LIANDINGPUII-2

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

LIANDINGPUII-2

Unread post by Rohlupuia Renthlei » April 29th, 2021, 8:17 pm

LIANDINGPUII -2-




Ka rin ang leh beisei angin engmah a kal hlei thei lo. A chângin thinrim takin ka insawh a, a chângin beisei nei takin ka mit ka len vak vak a. Facebook a "Liandingpuii" tih hming ka hmuh theih zawng zawng ka en zo a, tumah reng reng chuan amah an ang lo mai ni loin, kha tleirawl, A siamtu chawimawi nâna Biak In Pulpit aṭanga phar harh harh chunga a che vel lai hmel kha an phawk zo lo. Kha nu, nge nula zawk, LIANDINGPUII hming ka zuk chhiar ta kher kher chuan min va ti buai em....!



Nikhat chu, ka office bâng chuan hliam tuar LIANDINGPUII zawk chu ka ngaihtuah chhuak thut a. Motor lam pan ta lo chuan, accident ka buaipui na hmun lam pan chuan ka phei ta ngawt a! Sikul naupang an bâng zo tawh a, lirthei tei vel leh ke a kal hmuh tur an awm zeuh zeuh chauh a ni. Hliamtuari lo ṭhutna hmun chu ka thleng a, a sir a waiting shed ah chuan thawk lain ka ṭhu ta vang vang a. Zial tlawn khat ka zu zo, haw mai tuma ka thawh dawn lai tak chuan chu waiting shed hmaah chuan Scooty a rawn ding dawt a.



A helmet a phelh lèm loh avangin chiang takin a hmêl ka hmu thei lo a. A landan maiah chuan, mizo nu tawk tak, pian nalh leh dik thlarh hi a ni reuh a. Ka bula rawn kal pah chuan a helmet chu phelhin, a chalsam tla a'n hui kiang chiah chu ka phu zawk mai!


"Liandingpui"


Mi rawn melh zawk a, a nui ta var var a.


Amah vek chuan, "Hmuh i va har ngat ngat ve le...." tih pah chuan hlim hmel tak hian a nui vawr reuh a! Chutah chiah chuan ani, ka harh tak hawk chu.


"Hei....nang hi, i ni tiraw? I ni chiang lutuk!" ka'n ti chiam pek a! Nui hawk hawk chungin min thlek hâ a, "eng chu maw....? Damdawi in lama i buaipui chiam kha ka nih hi.... Hmuh leh che a, lawmthu sawi tumin helai hmun hi a khat tawkin ka tlawh fo mai." a tih seuh seuh lai chuan ngawi rengin ka lo en tlawk tlawk a!



A thusawi chu chiangkuangin ka hre reng reng lo. Ka hriat chhun chu Baptist Central Church, Upper Republic a ban phar a, "Kan dam chhûng nite chhiar dan tûr min zirtir ang
che, Finna thinlung kan neih phah hialna tûrin." tia, thinlung leh tihtak zet a ban a phar hmêl kha ka hmu a!



"Mawh, ka lawmthu sawina hi min pawmsak rawh...." tih paha a kut a rawn phar chhuak chu thlek hâ in, "Engtin maw...?" ka lo ti chiam a! A hrilhhai hmel ka hmuh chuan, a thusawi awmzia chu ka hrechhuak zawk a. Sehchilh deuh nak hian, "Lawmthu sawi a ngai love, Nunpuia ka ni e" tiin a kut chu ka lo vuan a. Hrilhhai taka min thlek hâw lai tak chuan,



"En teh, hman a Central Church a KNP Khawmpuiah khan Recitation i sawi tiraw? Sam 92 na a nih nghe nghe kha!" ka lo ti daih a!

Hmai sen ap ap a min en chung hian, "awi leh...." a han ti chhuak hliai a! A mit a chhing vang vang a. Chutihlai tak chuan ngun takin ka lo en reng a. A hmel hmai, engkim mai chu a fuh vel vek ni mai hian ka hria a! A hmui pet fan fanin, "U Nunpui" a rawn ti chhuak hluai mai a. A thaw zui ham ham a!

"Kha maw....I ni chiang alawm, engtin nge dawmdawi inah khan ka hriatchhuah loh zawk che le?" ka'n ti deuh hluai a. Ngaihtuah thui fê ni awm tak hian a chhing leh vang vang a. A ṭawngkam chhuak changin ka lo nghak reng a. A tawpah chuan,


'U Nunpui, min ngaidam rawh, ka lung i tilêng em mai' tiin ngawi rengin a chhing vang vang a. Ngaihṭha lo zet chuan ka lo thlir reng a. Rei vak lo hnuah a mit tlâng chu a rawn phu zaih zaih a. A thaw deuh huai a.


Ngun zetin ka lo en a, aw....a hmui, hnawihsen chawp ngai hauh lo a vam ham mai te, a biang vei lama biangsum val kalh mai te, a khabe kual, a hmai nena in chawih êm êm mai te chuan mit a va ti tlai si em! A thawk lak zawnga a awm bawr han in sép pawng leh dat ṭhin te chu hmuh hmaih chi rual a ni lo. Hun rei tak rilru mumal pu thei lova min siamtu chu, chãn loh khãnah kan intawnga, beisei loh tawp hmunah kan inhmuin kan ṭhu dun ta mai chu a nia!



Amah vek chuan, "I phal chuan, i phone number min lo pe la" tih pahin a thaw hawk a. A bag zen rak rakin a phone a rawn phawrh a. Engkima a bul ṭantu tur leh, hma hruaitu zawk ni tura ka inngaihtuah laiin, ka kha a chih zo a, ka lungphû-in min nawr dut dut ringawt mai!

Ka number pein, a number min pe bawk a! Harsa tih hmêl zet a thaw leh ham hamin min thlek haw a! Ka kawchhung chu lum pup pup-in, sawi duh nei, sawi mai tur hre si lo chuan ka hamhaih ngei mai.


Mahni tawka in la luck ve tak, nula ngam tawk chauha lo ninhlei ve zeuh zeuh, pa riau a in hre ve intih nak laiin, KNP Member, tleirawl chhuak hlawt ka ngam loh kha, vawiinah hian ka lo la ngam chuang reng reng lo em ni zawk? 'Chu zawng, a ni thei lo, chutiang mai maia hun khawhral tur ka ni lo....' tiin ka inpet ruh ṭeuh a!



"Dingpui" Ka aw chu a ri chhuak chàng chàng emaw tih mai turin a thâm chal a! Rawn hawi pahin nui sâng hian a han méng pual rawlh a! A va han hmuhnawm chiang tak em!

"Hun rei tak chu nangmah zawn nân hian ka khawhral tawh asin!"

"Engvang chuan maw?"

‌"KNP khawmpui, kan vênga in neih ṭuma kan in chibai a, Rinhlûa zara ka hmêlhriat che aṭang khân, hmuh leh che beiseiin ka mit leh beng ka chhi renga. Damdawi ina i hming ka hmuh aṭang khan, nasa leh zualin kha tleirawl zawnchhuah chakna khan min bual a. Engtin tin emaw hei kan inhmu a, mi hrang emaw ka tih kha mi pakhat in lo ni reng a! Ka hamhaih chhe der chu a nih hi."



"Awi, ka lung i ti leng em mai, sawi tawh rih lo ang. Min ṭanpui nasat zia kha, lawmthu hrilh che ka duh vangin ka zawng ve ngat ngat tho che a nia. Kan Inah la rawn lêng ngei ang che," tih pah chuan a tho uaih a.



"Ka no.i neih kha, kan in be dawn nia....Min rawn tlawh ngei ngei ang che aw. Tunah chuan, ka hmu chhuak tawh che a, remchâng hmasa berah lo lêng ngei ngei ang che...." tiin a tho ta tharh a.



Tum loh lutukin, a ruka lo inzawng ṭhin, inzawn chhan erawh hrang hlauh si chu kan intawng leh nawlh a! "A vawili na ah meuh chuan, engkim ka sawi thei tawh tur a ni" ti chungin In lam ka pan ve ta a!


(Dingpuii)


Nula, puitling, mi tam takin senior hmuhin min hmu ṭep....Mizo HSS aṭangin pawl 12(Commerce) ka zo a. Chumi hnuin Kolkata lamah zirna chhunzawmin ka liam thla leh nghal a. M.Com thleng ka zir hnuin Mizoramah bawk kir lehin, sumdawnna bul ṭan tumin ka inbuatsaih a. Thil ṭul leh pawimawh hrang hrang buaipuiin ni tin ka chhuak ṭhin a.


Ṭum khat, tlailam panga ka chhuak tur chu, kawnga sikul naupang tlai sikul bâng, lo kal khawm lêt lêt hel tuma ka kawi kha, control hlei thei loin ka tlu ta zawt mai kha a nia! Ka chal ka sawhna chuan ka lû ti haiin, ka mit deuh salh salh a. A hliam ka han hup chuan, ka hup phui thei ta der lo. Naupang ho chuan min buaipui ve tak na a, engmah tih leh tur chuang hre hek lo. An sira ka ṭhut vang vang lai chuan mipa pakhat hi lo pheiin, min rawn buaipui ta sawt sawt a! Damdawi In thlengin min hruaiin min buaipui vek a. Damdawi In khuma ka mu, ka han harh hlawl chu, ka phu zawk mai!


Min buaipuitu pa chu ka lam panin a rawn kal a, ngun taka ka en chuan, engemaw hriat chhuah, chiang taka hriat theih si loh ka nei a. Min mawlh tlat tu chhungril ah a awm tlat a. Ka buai ru kher mai. Mahni inbuaipui thei ka nih tawh avangin haw turin kan chhuak a. In ka thlen a, ka chhûngte bula thil thlen dan ka sawi hnu chuan ka room ah lutin ka ngaihtuah zui chiam a.



Hmuh leh a, lawmthu sawi ngei tumin hun remchâng ka neih phawt chuan ka mit ka len nasa thei ngang mai. Tlaikhat ka sumdawnna tur thil buaipuia ka chhuak chuan, ka chetsualna bul vel chu ka va fang a. A bul mai waiting shed a mipa lo awm chuan ka mit a la kher mai. Min buaipuitu kha a nih piah lamah, hmuh tawhna nei tlata hriatna ka nei a. Ka chiang lo ruai mai.



Zahtheih loh chhuahin ka va pawh a, lawmthu sawi tura kut ka va phar chu min chhang lawk lo lehnghal a! Ka hmingpum ngei maia min han ko te, Sam 92 na a rawn sawichhuah te chuan ka chhungrila hnawk awm chu a kiang ta duak mai! Min man chhuak ang tih hlau ru tak chungin zahtheih loh ka chhuah zui ta a nih kha!



Ka dawhkan sira ka Holy Bible, ka keuna chin ka hriat tawh loh chu ka ban dâk dâk a. Sam 92 na keuin, ka chhiarchhuak dap a. Chaw ka la ei lo tih hrechhuakin Choka lam ka pan ta a. Whatsapp te en pahin, a no.chu ka hmet chhuak leh ṭhin a. Biak hmasak chu ka inthlahrung ru ta riau a. Min rawn biak hun ka nghak ve ta ringawt mai a ni.



Ka lehkha zir chhung khan, ngaihzawng nghet tak nei lem lo mahila, mi hrang hrang nen chuan kan ni ve hman nual mai. Mahse, tute mai pawh khan ka mamawh tak hi an nei lo nge ni, kim lo riau hian ka inhre tlat zel a. Rei tak in zui thei loin, ka hne nghal zel ni berin ka hria!



Ṭhenkhat chu ka tisa mawina duh vang te, ka neih ei duh vangte emaw, midang runluihna tur a min kawp ni te hian ka hre fo a! Hlim ni nei ve ṭhin mahila, ka nunah khan kim lo awm tlata hriatna chuan min chenchilh leh ṭhin.



Khatia vanduaina ka tawh a, U Nunpuia nen kan insawi pawh hnu khan, kha keimaha kim lo kha bo ta duakin ka hria a, a ruka min delh tlattu chu kiang ta huai hian ka hre nghe nghe a ni. Nge, ka ngaihbel vang zawk. Hunin engkim a la hril ang chu!

(Story hi ka ziak fo a, mahse, puitlin hlei thei loin ka awm fo mai. Tun ṭum ah hian bul ka'n ṭan leh ngawt a, engtin tak khawr pum ang i maw! A chhiartute kutah 80% vel chu innghatah ngai ila. Tin, tunlai story ngaihnawm tak takte nen a in ang vak lo mai thei a, local lutuk....ti in lo awm a nih pawhin, ka hrethiamin ka pawm thlap mai. Keimah pawhin chhiar fo atana ka duh leh ngainat ber ṭhin, Mizo Thawnthu, changkang lutuk lem lo hian ka lung a ti leng ber miau mai.)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)