Liandingpuii -8

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

Liandingpuii -8

Unread post by Rohlupuia Renthlei » May 2nd, 2021, 9:11 pm

Liandingpuii-8



December Ni 6 zing ni chhuak chu a mawi ngei mai. Khawchhak kilah chuan khawvel mawina ti lang chiang turin a rawn dak dûk dûk a. Zing daifim leh thlasik ṭiau chhumte rawn ṭhawng kualin, fiah fai zet hian a rawn in vawrh sâng zel a. Boruak thiang leh nuam tak chuan, hun rei tak aṭanga nghakhlel êm êm a kan thlir, ka tlangval tawp hun tur chu a lo thleng ta! Darkâr bi a liam zel anga, a hun a lo thleng thuai dawn si a.


In lam pawh kan inpeih fel ta hle mai. Chawhnu dar 2:30 a insuih tur kan nih avangin, hun awl engemaw chen chu kan la nei a. Vêng kâr a hlat deuh avangin mahni In lamah, mahni buai buaiin kan buai a. Dingpuii nen chuan kan in be deuh reng a, kan phur ve hle a ni. Duhthu chi hrang hrang kan sam dun te, hmalam atâna kan ruahman lawk ve te chu kan koa a innghah theih nân kan hmabak, inkutsuih hun chu kan nghakhlel tak zet a ni.


Hun thâwl kan neih thui phian avangin, ka room-ah chuan ka mu zâl deuh vang vang a. Thlasik ni, nem riai mai leh thiang kàk mai kârah chuan Chalfilh tlâng leh a behbawm chu ka'n thlir vang vang a. Ka chhungril takah hian khawhar veng vengna a lo lut a. Engin nge mi mawlh ka hre lo. Ka chhungril ah hian khawharna thuk tak hian min chenchilh veng veng mai a. A chhan sawi tur ber awm si lo hian, ka nun chu a nguiin a nguai ngang mai.


Chhun dar 12 a ri ta....Kaw ruak zualpui te hnawh khat turin choka lam ka pan a. Chutih lai chuan mo lawm tur leh inkhawm tura lo kal, kan in lama lutkhawm an awm nual tawh a. Ṭhenkhat min lo biakna te pawh chu chhang liam luamin, mumal lo deuh ruai hian ka inhria a. Inphih harh zuiin, room lam-ah ka lut a. Muangchângin ka insiam chho ṭan ta a.


Ka insiam laklawh lai chuan ka room kawngkhar a rawn inhawng a, ka'n en nàk chuan, Mampuii chuan min lo thlir reng a. Ngun takin a hmêl chu ka han en a, a ruk tak chuan hrehawm nasa tak a tuar ni hian ka hria a. Hlim lui hram hram niawm tak hian,


"I dress chu i va inhmeh em em ve aw....Vawiin mo neitu tur chu, a nalh dawn hle mai!" tih pahin a rawn pen lut zan zan a. A hleitlingin a chhe lo bawk nen, a inthuamna a inhmeh bawk si! Ngaihtuahna dik lo ka pu lo chauh chu a ni!!! Chutihlai chuan inpeih atin Rempuia a lo lut a. Boruak uap lutuk tur a ziaawm suai suai mai a. Ka va lawm teh reng em!


Mampuii chuan ka insiam chu min pui pah mawlh mawlh bawk a. Hun rei lo te emaw tih laiin, Rempuia pawh Dingpuii te hruai tura a chhuah a lo hun ta der mai. Room aṭanga inzui chhuakin, ka motor, mo hruai tura chei fel sa diam lam chu kan pan a. Dingpuii leh a ṭhian nu hruai tur chuan kan vai liam ta a. Keini pawh Inah lut leh zawkin, kan Ina awm ho te nen chuan Biak In lam kan pan ve ta a. Kohhran Hall mawi hmawk tham chu kan ni ve reng mai. Hall kan han thleng a, thawhpuite leh ṭhiante hmêl hmuh tur an kat nuk mai.


Inneih ṭan turin engkim peihfel a ni ta! Mo tur te chiah kan nghak tawh. Programme ṭan nân minute nga chauh a awm tawh tihah chuan ka Pa chu ka bulah lo kalin, phone min rawn pe a. Phone chu chhâng nghalin, "Engtin maw?" tih tuar pahin pawnah ka tlanchhuak nghal a. Ka aw ki a san leh mangang aw râwl a tel avangin ka pa te, pastor leh ṭhiante pawh an rawn chhuak nghal a. Gate pawn panin chak takin ka tlan nghal nen, min rawn uma, min rawn umphak chuan thil awmzia min han zawt a. Ka hamhaih lutuk chuan chhan ngaihna hre loin phone chu ka pe a. Ka pa chuan be zui mawlh mawlhin, pastor hnenah chuan,

"Dingpuii te an accident a, nikhaw hre loa a awm avangin Hospital lamah an tlanpui nghal a nih chu..."

"A va zia lo em aw...." tih ri chu ka mang hriat riai ruai a. Ṭhiante motorin Hospital lam pan chuan kan tlan nghal vawk vawk a. Kan thlen phei meuh chuan, Rempuia, Dingpuii leh Tluangi te chu Casualty khumah doctor ten an lo buaipui map map a. Chak lutuk a tlan lut nghalin, Dingpuii mutna khum bul chu ka thleng nghal ruak a. Doctor te chuan min lo dang nghalin, thil awmzia min lo hrilh nghal zung zung bawk a! An thusawi aṭang chuan beisei a va tlèm tehlul em!


A khum kiangah chuan che chang thei loin ka ding khawng reng ringawt a. Ka ngaihtuahna a chiri vek mai. X-Ray ti tura an zawnchhuah lai chuan a kiangah ka kal zel a. A kuta vuanin ka hmer ngawt ngawt a. A che eih lo. Dingpuii chu a che reng reng lo nia! A mit a meng lova, a khap lova, mi nung hmêl reng a pu lo. A mar ka dap pah nghal a, a mar erawh ka hmu e.


X-ray room-ah pawh ka kalsan hauh lo. Mahse, dah ang angin a awm tawp a, a zawi ngiai a, khawih ang angin a thle kual ringawt mai. A va mak tehlul em....! X-ray result nen Doctor kan pan nghal a. An han en zung zung a, a kawchhungah thi a put a nih chu! Zai nghal tur an ti. Engkim mai chu a thleng zut zut ni berin ka hria. Dingpuii chu inzaina room ah lakluh fel a ni tawh. Tih theih engmah ka nei si lo. Nghah chu kan tih theih awm chhun a ni ringawt mai si a.


Rempuia leh Tluangi pawh, X-Ray leh ṭuldang te tih fel a ni a. Rempuia lû a hliam chu a serious hmel viau mai. Tluangi erawh rinaiin a zia niin a lang. Ka bîng mup mup ni ber hian ka hria a. Rempuia leh Tluangi te kianga ka kal hnu chuan, in thing nawk nawkin Operation room lam kapan leh a. Chutah chuan Nutein min lo pan var a. Mittui tling pam chunga min kuahin,



"U, Mami chu a ṭha leh ang ti raw? A ṭha chhuak leh vat ang ti raw?" tiin a ṭawng mawlh mawlh a. Chhan mai na chang leh chhan mai ngaihna hre loin Nutei chu ka lo kuah ringawt a. Sawi tur reng reng ka hre lo. Dingpuii nu leh pa leh ka chhungte ho an kim ṭhap a, ka ṭhiante leh thawhpui te, kan Kohhran hruaitu te leh chhungkhat lainâ an kim ngei mai. Inneihna hlimawm leh hriatreng tlak min hmanpuia, min hriatpui tura lo kal te chuan Damdawiin Casualty ah thin phu dep depin min awmpui ṭiai a. Ngaihtuahna a kal ding ngut ngut a, midang an awm ve ta lo emaw tih mai turin ka bîng mup a, ka â ruai mai ni berin ka hria!


Darkâr a liam tawh, thu thar engmah reng a la awm lo, a rehin a reh ṭhiap mai. Chutih lai chuan Rempuia chu lu tuam lûkin a rawn lang hlawl mai. Ngawi rengin ka pan a, "Enge thil awmzia?" tih bakin ka be thei lo. Ka hrawkah hian min hnawhtu awm ang maiin, ka ṭawng chhuak hlei thei lo. Rempuia chuan,


"Venghlui pêng kan rawn chhuk tur kha mak tak maiin Assembly House lam aṭanga Bollero rawn kual khan min rawn hnawl pawp ni berin ka hria! A ri rup a, a bak engmah ka hre zui lo...." a tih zawh chuan a meng bial kawk kawk a, a tlu dawn ta mai! Lo kuah vatin casualty khum lamah bawk chuan an hruai thla a, chu pawh ka zui thei lo. Nutei chuan min kuah a, a mittui a tling pam reng mai a. Hnem ngaihna ka hre lova, in hnem tur chuang kan awm lo a ni mah zawk awm e.


Khua a tlai zel a, darkar3 zet an khawih hnu chuan Dingpuii pawh an rwn nawr chhuak ve ta. Hlawhtling taka zaiah an in ngai a. Mahse, a insawh nat em avangin ICU lamah an nawr lut zui nghal a. Engmah tih theih nei ta lo chu, kan thlir vawng vawng ringawt mai a. Darthlalang phen aṭang chuan ka va thlir ṭhin a. Ka lungawi thei ngang lo chu a ni. A bula kal ka dil a, an phal si lo. Hrehawm vawg vawng tak a ni. Mihring leh Pathian hmâa "Tiam tlat e" ti tura kan kawngzawh danglam ta lutuk si chuan min va ti na teh lul em!


Tluangi leh Rempuia chu ngaihtuahawm lutuk an nih loh avangin, ward ah dah an ni a. Chu lam pawh kal thei lo chuan, ICU pawnah chuan ka ding ngawt ngawt a. Ei leh in tur min rawn pek te chuan engahmah thawk mawlh hek lo. Ka en liam vel mai ai chu a ni.



Engmah hre loin nihnih zet hun kan hmang ta. A chanchin kan hriat theih chhun chu,'hma a sawn zel e' tih zawng chu a ni mai. Hemi hun chhung hian ICU tual chu ka pel eih lova, ka nau ten inthlakna te min rawn ken a, inthlak lah ka tum hek lo. He thawmhnaw hi inneih ni a ka hak tura uluk taka Dingpuii min thlansak kha asin. A hriat lohin engtinnge ka thlak theih ang ni. Kan inkutsuih dawn alawm....


ICU duty Nurse a lo kal a. A thu rawn thlen chuan min va ṭhawng tehlul em! "A dam lai hmêl hmu turin, inluh chhawk theih a nih thu a rawn sawi a nih chu!" A bân tawn tawna dawmin, "dawt i sawi tiraw?" tiin ka hmer vak a! Engtin mah min chhang lo. Mit khap sak sakin min melh vang vang a. Inherin min kalsan zui a.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)