a. Truck chu kopang suin a ding reng a. Thingkung bula hmeichhe thisenin a chiah piah nuaia mu hlawm reng ka hmuh chuan hmanhmawh takin ka tho chhuak a. Ka va pan vat a. A hmel ka hmuh rual chuan ka kâ ka hup tawp. Lucy a ni. A mit a meng kar a, a khap eih lo. A landanah chuan nunna nei hmel a pu tawh hauh lo. Khawih tumin ka thu hniam a, a taksa vawt thler ka deh rual chuan ka ding nghal awt.

'Mumang a nih hi. Ka harh chhuah a ngai.. ' tiin ka phun sep sep a, khawvel chu a vir ta lo emaw tih tur khawpin a reh duk a.

'Lucy a ni lo. Ka mumang a ni.. ' tiin ka lu ka dawm a.

"Bawiha, mangtha le.. Ka hmangaih che. " Ka beng bulah chuan a rawn phun sap a. Lucy thingkung bula mu hlawm reng chu a ral riai riai a. Ka hmuh lai ngeiin a bo daih. Nilo, a theih loh... Lucy!

Ka au chhuak thawt. Thaw hlawp hlawpin ka thu a. Engkim mai chu ka hmaah fiah taka tihlan a ni ta.. Lalpa!!

Hmanhmawh taka thoin ka khum bula chapal chu ka rawlh thawk a, room chu ka chhuahsan nghal. Pawn lam chu a thim khup tawh a, in tinin varandah light an tieng tawh bawk. Ka hmaa kawng chu ka zawh mawp mawp a, darkar 1 chuang hah hre lo leka ka kal hnu chuan ka ding chawt a. Thlanmualah ka awm.

Thlan tam tak kalpelin step chu ka zawh thla zel a, thlan thar lam ho din khupnaah chuan ka kal phei a. Thlanlung Kraws vara hming inziak ka hmuh rual chuan ka ip chawih...

'Lucy Zodinpuii
Kum 24

Thihni 10. 9. 2020'

Ava hrilhhai thlak tehlul em.. Ka mittui chu dan rual lohin a rawn luang chhuak a, ka thingthi nghal thlawp bawk. Thlanlung chu ka kuah vawng vawng a, "Lucy.... A theih loh" Tiin âwrawl chhuah meuhin ka tap hawm hawm a. Ava na em..!

Ka ring lo. October thla full moon-ah pawh khan kan pahnihin kan awm dun a nih kha. Vawiinah pawh ka bulah a mu alawm. Hmanni lawk paw'n ka fawp reng alawm. Ka khawsik zan pawh khan min rawn enkawl a nih kha.. Ka bulah a awm reng thin alawm.

A tak ni lo tur anga ka ngaihtuahna chuan thil tak tak zawk chu min hmuh fiah tir zel si. Lucy kha min mangtha tura lo kal a ni. Âw... Lucy. Ka hmangaih Lucy...

"I taksa vawt thler thin te kha nunna nei tawh lo maw a lo nih a..? Pialleia zal i taksa chuan vawt a va ti dawn tehlul em..! I phone vawi tam ka lo call thin kha engtinnge i chhan theih tehlul ang le.. I zalnaah a zal ve reng si a. I vun nalh tak thin kha ruahtuiin duhtawkin a sur hnan ta si a maw....?

Lucy, ka hmangaih Lucy, ka mangtha phal thlawt lo che. Khawngaihtakin.... I taksa dai rial pawh kha ka la thlahlel asin. "

October thla full moon ka thlir pui Lucy kha a tak ngei a ni. Ka Lucy....!

.... . ... ... .. .



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)