Liandingpuii-4-

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

Liandingpuii-4-

Unread post by Rohlupuia Renthlei » May 1st, 2021, 1:05 pm

Liandingpuii-4



"Inhmu ila...."

"Ok"


Rei rial loin Muanzuali te in ka thleng phei nghal a. A room a kan lut chiah chu min kuah nghal chaih a. "Tinge i reh em em? Min va ngaihsak lo ve, min ngai miah nange?" Zawhna a tam ngei mai.


"Muani...." Thu tak zet chuan ka en run a! Ṭi deuh dai hian min en a. "Kan inkâr thu hi tih tawp ka duh a ni..." ka ti vawt ruih a. Ka ṭhu khawng ut bawk a. Mak ti lutuk a min enin, "Enge i thusawi awmzia chu?"


Hun engemaw chen ka lo kawp tawh, vawi tam Kohhran sadai ṭhiat a, siamtu duhdan kalha ka lo chetpui tawh, ka tana ui nei lo, a eng kim mai min hlan tu, chuti maia kalsan tura thutlukna siam chu thil awlsam a ni hauh lo. Mahse, Dingpuii nen kan inkâr chu chinfel la ni lo mahse, fel lo chung chung pawhin amahah chuan ka hahdam a, ka nun a hlim si!


"Kan inṭhen mai hi a ṭha in ka hria! Ka tâna i inpekna te, min hmangaihna te hi ka hrethiam lo ni loin, ngun taka ka ngaihtuah hian, nangnen hian inkalsan a ṭul niin ka hria!"



Ka mitah tak min en kal mai a. Che chang hlek loin min melh ran mai a. Rei en duh loin lehlam ka hawisan a. Chhungrilah chuan ka inthiam bik hauh lo. Mahse, ka nuna lo lang hian mawi leh mawi lo min ngaihtuahtir hlei thei lo ni berin ka hria.


"Ngaihzawng dang i nei ami? Kei aia duh dang i nei tihna ami?"


"Ka neih chiah pawh ka hre lo. Mahse, lungawi lo taka inṭhen a, in hau hrep chunga in kalsan te, in be leh duh tawh lo tawp khawpa inṭhente hi ka duh miah lo. Kan pahnih hian innei ta ila....tih thlengin ka ngaihtuah vek tawh." Chil lem in ka ngawi deuh dat a!


"Chuan...."


"Nupa ah lo insiam teh reng pawh ni ila, tuna ka hun tawn avang hian, chhungkaw ṭha leh duhawm tak kan din thei kher lo ang a. Chhungkaw hlim lo tak din ai chuan, tuna kan kár thu tih tawp rih hi ṭha berin ka hria a ni."


A ngawi renga, a melh ngai a melh reng a! Engmah a sawi lo, a khap fak fak a, mahse, ka ti a, ka ti tawh laklawh; kir leh turin ka rilru ka siam lo. Chuvangin, tunah hian ka kalsan lo a nih chuan, engtikah mah ka kalsan thei dawnin ka hre lo. Thil nuam leh awlsam a ni hauh lo, mahse, a ṭul ka ti miau a, hreh chung leh lainat chung pawhin ka kalsan a ṭul ka ti.


Ka tho uaih a, a room chhuahsanin inhnuai lam ka pan nghal a. A chhungte pawh be lem loin ka chhuak mawl tawp a. Tun ṭum zet chu, ka hma ka sial luat vang te pawh a ni mahna....


'Dam reng chunga thlana inphum ai chuan, hmangaihna hmasa chu ka thlang a, ka thlan kawng hi a dik lo a nih erawh chuan, ka tuar mai a niang chu!'


Motora ka luh rualin Dingpuii ka phone nghal a. Mahse, "on another call" a intih avangin a la tlai chhe lo bawk a. An In lam panin ka in khalh phei ta nghal a. Door bell ka hmet ri tuar a, nu valai tak hian rawn hawngin, lut tura min sawmna chu kawngkhar biang vuan chungin ka zui lut nghal a.

"Dingpuii awm em le?"

"Kha lamah khan...." ti a min kawh hmuhna lam, inkawmhona room lam chu ka pan tlang nghal hrawih a! Ka rei leh.... Insi rialin mipa pakhat nen phone an lo en dun a nih chu! Chupa chuan a dara kuah chungin phone a an thil en chu a lo hrilhfiah a ni ngei ang!


Ka su dupin ka hria! Engkhaw sawi set set lova han hnek zawt mai ka va chak em! Min han hmu thut chu rang zetin a tal put na a, ka hmuh tur ang chu ka hmu hman tho. Dingpuii mitmeng chu a chiai riau a, a phî buai cheng mai. Chu chuan mi satliah ang ngawt chuan min ngai bik lo tih a lantir a. Mahse, ngawi renga ka ṭhu hmuk chu min en rei lo.


"E hê, U Nunpui, i lo lêng elaw? Zuala, hei hi alawm, ka chetsual ni a min puitu kha....!" tiin min inhmelhriat tir zui nghal a. Choka lama awm, a chhungte chu au lâng lângin, min inhmelhriattir zui nghal a. A chhungte min biakna leh an lawmthu sawina te chuan ka beng an luh lem lo!


Amah ka ṭanpui avanga hmelhriat chawp leh, chumi vanga an Ina lêng emaw min tih chu ka hlauh ber a ni. A chhungten keimah min biak hlut kârah chu tlangvâl, Zuala tia a koh chu a lo haw daih mai a. Rei vak lo kan phul hlut hnu chuan a chhungte pawh anmahni hmun lamah an kal ta hlawm a!


"Tunge kha pa kha?"


"Ka ṭhianpa"

"I bialpa."

"Ummm"

"Tinge i la ṭhen loh?"

"A theih ngawt bik loh."

"A theih, a theih a ni mai...." tih pahin ka hnaihchilh ruak a! Min hlau hmêl a pu eih lo. Chu chuan min ti thinur lek lek zawk nia! Ka kuah a, a hmui, fawh chakawm zet maiah chuan ka fawp a! Min hnar lova, min chhâng let hek lo. A dai raih mai a. Min en loin a chhîng tawp mai!


Duhthawh zet a ka fawh hnu chuan thlahin, "Ṭhen rawh," ka'n ti mawl leh tawp a!

"Buaina kan nei si lo a...."

"Keimah hi BUAINA chu ka ni mai, a nih loh chuan, a awmlaiin ka kiss tawh ang che!"

"I va zak lo roh ê....!"

"Nang ka neih theihna tur che a nih phawt chuan, engmah tih hreh ka nei lo."

"Em em a che...."

A bul setah ṭhuthmun rem pahin, ka hmuh hmasak ber, hmeichhe naupang(tleirawl) mai a nih aṭanga tun hun thlenga ka nun hman dan chu ka hrilh mawlh mawlh a. Ngawi rengin min en a, a hmel landan a thlak chhen a! A tawpah chuan, "Umm, a va mak ve, kei pawh ka hmuh che khan, keimaha kim lo riaua inhriatna kha a bo daih, mahse, bialpa ka nei si a, tihngaihna ka hre lo a...."


"Kei chuqn nangmah vangin engkim ka kalsanin ka chhu chat fel tawh. I duh zawng ka nih loh chuan, tlang takin sawi rawh...."

"Ka duh lo che....ka tih chuan, ka hmuh che hian ka inthunun zo lo chu a ni sia. Ka awmdan hi ka hrethiam lo zo tawh..."

Rilru in pawh taka hun engemaw chhung kan titi dun hnu chuan, vawi leh khata nawr tut tut chi niin ka hre lova. Mahse, chan chu ka tum lo bur. Haw tumin ka ding uaiha, tun ṭum chu min thlah turin a tho chhuak ve tlat.

Kawngkhar kiangah chuan kuai dingin, duh thawh zet chuan ka fawp a, a hma ang em chuan a vawt ta lo. Min chhang let lo na a, min huat lohzia a lantir ve salh salh a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)