I TEL LO CHUAN BY Zawntea.

Story tawi te te emaw luanliamna emaw post na
Ngaia
Site Admin
Posts: 25813
Joined: April 30th, 2016, 4:07 pm

I TEL LO CHUAN BY Zawntea.

Unread post by Ngaia » December 27th, 2020, 6:42 pm

I TEL LO CHUAN. Zawntea.



Mimkutthla Favang awllenlai tak ani a, Lo lam hna te an awl bawk nen, Mitin mai chu mahni nuam tihzawng leh chak zawngte tiin an hmanhlel ani ber mai.



Zosangpuii pawh chu a ṭhiannu Pari nen chuan inthlawp nitinin Mualhak ngaw a thing phurin an liam nitina, an pahniha an awm tawh chuan tudangmah an ngai bik lo.


Hetihlai vek hian Ruatsaka te ṭhian ho pawh a tuk maia an ramriahna tur buaipui chuan an hmanhlela, Sa pelh tum annih avangin karkhat vel riah an tum a ni.




Darpui khua hi thingtlang khuaah chuan khawlian pangngai ve tak, In pawh Zahnih vellai din tawhna ani a, a mi chengte an felin an inlungrual bawk nen, an hlim em em ṭhin a ni. Zosangpuii hi Darpui khaw nula hmelṭha ani a, amah a felin ṭhenrual kawm a lo thiam bawk nen, tu mai pawh hian an ngaina em ema, Naupang hlei hlei hian a bula awm nuam an tiṭhin. An mahni hi Chhungkaw pangngai ve tak anni a, a pa hi Darpui Middle School zirtirtu ani nghe nghe a ni.




#Zanriah eikham hun ani a,a bialnu Zosangpuii rim tum chuan Ruatsaka chu a insiam mawlh mawlh a, chutihlai chuan Ruatsaka pa, pu Roliana chuan, Mama, nula rim i tum em ni?" Tiin a rawn zawta, Ruatsaka chuan, ka tum chu anih hi" tiin a lo chhanga, Pu Roliana chuan, Sangpuii te Inah bawk ani leh ang chu maw?" A Meizial pak khuk hluah pah chuan a han ti leh a, Ruatsakan a chhan hma chuan a pa bawk chuan, Sangpuii hi chu thlah theila ka ti khawp mai, kan dinhmun inthlauh zia pawh i hria a, mi sawi kan kai lutuk ang" a han tihzawma. Ruatsaka nu Pi Siamliani pawh chuan an pa chu lo thlawp ve zatin, ni e Mama, i pa thusawi kha ngaihtuah zuila a ṭha ka ti khawp mai" a lo ti ve bawka, Ruatsaka chuan Pindan aṭanga lo chhuah pah hian, ka pa, inngaih anga mi rilru chhia chu anni lo a sin, Zantin deuhthaw ka lenna ani a, hmel mawi lo leh min han ei lo hmel reng ka hmu lo mai" a rawn ti a, a pa chuan, Mama, Tlangval i ni ve tawha, thil tamtak i chhut thiam ve tawh turah ka ngai. Sangpuii nu leh pa te saw an sual e" kan ti lova, an ṭhat lohna han sawi tur lah kan hre hek law, tih tak takah chuan an fel em ema, keini khuaah ngat phei chuan a che thei ber anni bawk nen, fin pawh saw an fing reng a sin, bakah kan khuaah chuan a fingvar ber anni a, mi zah pawh an kai viau ania, an fanu inva rim chu mi â ni lo ta chuan lo remtih loh ngawt thu a awm hleinem, mahse an makpa tur atan em chuan an iai che ka ring a ni" tiin a fapa chu an zilh charh charha. Ruatsaka erawh a ngawi reng thung. Anu ve thung chuan, ni e Mama, i rilru tihnat hi kan duh hauh lova, mahse Sangpuii te zawng, an sang em a ni. Inla kal thui tak tak hma hian thlah theila i tan leh kan chhungkaw tan vek ania" a han ti veleh bawka. Chutia Ruatsaka an lo zilh mawlh mawlh lai chuan Rinpuia, Ruatsaka ṭhianpa chu a rawn lut hlawl maia, chutia thutak hmel taka a luhna te an lo ṭhu ṭhap a hmuh chuan zak rilru takin Kawngkapui lamah chuan let leh mai a han tuma, pi Siamliani chuan lo hrethiam vatin, Rina, engatia let leh i tum mai, lo ṭhu tawh, i ṭhianpa hi kan lo zilh mai alawm" tiin a han chiauau leh hnuhnawha, Rinpuia pawh chu bet lo zet chuan a ṭhu veleh ta zawka. Pu Roliana te nupa tan pawn an fapa chu zilh chhunzawmna chi ni tawh hek lo le, Rinpuia chu an han be lemluama, minute 5 vel an ṭhu tawh ang" tihah chuan Rinpuia chuan, ti teh, i leng teh ang, tiin a ṭhianpa chu a chhuahpui ta a.







#A fapate ṭhiandun an chhuah hnu chuan Pu Roliana chuan, hmel mawi lo min hmuh ngailo te kha a ti a, ava ngampa sual ang tih ania ka hlauh" a nupui bulah chuan a han ti a, an Chaw eina Thleng sil mawlh mawlh pah hian, ani ngawt mai, mahse Mama te zawng thu hi a awih thei a, kan thu hi a hnialin ka ring lo" tiin a pasal chu Pi Siami chuan a lo chhanga, Pu Roliana chuan, nupa karah chuan han sawi ru ta mai mai ila, Pi Ramliani, Sangpuii nu, saw a Mit a sang riau an ti leh nghala, keini tan zawng, cho chhin loh hi a ṭha ber" a han ti leh a, Pi Siami chuan, tunah chuan Mama hi nangmah tak pawh hian thunun la a ṭha ang, nu te hi chu min palzam ngamnachen hi a nei tlat ania" a lo ti ve siam siama. Pu Roliana chuan, ni e, tun aṭanga kan lo invenlawk hi a ngai reng a ni kan mualpho tam hma hian " ti a a lo chhan hnu chuan amah vek chuan, khawnge, ṭhenawm te Inah Thingpui sen hang kan va dawm teh ang "tiin a chhuak zui ta nghala.




Ruatsaka te chhungkua hi pali anni a, an unau hi pahnih chauh niin, amah hi a naupang zawk ani a, a u hi Hmeichhia niin, an khaw ṭhenawm Bualnam khuaah Pasal neiin a awm tawh a ni. Chhungkaw rethei berh tak chu ni lo mahse, khawsak nuam tak anni lem lova, an chhungkaw member an tam loh em avang hian an hautak lo mai pawh a, harsa lo angin an lang ve mai a ni. hei hi an chhungkaw dinhmun dik tak hretu a nu leh pa te chuan inkiltawih nan an hmang lo thei lova, chuvanga an fapa pawh hi a bialnu ṭhen tura duh viau anni reng a ni.




#Ruatsaka te pawh chu Sangpuii te In lam pan chuan an kal zela, chutia kawnga an kallai chuan Rinpuia chuan, Ruata, in In ka rawn luh khan in lo thutak sia ka zak tak tak a ni " a han ti a. Ruatsaka chuan, min lo zilh anih kha" a lo tih chuan rang zet mai hian, eng thuah chuan maw?" Rinpuia chuan a lo ti vata. Ruatsaka chuan, Sangpuii hi thlah turin min duh a" zep lem lo chuan a han titawng maia. Rinpuia chuan, Sangpuii te chu a fel tehreng nen, a hmel lah a ṭha si, eng rilru nge maw i nute chuan an put reng reng le?" Zawt titih chuan an ti a. Ruatsaka chuan a nu ten Sangpuii thlah tura a nu leh pa ten an duh chhan an sawi chuan Rinpuia chuan, i nute rilru aṭang chuan a awm reng mai, mahse ṭhianpa, Sangpui pawn a duh em em che a, mipain bul kan ṭan tawh alawm le" tiin a ṭhianpa chu an fuih sauh sauhva. Ruatsaka pawh chuan, ni e, anih nih hi han ni phawt mai ila, hmachhawn dan a awm zel mai ang chu" a lo tisapa. Biak pawh inbe zui lem lo chuan an kal ta zela...






Sangpuii te In an han thlen chuan Tlangval pahnih hi an lo awm tawha. Sangpuiin Ruatsaka te lo lut a lo hmuh chuan, u Rinpuia te ni reng che uin, inva rawn tlai ve" tiin a lo be siam siama. Ṭhuthmun rempah chuan Rinpuia zawk chuan, kan damdawi dawn a khal deuhva, kan han helh leh rih alawm mawle " nui ṭhaw pah chuan an ti a, Sangpuii chuan, thu thup deuhva Khabe sep hi i thiam sia maw, ka hrethiam phak nek love" a lo ti hluka. Sangpuii vek chuan, Thingpui kan lum ang che u" tiin Choka lam a pan ta nghala. Chutihlai chuan Sangpuii In leng pakhat chuan, Ruata, i u hi inva tlawh ngai em?" Ani hi pasal a nei a, a reh ta vung vung mai" a rawn ti a, Ruatsaka chuan, tunhnaiah tak chuan kan intlawh meuh lo, lamte a hla si a, intlawh zung zung a har e mai, chanchin ṭha lo kan hriat loh danah, an dam ṭha anih ka ring " tiin a lo chhanga. Chutihlai chuan Sangpuii chu Thingpui chawi chuan a lo phei a, an bul a rawn thlen chuan, Thingpui lumsa a lo awma, ka rei loh phah anih hi " a han ti a, Rinpuia chuan a Thingpui a in zawh hnu chuan, Sangpui, Thingpui ka in zo chiah na a, ka ṭin san ang che u, naktuk riah kan tum bawk nen, mamawh tur kan vai kual teh ang" a han ti a, Sangpuii chuan, amak em em e u Rina hi, Thingpui in zawh veleh a chhuah nulhte kha i zak lawmni?" Nui pah chuan a lo ti a, Rinpuia chuan, zak chung chungin ka chhuak dawn anih hi, hlim deuh khan inkawm rawh u" tiin a chhuahsan zui nghal a.





Rinpuia a chhuah hnu chuan Sangpuii chuan, Ruata, naktukah maw inriah dawna" tiin an zawta, Ruatsaka chuan, ni e, Lo lam hna awllai te ania remchang kan ti deuhva" ti a a lo chhan chuan Tlangval pakhat chuan, khawilaman nge inhan tuma?" A rawn ti a, Ruatsaka chuan, ka la chiang bik chiah lo, u Nghaka hian khawilam nge maw min panpui a tumni" a lo ti a, Tlangval pakhat ve thung chuan, U Nghaka te nen maw innih dawna, a tlawmngai sia a hnungzui a nuam a sin aw" tutu nge innih dawn?" A rawn tih chuan, kha, Rinpuia kha ania, Sawma ani bawk ang" a lo tih chuan Tlangval pakhat chuan, zu hlawhtling mawlh teh u, keini zawng, Sangpuii zun hian min zem nghet e maia, khawimah kan kal thei lo anih hi" nui hak hak pah chuan a han ti a, Sangpuii chuan, u ṭhuama ṭhin hi a, min tizak dawn alawm, keini zun te zawngin tumah va zem suh a" a lo ti ve a. Tichuan eng eng emaw sawi chuan an inkawm ta zela. Dar riat leh a chanve vel a rik chuan Sangpuii nu leh pa leng pawh an rawn haw ve tawha, Sangpuii chuan, ka pa, kan zirtirtu thar tur chu enge a an hmela?" Tiin a lo zawta, Sangpuii pa Pu Buanga chuan, a ṭhat hmel khawp mai, vawikhat inhmuhnaah hi chuan ngaih dan siam pawh a har e a" a lo ti a, Ṭhuama chuan, ka pu, khawilam mi nge maw ni reng reng le?" A lo tih chuan Pu Buanga chuan, Aizawl mi ani awm e, a lo ti a. Chutia an titi leh luam hnu chuan Ruatsaka chuan banga Sana intar melh zawk pah chuan, ekhai, kan ṭawng kan ṭawnga dar kua a lo hnai reng mai, haw zai kan rel dawn ange" a han ti a, Sangpuii nu chuan, Ruata chu, kan lo haw ve chiah alawm" a lo ti a, Ruata chuan, naktuk lam ram riah kan tum si a, insiam te pawh ka ngai e" ti a a chhan chuan Sangpuii chuan, i tih tlat chuan tirawh kan thlah ang che" lo ti vatin an inzui chhuak ta a.




Pawn thimlai deuh an thlen chuan an han ding khawmuanga, chutah Sangpuii chuan, i leng rei lo e" pangchang Aw deuh chuan a han tithawp sata, Ruatsaka chuan, a ṭulna hian min ur thlu si anih hi, engpawh nise, lo rinawmla, ka hmangaih em em che ani tih hi i lo hrereng dawn nia" a han ti a, Sangpuii chu a Mittui a hnam titih ta maia, Ruatsaka chu thlakhlelhna Mit menga en vawng vawng pah hian, keipawn ka hmangaih che, lo haw leh thuai rawh aw" a han tisapa, Ruatsaka chuan, kan lo haw leh thuai ang, va lut tawh rawh i chhungte ngaih a ṭha lo ange" a han ti a, Sangpuii chuan Ruatsaka chu en leh vawng vawngin, anih leh muttui le" tiin a luhsan ta a.





A haw kawngah chuan Ruatsaka chuan thil tamtak a ngaihtuah paha. A nu leh pa ten Sangpuii thlah mai tura an ti pawh chu awm" a ti em ema, mahse vawi leh khata han thlah mai chu a theih a inrin loh bakah, tum pawh a lo la tum ngailoh thil anih avangin harsa dawn riau hian a hria a, a rilru chu a insual buai ru ngei mai.






Chutia a rilru kawma a kal zel takah chuan an In pawh a thleng ta reng mai. In a luh chuan a nu chuan hmun a lo hawl faia, a fapa lo lut a hmuh chuan, e kha, i va leng rei love" tiin a lo be vata, Ruatsaka chuan, naktuk riah kan tum sia mut hma kan duh deuh mawle" a lo ti a, Pi Siami chuan, inkal hah dawn sia mu hma tak rawh, Chaw ei khamah a mi inkal ang?" a han ti a, Ruatsaka chuan, ka ring deuh kan tum dan kha chu ania" tihpah chuan, ka mamawh tur chu ka inkengkimin ka hria" an tihzawma, Pindan lam pan chu a rual ta nghala.


Chhunlama a lo inbuatsaih lawk vek tawh avangin buaipui tur a nei tawh lo a ni....







#A tuk tukṭhuan ei khamah chuan Ruatsaka chu a ṭhiante sawm tur chuan kal mai a han tuma, a pa chuan, Mama "ka sawi ang khan, ṭhiante zai ngai thiamla, puih ngai renga zu awm loh tur, zu fimkhur hle ang che" ti a a chah hnu chuan Nghaka te In lam pan chuan a chhuak ta nghala.





Ruatsakan Nghaka te In ava thlen chuan Nghakate pawn Chaw an lo ei kham fel ve tawha, Nghaka chuan "kha, i va rawn hma ve" tiin a lo bia a, chutia mawni, tlai ka lo inti riau tawh a sin" ti a a lo chhan chuan Nghaka bawk chuan Iptepuia a ken tur khung mawlh mawlh pah hian, "tlai teh suh ei, hei midang pawh tumah an la rawn thlen loh hi" a han ti a. Chutia midang nghak paha an lo titi mawlh mawlhlai chuan Rinpuia leh Malsawma chu an rawn inzui lut a. An rawn luhrual chuan Rinpuia chuan, inva hma bik ve, min lo nghak rei tawh em?" A rawn ti pah a, Rei love, keipawh ka thleng ve deuh chiah ani" Ruatsaka chuan a lo ti a, Nghaka ve thung chuan, a nghak rei tawh lutuk che u a kir leh a tum hman thut thut alawm, ka lo chelh hram hram a nih hi" nui hui pah chuan a lo ti ve a. Amah vek chuan, kan chhuah har lutuk chuan Buk sualte a ngai dawn bawk nen kan tlai lutuk ang, i kal dawn ang uhmiang" an tihzawma. Chutah apa chuan, Nghaka, khawian maw kan riak dawn i tih kha?" Ti a a lo zawh chuan, Saibawh lam kan tum chu ania" Nghaka chuan a lo ti a. Apa bawk chuan, zu fimkhur ru aw, inkutpalh te hi a hlauhawm ania, tiin a han chah leh hnu chuan Saibawh ngaw lam pan tur chuan an inzui chhuak ta a...






#Chawhma dawn an kal hnu chuan Ruatsaka te chu Saibawh Ram chhungah an awm tawha, Riahbuk sualna tur hmunremlai, Tui hnaihna hmun ni si zawngin an hmanhlela, darkar khat dawn an vah hnu chuan Luite hnaih deuh, hmunrem ṭha deuh chu an hmu ta, an Iptepuite nghatin Meizialte zuin an han ṭhumuang leh rih a, chutah an zinga upa ber Nghaka chuan "Saibawh pawh ka kal khat ta deuh aniang, hla ta riauva kan hriat chu" a han ti a, Malsawma chuan "ka vawikhat kalna ania, a hla ka tikher mai, a ram lah chu ala ngaw ṭhat hmel hrep leh nghala" a lo tih chuan Ruatsaka chuan "la ngaw ṭha e a, Sa pawh an la tam viau reng ania" a lo ti a, Rinpuia chuan, lungngai suh u, hei Pasalṭha kan kalpui alawm, kan hlawhchham lo tawp ang" Nghaka melh paha an ti chu an nui dar dara, rei vak lo an ṭhut leh hnu chuan Nghaka chuan, hmanrua tur sat zung zung ila i sa fel thuai ang u aw" a han tih takah chuan mahni tih tur ṭheuhva bur turin an tho chhuak ta hlawma....






#Chutia an phaktawk ṭheuhva Tlangval tha chak rual an han chet tak tak takah chuan an duh pawh an ngah har lo kher mai.



Tunah chuan Tlai dar thum vel ani ta. Ruatsaka te ho chuan an Buk tur pawh an sa zo tawha, an Buk chhungah chuan ṭhuin an han titi a, chutihlai chuan Nghaka chuan "Sawma Chaw chhumna tur Tui i zu chawi mai dawn em ni?" a han tih chuan Ruatsaka chuan, keiman ka zu chawi ange" a lo ti vata, Sawma chuan, "U Ruat naupang kan awm alawm, lo ṭhu mai mai teh u, hlat pawh a hlat loh khu" tihpah chuan Tiui um nena Buk chhuahsan chu a rual ta nghala. Sawma a kal liamhnu chuan Nghaka chuan, "tlailam ani tawha, Sava zanriak changa chhuah induh lawmni?" eirawng chu ka lo bawl thei reng ania" a han ti a, Ruatsaka chuan, Rinpuia nen hian chhuak zawk teh u, Silai keng ve ve inni bawka Sa pawh kan ei zawk ang" ti a a lo chhan chuan Rinpuia chuan a ṭhianpa chu a khawngaih ru riau maia, chutah Rinpuia chuan, ka Silai hi i keng dawn alawm, keia Silai keng ve hi ka themtlaw zia pawh i hriat vek kha" nui ṭhaw paha a lo tih chuan Nghaka pawh chuan, ni e, hei ka ta pawh a ken theih reng alawm" a lo ti ve bawka, a tawpah chuan tihian rem an ruat ta a. Rinpuia leh Ruatsaka te an chhuak anga, a bak chuan Buk an lo nghak dawn a ni...







#Buk an chhuahsan hnu chuan an chhaklamah an chho ta a, an awmna aṭanga Mual hranah perkai lehin, an Mit leh Beng lenin fimkhur takin an kal zela. Sahnu te chu an hmu ve takna a, hnu tharlam a lo ni tawh lo ṭhin nen, an kalsan zela, thui ngial an vah hnu pawh chuan engmah an ang thei chuang lo, khua lah chu a tlai chak phian mai bawk si, chutah Rinpuia chuan “i kir mai teh ang" a han ti a, Ruatsaka pawh chuan “ni e, eng kan an loh hmel e mai" ti a a lo chhan takah chuan an Buk lam panin an kir leh ta a. Chutia fimkhur lem lo taka an kallai chuan an hmalama Sava Thlazap ri phurh phurh thawm an hre thut maia, an titi lai pawh an tawp chiang hle mai, Rinpuia chuan, “va kap hlauh rawh", zawi sap hian a han ti a, Ruatsaka pawh chu thawm dim takin Sava thawm awmna lam pan chuan a kal ta nghala. Minute nga vel a ral leh chuan Silai a puak ta, chuveleh Rinpuia chuan, i kap thla em?" Tih leh tlan phei a rual nghala, Ruatsaka chuan a Sava kahthlak chhar pah chuan “a tla ngei anih hi", ti a nui var varin a Sava kahthlak chu a rawn khai chhuak va va a, Rinpuia chuan “Vahrit anih kha, ava tihzia em" hlim tak chuan a lo ti a, Ruatsakan Kawng a rawn thlen chhoh hnu chuan "hlawhchham ngawt ai chuan a lawmawm hrim hrim e", an tih chuan Rinpuia chuan “lawmawm e a, i themthiam zarah kan tlai dawn e, hawh teh Khua pawh a thim dawn i kal thuai thuai teh ang", a lo ti a, tichuan hlim taka titi bawrh bawrh chung chuan an Buk lam panin an kal leh ta a...







Ruatsaka ten an Buk an va thlen chuan Khua pawh a thim ruai chu ani tawh mai. Buka an luhrual chuan Nghaka chuan, “enge inana, inva hlawhtling em,,“ tiin a lo zawt vara, Rinpuia zawk chuan lo chhang vatin, “sa hnu chu kan hmu nual takna a han chhuizui tur khawpa thar kan hmu hauh lo mai, kan hlawhchham dalah Vahrit zanriak tur kan rawn tawng fuh hlauh a ni,“ tiin a lo chhanga, Nghaka chuan, “e chu, inrawn hlawhtling nasa alawm, kan tlai dawn mange,“ a lo ti a, Malsawma chuan, “khawimaw ka lo puah nghal ange zanriah kha lo siam rawh u,“ tihpah chuan Ruatsaka Vahrit ken chu laksakin Buk pawn lamah a chhuahpui nghala...










#Zanriahte an ei kham chuan Meizialte zuin an titi laih laih a. Nghaka chuan, “tihian ka lo ngaihtuah a, kan awmna aṭang hian Zuksih mual hi darkar hnih dawn kal ania, Sazuk pawh kah tur chu kan tawn mai ka ringa, chutah chuan naktuk lamah hian kan kal nghal mai dawn em niang, nge ni a, helai vel hi kan hrut hmasa phawt anga, kan hlawhchham dawna a lan tak leh Zuksih chu kan pan chauh zawk ang tiin ka lo ngaihtuah a, enge inngaih dan ni hlawm,“ tiin a naute ho chu an rawna. Ruatsaka chuan, “keizawng, helaia awm leh awm lo hela hun khawhral ai chuan hla deuh mahse, Zuksih pan chu ka awn zawk mah mai,“ a lo ti a, Rinpuia pawh chuan, “ni e, Vawiin lama kan sahniak chhar reng a hlui tawh e mai, ṭhianpa Ruata duh dan kha ka thlawp e,“ a rawn tih ve takah chuan Nghaka chuan, “chutiang anih chuan naktuk tukṭhuan ei hmain kan chhuak dawn nia, kan hlawhtlin hma leh kan haw hma dawn ani mai alawm,“ a lo ti a. tichuan an hmabak tur te sawi chung chuan an titi zawm ta zela...




Hemi zan hian Thla a eng em em maia, Saibawh ngaw chu chhah viau mahse, Thingkung lian tak tak karah chuan chu Thla eng chu a inkap lut sung maia, a ṭhiante an titi mawlh mawlh lai chuan Ruatsaka chu Sangpuii zun chuan a zem chiai chiaia, ṭawng pawh ṭawng ve lem lo hian a suangtuahna chuan Sangpuii chu a pawm vawng vawnga, a rilru chuan, “Sangpui, min rawn ngai ve tak che maw aw, zanin Thla eng te hi han lawmdun thei ni ila kan hlim leh dawn nena maw,“ a han ti a, chutia a rilru kawma a suangtuahnaa a chen veng venglai chuan Rinpuia chuan a Dara rawn khawih pah hian, “ava mak vung vung ve, enge i ngaihtuah a, biak reng i hriat loh ni“ a rawn tih takah chuan harh chhuak zawkin, “ekhaia, naktuk kan chet dan tur ruahmanna ka lo nei e ka tia lawm mawle,“ a lo ti thuaia, Rinpuia chuan, “chutiang ringawt chu ani lo deuh a ang ka ti mange,“ a han tih chuan an nui dar dar a...






#Darpui lam pawh Thla a eng kher mai. Zan darsarih vel ani tawha, Sangpuii lungleng chu an Kawtkaiah te chhuakin Tlang leh Mual Thla engin a en hnimruai mai te chu a thlir kual vela, a lung a leng em em maia, amah rim tur Tlangval an rawn leng lo bawk nen, a khawhar chu a zual em em maia, rawn leng an awm lo erawh pawi tihna a nei chuang lo.





A rilru chuan, ,“Ruata, i kiangah han awm ni ila, mal nun chhiarin hun ka hmang lo tur. I tel lo chuan heng Thla eng te hi a mawi zo lova, ka lunglen belhchhahtu mai ani si a maw, min rawn ngaiin min rawn vei ve tak che maw,“ tiin a Thinlung rumri chu a ngaithla a. A kil thimlai deuhvah chuan ṭhuin a Mittui far fep fep chu a hrupah zauh zauhva. Naupang pawnto hlim thawm leh Tlangval ṭhenkhat ṭingṭang perha lungleng taka Thla eng lawma zai ri te chuan a hnem zo mawlh lo a ni.





Chutia amah chauhva a ṭhut renglai chuan a nu chuan a rawn kova, Sangpuii chu inhruhul mawlh mawlhin, In chhungah chuan a lut ta nghala. In chhung ava luh chuan apa leh mipakhat, a hriat ngai pawh ni lo hi an lo titi mawlh mawlh maia, a nu chuan, hei kan zirtirtu thar tur chu anih hi, han chibai ta che,“ a lo ti a, Sangpuii pawh chuan hnial lem lovin chupalama a Kut pek pah chuan ,“lo inchibai ang hmiang,“ a han ti a, chupa chuan chiang takin Sangpuii chu a lo en a ,“chutah Awki zangvah hian ,“e hei, i hmelṭhat thu hi an sawi ka hria a, ka rawn leng nghal rawih mai anih hi,“ nui chunga a Kut lo phar chhuah pah chuan a lo ti ve a, chutihlai chuan Sangpuii pa chuan, i u tur ania, u Zir tiin i ko dawn nia,“ a lo ti a. Sangpuii chuan, Thingpuite i in tawh em?" Ti a a zawh chuan Zira chuan, aw in tawh e,“ a lo ti a, chutihlai chuan Tlangval pathum hi Sangpuii rim tur chuan an rawn inzui lut ṭham ṭhama. Sangpuiin a lo hmuh chuan ,“Muana te lah nireng che uin, lo leng rawh u, inva rawn leng duh love,“ tiin a lo be siam siama. Muana chuan ,“rawn len fo pawh hi midang thin tihrim kan hlau alawm mawle,“ nui pah chuan a lo ti a, ṭhuthmun te an remfel hnu chuan Sangpuii chuan ,“engatia zanin chu inrawn len ve teh hlawl ni, inbialnu te an lo khawhar lutuk ange,“ a han tih chuan Siama chuan ,“tumah keini avanga khawhar tur an awm love, zanin pawh rawn len kan tuma, u Valan min lo chelha, Thla eng lawm ang u a tia, kan zai tak hrep kha mawle, chu, an la zai ul ul chu,“ a lo ti a.. tichuan eng eng emaw sawiin an inkawm ta zela, Sangpuii tan pawh han inngaihtuah lunglen theih ni ta bik hek lo le, hlim taka titi chuan Zan rei tak thleng an menga, tlaivar ngawt thu awm hek lo le, amah rimtute chu an ṭin ve ta a. Sangpuii pawh chu mu tur chuan a inbuatsaih ve nghal a.


A mut hma chuan pawnah ava chhuaka, Thla pawh a lo la eng kher mai. Thawm chu a reh ṭhap tawha. Leihrik hram leh Pawngi lam rite,, Chiri Khuang beng ri te thawm bak hriat tur a awm tawh lo. Sangpuii chu a Mit lenin a han hawi kual riai riaia, a thil hmuh engkim mai chuan a lung a tileng em em maia, a Mittui te a tla leh dawn ta maia, chu chu a ṭha ber lo tih hriain, a Mittui lo tla tur dan tum chuan an khap fak faka, chutah zawisap hian, Lalpa, ka hmangaih kha venghim zel ang che aw,“ tiin a phunsapa, In chhungah chuan a lut ta nghala....



#A Tuk Tukṭhuan an ei kham chuan Sangpuii chu a Ṭhiannu Pari nen an lo tum angin Thing phur tur chuan a insiam nghal mawlh mawlh a. Chutihlai chuan a nu chuan; ,“Mami, enge thawh i tuma i va hmanhmawh ve,“ tiin a rawn zawta, Sangpuii chuan ,“Ṭhiannu Pari nen Thing va phur ang kan tia,“ ti a a lo chhan chuan apa zawk chuan, Thingphurh pawh hi a ngai emawni, i intihah mai mai alawm,“ a lo ti a, Sangpuii chuan, ,“a, ka pa, In a awm ngawt ngawt chu Ni a rei duh e mai, hetia Ni han tumtawi te hi anuam ve alawm, hah khawpin kan phur tak tak hleinem,“ a lo ti a, a nu te pawn engmah an rawn sawi zui tawh lem lo. Sangpuii chuan a inpeih hnu chuan, ,“ka kal ania,“ tih leh an In chhuahsan chu a ruala, a ṭhiannu Pari sawm tur chuan a kal ta nghala...





Pari te In ava thlen chuan Kawt aṭang chuan: Pari, i inpeih tawh em?" Tiin an zawta, Pari pawh chu Em nena lo chhuak nghalin, a lo chhuah pah chuan, ,“ka lo nghak reng tawh zawk che alawm, tirawh i kal nghal ang,“ a rawn ti a, tichuan Mualhak ngaw lam pan tur chuan titi siam siam pahin an kal ta nghala...





Chutia titi paha an kal zellai chuan ,“kha Sangpui, khawnge inkal dawna?" Tiin mipakhat hian a rawn zawta, Aw an hriatna lam an hawi chuan Sangpuii chuan lo betu chu tunge anih a hre nghal mai, chutah nui sang pah hian ,“a, hei, Thing kan va phur dawn anih hi, i Sikul dawn em ni?" tiin a han zawt leta, Zira chuan ,“ni e hei, ka tum chu anih hi, tluang takin va kal rawh u,“ a rawn ti a, tichuan inbe zawm ta lovin an kal leh ta a. Naurilṭam hun anih meuh chuan Sangpuii te pawn an tum ram chu an thleng tawha, rei vak lo an ṭhut hahchawlh hnu chuan Thingro fawm tur zawng chuan an che nghal vat vata. Chhun dar sawmpahnih a rik meuh chuan an phur khawp chu an ngah der tawh mai. An phur tur te an Em a an thawn fel hnu chuan haw nghal mai lovin an han ṭhu muang leh rih a, chutah Pari chuan ,“ṭhiannu, Ruata te hi engtik nge an rawn haw dawna?" a han ti a ,“karkhat vel chu an tum dan ania, an hlawhtlin hma leh hma loh a zir ani bawk,“ a lo ti a, Pari vek chuan ,“e taka, nichina min lo betu kha tunge, ka hriat ngai pawh ni a kan hriat loh chu, ala hre em em leh nghal che a,“ a rawn ti leh a, Sangpuii chuan ,“ka pa te thawhpui thar tur anih kha, u Zira ania, Aizawl lam mi ani awm e,“ tii a a han chhan chuan Pari chuan ,”a lo nih tak chu, ka lo hre ve reng reng hleinem,“ a lo ti a, amah vek chuan ,“i haw tawh dawn ang hmiang, hah pawh a dam ta e,“ a han tihzawma, tichuan khawlam panin an haw leh ta a...







#Ni pawh a liam ve zela, Ruatsaka te ho pawh an riah luh Ni aṭang chuan Nithum lai a liam tawha. A Ni li ni Zirtawpni chuan an tum ang ngeiin Zukchal an kap nghe nghe a, an hlim kher maia, chutihrual erawh chuan an zinga Naupang ber Malsawma chu a intipalh hlauh maia, chu erawh chuan an lawm a tikim lo deuh thunga, a Ban ruh a titliak ngei niin an hria a, chutiang Ramhnuaiah chuan han inbuaipui vak dan a awm si lo nen, an buai tlang kher mai.




Chutia Meilum kianga an ṭhut ṭhap lai chuan Nghaka chuan ,“Ruata, engtinmaw Sawma chu a intihpalh a,“ tiin an zawta, Ruata chuan: ,“khatia Sazuk thawm ka hriat khan nan hman ngei tum khan ka tlan ta kha ania, Sawma reng ka lo hre chang tawh lo, ti ila ka hnungah khan a rawn tlan ve mai turah khan ka ngai ani mah zawka, ri rumrum ka hriat pawh khan Sawma Lei rah ṭilh ni turah ka ngaia, ani lah chu a lo lum ni in, a zia lo tak tak a ni,“ a lo ti a. Nghaka chuan ,''“a zia lo tak hle mai, mahse hei kan tum ber kan hlawhtling ta bawka, Naktukah kan zing haw dawn nia, enge mawni le, sawm thah niah pawh vawikhat lungngaih a awm chawk an tih ve bawk kha mawle,“ tiin a han hnema, zanriah ei te a hun chuan an kil zui ta nghala....





Zanriahte an ei kham meuh chuan Khua pawh a thim fel der maia, Ruatsakate chu an Buk tualah ṭhuin an Sazuk Sa te er chuan an titi siam siama. Sawma erawhchu a Khua a Sik deuh avangin ṭhut pawh a ṭhu chhuak ve peih lova, Buk chhungah chuan muin, a khattawkin Ruatsaka te ho chuan anva vil renga, chutihlai mek chuan Thla pawn a tawmkuk chhuahsanin a enna a rawn pholang veleh tawha, Ruatsaka chuan haw thuai thuai a chak zual em ema, khawlamah chuan enge thleng a hre der si lo. Ruatsaka chauh khaw lam hawn chak ani bik lo. Rinpuia pawh chuan hawn ringawt chu a rilruk ve tawha, amaherawhchu, tuman chutianglam reng an sawi chhuak lem lo. Zan rei tak thlenga an men hnu chuan mut zai an rel ve ta a....









#A Tuk khua a var chuan Ruatsaka te ho chu tho sap sapin an inphih harh vat vat hlawma, an Phur tur te buaipui chuan an phe leh nghal vat vat hlawma, Sawma khawsik pawn zia lam a pan tawh avangin a tho harh ve viau maia, Nghakan, ,''”Sawma i kal thei angem?" ti a a zawh chuan,” thei e a, ka ṭha lutuk alawm,“ a lo ti ve maia, Nghaka vek chuan, ,“Naktuk chawlhni ani bawk nen, riah zelna chi ani tawh bawk si lova, i chhel deuh a ngai anih kha,“ inthiam lo deuh taka a han tih chuan Rinpuia chuan lo nuih ṭhaw pah hian ,“Sawma, i Kutin i kal hleinem tiraw, i kal thei lutuk ang,” a lo ti a, Sawma chuan ,”ka kal ṭhat theih loh tak leh mi paw tawh anga ani mai,” a lo ti ve a, an han nui dar dara. chutia infiam bawrh bawrh pah a an tih tur te an tih zawh chuan an kal dawn ta a, an kal dawn chuan Ruatsaka chuan, ,”i nawm loh deuh chuan chawlh i rawt hreh dawn lo nia aw,“ Sawma bulah chuan an ti a, tichuan khawlam panin an chhuak ta a....





#Ruatsaka te ho chu Rit phur annih bakah, Sawma an ngaihtuah deuh avang chuan a khattawkin an chawl zut maia, Sawma lah chuan a inthiam loh thu chu a sawi sek leh nghala, mahse Ruatsaka te ho chuan chutiang zawnga rilru pu lo tur leh hrehawm ti lo tur chuan an fuih ve thunga, Rinpuia lahin fiamthu a rawlh hnansek bawk nen, Sawma inthlahrunna pawh chu a tiziaawm viau ta ve ang.





Chutia Nilenga an kal hnu chuan Zanriah ei hun vel hian an khaw Kawtchhuah chu Thlansaphul kaiin an thleng ta hlawl maia. Hahdam taka khua luh an duh avangin Meizial te zuin an chawl hahdama. Chutah Rinpuia chuan, ,“Ruata, hlado te han chhamla mawle,“ nui ṭhaw pah chuan an ti a. Ruatsakan a chhan hma chuan Sawma chuan ,“hmanlai kan pi leh pute hunlai khan hlado kha Sa an kah te khan an chham zel kha ania, enge maw a ṭulna ni a, a tur ve reng zawk emawni?" Zawh bik pawh nei chuang lo chuan a han ti a. Nghaka chuan lo chhang vatin ,“ani tak a sin, kan pi leh pute kha mahni hmasial lo tak mai anni a, midang tana ralraih pawh kha an inhuam em em a ni,” ti a lo chhangin an chawl deta, chutah, hlado pawh hi a danglam chuang lo. An pamham loh zia leh mahni hma an sial loh zia an lantirna ani ber mai. ngei ngei tur tih phei zawng ani law, kha hlei hlei khan midang tana luanchhuah an hreh loh zia a tichiang,” tiin a thusawi chu a titawpa. Ruatsaka chuan,kan pi leh pute nun kha a lo ropui ngawt tak mai. An tlawmngaihna te hlei hlei kha ani ropui ni, mahni ṭheuh hian entawnin chhawm zel peih ila zawng, innghirnghona tamtak hi chu kan pumpelhin ka ring a ni,” tiin a lo tuihnih ve a, Rinpuia chuan ,“intui viau na a i kal tawh ang u hmiang,“ a rawn tih chuan lo hnial buai lovin kal zai an rel leh ta a...




#Khawchhung anva luh chuan Inkhawm Dar pawh a ri bal bal tawha. Nghaka te Inah chuan Sa insem a ngaih avangin an lut khawma, Nghaka ten an In an luh chuan a chhungte chu an lo lawm hle maia, Nghaka pa erawh inkhawmin a lo chhuak hman tawh thunga. Nghaka te chu Thingpui te inin an han ṭhu hahchawl te te phawta, Thingpui te an in zawh chuan an Sa chu a inzat ṭheuhva insemin an ṭin ta hlawma.




Ruatsaka pawh chu an In lam panin a kal nghal vang vanga, an In a thlen chuan apa chiah hi a lo awma. Chutia a fapa inphurbawr luk chunga lo lut a hmuh chuan ,“e kha i rawn thleng ta maw, ka lo beisei reng tawh che a, inva rawn hlawhtling awm ve,” tihpah chuan a phur chu a lo chawi thlaksaka. Ruatsaka chuan ,“nia, Pathian zarah hlawhtling ani ve mai,“ a lo ti a, apa chu Ruatsaka Sa rawn hawn te buaipui chuan a phe nghal vat vata. Chutah a pa chuan ,“zanriah ila ei awm si lova, han inbual faila i ei mai dawn nia,“ a han tih chuan Ruatsaka pawh chu rei ṭhu muang lovin a inbual ta nghala. A inbual zawh chuan zanriah chu a han kil leh nghala, a ei zawh chuan dar sarih leh a chanve vel ani tawha, tlai tirilru deuh viau mahse Ruatsaka chu Sangpuii rim tum chuan a insiam mawlh mawlh thova, apa'n zanin chu hahdam ve bawkla mawle,“ a tih pawh chuan ka chau hleinem,“ a lo ti maia, a insiam zawh chuan engmah sawi tawh lem lovin a chhuak ta nghala.






#Sangpuii pawh chu Ruatsaka te an lo haw ani tih a hriat avang chuan a hlim rilru hle maia, a nu leh Pa te Inkhawma an kal daih hnu a Zira rawn leng pawh chu hlim tak hian a lo kawma, a rilru tak chuan Ruatsaka chu a lo len a beisei a, Ruatsaka a rawn lan mai loh avang chuan a beidawng rilru viau maia, a chang leh a chau deuh anga a rawn leng peih dawn lo aniang,“ ti ten a han inhnem leh thula, a hmelah erawh engmah a lanchhuahtir lo thunga, Zira pawn engmah a hrethiam lem lo a ni...



Ni, Zira hian Sangpuii hi a hmuh phat khan hmelṭha a ti em ema: Kel Phung Tapchim hmu an sawi ang maiin a birh tluk tluk maia, a, Sangpuii bulah hian engmah chu ala sawi lo na a, a chet zia leh khawsak phung chuan a lantir fo maia, chu chu Sangpuii pawh hian a hai hauh lo. Mahse beiseiawma awm a duh loh avangin a inveng hram hrama, amaherawh zawng, rawn leng zantin ta chu lo biak chhiat ngawt thu awm hek lo le, Zira nen pawh hian an innel tawh viau a ni....






Chutia anmahni hriat tawk leka Zira nena an titi siam siam lai chuan ,“in awm em,” pawnlam aṭanga rawn tiri avang chuan an titi pawh chu an tawp chawta, chutah Sangpuii chuan ,“awm e lo leng rawh u,“ a han ti a, chuveleh Kawngkapuiah chuan Ruatsaka chu a rawn lang ta hlawl maia, Sangpuii chuan ,“e Ruata chu, i va rawn tlai ve, lo leng rawh,¡ tiin hlim tak mai hian a lo lawma, Ruatsaka chuan chutia a bialnu leh mipakhat chauh an lo awm mai chu a ngaih te a ṭha lo rum rum maia, chhuah leh mai te chu a duh rum ruma, mahse thil mawi ni a a hriat loh avangin inthlahrung tak chuan a lut ta zawka. Ṭhuthmun te a rem pah chuan ,“ka rawn tibuai lo che u maw,“ a han tipah a, Sangpuii chuan ,“tibuai lah love a, i rawn leng dawn lo emaw ka tia,“ tihpah chuan Ruatsaka bulah chuan an ṭhu a, Ruatsakan a chhan hma chuan Zira chuan ,“e kha ṭhianpa, inramriak chu inhlawhtling viau ani maw,“ a lo ti a ,”hlawhtling ani ve mai ang chu, kan vannei tak tak a ni,“ a lo ti a, rei vak lo an titi leh hnu chuan chhuanlam eng emaw siamin Zira chu a haw ta a, anihnaah tak chuan Sangpuii awm dan khan a Mit a tikham deuh a ni...




Zira a chhuah hnu chuan Sangpuii te chu an han ngawi dun ren rawna, chutah Ruatsaka zawk chuan ,“i inleng ka rawn hnawt haw daih maia a zia lo hle maia,” an ti a, Sangpuii chuan ,“a pawi chai hleinem, i rawn leng dawn lo emaw ka tihman tawh zawka,“ a lo ti a, Ruatsaka chuan ,“i hlim thovin ka hria,“ an ti leh bohva, Sangpuii chuan Ruatsaka chu a thutak em avangin a thik ani tih a hrethiama chutah thutak fe hian ,“U Zira nen khan min ringhlel ani maw, engmah chutiang a awm lo,“ a han ti a. Ruatsaka bawk chuan ,“engmah a awm phei chu ka ring chuang lova,“ a lo tibul deuh hmaka. Sangpuii chuan a duh khawp chhanna a pe lo tih hriain Ruatsaka hnenah chuan ,“ni e, zep thu a awm lova, engkim hi hre vela ka duh a ni: a han ti te te phawta. Chutah sawi zawm lehin ,“u Zira kha chuan min ngaizawng tih chu ka hria alawm, mahse ala beidawng har em em leh nghala, rawn leng ve reng ta chu lo biak chhiat nula tan a mawi si lova,“ a han ti leh a. Ruatsaka chuan Sangpuii chu a lo en rana, dawt a sawi lo tih pawh a hre thei mai, chutah Sangpuii kuah thut pah hian ,“kan fiah che anih kha,“ an ti a, Sangpuii chuan ,“ngeiawm reuh lutuk, mi tihhlauhthawn zia kha,“ tihpah chuan Ruatsaka chu a chum taih taih a. Ruatsaka chuan Sangpui Kut chu lo mansakin an kuah nghet sauh sauhva, chutah zawi sap hian ,“Sangpui, ka ngai ṭhin lutuk che a sin,“ a han ti thawp sata. Sangpuii pawh chuan Ruatsaka chu an kuah ṭha ve sauh sauhva, chutah Ruatsaka bulah chuan ,“keipawn ka ngai tawh lutuk che alawm, inrawn haw har ka lo ti lutuka,” a lo ti ve a, Ruatsaka chuan ,”kan beisei angin Sa kan kap mai lo a tin a ni,“ Sangpuii Sam chul hliau hliau pah a an tih chuan Sangpuii chu a ngawi hle hle a, a hmangaih ber a hmu ta chu a thla a muang hle a ni. Chutah Ruatsaka bawk chuan ,“naktuk chawhnulam chu Lengtlangah leng ila,“ ti a a han sawm chuan Sangpuii chuan ,“ni e, kan tum dawn nia,” a lo ti maia. Ruatsaka chuan engmah sawi tawh lovin Sangpuii chu an hnuk hnaia, chutah duhthawh em em hian a fawp ta vâwng vâwnga, chu zan zet zawng, Ruatsaka leh Sangpuii te tan chuan a mawiin ava hlimawm dawn em. Chutia tudangmah ngailova hmangaihna par tlana hlim taka an awmlai chuan pawnlamah chuan thawm an hria a, Ruatsakan a kuahna ata tal chhuah pah hian ,”ka nute anni tawh ang,“ tiin Sangpuii chu an tawlh hla deuhva, a mawi tawka inhlatin an ṭhu hman awrh tihah chuan Sangpuii rin ang ngeiin a nute chu an rawn lang chawpchilh nghala, Sangpuiin a nute chu lo be thuaiin ,“ka nu, inva rawn haw har em em ve,” an ti a, a nu chuan ,”i nu ṭhuami te In-ah kan rawn peng kawi alawm mawle, an In a luh tawh saw chuan chhuah leh mai hi a har tawh ṭhin,” tiin a lo chhanga, Pindan lamah chuan a lut ta nghala. Ruatsaka chuan Banga Sana intar chuan dar sawm a hnaih tawh ani tih a hmuh chuan ,”hei Sangpui, i nute pawh an lo haw ta bawka kan haw ve tawh ange,” dinhluai pah chuan a han ti a, Pu Buanga chuan ,”Sana te chuan a duh dar zat zat kawk ang hmiang hei kan rawn haw ve chiah alawm,” tiin an chelh mawi ve tak na a, an Kawng kalna lama a chauh chhuanlamin Ruatsaka chuan a ṭinsan lui ta a....






#Ruatsaka a hawn hnu chuan Sangpuii pawh chu mut tum chuan a inbuatsaih a, chutihlai chuan a nu chu Pindan aṭanga lo chhuakin Sangpuii hnenah chuan ,“Mami, i mut hmain lo ṭhu lawk teh,“ a han ti a, Sangpuii pawh chuan hnial lem lovin ,“eng thil nge ni a,” tiin a ṭhu ve mai bawka. Chutah a nu chuan ,“Ruatsaka nen hian ininngaizawng em ni,” tiin an zawt tawl maia, Sangpuii chuan ,”ka nu hi a, i tizahthlak e maia,“ a lo ti maia, chutah a nu bawk chuan ,”in lo inngaizawng anih pawn a sual lova, nula Tlangval inni a, ngaihzawng chu innei tur alawm,” tiin an ngawi deta. A nu vek chuan ,”mahse Mami, nupui pasal hi kan inthlanfuh loh chuan dam chhung hrehawmna leh retheihna mai a ni, inchhirin Ban a chena, engmah a sawt tawh si lo, chuvangin rethei lutuka chhungkaw din te hi kan inhmangaih avang chuan kan tuar thei pawh aniang, fate zawk hi an khawngaihthlak tawh ṭhin a ni,a tihzawm leh charh charh a, Sangpuii erawhchu a ngawi renga, a nu vek chuan ,“mahni tana ṭha hre rual i ni ve tawha, chuvangin pasal tur pawh hi i thlang thiam turah ka ngai, Ruatsaka hi a sualna phei zawng sawi tur ka hrelo, tin, an retheihna ka zu hmusit ani hek lo, ka sawi tak ang khan, retheih lutuk chuan hlim a har ṭhin, chuvangin in lo inngaizawng anih pawhin thlah tumla a ṭha ang,“ a han tihzawm leh a, pu Buanga erawhchu a ngawi reng thunga. Chutah Sangpuii chuan ,”ni e ka nu, a dik khawp mai,a lo ti a, amah vek chuan ,”ka mu tawh dawn a sin,” an tihzawma, a nu chuan ,”va mu tawh rawh, ka thusawi kha ngaihtuah zui ang che aw,” a tih chuan Sangpuii chuan a chhang lo. Ngawi rengin Pindan lam chu a pan ta nghala.



Link:
BBcode:
HTML:
Hide post links
Show post links

Ngaia
Site Admin
Posts: 25813
Joined: April 30th, 2016, 4:07 pm

Unread post by Ngaia » December 27th, 2020, 6:42 pm

I TEL LO CHUAN. Episode )2( last.






Chawlhni Tuk ani a, Darpui khua chu, chu Favang Ni eng mawi tak chuan a rawn chhun leh vâng tawha, Ni eng lawm Chawngzawng leh Sava dang ho pawh In chungah leh In bula Thing dingah te chuan infiamin an chiar nak nak hlawma, an siamtu Pathian fakin tudangmah an ngai bik lo. Chawlhni tuk anih avang chuan Nu ho chu an fate tuaifaiin an hmanhlela, rualpawl lo bik nih an hlau a ni.





#Zosangpuii pawh chu hma takah thovin ei a rel nghal vat vata, a peih fel hnu chuan a inbualfai leh nghala, tichuan tukṭhuan chu an kil ta a. Chaw te an ei kham chuan Thleng te silin ala buai hle maia, chutihlai chuan pawnlam aṭang hian ,”Sangpui, i inpeih tawh em,” Pari chuan a rawn ti a, ,”Sangpuii chuan, la inpeih lo deuh, lo lut rih la,” tiin an sawma, Pari pawh chu a rawn lut ve mai bawka, Ṭhuthmun a remlai chuan pu Buanga chuan ,”e kha Pari, i va hma bik ve, keini chhung hi zawng, tlemte e ti lo hian kan tlai riau zel,” tiin a lo be luama, Pari chuan ,”intlai hran loh hi, ka nu khu a tho hma ṭhina, ka rawn hma mai mai alawm,” a lo ti a. Sangpuii chu hmanhmawh deuh tak chuan a insiam zung zunga, a inpeih hnu chuan In chu an chhuahsan ta a. _ _ _ _ _ _ _ _ _ _ _ _ _ _ _ __ _ _ _ _ _ _.


Inkhawm an ban chuan Sangpuii leh Pari chu Sangpuii te In lam pan chuan an kal dun hnak hnaka, eng emaw sawi chuan an titi pah siam siama, chutihlai chuan an hnunglam aṭang hian Mipa Aw hian, ,”nangni pahnih chu, inva titi tui awm ve,” a rawn ti a, Sangpuii te ṭhiandun chu an hnunglamah chuan an hawi nghal thuaia, chutah Sangpuii chuan ,”u Zira chu, i inkhawm ve ani maw, i va fel ve,” a han ti a. Zira chuan ,”chutichu i sual bik lo tihna ani maw,” nui chung chuan a lo ti a, Zira vek chuan ,”Chawhnu lam enge intih dawn lo leng ula, Sangpuii phei chu Zantin ka rawn lenga, kan In ila rawn leng ve miah lo,” an tihzawma, Sangpuii chuan ,”ekhai, rawn leng ta ila tuemaw thin te kan tirim anga, a let kan tuar zo lovang tih a hlauhawm alawm,” a lo ti a, Zira chuan ,”chutiang tur tumah an awm love,” a lo tivata, amah vek chuan ,”i Ṭhiannu hi tunge a hming ni a, ka lo la hre ve miah lova,” an tihzawma, Sangpuii chuan ,”ekhai, tinge maw i lo la hriat loh ni, Darpui khaw nula hmelṭha chhuanvawr Pari anih hi,” ti a a chhang zet chu Pari chuan a melh rang kher mai, Sangpuii erawh chu engmah hrelo angin a awm thên thunga, chutah Zira chuan ,”inkhaw Nula hi zawng, inhmelṭhat tluk zetin fel pawh infel hlawm hi maw,” a lo ti a. Chutia titi bawrh bawrh pah a an kal zellai chuan Zira chuan ,”hei ka In peng ka thleng der mai, rawn pengkawi ve ula, Thingpui te rawn in ula, tih tur em em innei chuang em ni,” a han ti a, Sangpuii chuan ,”i mi sawmna chu a lawmawmin a zahawm viau na a hei ṭhiani hian tih tur hmanhmawhthlak deuh a nei aniang,” a han ti a, Pari pawh chuan ,”ni e ṭhianpa, Sangpuii hian mi puih ngei ngei a ngai bawk sia kan lo peng rih lo phawt mai ang,” a lo ti ve bawka, Zira chuan ,”chutiang anih chuan remchangah ani mai alawm,” a lo ti a, Sangpuii chuan ,”ni e, remchangah kan la rawn leng zawk dawn nia,” a han tih leh hnu chuan an inṭhen ta a.







Sangpuii te chuan an In lam an pan zela, an titi pah leh siam siama, chutah Pari chuan zawi te hian, Ṭhiannu ,”u Zira khan a ngaizawng riau che a ka hriat chu,” a han ti a, Sangpuii chuan ,”awihawm loh loh anih chu, keini te zawng, engatanmah min ti hlei lovange,” ti a a lo chhan chuan Pari chuan ,”mi â ka nih loh hi, a melh danah che khan a hriat vek alawm,” an ti leh a, Sangpuii chuan ,”nih pawh ani mahna, mahse engkim i hriat vek kha, midanga rilru pek hi ka tum lo bur a ni,” a han ti a, Sangpuii vek chuan ,”Chawhnu lam len kan tuma rawn kal vela,” a han tihzawma, ,”Pari chuan ,”ka lo che hnawksak thiam viau mai tur a sin,” nui har har pah chuan a lo ti a. Pari bawk chuan ,”tak taka: keinipawh kan tum alawm,” a han tihzawma, Sangpuii chuan ,”a ṭhat hlauh chu, min lo sawm rawh u aw,” a han tih chuan Pari chuan ,”ni e, min lo nghak dawn nia, in In pawh kan thleng hei, ka lo peng tawh lo mai ang,” a tih chuan Sangpuii pawh chuan a sawm lui duh ta bik lova, tichuan Chawhnu lama leng tur chuan an inthlah ta rih a...


#Chawhnu dar hnih velah chuan Pari leh a Ṭhianpa Lawma bakah Ruatsaka te chu Sangpuii sawm tumin Pari te In aṭang chuan an inzui chhuak diah diaha, Sangpuii te In kawt an thlen chuan Pari chuan ,”Sangpui, i hman tawh em,” a han ti a, Sangpuii chuan rawn chhuah pah hian ,”hman daih tawh e, inrei lutuka ka lo beidawng hman ṭhelh alawm,” a rawn tichhuaka, tichuan Lengtlang lam pan chuan an kal ta nghal a...





Lengtlang hi Darpui khaw chuanchung, hmun fianrial deuh taka awm ani a, Tlangbawk nuam tak, Phul hringdupin a bawm a ni a, a bul velah te chuan Thing lian tak tak a ding fur hlawm bawka, Darpui nula leh Tlangval te hian Chawlhni tlai len nan an hmang ber ṭhin a ni.






#Ruatsaka ten Lengtlang an han thlen chuan midang lo leng ve pawh an lo awm nuala, Ruatsaka ṭhianpa Rinpuia pawh a bialnu Hriati nen an lo awm ve ran mai. Rinpuian Ruatsaka te lo kal a hmuh chuan ,”inva rawn tlai ve a,” an ti a, Pari chuan ,”tlai emawni, a hun tawk chiahah kan lo ngai a sin,” a lo ti a, Ruatsaka chuan ,”Hriati kha a rawn tur hmanhmawh viau lo che maw,” a han tih chuan Hriati chuan ,”hmanhmawh e mawle, Hmai pawh ka phih ṭha hman lo, Tlang kan panlai te khan mi puak mai te kha a tum thut thut mawle,” ti a a lo chhan chuan an nui ho dar dara. Chutah Lawma chuan ,”tikhan lo inkawm rawh u Tlang hi kan han fang ve ange,” tihpah chuan Pari chu a melh zauhva Pari pawn a lo hai bik lo, tichuan Pari te chu an kal hrang ta a. Ruatsaka te pawh Rinpuia te nena rei vak lo an titi leh hnu chuan Lengtlang Hmarlam, hmun fianriallai deuh, khaw thlir remna hmun deuhvah chuan Sangpuii nen chuan an inzui liam ve ta a. Rihnim buk hnuaiah chuan ṭhuin, ngawi rengin ral leh lam Tlang te chu an han thlir a. Chutia minute khat vel an ṭhut hnu chuan Ruatsaka chuan ,”Sangpui,” a han ti a, Sangpuii chuan ,”eihah,” a lo ti a, Ruatsaka bawk chuan ,“thil sawi duh ka nei a,” a tih chuan Sangpuii chuan ,“engthil nge ni a,” a lo ti thuaia, Ruatsaka chuan ,”han sawi tawp mai ila, indinhmun leh kan dinhmun inthlauh zia hi i hre vek anga, kei aia hausa zawk leh nei nung zawk ten an la rawn beisei hun che ala awm anga, ka chan mai ang che tih hi ka hlau a ni,” a han ti a, Sangpuii chuan ,”Ruata, sum leh pai hausakna hmanga lei theih hmangaihna chu ka kawl lo a ni, ka hmangaihna chu rinawmna nena ṭang dun, hmangaihna dik tak a ni, chu ka hmangaihna chuan dinhmun a thliar lova, hausak leh retheih a thliarhrang hek lo, chu chu ka hlan tawh che a, i tih ve tawh tur chu i hrethiamin ka ring,” a lo ti a, Ruatsaka chuan ,”ka hrethiam alawm, nangmah a ka rinna hi engtikahmah ka thlah ngailo, ka hlauhthawn zawk erawh i nu leh pa te hian engtin nge an ngaih ang tih hi a ni. An fanu mal duatlai Pasal tur chuan rethei tak chu an beisei awm si lova,” a han tih leh chuan Sangpuii chuan a nu thusawi kha a hre chhuak rauh rauhva, chutah Ruatsaka bulah chuan ,”rinawmna rinawm zia tichiang tur chuan fiahna a ngai ṭhina, hmangaihna pawh ani tho, hmelma an awm loh chuan hmangaihna a fiah zo ṭhin lo, ni e, hmelma chu kan la tawng zel ang, mahse ka sawi tawh kha, keichu ka lakah eng rilru pawh pu la, nangmaha ka rilru put hmang hi thlak ka tum lo a ni,“ a lo ti a. Ruatsaka chuan Sangpuii chu a han kuah a, chutah zawi sap hian ,”Sangpui, ka lo tawng che hi chu ka vannei ngawt mai, a han tisap a, Sangpuii chuan ,”kei tak hi ania vannei, hlimna tamtak min pe a,” a lo ti ve a, Ruatsaka vek chuan ,”tunah chuan kan kar han tichhe tur awm hmelma an la awm lova, mahse kan hma hunah enge kan tawn dawn kan hrelo, engpawh lo thleng se, huaisen takin kan hmachhawn zel aniang chu tiraw,” Sangpuii Sam chul pah chuan an ti a, Sangpuii chuan ,”Ruata, chutianglamah chuan i thla lo tiphang suh, nangnen chuan engpawh hmachhawn hi ka inhuam em em a ni,” ti a a lo chhan chuan Ruatsaka chuan a lo nuih seih a, chutah ama lama kuah hnaiin Sangpuii Hmui Sen vamham mai chu duhthawh takin a fawp vawng vawnga, Sangpuii pawn a thiam ang tawkin a lo chhanglet ve bawka, chu Favang Tlai ni tla tur sen hnim ruai hnuaia mipahnih te inhmangaihna chu ava par mawi em. Chutia uar leh duhthawh em em a an infawh hnu chuan Sangpuii chu a han thaw deuh haka, chutah zawi tham ṭiak hian, nangmah a ka hlimna hi hloh ka duh lova, engdangmah a thleng hi ka phal lo a ni,” a han ti a, Ruatsaka chuan ,”ka hria alawm, eng harsatna pawh lo thleng mahse: nangnen chuan hmachhawn zel hi ka inhuam em em a ni, ka hmangaih lutuk che,” ti a a lo chhan chuan Sangpuii pawh chuan ,”keipawn ka hmangaih che,” a lo ti thawp ve sata, engdangmah sawi tawh lovin an infawp leh vawng vawnga. Ṭawng lovin thu tamtak an sawia, an Thinlung chhungril bera hmangaihna chu inbe si lovin an inhlan tawn mawlh mawlh a.


Tlai dar Li a rik dawn chuan Ni pawh a liam dawn ta, mipahnih inhmangaih em em te pawn an hun hman chu kham lo viau mahse Ni chelh ding tura theihna nei ni ni bik hek lo le, an awmna Tlang chu Ni in a liamsan dawn tih a hriat chuan Ruatsaka chuan ,”kan haw ve tawh dawn em ni, Ni pawh a liam dawn e,” ti a a sawm chuan Sangpuii pawh chuan a lo hnial bik lova, tichuan In lam panin an inzui haw ta a. Sangpuii te chu inbe lem lovin an kal zela, a khat tawkin an innuih leh seih vela, Khawchhung In awm tawhna an luh chuan Ruatsaka chuan chhuanlam eng emaw siamin Rinpuia te Inah a pensan ta daih a, Sangpuii erawhchu khawiahmah tawi khawmuang tawh lovin a kal zela, an In ava thlen chuan a nu leh pa te chauh chu an lo awma, a nu lo melh danah chuan Sangpuii chuan thil awmzia a hrethiam maia, biak pawh a lo biak lem loh avangin Sangpuii pawh chu Pindan lamah lut tlangin a inthlak zung zunga, a zawh hnu chuan In chhung sekrek te khawihin a buai leh nghala, Dar nga a rik chuan Zanriah an kil ta a. Chutia zanriah an kil mawlh mawlh lai chuan Sangpuii nu chuan ,”Mami, i nungchang hi i siamṭhat ran a ngai a ni, tlang takin ka hrilh ang che, tuna i ngaihzawng Ruatsaka hi ka duh lo,” a han ti a, Sangpuii chu a ngawi renga, chutah pu Buanga chuan ,”ni e Mami, i nu sawi tawh ang khan, rethei taka chhungkaw din zawng, hmabak a thim e mai, dik tak chuan midang hmu zo lo pawh i ni lova, tlema chhenfakawm deuh hi chu i tan a ṭha a ni,” a lo tih ve leh chuan Sangpuii chuan ,”ka Pa, rethei viau mah ila kan hlim tho chuan a hlu viau lo em ni,” a han ti a, Sangpuii nu bawk chuan ,”i ngaihtuah tlem vang mai mai a ni, retheih lutuk chuan a hlim tak tak theih ngailoh, han inneiin fate han nei ula, mamawh a lo tam tawh si anga, inhlim rei lo tawp ang,” a lo ti leh pang panga, an reh ṭhap mai, chutah Sangpuii nu bawk chuan ,”Zira pawh hian a beisei ve viau che hi, Ruatsaka te ang, Chempui nen baka hnathawh thiam lo ai chuan a innghahna zawk ang,” a tih leh chuan Sangpuii chu ngawi rengin a tho ta daih a, a nu vek chuan ,”i tana ṭha tur kan ngaihtuah em em a, ka titauve te i ti elaw, ka thawk ṭek ṭek chhung hi chuan tuna i bialpa Ruatsaka khu chu i nei hauh lovang, kan In pawh hi rawn rap rawn rap suh se,” a han ti ta phiar phiar maia, Pindanah Sangpuii chu a lut ta daih a, Pu Buanga chuan ,”a tawk tawh rih e, inbengdai hram hram teh khai,” tiin a nupui chu a lo khap dai a, a Chaw thleng thawhsan pah chuan Pi Rami chuan ,”mahni tana ṭha pawh hrelo mawl lutuk, ka Tu te hi rualawt reng renga an awm tur hi ka remti teuh lo mai,” tiin a ang pah bawrh bawrh a. Zanriahte an ei kham hnu chuan Sangpuii nu leh pate chu inkhawm turin an chhuak ta nghal a.






A nu te an chhuah hnu chuan Sangpuii chu Pindan aṭanga chhuakin a inphih fai mawlh mawlh a, an Chaw ei Thleng te chu silin hmun te chu a phiat fai a, a zawh hnu chuan ṭhutphahah chuan ṭhuin thil eng eng emaw a ngaihtuah a, chutihlai chuan pawn lam aṭang hian ,”inawm em,” rawn tithawmah chuan Sangpuii chu a harh zawk maia, a Aw aṭang chuan Zira ani tih pawh a hre mai, chutah phur lo fe hian ,”awm e, lo lut rawh u,” a han ti a, chuveleh Zira chu a rawn lut ta nghala. Sangpuii hmel ngui bara lo ṭhu a hmuh chuan Zira chuan ,”i va hlim loh hmel ve, engtizia nge ni a,” an ti a, Sangpuii chuan ,”i ngaihbel mai mai anih chu, ka hlim lutuk alawm,” ti a lo chhangin a han nui lui sak a, Zira vek chuan ,”i ṭap emawni leh nghal ni, i Mit te chu ava bui cherchur ve,” a lo ti leh kohva, Sangpuiin ,”chutiang engmah a awm lo,” ti a a lo chhan leh takah chuan Zira pawn engmah a zawt zui duh ta lova, titi dangah pakaiin eng eng emaw a sawipui ta zawka,. Chutia eng eng emaw sawi a an titi lai chuan Zira chuan ,”Sangpui, thil pawimawh deuh hrilh tur che ka nei a,” thutak zet a a han tih chuan, Sangpuii chuan ,”eng thil nge ni a han sawi ta che,” a lo ti thuai a., Zira chu a han ngawi deuh vang vanga, chutah a Aw rawn thian kharh kharhin, Sangpuii hnenah chuan ,”zak thei lo pawh min ti maithei a, mahse ka Thinlung hi i luah hneh em maia ka sawi lo thei lo a ni. Ka hmuhtirh phat che khan ṭha ka ti chein ka Thinlung hi i luah nghal em ema, i hriatthiam tur pawn vawitam ka chetzia pawn ka tilang fova, mahse mit mei mi hmuh duh si loh avangin ka sawi chhuak lo leh mai ṭhin, Sangpui, ka nupui ni turin ka duh che a ni,” a han ti ta a, Sangpuii chuan ,”anih ka mitmeina che i hmu tawh aniang maw, i rawn sawi chhuak ngam ta sia,” nui chung chuan a lo ti a, Zira chuan ,”nui mai lo teh, ka ti tak tak a sin,“ a han ti leh a, Sangpuii pawn fiamthu zui zelna chi ani lo tih hriain Zira bulah chuan ,”ni e u Zir, keia kawng kara min duh hi ka lawm khawp mai, mahse kei Thingtlang nula, engmah thiam nei lo te chu i chhungte pawn min duh nang, khawpui nun engmah ka hre der bawk si lo,” a han ti a, Zira chuan ,”thingtlang nula i nih leh nih loh hi ka buaina ani lo, min hmangaih a, min duh chuan a tawk, khawpui nun ka hrelo tihte chu, i awm anga i hre chhawm ve mai dawn alawm, nang ang nula hmelṭha leh fel hi chu ka nu te pawn an iai hauh lovang che,” a han ti leh a, Sangpuii chuan sawi mai tur pawh a hre tawh lo, Zira chu duh lo viau mahse midang rilru tihnat a duh bawk si lo nen, Zira chhan dan tur chu a ngaihtuah nasa hle maia, chutia a ngawih vung vung takah chuan Zira bawk chuan ,”i mi duh zawng ka ni lo anih pawn sawi tawp maila, mahse ka rilru chu ana viauvang,” a rawn tih leh takah chuan Sangpuii chu a ngaihtuahna ata a harh chhuak zawka, chutah Zira hnenah chuan ,”u enin ka lo en che a, i lak aṭang hian hetiang thil hi ka beisei lo lutuka, ngaih dan ka siam thei lo a ni, tihian ṭhian angin inkawm ila, hunin engkim a rawn her chhuahpui mai ang,” a han ti a, Zira chuan ,“ni e, tun thut thut a rilru i siam thei lo anih pawn ka nghak thei lutuk che alawm,” a lo ti ve maia, tichuan thil dang dang te sawiin an inkawm ta zela.






Zan dar riat a pel awrh tihah chuan Sangpuii Nute inkhawm pawh an rawn haw veleh tawha, In chhung an luhruala Zira a hmuh chuan Sangpuii nu chuan phur tak mai hian ,”e kha Zira i rawn leng ani maw, i va fel ve, la leng ve reng rawh aw” a tilut nghal bawrh bawrh a, Ziran ,”ni e, mahse Sangpuii hian min ning tawh riauvin ka hria,” nui pah a a lo tih chuan Pi Rami chuan ”an la naupanna hi a lang tlat zel ania, a hne phal lo tawp ang che,” ti a a lo chhan chuan Zira chu a lawm rilru kher mai. Chutah Zira vek chuan ,”inva rawn bang hma teh mial ve,” tiin a han zawt let a, Pi Rami chuan ,”ni e, khawiahmah kan rawn peng kawi lova,” tiin a lo chhanga, amah vek chuan ,”tikhan lo ṭhu rawh kan inthlak ange,” a han tihzawma, Pindanah chuan a lut ta nghala.




Chumi Zan chuan Zan rei tak thlengin Zira leh Sangpuii nute chu an inkawma, Sangpuii erawh chuan Zira chu a ning viau thunga, a nu ten Zira an biak dan velah chuan an duh hle ani tih pawh a hai hauh lova, mahse a rilru thlak erawh a tum hauh lo.



Dar sawm pelh rak thlenga a len hnu chuan Zira chu a haw ve ta a, a hawn kawngah te chuan a inngaihtuah nasa maia, Sangpuii chuan a hnar fithla ṭhak ta ni ten a inhria a, a chang leh ,“min fiah hmasa phawt aniang,” ti ten a inngaihtuah a, a rilru a buai hle maia, a tawpah chuan ,”beidawng lovin la nghak zel phawt mai ang, a nu leh pa te pawn min iai loh em kha maw,” tiin a rilru chu a siam fel ta a....









#Hun a liama Buh hmawr te pawh eng ṭanin, Buh Lu chuh a hun dawn tawha, Darpui khua a chhungkawtin deuh thaw chu Buh seng turin an inbuatsaiha, ṭhenkhatin Thlam te thawm ṭhain, ṭhenkhatin Fasuar te an siam lawka Buhzem tur te an kual ṭana, kumtluana an thawhrah seng tur annih avangin an phur tlang kher mai...






Ruatsaka te pawh engkim an peih fel hnu chuan a Karleh a riak turin a inbuatsaih ve a, Lo lama a riah kartluan ṭhin avangin Sangpuii nen pawh an inhmu khat kher mai, bakah, Sangpuiin a nu'n a duh loh thu leh, an In pawh rawn rap tam lo tura a duh thu a hrilh avangin Sangpuii te Inah pawh a leng lut ngai ta lo kha a ni a, Lo lamah a riah bo san ta daih bawk nen, Kartawp a haw changa an inhmu tih loh chu han inkawmfalna hun an nei ta lo hrim hrim a ni.




chutiang anih lai chuan Zira chuan Sangpuii chu a birh tlut tlut renga, Sangpuii lah a nu ten Zira nei mai tur chuan an ti ve reng bawk nen, Sangpuii nu leh pa ten an duh tih a hriat vang ngeni, Zira lah chu a hma zawng aiin a ngawrh zuala, Sangpuiin han tih deuh fak fak changte pawh nei mahse: zaidawh takin a nuih liampui mai mai ṭhin...







#Chawlhni Tlai ani a, Ruatsaka leh Sangpuii te pawh Lengtlangah lengin, Lengtlang an len apianga an ṭhutna, Rihnim buk hnuaiah chuan an ṭhu a, an ral leh lam Tlang, Romeiin a bawm te chu an han thlir dun vawng vawnga, Thlasik boruak anih tawh avangin khua pawh a vawt deuh suk tawh nghe nghe a ni.


Chutia an Mit lena an hawi riai riai hnu chuan an Mit leh Mit chu a intawng ta, tuzawkmahin hawisawn an tum lo, chutia rei vak lo an inmelh hnu chuan Ruatsaka chuan ,”Sangpui, i hmel a hlim lo riauva ka hriat chu, harsatna i nei em ni,” a han ti a ,”Sangpuii chuan ,”Ruata, zep lovah chuan ka thla a phang a ni. Ka nu lah hian u Zira nei tur hian min nawr na sawt viau mai si a,” a lo ti a ,”Ruatsaka chuan, i nu leh pate hi anva mak ve aw, an fanu duh lo chung neih luihtir hi an tih tur ani lo a sin mawle,” an ti a Sangpuii chuan ,”ka nute hian min neih luihtir ang tih ka hlau a ni, Ruata, i tlandun daih mai ang hmiang, hetiang anih chuan ka inveng zo rengin ka inring lo a ni,” Mittui tling kiauva a lo tih chuan Ruatsaka chuan Sangpuii chu amalamah a han pawma, chutah ,”Sangpui, i thla lo tiphang reng reng suh, nungdama ka awm chhung hi chuan tuman an nei lovang che, amaherawhchu, tun thut thuta chet kan thawh a rem lo a ni, i chhungte chuan eng an thlentir rum rum lo turah ngai ila, keipawh ruahmannate neiin ka lo inbuatsaih anga, ka nei ngei ngei ang che,” an ti a, Sangpuii chuan ,”Ruata, nangmahah hian ka rinna zawng zawng ka nghata, min phatsan suh aw, u Zira neih chu ka duh mawlh lo a ni,” a Mit aṭanga Mittui luang chhuak ngiai ngiai kar aṭanga Ruatsaka rawn melh pah chuan a rawn ti a Ruatsakan ,“i tan ka rinawm ani tih hi ringhlel suh, chhel takin lo la tuar hram hramla, keimaha i beiseina hi ka tihlawhchham lovang,“ tihpah chuan Sangpuii bianga Mittui luang chu a Kut chuan a hruk saka, Sangpuii pawh a thla a muang kher mai, rei tawk fang chulai hmuna an ṭhut hnu chuan hawn zai an rel ta a...






Sangpuii nen an kal hran hnu chuan Ruatsaka chu an In lam panin a haw nghal vang vanga, a nu ten Sangpuii an tih dan te chu a ngaihtuah pah nauh nauhva, mak,” a tiin Sangpuii chu an hmangaih lo ni ten a hria a, a laka Sangpuiin rinna a nghah zia te a ngaihtuah chuan Sangpuii chu a nu ten an remti emaw, remti lo emaw, neih ngei chu a tum ruh hle a ni...









Sangpuii pawh khawiahmah peng kawi lovin an In lam a pan ta kha a ni a, an In a thlen chuan Zira leh a nu chu lo inkawmin an lo titi siam siama, Sangpuii lo lut a hmuh chuan Pi Rami chuan, ,”e Mami i lo haw tawh a ni maw, hei i u Zira a lo lenga, a nghak reng tawh che a, lo inkawm rawh u, i nu Ṭhuami te In ah ka va kal lawk ange, i u Zira pawn Chaw a rawn ei dawn anih kha,” a lo ti a, rei vak lo a ṭhut leh hnu chuan a chhuahsan ta a. A nu a chhuah hnu chuan Sangpuii chuan ,”Thingpui te i in tawh em,” tiin Zira chu an zawta, Zira chuan ,”ka lo in tawh tho na a, han siam leh la, nupui tur te Thingpui siam chu in pawh a chakawm alawm,” nui sawng pah a a lo tih chuan Sangpuii chuan ,”u Zira chu, vawitam ka hrilh tawh che kha, i nupui hi ka ni ngailovang, fiamthu pawhin sawi tawh ngai suh,” a han tichangrawt maia, Zira chu a lo nui maia, chutah ,”kan la hria ang chu, i nu leh pate hian min duh hliah hliah em mai, ka nei tho thovang che,” a han ti a Sangpuii chuan ,”a neitu tur berin ka duh si lo che alawm,” a lo ti veleh a, Thingpui pawh chu insiam ta lo chuan an inhnial an inhnial ta maia.




Zira hian Sangpuiin a duh loh zia hi a hre chiang em ema, kiansan mai duh chang pawh a nei rum rum ṭhina, mahse Sangpuii nu hian a tiṭha em em renga, a fanu chu a rilru a thlaksak theih mai a rin thu leh, ala hmangaih ve mai a rinthu te a thlemin beidawng mai lo turin ala ti a, chuvanga Zira pawh hi ngampa ta viau a ni..






Zanriah ei hun ani a, Sangpuii nu leh pa leng pawh an rawn haw tawha, Sangpuii nu pi Rami chuan ,”Zira, in lo rilṭam tawh em, duh aiin ka va rei alawm mawle,” a tih chuan Zira chuan ,”ṭam love a, rilṭam lam a lang meuh lo a ni,” tiin a lo chhanga, pi Rami chuan ,”in lo hlim viau aniang maw, a lawmawm lam anih chu, inkhawm kan duh si a i ei tho mai teh ang u,” tihpah chuan Chaw ei chu a siam ta nghala, Sangpuii pawn a nu chu a pui ve vata, an siam zawh hnu chuan an kil ta nghala. Zira a awm ve vang ngeni, Sangpuii chu a kham thuaia, midang ho erawhchu an titi pah siam siama an hlim kher mai, a nu ten Zira an tih dan vel avang chuan Sangpuii chu a thinrim hle maia, a rilru te te chuan ,”intum ang chuan min va ti dawn lo rua em,” a ti a, mahse han tih dan vak erawh a hre chuang lo.









Zanriah te an ei kham chuan Sangpuii nu leh pa te chu inkhawm turin an insiam nghal mawp mawpa, Sangpuii pawh hmun tifaiin a phe ve vat vat bawka, a nute an insiam zawh chuan ,”Sangpui, kan kal ania, Zira nen khan lo inkawm rawh u aw,” a rawn tih chuan Sangpuii chu a ngawi renga, a nute an kalliam hnu chuan Sangpuii chuan Zira hnenah chuan ,”u Zir, ka ṭhiannu Pari te Inah kal ka tuma, tikhan i lo awm dawn nge ni a ka rualin i chhuak ve dawn,” an ti a, Zira chu Sangpuii tih dan avang chuan a sa deuh phat mai, chutah Zira chuan ,”i mi han tih dan velah chuan min tham lo hle mai, mi duh lo mahla ka nei tho thovang che, lo ngawi tak rawh, ka nupui ila ni dawn khawp mai,” seh chilh deuh nawka a han tih chuan Sangpuii chuan ,”kan hria ang chu, nui sak pah a a lo tih chuan Zira chu engmah pawh sawi tawh lovin a chhuak ta daih a. Zira a kal liamhnu chuan Sangpuii chuan Kawngka chu a kalh ṭha sawk sawka, Pari te In lam pan chuan a kal ta nghala.







#Pari te In ava thlen chuan a beisei loh tak maiin Rinpuia leh Ruatsaka te chu an lo awma, Sangpuii a lo hmuh chuan Pari chuan ,”Sangpuii teh hlawl chu, lo leng rawh,” tiin a lo be vata, Sangpuii chuan ṭhuthmun rem pah chuan ,”i inkhawm daih ka hlau lutuka,” a han ti a, amah vek chuan ,”nangni pahnih teh hlawl chu, helam lama kan hmuh che u a,” Ruatsaka te melh pah chuan a tihzawma, Rinpuia chuan ,”i rawn kal dawn tih hrilhlawkna kan dawng alawm,” nui ṭhaw pah a a lo tih chuan Sangpuii chuan ,”khawilam hrilhlawkna mah indawng lovange, i bialnun a inkhawmsan daih che a i lenna tur hrelo mai mai anih kha,” an tih chuan an nui dar dara, chutah Pari chuan ,”engmaw i rawn kal chhan chu ni a,” ti a a han zawh takah chuan Sangpuii chu a han hawi kual te te a, chutah, ,”khawnge i nute hi,” a han ti daih a, Pari chuan ,”an inkhawm mawle, kan pathum chauhvin kan awm,” Ruatsaka leh Rinpuia te melh pah a a rawn tih takah chuan Sangpuii chuan a nu ten Zira nena lo awm tura an tih thu leh a peih loh avanga a rawn kalsan daih thu chu a han sawi ta a, a sawi zawh chuan Rinpuia lah pek chuan ,”i rawn kal chu a lawmawm hle mai, hei ṭhiana hi a lo lunghnur lutuka, a rawn leng ngam tawh bawk si lova,” nui pah a a lo tih chuan Ruatsaka chuan ,”nang tak hi chu aw, thutak hi i pai hlawl lo, Khuai Zang pasarih nei pawh ni la Meizial tho i zuk ka ring,” a lo ti chu an nui dar dara, tichuan eng eng emaw sawiin an titi ta zela, Sangpuii chu lungngai lo tur leh a theih ang anga puih an tum tlat an tum thu te chuan an hnem bawka, Sangpuii pawh a beisei aiin a hlim kher mai, chutia eng eng emaw sawia an han titi takah chuan dar riat a pel ta reng mai, Pari nu leh pa inkhawm bang pawh an rawn haw ve tawha, Sangpuii chuan ,”min va thlah teh u, ka nute pawh an rawn haw ve tawh ang,” a han tih chuan Rinpuia chuan, Ruata nen hian va kal teh u, nuam pawh inti zawk ang, bakah tlanchhiat haw te kha a ngai reu reu palh anga ka peih teuh lo mai,” a lo ti a, Sangpuii chuan ,“rawn kal mai mai rawh, chutiang em emin ka nute an sual lo,” a han ti a, Rinpuia chu a lo nui tet tet a, Ruatsakan ,”kal vat teh ang u, inninawm e mai,” a rawn tih takah chuan Pari nen chuan inmangṭhain an inṭhen ta a.








Ruatsaka te ho chu titi bawrh bawrh pahin an kal zela, Sangpuii te In thlen hma deuh chuan Rinpuia chuan ,”rawn luh chu a chi lohvang, i nu ten min lawm vak si lova,“ a tih chuan Ruatsaka chuan ,”ni e, in In pawh a hlat tawh loh saw, a lo ti ve bawka, Sangpuii chuan ,”u Rinpuia nul nul chu, ngawi renga han kal daih,” a han tih chuan Ruatsaka pawn Rinpuia kal liam ṭep chu ava hmu ve a, zawi sap hian ,”mawl thei lutuk mai,” a ti sapa. Ruatsaka bawk chuan ,”kal tawh rawh le, ka lo thlir ang che,” a han tihzawma, Sangpuii chuan ,“Lo lamah mi riahsan leh daih dawn sia, ka ngai leh dawn che mange,“ a lo ti a, Ruatsaka chuan ,”keipawn ka ngai dawn che alawm, dam takin lo awmla, chhel takin i lo tuar hram hram dawn nia,” ti a lo chhangin Sangpuii chu amalamah chuan a hnuk hnaia, duhthawh em em hian a fawp ta vawng vawnga, inthlakhlelh avanga inchelh reng theih la ni hek lo le, intawn leh hun tur thlir chungin, tui taka mu tur chuan an inthlah ta a...






#Ruatsaka hi Tlangval kum sawmhnih paruk vel ani a, amah hi mi ti zawk zawk lo, chutihrualin, a ṭhian kawm te a zira ṭawng duh ve viau si a ni lawia, amah hi fit nga leh inches ruk vel niin, Mizo paah chuan a vantlang pawl a ni, tlawmngaihna lamah pawh a zahpuiawm lohva, an chhungkaw dinhmunin a zir tawk loh avangin a langsar lo mai zawk a ni, nimahsela amah lo chiktu chuan an hmuh hmaih chuang lova, nula tamtak Mit latu ani ru reng a ni...







#Sangpuii chu an In lam pan chuan a kal hnak hnaka, an In a thlen dawn chuan In chhunga a nu ang deuh hlawih hlawih avang chuan a han ding det a, mahse a luh dawn tho tho avangin rei ding lovin tim deuh tak chuan a lut ta a. In chhung ava luh chuan a nu leh pa te chu ṭhutthlengah an lo ṭhu a, an hmel chu a hlim lo a ni tih pawh Sangpuii chuan a hre nghal mai. Sangpuii rawn lut a hmuh chuan Pi Rami chuan thip fe hian a lo melh a, Sangpuii phei chuan a nu chu a en rei ngam lo, chutah a nu chuan ,”Zosangpui, khawiahnge i kal,” a rawn tichang rawt maia, Sangpuii chuan ,“Pari te In ah,” tiin a lo chhanga, Pi Rami bawk chuan ,”Zira nen lo awm turin kan ti che u a ni lawmni, Zira lah ila lensan zui a,” a han ti a, Sangpuiin ṭawng tuma a Ka a an zuaulai chuan a nu bawk chuan ,”phat tum buai duh suh, kan rawn hawn lamin kan rawn hre haw vek, i vahan zak thei lo ve, mahni In lengte lensan ngai ani em ni, min tihzah zia hi i hria em,“ a han ti leh hlawih hlawih a, Sangpuii chuan a nu chu a thinrim hle ani tih a hria a, chhan buai pawh a tum lo, pi Rami vek chuan ,”tun aṭang chuan khawiahmah i chhuak tawh lovang, engkim kan ruahman vek tawh, i duh emaw, duh lo emaw, Zira hi i nei dawn tih hi hria ang che, ani lova kawng dang i lo rek anih chuan kan tuithlar ang che,” a han ti leh bawrh bawrh a. Chuthu a hre zet chu Sangpuii chu mak tihnain a khata, na,” a ti kher mai, a Mit aṭang chuan Mittui a luang chhuak zawih zawih a, chutah ṭah aw ṭuau hian ,“ka pa, nang tal chuan min pui thei lawmni,” tiin, beiseina nen apa chu an ngena, apa chuan ,“Mami, i tana ṭha hrethiam tur ni a ka ngaih che avangin ka thlah zalen che a, mahse i heti ta si a, keini i nu leh pa, i tana ṭha tur duh em em te hi kan inrawlh a ṭul ta anih hi, chuvangin i nu thusawi kha ka thlawp a ni,” ti a a lo chhan veleh takah chuan Sangpuii chu a beidawng kher mai, chutah, Sangpuii chuan ,“ka pa, u Zira chu ka hmangaih hlawl lo a ni, khawngaih takin min tirlui lul suh u,” ti a ṭap zawih zawih a a han ngen ngial pawn awmzia a nei lo. Pi Rami chuan ,”tunah hmangaih rih lo mahla, fate inhan nei anga, i hmangaih chho mai dawn alawm, naktukah Zira nen inchhukna tur Motor Aizawl aṭangin a rawn chho dawna, Thawhlehni ah Aizawl inpan nghal dawn nia,” a han ti leh hmarh hmarh a, Sangpuii chu a rilru ana em ema, a nu leh pate chu a dem hluah hluaha, a mang a ang tak zet a ni. Sangpuii chuan la ṭah aw ṭuau chuan ,”nu leh pa rapthlak tak in lo nih hi,” a ti a, pindanah chuan a luhsan ta daih a....








Sangpuii Pindana a luh hnu chuan Pu Buanga chuan ,”Mami nu, kan fanu chunga kan tih dan hi a lutuk deuh lo maw,” zawi te chuan a han ti sapa, Pi Rami chuan an pa chu rum zeta lo melhin ,”mai mai che hian, tunah hian duh lo viau mahse: hun a liam anga a lawm lawm ala ni dawn tih hre ta che, bakah he thilah hian kan kal thui tawh lutuk a ni, duap nghal zul zel mai, a Beng hriatah te i lo sawi mai mai ange,” a lo tizek maia, pu Buanga chuan ,”a, thil thuphung ka sawi mai ania, ti teh, i mu ve tawh teh ang,” a lo tih chuan mut zai an rel ve ta a...






Chuzan zet chu Sangpuii chuan hrehawm ava ti em, a muhil thei lo chu Khumah chuan a inlet a inleta, a nu leh pate chu Rapthlak a ti em em a, thih daih te chu a duh hiala, mahse chuzawng, Pathian duh dan ani lo tih a hre chiang em em lawi si. A rilru chuan amah pui thei awm tur a dap ruaia, a ṭhiannu Pari leh Rinpuia te an lo langa, mahse anni pawn engtin vak nge an lo puih chuang ang, Sangpuii rilru chu a buai kher mai, a Mittui chu tlaktir loh a tum hram hrama, mahse a dang zo mawlh si lo. Ruatsaka chu a ngaizual em em a, mahse chuzawng, beidawnna khua tiseitu mai a ni. Chutia muhil thei lova a inleh a inleh lai chuan a chungah engpawh a thleng thei tih hriain Ruatsaka lehkha tur chu a ziak ta a, Ruatsaka chu pe hman dawn tawh lo mahse: a Ṭhiannu Pari Kut a dah chu a tum a ni...





A tuk Nileng chuan Sangpuii chu Inah chuan a awma, Zingkara Ruatsaka lehkha tur Pari Kuta a hlan tawh avangin chhuahvahna tur a nei lo bawk a tin a ni. Chumini zet chu a Mi tam zawk Lo lama an riah luh avang chuan Darpui khua chu a reh kher maia, Pitar leh Putar bakah, Naupang ninhlei thawm te bak hriat tur a awm meuh lo a ni...




Zan anih chuan Zira leh a ṭhiante Pathum chu Sangpuii te Inah chuan an lenga, Sangpuii nu Rami chuan a lo be ṭha kher mai. Sangpuii erawhchu Pindanah a tawm tlata, Mittui nena inchiahpiah nuaia hun hmangin, a hmabak thim zet pumpelh theih dan chu a ngaihtuah rauh rauhva, Ruatsaka chu zanlai vela a rawn lan a beisei a ni. A chhanchu Lehkhaah khan a nu ten an tih dan zawng zawng a thailanga, Zanin chiah hun a neih thu pawh a thailang nghe nghe anih kha...






Zan dar Sawm pelh rak thlenga an len hnu chuan Zira leh a ṭhiante chu an haw ta a, Sangpuii pawh a ruahman anga a awm anih chuan tlanbo tur anni a, chuvang chuan a insiam lawk veka, a nu ten an rawn hmuh chuan ,”e kha Mami, i inpeih tawh ani maw,” an rawn ti a, Sangpuii chuan lem lo changin ,”ni e, Zinga chet rum rum kha ka peih lova,” tiin a lo chhanga, chutia an fanu an hmin ta chu Pi Rami te chu an hlim kher maia, Sangpuiin chu chu a hriat chuan a nuih ru tet tet a, a rilru chuan ,”inva hlim rei dawn lo em,” a ti rilru a...





Tunah chuan zanlai dar sawmpahnih a ri ta, Archhiara Ar te chu an khuang chuah chuaha, chutihlai chuan Sangpuii chu a Khumah ṭhuin Ruatsaka chu a nghak ran maia, thawm ri hlek chuan a Beng a verh rang thei hle mai, a nute chu an muttui hle ani tih pawh a hria a, a hlim rilru viau mai. Zan darkhat a ri ta, Ruatsaka chu ala rawn lang ta hauh lo mai, Sangpuii chu a beidawng rilru viau tawh mai.


Zan darhnih a rik pawn Ruatsaka chu ala rawn lang ta chuang lo, Sangpuii chu hlauhthawnnain a rawn man ta, Pari khan Lehkha kha a dawng lo nge ni a, Ruatsaka Kut ala thleng lo zawk ang,” ti ten a ngaihtuah a, mahse Zingkara va pe kha ani a, Pari te feh tur chuan an keng hman awm si a,” ti ten a ngaihtuah ta zela.


Zing darthum a rik pawh chuan Ruatsaka chu ala rawn lang ta chuang lo, Sangpuii chu a bei a dawng ta, Ruatsaka chu a rilru chuan a dem a, a hmangaih tak tak lo ni ten a ngaia, a Mittui a tla zawih zawih maia, chutianga Ruatsakan a phatsan chu a ring lova, na,” a ti tak zet a ni. Darli a rawn ri a, Ar pawh an khuang chiah chiah tawha, Sangpuii chu Zan lam a meng tlaivar bawk nen, a hriat loh karin a muhil ve ta a...






Zing darsarih a rik chuan Sangpuii te In kawtah chuan Texi a ding ta ran maile. Sangpuii muhillai chu a nu chuan ava kaithova, a harh chuan a nu chuan ,“engtizia a tukin chu thawh i hai ni,” a lo ti a, Sangpuii chuan a Mit chu a han nuai chawt chawta, chutah a han hawi kual chuan a bungrua reng reng a lo awm tawh lo, Sangpuii chuan mak a ti viau mai, mahse a nu chuan lo hrethiamin ,”Motor-ah kan dah lut vek tawh e, thola insiam vat vat tawh, Motor pawn a nghak reng tawh che ania,” tiin a kalsan ta a. Sangpuii chu a rilru ana kher mai, a Mit aṭanga Mittui lo luang chhuak te chu a han hru a, a rilru chu na viau mahse, Ruatsakan a rawn lam loh avang chuan a hmangaih tak tak lovah ngaiin a rilru chu a siam fela, a nute chu runluihin awmzia a nei tawh lo tih hriain Zira nei tur chuan phur lo zetin a insiam ta a. A inpeih hnu chuan Zawlkhawpui lam panin an liam ta a.














Nau rilṭam hun ani a, Pari te nufa pawh an Thlamah chuan thleng fel ve chiahin an ṭhu hahchawla, rei vak lo an ṭhut hnu chuan Pari chuan ,”ka nu, Ruatsaka te Zauvah ka va kal lawk ange, Sangpuiin thil min thawna, ka rawn zawm nghal ang che u,” a ti a, Ruatsaka te Lo lam pan chuan a kal ta nghala.


Pari te leh Ruatsaka te hi inri mai anni a, an inlenpawh fo ṭhin reng a ni.




Parin Ruatsaka te Lo ava thlen chuan Ruatsaka te chu Buh sengin an lo hmanhlela, Pari lo kal pawh chu an lo hmu lo,, Pari chuan ,”Ruata, i va bei nasa ve, i chau tawh em,” tiin a han kova, Ruatsakan amah rawn kotu lam a hawi chuan Pari chuan nui sangin a lo thlir tih a han hmu a, chutah ,“Pari ni reng che a, nimin lamah inrawn luh ve kha ka lo beisei a, mahse i pa chauh kha a rawn lut ta sia,” tihpahin Pari awmna lam chu a pan ta nghala, Pari awmna ava thlen chuan Ruatsaka chuan ,“tirawh, Thlamah i chawl teh ang,“ tiin a han sawma, Thlama an luh hnu chuan Ruatsaka chuan ,”engthil nge ni a i rawn lan teh hlawl mai,” tiin an zawta, Pari chuan ,”eng ni love, hei Sangpuii lehkha tur ka rawn kenga,“ tihpah chuan Sangpuii lehkha chu a han pe a, Ruatsaka chuan lo la vatin, Pari bulah chuan ,”tikhan lo awmla kan chhiar ange,” tihpah chuan lehkha thleh chu a han kuai pharh a, a chunga thu inziak a han chhiar meuh chule, Ruatsaka chu a phu awn awn maia, a chhiar zawh meuh chuan a zawi hnawka, bing mum mum maiin a inhria a, a lo riak ta chu pawi a ti kher mai, chutia Ruatsaka awm dan a danglam takah chuan Pari chuan lehkha chu a han chhiar ve a, Pari pawh Ruatsaka ang tho, a phu awn awn ve tho mai, a chhiar zawh meuh chuan Hmeichhia anihna a lo lang ta, Ṭap ṭuau chung hian ,”Ruata, keima thiam loh a ni, nimin lamah Lehkha hi rawn pe tur che ka ni a sin, Ruata, min ngaidam mawlh teh,” tiin a ṭap hlawp hlawpa, Ruatsaka lah sawi tur hrelovin a ṭhu ngawi reng mai si, chutia minute sawm dawn inbe lova an awm hnu chuan Ruatsaka chuan ,”he lehkha hi lehkha hmanhmawh ani tih i hrelo em ni,” tiin Pari chu an zawta, Pari chuan ,”aw, nimin zing khan Naupang pakhat mi rawn pektir a, hei hi Ruatsaka lehkha tur a ni a, u Sangpuiin va pe rawh a ti a,” tih ringawt a rawn sawia, keilahin ngawi rengin ka lo la ve mai bawka, nimin kan rawn feh ta lo nen, engkim a pawi ta anih hi, ka thiam loh vek a ni,“ a lo ti a, Ruatsaka chuan Pari chu a inthiam lo tak zet ani tih a hmuh chuan ,”Tu thiam loh mah ani love, hrehawm ti reng reng suh, hetiang rum ruma thil a thlen hi kan beisei lo bawk a ni, Sangpuii pawn a beisei bik hauh lovang,“ ti a a hnemna chuan Pari lung a tichhe zual ngei mai, chutah, inhnit hlawp hlawp chung hian ,”ka ṭhiani chu ka va lainat em ve aw,, atana ṭangkai a hnekin atan thil pawi ka thlentir ta si a, ṭhiannu, min ngaidam lul rawh, ka thiam loh vek a ni,“ tiin a ṭhiannu thla chu ngaihdam a dil mawlh mawlh a. Pari chu a lungchhiate a zia deuh hnu chuan Thlam luhkaah va chhuakin, Ruatsaka nu leh pa Vuh seng lai chu a han kova, rei vak lo hnu a Ruatsaka nute an rawn thlen chuan Pari chuan thilawmzia chu a lo hrilh mawlh mawlh a, a sawi zawh chuan Ruatsaka nu pi Siamliani chuan, ava mak teh thut ngai ve, Mama, a pawi teh zawng anih hi,” a han ti a, Pu Roliana pawh chuan ,”ka lo beisei ang ngeiin thil a thleng ta, Mama, vawitam ka hrilh tawh che kha, tunah chuan a dikna i hmu ta anih hi,” a lo ti ve bawka, Ruatsaka chu ngui bur hian a ṭhu ngawi renga, a hmelah chuan tawrhna a langa, mahse awmzia reng a awm tawh si lo. Chutia a fapa ngui nghiaia ṭhu a hmuh chuan pu Roliana chuan ,”ekhai Mama, khatin nimai love, Mipa fa i nih kha hre ta che, i tuar na viauvang tih chu ka hria a, mahse engkim anih tur anih tawh hi, chuvangin indawmkun reng tur ani ngailove,” a han ti dap dapa, pi Siamliani chuan ,”ni e Mama, i pa thusawi kha zawm tum a ṭha ange,” a lo ti ve bawka, Ruatsaka chuan ,”ka nu, ka pa, inthusawi chu zawm hram ka tum ange, mahse Sangpuii nu leh pate khi nuamsa taka an awm reng ka remti hauh lo mai, enge ka tih theih an la hria ang chu,” a han tih chuan apa chuan ,”ekhai Mama, chutiang chu ni love, an fanu ani a, an duh duh a an tih chu a thiang alawm, chuvangin a tawrh dan thiam tum mai rawh, Pathian au tamla, anin a lo pui mai dawn che alawm,” a lo ti a, Ruatsaka chu a ngawi renga. Chutia rei ngial an ṭhuthnu chuan pu Roliana chuan ,”hetia ṭhut ringawt zawng hun a uiawm e, Mama, i Tha a tho vak loh leh tihian lo awmla, i nu nen kan zu chhunzawm ange,” a tih takah chuan Ruatsaka chuan ,”ka lo seng ve ange,” a lo ti a, amah vek chuan ,”Pari, nangpawh va phei tawh rawh, i chhung ten rei an ti tawh lutuk ang che,” an tihzawma, Pari pawh chu an Lo lam panin a kal ta nghala, Pari a liamhnu chuan Ruatsaka te pawn an hmabak hlen tum chuan Thlam chu an chhuahsan ve ta a...







#Chumini zet zawng, Ruatsaka Tha chu aza lo kher mai, a che vel reng reng chu a zawi em em maia, a hmelah lah hlim hmel hmuh tur lah a awm hek lo. Chu chu a nute pawh hian an hmuh hmaih hauh lova, zilh emaw, fuih emaw pawh an tum chuang lova, anihna ang anga en liam chu ṭha berin an hre rih a ni.











Chawhnu darkhat vel ani a, Rinpuia chu an thil theihnghilh lam tura a nu ten an tirh avangin Lo aṭang chuan Khawlam panin a kal hnak hnaka, Chhun Nisat laia Kawng kal a peih loh avangin Chawhnu lam, Ni nem deuhva kal ani a, a tum dan chuan khawthim ruala Lo a thlen leh hman a in beisei a ni. Ni pawh a inher hret hret a, Tlai dar thum vel ani ta, Rinpuia pawn khua chu a lut tawha, an In lam chu panin a kal nghal hlawk hlawka, chutia hmanhmawh taka a kallai chuan ṭap thawm a hre ta thut maile! Khawiaṭanga lo chhuak nge anih ti a Beng a han chhit uluk deuh takah chuan Sangpuii te In niin a hre ta tlat mai, Rinpuia chuan mak a ti hle maia, chutia rei vak lo a din hnu chuan thil awmzia hriat tumin Sangpuii te In lam chu a pan ta zawka. Sangpuii te In ava thlen chuan Pitar leh Putar bakah, Nu leh Pa ṭhenkhat hi Sangpuii te In kawtah chuan an lo awma, Rinpuia chuan Putar pakhat lo ding hnenah chuan ,”ka pu, eng thil nge thlenga, hei Lo aṭangin ka rawn haw a thil theihnghilh lamin,” tiin a zawta, putar chuan ,”Rinpuia lah ni che a, hei, Sangpuii Pasal nei a an tih kha, Vawiin lamah Aizawl an pana, Tlungvel kawng kawiah Motor pakhat nen an insu a, vanduaithlak tak maiin Sangpuii chu Ka pawh chhawn lovin a boral nghal ani awm e,” ti a a lo chhang zet chu Rinpuia chuan mak a ti ngei mai, rei vak lo sawi mai tur pawh hrelova a ngawih hnu chuan ,”anih leh midang ho enge an an ve hlawm,“ tiin an zawt leh a, putar chuan ,”thil hi ka hre chiang lutuk bik rih lova, i rawn thlenhma lawk, minute sawm vel liam ta velah chauh khan kan hre ve a, Sangpuii pasal tura an tih kha a ngaihtuahawm viau ani awm e,” a lo ti a, Putar bawk chuan ,”Ruang pawh ala rawn thleng lo, dar nga hma hi chuan a rawn thlen hman an ring,” a han tihzawma, Rinpuia chuan ,”a pawi kher mai, ka beisei loh thil daih a ni mai, engpawh nise Lo lama ka zu zualko a ngai anih chu, ka kalsan phawt mai ang che,” tiin putar chu a kalsan ta a, an In lam chu pan nghalin, a thil theihnghilh chu a khawm zung zunga, dar thum leh a chanve velah chuan Lo lam panin a kal leh ta nghal a.










Rinpuia chu hmanhmawh tak chuan a kal zela, Tlai dar nga a pel awrh ang tihah chuan Lo chu a zu thleng ta a, a Iptepui te chu an Thlamah chuan a dah sawk sawka, a chhung ten an lo biakna pawh chu ngaihsak ta lo chuan a Ṭhianpa Ruatsaka te Thlam chu a pan ta nghala. Ruatsaka te Thlam anva thlen chuan Ruatsaka te chuan Zanriah an lo ei kham tawha, Pi Siamliani chuan ,”Rinpuia teh hlawl chu, Zanriah te inei tawh em,” tiin a lo bia a, Rinpuia chuan ,”ei love, khuaah thil theihnghilh lamin ka han haw a, ka rawn thleng ve chiah anih hi,” tiin a lo chhanga, amah vek chuan ,”hei ṭhianpa Ruata hi thil pawimawh deuh mai hrilh tura rawn kal ka nia,” tihpah chuan Kil khata lo ṭhu ngawi reng Ruatsaka chu an melh a, Pu Roliana chuan ,”Sangpuii pasal neih thu kha maw, tukin zing khan Parin a rawn sawi tawh tak a sin,” a lo ti a, Rinpuia chuan ,“chu chu ani thova, mahse chu aia pawimawh zawk chu ani ka rawn ken ni,” a han tih chuan Pi Siamliani chuan ,”eng thu nge ni a han sawi ta che,” a lo ti thuaia, Rinpuia chu a han ngawi deuh vung vunga, chutah, a Aw chu a han thian kharh kharh a, zawi te hian ,”Ruata, Sangpuii a awm ta lo,“ a han ti thawp sata, Ruatsaka chu a danglam chuang lo, pi Siamliani zawk chuan ,”enge a awmzia, han sawi chiang deuhla mawle,” a lo tih chuan Rinpuia chuan ,”ni e ka nu Siam, rawn sawitu nih hi anuam ka ti lo viau maia, mahse ka ṭhiana hian a hriat ngei a ngai si a, ka rawn kal nghal vang vang a ni, khatia Sangpuii te liam ta kha Tlungvelah Motor pakhat nen an insu a, Sangpuii chu a hmunah Ka pawh chhawn lovin a boral nghal ani awm e,” a han ti ta a, chuthu an hre zet chu tuman ṭawng nachang pawh an hrelova, Ruatsaka phei chuan a nghilh dup mai hian a inhria a, au chhuah vak mai te a duh rum ruma, a rilru chu ana kher mai, zah pawh a dawn zo ta lo, a Biangah chuan Mittui a rawn luang chhuak ta hiala, a nun a hmuh chuan pan hnai vatin, Mama, ava pawi tak em, inti pachang hram hram rawh khai,” tiin a fapa chu ava kuah a, chutihlai chuan pu Roliana chuan ,”eng Motor nen nge an insut a, anva insu na awm ve, midang ho pawh chu enge an an hlawma?" Tiin Rinpuia chu an zawta, Rinpuia chuan ,”engmah chiangin ka hre bik lo, mahse Sangpuii Pasal tura an tih Zira kha chu a ngaihtuahawm viau ani awm e,” a lo ti a, Pu Roliana bawk chuan ,”Pathian remruat dan hi zawng, amak teh zawng anih hi,” a lo ti zuai raih a. Rinpuia ve thung chuan ,”Thianpa, khatia indawmkun reng tur ani ngailove, tunah chuan Sangpuii ruang pawn khua a thleng tawhin ka ringa, hmu turin kan kal dawn lawmni,” a han tih takah chuan Ruatsaka chu a inthingharh thuaia, chutah Rinpuia hnenah chuan ,”Ṭhianpa min hrethiam teh, ka beisei loh lutuk thil ani a, min deng na lutuk alawm mawle, min hrethiam aniang chu,” tiin thupha an chawia, Rinpuia chuan ,”tikhan lo insiamla, Chaw ka lova bar ve anga mi rawn sawm phei mai ta che, a zanazana kan haw nghal mai loh chuan,“ a lo ti a, Ruatsaka chuan a nu leh pate chu a han rawn a, a nute pawn hrethiam takin rem an lo tih saka, Rinpuia a kal dawn chuan pu Roliana chuan ,”Rina, i ṭhianpa hi veng uluk ang che aw, a rilru na hian thil ni lo lo te a ti mai ange,” tiin a chah a, tichuan Rinpuia chu an Thlam lam panin a kal ta nghala...










Sangpuii te In lamah ve thung chuan mipui an tam tawh kher mai, Ruang a thlen tawh avangin puitling chin chu an kim ani deuh ber mai. Sangpuii nu chuan a fanu engmah hrelova mu chu kuahin a ṭah nasa maia, aw, ka fanu, ka neih chhun, ava mak ngai ve, hetiang thil hi ka beisei lo a sin, min ngaidam rawh aw ka fanu, i nu hi min ngaidam mawlh ang che aw, ka fanu lo tho leh la, i hlimna leh lawmna ber ka tih sak tawh nang che ka fanu lo tho leh rawh,” ti a ṭah hla te chhamin a fanu chu a han ko mawlh mawlh ṭhina, mahse chhangtu reng a awm tawh si lo. Pu Buanga pawh Sangpuii Ruang bawh chuan a ṭhu kunlapa, a Mittui hruk zauh zauh pah hian ,“ka fanu, i nu leh pate hian i nu leh pa nih kan va lo tlin lo em, min ngaidam mawlh rawh aw,“ tiin engmah hre tawh lo a fanu ruang chungah chuan a phun sep sep a. Darpui khaw nula hmelṭha Sangpuii thi chuan khawchhung a than chhuak rang kher mai, Lo lama riak mi ṭhenkhat pawh an rawn haw hlawma, Sangpuii te In leh a chhehvelah chuan an phu mur mur a ni ber mai. Ruatsaka pawn Sangpuii ruang chu ava thlek ve zawka, mahse a mualpho mai a hlauh avangin a inthiarfihlim leh thuaia, theih ni se zawng, insumkarna tel miah lova ṭah vak mai chu a chak a ni. Chumizan chuan Sangpuii chu an tlaivarpui ta a, mithi tawh hnu uibeh reng theih ni hek lo le, mi nung rama intawng leh ngai tawh lo turin Chhun dar sawmpahnihah chuan Leidaia zal hlen tawh turin an vuiliam ta a...








#Hun leh Ni te a liama, Sangpuii thih aṭang pawn karhnih lai a liam leh tawha, Darpui khaw mi tam zawkah rilruah chuan Sangpuii leh a chhungte an awm tawh lova, an hma lawka Krismass lo thleng tur chuan an rilru a luah tawh zawk a ni.





Chutiang chu nimahse Ruatsaka Thinlungah erawh chuan Sangpuii chu ala nung renga, a rilru chuan Sangpuii chu a thih ala ring thei lova, ala zawn ruai ruai chang lah a tam, mahse tawn tur reng a awm tawh si lo.




Pathianni chawhnu lam ani a, a ṭhian Pari leh Rinpuia te Lengtlang pana an inzui chho dam dam chu Ruatsaka Thlan kal tur chuan a han hmu a, a lung a lengin a ngaihtuahna a kal thui kher mai, rei tawk fang a ṭhiante kal liam a thlir hnu chuan insehruh ṭeuh chungin Thlanmual chu a pan ta hnak hnak a, a rilru chu ana kher mai, Sangpuii nena an sulhnu te a han chhuikir a, mahse engkim mai chuan mawina leh hlutna an nei tawh si lo.






Thlanmual ava thlen chuan a reh ruih maia, Sava hram thawm bak hriat tur a awm lo. Sangpuii Thlan a thlen chuan Ruatsaka chu a ṭhu zawi hnawka, enge tih mai tur pawh a hrelo, chutia minute khat vel a ṭhut hnu chuan Sangpuii Thlanah chuan a han ṭhingṭhi a, chutah, Sangpui, i zalna piallei ka rawn fang a sin, min lo chhawn dawn lawmni, i hmangaih Ruatsaka ka lo kal hi min chhang ta che. Kan ṭhian te chu kawpte a lengin an in di riala, mahse keichu nang ngai reng rengin hun ka hmang a sin, Sangpui, i tel lo chuan ka nunkhua hi a nguia, ka hringchan khawvel hi a ngui takzet a sin,” a Mittui chu a sur zung zunga, dan lah a tum hek lo, chutah a han hawi kuala, a awmna aṭang chuan Lengtlang, Sangpui nen a an lendunna lo lang chu a han hmu a, chutah, Sangpui, heng kan khaw Darpui mawi hian kan tu leh fate an la tualchai ve anga, an lawmna leh hlimna te chuan Darpui khua hi ala mawi ve ang,” ti a duhthu ka sam laia fam mi chansan hi hriatthiam a harin, rin ngam har ka va ti em, mahse a tak ani miau si, aw, Khawvel hi zawng, inṭhen leh tura intawnna, intawng leh tura inṭhenna ani si anih hi, maw, thlamuangin chawl la, i kiang ka rawn pan ve hunah Chatuan kawtchhuahah mi lo hmuak ang che aw,” ti a phun sep sepin a Bianga Mittui tla chu, chu Thlan riang takah chuan a far ngiai ngiaia

hei le, thiam lo chungin story ka rawn chhawpchhuak veleh rawih mai ani a, khawngaihin min lo chhiarsakin, like leh Comment te min lo pe ve hram dawn u nia, short story ani a, mahse short story-ah chuan a thui viau ani tih inhre dawn nia😃😃. Tin, he story hi a mizo raih tih min hriatsak ula, pasalṭha story erawh ani lo tih inhre dawn nia.

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)