ENGTIN CHRISTMAS? By: Cietei samte

Story tawi te te emaw luanliamna emaw post na
Cietei samte
Posts: 63
Joined: May 19th, 2020, 11:13 am

ENGTIN CHRISTMAS? By: Cietei samte

Unread post by Cietei samte » December 11th, 2020, 6:53 pm

ENGTIN CHRISTMAS? By: Cietei samte

"Amma...." ka fanu kan tê berin, ṭap deuh titihin kawngkhar aṭangin min rawn ban ṭawk ṭawk a. Rang takin ka tlan a, ka ban vat. Min lo ngai hle a ni mahna, min kuah chûng chûng a, a nui heuh heuh reuh bawk.

Kei pawn ka ngai ṭhin alawm, tun kar tluanin, ram ka riah san a, buh lak ka zo deuh thawthang tawh a, tlem chuan, ka hlim ve deuh. Mahse, ka fate kartluan a ka hmu thei ṭhin lo erawh, pawi ka ti ṭhin in, khawvel pawh hi fair lo ka ti ṭhin asin.
Mahse, enteh maw, khawvel fairlo titu hian, ka dem phal leh lo ang lawi a.

Ka dam chhan, ka fate hi ka tan hian, an va hlu tak em! An tel lo chuan, nu ka ni thei lo a, an tello a ka awm thiamlo ang bawkin an ni pawn, min thlahlel ve ṭhin asin! Lei leh van lal pawh hian, min khawngaih ve ṭhin ngawt ang ka ring. Mahse, heng kan tuarna chhete te ah te hian, a lakah kan vuiin, khawngaihna nei lo ang maiin kan chhuah a, vanduaina kan tawh kar a, vanneihna kan dawn te hi kan hrethiam lo a, vuina tur chauh lo chu kan hmu ngai lo.



"Nu, i hah em? Tui ka lo suah ang che" ka fanu, kan upa berin a rawn tih chuan, ka tui hal zia ka hre chhuak a. Buk nghat pahin, inchhungah ka lut a.

"Nu, nizanah tepuii khua a sik a. A tlei thei lo, zan kan mu mang lo a. Lo chu eng nge a an, naktukah ka naute nen kan va feh ve dawn em ni ka ti deuh a" aw, ka fate damlo pawh buaipui na hun ka nei ve ngai ta lo chu a ni si a. Rilru na leh inthiamlo takin, ka thaw halh ringawt.

"Ka awm alawm, inah i naute ṭha takin lo enkawl la a tawk mai" naupang sawi atan chuan, a puitling mah mah a ni. kum 9 mi lekin khatiang thu a sawi kha, kei a nu ngei pawh hian, ka thlamuanpui asin. Fanu fel leh duhawm tak a ni. Midangte tan chuan, eng a ni lo mai thei. Mahse, ka tan chuan, ka innghahna tur ka beiseina neih chhun a ni a. Kum 9 chauh ni mahse, a rualpui te aiin a rilru a puitling a, kei pawhin ngaihngam leh ngam loin a naute ho nen ka hnutchhiah theih phah ṭhin a ni.

"Bawihte, khawnge i naute" nidangah ka feh haw min lo hmuak a, an ri chêl chûl ṭhin kha a nia. Vawiin chu, a hmeichhiate pahnih chauh ka hmu a, ka buai nghal der maiin ka hria.

"Nu, artui an lei a nih kha. Kartluanin, tepuii thlengin rawra kan chhu a" inthlahrung deuh takin a rawn ti a. Ka nuih ringawt, an tihtheih tawk leh phak ang tawkin min pui ve a, an theih chin bak hi chu ka phut lo. Ka tan chuan, hei chauh pawh hi a tawk em em mai a ni. Mahse, ka fate hian, an thawk ve tih ka hriat hian, natna nen mahni inthiamlohna ka nei lo thei lo a ni.

Lalhmangaihzuali ka ni a, ngaihte tiin min ko mai ṭhin. Kum 29na ka hmang mek a, pasal ka neih hma ve em vangin ka fanu upa ber pawh kum 9 lai a lo ni ve ta a. Fa panga nei in, a upa ber leh a tê ber hi hmeichhia an ni a, mipa pathum nen, kumin kum tir lam khan, ka pasal (uliana) chuan, min boral san a ni.

Ka ngaihtuah chang hian, engtin nge ka fate hi keimah chauhin ka enkawl chhoh zel theih ang? A tel lo chuan, engmah a nuam lo a, ka faten pa an mamawhin an la thlahlel a, kei pawh ka ni. Mi chiai hma tak ka ni a, ka rilru a no in, ka la naupang si nen, heng ka fa tetak tê te hi engtin nge a tel lo in ka enkawl zel ang tih chu, a rawn lang lo thei ṭhin lo. Kan tê berin kum 1 leh thla 10na a hmang ṭan chauh a, a u lah kum 2na a pum ve ek ek chauh bawk si. Mahni inenkawl thei an la ni si lo. Nitin ram lamah ka feh san a ṭul a, a chang phei chuan, ka riah san ṭhin. Mahni inthiamna ka nei lo a, rilru nuamin awm lai ka nei ngai hek lo. Mahni inthiamlo leh hreawm tihna nen nitin ka fate ka tlan san a. March 26 khan a pa in min boral san a, thih pangngai deuhte chu ni se, tun ai hian ka tuar lo ve deuh mahnâ le.

An ram kalna ah, a ṭhianpa in a kap fuh a, a lung a kap tlang a, a hmunah keini a mah la mamawh leh thlahlel ngawih ngawihtute a fate leh a nupui hi min boral san a, nu tan chuan, a beidawn thlak asin. Keimah chauh a, ka fate panga ka enkawl chho tur chu, ka ngaihtuah ngam lo! Eng tin nge, a tello in he hunpui hi kan hman ang?


A pa in min boral san tak si vangin, a upa ber phei chu, sikul pawh ka ban tir mai a ṭul ta hial a. Mahse, vanneih thlak lutuk in, an sir chhuana subject bik a lo thiam fal deuh a ni ngei ang. An sir chuan, inah min len chilhin, sikul kal zawm tir turin min ngen lawm lawm a, a nau sikul la kal ve lote pawh a sikul kalna ah a hruai theih tur thu min hrilh a, ngen takte hian min lo ngen a. Chu bak a thil lawmawm chu ka tan chuan, a awm tawh kher lo ang. Sikul chu a kal zawm ve thei ta zel hlauh a.

Thingtlang angah chuan, hmeithaite hi en hniam kan ni ṭhin a, ka fate hian, in rawn haw a, ṭap chung a, thu hriat nuam lo tak tak min rawn hrilh chang chuan, ka pasal hi ka ngai a, a mah tal la dam se chuan, ka fate pawh hian an rualpuite hmuhsitna an tawng lo ang a, kei ngei pawh ka thla a muang dawn asin! Kum 32 chauh la ni mahse, pa ber dinhmun a luah hnehin, thawk loin kan awm ṭhin a, mahni tawkah chuan, christmas pawh kan hmang nuam ve ṭhin asin.

Tunah, ENGTIN CHRISTMAS? Hun pui apiang a, ka faten an dawhthlak tur an beiseite an duh leh an awh em emte pathian hnen a an dil a, ṭawngṭai hmaih ngai miah lo ka fate hi an duh ka pe thei ang em? Ka thawhrimna hian, an duh leh awh chu, an nei thei ang em ka hre lo ani.

A pa telloin a vawikhat nan liau liau hun pui kan hmang dawn chu a ni si a. A awlsam hauh lo ang.

"Anu,,," ṭap purin a naute pathum in min rawn kuah a, engmah an sawi hmain, ka thin zawn hi a na ut ut a, ṭah chhuak takin ka awm a, rilru natnain min tuam a, ka tawtin ka lungphu chu a phut zawngin a na thip vawng vawng bawk. A dik alawm, an sawi tur hi kei hian, ka hre vek. Nu êngmawii thu sawi bak a ni dawn lo.

"Eng nge a, mike, biaka, dika" a uin, min kuah chung a, ṭap pur a naute a rawn pawt hrang vat a. Thin phu dep depin an thu sawi tur chu ka lo nghak a.

"Au, sangzuala nuin pa in nei ve lo. Nangni chu fahrah i ni a, thil pawh lei ve tawh suh u min ti a. Min beng bawk a" lungchhe zetin mikea chuan, a u chu a hrilh a. Chu thu chu vawitam an sawi tawh. Mahse, a mi den dan erawh a nat ngaiin a la na reng. Naupang an la ni a, an rilru a na hma bawk. Engtin nge nu ni ve tawh hian, anu tlinpui thinlung leh a fate rual thinlung tur hi an hriatthiam pui ṭhin loh ni? Ka hrethiam lo, thinrim eng ang mah ila, kan dinhmun hian, thinrimna tilang ngamlo khawpin min siam lawi si a.

"Lo kal teh mike" ka fapa a u kuah a ṭap hlap hlap kum 8 mi lek chu a naute nen kuah chungin, ka thaw ham ham a. Eng tin nge kei hian ka hem ang ka hre lo ani. Hnem chu sawi loh, an ṭah rual a ka ṭah ve loh nan leh nu chak tak ang a min hmuh theih nan an hmuh a mittui far tir ka tum lo a, harsa hle mahse, ka fate tan hmalam pan a, kal thei tur a chak tak a ka awm a ngai a. Ṭawngṭai hi ka tan chuan, ka chhuan tur awm chhun a ni. Lehkha thiamlo ka ni a, hei vang tak pawh hian alawm, mi ten an duh duh a min ṭawngkhum ṭhin. Lehkha thiam emaw, lo hna ni lo eng emaw tal thawh lo nei ila, tun a kan dinhmun ai chuan, a la sang hret thei tur.

"A ho lutuk. Pa te chu kan nei alawm kan bulah a awm reng a, a ni chuan, ramte min kal san lo a, kan awm dan engkim min hriatpui a. Ti nge pa kan nei lo intih tlat zel a" a uin, ka sawi tur ka ngaihtuah lai mekin a rawn ti zung zung a. Ka thaw huai mai, ka fanu hi ka zep lo, ka fanu mah nise, ka chhuan thu hi ka sawi tho ang. A puitlingin a hlim thei em em a, mi a hnem thiamin, naupangtê mah ni se, a ṭawngkam hi kei a nu ngei pawh hian ka thlamuanpui tak zet a ni.

"Ni e, i u hian a sawi dik alawm. Bakah in rawn selian ang a, mi chungah inla leng dawn bawihte, thu awih takin awm ula, ṭawngṭai hi hmaih ngai lo bawk ula, pathianin a hre reng dawn che u nia" ka sawi zawng a ka mittui hnai ṭhiam ṭiam chu, ka fa ten an hmuh loh nan lehlam hawiin ka khap sak sak a.

"Anu, a nih leh ka ṭhiante angin christmas thawmhnaw thar kan nei ve ang turaw" a ṭap a bang a, a ngaite bawkin zawhna min zawt a. An tan a thawktu hian, ka leisak thei ang em? Nge ni a, a pa awm lo chu, thil thar neih na tur pawisa ka pe thei dawn lo. Chhanna pek tur nei ta lo chu, chaw ei siam turin ka ti ta ringawt.

Thiamthu sawi tur ka nei lo, kei nu azawng a, nu nih tlin lo ber hian, ka fate duh leina tur pawisa chu, khawi a mi nge ka neih theih tehlul ang? Pathian, ka fate nen hian min hawisan lo ang che aw.

An unau ka en leh ṭhin,, pa la mamawh leh pate ngai rual lek hian, an rilru a thu awm ang ang an sawi chhuak a, naupang mai an ni a, an thu sawi erawh chuan, thinlung chhungril ber a luah khat lawi si a.

"Nu, naktukah kan inhlawh leh dawn a..." beisei nei takin au berin a rawn ti a. Mahse, kei chuan chawlhni hi ka serh ve tlat. Chawlh hun a ni a, hnathawh hun a ni tawh lo.

"Ni lo e, naktuk chu chawlhni a ni a, inkhawm ṭheuh tur. Tuman hna thawh bik loh tur. Enteh kimkim, in unau a a upa ber i ni a, i naute hian i hnung an rawn la zui dawn. Nang in i nun i uluk loh chuan, i naute pawn an uluk lo mai ang" thu ṭha hrilhin chaw eikham thingpui in kan neih chhung chu ka ṭawng char char a. Ka fate erawh chuan, engmah hnial buai eih loin ka thusawi lai ka mitah tak enin an beng an chhi reng a.


Ka hrilh ṭhin dan a ni bawk. Mi dangin eng tin nge an hrilh ang ka hre lo. Mahse, mi in thu an sawi emaw, thu kan sawi reng rengin an mitah en tlat tur tiin ka hrilh fo ṭhin. Tunah pawh an ching chho ṭan a, dawt an sawi leh sawi loh hi kei hian ka man thiam tawh lutuk ringawt. Dawt an sawi emaw a nih chuan, ka mitah an en ngam ngai lo a, hmun dang hawikual na tur an zawng reng ṭhin.

Dawt an sawi khat a, a upa ber phei chuan, dawt min la hrilh awm ka hre ngai lo. A naute pahnih hi chuan, vawihnih dawt min hrilh tawh a, dawt sawi hi ka duh loh em vangin ka hrem nghe nghe.


"Nungaih, engtikah nge riah luh leh i tum a?" kan veng nula chhuanvawr hmelṭha hleitling leh fel zet maiin kan in a rawn luh pahin a rawn ti nghal bawrh bawrh a, nula hian kei hi phurna tumruhna huaisenna tam tak min pe ṭhin a ni tih kan sawi lawk. Miṭha vang hle mahse, a ṭha pakhat tal in min fuih hian, kei hmeichhe chaklo leh derdep tak hian chakna tam tak ka neih phah fo a, Pathianin keini nufa tan a rawn tirh liau liau ah ka ngai hmiah bawk.


"Ka hre mai lo le. Ka buh pawh nithum vel bak lak tur a awm tawh lo a. Lo ṭhu rawh kha, kimkim ṭhutna i umawitei lo pe vat teh a ke te kha a lo kham ang e" fiamthu zetin ka ti nghal bawrh bawrh a, a tlangnel tawh bawk nen, huat enah pawh en loin a nui ve mai a. Inleng hi kan pa min boral san aṭangin, kan nei ngai mang tawh lo a, mawitei hi kan inleng neih chhun chu a ni mai.

Rei ṭhu loin a haw a, kan nufa za chauhin kan awm leh ta. Naupang mut pawh a chhuak thuai a, a uin mutin a u erawh ka bulah ka la phiar min lo en kiau reuh a. Kimkimi felna pakhat chu, mahni in min awm tir hman lo a, engmah lo ti ve lo mahse, ka mut ve hma chu, a mu ve duh ngai miah lo bawk.

"Bawihte va mu tawh rawh. Zing i tho hma ṭhin si a, mut i kham lo palh ang" ka la phiar a laklawh deuh vangin ka ti a. A hmel en pawhin a mut a chhuak tih a chiang ngawih ngawih tawh. Alu thing na na in, "i rualin ka mu dawn alawm. Nu nangmah kha i chau tawh zawk ang hawh mu tawh ang" tiin min pawt deuh a.A duh dawn chuang lo tih hretho mah ila, vawikhat tal ka tello hian mu ve se hi ka ti ṭhin. Dar 12 thleng men thlen chang ka nei a, zanah hi chuan, khum hi ka ngai vak lo ṭhin bawk atin a ni.

Kan mu a, kei chu a ngaite bawkin ka muhil leh lawk thei ta lo. Nun hlui leh hlimni chu, a rawn thar a, aw, fa ka hrin hmasak ber a, kan hlim zia te, a teber rawn pianni te, 'pa' tih thumal a lam ni hmasa berte kha, kan va han hlim tak em. A pen hmasak ber ni ang te khan, hlim takin kan nui a, hetiang hun pui a lo thlen dawn hnaih ah, kan inhlawh nasat ṭhin zia te, kan fate duh eng emaw tal pek kan tum a, kan beih ve nasat ṭhin zia kha.

A riah chhuah dawn a, ka phal lo chung kal min dil tluk tluk laite khan, lo phal lo hlen ila ṭha tur. "Sa ka rawn hawn dawn alawm, sa i chak tih ka hre reng alawm. Kan fate tan thilthar leisak pawh a ṭha i ti lo mi. Bakah christmas a thil pek kan pek ve theih nan tun aṭang inkhawl kan ngai tawh, thla 9 chauh a awm tawh hi... aw..." min tlawn zet a a thu sawi te, "ka rawn haw thuai dawn, ka rei dawn hleinem, zaninah pawh a nih loh pawn naktuk pawh...." muang fiah fel fai tak a, thu a sawi lai khan, lo phal lo tawp ila, emaw a keah lo uai bet tlat ila, hetiang hun hi kan tawng lo mai tur.


A sawi dik, a rawn haw thuai a, a rei lo, chu mai a ni lo, a tuk zing dar 3: 30 ah in a rawn thleng asin! Ṭum dangah lem hetiang a hma hian a rawn let ngai lo, a hma berah nithum hnuah a rawn haw chauh zel..! A ke ngeiin kan leika pui a rawn rap ve ngei zel bawk. Mahse maw! Tunah chuan, a rawn haw hma ber ṭum a hmasa ber leh a tawpna ni turin, meng tawh ngai lo tur a, chhing tlat chungin, mipuiin a vâng zawngin, kan leikâpui an rawn rah kai pui asin. Chu pawh a tawp nan tak tak tawh! He a kut chhuak in mawi tak hi, a la luah lum rei lo em asin!

Kan fate nen, kan au lawm lawm a, vawikhat.... vawikhat tal, a mit rawn mêng leh hram turin kan ngen a, mahse, a ni chuan, a hnuchhawn tawh ramah mitmen a tum ve tawh lo a, a hun lo asin! A hun lo takzet..... kan la mamawh takzet asin, pa tel lo chuan, inchhung hian nawmna a nei lo a, faten pasalin min pek ang hlimna min pe hek lo. Hlim tak a, kan hma hun suangtuah a, kan zalna hmun chuan, a ruang dai mai chauhin a zal pui tawh si....

Ka bek rawm lum thla pup pup chu, ka faten an hriat hlau zetin ka hru a, khum aṭang a tho chhuakin, pawnah ka kal a, van lam ka hawi a, hei pawh kan thlir dun van boruak zau tak tho a ni. Thil engkim ah kan sulhnu a lang zel a, mittui bawk a ko chhuak leh ṭhin.

"I bei fair lo bik ngawt mai ulian, i hria em? Hlimna a bul i ṭan pui kha, fanau duhawm tak tak i pek kha, a nun hlimna a par vul ve ṭan a, mahse, a tawpna chu, lungngaihna in i kharpui leh si. Chu pawh i bul ṭanpui dil hmasa emaw hriattir hmasa miah loin. Hlimna a bul i ṭanpui dawn khan i râwn hmasa reng si a, mahni hmasial takin nangmah chauhin, a tawp i siam a. Tunah hunpui kan hnaih a, ENGTIN CHRISTMAS i telloin hmang se min tih? Kha hunpui kha, kan hman ho theih hnuhnung ber tur a ni tih hria ila chuan, chintawk awm lo in ka hman pui che ang a, kha zan kha nang nen a kan hma hun kan suangtuah theih na hun hnuhnung ber a ni tih hria ila, mu miah loin ka sawi pui tur che. Zantin i bulah muin i riah chhuah ka phal ngai miah lo tur" van lam hawiin, ka mittui chu ka hru leh zeuh a, mahni hriat tawk lek a, phun sap sapin ka insut leh faih ṭhin bawk.

A chang hi chuan, Pathian pawh ka dem lek lek ṭhin. Eng tin nge mahni chauh a, heng naupang rilru thianghlim leh fel takte hi enkawl seilian se mi tih ni? Pathian pawh hian, rethei leh chanhaite, hmeithai leh fahrahte vaivaihna khawvel hi hetiang tur hian, a tirah chuan, a lo duan hi ka ring bik lo. Mahse, khawvel famkim nan keini rethei leh chanhai hmeithai leh fahrahte hian, heng hreawmte hi kan tuar a ngai miau si a. Dem chak viau mah ila, dem theih a ni lo, a chhunga chengte hian kan zir lo em atin a lo ni.

Mahse, kan tan a ṭha lo tur chu pathian hian a ruat ngai si lo. Hlimna tluantling emaw kan tih hi hlimna famkim lo mai chauh a ni si a.

Tun hnu ah ka ngaihtuah let a, ka pa thih aṭang a, kum 8 naah, pa ka neih fel leh hnu ah, ka nu lo khawhar ṭhin tur zia te, ka pa a ngaih vang a, zan mu thei lo a, a tho sek te kha, a thu sawite ka ngaihtuah let a, engtin nge ka lo hmuh sak theih loh zawk tiin mahni ka inzawt fo ṭhin. Mahse, ka nu chu nu chhuanawm tak a ni, zirtirtu ṭha leh ngilnei ber, khawvel a, a hmangaihna tluk awm lo tur lehkha thiam ni miah si lo a, zirtir thiam em em si, officer ni miah si lo a, afate tan a, zirtirtu ṭha ber ni si, lei leh van Pathian ni hauh si lo a, a fate tan a Pathian nih tlin em em si, engkimah tluk zo chhingzo tu reng awm lo ka nu hian, a lo tawrh nasat tur zia te, a thawhrim tur zia te, a fate tan a, zahna a tuar hnem tur ziate ka ngaihtuah a, ka na ṭhin. Eng vang a tunah chauh hriatthiam pui nge ka nih? Tunah pawh hian a tawrhna zozaite kha ka la ngaihtuah kim thiam lo zawk. Nu tia ko mawlh mawlh siin, eng vangin nge a tawrhna te ka lo hriatthiam loh hnem tumna chhete mah ka neih ngai loh? Mahni in chhanna awmlo zawhna ka in zawt a. Ngaihtuahna tawite neiin hringnun ka hmang chho bek bek a, nu zaidam leh nunnem ber nei thei tur a, Pathian malsawmna ka dawng hi vannei tih piahlamin ka vannei a. Ka nunna tlukin ka nu hi a hlu bawk.

Khang kum kal ta chhung khan, beidawngin min kal bo san thei reng. Mahni chauhin nuamsa takin a awm thei reng. Mahse, a fate kal san ai a, hreawm tawrh inhuam a, ṭul puitu nu hi khawvel a nu chhuanawm leh entawn tlak ber a ni.

A fate tan heng hmuhsit diriam leh hnawlna tuar ngamtu nu tan hian, eng vangin nge a fate hian, a hmangaihna rulh let sen loh dawng reng chungin vawikhat tal a nu tan hreawm tawrh hi a thlan ve mai loh ang. Vawi za chuang chung hnawlna te chu a fate tan a paltlang a, vawikhat mittui far mai ni lo, vawi sang chuan mittui far hi a phu ve sin.

Nu, nu, i tan hian tih theih neih ve ka va chak si em! I engkim min hlan fai vek a, hmangaih let ve che i phu a ni. Hmangaih tlak nu, chhuan tlak nu, entawn tlaknu, engkim a rinchhan tlak nu, ka hmangaih reng ang che. I mi hmangaihna vangin ka lawm a, engkimah ka lawm a ni.

Hah tak a i lo chawilen i fate hian, eng tikah emaw chuan, i thawhrim rah te hi thlamuang leh hahdam takin, an la ei let tir ngei ang che.


Aw nu, kan neih hlu ber nu, i faten ilak a kan hel loh nan a i dilna te hi hrethiam thei turin, Pathianin min khawngaih mawlh rawh se. Kan tan a nu nih tling ber hmangaih let phu ber nu, ka thinlung zawng zawng hian hawisan ngai lo tur che in leh thinlung tui ang a nem kan lak a i put reng na hi, thrihnghilh lo turin, kei pawhin Pathian hnenah ka dil reng zel ang.

Kan hun kal tawhte ka ngaihtuah a, hringnun hian, natna a ken tel zia ka hre chiang tulh tulh maiin ka hria.

Ka story min lo hlut sak thiamtu te in vaiin inchungah ka lawm vek e. Hlut tlak loh leh chhiar tlakloh tak min hlut sak a min lo chhiar sak te hi ka tan chuan, ka la tawn ngai loh thil thar vek a ni a, chhiar tlak leh han ngaihsak vak tlakah ka thu ziah hi ka ngai ngai lo hrim hrim a. Keimah hian ka tui em vangin a story zawng pawh ni loin, ka rilru a lang ang ang ziah a, dah ṭhat nan ka ti a. Mahse, min lo chhiar sak ve tih ka hriat rualin ka lawmin ka phur em em a, ka chhungte vei zui pawh hlawh lem lo leh hrilh lemlo in ka zawm mawlh mawlh a, in nin hi ka hlau ṭhin. Kei ai a, ziakthiam leh thu ril tak tak thiam an tam lai a, kei a engmah ni lo ber hi hetiang zat a tamin chhiarnuam min lo tih sak hi ka phu loin ka lawm tak zet a ni. Ka chanchin pawh hetah hian ka ziak tel nghe nghe bawk.
(KA HMANGAIH KA NU TAN KA HLAN E)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)