Liandingpuii-7

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

Liandingpuii-7

Unread post by Rohlupuia Renthlei » May 2nd, 2021, 2:41 pm

Liandingpuii-7


Ka awm dan chu a dik ka ti hauh lo mai. Lungleng leh khawhar taka ka awi tehlul vei nen, ka lunglenna ber hawisan zawnga, ka awmna te fanu chunga ka khawsak kual dan chu dik ka ti lo. Mahse, amah ber lah chuan engahmah a ngai si lo. A nu leh pa te awm loh chhûng chuan tu hriat si lohin nupa kan ni hawt a! In sum tum engang mah ila, midang awm ta lo leh til reh loh na nana chu, in sum reng theih ni hek lo!


Ka nundan dik lo chu hre reng mah ila, chhungrila inthiamlohna lian tak nen Dingpuii chu ka be reng tho a. In neih thute kan sawi kai leh ṭhin a. Tuna ka awm dan aṭang hi chuan, engmah kan tifel dawnin ka hre si lo. Chawlhkar khat chawlh lain, Aizawl lam ka pan ta ngawt a. Engmah hrilh lawk loin, zanah Dingpuii te In ka va pan a. Ka hmêl a hmu thu chu a hamhaih buai ve deuhin ka hria!

"Tinge min hrilh lawk loh?"

"Surprise hi ṭha ve alawm...."

"Ka ngaihzia che hi i hria em?" tih leh ka mal chunga ṭhutkai a rual nghal a! Ka ngai lo a ni bik hauh lo a. Mahse, ka awm dan avang zawk khan hrehawm ka ti a. In chhirin siamṭhat theih a ni tawh der si lo. Dingpuii lah chuan min ngaih zia te, min thlakhlelh zia thu te chu a sawi melh melh a. A hmel chu ka en ṭhin a, thlir nin a va han har teh lul em!


Dim te in a chalsam chu ka chul hauh hauh a, a khabe a dawmin, dim te chuan ka fawp riai riai a. A bulah hian ka nun hi a kim thlup mai si a. Engtinnge kei hian ka phatsan a, hmeichhe dang kha ka mutpui theih zawk ni! A hmêl chu ka thlir ning lova, ka en kham thei hek lo. Mahse, ka chhungrila inthiamlohna lianpui awm chuan min kam ṭeuh mai a! A bula ka sawi chuan, kan inkâr hi a tawp mai ang tih ka hlau si. Dam chhunga ka kawppui turin ani ngei hi ka duh a ni. Chuvangin, engmah hrilh lo law law tur chuan ka rilru ka siam fel ta zawk a!

"Palai rawn tirh mai ka duh a nia. Ka cham chhung hian..."

"Chungte chu i thu ber alawm."

"Naktuk zanah rawn lentir nghal ila."

"I thu ang zelin le," tiin min melh rawlh a.

"Mahse, dan thianghlim kan tlin si lova...."

"Nangnen a nih chuan ram pilril pawh nise a pawi reng reng lo."

"Chuti chu, a awlsam thei leh hautak lo thei ang berin i ti ang hmiang...."

"Ni mai e a, tlin lo chunga Kohhran dan thianghlima insuih tum ṭalh te, nakin lawkah miten an hrechhuak dawn tih chiang reng si, tlin loh khawp thil han tih luih ṭalh hi ṭul ka ti ve lo...."

Kei chuan, kuah nghet salh chung chuan, "Thuam chhawm pawh, uchuak leh tam lutuk a ṭul lova, mizo thuam chhawm pangngai a tawk viauin ka hria. Kan mamawh leh duh dang chu kan pahnih ngeiin kan sual chhuak ve tur a ni...." tih pahin a hmui, sen vam hiam ah chuan ka fawp vang vang a. Kan pahnih chuan, palai kal a hma hawtin duhthu kan sam a, duh dan kan zam chiam pek a nih chu!


Kan pahniha kan awm tawh chuan kan hlim em em a, thildang kan ngaihtuah hman meuh lo chu a ni. Duhthu kan sam a, kan nui a, kan tlin leh phak tawkah kan hlim veng veng a ni ber mai. Kum tam tak liam ta-a hmeichhe tleirawl duhawm chungchuang kha, vawiinah chuan nula duhawm leh ngaihawmna-a khat, en tawh pawha en nawn ngai leh ṭhin, thlir tawh pawh a thlir nawn leh ngai, a chu lai chu han chuti deuh se....tia han sel tur lai reng ka hmu lo. Hmeichhia hi ka kawp tam lem lo ka tih kha. Tin, ka khaw hawi a zîm ni maw, 'Ka Dingpuii khum zo tur reng reng hi kan Zawlkhawpuiah hian ka hmu bik lo. 'I uar mah mah lo maw?' tia min hnialtu awm se, aw bâwm phui vek khawpin ka hnial ngei ang le!


Chu zan chu kan tân hian a va rei lo tak em! Hun bi vawngtu, sana inkhai leh zan khaw thiang reh chuan haw a hun tawh a ni tih min hriattir si! Kham lo tak chunga ka inkhalh haw a ngai a. Tluang takin ka thleng em tih a hriat hmâ chuan min mutsan ngai hauh lo. A kiangah zawng, hunbi vawngtu te hi an hmanhmawh zual ta em ni?tih mai tur hian hun hi a kal chak a. Awm hrang hlek ila, in hmuh loh kâr lah kum sul vei tluk zet ni mai hian ka hria!


Ka chhungten Palai an tir ta! Engkim sawi fel a ni tawh. Biak In hawng lova Kohhran Hall kan thlang chu an hrethiam lo lek lek a. Mahse, rawngbawltu rinawm leh berampu ṭha ni lo mahila, hum sual dai chunga Kohhran inhungna sadai pal chhiat kher chu kan ngam ngang lo a. Zep leh thup nei hauh loin kan sawi tlang rawng lo thei si lo! Chhungril tak chu a nuam bik lo kher mai!

Dingpuii nau, Nutei pawh a phur ber berah a ṭang a. Mahse, Kohhran inang lo kan nihna avanga kal phung min han zawh zak zak châng erawh a nei fo mai! Kan in kutsuih nî atan December ni 6 kan ruat a. Chumi hma chuan tihfel ngai leh buaipui ngai tam tak kan neih ve avangin, kei pawh chawlh rei zawk la turin Champhai lam ka pan chho vang vang a.


Champhai lama ka chhungte, ka chanchin ka'n hrilh chuan an hlim ve hle mai a. Mampuii chu chik zawkin ka'n en kher a. A hlimna kârah chuan nâ ka hmu a. Mahse, phur takin, kal ve ngei a tum thu a sawi bawrh bawrh thei tho mai. Chawlhkar thum zet inbuatsaihna hun kan nei a. Kar khat office ka kal anga, chumi hnuah nupui nei turin Aizawl lam ka pan dawn a ni. Keima tawkah ka hlim ve hle mai a. A hun tur ngaihtuahin, ṭul leh pawimawh te chu ka buaipui pah ve reng a. Ka nghakhlel ve takzet a ni.


Hun a her zel a, ka haw hun tur pawh a hnai ve ta kher mai. Zan khat chu ka room-ah, kan inneih thil pawimawh te buaipui paha, phone ka hman kual lai chuan Mampuii a lo lut a. Inthlahrung hmêl deuh tak hian ka khumah, ka kiangah chuan a rawn ṭhu a. Phone ka hman zawh chuan a lam hawiin,

"Enge ni ta Mampui, mamawh leh duh i nei em ni?" ka'n ti thuai a.

"I hlim leh phur hmêl vel hi a hmuhnawm ve a!" chhuat lam bik zauh pah chuan a ti a.

"Phur ve bawk dawn lawm ni....Nupui meuh neih dawn te chuan....Nang pawh ka rualin i chhuk ang chu...." tiin ka sawm zui nghal a.

Mahse, test an neih dawn avangin ka ruala a chhuk theih dawn loh thu ka hre ve kar mai. Mahse, han sawm hrim hrim ṭulin ka hre bawk si a!

"Theih nise i ruala chhuk ka chak....Mahse, test kan nei dawn si a, kan zawh ve leh ka rawn chhuk dawn nia..." tiin min chhâng a. A ngawi zui leh vang vang a. Rei vak lo hnuah chuan,

"U Nun, thil pakhat chiah dil che ka duh ê...." a ti vang vang a!

"Sawi ta che, ka tih theih zâwng a nih phawt chuan...." ka lo ti thuai a.

"I thei lutuk, i duh leh duh loh a thu a ni mai!" tiin min melh vang vang a. Chutah kei chuan, "Enge ni ta Mampui, han sawi teh...." tiin ka han chhsng liam puat a. Min melh vang vang a, meng zim deuh san chung chuan,

"Zan khat chiah ka ta ni leh rawh....A bak engmah ka duh lo," zah avanga sen ap ap chung chuan a ti hlawl mai a!

Mak ti lutukin ka meng zau kawk a, a hmêl ka enin a fiamthu hauh si lo! Ka awm nghenga kuah betin, "Mampui, chu chu i duh dan leh i thil min dil duh chu a ni meuh maw? I ngaihtuah chiang em?" tiin a chala chul pah chuan ka zawt nawn leh a. "Aw, chu bak engmah duh ka nei lo..." ti a min chhan chuan hrehawm ka va ti ngai em!


"Mampui, kan awm dan hlui avang khan hrehawm ka ti takzet a. Siamṭhat theih a ni tawh si lo. Tunah lah nupui neih ni nghakin ka awm tawh a ni a. Ka nupui tur lakah leh i lakah ka inthiam thei ngai hauh dawn lo a. Tuna zankhat chauh pawh hun kan hmsn dun leh chuan, ka nupui neih hnuah pawh, kan awm dun apiangin kan inthunun thei dawn lo. Tuna kan theih laia tih nawn tawh loh hi kan tâna ṭha ber zawk a ni." chil lem khawlh pah chuan ka chhâng a.


Mahse, chu pawh chuan a hneh zo lo nge ni ang, a thil dil chu thil dang min dil zawk tura ka ngen chiam pawhin awmzia reng reng a nei thei lo. "Ka pasal i ni kumkhua dawn lo tih ka hria. Mahse, engtikahmah ka theihnghilh tawh dawn lo che a. I fa hial pai ka duh asin..." a ti tak deuh deuh a! A tawpah zawng, engtin tin emaw kan inthlem lungawi thei ta hram a. Mahse, chumi zan erawh chu a chhungte hriat lohin ka bulah a mu zan khua ṭhak a. Engtin mah kan khawsa hauh lo!


Nî a liam a, hun a ral a, kei pawh tluang takin Aizawl lamah ka haw ta! Dingpuii leh a ṭhiannu Tluangpuii nen, ka ṭhian tur Rempuia nen, ṭul leh mamawh lam khawmin, hlim taka nui rawih rawih chungin hun leh nî kan hmang ho a. Kan inbuatsaihna pawh kan peih fel thawkhat ta. Inkutsuih nî pawh ni khat chauhin min dang tawh. Mampuii leh a nu leh pa te pawh Champhai lam aṭangin an rawn thleng tawh a. Veng danga an innghah luih tlat avangin kan inhmu meuh lo.

Kan inneih hma ni chuan Dingpuii pawh, kan Kohhranah lakluh a ni a. Chumi ni chuan, kan Pastor hmaah kan chanchin engkim, biak in hawng lova kan inneih chhante, kan chanchin zawng zawng kan sawi fai leng a! Ani kan Pastor pawhin,


"Kohhran dan thianghlim tlin lo chunga Biak In hawng ngei a in nei, a hnu lawka inṭhen leh ta mai te, inthup tlat chunga innei a, rei lo te hnua lang chhuak a, mualpho leh ta sawi tur tam tak an awm. Mahse, nangni zawng, tlin lo chunga Biak In hawng ngei a inneih tum.lui loin, in chetsual tawhna avanga in diklohna te hre rengin, tun hi in thleng a ni a. In chhuanawm zawk hle mai."


"Hun liam tawha in tihsual chu theihnghilhin awm se, in tihsual avanga ngaihdam dilin, Kristian chhungkaw duhawm tak din ngei turin duhsakna sâng ber ka hlan che u a. In thil tih dan hi mi dangte fuihtu, kawng dik zawh tura entirna ṭha tak a ni. In tihsual hi a ṭha zawngin malsawmnaah lo chang se, chhungkaw duhawm tak din ngei ang che u...." tiin fuihna thu ṭha te min fah mawlh mawlh a.

A tuk maia insuih tur kan nih avangin, Dingpuii te ṭhian dun chu kan va thlah a. A tuka hun hlimawm tak hmang ngei tura inthlahin, mahni hmun ṭheuh kan pan ta a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)