KA PI, A FEL TI RAW......

Story tawi te te emaw luanliamna emaw post na
Masanga Sailo
Posts: 2
Joined: November 9th, 2020, 10:49 pm

KA PI, A FEL TI RAW......

Unread post by Masanga Sailo » December 2nd, 2020, 12:16 pm

KA PI, A FEL TI RAW...

A rethei atanga a hausa ber thlengin Krismas lo thleng tur chu tisa leh thlarau lamah mitin mai an inbuatsaih suau suau a. Aizawl Bazar pawh a lun ngei mai. Naupang leh tar chak lo deuh tan phei chuan kal ngaihna a awm lo a tih theih. Bazarah chuan mi zawng zawng an awm ta emaw ni chu aw tih tur a ni. Isua Krista lo piang tur lawmna turah thil thar neih ngei tumin mitin chu an hman hlel a. Kan thinlung lamah piangnawn leh se tih lam ai mahin tisa lamah kan hmanhlel zawk em ni.

Pi Tinkimi, lu a kel sam ṭo bam tawh leh a tunu Siamtei, kum 5 chauh chuan an hmarcha thar tlemte nen chuan Aizawl bazar chu an pan ve a, an hralh theih hlauh chuan an pi tuin thawmhnaw thar lei bakah mamawh dang an neihte hre rengin an pan a. Motor chuan man an neih loh avang chuan ke in an kal a, Aizawl thleng tur chuan a va hau tak dawn ve le. Vanneih a siamin mi khawngaihna an hmu hlauh a, 407 hnungah chuangin Aizawl bazar chu an thleng ta.

Siamtei hi a nu leh pa accident avangin a boral tawh a, a pi hian a pawm seilian a, an pitu in an phak tawk ang zelin hna an thawk nain Pitar leh naupang mai tan chuan mahni eikhawp tak ngial pawh a harsa a ni. Chuvang chuan mi khawngaihna pawh an dawng thin reng a, mahse mi khawngaihna chu kumtluana han rin chi ni mawlh hek lo, an pitua hmarcha huan an siama an thar chu Aizawl lamah hralh turin an kalpui ve ngawt a ni.

Aizawl bazar nge nge mi an tam si, an pitu chuan an invuan ran mai a, an hmarcha ken tak ngial pawh han zawrhna tur hmun awl a awm lo. A thawl lai apiang chuh zel mahse, rei a theih loh, remchang laiah an hmarcha ken an han phawrh ve pawh chu bazar lam thuneitu ten an lo hau leh bawk si. Pi Tinkimi pawh a mang chu a ang deuh a, an hmarcha chu bazarah thuten Rs.500/- in an lak sak a, an chan tawka an lungawi mai chu a ngai si.

An pitu chuan thawmhnaw lei tumin an han kal chhuak leh a, mi an ṭhahnem si, inhlauh palh pawh an hlau ve ngei mai. Dawr pakhatah chuan Pi Tinkimin, "hei engzah man nge," a ti ve dak dak a, a zawh hma a ngai rum rum zawk hial awm e. Engmah sawi chhun zawm loa kalin dawr pakhatah chuan an zawt leh a, Rs.250/- tia an lo chhan chuan, an pitu tan chuan a la to mah mah a ni, a tunu chuan a nalh a ti ngei mai, Siamtei chuan, "a pi, a nalh ti raw," a tih chuan, Pi Tinkimi chuan, "bawihte a nalh chu a nalh khawp mai," mahse a to em mai," a ti chuai raih a. Siamtei chuan a awt ngang mai. An kal sawn dawn pawhin a thlir let vawng vawng a. A pi tan pawh tute awh zawng lei chu duh hle mahse, an dinhmun enin, buhfai lei ngai nen, a to lua chu a ni, an pawisa neih lah Rs 500/- a ni mai si.

Krismas hman kan tum dan hi a lo piang Isua hian engtin tak ngai ve maw? Lianzuala mi hausa fapa, duh duh lei thei khawpa Aizawl pa hausa fa pawh zurim nam thur thurin bazar chu a kal ve a, a khawsak dan hi mi hausa chhungkua ni lo ta se chuan seltu pawh a ngah ta ve ang, an neih hian a chaldelh hrim a, tun han sel ta nge ti erawh an awm hran lo. Ruih sual deuh changa an buai hat thin tih lohah chuan a hnawksak lutuk bik si lo a.
Kawng tawt lutukah chuan Lianzuala chu dawr sirah chuan a chawla, Pitar leh hmeichhe naupang thil en lai chu a thlir a, Pi Tinkimin, "bawihte, a to deuh a ni, a aia tlawm deuh i zawng leh ang hming," a tih chuan a zuartu ten, "ka pi, Rs 250/- aia tlawm chu avang khawp ang, kan Sale a nih tawh hi," tih chu a thlir a, Pi Tinkimin, "Mami kan tan chuan a to deuh a la ni," tih paha an kal chu Lianzuala chuan a thlir renga.

Lianzuala pawh hmalam pan chuan mipui karah chuan a inzep ve tawl tawl a, chuti khawpa mipui tamah chuan rilru mumal pawh neih theih loh hialna tur a ni. Pitar ṭawng chu a bengah chuan a châm a, a zuartu in a tlawm tawhzia a hrilhlaite chu a mitthlaah a châm tlat mai. Mi dawr sirah bawk chuan a ding vang vanga, a rilruah mawlhtu a awm tlat. An ngaihtuah chianga, Rs 250/- man pawh to titu pitar chu a rilru luahtu a ni ta. An ngaihtuah chiang thin, a pheikhawk ringawt pawh sangchuang man a nih laia, zahnih sawmnga man to ti tu dinhmun tur chu, mipui karah chuan a let leh a, Pitar leh a tunu ni a, a hriat te chu a zawng ta. Mi an tam si, thlan tla hluama a zawn hnuah mi dawr sirah chuan inthlahrung takin a mi zawnte chu an lo chawl a.
ℒianzuala chuan, "ka pi, khawi atanga lo kal nge in nih" a ti a. Pi Tinkimi chuan an awmna leh bazar an tlendante chu a hrilh a. Lianzuala chuan Siamtei kaiin, "ka pi i kal thei ang ti raw," a ti a. Pi Tinkimi chuan a ngaihna hre lo deuh hian, "kal thei e, mahse," a tih lai chuan Lianzuala chuan, "ka pi, min zui phawt mai teh," tih leh kal a rual a.
Lianzuala chuan, thawmhnaw an lo en tawhna chu a tawt a tawtin a hruai thleng a, Siamtei kawr atana an en, to an tih avanga an dah let leh chu lain, an haktir chhin a, a ha tawk chiah chiah bawk. Siamtein a pian atanga nalh a la intih ber a ni hial awm e. Hmeichhe naupang, paw hrit hret, a siliper pawh a ke artui pawp tawh bunin chutiang thawmhnaw an inbel chuan, a lungawi ngei mai, a lungawi hmel hmuh zet zawng Lianzuala zu rim nam thur thur tak ngial pawn a mittui a khap per sawk thei. Pi Tinkimi tan shawl, kawr, kekawr lum, pheikhawk, an pitu chuan an mamawh a leisak vek hial a. Pi Tinkimin, "Vala, i hming pawh kan hre si lo, kan tan chuan Isua kan hmu anih hi," a bianga mittui luang pawh a dang zo lo.
Lianzuala chuan, "ka pi, Isua chu ni lo e, kei misual hian chutiang em em ka phu lo, haw u, helamah," tiin Siamtei kaiin an kala, thingpui dawrah an han chawlh chuan e, Pi Tinkimi chuan tui ti hle mahse, a ei in, a in thei lo, a maimit chhinga, a bianga mittui luang chu a tunu Siamtein a lo hruksak a. Siamtei chuan, "a pi ṭap tawh suh, ei rawh, a tui lutuk a nia," a tih chuan Pi Tinkimi chuan mittui khap per sawk sawkin a hma zawna tlangval, ngo lam deuh chu a en a, ei tur chu a ei ve hram hram a ni. Lianzualan, "ka pi ei rawh, in ei zawhah kan kal leh dawn nia," a ti a.
An ei zawh chuan, Lianzuala chuan, "ka pi, tah hian lo awm tlat ang che u, khawiah mah lo kal suh u aw, min lo nghak ang che u, ka lo let leh vat ang," tiin a kalsan a. Siamtein a thawmhnaw thar chu a kutin a zuk khawih thin, a hmelah chuan hlimna hlir a hmuh theih, thenawm khawveng ten an khawngaih changa an hak loh an pek tih loh chu engmah nei ngai lo tan chuan a lawmawm dan tur chu sawithiam a har zawk. Siamrmtei chuan, "ka pi, a fwl ti rawh," a tih chuan Pi Tinkimi chuan, chu tlangval chu mak a tiin a rilru in Pathian hnenah lawmthu a sawi mawlh mawlh a.
Lianzualan Pi Tinkimin te a kalsan a, an awmna hriat a duh vangin motor a hruai a tum a ni. Amah zawk a hlim tlat te, thawveng huaia inhriatna te chu Lianzuala chuan a nei a, a sawi chhuak thiam mawlh lo. Mi zi nuai nuai karah pawh lawmna mak tak chuan a chenchilh a, engkim chuan a tiphur a ni ber.
Motor pawh a kal hlei thei lo, Pi Tinkimi te pitu nen chuan an inlam an pan a, Driver pakhat bakah vai pakhat a la hruai bawk a. Bazar an chhuahsana, kalkawngah mamawh thenkhat an lei tih loh chu an ding khawmuang lo. An thil leite an inah an dahsak vek tihah chuan an hawsan leh ta a.
Kan nghah Krismas pawh a lo thleng dawn ta, urlawk zanah chuan, Lianzualan a lo hrilh lawk tawh leh a sawm angin mi engemaw zat chu a hruai a, an veng KTP Leader leh Secretary ten Lianzuala sawmna chu mak an ti zawk mah, han tel pui lo ngawt dawn se nitheiin a hre chiah bawk si lo. Kumtluana inkhawm chu sawi loh KTP thil tihna hrim hrimah pawh tel ngai lovin a thil rawt chu mak an tiin an phurpui lo nge an phur zawk tih pawh an sawithiam bik lo. Thalai mi 10 chuang mah chuan Pi Tinkimite in chu an pana, Lianzualan Present a kente nen chuan an kal tham tham a.

"Hei, lo dingte u," tih riah chuan an ding thap a, "khaw nge kal in tum," pakhatin a rawn tih chuan, Lianzuala chuan, "Pi Tinkimi te kan han tlawh ange," a ti a. Pakhat chuan, "duty kan ni a, enge in tih dawn," tih thawmah chuan Ruata chuan, Lianzualan a hming a lo hrilh tawh avangin, "Pi Tinkimi te pitu advange Krismas kan han hmanpui ange,," tha deuh chuan a ti a. Pa upa lam deuh zawk chuan, "khawi veng nge in nih," a rawn tih leh a, Ruata chuan tha takin a chhang leh a, an kal liam tham tham nain, duty ho rinhlelhna mit meng erawh an hmuh hmaih lo.

Muanpuii chuan, " kan kalna chu a va pilril sawt ve, hei vang hi a ni ang, min lo zawh," a tichhuak hial a, an thleng ta, mi an awm dawn em ni tih tur ni mahse, mei alh teng teng atang chuan mi an awm tih a hriat thung. Inchhe ve tawh tak, a bang dap, a chhuat lei, kudam ni awm zawk takah chuan an lut a, current a awm lo, an tapa meialh teng teng chu eng awm chhun a ni. Pi Tinkimi chuan, "Awi, bawihte tute nge ni," khum atang chuan a rawn ti a. Siamtei chuan chhunlama a thawmhnaw lei chu a lo inbel a, Siamtei chuan, "A pi, kan tan Isua a nih kha i tihte kha," a ti lang langa, Lianzuala kalpuite chu an in en thap a, mak an ti hle tih an hmelah chuan alang.

Pi Tinkimi chu rawn thoin, "Lianzual, awi, in va tam ve, enge ni ta," a rawn ti a. Lianzuala chuan, "Pi Kim, hei present an pe duh che u a, kan lo kal leh a nih hi," a tih chuan ei tur hrang hrangte chu an dah a. Malsawma chuan, a thiante a hrilhru sap a, amah chuan aw thian khar kharin, Ringvai te Lalpa pian ni tih hla chu a rawn sa chhuak a, midang pawh chuan an rawn zawm nghal a.
---

Kumpui sul lo veiin sikni eng mawi a lang,
Lusun fate tan fam ngaih a na;
Nghilh theih chang se hlim zai vawr in,
Riangvai te Lalpa pian ni a ni.

I hlim ang, i lawm ang,
Kan tan a naupiang lawm in;
Van ropuina kalsan in,
Piallei a rawn bel............

--

Αn sak zawh chuan mittui tla lo a ram an awm lo, hla dangte pawh sain thutna remchang awm awmah chuan an thu a. An KTP leader Ruata chuan, Pathian thu chhiar a, ṭawngṭaina a hman zawh chuan an chhuahsan ta a.

ℒianzuala rilru danglam ta lutuk chu a hmuh theih, kum dangah chuan, rui chhek chawkin tun ang hunah chuan hlim lai an chen a, tunah erawh amahah khawngaihna awm ve reng thin chu chhut kehin a awm ta si. A kalpuite ngei pawhin mak an ti hle renga, thalai rual ten intihhlimna hunte hmangin, gift exchange thlengin hun an hmanga, mi harsa leh chanhai zawkte ngaihtuah thleng erawh an awm loh zia te, an tan nunkhaw chhuahna dar rik hun nghaka awm te dan chuan mittui tlakna a nih zia te, Pathianin a siam ve tho, kil khatah he hun lo thleng tur avanga retheite ti rethei zualtu, nu leh pa tam tak tah vawng vawngna hun a nihzia te chu an sawi nak nak a.
Motora an chuan leh hma chuan Lianzuala chuan, "in zavaia chungah ka lawm tak zet a ni, ka rilrua thilawm hi ka sawithiam lo, mahse ka la hrethiam zui ve mai ang, ka lawm tak zet, min lo tawngtai pui vek ang che u" a tih chuan amah chungah chuan lawmthu an sawi liam liam zawk a.

ℕi e, Isua Krista lo piang hian mitin thinlungah engemaw ti tal chuan thu a sawi a ni chek ang chu. Mi sual ni a kan hriatte pawh hian thatna an lo nei a, khawvelah hian Isua chauh lo chu mi famkim awm hek lo le. Famkim vek ni ila, a lo kal angai lo tur.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)