KA THINLUNG SUMO DRIVER:ZIAKTU:NUTTY GIRL

Story tawi te te emaw luanliamna emaw post na
Nutty girl
Posts: 209
Joined: May 2nd, 2020, 11:28 pm

KA THINLUNG SUMO DRIVER:ZIAKTU:NUTTY GIRL

Unread post by Nutty girl » April 4th, 2021, 3:13 pm

KA THINLUNG SUMO DRIVER



Ziaktu:Nutty Girl



"Saii,i in peih tawh em? Hmanhmawh deuh ru dar 6 a ri hnai ania aw,"ka ni chuan a lo ti lawng lawng. Kei chu ka inpeih vek tawh Bawihpuia ka la siam laklawh lutuk."Ni ni,anu leh apa bulah kan haw tawh dawn mi?"a tih chuan ka bu nghauh nghauh a,a pheikhawk chu ka bun tir mawlh mawlh.


Room aṭanga kan chhuah chuan Bawihpuia chu ka nu leh pa bulah chuan a va tlan phei a,a ti ti phei mawlh mawlh.A nu leh pa telloin ka pate rualin a lo zin ve a,karkhat dawn an cham ve tawh ka pate inentir an la ngaih avangin kan haw phei hmasa dawn.


Pu Mama chuan Millennium-ah min dah a.Ka nu leh ka ni chuan min lo zui ve bawk a,kawngtluan chuan Bawihpuia chu a titi a,a ṭawng thei tawh bawk a kan hlimpui thei hle.



Kei hi Sairinpuii ka ni a,Lunglei khua ka ni. Aizawl Girls hostelah awmin PUC ah ka lut a,
3rd Semester exam kan zo chiah a,Lunglei lama haw ka tum a ni.Motor ruih ka hrat bakah khua a lum ropui si a,ka huphurh ru hle.Bawihpuia a awm zui bawk nen.Ka nu leh pate pawn nizan mut dawnah leh tukinah nen vawihnih lai damdawi min eitir.



"Bawihi sumo hming kha engnge khah?"ka nu chuan zawn kual pah chuan a ti a,sumo lo ding ho chu car chhung aṭang chuan a thlek ṭawk ṭawk.


"Omom sumo a niin ka hria.."



Ka nu chuan a va zawng kuala a lo ding der tawh.Buangrua ka hawn hnem lem lo a,kar hnih khat vel bak ka awm hmanin ka ring lo.


"Bawihpui,fel deuha awm tur aw,tlangval i nih tawh kha,"ka nu chuan a tih chuan Bawihpuia pawh chuan a thil ken lai chu khalh chhunzawm malh malh pah chuan a bu nghauh nghauh.Kan mi nghahte an lo thlen takah chuan kan lut a,1 leh 2 ka nuten khua a lum sia tiin min lo hauhsak.



"Tluang deuhin in kal dawn nia aw,Bawihpui fel deuha awm tur a nih kha aw,a ni thu awih la. Saii,i u Hlimpuii ta tur kha theihnghilh suh aw,kha a hmaah khan dah daih rawh,"ka nu chuan a tihzawm nghal zat a,U Hlimpuii thil tur chu a hmaah chuan ka dah ve mai a,Bawihpuia chuan a bye bye lauh lauh.Ka nu chuan driver chu biain Thenzawla thil pek kan ngaih lawk tur thu chu hrihin min hriatpui turin a hrilh nghe nghe.


Zing kara kan chhuak chung pawn boruak vawt suk a awm lem lo,chhunah phei chuan khaw lum a tawrhhleh awm khawp ang le. Bawihpuia chuan nuam a ti hle a,kawnga kan tlan pelh tak te chu a kawk kual zut zut renga,a ti ti siam reng bawk.Ni a tlangsang deuh tihah chuan a rawn lum chho a,Bawihpuia pawh chu a ninhei peih vak tawh lo."Ani a nuam tawh lo e,"a khat tawk chuan a ti a ti ṭhin,keimah zawk pawh chu ka ni chhu mai.


"Chaw ei tawh ang u aw,"driverin a rawn tih chuan hnunglam ho chu an lo 'aw'tliar tliar.



"Bawihpui,chaw ei ang aw,"ka tih chuan phur fahran lo chuan a bu nghauh nghauh a,kal dawna a phur nen ka khawngaih reuh hle.A piten hria se an khawngaih ngawt ang chu an tupa duatlai kha a ni miau a.


"A rui a ni maw,kan tlangval chu,"driver chuan a chhuah dawn chuan a rawn ti a,ka va hawi phei chuan kan mit a in tawng fu chat a ka hawi sawn rang hle."Umm,a rui a nih hi,,a zia lo tak tak,"ka ti bah nawk.


Kan chhuk tur pawm ka tum chu min luahkhum ta mai,a van zia lo thei tak."Ti khan a thawl deuh hawk zawk ang,khawiber nge in bag khah?"titu chu driver kha a ni. A kal daih tawh emaw ka ti a,hnunglama chuangte ho chu an lo chhuak fel der tawh.


"Maw?"a thil min zawh avang chuan ka ti haw a.



"Inthlak i duh em?"tiin ka kawr hma chu a melh zeuh a,ni dawn tak ka kawr hi ka thlak lo a nih chuan ka rimchhe vek ngei ang. Bawihpuia pawh thlak a ngai dawn hrim hrim,ka bu nghauh.


"Bag rawng?"tiin a nui leh suk.


"A..ah..a senduk kha aw,"ka tih chuan a bu nghut.Bawihpuia chu ka chhuahpuia vantlang zunin lo awmah chuan ka luhpuia a kam chu ka ṭhuah tir. Ka rawmawl ah lai chu tihuhin a kawr chu ka hru thuak thuak a,keipawh chu ka inhrufai nghal thuak thuak.


Sumoa kan let leh chuan driver chuan kan bag a lo la thla der tawh.Bawihpuia chu ka thlak sawk sawk a,kan sira lo awm ve reng chu ka melh leh zeuh zeuh ṭhin.


"Tikhan lo inthlak rawh,puan i duh leh i zar mai dawn nia,tumah chuan an lo bih chuang lo anga mahse thil thleng palh a awm thei a,"tiin a lu a tuai vut a nui sak bawk. A hnungah chuan lutin ka inthlak a,ka inthlak lai chuan pawnah Bawihpuia a lo awm char char.
Mi tlawmngai 'A ngai lo,'han tih deuh ṭung chi a ni si lo a,ka lawm rual rualin ka inthlahrung viau.


"Bawihpui,a hrehawm i la ti em?"ka tih chuan lu a thing nar nar,a rui a sawi thiam si lo khan 'A nuam tawh lo e,' a lo ti ngawt ṭhin kha a lo nia,a tie khan ka lo hrethiam chiah lo a,a van at theih tak."Ka lawm lutuk aw,"driver bulah chuan ka ti ngawt a,"A ho lutuk engmah a nih loh kha,"tiin min chhang a.Kan bag pawh chu min dah chhohsak leh nghal vat.



Shirt var a ha a,kekawr bul dum tak ṭha zet a ha bawk. A la upat lutuk hmelloha a sam chu a buk deuh lam a pawl lek lek. Nipui sen sa hnuaiah pawh hmuh a nuam hle. A..eng hi nge maw ka ngaihtuah ṭhin ni,hmanhmawh lutuk kher lo tur chuan min hrilh a,a hnuah chuan a bo daih ka hmu zui tawh lo.


Hmanhmawh lo turin min ti mahse nuam ka ti chiah lo,midang kan tikhawtlai vek ang tih a hlauhawm,ka rilru a hmanhmawh hle. Bawihpuia lah ei hmanhmawh rawh tih ringawt chi a ni hek lo,amahin a ei thiam tawh zawk a,a zia deuh hlek zawk.


"Tlangval kha ei rawh hei hi a lum emai,"kan lampan chuan driver chu a rawn phei a,Bawihpuia chu vur sen a lo ken sak."Aih,a ngai kher lo pe duh suh,"inthlahrung ru tak chuan ka lo ti a.


"A laklawh lutuk a,ka thil leinaah.Kha la rawh,"a tih chuan Bawihpuia chuan a la vat a."Ka lawm e,"chuan hrilh ngai hauh loin a ti ve thlap.


"Motor ruih te chu a pa loh thlak emai,mipa nih chuan motor te mai mai chu ruih loh tum tur aw,"a tih chuan Bawihpuia chu a bu nghauh nghauh,kan thil eina man chu ka pe vat a.Kan va phei chuan an lo la hman kim lo a,ka thawl deuh huai mai.


Kan tlanchhuah leh pawh chuan Bawihpuia chu a zia deuh tawh aniang,a hma angin a zawi tawh lo a ṭawng leh barh barh tawh. Driver nen chuan an titi hi a ni ber,driver chu ka va en leh zeuh zeuh ṭhin a,Bawihpuia ṭawngkam hman vang chu nge ni a nui leh suk suk ṭhin.


Ka ruihlohna damdawi ei chu a thawk ṭan a,ka mut chu a chhuak tak zet.Kan hla ngaihthlak chuan mut a tichhuak zual,hnunglam ho aṭang pawn titi bawrh bawrh peih an awm tawh lo,khua a lum bawk sia an mu ve a nih ka ring. Bawihpuia chu min ngheng chialin a mu bawk.



"Saii,Sairinpui,"tia min rawn ko tu an awm chuan ka harh zawk,ka awmna ka hai emaw ka tia mahse kan haw mek a ni tih ka hrechhuak zawk.Min rawn ko tu pawh kha kan driver hi a ni."Thenzawl kan lut deuh chiaha i thil pek tur kha,"ka va melh chuan a ti a,ka lo theihngilh leh hman tawh.A va han haihawt theih tak.



U Hlimpuii chu ka call a,min lo chang turin ka ti a.Kan unaua upa ber a ni a,Thenzawlah pasal neiin tunah chuan fa pawh pahnih lai a nei ve tawh.An rawn zin khat bawk a,ka hmu chu a a hma aiin a thau leh tawh,pasal neih a ngeih kung kung em a ni.


Driver bulah chuan lawmthu ka hrilh nghal luam,min hriatpui lo se zawng kei mi haihawt hian ka theihnghilh ngei ang.Khua chu a lum viau e ti lo chuan khua chu a dur deuh khuih mai,ruah a sur ve tawh dawn pawh a niang.Ka ngaihtuah lai tak chuan "Ruah a sur ve tawh dawn aniang,boruak a uap emai,"a rawn ti sup.


"Aniang,a nuam daih zawk ang.Khaw lum lutuk pawh hi a zia hawk mai ang,"ka ti a,ka dak nghal veuh veuh.Bawihpuia chu ka ena a la mutui ngang mai.Titi pui chu ka tum ve lutuk mahse kei ṭhenrual pawh kawm thiam lo tan chuan sawi tur vang tak a ni.


Hriat loh karin Lunglei kan lut der,nidangah lem thleng vat vat ila ka ti ṭhin a. Vawiin chu kalkawng chu a tawi hle in ka hria.Venglai traffic point chhaka sumo stand ah chuan kan chhuk a,ka nute chu kan thlen tawh thu ka hrilh a. Venglaia awm tho kan ni a,kan in pawh chu a hla hran lo hle mahse rickshaw chu ka la ta tho.Ani hi ka rilruah a awm reng dawn tih chu hria ila vawikhat tal a hmel hmu turin ka hawi let leh ngei ang.


Ka ṭhiannu ka kawm ve ber Mawitei bulah ka thlen thu ka sawi chuan a rawn lang vat,anni nen hian tette aṭanga in kawm kan ni a,kan inkawm deuh chawt bik.Kan in hi a in hnaih ve thawkhat tak chu a ni kan in inkarah


"Lalsai,i thil min rawn hawn chu?"a rawn ti nghal chul,ani hi chu khawi hmunah pawh awm se a awmna chin hi chu hriat a awlsam lutuk.Ka u te nupa,Bawihpuia leh kei chauh kan nih avang chuan Mawitei chu chaw eiah kan sawm a.


"Lalsai,chaw eiah min sawm te te a thleng min sil tir velah,"khuma phone ka khawih lai chuan a ka hnunga min rawn beng pawp chuan a ti a."Ka zin hi ka chau a lawm bakah nangmah a nih kha thleng ka lo sil ang ti,"ka tih chuan engah mah a ngai tawh chuang lo,ka thusawi pawh chu a hriat pawh ka ring chuang lo,a phone a bih leh ngar ngar tawh.


"U Lianmawian a lo be leh tawh che law,a duh ve ngawt mai che.Duh ve mai la,"ka phone chu rawn bihin a ti a,ka tum nghal bar. U Lianmawia chungchang chu sawiin,a fak leh nghal char char,ka ning lek lek a ni.


"Jimmy nen in inṭhen aṭang khan tumah i be tawh ngai lo a,mipa zawng zawng an in ang vek lo a,"a ti leh nang nang.Ni e,Jimmy tih loh kha chu ngaihzawng ka nei tawh lo hrim hrim. Engmah min hrilh loin a bo vang vang a,kum khat dawn hnuah nupui a neih tawh thu min lo hrilh hlawl.Ka ngaihzawng neih hmasak ber a ni bawk a ka la na viau.Ngaihzawng neih kual vel ka peih tawh lo a,zirnaah ka rilru ka sawrbing ta ngawt ngawt chu ania.


U Lianmawian min rawn biak chuan mak tak maiin vawiina sumo driver kha ka rilruah a lo lang tlat a.Ka tum reng vang ni hauh loin ka lo ngaihtuah zui vawng vawng.


"Ka biak che chu,a mak,"Mawiteii chuan a rawn ti hlak,ka ngaihtuahna aṭang ka harhchhuak nghal zawk.Vawiina sumo driver vel chu ka hrilh a a chek tlat tlat.


"Nupui a nei tawh awm e,tlangval ni se a khalh peih pawh ka ring lo e a. Bakah ka zin ngun e,chutianga chhelo an awm pawh ka hre lo. U Lianmawia hi a ṭha fe zawk ang,"a ti deuh tlat. Sawi zui duh tawh lo chuan,ka ngawi ta hmiah a mahse ka mitthlaah te chuan amah chu a lo lang zut zut. A van zah loh theih tak,mi pa a lo nih hlauh phei chuan tiin ka lu ka thing nak nak.


~~~


Kan Kohhranin MṬKP inkhawmpui kan dawl dawn a,han tel ve pawh ka tum loh nen Mawiteii leh U Lianmawia min rawn sawm ve ṭhin avangin hnatlang leh hla zirin kar khat dawn lai ka chhuak ve hman,kan inpuahchah nasa ve hle bawk.Biakin kan sak zawhna a la rei lo bawk a,a nuam ve reuh hle.Mikhual pawh kan bial ho bakah Rahsiveng lamah an sem darh a,keini pawn mikhual pahnih lai kan nei.


Nizan lamah inkhawmpui kan ṭana,zanah kan usher a. Sunday zing inkhawmah erawh Lalmawitei nen chuan refreshment lam buaipuiin kan awm ve ta daih.Tlanboin refreshment lam kan pui a nih ber chu,usher ai chuan nuam ka ti fe zawk.


Inkhawm ho chu an rawn bang sang sang a,mamawh vel lain chokaah ka tlan lut sek leh nghal."Kan nula mawng zang tih takah hotupa chuan a tir kual zat zat che a ni maw?"kan ṬKP President chuan a rawn tih chuan ka nui ṭha ringawt.Chawhnu inkhawm ve ngei a ngai leh dawn a,U Lianmawia chuan "Nangni pahnih chu in lo tlanbo a ni maw?Zu inthlak leh lawk mai ru,chawhnu programme lamah in usher mai loh chuan,kan indaih dawn lo,"kan no sil lai chuan a rawn ti a,chawhnu programme ṭan nan darkar khat pawh a awm tling tawh lo ania,a chhuah hnu chuan Mawitei chu a phun hlak hlak."Nangmah vang vek,"tiin min la mawhpuh vek leh nghal.


Chawhnu Programme a zawh meuh chuan ka chau tawh hle,Biakin kawtah chuan kan zi hut hut mai,Mawiteii zawnga ka kal tur ka hminga min rawn au tu an awm tlata ka hriat avang chuan ka hawi kual a,mi an awm deuh huai huai avang chuan ka hmu mai lo.Kal leh mai ka tum a mahse ka hminga min rawn ko tu vang chuan ka ding chat.



"Sairinpui,ka hmu ta che,"ka hmaah chuan tun thlenga ka rilrua cham veng veng ṭhin,ka sawi chhuah ngai hauh loh kha nui sukin a ding. Kha sumo driver kha!Ka hmu thut chu sawi tur pawh ka hre lo hle,amah bawk chu a rawn ṭawng leh.


"Ka hmu ta che,"a rawn tichhuak leh sap,kamis var a ha a a ban chu a tawm chho deuh bawk. A landan chu smart lutuk chu a ni lo mahse a inhmeh lutuk tlat."Engnge hetah i lo tiha ka zawn nasatzia che,"Mawitei ka bula rawn kala a tih chuan ka harhchhuak zawk,ni lo ka hmaa mipa min melh reng tu pawh chuan aw a thian kharh kharh.Mumang ram aṭang kan harhchhuak ve ve a ni.Mawitei lah chuan kan hmaa mipa chu a en uluk kher leh nghal. Ni e vawikhat en thuak atan chuan a uiawm mah mah,a theihloh hial zawk ang chu.


"Ka hmuh che pawh ka ring lo a,a van mak teh thut ve,"tiin ka hmaa mipa chu ka bia a,a nui suk. A biang dinglam sira khuar deuh kek chu chiang lutuk lo mahse ka hmu fuh leh ngang mai.


"Chawhma khan ka hmu thuak che a mahse ka en leh khan i lo awm tawh si lo a,ka hmuh sual che a nih ka ring zawk a,"a tih chuan ka nui sak. Kan titi ti ila,rei tak chu a ni lo. A tlai tawh avang leh ṭhianpa ni ngei tur a ni,mipa pakhat chuan a rawn au a,zana inhmu leh turin kan in mangṭha,kan in awmna pawh min zawt,chipchiar deuh takin ka hrilh.A hming pawh ka hre tawh,a hming chu Dika,Rindika a ni.


Chutia ani ka hmu kha ka sawi thiam chiah lo,ka hlim lutuk a ni berin ka hria. Keimah hi ka zang vah mai. Mawitei pawh chuan thil awmdan min zawh chuan chipchiar takin ka hrilh a,ka vei ruk ve dan thlengin.Mawitei pawh chuan mak a ti hle,dawt ka hrilh emaw a ti hial mahse dawt ni loin thudik ngei a ni."A mak e,"a ti chhen,a ṭhiannuin mipa vei deuh ka nei chu mak a ti nge khapa kha a rin aiin a chhelo a mak a ti zawk pawh ka hrethiam lo.



Zan inkhawm kal tur pawh chu ka phur viau a,diktaka sawi chuan ka hmu leh chak reng.Kohhran zaipawl kan zai lai te chuan ka zawng ru deuh a,ka hmu lo. Mahse inkhawm ban chuan Biakin kawtah chuan ka hmu leh hlawl.


Mawitei chuan nachang a lo hre hlauh a,thingpui in tur chuan a sawm a. Chutianga tlaichhe zawk zawk a la ni lo bawka tiin a ṭhianpa,a thlenpui pa nen chuan kan inah kan in zui lut ta a.Kan hlim hlawm dar dar hle,ka phone number min dil te chuan keimah chu ka lo hlim daih zawk.



Rindika nen chuan kan in be ta zeuh zeuh a,in hmu thei lo mahila nuam kan ti tho.Kei ai chuan a upat ka ring mahse a kum zat a sawi duh lo.Ka zawh apiangin ti ahian min chhang ṭhin,"Nupui nei rual,"tiin,chuan tlangval a ni ngei bawk.Refreshment lam kan puih lai khan an lo zai a,inkhawm pangngai i lang chuan keipawhin ka lo hmu ve ngei tur kha ania mahse a hnuah kan inhmu ta tho a,a pawi em em chuang lo.U Hlimpuii thil tur kan dah a,ka hming an ziah tel a hmuh avang kha a nia ka hming a lo hriat em em. Kei lah chuan mak tihna pawh ka lo nei der lo leh nghal a.


College kan ṭan hnu chuan kan inhmu ta zeuh zeuh a.A ṭawngtam lutuk lo naa mi tih hlimdan a thiam a,fiamthu a duh lutuk lo naa mi chu a tinui hnem thei hle thung. Inngaizawng chiah lo mahila ka rilrua vei reng tur khawpin zu han awm thiam a!A chang chuan a ngeiawm letling zawk.Chhunah min lo be ngai lo a,a service ṭhin vang a nih ka ring. Zanah pawh a ninawm lo tawk chiahin min be ṭhin.



Tlai khat chu kan class bang chu bike min rawn lama kal duhna a neih thu a sawi.'Nangmah in kal ve mai la,"tiin ka phun nang nang engmah a sawi chuang lo,ngawi rengin a bike chu a khalh mawp mawp.



"Tinge vawiin chu i service nange?"ka tih chuan a nui sak,ka be ṭawng zo lo.Kan kalna tur ka zawh lahin min chhang duh der si lo. Ngawi reng chuan ka ṭhu ta hle hle,ka chunga thil ṭha lo ti duh tur khawp a sual a ni lo tih he thlahnih chhung lek hian ka hrechiang tlat.


A bike a tihdin chuan ngawi rengin ka chhuk thlaa,ka kutah chuan min kai a.Building pakhat chu kan pan ding bikin ka hria,ngawi rengin ka zui tawp.



Inchhungah chuan min luhpuia tumah an awm lo."Hlauthawng duh suh,thil hrilh duh che ka neih vang ania hetah ka hruai che," rawn ti a,ṭhuthlengah chuan min nam ṭhu a,ka hmaah chuan a ding run. A thusawi chuan min ti hlim a,min ṭhawng a,awmdan min ti thiam lo.


"Ka nghak rei tawh lutuk che,i inpeih tawh ang tiro?"a rawn ti chhuak sup,mit khap fak fak chuan ka en ringawt.


"Khami ni aṭang khan ka rilruah i awma,ka hmuh leh che kha ka beisei ṭhin,ka zawng che ti ila ka tisual lo ang mahse hmuh che a harsa tak zet.Inkhawmpui khan ka hmu hlauh che a mahse ṭan ka la nghal thei bik bawk si lo a.Mahse tunah chuan ka nghak thei tawh lo,"a thaw deuh hak,amah ang lo takin a zam ve hmel,thutak run bawk si a,ka nuih a za tlat ka insum zo lo.


"Sairinpui,engmah nuihzathlak ka sawi loh chu,"a ti deuh hmuk. "Ka rilru put hmang ka sawi ve a,engnge i lo nuih mai mai,"a tih chuan ka nui tawp ria ria,keimah zawk chu ka zam daih.



"Chuan.."lai deuh tak chuan ka ti,hetiang hian sawi kual duah lo se ka awm thiam zawk ang mahse a thusawi chuan min ti lawm tho bawk si. Sawi tur pawh ka hre ve lo."I ṭhiannu kha chuan a sawi tho a,ngaihzawng i neih duh loh chhan,chuvang ania ṭhian angin ka biak che,"a rawn ti sup,Lalmawitei mai mai mai chu(h).Mak takin Rindika hi chu a danglam,ka ring bur a,ka rin sual ka ring lo bawk.



"Chuan i duh lo tihna ami?"a tih chuan "Ka duh lo ka ti ami?"ka lo ti vin hlar,a ṭhen deuh sak a. "A ṭhat nasat chu,ka nupui tur i ni nghal.A tlai tawh emai ka thlah ang che,zanah kan sawi chhun zawm leh ang,midang tan chuan ka phal lo che,"a ti a. Bialnu pawh ni loin nupui tur maw? Midang chu nise zak thei lo ka ti viau ang.Ani hi keipawn midang ta ni tur chuan ka phal bik lo.


Kan hostel kawtah chuan min drop a,min thlah fo mahse vawiin chu nidang a ang lo.In melhin kan nui dun leh han ṭhin,kan hlim ve ve a ni tih chu ralkhat aṭang pawhin an rawn hmu thei ngeiin ka ring.


Zanah chuan status a rawn up ve ngei,ka seen vat. Jt a hla "Kan in tawhna lamtluang a mawi vang em ni?Heti taka i zun a ka uai hi"tih lai chu a ni a,ka nui nghal ver ver. A mak ka ti.Kan inhmuh hmasak ber aṭangin kan lo induh ru ve em em a. Heihi em ni LOVE AT FIRST SIDE an tih fo chu?


A call a rawn lut nghal zat a rei fe kan inbia.
"Naktu i service dawn em?"ka tih chuan a nui ri deuh suk chu ka hre thei.


"Engnge?"ka ti ha



"Hmani kha chu ka cousin ai ka rawn service a nih kha,a nupuiin naute a neih avangin,"a ti a,a hma khan dawt min lo hrilh ṭhin a ni maw. "Vawiin i tluang em?"tia ka zawh ṭhin pawn 'Aw' a ti mai zel a,a va han sual mai mai tak.



"Hey,i thinrim ami?"a rawn tih chuan ka thinrim loh thu chu ka sawi a.An Veng private school-ah a thawk ve hi a lo nia.Kan in tawn dan teh nuai hi a mak,a cousin nupui khan nau nei lo tase kan in tawng awm tawp si lo a.Bakah inkhawmpuinaah mi tam tak karah min lo hmu leh chiah bawk,Sumo driver ka lo vei ṭhin em em kha sumo driver a lo ni leh der si lo.


Rindika nen chuan kan in zui ngawrh hle,kan intawn dan a mak thu chu ka sawi fo a,sumo driver a ni lo tih mak ka tih thu nen chuan."Sumo driver ka ni lo chu a pawi viau ami?"a tih chuan lu ka thing nak nak.



"Ni lo mahla,KA THINLUNG SUMO DRIVER i ni tho tho,"ka tih chuan a nui suk. 'KA THINLUNG SUMO DRIVER,'tih sawi chuan a phun ve sup.



"Kum khuain ka ni reng ang,ka nupui i nih hnuah pawh i thinglung sumo driver chu ka ni reng ang,"a ti sup a,min kuah vang vang. Ni e,a ni hi ka thinlunga awm reng tur KA THINLUNG SUMO DRIVER a ni reng ang.



~A tawp ta~



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)