JOON-a & SEO-i

Story tawi te te emaw luanliamna emaw post na
ElbieTomb
Posts: 3
Joined: December 26th, 2020, 1:57 pm

JOON-a & SEO-i

Unread post by ElbieTomb » December 28th, 2020, 9:25 am

JOON-a LEH SEO-i
Short story

Thlasik lai ani a, zan dar 10:00 p.m vel ani. Kanu leh kei chu kan mu tawh a chutah kawngkapui chu a rawn inkik ri karh karh a. "Tunge maw ni ang le tun ang zanrei ah" tiin peih manglo chuan khum atangin ka tho chuak a, ka mit nuai neuh neuh chungin kawngkapui lam chu ka pan phei nal nal a.
Kawngkapui bul ka thlen chuan hmeichhe tap ri feih feih chu ka hre ta a, a aw atang chuan Seo-i ani tih ka hre mai. Rang mankhengin kawngkapui chu ka hawng vat a , "enga ti leh ta nge Seo"? tiin eng dangmah a sawi hmain inchhungah chuan ka luh tir nghal vat a.

A nihna takah chuan Seo-i hi a Nu in kumkhat kal ta khan a boralsan a chuta tang chuan a pa chuan a tawrh thiam loh em avangin ruihhlo bawihah a tlu lut ta ani. A phone leh thawmhnaw te pawh tam tak a pa'n zu in man a tan a hman zawhsak vek tawh. Seo-i chu a kut thak hritthlak nan a hmang ziah thin. A ruih nasat zual chang phei chuan Seo-i chu hmeichhia emaw, a fanu ani tih pawh hre lek lo khawp a nasa in a sawisa hrep thin. Seo-i pawh mangang tak a kan in a arawm tlan chang a tam khawp mai. Tuna a rawn kal pawh a vawikhatna chauh ani lo.

Khatia ka zawh chuan thil awmzia chu khur tlawk tlawk chungin ti hian a sawi a " kapa kha zan dar 9 vel ah alo haw a, kei chu ka lo mu tawh a. "Seo Zotluangpui" tiin ka hming pum chuan ring mangkhengin min rawn ko va. Chu vel leh hmanmawh lutukin khum atang tho chhuakin 'eng nge ni kapa' tih pah in abul ah chuan ka phei nghal a. Ka pa chuan ' khawiah nge i awm? Ka ril atam chaw ei min siam nghal rawh ' a ti a. Kei chuan " mahse kapa chaw chu hmundangah i ei thin avangin ka eitur chiah ka lo chhum avangin ka lo eizo a" ti a ka chhan chuan " eng a! tiin min beng thal hlawp a, chhuatah chuan ka tlu nghal a..
Ala duh tawk mai lo, a ke chuan min pet vak vak a, kei chuan tap chungin ' kapa khawngaih in ti tawh suh ka pum ana ani a ' tiin tap chung in ka dil mawlh mawlh a. En ta miah lovin chhuatah chuan ka tap a, reilo te chu a reh a mahse ka han hawichhuah nak chuan kapa chuan minsual a tum ani tih hriat takin a kawng hren te chu a phelh melh melh a,
min bawh a tum lai tak chuan rang tak a thovin ka namtlu a ka rawn tlan chhuak thei hram ani" tiin a sawi a, a sawi lai te pawh chuan a mittui chu danrual ani lo a biangah chuan a luangthla ngeuh ngeuh mai.
Kei chu thinrimna in ka khat a, ka sa pawp pawp, ka chhungril chu meialh alh chhuak tur ang mai min nawltu awm ang mai hian ka hria mahse pangai takin " Seo lungngai mah ta che hei ka bulah i awm tawh a tuman an ti na leh tawh lovang che, i pa pawh ni ang hmiang tuman an tihnat che ka phal tawh lovang " tiin ka pawm a , kanu pawh kan lo tiharh pawh a ni ang kan bulah lo awm in Seo thusawi engkim a lo hre vek a, ani pawh amit ah chuan mittui alo paw riai mai.." "Aw Seo khawngaihthlak te i pa hian eng nge maw a hriat tak mai le tiang a awm tak mai ni, tiang a haw leh zawng a rem lo e, kal rawh zanin chu ka bulah lo mu leh phawt rawh aw?, " tiin Seo-i chu bedroom lam a pan pui a, kei pawh ka khumlam ka pan a eng eng emaw ngaihtuah in ka muhil ta a.

Hmeichhe aw ri chuan fiah lo ruaiin "Joon-a"? "Joon-a"? tia min ko ri ka hriat chuan ka harh phut a , ka thova ka han hawikual chuan zing alo ni der tawh mai. "Kha bawiha kaihthawh i har tulh tulh tawh mai, tho la in ti harh rawh " tih pahin kanu chu eirawngbawl chungin alo che zung zung a. Kanu ang nu ka nei hi chu khawvel a mi vannei ber ka ni te hian ka hre thin. Kanu chu kan khua Govt High School zirtirtu ani a. Pathian khawngaihna zarah kapa chu awm tawh lo mahse mithenkhat nu leh pa nen a awm te ai mah khan ka vannei zawk ten ka hre thin.
Ka nui a, mahse thil pakhat ka hrechhuak thut. Seo-i ; phawk tak chungin " Kanu khawiah nge Seo-i ?" tiin ka zawt nghal a. "Kapa zurui kha a reh tawh ang kava haw phawt ang e tiin a haw ta a nih kha" tiin min hrilh a. "Enga ti nge min kaihthawh loh!? " ti a ka zawh chuan " kaihthawh che ka tum a mahse Seo'n kai tho lo tur che in min ti sia ka kaitho ta lo che a nih kha " tiin min chhang leh mai a. A nih na tak ah chuan Seo-i hi ka ngaihtuah ru khawp mai a pa chu eng ang a sual leh kawlh ni mahse a zah a, a tul ang ang chu a tih sak reng tho, mi thenkhat chu nise a pa chu an tlanchhiatsan tawh ngei in ka ring.

Seo-i chu nula hmeltha ve tak, sang lutuk lo, zia zawi, tawngtam lo, ngo lampang , samsei mhse chalsam tawi a ni a..tet te atang thiantha tak kan ni. Kan chhungkua chu kan inpawh a, a nu boral hnuah phei chuan a laina hnai ber leh a pan ber kan ni. Khatia a pa in a sawisak ka hriat hian kei pawh ka na a, ka tawmpuiin ka lo khawngaih thin hle. A mah venghim tlattu nih ka duh a, thiantha ai mah a thuk a en palh chang ka nghah thin hle mahse engmah ka sawi ngam ngai lo . Sawi tawp ah chuan ka hmangaih ani.
A nu dam lai a a piancham kan lawm trum a a hlim hmel leh nuih hmel te kha aw,,,,, ka theihnghilh thei lo, a tun dinhmun nen a ka tehkhin phei chuan a hreawm ka ti thin khawp mai.

Vawi khat chu zanah thiante nen an inah kan va leng a, zan dar 8 vel a rik chuan thian te chuan haw an rawt a mahse kei val,a ruk a lo hmangaih tu hian ka la kham lo nasa bakah a pa lo haw se engthil nge a tih leh dawn hriat ani si lo. Thian te bulah chuan lo va haw hmasa mai tur chuan ka hrilh a, an haw ta mai a. An haw hnu chuan " hmanni khan engmah min hrilh lovin i lo haw ta daih si a, engkim chu tha maw"? tiin ka zawt a. " Umm , tha ni mai. A thil tih leh awm dan te engmah a lo hre tawh lova a tih chi phian" tiin a nui sarh a. A awri leh a mit meng atang chuan dawt a sawi a ni tih ka hre mai engthil emaw chua a pa chuan sawi a nei ngei a ni tih ka hria mhse zawt belh ta chuanglo chuan " nih chu mawle" , tiin ka lu ka bu ngauh a, " tun hi a hun chu ani, engkim a laka ka rilru put hmang zawng zawng sawi hun tak ani " tiin .
" Seo dik tak chuan maw, kei chuan nang hi ka......" eng dang mah ka sawi hma chuan kawngka chu a rawn in kik ri a Seo-i pa ani tih kan hre mai . Pawr lutuk tak mai in kawngka chu a rawn hawng a a landan atang zu a rui ani tih kan hre mai. Din pawh ding tha hleithei lo hian hawi dawi dawi chungin min han en a " eh eh eh, uire nu ka awm loh hlan in mipa i lo khawsakpui thin ani maw? "Vawiin zet chu ka chhuah tawh hauh lovang che", tih pah chuan a bula chempui chu la in in Seo-i lam chu a pan phei a, " nilo ka pa khawngaihin ti suh" ti a Seo-i hlauthawng hmel leh tlanchhiat a tum ka hmuh chuan insum hun ni tawh pawn ka hre lo, ka dinga , a pa chu na thei ang ber turin ka han hnek chu a let chiang asin. A tlu a a tho leh tawh miah lo a muhil nghal daih. Khumah chuan kan mutir a. Dar 11:00 pm a ri tawh. " Hei a tlai tawh emai Seo trinzai ka va rel mai tang e kanu'n min ngaihtuah lutuk palh ang, eng pawh a thleng a nih chuan min hrilh leh vat rawh aw" tiin ka chhuak a, kawtchhuah thleng chu min thlah a, hreh tak chungin ka kal a, ( a nih na takah a chuan ka rilru put hmang ka sawi hman ta lo kha a pawi ka ti hle eng tikah nge hun remchang ka neih ang tih ka hre si lo) rei ka thlen hma chuan "Joon"? tiin min ko a ka hawilet nghal vat a, rang lutukin " aw eng nge ni Seo ?" ka ti vat a. " Ka lawm e aw" nui deuh suk chung chuan a rawn ti a . " Kei pawh le" ti a ka chhawn hmain in a lut nghal a.. "Kei pawh le" ring lo deuh a ti chungin hlim takin ka haw ta a ni.

Hun leh kum a her zel a, nikhat chu kanu in Aizawl a Seo-i nu unaute chu kan khua a an rawn zin thu min hrilh a. Va leng tura min hrilh avangin va leng tur chuan an in lam chu ka pan ta a. A nih na takah chuan kei pawn Seo-i nu chhungte chu hmuh ka chak ve reng. Ka kal a an in kawt ka thlen chuan an kawt a Car pakhat lo ding ran mai chu ka hmu a, an kawt atang a an inchhung ka han bih chuan hmel en pawh a mi neinung ani tih hriat tak mai nu pakhat leh pa Ngura( Seo-i pa) in bia chu ka hmu thei a, Seo-i leh tlangval pakhat pawh ka hmu thei a. An landan atang chuan an hlim viau a ni tih ka hre thei mai. Seo-i chu khapa bulah a nui a, a mak pawh ka ti mah zawk. Mi an tam ve deuh avangin leh an hlim hmel ka hmuh takah chuan va lenbuai kha tha in ka hre lova.
Ngui tak chungin kan in lam pan chuan ka haw leh ta nal nal a ani". "Tinge Joon i va rawn let leh hma ve"? I va leng na nge ?" ti a kanu in min zawh pawn " umm , leng ta lo mai. Va len loh kha a that zawk ka ring " tia chhang chungin ka room lam chu ka pansan mai a. Khum ah chuan mu in ti hian ka ngaihtuah a" ni e , Seo-i chu hmangaih in duh mah i la engmah ka hrilh ngai lo. Chu bakah khapa bula a hlim hmelte kha hun rei tak ata tawh a nui hmel ka hmu thei lo kha ani a, rethei thin hle mahse tunah chuan a tan lawmna kawl a rawn eng tan a nih hmel a , lawm takin a numhlimna tur kawng chu a va zawh tur ani. A hlimna chu ka hlimna tur a ni dawn si" tiin.
Ni atla in, khua a lo thim a, zan dar 10 a ri a , kan kawngkapui chu a rawn in kik a pawn a tang chuan " Joon-a? Joon-a?" ti a hmeichhe thlabar aw ri chu ka hre leh ta thut a, kei pawh Seo-i a nih leh ngei beiseiin khum atang chuan ka zuangthla nghal a . Kawngka chu ka hawng nghal a Seo-i lo ni reng mai. " Ti nge a Seo? I pa'n a khawih leh tawh che law? Lo ngawi rawh vawiin chu kan khawih tawh ta tak ang e, a ni em em tawh lo" ka tih chuan " nilo Joon-a, chutiang ani lo ka pa hi a chau lutuk, a thaw hlei thei lo khawngaih in min pui rawh, khawngaih takin , kanute te tuman in in kalkawng an hre silova, bakah nangni bak chu midang koh tur ka hriat mai loh avangin hmanmawh takin ka rawn tlan ani " tiin mittui paw riai chung chuan a rawn ti a. Chuti nih chuan tiin kanu pawh kai tho nghalin Seo-i te inlam chu kan pan ta nghal a. An in kan va thlen chuan chuan Seo-i nute chu rawn chhuakin a rawn tap chhuak ta hawk hawk mai a, " bawihi , aw bawihi , engtin nge ni ang? I pa hian min liam san tawh " tiin a rawn tap hawk hawk a. Inchhungah chuan kan lut nghal Seo-i chu "kapa, ka duh thei lo pa, pa khawingaihin lo tho hram rawh i tel lo chuan tunge ka neih tak ang? Ka neih chhun i ni asin pa !! Khawngaih in, khawngaihin....." tiin a tap hawk hawk,,chutah an in a tlangval hmanni a ka hmuh pa bawk chuan rawn kuah in " Seo, duh tawk rawh , hetiang te chu hringnun kalphung ve reng alawm ", ti a kuah chungin a hnung a chul heuh heuh a. Tlangval pumpa kan mit hmuh lai ngei a kan miduh te midangin an dar a an han kuah vel han hmuh hi chu a nuam teh chiam lo zawng ani e.

A pa thih hnu karkhat hnuah Seo i chu kan in ah a rawn kal in "Lo lut rawh Seo , eng nge ni ta bawihi i rawn len teh mial a tun ang hunah" tiin a lo dawng sawng a. Kei chuan engmah ka sawi lo. " Joon-a hi a fal a biak ka duh a nu Ro", tiin min hmuh duh thu a sawi a. Kan kawmthlang tanky bulah chuan kan in bia a, Seo i chuan engkim zep nei miah lovin min hrilh a, Aizawl a nutete bula a awm tur thu te, a awm hlen dawn thu te, a nutte te chu an pafa a Aizawla awm tura hruai tur a rawn kal an nih thu te , vawiin tlai dar 1 a an chhuak tur thu te min hrilh vek a. " A nih khapa kha?", tiin ngeng zet in ka zawt a , chu vel leh " , a tu khapa maw? E, Kima kha maw. Ani chu ka nute fapa ania , kanu damlai pawh khan a rawn zin thin a. Mipa fel tak ani asin. Joon, he thil ka hrilh che a ngai hi a pawi ka ti khawp mai, a ni nen khan kan, kan,,,". A sawi hleithei lo. Eng nge " kan , kan i tih reng a , i sawi mai thei lo a mi"? vin deuh hlak a ka tih chuan " A ni nen khan kan in nei mai thei ", ti a min hrilh chuan ka nguai vek. Engmah pawh ka rilru ah a awm lo nghal. A tu aman engmah pawh kan sawi lo . Chutia engmah sawi lova kan awm lai chuan Seo-i chu a lo uak thut a " Seo engtin nge i awm i tha em"? A darah chuan vuan chung in mang ang hmelzet in ka zawt a. "Ah, engmah anilo, ka tha e," tiin za lo nuih hmel deuh si hian a ti a. Chutia engdangmah kan sawi hma chuan kanu chuan min rawn kova. Nichin a ka sawi tlangval Kim-a kha Seo lam turin a lo kal kha alo nia. In kan thlen chhoh chuan kanu chu Kim'n engkim a lo hrilh tawh a, kanu nen an in mangtha hnuah kei chuan Seo-i te chu kawtchhuah thleng ka va thlah . An liam hma chu ka thlir char char a Seo-i chu a rawn hawi let miah lo , ni e engah nge a rawn hawilet reng ang ni, a ni chuan thiantha innghahna tlak tak ang chauhvin min en a , kei lah in hmangaihna mit in ka lo thlir a mahse eng mah ka hrilh ngam bawk silo kha a ni a ka dem hran lo.
Seo-i kan khuah a awm tak loh ah chuan kan khua chu a ruak huai in ka hria, ka lung a leng hle. Ka hawina lam apiangah a hmel a lo lang a, chhuanah te chuan an in lamah te ka va phei thin a , an kawta a pa hlauvaa khur tlawk tlawka a awm lai te kha ka mit thla a , chung thil te chuan hreawm ti takin min siam a Seo-i ka hmangaih na chu chung khawngaihna te chuan an ti zual thin. Hmangaih ka nei ve a mahse ka hmangaih thu pawh ka hrilh hman silo, chutah a chungah te ka la thinrim zui a nia, eng nge ka awmzia pawh ka hrethiam tawh lo. A chang leh ka insit a, a chang leh ka lungngai a, a chang leh ka lawmpui leh lawi si. Ka chawei pawh a tui thei lo. Kanu chuan Seo-i chunga ka rilru put hmang te chu a hrethiam nghal a, chaw ka ei loh thin avang a ka cher phah zia te pawh a sawi fo bawk, zantin Seo'n kawngka a rawn kik leh tur ang ten ka ngai thin a, a changru niawm tak ten zinglam dar 3 thlengte chu mengkar chungin khumah ka mu tlaivar leh ringawt zel. Ka ã zo ta zawk nge ni ang.

Thla thum a liam tawh. Tuk khat chu kanu'n phone atangin mi pakhat a be malh malh a , tu vak an nih ka rin loh avangin ka ngaihsak duh lem lo. Tukthuan kan han ei a kanu chuan " Joon bawiha nakum session thar atang chuan kan khuaah hna ka thawk thei tawh dawn lova", ti a min hrilh chuan " ngati nge? khawiah nge i thawh tak ang a nih ? ti in phawk tak chung ka zawt nghal a. Kanu chuan session thar atan Aizawl lam thawk tur a transfer a hmuh thu min hrilh a ka lawm ru hle. " "Chuti law?", tiin nui deuh suk chuan ka ti a kanu chuan " Chuan maw bawiha nichin khan Seo in min bia a, April thla ah a nute fapa Kim-a nen an in neih tur thu pawh min hrilh bawk a", ti a min hrilh chuan nichin a ka hlim hmel te chu laksakin ka awm nghal ni mai in ka hria, ka zawi raih. Ka chaw ei duhna pawh a bo hmak. Kanu bulah chuan a call na number chu ka dil nghal in room lamah ka liam nghal. Chu number chu ka dial nghal a, a ring va va mai a reilo te a ring hnuah chuan nula awm tham mawi tak hman a ka hriat thin chuan "hello, tu nge aw?" tiin min lo chhanga " Hello Seo, keimah ka nia Joon-a, i tha maw? Kanu khan engkim min hrilh a a dik reng em ni? ti a damdiai a ka zawh chuan "Umm, a dik alawm", tiin min chhang mai a. " Tinge tun hmain min hrilh loh Kim-a nen a inchung changte? I tan thiantha ka tiang thu pawh hrilh ngam tlak loh em mi ka nih ? Engtin nge ka ngaih ang tih te pawh i ngaihtuh ve lo em ni? tiin ka zawt phiar phiar a. "Ni e Joon , ka thiantha tak i ni , nang ang thiantha hi chu khawvel oum pawh hel chhuak mah ila ka hmu lovang tih ka hria mahse Kim-a hian min hmangaih a, i hria a ni lawm ni kanu boral atanga kapa khatianga a awm hnuah tuman min biakthat duh loh zia te, miten min diriam zia te kha, ka khua a har thin asin . Thinlungtak a min hmangaihtu tur ka zawng a mahse tu mihring hian nge hmangaihna mit a min en duh ang kei tehlul hi i ti ve lovem ni? Nangpawh ka thian i ni a thiantha nih na bak i lak atang eng nge beisei ngam tur ka nih Joon? Hei tunah thinlung taka min hmangaihtu ka tawnga ka thian i nih na angin min lawmpui tur i ni lo em ni? tia min chhan chuan thil tam tak ka ngaihtuah a, Seo-i chu a lo insit thei hle nimaw, a khua a har in khang hun chhung zawngte khan hreawm a va ti thin dawn tak em, kan inah chuan rawn tlan chhe thin mahse a rawn tlan loh changin engtin nge a awm ang tih pawh ka ngaihtuah phak ngai silo chuta chhap ah kei ka hmangaih thu pawh hrilh ngam lo khan tunah ka hlat a a awm vel leh ka thinrim khum chiam thin leh nghal , engmah thiam loh na a nei silo", tiin ka ngaihtuah na ah chuan thil tam tak a rawn lang zung zung a. " a lo ni maw Seo, in thianthatna ai mah a thuk in asin ka lo kei chuan ka lo en thin che" tiin phone chu ka dah a.

March thla tawp lampang kan thleng a kanu nen chuan Aizawl ah chuan kan insawn ta a, Seo-i pasal nei mai tur ani a ka lawmpui hle rualin alak a ka rilru put hmang erawh a la dang chuang lo, hmeichhe dang han chhai pawh ka tum lo bawk. Aizawlah chuan Chanmari Veng ah kan awm a ni. Kanu chu transfer a nih hnuah a hlawh a lo tam deuh a tin, Azawl khawpui a awm takah chuan hnatul neuh neuh a tam avangin kanu rawtna angin awmpui chu kan la nghal bawk a , a hming chu Ruatpuii a ni. Kei pawh tlangval pum hna nei lova awm a tha love tiin kanu chuan dawr pakhat ka enkawl turin mi leisak a chu chu ka enkawl a ni. Seo-i erawh ka ngaihtuah lo ngai lo. Hmana a phone number lah a call tlang theih tawh si loh. Nitin ka chhuah apiangin a ni hmuh in beisei ran chungin ka chhuah chang pawn mipui zingah ka zawng pah thin.
Hun akal zel a kan awm hnu thla li vel a liam tawh . Nikhat chu " khawi maw vawi khat na na na chu Aizawl khawpui kan va fang tak tak teng ", tiin ka bike nen chuan ka leng chhuak a. Nisat vanglai a nih tawh avangin Aizawl khawpui pawh a lum tan tawh hle. Khatla bazar ah chuan apple an lo zuar a a tuihnai ka tih em avang chuan eng emaw zat chu ka lei a chutia ka bike lam ka pan laitak chuan hmeichhe pakhat Seo-i hmel ang deuh hi ka hmu a, a vun te chu Aizawla awm ni mahse a hang deuh a, san zawng erawh Seo-i nen a in chen vel chiah chiah ang mahse raipuar a ni a Seo-i a nih ka rin loh avangin ka umzui duh ta chuang lo.

In ka thleng a , vawiin a ka thil hmuh chu a mak ka ti hle, Seo-i a ni thei mai ang em? Mahse engtin nge raipuar in??,,, ka rilru a in saisa char char a , kei mah leh keimah ka inhnial char char ringawt. Zanah chuan eng emaw a hriat tak mialin tiin kan awmpuinu (Ruatpuii) chu " Ruatpui Seo in ti hmingpu hriat i nei lo maw?" tiin ka zawt a , ani chuan mak ti hmel deuh in " Seo-i maw? ti in min han zawt let nghal a, eng emaw chu a hriat ka ring nghal ringawt.
"Aw nie, a ni chu hmeichhe sang lutuk lo, ngo lamlang, mi ngawi chawi lampang ani a" ti a ka sawi chuan " Aw, aw, hria e , ani nen chuan kan inhre lutuk a lawm", a rawn ti a. An in hria chu a mak pawh ka ti hle mahse a tha phian. Chutia an in hriat tak ah chuan engkim chu chip chiar takin, zep neimiah lo a min hrilh tur in ka ti ta a. Ti hian a sawi a " Hmanah an awmpui kani thin a, i sawi angin hmeichhe tawngtam lo tak chu ani. A ni chuan min duat khawp mai . Nikhat chu a phone a hmang a chuta tang chuan a rawn tawng tlem leh zual ni hian ka hria. Tun April thla a Kim-a nen a in nei tur an nia mahse thil lian tham lutuk tak mai a thleng a, eng thil lianthmam nge thleng a,"? tiin kei chuan ka zawt vat a. " Ih, Seo-i kha a rai ani tih an hrechhuak a, chuvangin Seo-i pawh nu Lucy(Kim-a nu) hian an in atang a hnawkchhuak nghal a". A rai a tih chuan a mak ka ti hle a pa fa ani tih ka hre nghal mai. A pan a khawidan te chu ka hrilh vek tawh che u kha. " Rai chungin a chhuah tira maw!?" tiin kei chuan ring deuh hlakin ka zawt a. Ruatpuii pawh a phu chiang kher mai. A sawi zel a " Umm ni e, Seo-i chuan chhuah tir lo tur in a dil hram hram a mahse an chhuah tir ta tho a ni. A phone pawh an laksak nghal bawk a. Chutia Seo-i a awm tak loh ah chuan nu Lucy-i kha a à reng a ka nin em avangin kei pawn ka chhuah san ta daih ani. In awmna a la rei lo sia in la hre lo a ni mai thei bakah Khatla veng chhungah chuan an chungchang hre lo pawh hi an awm mang lo asin. Chutia an chhuah tir hnuah chuan mi zawng zawngin uire angah an ngai a, awmna tur mumal pawh a nei lo a ni mai thei chawhmeh lei tur a ka chhuah chang te hian ka hmu zeuh zeuh thin a. Kanu leh pa te chu Seo-i chungchsng ka hrilh hnuah an khawngaih em avangin kan ina awm thr a ko turin min hrlh a mahse chutih veleh khawiah mah ka hmu ta silo ani", a ti a. Chutia Seo chungchang min hrilh takah chuan in thiam loh na in ka khat a, vawiin a ka hmuh kha Seo-i a ni tih ka ring nghet bur. Zawn chhuah ngei chu ka tum ta a ni .

A tukah chuan kanu bulah ti hian ka sawi a " kanu vawiin atang Seo-i ka zawng dawn a ka rawn thlen hunah engkim chu ka hrilh dawn che nia" tih leh chhuah ka rual nghal a. Nimin a ka hmuhna vel chu ka en hmasa a ka hmuh mai loh avang chuan Khatla veng chhung zawng zawng chu ka zawng chhuak vek mahse Seo-i hmel niawm hmuh tur reng reng a awm lo. Nimin khan lo en tha mai mai ila tha tur ka ti vawng vawng. Khatia ka hmuh zawh loh takah chuan kan venglam pan chuan ka haw ta a. Ka haw kawngah traffic a lo zam a " ngati nge a thianpa" tiin ka bula tak driver chu ka zawt a. " Ah, sawtilai lawkah nu pakhat a tlu a a chet mai theih loh avangin an buaipui a nih saw, raipuar a nih hmel a, nau nei mai tur a nih hmel " , a rawn ti a chu vel leh " Seo-i a ni dawn chu" tiin thei traffic chep tak karah a thei leh thei mang lo in ka in rawh lui hram hram a mahse accident na hmun ka va thlen chuan Ambulance motor chhungah damlo chu an lo dah hman chiah chiah a. Seo-i a nih ka rin avangin Ambulance motor chu zui nghalin Civil Hospital ah chuan ka zui tlang nghal a.

Hospital chhung an zawn lutna lampang chu ka va lut a chutah nurse pakhatin " engtin nge ni ang a chhungte kha kan kohsak dawn em? a rawn ti a chu veleh pakhat in "mahse ka hriat dan ah hmani lawk khan a chhungten in atang an hnawtchhuak ani awm e", a rawn ti leh a chu veleh kei chuan " hei ka awm alawm keima hmingin ziak rawh u" ka ti nghal vat a, ka nu chu Hospital ah chuan ka call nghal.
Darkar chanve hnuah kanu chu a lo thleng a " ti nge a bawiha Seo-i chung chang i sawi em ni?" min ti a. "Aw kanu " tiin hman zana Ruatpuii thu sawi zawng zawng engkim chu kanu ka hrilh vek a". "Khai aw, kan Seo-i chu a lo va khawngaihthlak tak em, enga ti nge tiang hi Pathianin a tawrh tir bik le, awi aw ka duh thei lo " tiin a tap liam liam a. Doctor chu a rawn chhuak a " doctor engtin nge a awm, Seo-i chu a tha em?" tiin ka lo zawt nghal a.
Doctor chuan " A pawi kan ti khawp mai a nu hi a tlu na deuh a vanduaithlak takin naute chu kan chhan hman ta lo ani, a nu hian ei leh in ah a taksa mamawh zat hmu lo nasa em em a, a hriselna pawh a chhe hle ani mahse a nu erawh engtin mah a awm love a tha leh vat ang, darkar chanve hnuah in hmu thei ang," tiin min hrilh a. Kan thu hriat chuan min thawng hle, apawi pawh ka tih pui khawp mai. A pa kha la dam se sawisak hlum hial te ka chak.
Darkar chanve hnuah Seo-i aharh a kan hmuh theih tur thu nurse pakhat chuan min rawn hrilh a, kan lut nghal.
Seo-i chu a rawn meng ruai ruai a " hei Seo?", tiin ka ko a chu veleh " khawiah nge ka fapa?, mawh khawiah nge a awm? Ka fapa min pe rawh u , ka fapa ka duh", tiin a zawt chiam a. Kanu chuan " "bawihi, in sum hram hram rawh i fapa chu an chhan hman ta lo ani ", ti a a hrilh chuan a mit atang mittui a luang thla a atap tawp. " Tap suh Seo hei i bulah ka awm tawh alawm" tiin ka hnem a. Mipa ka nia engthil ah pawh kei chuan tap loh hram kha ka rum thin mahse a hreawm ka tih zia hi tu fa hian nge hria . A mittui te chu ka hruk hul sak a kanu pawh sir khatah chuan mittui hru sep sep chungin a lo ding a Seo-i chu a chhuah veleh kan in a lo rawn awm turin a hrilh nghal ani.

Karkhat hnuah chuan Seo-i chu a chhuah theih tawh dawn avangin kanu chuan Seo-i chu va lama kan inlam a hruai turin min hrilh a, Ruatpuii bulah tlailamah chuan ei tur Seo-i duh chi tak lo siam turin ka chah nghal bawk.
Tlaiah khat chu chu chaw kan han ei a, kan chaw ei lai tak chuan kanu bulah ti hian ka sawi a" kanu Seo-i hi kum kha leh chen ka lo chan tawh a, tun dinhmun a thlen chhanpawh keimah vang ani. A nalai hmel hi ka hmu thei tawh lo. Nupui a neih ka duh a ni khawngaihin min phalsak rawh rawh ka ti tawp. " Mahse Joon tun thut thut a tih i duh em ni? tiin kanu chuan min zawt a. A nih na takah chuan kanu chuan Seo-i tawrh na zawng zawng a hriat avangin a hnar dawn lo tih ka hria mahse la hma a ti deuh a ni mai thei mahse kei chuan ka lo ti lo nasa, hman a Seo-i ka hmangaihna leh tun dinhmun a adin hnua ka hmangaih na chu a la ngai reng ani.

" Duh e , harsatna ka nei lo. Ani nupui a neih tluk a chak leh duh ka nei lo", tiin ka chhang a, a nihna takah chuan zahpawh ka dawn zo tawh lo hi ani ber in ka hria. Chutah Seo-i chuan " Mahse Joon ka,,,,," engdang a sawi hma chuan ," Nilo Seo, tunah chuan engkim i hre tawh a, kei chuan hman a ta tawh ka hmangaih che a nang pawh in nangmah hmangaihna thinlung nen a hmangaih tu tur che i duh tih ka hria. Khawngaih in hman a ta tawh ka hrilh loh vang che khan min ngaidam ang che, " tiin Seo-i bulah chuan ka sawi a.
"Awle nih i duh ang chuan kan ti dawn ania" tiin kanu chuan min pawmpui thu min hrilh a ka lawm hle.
Seo-i mit atang chuan mittui bawk a rawn luang chhuak leh a, chaw ei na atang chuan a tho chhuak a roomah a lut a. Ka zui lut nghal a , room a ka luh ve leh min lo pawm nghal a " lung ngai suh Seo engkim chu a tha e," tiin a hnung chu ka chul heuh heuh a.
"Ka lawm e, nang awm lo la kei hi mihring tlak pawh ani tawh lovang, kan khuaah te khan thian tha chauh angin min lo en emaw ka lo ti char char a, ka chungah i tha tih ka hria mahse i lak atang ka thu hriat duh ka hriat ngai loh avangin in thianthat na bakin kan inkarah hmun achang ngai dawn lo a nih hi ka lo ti asin, zan alo thlen apiang in ka pa hian engthil nge a tih leh ang ti hlau reng rengin ka khawsa thin a mahse i lak ah engkim ka hrilh che chuan min ten in min kalsan ka hlau si. Joon khawngaih in min kalsa tawh suh aw, ka hmangaih che," tiin min kuah vawng vawng chungin a tap a " Kei pawh in ka hmangaih che alawm, i lak atang ka bo tawh lo ang, nangpawh i bo ka phal tawh ngai lo ang ", tiin ka hnem a.

Kar hnih hnuah chuan hlim tak a in nei in kanu, Seo-i leh Kei kan chhungkuain nunthar kan hmang ho ta a ni.


Thanks for reading.
Attachments
00687bff749d25e0f66d8684d16972e6_1.jpg
Ka vaqikhatna a nih avangin duhthusam lo lai a tam dawn a khawngaih in kha lai kha chu deuh se tih emaw, tha lo leh fel lo lai kha chu cmmt na lam ah min rawn hrilh pawp pawpdawn turin ka rawn ngen che u ani. Tim, phur taka min lo chhiarsaktu te chungah lawmthu ka rawn sawi nghal bawk e.
00687bff749d25e0f66d8684d16972e6_1.jpg (61.69 KiB) Viewed 1546 times



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)