A HUN TAKAH----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

A HUN TAKAH----Zualtei B Zualtei

Unread post by Zualtei B Zualtei » November 27th, 2020, 10:21 pm

A HUN TAKAH!
(Thawnthu tawi)



ZUALTEI B





"I duh loh chhan ka hre duh. "

"Ka duh lo tawp chu a ni lo mahse... " Tiin thil thui tak ka ngaihtuah a.

"Kan inhmangaih a, kum 1 kan inzui tawh a, kan naupang chhe zawk zawk tawh hek lo. A eng ber chu nge inneih I duh loh chhan? "

"Thil dang sawi ang... " Ka ti hmuk. A ni pawh lawm lo tih hriat zetin a hawi sawn ve hmak.

A ni hi ka bialpa Lalrinfela, kan bial Pro Pastor a ni a. Kan naupan laiin higher kan kal ho thin bawk. Kum khat liam ta khan Reunion kan neihnaah kan inhmu leh a, kan naupan laia tawng tlem thei tak, hmeichhia be ngai miah lo kha a ni tih a hriat tawh lo. A nui sen sen a, a titi bawrh bawrh bawk a, chaw kan ei dawn chuan tawngtai turin an sawm a, sawisel miah lovin a tawngtai ve mai. Karkhat hnuah kan biakinah ngei a rawn inkhawm a, kan Pro Pastor thar a ni tih ka hre zui nghal zat. Inkhawm banah ka pa leh kohhran upa dang te nen kan inah an rawn inzui lut a, thingpui ka sem lai te chuan ka lai lutuk a, ka khur ru der der nia mawle.

'Dingpui, in in nei nuam hle mai.. ' a thingpui no chu choka dawhkanah a rawn dah a. Ka lo lai tlat pek a.

'I va ti lawmawm ve.. ' ka ti let ve mai. School kan kal ho laia a awmdan thin kha ka ngaihtuah let lo thei si lo. A hmel ka hmuh chuan mak ka la ti tlat a, hetiang em ema mihring a lo danglam thei hi thil mak ve tak chu a ni.

Kan class ho group-ah chuan kan nawi thei hlawm hle a, a tam zawkin nupui pasal an nei tawh a. A then an thlawi leh tawh bawk a, la nula tlangval chu kan tam tawh lo. Kei phei chu ka thianten 'Nula senior I ni ta mai hi mak ka ti.. ' tia min fiam zeuh zeuh an ching lehnghal a. Ka nui tawp zel. A hma kha chuan harh ve tak, lerh mawi tawk ka ni thin a, fiamthuin 'A spare I nei em? ' min ti thin hial. Tunah erawh mahni tawkah hna tha tak ka lo nei ve ta bawk nen, pasal neih chu sawi loh ngaihzawng takngial pawh ka nei peih tawh lo der chu a nih hi.

'Zanin tinge I inkhawm loh a.. ' ka msg dawn chu mak ti deuhin ka en a. Ka rilruin mihring danglam theih zia bawk ka ngaihtuah leh nghal zat.

'Ka hritlang a... '

'Ava mak dawn ve.. '

'Um, ka khuh puak a.. '

'Chu, silai hlauhawm chi I pai reng a ni maw? ' ka nui huk. Pathian thu hmangin min chhan ka lo ring ru deuh zawk a.

Tichuan ho te tein kan inbe chho ve zel a, Pastor e ti loin fiamthu a duh reuh a, a thu a nawi thei phian bawk. A hmel a fai vang a, biak a nuam bawk si a, a thusawi a ngaihnawm tel lehzel nen kan kohhranah chuan a tla na hle a, a bikin thalai huangah. Inkhawm pawh kan thahnem thei khawp mai.

'Pastor Rinfela hi a single i ring em? ' ka hnunga tawng thawm chu ka hre pha a.

'Ka ring. A awmdan hi a single ang.. ' pakhat zawk chuan a ti a. Biakin chhunga chutiang thu sawi te chu a, amah Rinfela lah chuan tang em em in Pathian thu a sawi mek bawk si.

'Yes, chance ka nei tihna.. ' pakhat zawkin a tih leh chuan ka ner sak. Eng nge kan thupui ber pawh ka hre tawh lo. Inkhawm banah chuan ka pa dam lo rawn tlawh kawi a tum avangin kan haw dun a.

'I va tum nasa ve. Tum sa in hmeh em ni? ' Nui chunga a tih chuan en duh lovin kawngpui chu ka bih ngur ngur a.

'Hey, tinge I thinrim em ni? ' ka tawng duh loh takah chuan a ti leh a. Ka la chhang chuang lo. Ka awmdan chu ka hre thiam bik lo, nichina ka hnunga thu te thusawi vel avang khan a chungah hian ka lungawi lo ve ngawt tihna em ni? Zantin inbe lo mah ila a khat mawi tawk chuan kan inbe ve reng thin a, keimahni ang tho hian hmeichhe dang nen pawh an lo inbe ve reng thin tihna em ni le?

'Dingpui.. ' ka ngaihtuahna atang chuan harh thutin ka melh hu a. A ni paw'n mak tih hmel deuhin min en ve bawk.

'Eng nge I ngaihtuah a, ka be char char che a min chhang bawk si lo. '

'I single em? ' ka inrin hmain ka sawi chhuak thut. Ka kâ ka hup nghal. A nui suk a.

'Tinge chutiang te min zawh thut a..? '

'Biakinah khan ka hnunga thu ten I single an rin thu an sawi a, chance an neih thu te an sawi bawk a, I duh ve tho em? ' ka sawi chhuak vek. Ka zawt tawh ta sa sa... Ka tang tun a.

'I hnungah tunge thu tih pawh ka hre hleinem.. ' tiin a nui a. Kei erawh ka nuih a za hauh lo thung.

'Dingpui, ka awmdan hi I hrethiam lo tak tak em ni? ' a tih chuan hrethiam lo tih lantir nan ka lu ka thing a.

'Kei hian school kan kal ho lai atang tawhin ka duh tawh che.. ' ka meng bial kawk a.

'Min duh ve em? ' a tih chuan chhan ngaihna ka hre lo. Ka awmdan chu duh ve ang thoin ka inhria a mahse ka chiang ngam bawk si lo.

'I inpeih hunah min chhang dawn nia.. Zanin chu ka rawn leng lo mai ang. Pu Sanga chu naktukah ka lo kan zawk mai dawn nia. Mangtha le.. ' tiin a inher a, a kal ta a. Ka hawi chhuah chuan kan in kawtah kan lo ding reng tawh niin.

A tukah chuan phone hmangin keipaw'n ka duh ve tho thu chu ka hrilh ta a. Ka tihsual loh ngei beiseia chhang ve ka ni.

Mahse vawiinah erawh dinhmun khirhkhan takah ka ding thung si.

"Kan tawp zawk mai dawn em ni? " Inneih ka duh loh thu ka sawi atanga karkhatnaah he thu hi a sawi a, sawi tur ka hre lova, ka melh tlawk tlawk ringawt.

"Chu chu i duhdan em ni? " Tiin ka zawt let ve a. Hmeichhe chapo leh induhtawk tak ka nihna kha an la bo zo vek bik lo tih ka hre thar leh bawk.

"Ni love, mahse nupui neiha chhungkaw din ka chak ve tawh a, ka neih ngai loh chhungkua chu din ve ngei ka duh a mahse ka neih duh ber nang erawhin min neih tumin rilru i la seng chhin ngai bawk si lo. Kan pahnih tana tha tur zawk a nih ka ring.. "

Chu thu chu kan tawpna a ni ta. Chumi ni atang chuan kan kawng a hrang ta a. Ka tuar viau naa nula senior tih takah ka lan chhuahtir ngai lem lo. Kan pastor a nihna angin kan inah chuan a rawn chuangkai leh fo va, a rawn kal chang chuan chhuanlam eng eng emaw siamin room-ah ka tawm bo san thin. A ni pawh a hmelah emaw, a cheziaah pawh ni se danglamna hmuh tur a awm lova. Pastor a kohhran mite ngaihtuah tak kha a la ni reng. Min biak a hreh lova, kei erawhin a ni biak ai chuan inkhawm thulh hial pawh ka thlang zawk zel si.

"Dingpui, room-ah lo lut tlang mai rawh aw.. " Sitting room a Rinfela leh Seni thu dun chu melh zawkin U Rama room-ah chuan ka lut nghal a. U Rama nen hian kan hnathawhna a inang a, zaninah hian eng emaw tih dun tur kan neih avangin an inah ka kal a. Seni leh Rinfela titi a, nui dun ka hmuh chuan ka thinlung chu a na ru viau.

"Seni hi engtik khan nge a lo haw a..? "

" Nimin piahah.. "

Seni hi Missionary a ni a, a hmel a tha a, nula fel tak a ni bawk. A ni nena tehkhin ralah chuan engah mah ka tluk lo. A hmel a tha a, a pian a nalh a, a fel em em a, sawiselbo tih hiala an sawi thin a ni. Nichinah khan Rinfela khan min rawn melh ve zawk ngei a mahse min en rei lo. Seni bawk a en leh nghal a nih kha, chu tak chuan a ni min tina zual ni.

Darkar khat vel hnu chuan kan zo thei hram a, U Rama chuan min thlah turin min zui chhuak a.

"Nu, khawnge Seni te kha.. " Ka rilrua awm hria niawm taka U Rama'n a nu a zawt chu ka lawm ru viau.

"Pastor nen khan tawngtai tur an nei a, an inzui chhuak ta a nih kha. "

In ka thlen rualin room-ah ka lut a, ka khumah ka bawk nghal thlawp. Ka mittui a rawn luang ngiai ngiai a, ka awm zawn chu a na em em a. Ka tawt ut ut bawk. Rinfela hlim hmel kha.. Ka tel lo hian a lo hlim zawk ngei a nih hi.

"I va inkhawm khat ve.. " Dawra Cake ka lei lai chuan a rawn lut ve a.

"Nia, tunlai chu ka buai deuh a. " Ka nui lui sak a, pawisa pein min biak zui leh hmain ka chhuak nghal.

"Bawihte, tinge hetia I awm le.. I pa phei chu I awmdanah hian a ngaihdan a ni vak tawh lo a nia. " Ka khumah chuan ka nu chu a rawn thu a, kei erawhin ka laptop ah thil ka type mial mial thung.

"Nu, a rei tawh lo ang... " Ka ti sap.

"Pastor Rinfela vang a ni tiraw? " A tih chuan ka thil type lai ka chawl dat a.

"I nu ka nih hi. I awmdan te hi ka hrethiam ve vek asin. Engvanga inthen nge in nih? "

"Nu, a chanchin sawi ka duh lo.. "

"Min hrilh la, I thawl zawk ngei ang. I nu hian I harsatna chinfel pui dan tur che ka hre lo ngai em ni?? " Dam diaia a tih chuan ka ngaihtuah a, a sawi dikin ka hria.

"Inneih a duh tawh a mahse ka duh ve si lova. Chu chu a ni deuh ber mai.. " Tiin ka laptop chu ka khup a, ka nu bulah chuan ka va thu a.

"Tinge inneih chu I duh loh a? I pa nen pawh hian I pasal neih hun hi kan nghakhlel tawh viau asin. Tu hmel hmuh te pawh kan chak ve tawh a, bakah Pastor Rinfela ngat phei hi chu makpa atan chuan duhthusam a ni asin... "

"Nu, I hrethiam lo em ni? A ni hi nei ta ila engtinnge ni ang... " Rilru pik tak chungin ka ti chhuak a.

"A eng ber chu nge I buaina ni a.. "

"Ka nei a nih chuan ka hna hi ka bansan a ngai ang a. Ka pa hriselna a pan em em a, a hlawh a tam bawk si lo. Ka nau te pahnih hi ka enkawl a la ngai alawm. Pastor ni lo se chuan neih hi hnialna chhan tur ka nei lo mahse Pastor a ni a, Pastor nupui chuan sawrkar hna a thawh theih si loh chu a nih hi. Engtinnge ka chhungkaw tana ka lakluh ve hi ka bansan phal mai bik ang.. " Ka sawi zawng pawh chuan ka ipik hluah hluah.

"Chuti chu I hna avang khan I hnar tihna a ni maw.. Keimahni min ngaihtuah luat avangin tihna a ni a.. "

"Nu, ka hna hi ka bansan thei hleinem. Mami hian zir tur tam tak a la nei a, Ruattea paw'n chuti tho. Tunah hian keiin pasal neiin ka hna hi bansan ta ila in phur a rit dawn lutuk asin. Engtinnge chutiang tur chuan ka kalsan theih ang che u.. "

" Bawihte, thil I ngaihtuah tam lutuk a nih kha. Vawiin nia hetiang dinhmuna I din theih chhan hi tunge? Pathian a ni asin. Pastor nupui nih hi I missionary ve na a ni thei asin. Tinge khawvel nun lungkham vang maia I hmaa Pathianin kawng tha tak a hawn sak che hi I thlauhthlak mai ang le.. Khawvel nun lungkham a, khawsak dan tur lungkham reng renga hringnun i hmang a nih ngai chuan i damchhungin lungkham tur i nei reng ang.. Ngaihtuah chiang teh aw.. " Ka nu thusawi chu ka rin loh lam daih a ni. Ka thutlukna leh ka ngaihdan te kha a dik tia min pawmpui zawk ka rin laiin chutiang chuan a lo ngai ve hauh si lo.

"Tunah chuan awmzia a awm tawh lo. " Seni nen khan an inngaizawng chianga rinna ka nei nghet hmiah tawh.

"Hawh.. Chaw I ei phawt ang u. Thil tam tak ngaihtuah hi a tul kher lo tih erawh i hre reng dawn nia. " Tiin a chhuak a. Ka ngaihtuahna a vak kual nasa viau.

"Eng nge ilo tih dawn.. " Ka hmaa ding mipa chu ka ti a.

"I pain counselling i mamawh deuhin a hria a, ka rawn lenchilh dawn che a nih hi. " Tiin a thu a. Ka nu leh pa an leng a, ka nau te lah inhnuai room-ah an awm daih bawk si. Kan pahnih chauha han awm chu boruak a tang ru ngat ngat hle.

"Dingpui, kan inkar vang hi em ni kohhran lam i thlah tak tlat chhan hi.. "

"Ni love, tunlai chu ka buai ve deuh a... " Pangngai thei ang berin ka ti a.

"Dawt sawi i thiam lo em mai. " Tiin a nui suk a. Ka run tawk a tling viau.

"Ni e, nang chu hmeichhe dang nen hlim takin in nui leh thei nghal a, mahse keichu ka ni ve lo. " Ka ti chang fak a.

"Hman zana Seni nena min hmuh dun vanga chutiang ngaihdan chu pu i nih chuan i ring sual a ni. Nang lo hmeichhe dang ka la ngaihven eih lo.. Seni nen kha chuan Dam lo tawngtai turin kan insawm mai a ni. "

"I insawifiah a tul chhan a awm lo. " Ka ti hmuk a.

"I rilru natna kha thup tum eng ang mah la I thup seng mawlh lo a nih kha. Ka tel loin I awm thei lo tih hi engngatinge I pawm mai loh?"

"Chutiangin ka awm love... "

"I induhtawkna hi ka duh tak chu a ni thin. Tun chiah hi hun ka pe dawn che a, thutlukna chu I siam tur a ni ang. Inngaihtuah nan zanin hun I nei a, naktuk zingah chhanna min pe dawn nia. Ka hnena rawn kir I duh nge ni a, rilru na reng renga I hun kha hmanral I duh zawk.... " A sawi zawh chuan a ding a "Ka haw phawt ang e. Naktukah ka lo ngaichang ang che.. "

Ka muhil thei lo chu ka inlet sek a, ka harh tulh tulh mai bawk si. A tawpah chuan chhuatah chuan ka thingthi tawp a, 'Lalpa, ka damchhunga thutlukna pawimawh ber tur hi keimah mai chuan ka siam thei lo. Khawngaihin nangin duhthlan tur dik min hriattir hram rawh.. ' ka ti ngawt a. Ka khumah lawnin ka muhil ta a.

Ka fapa bible chang sawi lai chuan chhuang em em maiin ka en reng a. A pa nen chuan kan inmelh ru leh zeuh thin. Kan fapa chu kan chhuang dun hle tih kan mitmengah chuan a hriat theih hial awm e. 'Duhthlanna dik... ' tiin ka phun chhuak sep a.

Damchhung khawsak dan tur lungkham reng reng a ka hringnun ka lo hmang ral lo kha ka lawm a. A hun taka Pathian ka lo rawn kha ka lawm a, chhanna dik leh hlu ber min pek avangin Ka Pathian chungah hian ka lawm bang ngai dawn lo.

Ka hna chu ka bansan a, Pastor nupui ka nihna angin ka pasal chu ka tawiawm tlat a, ka sawrkar hna tha tak, thla tina sum tlem lo tak ka hmuh thinna hna ai kha chuan ka pasal tawiawmtu ka nihna chu ropui ka ti zawk a, a sum anga hlawhchhuah nei lo mah ila hmangaihna leh hlimna tam tak ka hlawh zawk si.

Ka hna bansanina a nghawng tura ka rin ber ka nau te paw'n an zirna chu Pathian khawngaihna zarah engtin emaw an zir chhuak ve ve a. Ka nu leh pa te pawh chaw ngheiin vawikhat mah an la awm hek lo. Tunah chuan a hma ai khan an khawsak a nuam ta zawk emaw tih tur khawpin an hlim a, an nun chu mi tam tak awh rawn a ni tawh zawk.

Ka pasal hnenah chuan 'Tinge min duh reng chung siin inthen kha I rawt a.. ' tiin ka zawt a.

"Mihring siamthatnan khawdur a ngai thin ang hian, thinlung mit tifiah tur pawh hian chhum chhah tak a ngai ve thin bawk a ni. Kan inhmangaihna hi khawvel khawsak nawm duhna vangin a chhe dawn lo va, a nghing dawn hek lo tih kan hriat chhuah phah a ni lo em ni..? " Tiin min zawt let ta daih zawk a. A kila mu kan fapa chalah chuan fawp zeuhin min rawn kuah a.

A tawp ta!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)