I RINAWMNA A ROPUI E!----Zualtei B Zualtei

[Zualtei B Zualtei]

I RINAWMNA A ROPUI E!
(Thawnthu tawi)



Zualtei B






A pasal ruang thlaha a nui thei chu mi tam takin mak an ti a, an sel luai luai bawk. A nui hmel chu thinlung atang chhuak a ni tih lah hai rual a ni lo. Van lam hawiin a thaw hak a, hlim tih hriat zet hian an chhing vang vang a, mite chuan mak tiin an en dauh dauh a, an phun mur mur a. An tin ve leh mai. Mahse a tuk lawkah chuan chu a chezia mak tak chu veng chhung titi chaw tui ber a lo ni ta a. Amah lah chuan a uksak vak lem lo. A pasal ruang thlah pawh ni se a hlim a, a nui a ni mai. A hriat loh chu a hlimna tawmpuitu ka awm ve reng tih hi a ni.

Tuna a chanchin ka sawi mek hi kan thenawmnu a ni a, kum 50 a upa a ni. Hmeichhe zawiawi tak a ni lova, nui ring thei zet a ni nghe nghe. A nuih rin vang ngawt hian a nun chu a nuam bik hauh si lo.

A lo pian chhuah dan atangin sawi tan dawn teh ang. Hringtu nu chu a nei a, pa a neih awm a hre lo. Pa telloin a lo piang ve ngawt ti dawn ila, thil ni thei lah a ni hek lo. Sawn a ni tihna a nih chu. A nu chu khaw khat nula hmeltha a ni a, a nu chuan unaupa zu heh zet a nei a, a pi leh pute'n awmngaihna a hriat loh avangin an tuithlar nghe nghe. A nuin a hrin rual chiahin a boralsan a, a pi leh pute kutah a awm ta a. Tha taka enkawl a ni a, an duat bawk a, kum 13 a nih thleng kha chuan lungkham nei lovin a nung ve thin.

A hun hrehawm bultanna chu kum 13 a nih lai atangin a lo intan a. Nat lawkna pawh awm lovin a pu chuan a boralsan ta thut mai le, a tana pa, pu ni tel bawkina a boralsanna pawh a tawrh thiam loh hle laiin a neihchhun a pi pawh chuan malaria vangin a boralsan ve leh ta si. A khawvel chuan ni a hmu ve ta lo. Nimahsela chu a tawrhna chu a bultanna chauh ka tih tawh kha... Thisen zawm nei tawh loa a inngaih laiin hun rei tak liam taa tuithlar lo ni tawh a putea chu lo letin a pi leh pute nena hlim taka an nuih dar darna thin in chu a nupui fanaute nen an lo luah ta mauh mai. Chutih lai chuan kan thenawmnu chu a hawi lawl lawl asin. A putea te chhungkua lah chuan khawsak rel nan zu an zuar leh ta nghal a, a pi leh pute in thianghlim taka an lo enkawl ve thin chu zu zuar in a lo ni ta. A tan chuan na tak hi a ni ringawt.

A tana hmelhriat lohin a in an neih sak lai chuan sawi tur a nei lova, a pi leh pute thihna pawh chu tawrh vak ngaihna a hre ta lo. A putea nupui chuan khawtlang mithmuha mawi tura han duat derna eih pawh nei lovin a khawsa zui nghal a. Keh thei dawma dawm ni ve thin kan thenawmnu chu ama in ngeiah chhiahhlawh dinhmun a chelh leh ta tlat mai.
Thenawm khawvengte tan tawngka chhuahna chi a ni si lo. A putea zurui lahin kut a thlak bang lova, vawikhat phei chu zu in ho zu thlit sak turin an ti a, a duh si lo chu a putea thinrimin a kut ruh tliak hial khawpin a sawisa a nih chu mawle. Hmeichhe naupang tawrh atan chuan a mah mah lo maw.

Tichuan zu leh sa karah chuan a lo thanglian ve zel a, a rawn tleirawl chhoh chuan a rilrua dawihzepna kha a paih ve zel a, a putea te chhungkaw chhiahhlawh a nih rengna chhan tur a hre tawh bik lo. A sual let ve tan ta, mahse chu chuan a chhe lam chauh a hring chhuak leh ta zawk si.

A putea'n Vai sumdawng hnenah sum tam tham takin hralh a tum thu a hriat chuan chu in bawlhhlawh chu a chhuahsan a ngai tih a hrethiam a. An thenawmte puihna a zarah khawpuiah mi awmpui hna thawk turin hlim taka a pi leh pute nena an chen ve thinna in chu mittui luang chungin a chhuahsan ta. Thil tam tak ken tur a nei lo, a pawisa khawl sa tlem te leh thawmhnaw tlem te chauh lo chu.

A vanduaina chu a la kaltluang zel a, tleirawl hmeltha tak a nihna chu a tan vanduaina a ni ve leh tlat. Khawpuia a awmna te chhungkua chu chhungkaw pangngai ve tak an ni a, mahse pa ber chu pawn lama tha tak anga lang si inchunga zu in reng mi hi a lo ni ve leh a, zu a huatna chu nasa tak a ni. A awmna pa chuan mitmeng danglam tak hian a melh fo thin a, hun remchang a la hmuh loh avanga la him mai chauh a ni tih a hria a,chu in pawh chu a chhuahsan a ngai tih a hrethiam a. Hun remchang a nghak a, mahse chhuak ta ngawt se kalna tur a nei bawk si lo. A buai ta.

Tichuan fimkhur takin a awm ve leh ta phawt a, a hlawh a lo khawl ve te chu tam tak a ni bawk si lo. Chutih lai chuan an vengah chuan Rivival camping a awm a, a awmna te in pa ber chu zuin mi ni mah se pawnlam leh kohhran lama inhmang ve tak a ni ka tih tawh kha, nu ber lah veng khat nu fel a lo ni leh zel bawk nen an inah chuan Speaker leh a nau te chu an lo leng lut zut mai a. Pathianin a tana a tirh ka ti dawn nge Speaker nau te zinga pakhat chuan kan thenawmnu chu kawm falin a harsatna chu a zawt chhuak ta a. A khawngaih ve hle a ni ang an bula cheng ve turin a sawm a, a awmna nu leh pa te hnenah chuan "Kan nu nen chauh hian kan ni tawh a, a hriselloin enkawl ngai a ni bawk si. Kei lah rawngbawla chhuak reng ka ni bawk sia nula awmpui tur kan zawng ve mek a, in nula hi fel ka tih zawng tak a nia, khawngaihin kan hnena a chen phal mai ta che u" tiin a dil a.

Pa ber chuan phal lo ru hle mah se Pathian rawngbawltu meuh han hnial chu a hreh a, bakah a mizia dik tak an hriatchhuah a hlau ve tho bawk si nen a kal tir ve ta a. Kan thenawmnu lawmna chu nasa tak a ni. Tichuan chu in inveng reng renga a awmna hmun chu chhuahsanin chupa chu a zui ve tawp a.

A chenna thar chu veng hran daiha awm a nih vangin a lo awmna hmasa te nen chuan an inhmu zui tawh lem lova. A tana Pathianin a tirh te nupa chungah chuan a lawm em em a, lawmthu nise a sawi bang lo. A theih ang tawkin inchhungkhur a enkawl a, a lo rei deuh a a chenna te nupa chuan fanu ang takin an enkawl a. A tan khua a var tan dawn a ni mahna. A nunhlui kha a ngaihtuah tawh ngai lova, thisen zawm nei tawh lo angin a awm tawp. A tan chuan a pi leh pu te a hriatrengna chu a tawk viau e.

Chutia nulat te a han hriat chhoh takah chuan beiseitu neuh neuh a nei ve thin a. Mahse a hnar zel thin. Rawngbawltu in tih takah mi hrang hrang an lut chhuak nasa a, mihausa leh rethei, politician leh sawrkar hnathawk luh chhuahna in a ni a, hmelhriat tha pawh a neih ve teuh phah bawk.

Nula hleitling tawk tak, hmeltha zet mai a han nih takah chuan tih tak zeta ngaizawng vetu hi a nei a, amah pawh chuan midang lo rim ve thin tute ai chuan a ngainain a be tha zawk a. Chupa lah chuan neih a tum nghet bur mai bawk si. A chenna nu chuan chupa chu fahrah ve tho a nih mai bakah sawrkar hna thawk lo mah se hna tha tawk tak nei a nih thu sawiin, a hrehawm dawn loh zia te a hrilh a. A tawpah chuan 'Aw' a pawh ve ta. Rei tak pawh an inzui hmain palai hmel an hmu nghal a, a man chu a chenna pa chuan a rel a, a tan chuan pa a ni tawh tlat alawm.

Mi nupui a ni ve ta. A pasal chu pa lian zet zawt, hmai fang dik zet hi a ni a. A aia kum tlem tea upa a ni. A pasal chuan a duatin a hmangaih hle a, tunhmaa a la dawn ngai loh thil tam tak a dawng bawk. Nupa chauha khawsa an ni bawk a, mi mitmei ven tur a awm lova, kan thenawmnu tan chuan ama in ngeia han khawsak a, ei han rel vel tluka thil nuam a awm leh tawh kher lo ang.

A kuma kum teh meuh an inneih hnu pawh chuan a la rai thei reng reng lo mai a, a ngaih a tha lo tan a.

"I rilru I tihah duh a nih kha. Pathianin a hunah chuan min la pe mai ang. " Tia a pasalin a hnemna chu a tan a tawk lova, inenfiah ngei tulin a hre tlat a.

"Aih, kan innei rei ve tawh. Inentir zawk ang" Lungawi lo aw deuh tak hian a pasal chu a kuah a.

"Inentir kher ngai paw'n ka hre hleinem.. " A pasalin dam thlupa a tih leh chuan titauin lehlam a hawi daih a. A pangchan ve ngamna awmchhun a ni bawk a, a tau ve reng thin. A pasal lah chuan chutia a nupui tau han thlem vel chu nuam a tih zawng tak mai a ni a, an nupa chu innei awm hliah hliah an ni.

"Awle, i duh phawt chuan naktukah kan han inentir dawn nia aw.. " tiin a nupui chu a hnunglam atangin ava kuah a. Chu zan chu hlim takin an hmang dun a.

"Hrehawm ti suh.. Fa ka awt hleinem" tiin a nupui tap chu a hnungzangah a chul heuh heuh a. Tu mipain nge fa awt lo tehreng ang ni.

"Inthen mai ang.. " Tap tuau chung chuan kan thenawmnu chuan a ti a, a pasal chu a hmangaih lutuk alawm, then hial ngam khawpin ni a hmangaih ni.

"A teuh lo.. Kan inthen dawn lo" Lungawilo tih hriat zeta a pasalin a tih chuan a tap uar sauh a. Hetia kan thenawmnuin inthen a rawt mai chhan hi eng dang vang a ni lo, an nupain phur takin inentir turin an chhuak a, result tha lo an neih beisei miah lo an ni a mahse chhanna duhawm lo ber mai an dawng ta si. Kan thenawmnu chu a damchhung leh thihna piah lamah pawh nu a ni thei ngai dawn lo a nih chu.

A tawng mawh hle a, chaw a ei tha thei lova, a mu tha thei hek lo. A tawng chhuah ve chhuna a sawi tam ber chu inthen a duh thu a ni. A pasal a hmangaih em em pawh fa pe thei lo nih chu na a tiin tawrh thiam har a ti hle a. An inzawmna chhutchah hial pawh a thlang zawk. A pasal erawh chuan then a tum chhin eih si lo.

"Fa ka duh vanga nei che ka ni lova, fa kan neih theih dawn loh vangin then che ka tum hek lo. Nupa kan ni a, fa chu nei tura ngaih kan ni. Mahse nupaa min siamtu hi fa a ni lova, kan inhmangaihna vang zawk a ni. Inthen chu sawi buai duh suh, ka damchhung hi chuan ka then ngai dawn lo tlat che.. " tiin a pasal chuan thutawp a siam mauh mai si. Kan thenawmnu chu a lawm rualin a rilru a hrehawm hle bawk. Mahse a pasal berin a hmangaih tlat chuan eng dang mah a ngai bik hleinem. A hmangaih miau alawm.

Tichuan hun a liam ve zel a, hun pui pawh vawi tam tak an hmang dun ve ta reng mai. An karah fa awm lo mah se an inzawmna chu a nghing hek lo. An nghet zual sauh emaw tih tur zawk an ni. An thenawm khawvengten an ngainain an nupaa an inzui chhuak te chu hmuh nuam an ti thei hle.

"Hei aw... Ka siam fel tawh e" A pasal bag lian vak lo chu chhuatah a nghat a.

"Awle.. Ka hman tep" Tiin pakhat zawk chuan pheikhawk a hun mek bawk.

A chhuah dawn chuan "Ka duat, ka ngai ngawt ang che.. " tiin an nu chu a fawp vang vang a, a nupui chuan hna pawimawh vanga a pasal Zokhaw lama kal tur chu a vai liam a.

A pasal taksa pawh hmuh tlak nei lo khawp a chhia, a lu atanga a ke ler thlenga an tuam var luk chu a en a. A tap thei lo, a khawng vek a, khuang ri leh zai ri pawh chu a hre mumal lo. A mittui a luang lova, a taksa a na ngawih ngawih mai a ni.
Hlim taka an inthlah lai kha a mitthla a, nidangah pawh a zin san fo a, hlim takin a lo haw leh thin a nih kha. Tunah erawh a ruang zawk a lo lut ta si. A pasal leh a thiante accident na motor chhe nasa lutuk te chuan a rilru a tina zual a, a pasal tawrh nasat dan tur ngawt a ngaihtuah a, a tuar zo ta lo. A thim vek a, engmah a hre zui ta lo.

A nunah hlimnain zung a rawn kaih tan a, a hma kum lawka a chenna thin in neitunu a tana nu awmchhunin cancer vanga a thih san pawh kha a tawk tawh viaua a hriat laiin, tunah a pasal amah hmangaiha kum sarih chhung duat taka lo enkawl tawh tu a chan leh si.

A harh leh meuh chuan damdawiin khumah a lo mu reng a, a hriat leh hmasak ber chu a pasal chuan piallei daiah a zal san tawh tih hi a ni.
A thinlunga a pai ruk natna tam tak chu chu natna khumah chuan a leih bua a. A phalna la lova a pasal an lo thlah ve ngawt chu a thinrim hle a, 'Ka phal lo.. ' tiin a rak chel chul a, an chiu mut tawp hma chu a thawm a ring tha hle.

Tunah chuan belh tur dang a nei ta lo. A pasal nena an khawsakna in chu a chhuahsan duh lova, in neitute pawhin a duh duh chen a luah theih tur thu an sawi ve bawk. Tichuan a pasalin pawisa a lo khawl ve te chu la chhuakin a intunnun ve na turin eichawp dawr a siam ta tawp a. Kuhva a siam bawk a, nilengin a tha a chawl ngai lo.

An veng chhungah chuan amah khawngaih vang hrim hrima dawrtu a ngah a, a ei khawp chu a la hmu ve zel a. Nilengin a dawra lo chuangkai chu an awm reng thin avangin a nui huah huah reng a. Zanah erawh chuan khawharna namen lovin a tuam thin avangin mut a harsat hle thin.

Nuthlawi ka ti dawn nge hmeithai zawk.. Chuti ang a lo nih takah chuan a kum a la tam lutuk lo bawk nen beiseitu a nei ve leh zeuh thin a. Zuam tawk lah an bo hek lo, mahse zuamawm tak a nih loh zia erawh chiang takin a lo lantir thin thung.

Hun a ral ve zel a, chutiang bawkin a natna pawh. Hunin a hliam chu a thawi dam ve zel a, mahse a vai chuan a ni bik lo. A dawrah chuan a insawrbing hle a, chu chuan rah tha tak chhuahin lunglenna lam hawi chuan a kun tawh ngai lo. Zanah te pawh chuan a chauh thin em avangin khawharna hre hman loin a hnar bawrh bawrh thin.

Kum riat zet a liam leh hnu chuan a inah chuan amah chauhin a cheng ta lo. Ni e, pasal thar a nei alawm. Khatia amah chauha a khawsak ve mawlh mawlh lai khan amah aia kum tlem lutuk lo taka naupang lengtu a nei reng thin a. A tirah chuan naupang alawm a nih tiin a ngai thutak ngai lova midang a lo hnar thin ang pawh khan a hnar ngai lem lo. Chhun zan zawma a lo len tlut tlut takah chuan mawihnai takin midang tan a la inpeih loh thu a lo hrilh a nih kha.

Mahse chu mipa chuan thlah a tum loh thu a hrilh ve thung. A lo len chang te chuan kan thenawmnu chuan a lo be tha duh lo thin a, awm ve lo ang maiin a en thin. Chutianga a tih chuan a kian san ve mai a ring a mahse a teuh lo nasa lutuk. Chupa chuan a hmangaih thu a fah fo va, a hnar nasat poh leh hnaih zual a tum thu nen lam a fah mawlh mawlh bawk si.

Kan thenawmnu mipa mamawh pawha lo inhre tawh lem lo chuan chutiang taka lo hmangaih der vetu chu a nep zo bik lo a ni ang e. Hlim ber anga a nuih huah huah lai pawha a mitmeng chu khawharnaa khat thin, zantin mahnia khum ruak huaia mu mai thin tan chuan chu mipa chu a hlu ta lutuk a. Rei pawh a rial hmain chupa chuan a luhkhung hmak.

A mipa chhungte chuan an fapa nupui chu an duh loh lutuk vangin an fapa chu an rawn ngaihven zui hauh lo. Kan thenawmnu chuan a pasal thar hnen atang chuan a lo thlakhlelh thin hmangaihna tam tak a dawng thar leh a, nupa inhmeh tak zawng an ni ngei alawm.

An eichawp dawr atang leh a pasal nitin inhlawhna atang chuan an eikhawp chu an hmu ve zel a. Nei lo nghei lo an ni mai. A pasal hmasa nena an inneih lai ai khan an khawsak chu harsa deuh mah se a hlim em em tho. A pasal thar chu a aia naupang a nih miau avangin fapa ang taka duatna chin a nei bawk a, a duh leh mamawh apiang chu neih dan a ngaihtuah ngar ngar thin.

Nikhat chu a eichawp dawr bungrua la tura a kalna hmunah tunhmaa a hmelhriat tha Sawrkar hna sang tak chelh nen an inhmu hlawl a. Chu a hmelhriat chuan kan thenawmnu chu a mimal chanchin te a zawt chiam a, a khawngaih ve a ni ngei ang an inmangtha dawn chuan a pasal tana hna thawh awm tawk a lo ngaihven tur thu a hrilh nghe nghe.

Tichuan beisei loh takin kan thenawmnu pasal chuan sawrkar hna a hmu ve hlawl a. An nupaa an lawmna chu nasa tak a ni. Chutah tak chuan kan thenawmnu chuan tawngkam tha hlutzia a hre thar leh bawk. Kha a hmelhriat kha tawngkam tha tak takin a lo chhawn fo thin a, tunah chu tawngkam tha leh thatna avang chuan khawsak harsa lutuk lovin an awm ve thei ta.

Hun lah hi hriat loh laiin a kal mawp mawp reng mai a. A tira nuam deuh zawka an khawsak ve theihna kha an nupa inkar tichhetu a lo ni leh zel a, a mak ngawt asin. An nupa chuan inchhungkhur bungrua pawh tha tak tak an nei ve tawh a, a eichawp dawr pawh chu chawhmeh leh ilo leina tur sum thawk chhuaktu chauh a ni tawh. An eibel ber a ni tawh bik lo. Mahse an nupa inkarah chuan hun a kal zel ang hian khi a awm chho zel a. Chu hun bawk chuan upatna a keng tel zel bawk si.

Kan thenawmnu kum lama naupang chhe zawk zawk tawh lo tak chu a vun paw'n chuar lam a pan ve zel a, a lo in uluk vak ta lo bawk nen a lo thau kung tawh bawk. Mihring hi kan han mak mai mai khawp a, thinlung a thlir zawk ti reng chung si hian taksa mawina hi kan la en kan thei meuh lo chu a nih tlat si hi le.

A pasal chu a rui zeuh zeuh a, pawn lama riah chhuah a ching tan bawk. A ruih chang hi chuan a tawng duh thei hle a, a nupui chu a sawisel vak thin bawk. Chutiangah chuan kan thenawmnu chu a ngawi mai thin. Ka sawi tawh ang khan a pasal hi amah aia kum tam taka naupang a nih vangin a fapa chei deuh thin a, a duat thei hle ka tih tawh bawk kha. A pasal chu a nihna ang ang chuan a pawm zel tawp.

Zu chauh emaw a ruih thin a tih laiin a pasal chu a lo kaisang der tawh a. A banah lah chuan inchiuna hnuhma a lo awm thliah tawh a nih chu.

Chu chauh chu a la ni lo, ngaihzawng dang a neih san ta fo mai. Kan thenawmnu chuan tunhmaa a khawharna ang kha a tawng leh ta. Zanah amah chauhin khumah a mu tlaivar thak thin a, a pasal lo haw hun nghakin a meng kar thin. A pasal chu a han khak ve deuh lahin amah bawkin hrehawm a tuar leh thin si a.

"Nang fa pawh min hrin sak thei lotu ka lo nei che hi ka inchhir.." Tia a pasalin a chhan tum phei chuan kan thenawmnu chu a tap tlaivar thak asin. Ni e, fa a nei thei lo, chu thil chu hre reng chungin a pasal hian a nei lui tho a nih kha mawle. Fa a hrin sak thei ngai dawn lo tih a hrilh hnu pawha bang lova hel thintu a pasal kha khawnge a awm tak..?

"Fa i awh viau chuan i ngaihzawng lakah khan nei mai la, keiman ka pawm dawn nia.. " tlawm ngawih ngawih chunga kan thenawmnuin a tih chuan a pasal chu a nui hak hak a. Hmuhsit hmel zeta kan thenawmnu melh chungin.. "Ka fate nu atan pawh ka duh lo che, han inen ta che, tar lam i hnaih hle tawh a nih hi, engtinnge naute te i enkawl theih tehlul ang ni.. " tiin a chhuahsan hmak.

Chu tawngkam a sawitu tana hote chu a lo dawngsawngtu tana a nat zia hi vawiin ni thleng hian ka la sawifiah thiam lo.

A pasal chuan an neih sum a chen a, a nupui dawr chu an ei leh in a ni leh ta ber mai. A hlawh zawng chu nawmchennan a khawh ral vek thin a. Zu leh drugs-ah a tlan a, hmeichhia lah kawp bik pawh nei loin a kawp kual zut a, zan rei tak tak thlengin nuam a chen thin. Amah hmangaiha mittui nena lo nghak thintu a nupui te zawng a rilru sirah pawh a lang lo hrim hrim.

A ruih at chang lahin a nupui chungah bawk a tuan a, "Nang ka lo nei kher kher che hi a pawi anih hi.. Nang hi lo nei lo ta che ila chuan tun ang hian ka awm tawp lovang. " tih tawl chang lah a ngah. A nupui chuan engpawh sawi se a lo ngaithla mawl tawp tawh a. A tuar hle nachungin a tilang ngai lo thung.

"Nang ang hmeichhe upa tawh lutuk, itawm loh ropui si.. " tih te a ching chho ta zel a, inchhungkhur bungruaah tuan zui lehin an neih bungbel tha chu a chhe zo tawh.

"Thiani, chhuahsan mai rawh.. Hetiang ringawt zawng a ni tawh em em love. Inenfiah a mamawh a nih hi... " Tiin thenawm khawvengte chuan han ti ve thin mah sela, kan thenawmnu chu a nui liam mai a. A pasal then tura thurawn petu lah chu an awm reng lehnghal. A tawpah phei chuan tuma'n kan thenawmnu chu khawngaih enah an en tawh lo. A dawihzep vang leh mawl vanga a pasal pawh sualah an puh thlu zo vek tawh. A pasal sual chhanah chuan 'A nupuiin a then ngam lo va, a hrem ngam bawk si lo. Sual awm reng a ni.' tiin an lo sawi ve chhen bawk. 'A phu tawk chiah' lo ti tawk lah an bo hek lo.

Kan thenawmnu ngaihdanah ve thung chuan, 'A ni(A pasal hmasa) mahin kum sarih chhung fa ka pe thei lo chung paw'n min hmangaih thei a nih chuan keipaw'n ka pasal that hun hi ka nghak thei em em ang' tih a ni tlat.

Veng chhung numawl ber thanin a thang a, a pasal chu an tan zawk hialin ka hria. A pasalin a lepler San a, vawi tam a thlim a chang pawh chuan a phunnawi ngai lova. Vuina tawngkam chu sawi loh a nat thu pawh a sawi ngai hek lo.

"Nui, ka lawm e aw.. " Tiin a pasal chuan a taksa a thlah a. Zu leh drugs tihpawlh reng rengin a nun a hmang a, hmeichhe lamah lah a tlan nasa hle anih kha, a tawrh tur dik tak a tuar ka ti mai HIV positive a ni a, rei tak pawh an inenkawl hmain a boral nghal bawk. Mahse a hun hnuhnungah chuan a nupui amah nghak rengtu hmangaihna kaltlangin Pathian hmel a hmu a, a nupui hnenah chuan mittui luang zawih zawihin ngaihdam a dil bawk. A nupui pawh chuan a pasal lo let leh hun chu a lo nghak reng thin a nih kha, a pasal chu a lo pawm leh a, a lo kuah a, a ngaidam bawk. Nilo, a lo ngaidam sa reng tawh zawk a ni.

A pasal thihna avanga a hrehawm tia a indawm kun lo te chu mi mak tih a lo tling leh hman a, kan thenawmnu erawh chuan 'Ka rawngbawlna ka hlen e.. ' tiin hahdam hmel takin a thaw huai a. Zanah chuan mumang bo thak khawpin a muhil siai siai a.

Khawvelah hian ni a sa reng thei lova, khua a dur chang a awm a, ruah a sur a, tek a tla buan buan thin bawk mahse a tawpah chuan ni bawk a sa leh thin a ni lawm ni? Chutiang bawkin hringnunah pawh thil a thleng thin. Kan thenawmnu nun chu hrehawmnaa a khah chang a awm a, hlimnaa a khah hun pawh a awm bawk. Mal taka a awm laiin a tan nupa fel tak an lo awm a, hmangaih takin an enkawl a, tichuan pasal a aia tha leh fel awm thei tawh ngai lo tur a nei leh a. A hlim a, a mal hek lo. Nimahsela, chhum thim chhah khup mai bawk chu a lo lang leh thin. Hrehawmna bawk a hmachhawn leh a, mahse a tuar a, a tuar chhuak ta. A tawpah chuan a rawngbawlna a hlen ta.

A hnukchah hun nghak tih hriat zetin a inah chuan mipui an thu tlar dul a, ka hmaa hmeichhia nen chuan chung mipui ho chu kal kanin room-ah kan inzui lut a. Khuma chau tih hriat zeta mu bulah chuan ka thu a, a mit chu fiah lo zetin a khap reng a. A beng bulah chuan 'I rinawmna a ropui e.. ' tiin ka phun sep a. Khawvela nui hmel mawi ber mai chu ka hmu a.

A tawp ta.