MINE IN MY HEART----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

MINE IN MY HEART----Zualtei B Zualtei

Unread post by Zualtei B Zualtei » November 27th, 2020, 10:32 pm

MINE IN MY HEART

ZUALTEI B





Ka kut vuana ding mipa mitmeng fiah zet chu ka en kal a,a hmel,a pian,a nungchang,a nihnaah hian sel tur pakhat mah ka hre lo.Sawi tur a nei a,ngaihthlak erawh ka hreh a ni.A âw a thian karh a,a zam a,mahse sawi ngei a tum nghet tlat thung si.

"Min nei rawh.."a rawn ti chhuak ta nge nge a,a nui bawk a, mahse ka nui ve thei ta tlat lo.He ka mipa hmangaih a inhriat hma hauha ka thinlung nei reng tawhtu hi chhanna duhawm pek theih ka va chak tehlul em.

"Sir.."ka ti sap a,a mitah pawh ka en ngam lo.Ka kun ngiai a,ka ṭah a chhuak ut ut lehnghal.

"I hriat kha....."ka ti leh a,ka ṭawng chu a ri em pawh ka hre lo.Keiin a rik leh rik loh pawh ka hriat loh laiin a tan chuan a lo ring tawk hle a ni ang ka kut a vawn chu a thlah a,a nui hmel kha lungngaihnaah a inthlak hlawk bawk a,lehlam hawiin a thaw hak a,kan inkara buaina leh kan rem theih loh chhan hi kan va hre chiang dun si em.Hnam khat kan ni tlat lo.

Kum thum liam ta khan kan intawng a,board exam ka damchhunga a vawikhatnana ka hmachhawn hnua result duhawm tak nena ka ram ka chhuahsan a,ram vawt tak leh nuam em em maia zir zawm tura ka kal khan.Mahni ram ni lo leh ka zalen lohna hmuna awm ta chu ka nguai a,ka duh zawng pawh sawi ṭha ngam lovin Private hostel-ah chuan ka awm ve ta rawi a,school kan ṭan ni chuan hrehawm ka va ti tehreng em.Language class hmasa berah chuan ka hmu a,a sangin a vun a nalh em em a,ka hmuh tirh aṭang chuan ka vei nghal bur a ni tawp.A mahah sawisel tur leh iaina tur ka hre lo ka Mizopui a ni lo tih chauh lo chu.Ani chu ka tana a hminga koh mawi a ni lova a chhan chu ka Language teacher a ni miau a.

A hmel ka hmuh ni aṭang chuan ka nun chu a hlim ve leh deuh a,hun a liam a,ṭhian ka siam ṭan ta bawk a,a nui hmel hmuh tur a awm lova,min hriat pawh a rinawm loh.A class-ah chuan ka ṭawng ngai lova,a explain lai chuan mit tla lek lovin ka en reng ṭhin.A subj ka zir nasa bawk a,ka mark a sang thei hle bawk.

Hun a liam a ka kum khatna chu ka hmang zo ve ta reng mai.Mak tak maiin ka hnam pui ni lo,kei aia kum 15 vela upa tur chu ka hmangaih ta tlat a,ka awmdan ka ngaihtuah chian chuan duh satliah ka ni lo.Ralkhat star ve mai mai atan ka duh a,ka vei em em lai paw'n hmangaih tur ang chuan ka indah ngai lo mahse a nih tur a ni zo tawh si.

A vawihnihna atan board exam midang ram aṭangin ka exam leh a,ṭha taka exam ka zawh hnuin mahni in lam panin ka haw ve ta.Result chhuah ni chuan ka beisei phak loh hnen aṭang call ka dawng a,lawm avangin leh zam avangin ka khur thei hial.

"Irene.."a âw mawi tak maia ka hming a rawn lam lai chu ka lung a phu dut dut a.

"Aw..Sir"ka ṭawng ri chang chang a ni.

"I result rawn hrilh che ka tum a..Distinction-ah i pass e,ka lawmpui lutuk che ania"lehlam a mi chuan a rawn ti a,chhan dan tur ka hre lo takzet.

Amah bawk chuan "Lo inenkawl ṭha rawh aw..."a rawn ti leh a,bah nuaia chhangin phone chu a hmet tawp a.

Kan chhungte leh kan ṭhenrual ṭhate lawmpuina ka dawng nasa a,zanah pawh inleng kan nei ve nawk a,thingpui ka lum zing mawlh mawlh hle.Zan a rei deuh hnu chuan inleng pawh an ṭin ve a,ka room-ah hla ngaithlain khumah ka let ka let a,ka phone ri ral ral chu ka ban a,amah a ni.

"Hello.."ka âw chu a khur deuh a.

"Irene..i hnena sawi duh ka nei a"

"Aw..sawi la"

"Tunah chuan ka student i ni tawh lo bawk a,ka ngaihzawng i nih theih lohna chhan tur ka hre tawh lo"

A thusawi chuan min fan chhuak vek a,hnam dang a nihna leh ka tana chhiar tham fe a upa anihna chu mahni inthiam chawp chungin ka hre lo der ta a,ka thinlung neitu a nihna chauhah chuan duhtawk lovin a thinlung neitu nih chu ka thlang a,ka hmangaihna chuan ka mit a tidel ni lovin,keimah a mihringa hian ka hmasialna leh chan ka hlauhna avangin ka mit ka tidel zawk a ni.

Hun a liam a,ka zirna pawh chu ka hmangaih berin 'Ka ram' tia a chhalna hmunah chuan ka chhunzawm leh zel a,a zirlai ka nih lai khan vawikhat pawh a mitmei ka hmu ngai lova mahse tunah erawh khawvela hmeichhe awmchhun ang maiin min en a,min duat a,ka naupanna a ngainep ngai lova,hoteah pawh min rawn zel ṭhin.Min hmangaihna a thiam ang tawkin a tilang a,min zahpui ngai hek lo.Mahse kei erawh chuan a tih ang hian ka ti ve thei ngai si lova.

Vawiina a thusawi kha ka ngaihtuah let neuh neuh a,"Min neih chu engvanga harsa ti em em nge i nih..Ka hnam avang hian maw..min hmangaih a ni lawm ni..?"

Hrehawm a ti a,sawi zawm pawh a duh tawh lo mahse a sawi ngei angai si."Ka tihpalh..nupui nei rual ka ni ve tawh a.."lehlam a hawi leh a,van lam enin a dak vang vang a,a rawn sawi zawm leh a"Min zui thei mai lo em ni..I tan kei min neih chu a harsa viau em ni?"a ṭawng chu a chang fak a.Kei erawh mittui tling kiauin ka ding a.

"Sir....khawngaihin..."eng nge ka sawi ang.Ka hmangaih a,neih pawh ka duh.Damchhunga a kianga awm ka duh a,ka thlang ber fo ṭhin ang.Mahse ka thei si lo.Ka rilruin Pathian ka dem a,ka neih theih loh tur min hmangaih tir avang chuan ka haw hlur bawk.

Ka darah a rawn chelha "Mawh..min zui mai rawh.Harsa leh hrehawmin i awm ngai lovang.Ka chhungten nupui nei turin min lo ti ve chhen a mahse nang lo chu neih ka tum lo.Hnam hrang innei tam tak an awm alawm,an zinga pakhat chu kan ni ve mai dawn alawm.."a chawl dat a,ka hawi chhuak ngam lo.Ka mittui ka dang zo lova,ka biang a sa pup pup a,ka kut a thlan dap a,ka awm zawnah chuan hnawhtu nei ang maiin ka awm a.

"Ka tihpalh..ka tihpalh.."ti sapin min kuah bet a,a dar thleng vel awrha sang ka nih avang chuan min hliah bo hneh hle.Ka sam a chul a,a beisei ang chhanna pek theih ka va chak tehlul em.

"Ka hrethiam e....i thlan theih loh tur duhthlanna siam che ka duh lo.A upa zawk ka nia..."thawk a la vang vang a "keiman ka thlah ang che.."a rawn tichhuak a.Thu tawp a siam ta.

Karhnih chhung chu kan inbe tawh lova,ka ei thei lova ka in thei hek lo.Ka ngai a,biak ka chak a,kuah vawng vawng ka chak a,hmangaih taka pawm leh pawh ka duh.

Min neih a duh tih a sawi lai khan ka rilru hian hmun tin a fang chhuak a,kan inkarah hian kan inneihna tur daltu dang kan nei lova Mizo ka nihna chauh lo chu.

Keimah chauh inngaihtuahin ka hmangaih ber hi nei ta ila kan hlim ngei ang mahse chu hlimna chuan eng chen nge a daih ang le.Fa kan nei ang a,ka fate chu Mizo an nih a rem ve tawh dawn si lova,Mizo ṭawng zirtirin duhtawkin hmang thei mahsela he Mizo 'A aw b' hi a neitu an ni ve ngai dawn si lo.Inchhungkhurah titi kan vawrh chhuah dawn paw'n Mizoram kawng chhiat zia lah sawi pui theih an ni lo ang a,an ram a nih ve dawn loh avangin veiawm pawh an ti ve kher lo ang.An lo puitling ang a,MZP-ah Committee member chu sawi loh nawrh an huaihawt ni pawha thingpui leh ilo buaipuitu takngial pawh an tan chuan ban phak chi rual a ni dawn si lo.Chu zawng zawng chu ka ngaihtuah a,ka pawm thei hlawl lo a ni.

A no. chu delete tawh mah ila ka thluak te tak te hian a theihnghilh ve der si lova,zawimuangin ka pick up a,karhnih hnuah a vawikhatnan kan inbe leh ta.

"Nupui ka nei dawn a,midang kâ aṭanga hre turin ka duh lo che.A tawpna atan hmuh che ka duh a,i thei ang em..?"ka natna leh hrehawmna dahṭhain inhmu tura kan intiamna hmun lam pan chuan ka chhuak a,kawng tluan chuan ka mittui a luang a,ka thlah a ngai dawn ta.

"Sir...."a lo nuisang a,a der maia nui a ni tih ka hmangaihzia ka hriat tluk zet hian ka hria.A cher ve deuh a,a khabe hmul pawh a zuah nge ni a met tur paw'n chakna a nei lo zawk ka hre lo.Ka hriat chhun chu he mipa thinlung hi keimah avang hian a hliam a,a thi zawih zawih a,a tuam dam lam hna erawh ka thawk thei lo tih hi.

"Inenkawl ṭha rawh aw..i cher viau ania.Hetiang chuan engtinnge ka thlah theih ang che."tiin min thlek vang vang a.

"Hrehawm ti lo la..kei min theihnghilh tumin hmalam pan la,chuan hlawhtling ngei bawk ang che..."min fuihna leh hmalam pan tura min duhna hlir a sawi a,a zirlai ka nih laia thu ṭha min hrilh ṭhin ang khan thu ṭha min hrilh bawk a.
A tawpnana kuah leh tura min ngenna erawh hnawl sakin ka kalsan a.Ka kuah leh a,a ṭanga ka bei leh anih chuan kalsan ka phal lo ang a,mahni hmasial takin ka zui duh mai ang tih ka hlau a ni.

Harsatna kan tawh chiah hian min hmangihtu te chu an lo hriat ṭhin a,chutia hmangaihna avanga ka tawrh lai chuan ka ṭhiante ka kiangah an awm reng a,ka ṭahin min ṭahpui a,ka nuihin min nuih pui bawk a,anmahni vang chauhin ka rilru na a zia ṭhin.

An inneih hun chu naktuk a ni ta reng mai.Kan thlalak dun ho leh kan sulhnu ṭhenkhat chu thenfai tumin ka rilru ka siam mek a,chutih lai tak chuan call ka dawng a.

"Sir...."

"Irene.."a âw aṭang chuan a ṭap tih ka hai lo.A inhnit feih feih a,keipawh ka bang bik lo ka kâ hupin ka ṭap zawih zawih a.

"Irene..ka hmangaih che tih i hria tiraw.."a rawn ti a.

"Aw...Sir...."ka âw chu control tumin ka bei a.

"Nupui dang pawh nei ila....ka thinlung kil khat hi i luah reng dawn tih hi lo hre rawh aw..."a inhnit leh feih feih a "Nangpaw'n i hnampui ngei nei la..I Mizopui ngei..mahse ka thinlungah hian i tan hmun a awm reng tih erawh theihnghilh ngai suh.."

"Sir...."sawi harsa ka va ti tehlul em!"I nupui tan pasal rinawm tak ni la..damchhung atan i nupui leh i fate tan rinawm tlat ang che aw"tiin ka thlah a.Ka hmangaih ber midang nena hlim tura duhsakna hlan chu a harsa takzet a mahse thildang hlan tur ka nei si lo.

"Chutianga ka tih chuan i hlim dawn em ni..?"

"Um..."

"I hlimna siam tluka chak hi ka nei hleinem..Ka nupui tan ka rinawm ang mahse hei erawh hre rawh ka lung hi a phut chhung chuan ka hmangaihna che hi a nung reng ang...."

A tawp ta.Kan inkara hmangaihna par mawi vul chuk ṭhin chu a chuai ta.A zung erawh kan thinlungah a awm reng tawh ang.

KUM LI HNUAH CHUAN

Ka ṭhiannu nen chuan hmanhmawh em emin bazar tawt tak karah chuan kan inhnawh phei ve zel a,Mizoram a ka awm vang vang hnuin hna ka hmuh tak avangin ka lehkha zirna hmun a lo ni bawk nen ka rawn let leh a,ṭhian hluite nen te kan inhmu leh a,a nuam phian.A ṭha chan hman loh hlau ang hrim theihtawpin kan tlan a,puanthan sale kan channa a rei tawh bawk a,kan hun ṭha hi bawhpelh kan tum lo hrim hrim.

Mipui thawl deuhna kan thlen chuan ka khawng ta tlat a,ka hma zawna mipa lo kal phei mek chu chechang lovin ka en reng a,a kokichhawn mek mipa naupang duhawm tak nui siai te chu a hmuhnawm ka ti a.A pa nuihmel ka hmuh phei chuan ka hlim a ni.Min rawn en a,min nuihsang chungin min rawn pan hnai a,mipa naupang chuan naupang thil zawrhna dawr lam a kawk a,hmeichhe pakhat bag lian deuh tak ak chuan a pa koki aṭang chuan chawi thlain naupang thil zawrhna dawr lam pan chuan a hruai phei ta a.

Inhmachhawnin kan ding ta ran mai.Ka ṭhiannu chuan mak ti takin min thlir reng a,ka ngaihven hman rih lo.

"Sir.."ka ti zawi raih a,a hmel patling tak chu hmuh a nuam kher mai.

"Sir....i lung kha.."a awm zawn ka en a"A la..a la phu reng em.."inthlahrung tak chuan ka zawt a.

Nuisang chung chuan"Aw..a la phu a,phut tir reng pawh ka tum"ka nui ve thei ta.

Dawr chhunga awm mipa naupang chuan a rawn ko a,chu mipa naupang a en a a nuihmel chu kei min hmangaihna aṭanga rawn chhuak a ni lo.A fapa,a rila rah,a neihchhun a hmangaihna aṭanga rawn lang chhuak zawk a ni.

Ka kalsan hnu chuan hringnun kalsiam hi ka ngaihtuah neuh neuh a,ka hmangaih ber nen kan innei thei lova,kan inhmangaihna chu a par thliakin a zung chauh kan zuah ta a,nupui dang neiin fapa duhawm tak a anei a,keipawh ka hnam pui buaina leh harsatna ka neih miah lohna tur nei turin min duhsak bawk.Nupui dang a neih vang hian min hmangaihna kha a dai chuang lova,a thinlung kilkhat mawitu chu ka la ni fan a,chutiang bawkin ka tan pawh a ni hi ka thinlung kilkhat mawitu a ni.

Ka neih loh avang hian ka hmangaih lo tihna a ni lo,ka ta a ni lo chung pawh hian ka hmangaih reng thei tih zawk a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)