LIANDINGPUII-3

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

LIANDINGPUII-3

Unread post by Rohlupuia Renthlei » April 30th, 2021, 8:12 pm

LIANDINGPUII-3

Rpa Renthlei




Hun lah hian tumah a nghak si lo! Zan khat chu, tih tur em em nei lova ka phone ka hmeh kual nuap nuap laiin, Dingpuii no.chu ka hmet chhuak a!


"Hiii...Dam maw?" ka'n va ti teh thawr a!


''Ummm....induh hle mai."


"Hna lam ṭul a na deuh a!"


"Hnar hnuaiah phatna a bo lo."


"Lêng ila...."


"Khawiah?"


"Tûmà chimbuai phak lohna hmunah."


"Chutiang hmun chu i hria ami?"


"Kan zawng ang chu...."


" Hmnnn, lo leng rawh...."


Nulâ tlangvâl, naupang lutuk tawh lo inbiakna atân chuan a ho ve ngawt mai! Ngawi rengin ka inkhalh chhuak a. Zarkawt kawn aṭang chuan ka phone a, minute hnih khat bak nghah a ngai lo. Kawngsir ah chuan a rawn chhuak chho hlawl a, hla deuh hlek aṭang pawhin ka hai lo chiang mai. Motor aṭanga chhuk in ka va pan ruak ruak a. Min lo hmuh chuan, an In lam panin min hruai ta a!



In pawh an nei pangngai hle mai. Keini ang duang tân chuan er tham fê a ni mai. A chhungte an reh deuh ṭhap a. Sitting room ah ṭhuin, tuisik in tur a rawn chhawp chu ka'n in khawlh khawlh a.



A ruk tak chuan ka hamhaih ve tho mai. He nû hmâah hian engti tiha zam tlat zel mai nge ka nih ka hrethiam lo! Ka ep chiahah rawn ṭhuin, eng eng emaw ka sawi luam a. Titi kâr lakah mit la lêk lo hian ka lo thlir leh vung vung ṭhin. 'Thlir tawh pawha thlir nawn ngai leh ṭhin' tih zawng zawng hi a nei zo ni ber hian ka hria nia!


"Thingpui in ang aw...."


Kaphu deuh zuk a! "Khawnge i chhungte hi?" ka'n tih zawm hram a.


"Ka chhungte elaw i rawn len chhan?" nui hlek lo a min thlek hâw pah chuan a rawn ti hram a!


"Anni chu ka duh ka neih theih na tur a nih chuan hmu duh ê a...." ka lo ti hram a! Men hmawn chung chuan choka lam panin a kal.nghawng nghawng a! A titau der hmêl te hlei hlei chu a hmuhnawm ka ti nia! Thingpui no nen a lo let leh hnu chuan ka bulah a rawn ṭhu a!


"Dingpui...."


Sawizawm mai tur ka hre lo pawh ni loin, ka hrawk chu hnawhtu awm ang maiin ka aw zuk lawi rût a! Kei, mahni in duh ve lah ṭhin, tu fanu mah huphurh nei bik lo...inti ve ṭhin kha, ka duh hmu tura ke ka penna kawngah, ka inchhuih khaw lo zo dawn.... Hetiang tur ka ni lo....


"Enge a....?" tih pahin mi rawn en deuh hau mai a! Ka lai chhe hmêl chu min nuih sak a! Ka rilru thlak thutin, 'heti chuan engmah ka ni dawn lo....' tih ngaihtuah chungin, ka va kuah a, ka lamah pawt hnaiin, a hmui, vam ham maiah chuan ka fawp thut mai a!



A tirah chuan a ṭang na ngang mai. Min nam ṭang ṭang a, ngenngawl taka ka fawh luih tak hnu chuan a inthlahdul ve ta deuh hret hret a! Thaw chham dawn a ka fawh hnu chuan ka thlah a, ka thaw hawk mai! A hmel ka va en a, a rilru chhiar hleih theih lohin a buai nuaih niin ka hria! Meng phelh phang chung hian min en kar a.


"Tinge khatia min tih a?"

"Ṭawngkâin sawi ngaihna ka hre lo a, khati khan a fiah ber ang chu ka ti...."

"Hmnnn...."

"Kum tam tak chhung chu kga thil ti tur kgan ka nghak tawh. Beidawn tawh hnuah kan in hmu a, ṭawngkâ a sawi ka duhte sawi thei loin ka lei min phuar tlat. I duh loh zawng a nih chuan min hrilh dawn nia!"

"Bialpa ka nei asin...."

"Bialnu ka nei ve tho aw..."

"Chuti chu, tah khantawk rawhse...."

"Tawk lo e, ka neih theihna tur che a nih chuan, engmahin min dal lo ang."

"Duh ta tlat lo ila..."


A mit taka chiang taka enin, ka lamah ka pawt hnai a, a hma aia uar leh duhthawh zet chuan ka fawp leh a!

"Kha khan engkim a sawi chiang ang chu!" ka ti zui sup a.

Min melh vang vang a, sawi mai tur a hre lo nge, a nui sak a, "Tunge i bialnu chu?"

"Nangmah."

'Keimah ni lo, bialnu i neih thu i sawi kha...?'

"Ka hmuh leh che aṭang khan ka ṭhen tawh...."

"Engvangin?"

"Nangmah aia duh ka nei miau lo a, ka ṭhen mai lohin...."

'Hmnnn....Min hmuh leh hmain i duh ber a ni lo ami? Engtinnge vawi leh khatah i ṭhen theih?'

"Vawi leh khata ṭhen turin engtin nge nang hian ka thinlung i hneh?" tih hi min lo hrilh zawk la? Ka ngaihtuah let a, Liandingpuii ka tawn leh aṭang hian Muanzuali chu ka la be mumal hlek lo a, ka thinlung hian a lo thlah fel der a ni tih ka ngaihtuah chhuak zawk a!



A ngawi vang vang a, a rilru chu a buai hmêl riauin ka hria! A inngaihtuah buai lai tak chuan, "I bialpa chu ṭhen rawh...." ka va ti thut a! A meng bial deuh kawkin ka hria!



A phone a rawn ri a, a hmet hlum nghal a. A rawn ri leh a, a off leh a, min rawn melh deuh zak zak a. A vawi thumnaah chuan a la ta nge nge a. Ngawi rengin ka lo en tawp a. A awmdan aṭang chuan a bialpa chu a nih ngei ka ring a. Tihbuai ka chak tlat pek a! A bulah tawlh hnaiin, ka lo kuah pek a! Min nam deuh ṭang ṭang a, a biangah ka va fawh sak thut chu, phone a thlauh bawl mai! Min bêng mai dawn emaw tih turin min melh rum a. Engahmah ngai lo luiin ka tho thurh a. Kawngkhar lam ka pan nghal ruak a!



Motor awmna ka pan ding nghal a, hawikir hlek loin In lam kapan ta vang vang a. Ngawi renga room pan nghalin, khumah ka bawk thlawp a. Ka ngaihtuahna chingchivet zet chuan min ti buai kher mai!



Amah ka hmuh leh hnu hian ka lo kawp ve ber ṭhin Muanzuali pawh ka be ta meuh lo a. Ka leng ngai ta meuh lo. Ka thlakhlelhna zawng zawngte kha vawmbo ang duak chuan kiang vek lo mahse, amah pan a, va hmuh leh tumna emaw, chakna emaw reng reng ka nei lo. Hrehawm tih leh inthiam loh châng chu ka nei meuh mai a. Chuvang tak chuan, pangngai leh ṭha taka thlah ka duh vangin hun remchâng zawk siam tum chuan ka rilru ka siam fel ta a. Dingpuii number chu ka hmet chhuak a. A bialpa neih lai kalsan a, ka hnen a kal tur leh, kei pawhin midang kalsan a, amah chauh ka nghah tur thu ka va hrilh tawp mai a! Min chhan ngaihna vak hre loin, phone a dah ta daih a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)