Liandingpuii-9

Story tawi te te emaw luanliamna emaw post na
Rohlupuia Renthlei
Posts: 20
Joined: April 29th, 2021, 8:10 pm

Liandingpuii-9

Unread post by Rohlupuia Renthlei » May 2nd, 2021, 9:29 pm

Liandingpuii - 9




ICU ah chuan keimahin ka va lut ve ta! Dingpuii hmêl chu ka thlir ṭhin a, ka lung reng a awi thei lo. Duhawmna a khat, cheimawi leh chuan ngai lo a hmêl chu a lo chul riai tawh a. Tisen sawkin a kah, a biang leh a hmui, sen no hiam ṭhinte chu hmuh tur reng reng a awm tawh lo. A dângin a hil bel mai a. Mi nung hmêl reng a pu si lo!





A khum sirah chuan ṭhuin, a kut chu ka han hum vang vang a. Ngun taka ka thlek veng veng lai chuan a mit ko a rawn phu zaih zaih a, meng tura chakna reng nei lo tih hriat zetin a dul hnak a. A beng bula kun hniamin,





"Dingpui, lo tho tawh rawh le....Pastor leh mipuiin min nghak reng asin! Kan puala an chei mawi, kan Kohhran Hall pawh kan luah lum nghakin a awm reng a nia! Rinawmna thu tiam a, thihnain min ṭhen hmâ loh hmangaiha, rawng inbawlsak turin kan in tiam dawn kha. Heti ringawt te chuan ka tân rawng i bawl thei dawn em ni? I tân tih theih ka nei lul lo em ni? Ka tel lova awm hrehawm i tih em kha....Harh la, hawh, i kal tawh ang le....Keimah ngeiin Hall-ah ka hruai lut ang che" tiin ka phun sep sep a.





Ka thu sawi te chu hre awm hian a awm reng reng lo. Hahdam taka mu siai siai ang mai hian, chet sawn reng tum loin a mu zawi ngiai a. Dan rual lohin ka mit aṭangin mittui a sur zungzung a, engmah hre lova mu bal mai, ka hmangaih tân chuan ka va hlu lo teh lul em! Sawi tur dang reng reng ka hre lo. Ka chhungril hi a na ngawt ngawt a, a rum vawng vawng a ni ber mai. Nurse duty bawk chuan min rawn kai chhuakin, hmuh theih hun a zawh thu leh, a chhe ber tawk thei reng kan nih avanga, chhungril lam thleng inpuahchah tur chuan min hrilh hlawm a!






"A ni thei lo....Hetiang tur a ni lo. Kan inneih ni tur pawh a liam tawh, helaia awm reng tur kan ni tawh lo. Dingpui....I tel lo chuan kan In pan ka duh lo a nia aw.... Min kalsan thei lo ang...." tiin ka phun mawlh mawlh a. Rempuia leh Tluangi te chu mahni in an in sa seng thei tawh bik a. An taksa chak loh vangin in lamah hahdam tir an ni tawh.







Ka taksa chau lutuk chu ka ke in min zo ta meuh lo. Keimaha ding turin chakna ka nei ta lo. Ka ṭhingṭhi hnawk a, ka khaw hmuh a phê ruai a, a thim mup ringawt mai nia! Ka dara tha chak zetin min chelhna chu ka hria a, a bak ka hre zui ta lo.






Kham chhengchhia leh khawkrawk zetah hian keimahin ka lo tâng tlat mai a. In vai chhuah ngial ka tum pawhin ka thei ngang lo. Hrui hnawk zet hian min phuar bet tlat mai a. Tal chhuah ka tum ngial pawhin ka thei ngang si lo. Thlan fimin mi bual huh hnep a. Ka chau ṭan ta. Chutia chu hmun aṭanga chhuah tuma ka beih fat fat lai chuan, ka piaha tlâng thengthaw nuam zet aṭang chuan thlifîm a rawn thaw heuh heuh a. Ka dam sawng sawng thei nia!






Chhum vár leng delh delh kârah chuan Dingpuii aw ngei mai chuan, "My dear, kal zel rawh, ṭang fan fan rawh...." rawn ti hian ka hria a. Chu lam pana kal tum chuan ka inher a, ka bân chu rawn thip zawkin, "Tal suh tal suh" tih ri chu ka hria a. Ka meng hlawl chuan ka khum sir a Mampuii lo ding, ngun zeta min lo melh vang vang chu ka hmu hmasa ber a. Ka bân chu ka'n en a, drip an lo khai niin....Muang châng chuan ka awm dan ka chhuikir thei ta a.






"Khawnge Dingpuii?" tih pah chuan ka ṭhu chhuak hlawl a. Ka bâna invuah zawng zawng pawt thlain, ICU lam panin ka kal nghal sawk sawk a. 'Kei hi chau thei ka ni lo, mu a, tlu a, tawi khawmuang hman ka ni lo....' ti mawlh mawlh chungin ka kal zel a. Dingpuii awmna hmun chu ka thleng a, Nutei chuan mi lo kuah chawt a. Mittui dir zawih zawihin, "U Pui, Mami saw en teh....a awm ve tawh lo...."






Ka thinlung chu a nghing dawt a. Ka keh chhe vek ni berin ka hria! Nutei chu kuai herin, room lam chu ka pan zel a. Doctor leh Nurse te chuan Dingpuii taksa leh hmai te chu an lo siam ṭha a, an lo buaipui mawlh mawlh a. A hmêl ah chuan mi nung hmêl reng a lang tawh lo. Engkim a tawp ta! A zo vek tawh. Dingpuii a awm tawh lo. Nurse leh Doctorte pawh zah zo loin ka pan ruak ruak a. Dingpuii biang tawn tawna vuanin ka ko chiam a. Chhanna reng reng ka dawng lo. Ka khawih ang ang chuan a thle tawn mai mai a ni. Lungchim takin a biangah chuan ka fawp vawng vawng a. Dingpuii rim reng reng a nam tawh lo. A pangti te chu a dai riai a, lumna reng reng a nei lo. Ka kuah a, phur taka ka lam lo hawi a, a thaw lum ham ham leh a hmêla phurna nasa tak te kha hmuh tur a awm reng reng lo. A dai riai vek a, a hit ngiai a, a taksa chu a khawng ṭan tawh. Min mamawh leh thlakhlelh vanga taksa ṭang khawng a ni tawh lo! Amahah chuan nunna thaw reng a awm tawh lo.






Rempuian min kuah chhuak tih zawng ka hria a. Mumal taka thil ka hriat leh hmasak ber chu Dingpuii te In ah, a kuang bulah ngei chuan ka lo bawk reng a. Ka harh chhuah rualin ka hawi ruai ruai a. A nu leh pa, Nutei te chuan min kuahin min ṭah khum hawm hawm a. Ka harh chhuak zawk a, ka Ipte ka zen rawk rawk a, Rempuia ka pek hman tak loh, "Inneih Zungbun" Dingpuiin a duhdan taka a design tir ngei mai, a kual chunglama kan hming lam tawi, D&P chuang ngei mai chu ka phawrh a. Dingpuii kuang chu panin a kut ah ngei chuan ka buntir ta a. Ka ṭap lova, ka nui hek lo! Engkim chu tawp se, keimah ngei pawh hi ral riai riai ila ka duh ber!







Dingpuii taksa chu ka bulah a awm tawh dawn lo. Thlanah phumin a awm tawh dawn a, a lei taksa chu phum boin a awm dawn. Kuang an chhin a, an zawn chhuak ta! Chesawn turin chakna reng reng ka nei lo. Kan inneih nî a a thawmhnaw hak chu a kuang chungah an dah a, kei leh kan ṭhiante pahnih pawhin kan thawmhnaw ngai thlap kan ha. Tichuan Thlâ kan lakpui a, mipui hmêl chu ka thlir ngam lo. Ka hmuh chinah kan thla la min hmutu te zingah mittui hru lo reng an awm lo.







Thlan mual thlengin kan thlah a, hawsan a ngai dawn ta! Keimaha pen turin chakna reng ka nei leh ta lo. Kalsan harsa ka va ti teh lul em! Ṭhiante zârah mualpho nasa lutuk loin kan haw thei a. Khawidanga kal loin Dingpuii te in kan pan a, a room ah, a khumah chuan ka mu thlawp a. Engmah reng ka hre zui ta lo!






Chiang takin ka harh kawk a. Ka hawi kual ruai ruai a. Ngun takin Nutei chuan min lo vil reng mai niin. Ni a lo sa uar tawh a, inhnuai lamah chuan khuang a ri dap dap a. Thlan nghaka leng ho an ni! Dingpuii a awm tawh lo. Amah vanga chung thil chu thleng a ni tak! Hawina lam apiangah mittui ko chhuak tur a va tam si em! Darthlalang hmâah ka dinga, ka hmêl ka hmuh meuh chuan ka phu zawk thei nia! Ni4 zet inbual lo, hmai phih lo leh thawmhnaw ngai hain ka awm tawh! Ka bawrchhawr zia hria in, Nutei chuan Towel nen Bathroom-ah min nawr lut a. Tuilum, sa ver vawr chuan ka inbual a, ka harh ta hawk hawk mai.






Ka chhuah chuan ka inthlakna tur nen Nutei chuan min lo nghak a. Ka Nu ten ka inthlakna leh ṭul zawng zawng an rawn dah phei lo niin....Ka inthlak sawk sawk a, Nutei nen inzui chhuakin Thlanah kan kal vang vang a. Ka ṭap lo, ṭap turin chakna reng reng ka nei tawh lo. Nutei chu a titi siam siam a, a u chanchin chu ka ngaithla ning thei lo.






Kawlah ni a liam dawn suar suar a. Keini pawh hreh tak chungin In lam panin kan inher a. Dingpuii thlan chu kan hlat hret hret a. Kan liamsan dawn chuan ka hawikir a, thlanah chuan a hlimthla hmu tlatin ka inhria a. Ka lam lo hawiin, "Hlim takin i hun leh ni hmang la, min rawn tlawh fo ang che aw...." ti a phun sap sap hian ka hria a. Ka khaw hmuh a thim riai riai a, khap per sak saka in nuai nawk nawkin, "KA LO KIR LEH ANG" ti sap chung chuan Nutei chu ka zui ta hnang hnang a!



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)