U SANGPUII----Zualtei B Zualtei

[Zualtei B Zualtei]

U SANGPUII

Zualtei B




"Sangpuii chu a inlak fel thin tehreng nen a lo mak hle mai. Tihian fel ber awm ang hian an awm a, a tawpah sawn an pai leh nawlh a.. " Ka tui in lai ka phuh thawt. Ka nu leh a thiannu thutna lamah chuan ka kal phei vat a. U Sangpuii a rai an ti em ni?

"Ni e, kan nula ho ve hi tha ber awm ang hian an awm a. An zahpuiawm ngawt mai. Kan nulat lai kha min tluk hlawl lo. A rukin an lo thak zek hlawm a nih hi. A bikin Sangpuii te chu kohhran leh khawtlang velah a inhmang ve em em a, tunah tu fa nge a pai pawh a hriat leh loh a. A lo hur ru hle a nih ka ring. " Ka nu thusawi duh thin dan hi chu aw. A mak bawrh bawrh thei teh e.

"A hma paw'n nau a titla tawh an ti.. " A thiannu ve thung. An thusawi chu ngaihthlak chhunzawm peih lovin room-ah ka luhsan daih.

Kan khua hi khaw lian lutuk lo a ni a, mahse a faiin a chengte pawh kan changkang ve tawh hle. A khawthleng mawlh hi a mawiin a nuam a, boruak te lah hi a dai nuam em em bawk a. A chhunga chengte pawh kan inpawh tlang viau. Kan khuaah chuan ka nu leh kan thenawmnu hi tawngthei ber tia sawi theih an ni ang. An thu hriat hi bung khat vel thawk belhin mi zawng zawng hnenah an sawi chhawng a. Kan khaw pum hian nikhat thil thu lekah thil min hriattir duh a nih chuan Information mic vel a ngai ve lo, ka nu leh a thenawmnu hi hrilh se khaw pumin an hre nghal a ni mai. A chang chuan ka zahpui lek lek zel..

"Nu, mi chanchin hi sawi tlem ve deuh tawh rawh. A zahthlak em mai" A thiannu haw hnu chuan ka ti a. A ner vak.

"Hm, thudik bak ka sawi ngai lo"

"Mahse mi chanchin a nia. Sawi tam loh a him ber alawm.. "

"A ho em mai. Ka thudik sawi vanga min lo chhuahchhal ngam an awm tawp loh hi.. "Tiin tuibur a hmuam a. Ka sawi thui peih tawh lo e. Awmzia a awm dawn chuang lo. Mahse U Sangpuii kha....

" Nu, U Sangpuii a rai in ti em ni? "Ka ti dek dek a.

" Aw, rai e. A inlak fel tehreng nen zahpuiawm lutuk. A hur ru ngawt ang ka ring. A hma paw'n nau a titla tawh. Ilo entawn ve palh ang e... Sawtiang milem an nih saw" A ti hlak hlak a. A thin lah chu a rim hmel ve em em lehnghal a. Kan inhnuaipain a lo koh avangin a chhuak a.

U Sangpuii a rai chu mak ka ti takzet. Midang paw'n mak an ti ve tho ang. A ni chu kan khaw nula fel, kan chhuanvawr leh ka naupan tet lai atanga ka ngaihsan leh ka zah thin a ni. Mizo nu ve tak a ni a, a lian lutuk lova, a ngo vak hek lo. Mahse hang chhia chu a ni chuang lo. A hmel chu tha em em lo mah se a mizia leh a nungchang avang chuan tha ka ti. A nui sen sen reng a, a tawng siam siam thin a, rual a pawlin mi kawm te hi a thiam em em bawk a. Kan khuaah na na chuan mite ngaihsan rawn leh entawn a ni ngei ang. Naupang pawl hruaitu a ni a, Sunday school-ah zirtirtu a ni bawk. Thalai pawlah lah chuti bawk. Khawtlangah nise YMA committee member a ni a, chhiatni thatni pawha a tel tam pawl leh naupang zawk te hruai khawmtu a ni thin. Tunah sawn a pai ta si. A mak tih bak sawi tur ka hre hlawl lo.

Ka nu chuan a ngai te bawkin kan ina lo lut apiang hnenah U Sangpuii rai thu chu a lo sawi zel a. A sawi apiangin thu a belh zel bawkin ka hria. Zanah phei chuan kan thenawmnu bawk kha a lo leng leh a, a bul atangin an khel tha leh alawm le. Ka ning lutuk chu Ka pi te ina riak turin ka kal daih. Keini pawh kan tleirawl chho ve tan tawh a, kan khua angah phei hi chuan nulaa chhiar kan ni ve tawh. Hetia ka nuin midang chanchin a sawi vak vak thin hi a zahthlak ka ti a, miin 'A fate pawh... ' an lo tih ve thin ka ring bawk si. Hrehawm ka ti takzet.

A reh hle a, inchhungah an tawm thap hlawm a ni ang. Ka pi te hi veng mawngah an awm a, mahse kein kan kal mai zel a, hla pawh ka ti vak tawh lo. Kan biakin zawn ka thlen chuan ngaihtuah lem loin ka hawi thla thut a, ka kal pel ve mai. Mahse biakin kawta bench-ah chuan tu emaw thu an awm tlatin ka hria. A reh tha hle a, biakin bul hnaiah tak hian in a awm lo bawk nen ka hlau ru ve deuh a mahse biakin a ni a, a hrang lo ang. Ka let leh ngat. Nichina mihring ruangam thu anga ka hmuh kha a la thu reng e. Thla a eng tha bawk a, mihring a nih ka ring nghet bur. Gate chu hawngin zawimuangin ka lut a, Biakin kawt bench a hmeichhe sam thlah nuaia thu chu ka hmu chiang thei ta. Ka pan hnai a, a thawm pawh ka hre thei tawh. A inhnit deuh hlap a, a tap niin ka hria. Ka pan hnai a 'Tunge... ' ka ti sap. A inhnit hlawp hlawp a, a rawn hawi chhuah chuan ka ding khawng tawp. U Sangpuii a ni.

A mit chu a bui luk a, a hmai lah chu a duk deuh thluah bawk. A sam a thur bam a, a thawmhnaw hak ka han en phei chuan a thler deuh nuai a, a biang ki dak te chuan a cherzia a tilang chiang lutuk tlat. U Sangpuii kha a ang ta lo ka ti mai. Min en lova, tah chhuak insum hmel hi a pu.

"U Sangpui.. " Zawi tein ka ti sap. Min rawn melh ve chat a. A mitmenga na tuar hmel, tanpuitu mamawh ngawih ngawih hmel chu ka hrethiam pha ve nia mawle.

"Tinge hetah i awm a? Tinge I hmai te kha.. " Tiin ka din hnaih deuh a. A chesawn lova, van lam enin a thaw chhuak hak a. A kutin a sam chu a tham nawk nawk a. Ka hrilhhai viau. A sam chu a kek nawk nawk a, a rum hak hak bawk. Thinrim inhrosa hi a ang zawk mahin ka hria. A bulah chuan ka ding ngawi reng a, a ruk tak chuan ka hlau ve det. Mahse U Sangpuii kha a ni tlat si.

"Tinge zanah te i chhuah a. Haw rawh.. " A âw chu a chham tial deuh a. A tap nasa hle a ni ang. A sam a tih thur te chu a tuai mam leh a. A hmai chu a kawr chuan a hrufai a. A inhnit hlap hlap reng bawk. Mak tiin ka en reng ringawt.

"U Sangpui, tinge hetia i awm a? " Ka ti leh a. Ni e, hetianga a awm chhan te hi ka hre chak a ni. He khawvel mihring zinga fel ka tih leh entawn tlak bera ka ngaih hi engvangin hetiang khawpa dinhmun chhiaah hian a din tak mai le. A hmelah lah chuan kut tuar hmel a pu bawk si. Mi pawisawi ngai lo khan tu fa nge a pai tak ang.. Zawhna hlir zawhna hlir.

"I hrethiam lo ang. Tuma'n an hrethiam lo. Mibawlhhlawh ka nih hi.. " A mittui luang chu ngai pawimawh lo zetin a nui sak a.

"Hriatthiam che ka duh takzet. U Sangpui, ka mihring ngaihsan ber i ni a, tun dinhmun i thlen chhan hi a awm ngei ka ring. Khawngaihin min hrilh rawh. Ka mi ngaihsan ber hi mibawlhhlawh a ni lo tih min hrilh rawh.. " A ngenin ka ngen a. A bulah chuan ka thu ve nghal a.

"I ti tak tak maw? Kei hi min ngaisang a maw? " Min melh kiau a.

"Aw, ka ngaisang che a. Ngaihsan zui zel che pawh ka duh. Khawngaihin min hrilh rawh.. " Ka tih chuan a nem ve deuh ta a ni ang e. A inhnit raih a, a mittui luang chu hru hulin a insangmar lui a. Keiin a che vel chu ka lo thlir reng thung. A âw a thian karh karh a, a chanchin chu a sawi tan ta a.

"Ka nun hi a lan ang ringawt hi a ni bik lo asin. Kristian chhungkaw tha tak atanga seilian leh chawr chhuak emaw min ti thin a mahse a teuh lo. Kristian chhungkua chu hlat tak kan ni. Kan in chhungah hian Pathianin hmun a chang meuh lo chu a ni e.

Ka pa, mi zawng zawngin pa tha leh ngilnei a an sawi thin hi ka tan chuan ramhuai a ni zawk. Kohhran Rawngbawltu a ni a, zan inkhawm vawikhat mah a thulh ngai lo. Khawtlang leh kohhran tan chuan mitha tawpkhawk a ni a mahse a nupui leh a fanu tan chuan Ramhuai azawnga a rapthlak ber a ni hial ang. Setana sawn ka ti mai.
Kan chhungkua hian hlim ni kan hmu ngai meuh lo.

I hriat angin kan in chu veng hmawrah a awm hi. Tumah kan chhungkaw chanchin min hriatpuitu tur leh kan thawm hre tur pawh an awm ngai lo. Chutak chu kei leh ka nu tana hrehawm nasa thlentu chu a ni zawk a. Ka pa saw maw.. A pawn lam nun chu mithianghlim ang a ni a, mihlim thei tak leh fel tak a ni mahse kan in kawngka a rawn rah chiah hianin a mizia chu a inthlak hlawk a. A nihna dik tak a rawn lang ve chiah thin. A rawn luh rualin ka nuin thingpui sa nen a lo chhawn a, nuisangin a lo be thin. Mahse ka pa erawh chuan ka nuin a lo chhawn vena thingpui sa chu ka nu theh khumin ka nu na tuar te thawm chu hriat nuam a tih ber a ni thin zawk si. A lo hawn ruala thingpui a awm lohin hmanrua a hmuh hmasak ber a chuh a, ka nu chu che thei lo rawih khawpin a vaw ta thin a. Ka naupan lai kha chuan ka nu na tuar hmel chu ka en tlawk tlawk ringawt zel.

'A ni hi chu a hrisel lo lutuk a, a chhuak thei vak tawh lo. Lo hre thiam hram hram mai rawh u.. ' tiin kohhran mipui ho hnenah chuan a pha mawi vel thin a. Ka nu hrisel loh chhan erawh kut a thlak nasat theih em vang zawk a ni. Ka naupan tet lai atanga ka pa kut thak hnawihna ni thin ka nu chu a át phah a nih saw. Vawi tam ka nu kut ruh a titliak a, tui so a leih chang lah a ngah. Ka nu chu a phunnawi ngai lo va, a bei let ngai hek lo. A tuar tlawk tlawk a, a mittui chiah a luantir thin.

Tichuan, ka lo thanglian ve zel a. Kan inchhungkhura thil thleng chu tu hnenah mah ka sawi chhuak ngai lo. Ka pa chu pawnlamah chuan ka tan pa a ni a, inchhungah erawh ka nu nunna tlem tlema laksaktu a ni zawk si. Kei erawh chu ka naupan át lai zawng chuan kut min thlak ve ngai hauh lo thung a, mahse ka rawn tleirawl tan a, ka nu thlavang hauh nachang ka rawn hriat tan takah chuan ka khawvel chu a thim ta mup mai.

Ka tawn vawikhatnaah chuan ka nu tawrhchhel zia ka hrethiam nghal. Ka samah kekin chhuatah chuan min hnuk kual a, ka thawmhnaw a pawtthler bawk a. A rem remah chuan ka lu a tauh tir bawk. Ka nu chuan ngawi rengin ka na tuar rak chu a lo ngaithla tawp. A chhan chu ka nu chuan mihring pangngai a tluk tawh lova, min chhan nachang a hre lo. A kawnghren phelhin ka thawmhnaw chu tihluihnain a hlip fai vek a. A kawnghren chuan min hlap ta alawm. Ka rak a, ka tap a, a na lutuk chu ka tal vak vak a. Ka na tuar thawm chuan a tihlim a nih chu mawle. A nui vak vak a, a aia nain min hlap bawk. Tichuan a lungawi hma chu min hlap char char a. A chhuah dawn chuan 'Ka fanu hian a nu aiin min tihilm zawk tlat. A nu hi chu a chawl hahdam ve thei deuh tawh ang.. ' tiin a nui a. Ka mu hlawm reng ringawt. Ka taksa na lutuk ai chuan ka thinlung na chu tawrh a hrehawm zawk. Pathian hian engvangin nge hetiang pa hi min pek bik.

Chuta chin chu ka nu kutthlak tawh lovin keimahah a tuan ta thin a, mahse a lang thei chin ka hmai leh kut velah erawh min khawih tawh ngai lo. Ka hnungzang, ka dul bawr vel leh ka malpui te chu engtiklai paw'n a duk thluah reng a, ser pawh ka ngah ta viau. Ka nun chu hremhmun tluk zet niin ka hria. Ka nu tuar ai ka tuar tih ka hriatna chauh chu ka hlim pui ve thin.

Hun a kal a, ka na tawrhna erawh chuan dam zai reng a rel thei lo. A dam hmain hliam dang ka nei leh a, chuti reng reng chuan hun ka hmang thin. Inah ka tawm tlawk tlawk a, hnathawh lam phei chu ka thei lo hrim hrim. Bakah sumah kan buai lo bawk a(U Sangpuii pa hi sawrkar hnathawk a ni) , ka hnathawh chhun chu ka pa kut tawrh chu a ni mai.
Ka nunna hi ka duh chuan ka la thei alawm mahse awm lo ta ila ka nu tawn tur ka hre vek bawk si. Chuti ngawtin ka nu chu ka kalsan thei lo. Ka tuar a, Pathian hi ka dem thin. Kan khuaah Revival camping buatsaih a nih khan Damna ka chang ta.

Pathian hi ka dem thin a, ka haw thin takzet. Ka pa chu ka pa a nih tir avangin ka dem a, ka tawngtai ngai lo bawk. Mahse chu camping-ah chuan ka pa tlanbosan nan tiin ka lut ve a, mipui ho bulah chuan tha lutuk tak maiin 'Bawihi, piangthar ngeiin lo chhuak ang che aw.. ' te min ti a, ka luak a chhuak hial. Ka thlarau chu a dam a, ka taksa na pawh ka thlarau damna vangin ka tidam lui thin. Pathian leh ka nu chu ka tan engkim an ni a, anni bak neih ka nei ta lo. Ka pa kutthlakna te mai mai chu ka tuar dam mai zel. Ka nun chu midang tana hman chaknain ka khat a, bul tan dan tur ka hre lo.

Zankhat erawh ka nu chu a harhfim ve hle a, kan titi ve luam a. 'Ka fanu, midang tan rawng i bawl duh a nih chuan khawtlang leh kohhranah tel tam la. A der ni lovin nang chu a tak zawkin aw.... 'tih a sawi chuan ka harh a. Ka hun tam zawk chu kohhran leh khawtlanga hman tumin rilru ka siam fel hmak. Bul ka tan ta a. Ka naupan lai zawnga kohhrana tal tam ka ni a, ka pain ka nun hremhmuna a chantir hma thleng kha chuan naupang inkhawm taima leh hruaitute fak rawn ka ni ve thin. Ka pa vangin ka nun kha ka paih a, keimahah hian sernung a tuh a, chu chuan vawiin ni thlengin min kiansan ngai lo.

Kohhranah chuan ka inhmang thar leh a, khawtlang lamah pawh ka inhmang ve tan ta. Ka nu sawi angin keichu a tak ka ni a, ka pa erawh milem a ni. Min sawisa bang lova, a hma aiin a zual emaw tihtur khawpin ka chungah a nunrawng a, mi zingah erawh min fak luam a, kohhrana ka inhmang thar leh te chu a lawm zia te a sawi chamchi thin. A zak lo hi ka ti a nia. Pathian pawh hi a hlau ve em em lo em ni le...

Ka taksa chu a nghaisa a, a duh tawkin a khawih a, hliam nasa tak min siam a mahse chu chuan min tichak ta zawk a. Taksa na te zawng ka tan eng a ni ta lo, ka hun tam zawk chu midang tan ka hmang chho zel a. Ka Bible chang duh ber chu ka chakna tha a ni (1 Korinth 10;13). Naupang te mawlh mai chu ka ngaihtuah a, an that loh hlauin ka thiam ang tawkin ka fuih ve thin. Ka nun chu a hlim a, ka nui a, mahse chu ka hlimna chu kan inkawngka ka thlen rualin nuai bo a ni nghal thin si a.

Nula puitling ka rawn nih ve takah chuan inleng ka nei ve ta fo mai a. Kut pawh ka tawrh tlem phah ta deuh. Min heltu lah an awm ve reng a mahse ngaihzawn ngam ka nei ngai lo. Pasal neih ka hreh tlat alawm. Ka pa ang hi ka tawng ve ang tih mawlh chu ka hlauh a ni a, mipa hlauh rukna chu keimahah a awm nghet tlat. Mahse mihring ve tho ka ni a, chak lohna lai zawng ka lo la nei ve e.

Kan kohhran Thalai pawla Secretary U Mama hian tihtakzetin min ngaizawng a, zantin a rawn leng a, a rawn kalin eng emaw min rawn ken ziah thin bawk. Min zar buai nasa a, min hmangaih thu mawlh chu min fah zing asin aw.. Kei hmeichhe derthawng pawnlama huaisen tak anga lang, chhungril erawh ruak ve tak, hmangaihtu mamawh em em si chuan ka hnar zo bik ngang lova. Min hmangaihtu awmchhun chu tiin a kut ka vuan ve a. A hmangaihna angchhungah chuan maw ka lut thuk zel a, a tawpah chuan ka thianghlimna hial ka hlan a. Kan thil tih chu a mak tiraw. Pathian leh kohhran tana rinawm ber awm anga lang siin khawvel nawmna chu kan chen ta zawk a. Pathian hian min ngaidam theiin ka ring lo.
Vawikhat chuan vawihnih a hring a, vawitam tak kan chesual a, Pathian hmaah pawi lian tak ka khawih tih ka hria mahse tawp erawh ka tum chuang si lo. He mihring rilru tak hi chu aw.... A va tenawm tehlul em!

Pathian pawi sawi hlauhawmzia chu maw hei tunah a rawn lang chhuak ta alawm. Ka ruak ta lo. Ka inhriat tirh chuan ka khur hlawk hlawk a, awmngaihna ka hre hlawl lo bawk. U Mama ka hrilh chuan engtiinge a tih i hria em? A thusawi kha ka bengah hian a la ri nawn tlut tlut asin.

'Ka fa a ni lo ang. A lo ni ta a ni leh paih mai rawh. Keichuan ka duh love.. 'A ti a nih chu mawle. Min hmangaihtu awmchhun anga ka ngaih khan ka thianghlimna chauh a lo duh zawk si. Ka fa ka thisen ringa nung chu khawngaihna nei hauh lovin paih turin min ti a. Ka tliak hnawp a ni mai. Ka pa kuttawrh ai khan na ka ti zawk a, ka thinlung chu a kehsawm chiang hle. Ka hliam chu thawi dam chu sawi loh chi a la phul belh ta deuh deuh a. Kar hmasa khan Zovi hnenah palai a tir a nih chu. A mak tiraw. Ka bialpa, min hmangaihtu nia ka ngaih chuan ka hriat ve miah loha kan inkar titawpin hmeichhe dang chu nupuia neih a tum a.

Tunah hian tu fa nge ka pai tihah kan khawtlang hi an buai a, ka fa paina pa hi tunge a nih tih hria se engtinnge an tih ang? Keimah chauh hi min dem leh tho ang em...

Ka thiam lo, ka thiam hlawl lo. Pathian lakah misual ka ni a, mi bawlhhlawh, mi tenawm ka ni. Pathian tan ka rinawm zo lova. Hmangaihtu nei lovin ka lo piang a, hmangaihtu nei lo bawkin a nih hi khawvel ka chhuahsan dawn. Mahse maw.. Mi tenawm ber pawh ni mah ila hringnun fair tak chu ka phu ve tho lawm ni? Hlim hi ka phu ve tho lawm ni? Ka taksa tihnat hi a tawk tawh em em lovem ni? Ka thinlung lehzel pawh a kehsawm tak si hi...

Vawiina ka tihsual avang hian nimina ka thil tihthat kha a bo ta vek a. Ka damchhung zawnga sual reng angah min chhuah a. Ka nun khan Lalpa a lo chawimawi ngai hauh lo a maw? Ka tawngkam te khan tu nunna mah a chhan ve ngai lo a maw..

Ka chhungril nun hrethiam si lo hian min vei ve hlawm a. Min sel rawn a, min kawk a, min vit a. Ka rawngbawlpui thin te khan ka hnunglam chu sawi loh ka hmalamah ngei min nuihsawh a. Min hmusit bawk. Tumah thlavang hauhtu ka nei ve lo. Eng nge ka tawrh tih hre turin ka nun hi lepse zawk ta se.. A tha tur. Eng nge ka lo paltlang a, eng anga ramhuai bawlhhlawh bulah nge ka khawsak tih hre turin min chik se la, min zirchiang se la. Hmangaihtu ngaia ka thianghlimna hial ka hlan chhan te kha chhui zawk se la, tunah hian dam ka la thlahlel ve deuh tur. Mahse.. A tlai zo tawh. Khawvel tak hi chu(h)..... "

U Sangpuii thusawi zawng zawng ka ngaihthlak zawk meuh chuan ka mittui a luang a. A hringnun chu rapthlak ka ti. A pa kei ngei pawhin pa tha tawpkhawka ka lo ngaih thin mize tenawm chu ka hua a. U Sangpuii a tihnatna avang phei chuan vawihnih thi nawn tlak a ni hialin ka hria.

Mi thianghlim U Sangpuii khan thil tam tak a paltlang a, khawvel hremhmun a dai a. Pathianah hlimna a hmu ve tan a, a hlimna chu a san zel laiin Sual bawkin hna a rawn thawk a, U Sangpuii chak lohna ber hmangin Sual chu a rawn inlar a. Tunah chuan U Sangpuii chu a chhe zo vek tawh.

A vawiin hun chu mualphona, hmuhsitna ni mah se a nimin hunah kha chuan thatna, midang tana kawng sial sak thintu, khawtlang leh kohhran tana thahnemngai, Pathian tana rinawm dik tak a lo nih ve tawh thin kha. Hriat sak reng a phu ve lo em ni?

(Vawiina i kuva/kuhva lei a chhiat vang mai khan phunnawiin sawisel hlek suh. Nimin lama I lei te, nimin piah lama i lei te kha chu an that viau kha. Kuva/kuhva rah bag khatah hian a tha ngawt a awm reng thei bik lo)