KA HMANGAIH (Among Us)----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

KA HMANGAIH (Among Us)----Zualtei B Zualtei

Unread post by Zualtei B Zualtei » November 27th, 2020, 10:22 pm

KA HMANGAIH (Among Us)
(Thawnthu tawi tak tak)




Zualtei B




"Ava mak ve aw..! " Ka nu chuan a ti vawng vawng a. Thil thui tak ngaihtuah hmel a pu bawk.

"Nu, eng nge a? " Kei mihring azawnga thuduh ber mai hian chu thil mak chu hre lo nih bik ka duh teuh lo. Ka nu chu ka thut hnaih sauh sauh a.

"Kan thenawm te in hnuai rawn luah tute hi mawle.. "

"Tinge? Tute nge a..? Eng nge a makna? " Ka ti leh zung zung a.

"I la hmu ve lo em ni? " Tiin min melh a.

"Hmu nang. Sawi vat... " Ka ti leh. A nui huk a, a fanu thuduh lutuk hi mak a ti deuh pawh a ni mahna.

"Pitar leh putar kum 55-60 bawr vel an nih saw.. An inru alawm. " A tih chuan ka kâ ka hup chawt.

"Nu, I ti tak tak maw..? " Mak ti lutukin ka meng bial kawk kawk a. Sap ho chu lo ni tase emaw, midang ka va hmuh phak loh chu ni tase ka la hrethiam maithei mahse hetah kan in bulah ngei tar lama inru an awm tih hriat chu mak ka ti ve thlawt.

"Tute nge ni reng reng? Khawi lam a mi nge an nih? "

"Ka hre lo. Kan khua chu an ni lo. "

"A van mak em em... "

"An inhmangaih ve hle a ni ang.. " Ka nu chu thlang lam a hawi vang vang a. Eng ang hmangaihna tak ni ang maw.. Ka ngaihtuahna a tikal thui leh viau mai.

Zan muthmunah pawh chuan thil dang ka ngaihtuah thei lo hrim hrim. Eng vanga inru ta mai nge an nih ang? A mipa emaw, a hmeichhia zawk pawh chu an hausa viau em ni dawn le? Ka rilru chuan kil tin a fang kual vel a, zing dar 2-ah pawh ka la meng kar mai. A tukah pawh chaw ka ei theih loh phah vek. Ka rilru ka sen nasat lutuk hian ei leh mut ka harsat hle thin a, natna ka neih phah lo chauh zel chu a nih si hi. Mahse thu ka duh em em reng tho si. Ava hahthlak thin em.

"Duati, hei hi kan thenawm pitar te chu va pe ve rawh. " A bai siam chu plate-ah a chhawp a, ka kal hrehna leh ka chakna chu a inzat vel awm e. Zawimuangin kan thenawm te in chu ka pan phei dat dat a, inhnuai chhukna step-ah chuan ka chhuk thla a, kawngka chu a inkhar thap a. Zawi tein ka va kik...

"Lo lut rawh... " Ka hmaa ding chu ka chhoh en ha a. A ni hi em ni pitar kum 60 bawr vel anga an sawi chu. A vun chu a ngo hle a, a sam pawh a buang deuh thlap. A hmai vun chu a chuar ve deuh tawh a, mahse chuar over a ni lo. A nuisang a, a hmelah chuan hlim hmel ka hmu thei hialin ka hria.

"Aw.... " Tiin zawimuangin an inah chuan ka pen lut a. An in chu a zim ve hle a, room chu plywood in an dang a, bungrua pawh an la nei vak loh hmel.

"Ka nuin hei chawhmeh pe tur che u in min ti a.. " Dawhkan te pakhat lo inhung veah chuan ka thil ken chu ka dah a.

"Kan va lawm ve aw.... " A hmel chu tha lo ka ti phal teuh lo.

"Eng nge ni a.. " Room atanga rawn chhuak pitar chu ka melh rang hle. A ni pawh a hmel a faiin a sang reuh hle a, Mizo putarah chuan a sa tha pawl tak a ni ngei ang. A sam chu a tuak ve deuh a, mahse chu chuan a tilang tha zawk mahin ka hria. Ka sawi thiam dan ber chuan pitar leh putar hmeltha tak an ni tih hi a ni tawp.

"Hei chawhmeh min lo suah a.. " Pitar chuan putar lam hawiin a ti a.

"Ava lawmawm ve aw.. " Putar pawh chu a hlim hmel viau. Thildang vak sawi tawh lovin an in chu ka chhuahsan a, step ka chhoh chhuah hnu chuan ka hawi let leh a, ka ngaihtuahnaah erawh thil tam tak a awm thung.

"Nu, ka thei tawh thlawt lo. Ka va leng mai teh ang.. " Tiin ka ding hluai a.

"A tih chi dawn em ni? An in vel pawh an singsa duh ve rih ang.. "

"Aih, nu, ka va kal tawp dawn... " Tih leh kawngka lam pan ka rual a. Nihnih tawp chu anni nupa ngaihtuah vang hian ka mu mumal tawh lo. Va kal a, va zawh tawp chu a tha berin ka hria.

An in step ka zawh thlak lai chuan ka zam thar thut a, let leh mai ka tum hman mahse ka inngaihtuah chiang a, ka kal tawh ta sa sa, a tawp ka thleng ngam tur a ni tiin ka han infuih leh rih a. Ka kal tlang ta...

Pitar nen chuan kan inhmachhawn ran a, a nui leh sen sen tawh a, ka zawhna erawh min chhang duh lovang tih ka hlau ru hle. Reilote hnuah chuan a âw a thian karh karh a, kei erawh ka lo thu mar sawt thung.

"I hre duh takzet a maw..? "

"Aw, i sawi hreh loh chuan hriat ngei ka duh. " Ka huaisenna zawng zawng sawm khawmin ka ti sap.

"Awle, a nih chuan ka han hrilh ang che. Keipaw'n insawi thawlna tur ka mamawh ve bawkin ka hria.. " Ka beng chu ka chhi ran a.

"Hun kal tawhah let vang vang phawt mai ang aw.. Kum 19 ka nih lai khan game pakhat ka atchilh deuh bur mai a, chu game chu Among Us a ni. Ram hrang hrang mite nen chuan kan khel ho thin a, thian zawn nan tak te pawh kan hmang bawk, chu game chu tlaivar lek lekin ka khel fo mai a, ka hriselna paw'n a tawrh phah fo reng a. A, ka hriselna hi a pan sa hrim hrim a, sikul pawh kal lovin inah ka awm tawp zel. Zankhat chu ka game khel chu ka crewmate te nen chuan kan khel chho map map reng a, rei tawk tak kan khelh ho hnu chuan WhatsApp group siam kan rawt ta a, kan siam ta reng a. Group-ah chuan 'Hi.. ' hi an rawn ti sap sap hlawm a, pakhat chuan "Hawh u, mahni tawng theuhin 'Hello.. ' ti ang u. " a rawn ti a. Midang paw'n an lo thlawp ve bawk.

An tawng theuh chuan 'Hello.. ' an rawn ti sap sap a. Keipaw'n Mizo tawng ngeiin 'Chibai.. ' ka va ti ve a. Ka msg hnuai chiaha 'Chibai.. ' tih rawn inziak ve kalh avang chuan ka meng deuh kawk a. A chhan chu zankhua deuh thawin game kha kan khel ho a, ka crewmate te zingah chuan Mizo dang an awm ve tih rin ngaihna ka neih hlawl loh vang a ni.
"Mizo i ni ve elo.. " ka va pvt a, a dp-ah chuan cartoon lem hi a hmang a. A hming ka en chuan 'Philip.. ' tih hi a inziak thung.

"Aw, ni e.. I ni ve zawk elo" A rawn ti let.

"Ni chiang lutuk tlat.. " Mizo ka nihna hi ka chhuang ve em a ni.

"Ka lawm.. " Tih hi a rawn thawn let a, a ngaihna ka hre lo viau.

"Eng thilah..? "

"Mizo ilo ni ve hi.. "

"Ava ho.. "

"Ho lo lutuk zawk.. " Ka chhang tawh lo. Ka phone chu off in mut tumin ka maimitchhing ta zawk a.

A tukah pawh nidang ang thoin ka games khelhah chuan ka bur leh ngat ngat a, a nuam leh tawh viau. Chawhnu lamah chuan ka out ve hram.. Chu pawh signal chhiat vang chauhin.

"Tinge I out daih a? "

"Signal a chhe lutuk a, tihngaihna a awm thlawt lo. I out ve mi..? "

"Aw... "

"Tinge? " Ka va ti leh.

"I out daih sia.. " A rawn ti kher. Ka nui suk. Kan game-ah khan min zui char char a, chat-ah 'Tinge min zui char char? ' ka va ti a. 'An thah che ka hlau.. ' a rawn ti a nih chu. Chu tawngkam chuan min khawih che dawt thei nia mawle. Chuan tihian ka out rualin min rawn be nghal bawk si.

"Mizoramah i awm em? " ka reply mai lohah chuan a rawn ti leh a.

"Aw, awm e, Aizawlah. Nang? "

"Awm lo... A nuam awm, hawina apiangah Mizo an kat nuk ang a.. "

"Khawiah nge i awm a..? "

"Delhi-ah.. "

"Lehkha zirin i awm mi? "

"Aih, kan chhungkuain kan khawsa. Delhi a piang leh khawsa kan ni a.. "

"Oh.. Nih chu.. Lo zin ve la.. " Eng nge ka rilruah awm ta ka hre lo, nidang zawnga midang chat peih ngai lo khan hepa hi ka be chak tlat alawm.

"Ka lo zin ang. Ka hmu chak che.. " Keimahin ka khi vur vur mai. Lo zin tak tak se ka ti takzet.

Msg pakhat vang mai maia min tinui a, min tihlim theitu mihring hi ka la tawng ngai lo. A danglam bik tlat. A hmel ka la hmu lo, a dp-ah pawh a thlalak a dah hek lo mahse mak tak maiin keimahah hian a awm tlat. Tichuan, zantin kan inbe ta a, Among Us lam a lang khat tawh hle. Kan pahnih chuan thu atthlak leh nawi pui pui kan sawi a, kan nui vak vak thin. Ka hlim a, ka chhehvela awm te titi ai ngawt chuan ka nuihpui tam zawk bawk.

"I dp-ah hian I pic hmang ve la.. "

"I hmu chak mi? " A rawn ti kher.

"Chak pawh ni chuang lo.. "Ka hmu chak a, hmu chak nih ka hreh bawk si.

" Ka'n hmang nghal ang e.. " A rawn ti ve leh mai a.

A dp chu ka ennawn sek a, a hmel chu tha lutuk tia sawi tur ni lo mah se a pa hliah hliah ka ti mai. A mitmeng zim deuh tak te chu a mawi a, a hmui chhah lam hret te lah chu hmuh nuam tak a ni bawk si. A sam chu a kir deuh bawk. A zuah buk vang pawh a ni maithei. Amah hi College kal lai a ni a, kei aiin kum 2 in a upa. Fapa mal a ni a, a pa hi Delhi a hnathawk a ni a, an chhungkuain tihian an khawsa ta zel a niawm e. Mizoram lamah chhungkhat hnai tak an nei lo bawk a, an rawn zin vak loh thu te pawh a sawi.

"Tinge nilengin i online loh a? " Signal awm ruala ka phone ka en chuan a msg hi a lo tlar dul a.

"Signal a awm lo char char alawm.. "

"Lily, ka duh chein ka hria.. " A msg chu ka chhiar nawn zing lutuk. A changin ka sipel a, ka chhiar nawn a, ka chhiar nawn leh thin.

"Nilenga biak tur I awm loh tawp avang khan ka mood a off nileng a, eng tih mah nuam ka ti lo. A tir atang khan ka ngaihsak che tih chu ka hria a mahse hetiang zawng hi chu a nih ka ring bik lo. Tunah chuan I tel loa nikhat lek awm hrehawm zia ka hre ta a, ka duh takzet chein ka hria.. "

Ka rilruah a cham reng thin a, zana kan inbiak loh chuan mut a har talh thin a nih kha. Ka vei ruk, a dp vawi tam ka ennawn a, a last seen vawi tam ka check thin khan min duh thu a sawi a, kei hian eng ang rilru nge ka put ve chiah hi le...

"Ava mak ve.. " Ka ti tawi tak.

"Mak lo. Mihring chu induh tur alawm kan nih. "

"Mahse kan la inhmu bawk si lova, vawikhat mah call in kan la inbe hek lo, text msg atang ringawta induh chu.. "

"Thil theih a ni alawm. Ka lo call ang che aw.. Chuan min lo chhang ve ang a. " Ka sa hat hat thei nia mawle.

"A ngai lo. A tlai tawh.. "

"Vawikhat chiah.. Ka lo call" A rawn call nghal. Ka phone chu ka khumah ka thlauh tawp. Ka pick up dawn a mahse ka zam bawk si. Ka kutzungpui chu zawimuangin ka tiche a, ka khur thei hialin ka hria.

"Hello. " A âw chu... Ka ká ka hup zawk a, ka blanket sin chu ka tham nghal nawk nawk bawk.

"Lily? "

"Um.. " Ka ti zawi sap.

"I âw a mawi lutuk.. " a tih leh phei chuan ka tuiral dawn tlatin ka hria. Ka off tawp a, ka kâ hupin ka au vak.

"I off daih a.. Min chhang tawh la, min duh ve tho em? " Ka kut a thlan dap a.

"Aw.... " Tih ka thawn rualin ka mit ka chhing vak.

"Yessss.... Ka lawm e. "

Kan induh ve ve a, kan inngaizawng ta a nih ka ring. Vawikhat mah hetiang lam la ngaihtuah ngai lo ka ni a, mipa hian kan rilru an la kawi ngai hlek lo. Tunah erawh Tu emaw, a hmel ka la hmuh loh, ka hmu ngei ang em tih pawh hriat loh mipa chu ka rilru ka pe pumhlum hmiah mai si a. Ka tih atan chuan mak ve tak a ni.

"Ka bialnu Lily.. " Ka no. a save dan min hrilh chuan lawm avangin ka nui vak.

"Engtinnge ka no. i save ve... " a tih chuan phur lutukin ka type a.

"Keima Philip.. "

Kan no. in save tawn dan vang mai mai pawh chuan kan hlim dun hle a, kan hlimna hi ava ho tehlul em.. Tleirawl inngaizawng tih takah kan nawi ru dun hle a, thik thu pawh kan pe chhe ve hle.

"Be tawh suh.. "

"Ka be ngai lo.. " Ka ti.

"In inah pawh len tir tawh suh.. " A rawn ti leh. Ka nui tawp, mi lo leng ve duh na na na lo leng lo tura tih thu awm hek lo. Kan in text laklawh laiin kan thenawm tlangval U Thana a lo leng a, thingpui lum turin min tir zui nghal zat a, chu ringawt pawh chu a lo haw leh hman a, huiham...

"Ka lo zin thei tep tawh.. " A msg ka hmuh rual chuan hlim lutuk vangin ka zuang vak.

"Tak tak maw? Engtikah.. "

"Thla lehah emaw chu aia hma pawh chuan a ni maithei. Ka la chiang chiah lo va mahse ka lo zin ngei ngei ang.. " Awi, ka hlim lutuk chu ka tap lo chauh. A no. chu ka hmet chhuak a, ka dial nghal. Reilote a rik hnuin a rawn pick up a...

"Hello.. "

"Ka HMANGAIH che... " Ka ti nghal. Lehlama mi chu a reh deuh a, a hnuah a rawn nui huk.

"Keipaw'n ka HMANGAIH che.. "

Ka hmangaih chiang alawm. Ka hmangaih thu hi hrilh ka chakna a rei tawh a mahse sawina hun tha ka hmu ngai lo va, tunah chuan ka sawi ta bawk, ka thawl huai mai.

Hmangaihna hi thinlung atanga chhuak a ni a, hmel mawina avang ringawta thleng a ni lo. Chu thil chu a tawngtu ka ni a, ka va chiang si em. A ni hi ka hmangaih a, a hmel hmuh emaw a taksa lum nghenchhan hmasak kher ka mamawh lo. Ka tan a hlu a, ka hun zawng zawng ka pe a, a tan pawh ka hlu takzet tih ka hria. Kan inngai em em a, inhmuh hlan mawlh chu kan nghakhlel thin.

Nikhat erawh a reh daih a, a last seen ka check zing malh malh hle. Nilengin a online ta lo. Ka awm a nuam lo zo a, ka be chak tawh lutuk chu ka khua a sik hialin ka hria. Zanah pawh chuan a la reh tlawk tlawk a, a tawpah chuan ka call tawp. A ri ral ral a, chhanna erawh ka dawng si lo. 'Vawiin chu a buai ve aniang.. ' tiin mut zai ka rel a, ka mu tui hlawl lo.

A tuk zingah chuan mit na urin ka tho chhuak a, ka phone ka ban nghal zat. Engmah a awm lo. Ka thinrim ru tun tawh a, tukinah tal hi chuan nimin lama min rawn biak loh avanga insawifiahna a lo awm thluah tawh ka beisei kha a ni a mahse a lo awm si lo.

Chhunah chuan ka call nawn leh ta tawp, ka ngai tawh em a ni. A ri leh ral ral a, a ring ral thak. Mahse ka beidawng mai lo. Ka call nawn tlut tlut a, a tawpah chuan a rawn pick a, ka thaw chhuak hawk..

"Tinge min lo biak loh..? " Ka tivin thak.

"Tunge i nih ka hre lova mahse he phone neitu hi ka bialpa a ni a, vawikhat mah rawn be tawh lo la ka duh khawp mai. " English fiah fai taka hmeichhe âw no takin a rawn tih chuan sawi tur ka hre lo.

"I fiamthu em ni? " Ka ti ban charh a.

"Hetiang thilah te ka fiamthu I ring em ni? Ka bialpa hian a lo be thin che a nih chuan kan chhiat zuai laiin a lo play ve mai mai che tih I lo hre dawn nia. Lo be tawh suh.. Nih mangtha" A off nghal. Ka khawvel vir lai chu a chawl ta emaw tih turin a reh duak a. Ka ngaihtuahna a buai vek a, ka mittui rawn tling ringawt te chu ka hrethiam hlek lo. Ka phone chu ka melh ngawt ngawt a, engkim kha dawt tihna em ni? Philip-a khan min lo play mai mai tak tak em ni? Mahse a tawngkam te, a nui ri te kha a lem a ni hauh si lo. Distance relationship ka rin loh thu ka sawi lai pawh khan 'Distance love hi a ropui zia leh a rinawm theih zia lantirtu kan la ni ngei ang.. ' a ti a nih kha. Kha kha dawt a ni tihna em ni?

Ka buai a, ka na takzet bawk. Chaw ka ei thei lova ka in thei hek lo. Ka mittui a luang ngiai ngiai reng a, ka thinlung chu a rum vawng vawng reng a. Ka chhungte pawh an mangang viau. Ka cher kawk kawk a, ka hmai te chu a ki lek lek thei hial a nih chu mawle. Hmangaihna chu kan hlimpui thin a mahse kan tahpui tak meuh chuan kha a mawina zawng zawng kha a awm tawh si lo. Ka hmangaih, ka hlimna ni thinina min bumna chu ka tuar a, bumna azawnga rapthlak ber a ni. Min hmangaih thu sawiin a nui a, lehlamah erawh hmeichhe dang kut a vuan a, pawm thiam harsa mah se a hmuh ngai loh hmeichhia ai ngawt chuan a hmuh phak leh a ban phak hmeichhia chu a hmangaih zawk ngei ang. Tunah chuan ka pawm a ngai ta. Min hmangaihtu tia inchhal kha a lem chauh a ni tih hi.

Thla sarih hnuah chuan palai hmel ka hmu hlawl a. Ka rin loh lutuk tak mai a nih avangin ka hamhaih viau. Ka chhungte chuan min rawn ve a, ngaihdan mumal ka nei lo. Ka thinlung chu a ruak a, mittui nena mut chang ka la nei fova. Bumtu tena ber ngai khan ka la rum vawng vawng thin te chu ka inhaw hial a.

'Mi theihnghilh dan tha ber chu a thlaktu an awm hian... ' tih chu ka innghahna awmchhun a ni ta. Pasal neih chu ka tum nghet bur a, ka pasal tur chu kei aia kum 10 a upa a ni a, tlangval hleitling tawk tak a ni a, sawrkar hna tha tak a chelh bawk.

Thinlung hliam chuan pawisak a nei ta lova, hmangaih chawp inbeiseiin pasal ka nei a, a tawp thleng khan ka hmangaih em tih ka inzawt fo asin.

Ka pasal chu innghahna tlak khawpa mipa nghet a ni a, kei hmeichhia azawnga derthawng ber mai chu min enkawl a, min chawikang a, ka nih lohna tur hmun thleng thlengin min dah a, ka tan chuan ka khawvel parvul tirtu a ni. Kum li meuh a ral leh hnu chuan fa duhawm tak tak pahnih kan nei tawh a, mipa leh hmeichhia an ni. Chhungkaw hlim tak kan din ve ta.

"Lily.... " Chu âw lo chhuahna lam chu ka hawi a. Ka hma lawka ding mipa nen chuan kan inmelh reng a, ka thaw a sak talh a.

"Lily, ka zawng nasa lutuk che.. " Min rawn pan hnai ruakin a ti nghal zat. A hmel chu ka en reng a, a mitmengah chuan lawmna ka hmu bawk. Mahse....

"Engatan nge min zawn a..? " Ka ti chang fak a.

"Lily.. Inbia ang, sawi tur ka ngah lutuk. "

"Sawi tur ka nei ve lo.. "

"Tinge hetia i awm a.. Helai hmun rawn thleng tur hian thil tam tak ka paltlang asin. Ka hmangaihna che vang chauha la dam ka ni asin.. " A thusawi avang chuan ka kâ hau a. Chutiang thu a sawi ngam te chu mak ka ti zawk hial.

"Awle, keipaw'n sawi tur ka nei alawm.. " Kan Inkara thil awm a lo awm ve tawh avang khan vawikhat tal chu biak ka duh ve alawm. Ka thinlung hliam a, min tikehsawmtu ni mah se tha taka mangtha chu a phu vein ka hria. A tawpnan.....

"Ka ngai lutuk che.. " Restaurant-ah chuan kan thu dun vang a. A hmel ka hmuh chuan hmanlai hun kha a rawn thar leh a, ka natna pawh a rawn thar leh ta.

"Kei lo ngaih tur i neih that khawp kha mawle. Tinge kei te chu min lo ngaih duh a... " Ngeiawm thei ang ber hian ka ti sap a. A meng buai nak thung....

"Lily, eng thil nge maw I sawi hi le. Nang lo ka nunah hmeichhe dang an awm ngai lo asin. I awmdan hi ava mak ve... Engngatinge? "

"Mak I ti a maw.. Hun kal tawh hi sawi chhuah leh kher ka tum lo naa ka kâ atang ngeia hriat I duh tlat a nih chuan tenawm taka min lo bum dan kha ka han hrilh ang che. Nang hian khatih hun lai khan min lo kawp reng a nih kha. I reh hmak a, tichuan biak che tumin vawi tam ka rawn call che a, I bialnu dik tak khan engkim a rawn sawi alawm. Min lo play kual vel mai mai a, ka thinlung chu infiamnan ilo hmang a, engtinnge I theih zawk.? Ka rinawmna chu eng mah loah i chan a, i tana ka rinawmna kha i ngainep zawk hle lo maw.. Tichuan tunah, hei kum li leh thla sarih hnuah i hmel i rawn lan a, min hmangaih ber niawm angin i rawn insawi a, i nuihzatthlak ngawt mai. Tunah chuan keima khawvelah ka hlim tawh tih hi hria ang che.. " Ka sawi zawh meuh chuan ka thawl hawk mai. Ka hmaa thu mipa erawh mak tih luat avangin a meng bial kawk kawk thung a.

"Lily.... Engtinnge ka sawi tan ang. " Rilru nat hmel zet hian a tichhuak sap a.

"Sawi tur engmah a awm tawh lo. Tihian keini chu inmangtha ila a tawk mai.. "

"Ka nun chu kha mi te khan an tichhe ta vek a nih si hi. Ka hmangaih awmchhun paw'n phatsantuah min ngai ta si a... Tunah thudik engkim ka'n sawi ve ang e aw. Khami ni, ka reh hmak ni khan maw kan chhungkuain kan zin chhuak a, kawng lakah suamhmang kan tawk a, kan neih zawng zawng min lak sak a, tichuan awlsam takin min kaltir ve leh mai a. Mahse kan vanduaina chu a kaltluang zel a, truck nen insuin ka nu leh ka pa chu a hmunah an boral nghal a, keimah chauh ka ni ta. Surgery ka hmachhawn hnuin nikhaw hre lovin ka awm zui reng a, thla riat hnuah ka harh chhuak ve chauh a ni. Ka harh chhuah ruala ka nu leh ka pa an awm ve tawh lo tih hriat nat tehreng nen ka natna belhchhah tur thil dang a la awm cheu a. Kein ka kal thei tawh tlat lo. Vawi tam i no. hriat chhuah tumin ka bei a mahse ka hlawhchham a ni. Biak pawh ngaihna che ka hre hlawl lova, fb leh ig ah te i hming ka zawng a, ka hmu si lo. Among Us ka khel zing viau bawk a, hmuh che ka inbeisei vang a ni mahse ka tan kawng pakhat mah a awm lo. Ka nun a beidawng a, thih ka chak a, vawitam intihhlum ka ngaihtuah thin a mahse ka hmangaih ber nang ka ngaihtuah chang che hian thihna chu ka hneh leh ta zawk thin a. Ka hmuh ngei theih nan che, ka lo zin ang tia i hnena ka thutiam kha ka hlen ngei theih nan tiin theihtawp ka chhuah a, kum li a ral leh meuh chuan keima ke ngeiin ka kal leh thei ta. Ka lawmna San zia kha aw... Nang ka hmu che ang a, ka khawvel chu a eng ve leh ang tih suangtuah chungin Mizoram ka rawn pan tawp a. Thla khat chuang chu Mizoramah hian ka zawng tawp che a ni. Lily, ka hmangaih takzet che asin... "

Ka thu hriatin min den nat zia chu maw, a vawihnih nan ka thinlung bang chu thiah a ni leh ta. Engtinnge ka tih tak ang.. A thusawi hi ka ring nghet hmiah a, dawt a sawi lo tih a mitmeng chuan a tichiang bawk si.

"Khawngaihin, min pawm leh thei ang em..? "

"Ka thei tawh lo... " Ka hrawka hnawhtu avang chuan ka âw a zawi hle a. Ka mittui a tling pam bawk...

"Tinge? Tinge I theih loh ang..? " Mangan hmel taka min melhtu chu en ngam lovin ka kun ngar ngar a.

"Tunah chuan nu ka ni tawh.. "

"I fiamthu tiraw.. " A nui hak a. Ka mitmenga ka tihtak zia a hmuh chuan a nuihmel chu a tawp riai riai a.

"Lily, a theih loh.... "

"Pawi ka ti lutuk. Thla sarih chhung kha ka tuar a, ka theihnghilh theih che inbeiseiin pasal ka nei ta a ni. Tunah chuan a tlai zo tawh.. " Ka mittui chu ka hru a.

"A theih loh. Lily, min zui mai rawh. Pasal nei tawh mah la pawi ka ti lo. Ka hmangaihna che kha a nep phah lo min zui la, kan pahnihin khawvel kan din thar leh dawn nia. Hawh, aw,.. Min zui rawh aw" Ngenngawl taka a tih chuan insum zo lovin ka tap chhuak hawk a.

"Ka thei lo. Ka fate ka kalsan thei lo... "

"I fate nen ka pawm vek che u.. I fate nen.. " Titu chu ka melh tlawk tlawk a.

"Ka thei lo. Pawisawi lo ka fate hi an nu leh an pate karah ngei an seilian tur a ni... "

"Lily..... " A reh tlawk tlawk a. Kan rilru kan kawm melh melh a ni mahna.

"Nih min la hmangaih em..? " Tia a zawhna chu dawtin ka chhang thei si lo. "Aw... " Ka ti leh ta nge nge a. A ni hi ka hmangaih thin a, ka la hmangaih reng a, ka hmangaih reng bawk ang. Mahse ka fate erawhin pa pakhat chiah an nei thung ang. Thihna chauh lo chuan ka fate pa nen hian min thenhrang thei lo. Nu hmangaihna tak hi chu aw.....

"A tha e.. I fate I hmangaihna avang hian ka zah takzet che. Ka chhuang bawk che. Mahse engtik niah emaw ka kut hi vawn i duh te a nih ngai chuan i tan ka awm reng ang.. " Tia min hnungchhawntu mipa chu kuah vawng vawng ka chak a mahse thil theih a ni si lo. Hringnun hian eng nge a her chhuah tak hi, natna chauh a ni. 'Khuanu hian rem a ti a nih ngai chuan i ta ka la ni ngei ang... ' ti sapin ka fate leh ka pasal tana nu leh nupui ni turin ka kal ta a.
Hmangaihna chauh hi a ni min tinui a, min titap theitu chu.

"Lily, I tan ka la awm reng e... " Titu mipa chu ka nuih sak a. Tunah chuan kum lamah pawh kan lo upa ve ta.

Ka pasal khan cancer in min boralsan a, ka tuar zia chu sawi fiah dan ka thiam lo. Ka thinlung zawng zawng a nei lo a ni mai a, ka pasal, hmangaih taka min enkawl a min kuangkuahtu kha a ni tlat a, ka tan a hlu a ni. A thih dawn darkara a thusawi avang khan ka mittui hi a hul ngai lo ang. 'I hun tam tak min pe tawh a, tunah chuan I hmangaih ber pan turin ka duh che, a ni nen chuan hlim takin awmdun ang che u.. ' Ka pasal chuan ka sawi chhuah ngai miah lovin hmangaih dang ka nei tih a lo hre reng a ni si a.

Ka pasal thih atang kum hnih hnuah ka hmangaih ber nen chuan insuihzawm turin thutlukna kan siam a, mahse ka faten an remti tlat lo. An nu kum lama upa tawh takina pasal dang ka nei leh tur chu an ngai ngam lova, zahthlak an ti a, an remti hlek lo. An ngaihdan chu ka zah sak a, mahse ka fate hmangaihna vang hian ka hmangaih ber chu a vawihnih nana kaltir leh ka tum tawh bik lo.

"Ka kut vuan la, engtikah mah thlah ngai suh... Min ring tawp rawh. " Titu mipa chu ka ring a, a kut ka thlah ngai hek lovang.

"Ka ring che. Ka ring reng bawk ang che... " Tiin ka nuih let sak a...

Tichuan tun dinhmun hi kan lo thleng ta a ni. "

A thusawi chu ngaihnawm ti lutukin ka ngaithla a, a sawi zawh meuh chuan an nupa chu ka khawngaih hle. Hmangaihna azawnga hmangaihna ropui ber a ni ngei e..

Kum 60 pawh nise an inhmangaih chuan a tawk mai lawm. Hmangaihnaah hian kum a pawimawh lo an ti fo a ni lawm ni? Kum te chu number mai mai a ni an tih kha. Among Us avanga intawng te chu tunah chuan kut inkai rialin an mu dun tawh a.

(A lem viau maithei a ni🤣🤣)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)