LIANDINGPUII-1

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

LIANDINGPUII-1

Unread post by Rohlupuia Renthlei » April 30th, 2021, 8:26 am

LIANDINGPUII

Rpa Renthlei

Bung-1-na


Dingdihlip deuh ak ak chungin, sikul naupang, uniform ha lo bial lât lát leh, a sir a Scooty lo let ngât chu ka en a. An sirah chuan hmeichhe pakhat hi chal dawm vawng vawng chungin a lo ṭhu kun lap a! Buaipui tu nei lo ni awm tak chuan a lo ṭhu khur hlak hlak a! Inthlahrung tak chungin ka va pan hnai a.

"Enge ni thil awm zia ka pi?"tiin ka va zawt a. Che sawn chuang hauh lo hian min chhan tumin a ang zuau a, a luhai niawm tak chuan a mit a chhing sawk a! Buaipui vat loh chuan a thisen chhuak chuan a ti buai zual dawn niin ka hria a. Naupang ho chu thil awmzia ka zawt thuai a. Min lo hrilhfiah hnu chuan Scooty chu kawngsirah ka hung ṭha a,ka motor, hnung deuh hleka ka hun fel chiah lam pan chuan chu nu chu ka kuah phei a. A kal tur chu a ṭhu hnawk a. A zaka kuahin, ka pawm bet hman hram a.


Naupang ṭhenkhat chuan min rawn pui a, motor ah chuan kan zawn lut ta a. Mipa fel deuha ka rin chu min pui turin ka sawm nghal a. Damdawi in lam panin kan tlan ta nghal a. A lu aṭanga thichhuak chu naupangin rawmawl hmangin an hup nghal a. Hmanhmawh tawkin Casualty ah kan luhpui a. Doctor ten an lo en zung zung a, a lû a hliam chu an ṭhui thuai a, thi chhuak pawh a tawp nghal bawk a. X-Ray ti nghal turin X-Ray room lam kan pan nghal bawk a. Chumi hnu chuan, a ṭul angte kan buaipui zawh hnuah, naupang ho chu lawmthu hrilhin, Taxi fare te ka pek hnu chuan an haw ta a.

Casualty hmuna inthiarna ah chuan ka kuta thisen kai liai luai te chu ka va sil thuak thuak a. Khum lam pan chuan ka phei ta a. Chu nu/nula chu a lo muhil bam a. Tih harh hlau tak chuan Doctor hnenah, result ngaichangin ka phei ta a. X-Ray result a ṭha a, a lu hai nasa lutuk a reh chuan, pangngai taka a awm mai tur thu min lo hrilh a. Doctor hnenah chuan a Scooty ka va lam sak tur thu leh ka lo kir hma a a lo harh pawhin, min lo nghak tur chuan ka chah ta ngawt a!

Pawna ka chhuah fel chuan, Office a ka file theihnghilh lam tura let leh ka ni tih ka hrechhuak zawk a! Kan office bul maia chetsualna tenau thleng avang chuan ka thil tih tur ka theihnghilh chu ka hrechhuak zawk a. Scooty chu a lo la ding fel at a. Hospital lam pan chuan ka khalh phei ta a.

Casualty ka va luh chuan kan dam lo pawh chu khumah a lo ṭhu fel at a. Inthlahrun hmêl takin min lo melh zawk a. A hming hre hek lo i, "Ka pi, enge i an?" tia ka va biak chuan, sen ap apin, "Ka ṭha e" a lo ti ve mai a. Lehkha pawimawh te kan tihfel hnu chuan, harh pangngai tak in a awm tawh a. Doctor bula lehkha pawimawh leh damdawi chawhna ilo ka va lak fel pah chuan, lehkha chu ka bih zuai a, chuta ka thil hmuh chuan min ti ding chawih nia! LIANDINGPUII!!!

A Scooty ah chuan thil pawimawh te dahsakin, an damdawi chawhte chu ka va lei fel a. A kuta ka hlan fel hnu chuan, kal sawn mai tumin ka inher a. Pen thum lo liam ka pen hman awm lo e...

"Hey....ṭhianpa...." tih ri vang chuan ka hawi let vat a. "Ka lawm e" a tih sap chu ka hre thei a, a purse dap a, pawisa min pek a tum tih ka hriat chuan, "Eng mah a nih loh kha....lo dam thuai rawh...." tih pahin ka inher a, ka motor dahna lam pan pah chuan, 'Liandingpuii' tih ringawt mai chuan ka rilru a luah ngut ngut mai nia!

He hming hi ka bengah chuan a mikhual miah lo. Ka han ngaihtuah leh vang vang a. Kum 2004, October thla a ni a. Chumi ṭum chuan, kum danga an tih ngai lem loh, Aizawl khawpui chhunga Baptist Kohhran a Naupang Pawl, KNP an tih te pualin, Inkhawmpui an buatsaih a. Central Churh in thlengin, Aizawl khawpui chhunga KNP member, Sacrament chang pha chin leh a zirlai mekte chu he Cetral Church ah hian an Inkhawmpui a ni.

(Baptist Kohhran kalphung hi chiangkuang takin ka hre lem lo a. Ṭhiante zawt chawpin, Kohhran pawi kan khawih loh hram beisei chungin a kal phung hi ka phuahchawp a. Kohhran pawi a lo sawi palh a nih chuan ngaihdam ka dil nghal e.)

Kan veng a nih avangin leh, ka ṭhian kawm ber mai hi Baptist Kohhran, ṬKP ah pawh an hruaitu te zing ami a nih avangin, kan venga rawn inkhawmpui ta chu, min phut ve nen, a hnung zuiin Pathianni chawhnu Inkhawm chu ka va chhim ve a. Hetah hian a ni ngat mai, he hming, a hming paper-a in ziak chauh ka hmuh pawha, ka lungphu zawng zawng a la danglam phah tak na ka tawn ni!

Recitation with action hmangin intihsiakna an nei a. A hnuhnung berah chuan "LIANDINGPUII", Zarkawt Kohhran a lawi chuan a rawn sawi a. A chevel leh a sawi thiam lutuk chuan min hneh ngei mai. Mit khap lêk lo hian ka lo thlir a. He thu ngei hi a ni a sawi kha!

Sam 90:1-12

Lalpa, nang chu chhuan zawng zawng chenah Kan awmna i ni thin.
Tlangte pian hmaa, Leilung leh khawvel i din hma pawh khan, Chatuan ata chatuan thleng pawhin nang chu Pathian i ni...

Kan dam chhûng nite chhiar dan tûr min zirtir ang che, Finna thinlung kan neih phah hialna tûrin.

Kan dam chhûng ni te chhiar dan tu min zirtir ang che....tih lai phei hi chu vawiin thleng hian ka bengah a la cham nia!

Ni e, a ṭhut hmun pana a kal te, a ṭhu, zak hmel taka a kun chal mai te kha mitthlâah a la châm reng mai. Inkhawm ban ruala kan lo chan dan te, kut thing meuh a ka lo chibai tak dan te kha ka mitthlaah a la châm reng mai. Chutiang ngaihtuah a, ka chhuikir fê hnu chuan,

'A ni kha, aw, khami ngei kha he Liandingpuii hi a ni ang, a aw tliang, thawp, thâm chal mai te kha!'

Ka phone phawrhin, ṭhianpa Rinhlua no.chu ka hmet chhuak a. Hun rei tak, eizawnna avangin kan in be mumal tawh lo tih ka ngaihtuah chhuak a. Ka va call ta a. Eng khaw sawi lo hian,

" 'LIANDINGPUII' ka hmu..." ka va ti thawr mai a!

A lo nui hawk hawk a! "Tu Liandingpuii chu nge maw i lo hmuh le, Zaithiam, Venghlui ami kha maw?" a lo ti let hû mai a!

"Hmelchhepa, chutiang a ni lo....Recitation sawi thiam kha...." tiin ka va hrawk chiam a!

"É hê, teh thut che chuan...."

"A chanchin i hriat ang ang min hrilh rawh"

Darkar dawn kan inbiak meuh chuan, ani hnen aṭang pawh chuan thil thui tak ka hre zui lo.

'Pawl 12 a zawh hnuin, mizoram pawnah lehkha a zir zawm....' tih zawng chu ka hriat theih chin a ni ta. Ka koah engkim a innghat ta a nih chu!

Khum ka pan a, ka mu thlawp a. Vawiina ka hneichhe buaipui hrep kha AMAH kha ni ngeiin ka hria a. 'Ka zawng chhuak leh ngei tur a ni....' ti chungin ka in let a, ka suangtuahna chu ka kawm zui ta daih a.

Kei hi Nunpuia ka ni a, tlangval hnahkhat niin, ka naupang chhe tawh lo viau a. Chhungte leh ṭhiante pawhin Nupui nei turin min kar fiam ve fo mai. Mahse, ngaihzawng te chu han nei ve ṭhin mah ila, nupui atan meuh chuan ka iai nge ni dawn, vawiin thleng hian ka la nei ta rih lo zel chu a ni a. Kum 30 mi niin, mizo pa-ah chuan a vantlang pawl ka ni awm e.


Hmelchhiat leh ṭhat thu hi sawi ngaihna ka hre lo. Min thlirtu azira chhe tak, ṭha leh pa lutuk pawh ka ni thei ve tho mai. Mahse, tu hmeichhia mahin, 'I hmel ṭha ka ti lo....' min ti bik lo mai thei. Ngaihzawng hrang hrang nei tawh mahila, rinaiin ka ninhlei lo phian mai. Hmeichhia, ka mutpui hnu....tia sawi tur pawh ka nei meuh lo chu a ni e. Chhungte zarah, MA ka pass hnu lawkin Sawrkar department pakhatah, Assistant atana lak ka ni ve a. Nupui te chawm theihna tawk chu ka hlawh ve chuan ka ring. Han chapopui tur phei chu ni hauh lo mahse, nei hlei lo, nghei hlei lo ang vel kan ni ang chu.

Hmabak ko tak, huphurhawm leh phurawm ru tak nei chung chuan, suangtuahna kawmin mut zai ka rêl ta a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)