KA DUH THO CHE----Zualtei B Zualtei

Story tawi te te emaw luanliamna emaw post na
Zualtei B Zualtei
Posts: 51
Joined: December 16th, 2018, 5:56 pm

KA DUH THO CHE----Zualtei B Zualtei

Unread post by Zualtei B Zualtei » November 27th, 2020, 11:16 pm

KA DUH THO CHE!


ZUALTEI B






Ka thiannu Daisy dawr ka nghah pui lai chuan pawn lamah ri hluai an awm a, ngaihven lem loin ka phone chu ka khawih neuh neuh a, Daisy zawk chu en turin a chhuak a.

"Malsawmhlu, lo kal vat rawh" ka hmingpuma minlo koh vak avang chuan ka tlan chhuak ve nghal a, sana dawr kawtba ka thil hmuh mai mai chu(h).

"Lalrinpui" ka vin vak a, mipui ho chu an lo hawi thap a, ka zak bawk si. Ka nau Lalrinpuia chuan mipa pakhat a kawr awmah thamin hnek alo tum mek chu niin. Min hmuh rual chuan a thlah nghal a.

"Lo kal nghal rawh" Ka vin leh vak a, ka kal sawn nghal a, ka hnungah chuan alo kal ve a, mipui ho chuan min en la en duh em em zui a, a van zahthlak tak. Dawrah chuan kan inzui lut a, ka mitah min en ngam loin a kun tlat a.

"Engngatinge buaina i siam a, khawlaiah lehnghal, I zak miah lo em ni? " ka vin tawh lo naa ka tawng chu a chang fak thung.

"Eng lo, U, sana kan inchuh a. "

"Sana mai mai avangin khawlaiah buaina i siam a maw..?"
Dawra lo lut mek pa chu ka va en a, nichina a intihbuai pui pa kha a niin ka hria, a kut vei lam chuan sana alo keng bawk a, hepa hian ka nau kha khawih duh sela chuan a sawisa hrep thei ngei ang, mahse ka nauin hnek a tum pawh khan a dawh mawl tawp kha ania. Nichina Lalrinpuia ka koh lai lah khan alo hawi chiang em em zui. Lalrinpuia'n chupa chu a hmuh chuan tawng a tum a, tawng lo turin ka mitmei zeuh a.

"Min lo hrethiam ula, nichin khan he sana hi kan lo inchuh a" Sana ka hmuh chuan Lalrinpuia ka melh rum nghek a, hmeichhe sana inchuhin mi alo intihbuaipui a nia, zahthlak hian..

"Lalrinpui, hmeichhe sana mai mai inchuhin khawlaiah buaina i siam a maw" Ka thinrim lutuk tlat.

"U..sana kha i awh deuh ang chi kha ania, i birthday-ah present che ka duh a, lei tuma ka va kal khan hepa hian minlo lei khalh a, a dang a awm tawh si lova." Kun reng chung chuan a sawi a, ka nau hian keimah vangin buaina a siam a maw....kei lahin ka lo hau vak lehnghal a, ka inthiamlo letling zawk. Ka khawngaih bawk si, min en ngam miah lo khawpin ka lo hau a, sawi mai tur pawh ka hre lo.

"Hei, sana hi nei zawk rawh" Pakhat pa chuan ka nau kuta hmehbel pah chuan a ti a, ka zak takzet a ni. Ka nau chu ka signal leh a.

"Ka tihpalh lutuk nichin avang khan" Ka nauin a tih chuan a khi suk a.

Lalrinpuia'n pawisa pek a tum chuan a la duh lova, mahse ka pe lui a, tunge a nih pawh kan hre lova a hnen atanga thil kan dawn ringawt chhan tur awm hek lo.

"Duata, ka tihpalh aw, ka lo vin vak che a" Pakhat pa chhuah hnu chuan ka ti sap a, ka nau chuan nuisangin "A pawi lo.." a ti ve sap.

"Min bun tir dawnlo em ni? " Sana en chung chuan ka ti a, phur deuh hian min bun tir a, ka nau hlim hmel ka hmuh chuan ka thawveng huai mai.




Vawiin chu Bus accident a awm vangin ka duty tur aia rei ka awm a, hliam na lutuk an awm lo naa hliam tenau nei an tam khawp mai. Khuma thu pa lam pan chuan ka kal phei a, hepa hi ka hmu tawh chiang alawm. Duata nen sana inchuhpa ngei kha a ni. A chal chu a kak ve deuh a, ani paw'n min hmuh chuan mak a tih hmel deuhin ka hria, ka nuih a, a chal chu ka thui sak nghal a, ka thui zawha hmanrua vel ka dah fel lai chuan min lo bia a.

"Hmannia 'Lalrinpui' i lo tih vak khan keimah min ko emaw ka lo ti hman a" Nui suk pah hian a ti a.

"Maw..?"a thusawi chu ka hrethiam lo.

"Keipawh hi 'Lalrinpuia' ve tho ka nia" a kut min rawn pek pah chuan a ti a. Ka kut ka en chuan nui chungin "Ka chibai thei lo che a nih hmel" ka tih chuan hriatthiam hmel deuhin a kut a la thla a, kutkawr bun chung chuan chibai chi ni hek lo.

"Tunge i hming ni ve a?"

"Malsawmhlui"

"Chuan..?"

"Eng nge chuan" A sawi zawh rual chiah chuan ka lo ti ve a.

"Engtinnge ka koh dawn che?" Hei hi lawm ka fin lohna pakhat chu..ka hming ka sawiin min koh dan sawi tel nachang ka hre thin lo.

"'Ms' min ti dawn nia"
Damlo dang an rawn hruai belh avang chuan ka kalsan ta a, engngatinge maw khapa bulah khan ka laih deuh tlat le....

Kartluana hnathawh chu a chauh thlak thei ngei mai..Inrinni ka chawl a, ka awm hahdam thei ang ka lo ti ve a mahse Daisy-in a nu damdawi ina kal pui a duh vangin dawr nghah sak turin min ti a, ka hnial thei lo, damlohna thil anih phei chuan. Mi tupawh hi inmamawh tawn vek kan nia, ka mamawh ka rin ngai miah loh pawh kha ka la mamawh ve thei tlat chuvang chuan inpuih tawn hi hreh lo ila, a nuam a ni mai.
Chau deuhin dawr ka nghak a mahse ka rin aiin ka inhralh thei zek a, a nuam letling zawk. Thil tui deuh ka inlei tir ngei angai ang. Kawngka atanga mipa pakhat lo lut chu ka en reng a, min lo nuih deuh a ,Rinpuia chu ka lam panin alo kal zel a.

"Eng nge i rawn tih dawn?" sawi tur dang hre hek lo.

"Hei, ka chal i thuina hi a pun a, ka lo zawng che"

"Maw..!" ka hlauthawng lutuk chu ka thutna atang ka ding hluai a, midang hliam ka enkawlin tha lo an la awm ngai lo, nilo hepa hian ka enkawl tha lo anga sawiin min timualpho ang a, kan damdawi in hming pawh hi a chhiat phah ang aw.....Ka mangang hmel a hmuh chuan alo nui chhuak huk a.

"Ka fiamthu anih kha, ka tha tawh lutuk, a mawiah bandaid ka bel ve mai mai anih hi" ka van ngei mai mai tak, min tihhlauhthawn hman zia kha aw...ka melh rum nghek.

"Chuti eng nge ilo tih dawn?"

"T-shirt rawn lei ka tum a"

"Eng atan" Kei hi eng nge maw ka hriat ni..t-shirt chu hak atan lo chuan engatan nge a tih tehlul ang. A bulah hian sawi tur ka hre thlawt lo, ka buai zo vek. Ninawm....

"Chu lei i phal vak na nge?"Nui deuh sang chung chuan a ti a.

"Phal tehreng mai, in lei loh hi lawm kan hlauh" pangngai thei ang bera lan ka tum a.
Jockey t-shirt pahnih chu a lei a, ka number min dil a, pek loh chhan tur ka nei tlat lo, ka pek hnu chuan a thil lei nen chuan a chhuak ta a.





Kan inbe ta zeuh zeuh a, a hnuah phei chuan kan inbe reng zel a, minlo biak hun pangngai a min lo biak loh te hian ka lo ngai hman a, ka duty lai te hian ka lo ngaihtuah leh vang vang zel. Phat rual lovin ka duh a ni.
Mahse sawi chhuak hmasatu nih ka tum lo bur. Sunday inkhawm ban chuan Daisy nen ka room-ah kan awm a, counselling clas ka kal leh ta.

"I thupui vawn 'Hmeichhia chu a induhtawk em em tur a ni' tih hi i thlak loh chuan pasal tur i hmu zo lo mai ang" a tih chuan ka hmui ka lo tihpawrh khum a.

"Malsawm-ek, ka thusawi hi ngaithla rawh. Hmeichhia pawh hi tlawm zawka tan a tul chang a awm ve ania, engtiklai paw'n i dik reng thei biklo. Ngaithlatu nih ve pawh a tul thin. Thil awmzia hre lova induhtawkna leh chapona vanga intihnat hi a tha lo, i hria em?"

"Ninawm..counselling class ka kal peih lo ania"

"I induhtawkna leh i chapona i dahsan em vang anih kha Henry nen paw'n in inthen. A insawifiahna i ngaihthlak sak duh lova, thu leng vak mai mai i awih zawk a, a insawifiahna ngaihthlak sak kha nep thlak i tia, a hnuah thudik i hria a, chumi hnu pawh chuan tlawm zawka tana va biak kha i duh chuang lova, i ngaihdan i kal tlang pui a, tunah chuan nupui a neih san daih che hi"

"I ninawm, kha thil kha sawi ve ziah suh. Pathianin ka tana a ruat a ni lo a ni ve mai"

"Pathianin kan tana a ruat pawh hi kan zawn thiam ve tho angai ania, i tana a ruat kha ilo hnar reng pawh a ni thei asin"

"Ka ning ka ning" ka lu chu lukhamin ka khuh daih a, rawn tawng leh a tum chuan ka zai vak vak a

"Ka vai bik lawn'g e, pasal pakhat leh thingphur khat chu..."



Rinpuia nen pawh a hma aiin kan inbe nasa zual a, Daisy dawrah kan inhmu ve zeuh zeuh thin a, Daisy dawr piah lawkah hian Computer zirna dawr a nei ve a, Daisy dawrah chuan kan pathumin kan awm a, dawr hnung lama varandah-ah chuan kan thu dun a, Video kan en dun a.U Ben-an 'Do you know what chhangban is?' a tih lai chuan za lutuk hian ka nui chiam a

"Inngaizawng ve tawh mai ila" Ka nui tawp chiang hle, ka va en chuan thu tak hmel deuh min en a, min rawn fawp thut a, a inlahrang lehnghal a.

"Eng thil nge i tih a" ka zak bawk si chuan ka ngaihtuah naa lo awm hmasa ber chu ka sawi tawp.

"Inngaizawng te chu an infawp thin alawm, kan inngaizawng tawh a, kan infawp ve a ni mai a, ni lawm ni?"
Sawi tur pawh ka hre lo, ka en reng lai chuan min rawn fawp nawn leh a, ahma ai kha chuan a rei zawk. Keipawh chuan ka lo fawp let ve a, kan inngaizawng ta der mai.!!



Kan induh em em a, inhauh buaina kan nei ngai lo, ka tan a inpe zo em em a, min duat bawk. Sawiselna tur hi ka hre thlawt lo. Chhungkaw chungchang erawh kan sawi dun ngai lo.


Kan inkawp atang thlahnihna kan hmang ve mek a, zanriah ei dun kan tum avangin ka duty zawhah taxi lain a dawr lam ka pan a, dawr atanga Rinpuia hmanhmawh taka alo tlan chhuak ka hmuh chuan taxi kawngkhar chu ka hawng a, mahse ka phone ri chu hria in ka la a, Rinpuia a ni.

"Hello" Rinpuia chu car-ah a lut a.

"Duat, thil pawimawh tih tur dang ka nei thut a, zanriah chu nidangah ei dun mai ang aw, ka tihpalh lutuk" Car chu a tlan chhuak nghal a.

"Um,,a pawi hleinem" taxi driver chu car chu zui turin ka signal a, engngatinge maw ni zui ka chak tlat. Ka lakah thil zep a nei tlata hriatna ka nei.

"Nih nakinah ka lo be leh dawn che nia, bye aw"

"Bye le.."

Kan hmaa car tlan chu kan zui zel a, khaw pawn kan thlen hnu chuan car chu kawngsira hmeichhe ding bulah chuan a ding a, a hnung deuhah chuan kan ding ve bawk. Rinpuia chu car atang chhukin hmeichhia chu a va kuah a, hmeichhia chu a tap in ka hria, kei ai chuan a naupang ngei ang. Ka thil hmuh avang chuan ka na takzet. Kei hi phatsan ka ni a maw..ka ring thei lo, nilo ka ring phallo. Car-ah chuan an lut a, an tlan chhuak nghal a, keini chu kan la ding reng a, driver-in minlo biak chuan kan in lamah ka inthlah tir ta zawk a.
Zui chhan tur ka nei tawh lo, ka thil hriat duh ka hre tawh alawm, in ka thlen chuan ka room-ah ka lut nghal a, ka mit ngeiin ka hmu alawm le, engvangin nge ka zawh fiah kher ang. Kan inkar hi ka titawp hmak tur a ni. Ka tap tur a nilo, min phatsantu mipa vang hian ka mittui far khat pawh hi a tla tur ani lo.
Zanah pawh min rawn biak a tum lo hrim hrim a, a tukah chuan min rawn call a mahse biak ka tum tawh lo. Ka reject hmak, a lo call nawn leh chuan ka phone ka off hmak. Hospital lam panin ka chhuak nghal a, nilengin ka ngaihtuah a, ka nguai em em bawk mahse ka tlawm tur ani lo.


Thim hnuah ka haw a, kan in bula Rinpuia a car nghenga lo ding chu ka hmu a, thawk ka la vak a, hre lo ang chiahin ka kal pel a, ka banah min lo chelh a, min kuai her nghal bawk a, ka tal vak a mahse ka kut a vawnna chu a thlah duh lo.

"Engngatinge tihian i awm" chhang duh lovin ka kut a vawn mek chu ka tiche vak a, a thaw hawk. A hmel en duh lovin ka kut chu ka en ngar ngar.

"Mawh..nimin vang kha a nih chuan ka tihpalh, a thleng nawn tawh lo ang, thil pawimawh a awm thut a"
Huh..kha hmeichhia kha a pawimawh hle a ni ngei ang.

"Duat, khawngaihin tihian awm lo teh. A thleng nawn tawh miah lo ang, ka tiam a che" A thusawi avang hian ka nem mai mai dawn lo, ka thinrim chhan lah sawi ka tum hek lo. Hmeichhe dang nena an inhmu lai ka hmuh thu sawi ka tum lo bawk.

"Kan inkar hi tawp rawh se" Ka ti chang fak.

"Duat, nimin thil vang kha a nih chuan inthenna chhan tur a tling lo. Ka sawifiah thei.. "

"Nimin vang kha a ni lo, a chhan chu ka sawi kher ngai loin i hria ang chu. I sawifiahna ngaihthlak kher ka mamawh lo e. Kan tawp tawh. " Ti leh fakin a mitah ka melh a. Hriat thiam log hmel taka min melh vel te chu ka haw lutuk. Ka kut chu ka tiche leh vak a, a thlah rualin hmanhmawh zetin ka kalsan nghal. Phatsantu...
Ka na lo bik lo mahse min phatsantu hi ka pawm leh thei lo.



Rinpuian min lo biak a tum ziah a, ka block hmak. Zanah hian kan in bulah a car ka hmu ziah bawk a, ka inngaihtuah kual vel chang chuan va kuah vawng vawng mai ka chak thin a mahse kha hmeichhia a kuah lai kha ka mitthlaah alo lang a, theihnghilh ka thlang zawk. Mihring kan nih chhung chuan hetiangte chu kan tuar ve tur alawm, a rei anga ka rilru natna te pawh hi a dam ve leh mai ang. Ka tuarchhuak thei ngei ang. Daisy hnenah pawh kan Inthen chhan dik tak ka hrilh duh lo, a sawi tur ka hre sa vek, insawifiahna hun pe turin min ti leh dawn chiang alawm.



Rinpuia pawh karkhat aia rei a chanchin ka hre tawh lo, a tha zel turah ka ngai tawp tawh. Kan in bulah a car ka hmu tawh ngai hek lo. Hmalam ka pan vat angai a ni. Kan Inthen atang khan ka engtih mah ka tui lova, ka ning em em vek a, ka mizia ka thlak nasa em em bawk a, ka sual zual ni berin ka hria. Huiz.... Hmangaihna hi chu aw.. Hlimna aia Natna thlentu a lo nih hi.


Damdawi ina lo lut mek hmeichhia chuan ka mit a la lutuk tlat. Rinpuia nena ka hmuh nu ngei kha a ni. Mipa pakhat nen an rawn inzui a, hmeichhe doctor awmna lam pan chuan an kal a, room a an luh hnu pawh chuan ka la thlir reng. Rei vak loah chuan an lo chhuak a, kawngka lam a an kal lai chuan min lo en a, ka hawi sawn nghal.

"U Ms.." aw lo chhuahna lam chu ka hawi a, kha nu kha a ni. Engtinnge min koh kha 'U Ms' maw...

"I dam tha maw" A rawn ti leh a, pangngai thei ang bera awm ka ngai a ni.

"Aw, dam tha e, mahse ka van hre mai lo che. " ka nuisang a. Ka kut erawh ka hum thlan dap tawh.

"Oh..ni tak, U Rinpuia'n i chanchin min hrilh thin a, a phone leh a computer wallpaper-ah i thlalak a hmang a, ka hmuh che khan nangmah hi i niin ka hre reng a ni. Tunlai chu in intithiamlo nge U Rinpuia hi a nguai thei lutuk a, a tawng tlem bawk si." Sawi mai tur ka hre lo. Ka chhan hma chuan a thianpa khan a lo ko a, min kalsan ta a. Kha nu kha tunge anih ka hriat ngei a ngai. Inentir tur ho hming inziahna chu ka en a, nilo, henu hi Rinpuia farnu tihna a mi.. An hnam hming pawh a inang chiah. Kei hian thil ka hresual tihna em ni??

Nilo, ka thinrim chhan kha lo hrilh ila a insawifiahna ngaihthlak sak bawk ila, kan inkarah hetiang thil hi a thleng kher lo ang. Na takin ka insiam a, chutiang bawkin Rinpuia pawh. Daisy thusawi kha ka hrechhuak zawk, a sawi dik a ni. Rinpuia ka biak a ngai.

Ka phone ka phawrh a, ka unblock vat a call ka tum a mahse hmaichhanah ngei bia i la a tha zawk ang. Ka hmangaih hi chan hlen ka duh loh chuan ka tihsual pawmin ka tlawm ang a, a thusawi ka ngaihthlak sak ngei ang.

Ka duty zawh chuan hmanhmawh takin Rinpuia dawr lam ka pan a, room hran a neihah chuan ka lut nghal a. Min hmuh chuan mak a tih hmel chiang kher mai. A thutna atang chuan alo ding a, a cher ve deuhin ka hria, a khabe hmul pawh a ziat lo ani ngei ang, a chauh hmel em em zui. Keimah vangin tiang hian a awm tihna em ni..
Ka hmangaih hi ka nei let leh ngei ang, ka thil tihsual ka siam tha ang.

"Kha mi ni khan ka zui che a, hmeichhe pakhat i kuah lai kha ka hmu a, inpahnihin car-ah lutin in tlan nghal a" Ka sawi zawng ringawt pawh chuan mahni inthiam lohna avangin ka tawng a sak tulh mai.

"Chu chu em ni min then chhan" a mit chu a meng zim deuh a, ka lu ka bu nghut a...

"A ni kha ka farnu a nia, buaina a tawh avangin ka va hruai a"

"Ka hre tawh. Vawiinah kan inhmu" Tiin ka kun lap a.

"Engmah min zawh fiah i tum miah lo a maw..Ms, min zawt ve tur i ni lawm ni. Ka nau nen inhmu lo phei ula chuan min hmu tur hian i rawn kal miah lo ang tiraw.." A kekawr ipte zenin a thaw hawk a, ni e ka ti diklo a ni. Ka induhtawkna leh ka chapona kha ka lo dahsang em a tin ni.

"Ka tihpalh. Kha nu nena ka hmuh che u khan ka rilru a na lutuk a ka be duh tawh lo che a, min phatsan emaw ka tih vang a ni mahse a thleng nawn tawh lo ang... Khawngaihin" Ka thiam lohna pawm thlapin ka ti sap a.

"Lo kal hnai teh" ka va pan hnai a, min lo kuah nghal vat. Ka thaw huai mai.. Ka inthlah dul bawk a.

"Kan tha tiraw" Tiin ka melh a. Min chhuk melh ve run bawk.

"Um,,,ka ngai lutuk che" Thawk a la vang vang a. Thlamuang tih hriat zet hian a awmah chuan ka bei thlap a. Tlawm ngamna nun ka neih meuh chuan ka hlim a, ka hmangaih a hlim bawk. K a thuvawn hi ka thlak angai a ni 'Hmeichhia pawh hi a tlawm ve zeuh zeuh tur a ni' tiin.




"I thinchhe ve ngawt mai"

"Ka thinchhia tih chu tunah chauh mi i hriat"

"Aih, 'Lalrinpui' i rawn tih ni atang khan ka hre tawh" kan inhmuh hmasak ber ni kha a sawi chhuak ve ziah mai.

"Kha kha sawi ve ziah suh" ka kut kuangkuahin lehlam ka hawi hmak.

"Ih maw"

"Aih"

"Thinchhe viau mah la maw"

"Aih"

"Ka duh tho che" A thusawi avang chuan ka nui suk a, ka inher a, nuisanga min en rengtu chu ka nuih sak a..

"Aw"

Hlim tur hian thil tam tak tih angai lo, inrin tawnna, inhriatthiam tawnna leh tlawm ngamna neih hi a tawk viau a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)