MAWLA!----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

MAWLA!----Zualtei B Zualtei

Unread post by Zualtei B Zualtei » November 27th, 2020, 10:28 pm

Ka rilruah a lo lang thut a, ka ziak ve thut. A ngaihnawm vak paw'n ka ring lo....

MAWLA!
(Thawnthu tawi)

Zualtei B




"Phalna la lo chuan chhuah phal loh a ni tih i hre lo em ni..? " tiin min melh vung vung a, a mitmeng lah chu a rum deuh ul lehnghal. Ka scooty chu a melh zawk bawk a.

"Min hrethiam hram mai la.. Lockdown an ti leh thut sia, buhfai kan nei tawh si lova, chaw kan nghei mai dawn asin.. " nem thei ang berin ka ti a. Ka'n hawi kual chuan midang phalna la lova chhuak an lo awm ve nual bawk a.

"Chu chu ka thiam loh em ni..? " a ti a. Min melh rum tulh tulh lehnghal. Ka thaw hak a.

"Enteh, ka duh vang a ni bik lo. Nu leh pa ka la nei ve a, lockdown an ti leh thut si, kei chu kei ka ni a, ka nu leh pa chaw eitur nei lova an awm tur chu ka ngai ngam bik hleinem.. I thiam loh pawh ka tih loh kha" thinrim anga lang si lovin ka ti let ve a. Ka duh vang ni bik lo mah se tihngaihna awm hek lo.

"Chu Sawrkar chu i dem tihna em ni..? " leh ta zel chuan aw. Hepa hi tunge maw a nih le... Ka zo lo mai dawn.

"Ka dem ka tih loh kha... " Ka melh rum vak a. Lehlam hawiin a nui suk a nih chu mawle. Misual tak a nih dawn hi.

"Eng pawh nise,Sawrkar thuchhuah zawm lova chhuak i ni a, a hremna chu i tawrh ve ngei a ngaih hmel.. " tiin ka hremna dawn tur a sawi zawm nghal a, ka haw lutuk chu tham nawk nawk ania ka duh a ni. Tih theih lah chu ka nei lem lova. Melh rawm rawm chungin ka tlan pel a, keima hriat tawk lekin ka huat thu ka sawi mawlh mawlh bawk.

Kan veng naupang ho rintlak loh dan em em hi chu. Duty an awm lo an ti ve a, kha anmahni vangin pawisa ka chawi teuh lehnghal. Ka ngei lutuk. Kan veng ho lah hi bazarna hun takngial pawh hawn tum bawk si lo. Buaithlak hian.

Hnahthial khua ka ni a, Aizawlah hian ka tleirawl tirh atangin ka awm tawh thung. Ka nutei te bulah lehkha zirin ka awm reng thin a, ka lo nulat a keimaha dawr ka neih theih hnuin ka in dang ve ta chauh. Aizawl hi ka khua ang taka ngaihna ka nei a, Hnahthialah ka haw khat hle bawk. Ka pianna khua mah nise ka awm tam loh em vangin thian tia sawi tur tak ka nei lem lova, hmelhriat lah chhungte hnai lo chu ka nei hek lo. Ka nu leh pa erawh mahni khua nuam ti ngang an ni a, zin chhuah pawh an hreh thei hle. An fanu ber hmun danga ka awm tlat avangin min lo tlawh ve zeuh zeuh thin a, min lo zin bak hi chu an zin chhuak ngai lo tih theih a ni. Tihian an lo kal a, lockdown a ni zui ta si, keiin ngaiin thlahlel hle mah ila mahni in nuam an tih zia ka hria a, ka khawngaih viau.

Boruakin zia lam a pan hnu chuan kan hun hman dan pangngaiah kan let leh a. Ka nitin hnaah ka buai leh ta hle mai. Pathian malsawmna ka dawng a nitin mai chuan lehkhabu eng emaw zat ka hralh thin. Ka dawr awmna leh a bul velah hian lehkhabu dawr dang a awm lo bawk a, a nuam ang reng hle.

Nidang aiin ka buai zual a, lehkhabu thar ka nei a, an lo duh hle a nih dawn hi. Chhun chawlh takngial pawh ka nei thei hleinem mawle...

"Thiannu, class X English Guide I nei em.. " tia min lo zawttu chu ka en a, a hmel hi ka la hrechiang lutuk tlat. A lo rei ve leh deuh tawh a nia mahse a hmel hi ka theihnghilh thei reng reng lo. Huatna nasa lutuk vang a ni mah na. Thil ka ngaihtuah chhuak thut a, a rukin ka khi sak. A nuam dawn e..

"Aw, nei e.. Mahse hei ka la buai deuh hlek a, khawngaihin min lo nghak lawk thei ang em.. " tiin midang chu nuisangin lehkhabu ka pe a.

"Awle.. Tah hian ka lo thu ang" tiin a bula chair-ah chuan a thu a. Ka rilru hi a hlim veng veng alawm le.
Midang ho chu buaipuiin ka lo be siam siam a, hnam dang an lo awm ve nawk thin bawk nen English nen ka tawng mawlh mawlh a. Ka dawra lo kal te chu eng ang mi pawh ni se tha taka lo dawnsawn vek ka duh.

Ka lehkhabu thar chu hralh a kal hle a, a lar thawkhat bawk a ni ang e. Darkar chanve vel a ral hnu chuan ka thaw huai a, chutih rual chiah chuan ka piah lawka thu mipa chu ka hmaah lo a lo ding nghal zat a.

"Thiannu, lehkhabu chu.. " a sawi zawh hma chuan "E.. Lawk aw.. Ka lo theihnghilh daih che alawm" tiin ka thutna atangin ka tho a. Zirlai bu awmna lam pan chuan ka kal nghal a, ka han enkual vel hnu chuan kut ruakin min lo nghak rengtu lam chu ka pan a.

"Pawi ka ti lutuk.. Ka la nei emaw ka tia ka lo nei tawh lo a nih hi" pawi tih hmel tak chuan ka ti zawi raih a. A hmelah chuan lungawi lo hmel pawh ka hmuh chuang lo. A thinrim ka rin nen, a thinrim miah lo nge maw ni le..

"A pawi love.. Phuba lak dan i thiam hle mai" A thusawi hriatthiam loh hmel deuhin ka en a. Nuih za insum tih hriat tak hian a khuh karh a.

"Ka pu, kan inhria em ni..? " Ka ti ve kher a, a mitko san akin "Hunin a la hril ang chu.. " tih chauh sawiin a in her a, a kal daih. Ka rin angin kal chiah lo mah se ka lawm tho, rei tawk ka nghah tir a, hlawhchhama siam kha a nuam ve hrim hrim.. Haha

Mahnia awm ninawmna chu haw ila, in ruakah kan lut a, eirel a lo ngai a, a reh em em ringawt mai a. A nawm ve leh na erawh chu ka haw tlai paw'n engngatinge lo ti tu an awm lova, ka duh ka ei a, ka in mai bawk a. A reh nuam em em bawk. Reh taka awm hi a ninawm chang awm ve thin mah se a nawmna hi a tam zawk mahin ka hria.

"Naktuk chu min va kalpui rawh aw.. Class banah ka lo sawm ang che" thutthlenga thu awn duaiin a ti a. A chewing gum thial lah chu a ham puak pawp pawp reng bawk. A ni hi ka thiannu kan thenawm lawka awm a ni a, ka inleng ve ber a nih hi.

"Aw.. Khawiah nge lei I tum a" tiin thingpui ka lum a.

"LJ Enterprise-ah.. "

"A awmna i hria mi.. " Ka tih chuan mawl min tih hmel deuh hian min melh a.

"Hre lo ila ka sawm dawn che mi.. " a ti vin khur a.

"A hmun zawn chawp ngaiah ka zui ziah che.. " ka tih chuan a hehe liam ve mai. A sawi dan atang hian a hre ve turah ngai phawt mai ang. A confi em mai.

Inleng hi ka nei vak ngai lo a, in neitute nau hi ina ka awm ni hian a lo lang ve zeuh thin. Chuan ka thiannu hi a ni leh tawp mai. Tlangval inleng erawh ka nei ngai hauh lo thung. Ka hmuh zawh loh vang erawh a ni bik lo ania, ka duh loh vang a ni zawk. Pathianin min pek hun ka nghak mai a ni. Bakah tunlaiah an inleng zut zut tawh ngai paw'n ka hre love.

"He lamah hian maw... "

"Aw.. Tlan zel tawp rawh" kalkawng min kawhhmuh zel a, khua a tlai tawh hle. Ka rin aiin a lo kal tlai a, a lo thlen rualin min la tur sek zui. A zam lo mai sia aw... Hmanhmawh baklengin dawr kan khar a, kan inphur chhuak nghal a. Kawng tluanin "An lo khar hman ang aw.. " a ti char char bawk. A ninawm tak tak a ni.

"Yes.. " kan thlen rualin a zuang thla nghal a, ka park lai pawh min nghak loin a lut hmak. Henu hi chu aw...

"Dais.. He lamah" ka luh ve chuan min lo hui vat a. Dawr lian ve tawk tak chu a nih reuh hi. Ka thiannu chuan a mattress duh ang te chu a sawi zung zung a, hmeichhe pakhat chuan a duh ang awmna lamah chuan min hruai phei a. A lo tam ngang mai. An sirah chuan ka lo ding mai mai a, ka thiannu hi zawng duh khirh ngang mai hi a ni a, an enkual vel a.

"Thiannu.. " ka phu zawk alawm le. Tunge aw tiin ka lehhawi a. Amah bawk..

"Mamawh i nei em ni.. " Min ti leh a.

"Ka thiannu ka lo zui.. " Ka ti tawp.

"Eng lam nge a.. " A ipte zenin a ti leh hram. Thu a va duh reuh e aw... Huiham..

"Mattress.. "Ka hawi sawn hmak.

A nui deuh huk a, ka va en chuan " Phuba ka la ve dawn hleinem.. " a ti leh kher a. Phuba a la ve dawn pawh ka ti lo e a.

"U Zorem, khawngaihin helamah min lo pui lawk... " Hmeichhe pakhatin a lo tih chuan a lu a bu zeuh a.

Min en lehin "Hmanni khan 'Ka pu' tiin min ko a, ka hmanhmawh em vangin ka hrilh hman ta lo che a.. " chawl detin min nuih a, ka lo lai ve ringawt a nih chu mawle. Engvang kher chuan nge ka laih..??

"Tlangval Zoremsanga ka ni e.. I pu tur atan chuan ka la nau deuh hlek aw.. Ka kal phawt ang e, kan inhmu leh dawn nia.. " tiin min nuih leh a, a inher a, nichina hmeichhia kalna lamah khan a kal daih.

Tunge a nih pawh ka zawt tawp si lova, min hrilh ve ringawt. Val senior a nih dawn kha. A duty a min man tum khan police leh a rawngkai thawmhnaw a inbel lova, chuti chu he dawr neitu hi a ni ang a. A.. Ngaihtuah lo ang, a ho em mai.

"Dais.. Hei hi ka la mai dawn" Ka thiannuin min lo tih chuan ka lu ka bu a. Free home delivery an ti bawk a ni awm e. A zia phian mai.

In ka thlen chuan khua a thim der tawh. Chaw ei chakna pawh ka nei lo, chhuna ka thil ei khan a daih rei hle a nih dawn hi, ei ziah chi a ni. Ka thut vel mai mai lai chuan khapa kha ka rilruah a lo lut zut a, Zorema a inti emaw ni kha. Amah avanga ka pawisa chawi zat pawh ka la hria. A tlem chhe lo em a tin ni. Misual a nih kha. Ka ngaihtuahna vang chuan ka nui leh rih phawt a.

Nihnih hunah ka dawrah a rawn lang leh hlawl a, class 10 ka zir kuma ka sap hming inphuah ngatin min lo la ko zui.

"Engtinnge ka hming i hriat. ? " Ka lo ti hmanhmawh leh pek a.

"A intar kuau hi.. " Chunglam a kawk va a. Ni dawn tak ka dawr hming hi.. Kei hi ka â tawh a nih dawn hi.

"Eng nge i duh" Ka ti leh a.

"Thil ka lo hrilh dawn che" Lehkhabu ho chu a keu kual dan dan a.

"Eng.. " Keipawh chu engvanga hre chak viau nge maw ka nih le.

A lehkhabu keu lai khupin ka hmaah a lo ding a. "Zaninah ka lo leng dawn tih hi.. " a ti thut mai chu ka ngawi dak mai alawm. Ka tawng tawh si loah chuan a kal ve leh mai a.

Ka huat vang nge phei chu ka hre lo a, khapa kha a hming min hrilh ni atang khan ka vei tlat a. Hmuh leh te ka chak a, ka rilruah hian a cham reng a ni mai. Ka hmu leh ta ngei a, tawngkam tha pawhin ka lo chhang leh duh bawk si lova, ka inhrethiam tawh lo e a.

"Eng nge ilo tih dawn.. " Ka kawngkaa ding nen chuan kan inmelh ran a.

"Ka lo leng dawn ka tih kha" Tiin a lo lut ve hmiah. Keipawhin ka lo kian tha ve mai bawk a. Thutthlengah chuan a thu nghal a.

"'Aw' pawh ka tih loh kha.. " tiin a thutna epa thutthlengah chuan ka thu ve a. Ka beisei ngam chiah loh mahse ka beisei ruk reng kha a ni a, a ruk tak chuan a lo leng hi ka lawm hle. Mahse tihlan erawh ka tum lo hrim hrim.

"Nangmahin i awm mi.. " a tih chuan 'Aw' tihnan ka mitko ka san euh a.

"A va rem dawn ve.. " a tih chuan ka insum hman lo. "I zak lo.. " ka ti hmak.

"Ngawt a che.. I rilru kha a kawi anih kha" Min nuihzat hmel deuh hian a ti a. Eng a sawina nge ni ang a, ka sa hat hat mai.

"Tak takin,ka unaunu fapa mawle.. Class X a ni ve tawh a, English hi a harsat riau a, a tutor atan ka duh che a.. "a tih chuan ka zah ruk hle bakah ka hnual nghal rawih thei. A lo len chhan chu tutor atan min duh vang lek a ni sia.

" Chutianga Tutor em ni tur chuan ka thiam tawk hleinem.. Degree pawh ka nei ve lo" Tiin ka tho vut a, tih tur ka hre leh si lova, thingpui ka lum ta ngawt a.

"Degree neih kher a ngai lo, i thiam tih ka hria alawm.. "tiin chokaah chuan a lo phei ve a. Dining chair chu pawt chhuakin a thu a, min melh kar lehnghal.

Ka in hi choka leh sitting room zau vak lo a ni a, pindan erawh a zau tha hle thung. Choka leh sitting room indaidan nan parda ka zar mawl ve leh tawp.

" A thlum nge a hang..? "tiin ka zawt a, " A hang.. "a tih chuan kan pahniha in tur a hangin ka siam a, dawhkana chhawpin ka thu ve a.

" Chuan naktuk zan atangin i zirtir thei ang em..?" Tiin thingpui chu a in a. Ka zirtir ang pawh ka ti tawp si lova. A confi ve e.. Ka naupan lai atangin English hi ka subject thiam ber a ni a, keima tawkah chuan hneh ve par par tak ka ni. Lehkhabu pawh mizo ai chuan English a ziah ka chhiar tam zawk.

"Um.. A tha alawm" Tiin ka no ka keng kang ve a. Pawisa ka mamawh ve reng tho a, zanlamah engmah tihtur ka nei lo bawk a, a tihchi ve phian ang chu mawle.

"A nih chuan naktuk zanah ka lo hruai ang aw.. " A no chu tuikhawihnaah a dah a. Nichina a thutnaa thu tawh lovin ka bulah a lo thu a. Ka lung phu lah hi a ri dup dup maiin ka hria. A mak a ni.

"Aw.. A tha alawm" Thut sawn tumin ka ding hluai a, ka inrin hmain min pawt thu leh thut. Kan inmelh hnai tawh viau.. Sawi mai tur pawh ka hre lo.

"I lawmman tur vel te kan sawi dawn em ni? " Min chelhna chu a thlah.

"A, chutiang.. " Ka tho vut.

"Nih, nidanga sawiah khek mai ang aw. Ka kal tawh ang e"

A haw dawn chuan lo hawi let lehin "Muttui suk suk le.. " a ti a. Za vak loin ka nui. Zan muthmunah pawh chuan zanina kan awm dan vel kha ka chhui kir a, ka kut a chelh lai te kha ka ngaihtuah let vel. Ka nui leh hak hak thin. Ka mumang pawh a nuam ngawt ang.

Zan dar 6 leh a chanveah an lo thleng a. A u fapa chu a sang tha hle a, an inchen vel awrh ang. Ka zam ru em em lehnghal. Kei aia naupang daih ni mah se pumruaah kei ai a lian a, bakah a puitlin hmel. A ngawi reng a, choka dawhkanah chuan a lehkhabu phawrhin kan inzirtir tan a. Zorema erawh Sitting room-ah thuin a phone a khawih mial mial thung.

"I awm ve reng dawn mi? "

"Awm ve lohin.. " Tih chauhin min chhang. Hm, awm ve phawt mai rawh se.

Line by line in ka chhiar a, ka sawifiah a, word meaning nen lam ka sawi zel a, a hrethiam em ang chu maw. An haw dawn chuan 'Ka hrethiam.. ' a ti ve ngei a. A hrethiam turah ngai mai ang.

"Nih, kan kal phawt ang.. Muttui aw.. " Tiin kan inmangtha a. Ka intifai a, ka mu ve nghal. Mutthilh erawh a har lam hret a ni. Ka lo dream hman zel pek a.

Tichuan zantin kan inzirtir a, a hriatthiam loh lai pawh a sawi ngam ve tawh. Kan sawi nawn leh mai thin. Zorema pawh a thu ve reng zel a. Zan khat phei chu ka hriat chak, ka zawh hreh si mahse zantin mut hmuna ka ngaihtuah ziah thin chu ka zawt tawp. A chhanna vang erawhin ka lo zawt lo ang tih kha ka hlau zawk hial.

"Lenna tur te hi i nei ve lo mi. Tlangval ve si.. "

"Ka nei a, hei ka lo len hi"

"Aw.. Hetiang lo hian"

"Tawng tawng lo khan inzirtir rawh u. Lenna tur dang ka nei lo"

Ngaihzawng a nei lo tihna chu a ni phawt mai a. A nuam veng veng mai. Ka no. min dil a, ka pe ve mai. An hawn hnuin min rawn be hram..

Zan khat erawh kan zir tan deuh chiah tihin Vala(Zorema u fapa) phone chu a ri chhen a. Zan dangah chuan a phone hi a off hmak thin. Zanin erawh nghah nei deuh niawm tak hian a bih leh chhen thin a. A phone chu chhang turin ka ti a.

Mahse a phone hman lai a thlauh tawp chuan ka hamhaih a, a hmel lah a dik mawlh si lo. Zorema pawh a lo phei a, Vala chu a bia a, mahse chhanna a awm lo. Kan pahnih chuan kan inmelh a, Vala lah a ding khur hlawk hlawk ringawt mai bawk si. Chutih lai chuan Zorema phone a rawn ri ve thung a. A pick up hnu chuan 'Vala thiannu a boral a ni awm e. Kan va kal phawt mai ang aw.. ' tiin min mitmei a, Vala ding khawng reng pawh chu harhchhuak niawm takin a meng kual a, an inzui chhuak nghal. An chhuah hnu pawh chuan ka la buai tlat a, ka rilru lah a mumal hek lo. Vala awmdan mawlh khan min timangang a ni.

"Kawngka lo hawng rawh. " Zorema a ni. Tunah Dar 11 vel a ni tawh a.

"Eng nge thleng a..? " A lo luh rualin ka ti vat.

"Vala bialnu a nia, a inawkhlum a. "

"Tinge? Awi, ava rapthlak ve. " Ka ti tawp. Vala bialnu a nih chuan naupang ve tho a nih ka ring a, mahni nunna hial la duh tur khawpin eng hrehawm nge maw a tawrh bik le.

"Broken family dik tak an ni a, amah Vala bialnu ber lah hi ruihtheihthil lam a ti ve nasa a niawm e, a la naupan nen. Hmanni deuh atang khan Vala hian a thiante thurawn angin a bialnu chu a nun a sim theih nan a then a, a then kha chuan a insiamthat phah a ring ve aniang. Mahse a bialnu chu a lo buai phah zawk a, tihian a thih thu chiah kan hre ta a nih hi. A pawi tak tak a ni" Rilru buai hmel deuh hian a lu a dawm a. Vala chu ka khawngaih e....

"A zia lo e.. Vala'n hrehawm a ti ngawt ang"

"Nia...... "

Kan ngawih dun reng hnu chuan "Daisy, keini hi kan ni tiraw? " A rawn ti. Ka nui chhuak huk.

"Awihawm loh e... "

"Nih eng nge kan nih? "

"Hei, i hriat reng hi"

"Ni ila.. "A fiamthu a nih ringin ka en a, a mitmeng lah chu a thutak em em mai bawk si.

" Pawisa ka chawi tir vang che khan chuan min hnar thei lo a nia. Kha chu Sawrkar thupek a ni" A ti leh. Ka nuih a za leh thut. A mak e...

"Ih. Zorem, ka hre lo.. " Ka hawi chhuah rualin min rawn fawp chat. Ka dawh mawl tawp.

A haw dawn chuan inngaizawng inthlahin kan inthlah ve thlap. Zantin ka dream thin mipa kha a ni a, ka tan hnar chhan tur awm hek lo. Ka single a, a single bawk a, inngaihzawn theih loh chhan tur kan nei lo.

Vala nen pawh chuan kan zir chhunzawm ta lo va, amah pawh a la pangngai thei lo a ni awm e. Class pawh a chawl tawp. Zorema erawh zantin a lo leng a, nuam takin hun kan hmang dun thin. Tlangval mah nise a naupang chhe zawk zawk tawh lova, keipawh nula senior tih theih chiah si loh mahse naupang chhe tawh bik lo tak ka ni. Kan kum ngaihtuah erawh chuan kan zei lo dun thei hle..

"Ka la ngei reng che.. " Min vawnna kut chu ka la sawn a. Hmana min man tum bawk kha a sawi chhuak leh a, a nui hak hak lehnghal. Buhfai bag kha keimahin ka zawh leh zawh loh te min zawt. A ngeiawm thiam ve e.

"Phuba i lak tawh kha.. " Ka kawngah a rawn kuah a.

"Sawi chhuak fo suh. " Titau âw tak hian ka ti a.

"Min fawp phawt la.. "

"Teuh lo.. "

"Okay. Keima'n ka fawp mai ang che" Min kuai dak a, a kut lehlam chuan ka kawngah kuah rengin min fawp a. Kan inthlah hnu chuan kan innuih leh sak. A bula hun hman hi ka kham thei ngai dawn lo a nih hi.

Thla khat vel kan inzui ve takah chuan inneih a duh thu a sawi a. Kei lahin chutiang lam chu ka lo la ngaihtuah thleng lo nasa mai bawk si. Bakah kan la ni rei lo lulai ve bawk em a ni. A ni erawh chuan 'Ka upa tawh a. Nupui leh fate nena khawsak ve ka chak tawh' a ti deuh sek mai bawk si. 'Nangpawh i senior hman palh ang.. ' min tih te a ching. A buaithlak thei a nia. Engtin tin emaw kan inthlem lungawi leh thei zel zawk a.

"Daisy, inhmuh ava khat ve" Âw lo chhuahna lam ka hawi chuan kan school kal laia ka classmate Sanga lo ni rengin. Ka ding a, kan inchibai a.

Zorema nen kan bazar dun a, thil ei turin Restaurant pakhatah kan inzui lut. Kan thu fel deuh chiah tihin Sanga a rawn lang ve hlawl.

"Hei hi ka thianpa Zorema a nih hi.. " Zorema lam hawi chuan a kut a phar a, an inchibai ve mai.

"Reunion te kha i hria maw. Lo kal ngei ngei ang che. I ngaihawm a nia"

"Tehreng. Nangni pawh in ngaihawm alawm.. "

"Nih, ka kalsan phawt ang che u. Tui deuhin in ei dawn nia" Tiin min kalsan a. Zorema ka va melh chuan min melh rum lutuk tlat. Ka hrethiam lo.

Kan eitur an rawn chhawp thleng chuan ka be tawng zo lo. Ngawi rengin a ei mial mial a, ka thil ei pawh a tui hlawl lo. Kan inzui chhuak a, car-a kan chuan hnu pawhin a la tawng duh chuang lo.

"Tinge tihian i awm a? " Ka inah kan awm tawh.
Thutthlengah chuan duhdah zetin a thu a.

"I thian chauh maw ka lo nih a.. "A âwki a lawm lohna ri tel chu ka hai lo. 'Ka thianpa' tia ka hmelhriattir kha a thinrim phah a nih chu. Ava ho thin tehlul em!

"I thinrimna a ho e.. " Tiin a bulah ka va thu a.

"A ho a? Min zah pui chuan sawi mai ta che" Tiin a tho vut. Ka hrilhhai letling zawk.

"Chutiangin ka sawi loh kha. 'Ka thianpa' ka tih te kha chuan a hrethiam ve tho ang chu"

"Min neih i duh lova. Tunah i hmelhriat bulah i bialpa angin min sawi duh leh lo va. Daisy, min lo duh tak tak lo a nih ka ring"

"Chutiang a ni lo. Khatiang mai maiah i thinrim ka ring lova, pawi ka ti.. "

"Daisy, tinge min neih chu i duh loh tlat a. Eizawnna kawngah lah buaina tur kan nei lova, tinge?? " Ngenngawl takin min melh a. Nichina a thinrim hmel kha chu hmuh tur a awm tawh lo. Mahse ka chhang lo. Sawi tur ka hre lo.

"Ka kal ang e.... " Tiin a chhuak a. Ka thutnaah chuan ka thu reng ringawt. Zorema hi ka duh a, ka hmangaih bawkin ka hria mahse pasal neih hi ka la ngaihtuah ngai loh thil a nih vang aniang ka hreh tlat a. Hnial vak dan tur ka hre bawk si lo.

Zanah a lo leng lova, min rawn be hek lo. Ka va text a, a seen a mahse min reply lo.

A tukah chuan ka thiani kawr thuitir tumin Deby Studio lam kan pan a, kan luh rual chiaha ka thil hmuh avang chuan ka nui tawp chat. Zorema leh hmeichhe pakhat chu megazine enin an nui dun vel a, a rawn hawi chhuak a. Kan mit a intawng chat. A ni pawh a nui hmel a tawp riai riai a. Nizanah min rawn be lova, ka text a reply hek lo. Tunah erawh hmeichhe dang bulah a nui ar ar a, nizan zankhuaa amah neih mai tuma ka rilru ka siam fel vek tawh kha ka paih bo nghal hmak.

"Dais, ka puanthan duh kha an lo nei tawh lova. Hmun dangah kal mai ang" ka thiannuin a tih chuan kan inzui chhuak nghal. Scooty a kan chuan fel hnu pawh chuan Zorema'n min rawn zui ringin ka tinung duh lawk lova mahse ka ring sual a ni. Min rawn zui lo.

"Thil i hresual a nia.. " A rawn luh rualin a ti a. Ngawi rengin thutthlengah ka thu nghal

"Chutia law.. " Ka nui lui sak.

"Daisy, i ngaih ang kha a ni lo.... Vawiin khan" A sawi zawh hmain ka lo pawt chat a "Nimin lawkah min neih i duh thu i sawi a, thinrimin i chhuak bawk. Vawiinah erawh hmeichhe dang bulah i nui a, i hlim a nih kha. Nei tur chea rilru ka lo siam hman kha â ka inti takzet. Tihian kan inkar chu tawp rawh se.. " Ka ti chang fak.

"Maw...? Min nei dawn maw.... " Hlim hmel takin ka bulah a lo thu a.

"Tunah chuan Aih"

"Ka nei dawn tho che... " Ka nghawngah rawn chelhin a lamah min pawt hnai a. Ka rak thut. Tawng ka tum rualin ka hmui chu a hmui hmangin a lo hup chat. Ka tal vak a mahse min kuah ngheh em vangin ka tal chhuak zo lo. Ka lu ka thing a, min fawp uar tulh tulh zawk si.

"Tunah chuan ka thusawi ngaithla tawh rawh le.... " Min thlah rualin a ti a. Ka kut chet ka tum chuan a lo chelh bet hmak.

"Ngaihthlak tur ka nei lo. Min thlah rawh... " Ka tal vak vak a. "Ka ú a nih kha" Ka tawp chiang hle.

"Vawiina i hmuh kha ka U (Vala nu) a nih kha. Hmuh ve che a chak a, rawn hruai ka tum a mahse a thawmhnaw order lam turin kan peng kawi lawk a. Tikhan min rawn hmu a, i hmelah lah khan i lawm hmel vak bawk si lova. Ka rawn hruai ta lo mai alawm.. " Zaidam takin a ti a.

"A la naupan hmel bawk si... "

"A tleirawl tirhin pasal a nei daih alawm. A la upa lutuk lo.. " A thusawi chu ka awih hmiah mahse ka lo thinrim khum ve laklawh tawh si. Ka zak tlat.

"Nizanah pawh min rawn biak loh kha.. " Ka titau tha leh phawt. Ka kut chu a thlah a, ka biangah a dawm a.

"Ka tel lova i awm theih loh zia ka hriattir che a nih kha... " A nui suk a.

"Misualpa.. " A ban velah chuan ka beng vak vak a, a nui duh chauh bawk si.

"Ka hmangaih che. Kei aia hmangaihtu che hi i tawng tawh dawn lo tih hria la, ka kut hi vuan mai rawh. Chuti lo zawng nangmah hi a nia a tuartu tur chu.. " Fiamthu deuh taka sawi ni mah se a dikna chen a awm ve tlat. A tel lova awm hrehawm ti tur chu keimah ka ni. A tawpah chuan 'Aw' ka ti ve a.

"Tunah chuan inneih chiah kan hmabak a ni ta. " A haw dawn chuan a ti sap a.

Ka chhunte biaiin kan chanchin vel chu ka sawi a. Pasal neih ka sawi chuan an nui zo vek. Bialpa ka nei tih ka hrilhna kha a la rei lo ve bawk em a ni. Mahse min lawmpui a, an remti thlap bawk. Mahse haw ve phawt turin min ti a. Ka dawr vel rem felin ka haw vat tur thu ka hrilh.

"An remti e... " Phone in kan inbia a.

"Yes.... Kan innei tawh dawn. Palai ka lo tir nghal ang" A phur lutuk mawlh hi lawm min tihlimtu chu.

"I hmanhnawh a nih kha. Ka haw ve phawt ang chu.... "

"Chutiang a rei. Bakah karleh vela inneih nghal ka duh" A ti leh hmak. Hepa tak hi chu aw....

"I mawl thei em mai. Thla khat vel tal inbuatsaihnan a ngai alawm.. " A upat ngaihtuahin a ngaihtuah kim lo hi ka ti khawp a. Tlangval senior ve si dan thianghlima innei tur chuan hun a mamawh ve tih te chu hriat awm tak.

"A rei lutuk. Inru mai ang.. Ka lo lut mai ang" A âwah chuan a tihtak hmel bawk si.

"A teuh lo. Dan thianghlim chauhin pasal ka nei dawn"

"A rei mai mai alawm. Ka luhkhung mai ang che. Ka lo kal ania.. " Tiin phone a off hmak.

Hepa tak hi chu aw.. Hetiang em ema nupui nei tur phur hi an awm leh tawh pawh ka ring lo e a. Inbual turin bathroom-ah ka lut a, kan intawn dan nuihzatthlak tak te kha ka ngaihtuah let a, khatih lai kha chuan haw viau mah ila tunah erawh ka thinlung zawng zawngin ka hmangaih tawh zawk si. Ka hmangaih thu hrilh luam luam lo mah ila ka hmangaih takzet tawh. Ka phuba lak dan te khan nuih an tiza tawh a, ka hlim pui ta em em zawk chu a nih si hi. Ka thawmhnaw ka thlak fel lai chuan kawngka kik thawm ka hria a, ka hawn chuan Zorema bag lian vak lo nen a lo ding run.

"Ka luhkhung dawn che.. " Tiin a nui sak. A rawn lut nghal.

A tawp e.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)