SAVE THE LAST DANCE FOR ME

Story tawi te te emaw luanliamna emaw post na
Tochhong Ruata
Posts: 53
Joined: October 2nd, 2016, 1:46 pm

SAVE THE LAST DANCE FOR ME

Unread post by Tochhong Ruata » May 31st, 2021, 1:23 pm

October thla chawhnu lam a ni a, Van boruak thiang kuk mai chuan tlang leh mual a ti lang hring nghul mai bawk a, Lunglen tizual tur tawk velin romei a zam deuh chiai mai bawk a, Hawivel a nuam in boruak a zangkhai angreng viau... Mahindra Thar Jeep ah Keini thian 4, Patea Hmingthana leh Maawmi te chu Khawchhak lam fang turin kan tlan khu vat vat a. Keini ho hi High School kal lai ațanga inkawm țan kan ni a. Inthlah ta miahloin kan inkawm ho ta a, Zirna bansan hmasa ber ka ni a, kan chhungmaw Bussiness dawrsiam chu ka eizawnan ka thlang a, Hmingthana hi Ukil a ni a, Patea Master Degree a neih hnuah Ph.D (Geo) bei leh mek a ni a, kan zinga hmeichhe awmchhun lian lo vetak Maawmi chu Doctor niin hmeichhe lam specialist a ni nghe nghe. Kum tin kan hun neihdan a zirin Tour kan nei țhin a, Chutiang Tour kan neihna tur hmun chu kan sawi ho phawt țhin. Goa, South India, Central India, Shimla, Nicobar Island etc te India ram chhungah chuan ka tlawh tawh a, Foregin lam pawh Malaysia leh Indonasia pawh kan tlawh tawh bawk. Tuna kan kal tumna hi Burma ram chhung a awm Mizo rilru a lian em em 'Buannel' tlawh kan tum a, Kan nula Maawmi pasal neih a tum ve tawh avangin a thlahna ni pahfawmin hun kan hmang dawn a ni.

Hetiang a kan tour reng reng hian kan inkeng bawr thei hle țhin, Puan In zar tur, Eiin tur, Mutbu, Music System, Guiter etc thlengin kan keng vek thin. Nuam kan tiin kan hlim tlang thei viau nghe nghe. Mipa ho in kan hmeichhe neihchhun kan en hrang lova, kan hmeichhe neihchhun lah a hmeichhe awmnem chet duh bik lova, nuam kan ti tlang thei viau. Tumah kan inhnial ngai lova, kan ti ti a rual em em a, kan nuam tih zawng ringawt kan ngaihtuah lova, kan vaia kan phur tlan theihna ber tur kan sawi ho hmak țhin. Tuna kan kal tumna pawh hi Kan nula Dr. Maawmi rawt chhuah a ni a, tlangkam atanga a hriat thin chu a belhchhah nan damlo a enkawl hrep tawh Mizo hnathlak pakhat in a sawihmuh leh vanga kal chak a ni nghe nghe. A rawn rawt tirh ah kan lo phur nghal em em ringawt mai a ni. Chawhnu lam dar 1 ah Champhai kan thlenga, Thingpui in in kan chawlh zawk a, Kan tlan leh vang vang a, Zokhawthar kan thlenin Dar 4 a ri thuak tawh.. Ramdang luh phalna kan tihfel meuh chuan khua a thim hnai tawh viau a, Ukil Hmingthana kawlhrawng ta reng reng Burma țawng a lo thiam hlauh mai a, kan In kan chhuahsan zan la la chuan Burma ram Rihdil kamah Bukte kan kaih hman thei phah a ni.

A tuk zingah Rihkhawdara Dr.Maawmi hmelhriat Ngokam chuan Buannel lam kawng min zawhpui leh a, Rin aiin a hnai nangin kawng lakah kan muang ema Buannel bula khaw hnai ber leh lian ber Paite khua Kaptel chu zanriah ei hmain kan lut thei ta hram a. Ngokam chuan Dr.Maawmi hmelhriat Pi Margaret Sailo te awmna chu a zawt kual a, Mizo hnahthlak an ni bawk a, an fel hlawm viau mai, an khaw hotupa Pu Kama chuan minlo dawngsawng a, Zanrih ei turin min ngen tlat bawk nen Zanriah ah Zo arpui tuilai sa ngei mai hmeh in puar el euhin kan ei ta a. Hetah hian kan tleirawl chhuah hlima kan Teak huan enkawl a kan chhawr Pa Dawnga kan tih mai te khua a lo ni a, Kan inhmu chu kan inchibai lawp lawp a.. Kan beisei aiin kan tlangnel ta viau. Pu Kama in a zanriah kan eikham hnuah Pu Kama fapa te kaihhruaina in Pi Margareti te in awmna an khua atanga Km 6 zeta hla 'Lal In' an tih mai chu kan pan ta a ni. Pi Margareti te In kan thlen hian Zan dar 10 a hnai tawh viau nghe nghe..

Buannel kawng kan zawh ngar ngar a, Mel lung (Mail Stone) ah mel(6) a inziahna kalh chu kan thleng a, Chulai chu Lamțhuam an ti mai a, Hmanlai In Ramhuai an tlawnnan an Inthawi țhin niin an sawi. Chu Lamțhuam ah chuan Kawng peng 4 ngawt hi a awm a, kawngpui in a zawh tlang chu Buannel panna kawng a ni a, A bak 2 te chu hmundang panna kawng leh an Leilet neihna panna kawng a ni a, Peng pakhat Dinglam a peng kawng chho tlan nghal ngaihna kawng chu 'Lal In' an tih panna chu a ni. Lamțhuam atanga kan penchhoh Meter 200 vel zet chu kawng chho awih tlan nuam tak a ni a, tlang kan lawn chhuah ah mual zal deuh kan zawh phei leh par par hnuah Hmun nuam deuh mai kan thleng ta hlawl mai a. Phul hmun nisi, thing chang tha tak tak awm thelh sungna a ni a, Chunglai a thing awmte chu Far thing kan tih leh An rama thing manto pawl tak Thing Uk an tih te a ni hlawm.. Chu phul hmun chu thing tuai ngil tha zet zawt tak hian an hung pup a, Sekawtrawlh inhawng hiau ah chuan kan tlan lut a, In lian zet mai a lo ding luah a, kawtlai vel chu pangpar leh thingkung tawi buk leihlawih tak awmze nei taka phun te chuan a lo chei vul chuk a ni ber. In thlenhma kawng sirah chuan In lian ve tak dinglam ah a awm zui a, Chu chu Sakawr in leh Beram huang a nih thu min hrilh a, Kawt zawla motor kan tih din rual chuan Uipa lian țha thelh thawlh tak 3 hi an rawn lang nghal țhawt a, an nelawm fahran lemlo.

In sirah chuan Motor dahna in hlui ni ngei tur a ding a, a chhungah chuan Motor khuh hlun pakhat leh Khawchhak lam Jeep hmanlai niawm tak pakhat an awm a. Bang kil lamah chuan Khawchhak motor Jonga ang tak a ke nei tawhlo, Lunga do kan mai mai hi a ding hlui bam bawk a.. Chung te chuan engemaw ti takin min hneh ru riau pek a ni. Chung motor dahna In hlui bula kawt zawl chu Phul kawlh deuh hmun a ni a, Khawthlirna nuam tak a nih ngei a rinawm.. Chumi atang chuan Kaptel khua chu a lang eng ve țhat bawk... An In sak dan chu Khawchhak lam In sakdan nisi, Changkang ru tak si a ni a, Chhawng 2 lai a ni nghe nghe.. Inchung chu Leirawhchan Inchung ang chi kha an la hmang a, Bangah pawh leirawhchan bawkkhup in an rem bawk a.. Min hruaitupa sawi dan chuan Heng In bangte hi Rocket Luncher pawn vawikhat ah a phin darh zawh loh tur khawp chhah in an remthuah niin a sawi.. In hnuai zawk chu Lei chhuat ni mahse Lung lian țha leh mam nalh em em mai uluk taka rem chungah inhung a ni a. An sawi dan chuan chu In innghahna lung an lak lai chuan Kawl sipai sal ho in Mel 20 vel a hla a mi Bawng tawlailri hmanga an thiar khawm niin an sawi, Lung hi thuah hnih laiin an rem nghe nghe.. Vanranda chu zau deuh halh nisi in an hung pap a, Pangpar enkawl uluk tih hriat tak an hung far nghe nghe.. Kawngka pui chu Hawn khat chauh a ni a, Kawngkapui an siamna chu thing dum sen deuh tliang hlurh mai a ni nghe nghe. Chu In leh a chhehvel en chuan he In sak a nih lai leh helai hmuna chengte hi mi khawsa thei tak an nih ngei a rin hriat theih nghal mai a ni.

Motor kan dinrual a Ui rawn chhuak te chuan min boh lemlo, min en kur mai a, an țhu tlar țham bawk, Kawngka a inhawng a, Tourch light eng fiah tak mai keng mipakhat hi a rawn chhuak a, Pu Kama fapa Zamneihpau chuan Paite țawngin a lo be vat a, Chupa chuan kan motor te kei mahni te chu min chhun pup pup a, thawp sup hian "Lo lut rawh u" ati bul ta hmuk a. In chhung kan lut chu ka beisei ang a ni ta hauhlo mai, Lei chhuat ni tura ka rin chu Lei chhuat awzawng a lo nilo, Thing phek chhah tha zet mai uluk leh mawi taka rem a lo ni a, chhuat chhah zawng hi 2 Inch lai a chhah niin Zama hian a sawi, Inchhung kan luha kan din na lai chu thawl zau deuh huau engmah awm lemlohna a ni a, A dinglam leh veilam ah chuan corridor a awm phei zui nghe nghe.. Chu hmun chu kan kal tlang a, Puan lo inzar ah chuan kan lut a, Thutkhawmna pindan zau leh fai nawm hmel deuh kan pawh ta a, "Tah hian lo țhu rawh u" a ti nghut a, Kan luhna lam ah chuan a chhuak zui leh ta mai a. Chu room chhungah chuan Thutlengsei cheimawi awmze nei taka design hi a inhawi tawnin an rem a, Bang kil lamah chuan Mei thuk lian hemhawm deuh a awm thung.. In chhung bang chu pawnlam anglo takin uluk zeta Thing ze mawi deuha cover vek a ni a, Bang chu chiang deuha en loh chuan thing ½ ft. lek lek a hlai rem khah dal a ni tih hriat loh khawpin an rem phui nalh.. Chung bangah chuan Mizo zia tih lanna Fei, Silai, Chempai leh Chemsei, Awmphaw etc an thar a, Sazuk Ki hreu bum leh Sakei lu, Tumpang sial lu an tar tel bawk a, Mei chhemna bang lai takah chuan Hmeichhe 1 thlalak black & white hi lian puiin an tar kung a, Chu hmeichhia chu hmelțha tak leh nui mawi tak a ni a, A sam dum hlap chu a dar dinglam ah thlak thla zan a, a bek veilam ah chuan nauban par niawm tak a inthiat vang bawk. A nui hmel a nalh ang bawkin a mitmeng chu a nalhin a zahawm ru viau mai. Kan en chhung chu min rawn melh reng ni mai hian a hriat. Mei chhemna chung awl lai ah chuan Thlalak frame nalh em em lemlo, mahse uluk taka enkawl tih hriat tak hi an lo rem tlar pat hlawm a, Hawkdak hek Kan pan hnai a, kan en chiang a, Hmanlai Kum 1940 -50 Inkar vel thlalak daih a lo ni tawh a, Chung zingah chuan Pitar sam var vek tawh hmaitluak țha leh nui sang mai hi Hospital khum tih hriat taka mu nen a Maawmi biang insi deuh thaw a an awm dun lai thlalak chu a lo intar ve nghe nghe a.. Kan fiam nak nak hlawm a, Chutia kan en nak nak lai chuan "Thingpui ka rawn chawi che u a" Hmeichhe pakhat aw hian a rawn ti a, kan lehhawi vat a. Hmeichhia Kum 40 ralkai tawh tih hriat tak, hmeltha ve lam deuh hi nuisang chungin thingpui no tray a chawi chungin a lo ding a.. Thingpui chu kan la sap sap a,. "Longtime no See Dr.Maawm" tih ri kan hre zui nghal a, Kan luhna lam atang chuan Pitar Sam var vek tawh hi Wheel chair ah kawng min hawnsak tupa khan a rawn nawr lut mek a. "Pi Margaret i dam maw? i țha zel em?" Chibai pah chuan Maawmi chuan a ti ve nghal a, "Inlo kal tir thu i rawn thawn kha nimin khan kan hmu ve chauh a, kan dawngsawng țhat hmanlo che u a, min ngaidam dawnnia... Zama i pa a dam maw?" tiin min hruaitupa chu a be zui nghal a, Zama chuan paite tawngin a chhang vat a, an nui var var bawk a.

"I țhiante ho an ni maw? tuber hi nge i pasal ni tur chu?" Pitar chuan a ti a, kan nui ham ham a, kan nih loh thu leh a pasal chu keini aia chhia a nih thu te chu fiamthu pahin kan hrilh a, a nui ve hak hak reng bawk a.. Kan ti ti luam hnuah "Kan riahbuk te sual kan duh si a, kan ti ti kan duhtawk phawt mai dawn em ni?" ka ti a, Phawk hra hian min en a "riahbuk sual in tia law?" a rawn ti a, "nia, ka pi keini ho hi hetia kan zin hian hotel emaw mimal emaw kan tibuai duh lemlo a, an inhuam viau pawn zalen taka kan khawsak theihna tur Bukte sa in kan inkulh mai țhin" ka ti a.. a nur nang nang a.... "hmm in dan dinglai anih chuan sadai ka țhiah sak ngawt theilo che u, Mahse Dr.Maawmi erawh a rawn zin hun atan a kan lo dah awl khiau tawh a room turah a riak thung ang" a ti ta a. Tha kan titlang bawk a, inrem tak chuan kan buk siam turin kan chhuak zui ta nghal a.. Pawn kan chhuah chuan pawn chu a lo engkulh tawh a, Zan a ni a kan lo hmulo mai mai a lo ni, In comound hungna ban karthlak chuan Chaina khawnvar ang type chu an lo khai thluah hlawm a lo ni a.. Khaw chuan nuam lam tura an tih Motor in kawt ah chuan kan riah buk tur Puan In kan kaih ta a, a bak chu a tuk lama buaipuiah kan dah ta rih a.

"Nizan in mu tui bawk em? He kan awmna hi tlang thengthaw nuam leh zo ve tak a ni a, Thosi leh Miseh ka tih ang hi kum tluan hian an awm manglo a nia, Furpui ințan dawn chho, boruak a hnawng țan velah an rawn inlar ve zauh a, chupawh kar khat vel baka ni ngai meuhlo" Pitar chuan Varanda a țhu chuan a ti a, Kan che vel chu minlo thlir dauh dauh a, "Nia, engmah mi seh an awm lo tak tak a nia, a nuam khawp mai, Van lah khi a lang hnai kuar bik in ka hria" ka lo ti a, kan nui ham ham a, "Nia, keipawh Nizan thla rawn lang pawh kha a bial lian bik riau a hriatna ka nei mawle" Hmingthana chuan a lo ti a, "ania sin Helai hmun hi kan pipute khan an pialral kalkawng pawimawh ber niin an sawi nghe nghe thin a sin, Pawih thawnthu ah phei chuan He hmun an thlen hian Lungleng reng reng in hun an hmang a, an thlarau kha an vakvai ta țhin a, Lamțhuam an tih hmunah khan pan tur zawk hreloin an tap reng țhin an ti... Buannel an thleng a, an lunglen a reh a, Chumi hnuah Vamurah changin Rihkhawdar panin an thlawk liam ta țhin an ti a, helai hmun han thlen hi chuan an thawnthu chu nitak tak awm mange tih mai awl tak a ni, Vawiin ah Buannel intlawh dawn phei chuan mak ti khawpin in awm ang mawle" Pitar chuan a ti a. Kan ei siamna tur te thuthleng te kan siam zawh hnuah kan insingsa fel a, Tukțhuan ei turin kan inhawrkhawm ta hlawm a.

"Ka pi vawiin chu i ho Buannel kan tlawh ang chu mawle, Kan motor hi a sawi a na vak lo a nia" Patea chuan a ti a, "Ka chak khawp a sin, Kum 10 chuang chu ka thleng ta lo, kan motor kawl velah saw nawr nun chawp ngai reng a ni mai si a" nui hak hak chung chuan a ti a. He Pitar hi nu hrisel țha tak a ni tih a awmdan velah chuan a hriat mai, a beng a la chhet lova, a mit a la fiah em em a, a ha a la bal miahlo lehnghal, a ngal sei danah nute chhe tak chu a nih a rinawm lemlo.. Beng parh ve vaw tak a ni a, a sai ngho behna abeng verh chu a uai dar a, a kaw pham bawk a, Bakilh Phengphehlep lem Silver a siam a kilh vang reng bawk a,. a fai veng reng bawk nen a ngainat awm hliah hliah a ni. "Chutiang a nih phei chuan lokal ve ngei ngei ang che" Ka lo tive vat a, "Nikhat cham in kal a nuam bik a sin" ala ti ta deuh deuh a, "a la hla viau em ni?" ka lo ti a, a ngawi vang vang a, "Hmanah khan Mel 20 kan ti tain ka hria" a ti a, "Chu Km 40 dawn a la ni tihna a ni maw?" ka ti a.. "a ni awm e" a ti mai a.. Patea chuan Hmmm.. tihian ti ang, Puan In te chi ka kenga chutah chuan ka pi hi a mu mai ang a, midang erawh chu puan phah chungah kan tlingtla thei mai ang" a ti a.. Ka thu a rual leh pek hle. Kan sawi ho laih laih hnuah Pi ber ho a Buannek kal chu kan ti tlu ta nge nge a.

Chawhma lam dar 10 pelh hretah Kan chhuak a, Ngokam chuan Jonga chu a lo khalh thiam hlauh bawk nen, kan bungbel leh kan mutbu tur nen kan thawk chhuak rip kher mai... Kawng chu a nuam fahran lo nangin chhe hrehawm lutuk chu a ni biklo, Motor ka khalh a, ka sirah Pitar chu a țhu a, a ti ti siam siam reng a, Kan nui leh ham ham țhin.. Kan tlanmuang em mai bawk a tlailam dar 1 velah Buannel chu kan thleng ta hlawl mai a.. A thlen hma Km 10 vel atangin a boruak a dang zar tawh a, Chhawkhlei leh Pangpar dang an lo vul chuk tawh a, Tlangsam kung malpui tia tia an ding thelh sung bawk a, an in zar pharh duai a, a hnuai chu mihring duhtawk a tlan theihna tur khawpin a thelh nghe nghe.. Sazupui var kawng kan hmuh tur an awm leh zauh țhin a, Sava chiar nak nak nen, hriatthiam theih chiah siloh chhuan kan lungleng ni berin ka hria. Kan Pi ber pawh a ti ti tawh biklo, Buannel kan thlen thlengin a ngawi ngar a, a rilru a kawm ni ngei tur a ni.. Dr.Maawmi lah engdang a ngaihtuah tawhlo a camera a hmet zawt zawt reng bawk a.. engkim mai chuan lung a ti leng hliah hliah a ni ber mai.

Buannel ka thleng ta, Mual nalh zet mai, bung vut ni silo awih ru deuh si ang hi a ni ber, Phul a țo hring nghulh mai a, Phul hniam chi niin a inphan chhuak vek a, Thlifim a thaw heuh heuh bawk a, phul kara pangpar zam chi par sen leh var, a eng voilet rawng tihte chu an par nghelh mai bawk nen mit a tlaiin a hahdam sawng sawng theih niberin a hriat. Keini chauh nilo hmun 3 laiah Inkulh an lo awm ve bawk a, Lei lan zauna deuh, Mei an lo chhem țhin tawhna hmun pakhat fal deuh bikah chuan kan inkulh ve ta a. Kan thlen tirh atan tu pawh chu kan helhhawlh nge kan mu a, kan vak darh a, thla kan la a, kan in um a, nuam kan ti em em ringawt a ni. Chutiang a kan talvel hnuah Tui awmna nia an sawi lam ah Gallon nen Tui chawi tura liam tawk kan awm a, Thenkhat Tlangsam kung ro lo fawmkhawm tawk kan awm a, Thenkhat Ei rawngbawlna tur thing lo phun tawk an awm bawk a, Kan buai sang sang a.. Ni a tlak dawn hnaih ah chuan kan camp ah kan awm țhap a, Beer kan dawm a, Guiter perin kan zai a dial dial tawh.. Nitla tur kawl eng sen phut maiin Chu Buannel hring nghulh mai a chhun tluka mawi hi khawvelah ka hmuh lehpawh ka ring tawhlo..Ni tla tur chu a chiang kulh bik niin a hriat..

Khua a thim a, Emergency light leh Solor ligh kan neihte kan chhi eng thliah thliah a, Kawl kil atangin thla a rawn dak duk duk bawk a, Chhun a mawi em em mai kha, zan a nih pawn a mawina a let in a pung ta emaw tih mai turin a eng no sut mai a.. Thlifim thiang kak mai chu chhim hawi zawngin an thaw seng seng reng a, Zanriah ei thei a lawi kan awm lo, Phone hman theih nise kan ngaih deuh te kan be chul awm a sin.. Arsi a rawn lang pe ut bawk a, Thla bial chu a hnai kuarh ni maiin a hriat, Midang awmve tepawh keini ang țho chu an ni awm e. Khuangchawi thla eng no nghulh mai hnuaiah Phul a chhun tlet sur mai chungah chuan kan leng kual vel a, tumah inhaw hmel kan awmlo... Mahni In lam ngai hmel kan awm heklo, Chulai hmun a aawm chu nuam kan ti hliah hliah hlawm. Kan Ar puahsa ken chu kan hem a, Beer kan chhawp a, thla eng hnuaiah Țingțang perhin kan zai ta rawng rawng a. Kan hla thiam ang ang kan thawh khawm a, Mei kan kil bial laih a, Fakna hla, love song, Lengzem engmah gap a awmlo, hla hruaitu in a lak lak chu kan sa ho dial dial reng mai a. Kan bul vela awmte chuan kan awmdan chu nawmhmel anti deuh nge min rawn pan khawm laih laih a..

Group khat chu Kawl leh Sap inpawlh an ni a, Pakhat leh chu Kawl hlang niin midang leh chu Korean lam mi daih an lo ni a.. Kan inchibai nak nak a, an ei tur neih te an rawn keng khawm bawk a, kan zai ho ta dial dial a.. Engkim mai chu a fuh vel vek, Kan inhmelhriat chhoh zel takah chuan keini ang bawka Zirlai nih atanga inkawm emaw University a kal ho emaw an lo ni ve hlawm a..English chu kan țawng hman tlan theih awmchhun a ni nghe nghe.. Kan Musician neih ve ber Hmingthana chuan a duh duh hla a la tawp a, kan țhiam zawng a nih chuan kan lo sakpui nghal vat țhin.. Chutiang a kan zai mek lai chuan Ka thawk lawk a, ka ding hluai a... "Minlo hrethiam u la, hla ka thlang duh tlat mai, Kei mahni Mizo hla ngei mai, 'Chhawrthlapui leh Siar zawngte' tih nita in ka hria, C.Vansanga sak ngei kha kan sa vang vang teh ang" ka ti a.. English in a thu awmzia tlangpui ka sawi zawr zawr hnuah ka thiam vang ni hauhlo chuan ka zai ta veng veng a.. Hnampui te bula khawsak nawm na chu kan thiam leh thiamlo lam min ngaihven lo, kan thiam ang tawka kan tih a nih chuan lungrun takin minlo ngaihthlak sak a ni mai... Ka zai zova kut an beng dar dar a... Sap pa Williama a rawn ding a, "Ka zaithiam lo, min hrethiam ula, ka țhiannu hi University a kan soloist a ni a, a ni hian ka hla duh em em Hervest Moon Neil Young hla ngei kha min sak sak rawh se" a ti a.. Kut kan beng dar dar a "Kim, Kim,,kim" kan ti țhap țhap a, a hming hi Kimberly a ni awm e, Australian lam chhuak a ni nghe nghe.. Guiter chu a perh a, Uluk zet chuan Neil Young hla kan ngaihthlak țhin ngei mai chu a rawn sa ta veng veng a, a van țhiam kher em.. Chutiang zel chuan a duh duh in hla kan thlang a, Kimberly chu kan zai tir ta zel a, hla a thiam hnemin a sa nalh thei em em vek a.. Amah ngeiin a thlan Bridge Over Trouble Water tih hla a sak te, Simon And Gurfenkel hla The Boxer a sak te chu nalh ka ti zual,... Kawl tlangval hla thlan 'The moon the star and me' tih hla pawh a thlawh nalh viau...

"Ka thlan ve hun" Kan Pi chuan a rawnti a, kan ngawi thap a, Thla chu Vanlaizawlah a ding eng luah a, kan hmuh phak chin phul hring nghulh mai chu a chhun tle siau mai bawk a, chung eng lawm chu niawm takin Chhimbuk leh Vabak an rawn inchhawn dut dut bawk a.. Hei lo liama Vanram tih mai awltak tur a ni. Lungleng mi tan chuan hla thu ziah mawlh mawlh tur a tam khawp ang.. "thlang rawh, ka pi" Kimi chuan a lo ti vat a.. Kan pi ber țhutna awn lam deuh nawm hmel taka țhu lam chu kan en țhap a...

"He hla hi, ka mipa hmangaih hmasak ber, Ka fapa pa, ka pasal ni țhin, Khawvel tawp lehlam a Indopui vanga rammu chin hriat lohva bo ta vang vang Capt. Albert Clayton Birmingham City a piang leh seilian hnen ațanga ka lehkha dawn hnuhnung bera a rawn tarlan 'SAVE THE LAST DANCE FOR ME' tih ngei mai kha min han sak sak ve teh" a rawn ti a.. Kan ngawi țhap a, amah lam chu kan en țhap a... "Enge?... i thiam lo em ni?" nui chung chuan a ti a... "ka tihpalh, I hla thlan leh i story kha min sawifiah sak deuh thei em?" Kim chuan a rawn ti a, "Ni e" kan lo ti sap sap a... Nui hak hak chung chuan, Chutiang țhu leh hla engmah sawi tur tham a awm lo... Mahse he hla hi khawvel a ka hla duh leh ka dah pawimawh ber a ni kumkhua ta a ni" a ti chuai raih a...
You can dance-every dance with the guy,

Who gives you the eye,let him hold you tight,

You can smile-every smile for the man,

Who held your hand neath the pale moon light

But don't forget who's takin' you home

And in whose arms you're gonna be.

So darlin' save the last dance for me"... a ti sap sap a, Chutah Kimberly chuan guiter hrui chu nalh em em a hrut chung chuan a zai ta vang vang a... A hla thu leh a thluk zun a uai chung chuan Piber thusawi lan zuai, A hmangaih ral rama boral ta nen an inkar boruak lungleng reng reng a an hmang tur mitthla chungin Zan thla eng bial fiah kuk mai hnuaiah chuan khawthlang lam kil tawpa arsi phe sep sep chu țangdang kan thei map lo chuan ka thlir dauh dauh a. Ka țap chhuak emlo chu ka mualpho lohna tlemte a ni. Hmeichhe ho chu an mittui an hru sap sap a, Mipa ho lah kan țhu ngawi kar hlawm a, Williama pa san țha leh chal kawlh tul mai, biang sen suah lunglen hreve ngailo tur hmelpu pawh kan harmei chheh chu mit la sawn miahlo chuan a en vung vung a... Capt.Albert chuan He khawchhak tlang chhengchhe taka amah nghakhlel taka lo nghaktu Nula Margareti chu mitthla chungin lehkhathawn a ziak ang a. A nula ni mahse Mipa te kawlhrawnna Khawvelah zawng hmeichhe kawppui neilo lengvel chu lamna hmunah te lenpuiin amah hrechang lo lekin lam a lo thai mai ang tih hlau rilru tak chung leh, Chutiang chu lo thleng pawh nise atan lam hnuhnung ber tal chu lo zuah sak hram hram tura a ngen tur lunghnur tak leh thik rilru tak chunga a suangtuahna vak vel rual chuan he hla hi a ziak malh malh tur te chu mithla ah a lang uai uai a, Mipa tan pawn lunglen luat vanga țah vak vak mai a chakawm ngei mai.

"Oh I know that the music's fine

Like sparklin' wine, go and have your fun

Laugh and sing, but while we're apart

Don't give your heart to anyone

But don't forget who's takin' you home

And in whose arms you're gonna be

So darlin' save the last dance for me

Baby don't you know I love you so

Can't you feel it when we touchI will never, never let you go

I love you oh so much

You can dance, go and carry on

Till the night is gone

And it's time to go

If he asks if you're all alone

Can he walk you home,you must tell him no

'Cause don't forget who's taking you home

And in whose arms you're gonna be

Save the last dance for me.

So darling, Save the last dance for me.

Oh baby won't you promise that you'll save,

The last dance for me

Save the last dance, the very last dance for me."

*********

Buannel atang a kan haw chu kan boruak a dang chiang kher mai, kha hmun zun ah khan kan uai a, Kan che theilo a chha a ni mai..Kal lam aiin haw lam ah kan thleng tlai zawk a, Zan dar 9 ah kan thleng hram.. Tumah kan inbe lo, ngawi rengin kan in singsa mawlh mawlh Petera a tih mai kan thlen zana minlo dawngsawngtu chuan Pitar chu wheel chair nen a lo hmuak a, zo takin a pawm nawlh a, engemaw hi a sawi suap suap a, an nui dun hawk hawk a... Inchhung an luh thlengin ka thlir zui reng a... Kha Pitar chanchin kha hriat ngei ka tum ta tlat a.

"Khawiah nge an awm zawh vek a?" tiin Nu rawngbawl a lo phusa mek hnenah chuan ka zawt phawng mai a, "Josua a lo haw dawn a, hmuak turin an kal a nih kha, I țhiante pawh an kal ve a, Doctor leh ka u chu Inchung lamah an ti ti a nih kha" a lo ti a, ka sana ka en a, Zinglam Dar 10 chauh a la ni si, tukțhuan an ei vek tawh a, Lunch ei erawh a la hunlo deuh. Zanah ka muhil thei mai lo a, Zing dar 2 a rik te chuan ka suangtuahna khawvelah ka la cheng hle a nih kha.. Zu ka in vaka ka muhil nghet leh hle a lo ni a... "Breakfast i duh em? Lahpet thouk, Flan leh coffee a awm?" nu chuan a ti a, Dawhkan a a khuh chu a hawng a, khuhriang chhin nei a inchhawp dal chu plate te ah min suah sak a, Kettly te a mi coffee lum vat vat chu min thlit bawk a.. Ka duhtawk ka in ei hnuah Inchung lam pan tur chuan ka chho zui ve ta nghal a.

Inchung panna kailawn tawp ka thlen chuan chhuat tliang hnum hlur mai veranda ang deuha siam room pawn ah si chuan a lo awm a, Kaptel khaw lam lan theihna a ni nghe nghe.. Chutah chuan Dr.Maawmi leh Pi Margareti te chu an lo ti ti a, Pi Margreti chu Weaker Chair ah a lo țhu buk lat lat a, a bul chhuat a zampher phah chungah chuan Maawmi chu a lo thu sawp niaih bawk a.. "E i tho ve thei ta maw? i thi emaw kan ti hman a sin mawle" Pitar chuan minlo ti fiam hlut a.. "Nia, Zan mut ka thei lo pek a, Ka mut ve meuh chuan kawl a eng tawh a" ka ti ve mai a, "i damlo emni Țhianpa?" Maawmi chuan a lo ti vat a, "dam e, Buannel zunah ka la uai vang pek mawle" ka ti a,an nui hak hak a.. "Ka pi tunge Josua chu?" ka ti a... nui var var chung chuan "Ka fapa neihchhun mawle.. Rangoon ah thlakhat lai cham turin a zin a, a rawn hawh ve tawh dawn a nih kha.. Engmah thiam a neilo, zinkual vel hi nuam a ti em em ringawt a, a farnu Sanda (Sanda Pali Htun ) Ka nau Ngurkunga leh ka monu May Myat Aung (Noble Maiden Succed) te fanu nen an zinvak a" a ti a.. "Tunge May Myat Aung chu ni a?" ka ti leh hram a.. nui hawk hawk chung chuan 'Mawii' kan tih khu mawle.. Kawl nula a nih khu ka nau nen hian an innei a fanu duhawm tak Sanda Pali Htun an nei mawle.. a hming awmzia chu Thla eng mawitak tihna ang vel a ni" a ti a.. ka fiah ta kuar in ka hria...

"Doctor, ka room ah sawn va lut la, Khum lu chhuar a ka bawm dum chhin nei kha min va lak teh khai" a ti a.. Maawmi chu a tho vat a, reilote ah arawn let leh nghal mai a, Bawm dum hnum hlap mai hi a rawn chawi chhuak a, Pheikhawk bawm tiat vel Savun a tuam hi a ni a.. A inkalh na ah chuan a chabi awrh lai chu a hawlh a, a ri rek a, a inhawng țial țial a.. Bawm chhung ah chuan lehkhathawn hlui hmel tawh tak tak hi rubber in a ințawn khawm a, chumi hnuaiah chuan Thlalak hi sarangah laminate vek a inrem am a, "Hei hi keimah, hei hi ka nau, hei hi ka U tlangval laia boral, hei hi ka Nu leh pa" tiin an chhungkaw thlalak Black & White chu min en tir a, an thlalakna hmun chu hmun nawm hmel deuh hi a ni lawi a, "Ka pi hei khawilai hmun nge ni a?" ka ti a, "Bombay a nih kha...Ka pa hi Sipai Kawmpawndar a ni a, Sap sipai hmunpui pakhat a nih hi.. hetih lai hian pawl 6 ka zir lai a nita in ka hria" a ti a.. Thlalak dang min hmuh leh a, "Hei hi ka nulat țan tirh a nih hi Kum 16 mi lek ka la ni" a ti a, "Hei hi Captain. Albert Clayton a nih hi, kan dinna hi Methodist Biak In kawt a nih hi" a ti a.. Ka phur ngei mai, "Ka pi Capt.Albert nen chuan engtia rei nge in inkawp a, engvanga boral maw a nih?" ka lo ti vat a, a rohlu bawm chu a khawih nap nap a, a khar a, a malchungah a dah thlap a...

"Kum 1937 November thla nita in ka hria, 37th Kumpinu Sipai Headquarter ah ka pa Asst. Komponder a thawh lai a ni nghe nghe..Sipai awmsa an haw a hun a, Sipai thar an rawn thlen a hun bawk a, Kei chu kum 14 mi lek ka la ni a, khang hunlai khan nulat hrerual ka ni tawh awm e. Ka Sipai hmelhriat Srg.Mc Arthur te, Capt.Solomona te, Lt.Desmond te ho vai liam turin lawng chawlhna hmunah ka țhiannu Kasturi nen kan kal dun a, Pawl 8 ka zir ve tawh. Chutah chuan Capt.Solomona chuan a țhianpa a hmu a, an inchibai lawp lawp a, Ka thiannu Lasturi chuan hmelțha a lo ti em em a, chutah Capt.Solomon chuan "Nulate u hei hi Capt.Alberta min thlak tu tur a nih hi" tiin min hmelhriat tir a, chu chu kan Intawnna hmasa ber a ni. Thlalak a mi ang khan Pa khansang tak a ni a, ngo sen vuk nilo, a mawi tawk leka ngo a ni. Hmuihmul a zuah buk laih a, a bek sam chu a zuah sei zal bawk a, Min rawn pan phei a, Kasturi chibai talo chuan kei chu min rawn chibai pah chuan " I hmelțha hle mai, China mi i ni maw? Nge Burmees?" a ti a, ka zak lutuk chu ka sen vek in ka hria.. Chumi atang chuan min rawn tlawh ta zauh zauh a, Kasturi chuan chang lo mahse min lawmpui em em tho.. Kei chuan ngaihzawng en in ka en ngamlo hrim hrim... Kum 1 a awm hnuah pawh ka la pawh ngam chuanglo.. Ka nu kha nu fimkhur tak mai, Mizo Lal fanu rilru paukhauh zet mai kha a ni a, Min khap bur bawk nen kan inkar chu sawi thiam chiah silo chuan a insi ve det det niin ka hria. Kum a liam leh a, Burma lam ah Sawn a ni ta daih a. Ka lo ngaina hman hle a niang, ka ngai em em a, lenpuia min sawm changa kan len dunna Tuipui kam te chu ka fang leh ringawt țhin.. A insawn ațanga kar 1 liam hnu lekah lehkhathawn ka dawng ta malh malh a, ka chhang let ngam mai lo.. Min thawn zin em avang chuan ka chhang lo thei ta lova. Chutia ka chhan ve takah chuan kan lehkhathawn chu kan ziak huai tual tual a, Kum ka tlin vela min neih a duh thute a rawn sawi ta a, khatih hunlai a ka lawm zia leh ka zah ruk nasat zia kha aw" a ti vang vang a... Keini 2 lah chuan chhuat a țhu nuaih chungin a sawi zawm leh hun chang ranin kan lo țhu ka ho mai bawk a..

Kum 1939 atang khan German ral a lian a nih kha, Indo a kal thut thei a nih thute, kan inneih huna kan awmdunna tur a ngaihven mek thute a rawn sawi chamchi bawk a.. Hemi kum October thla hian a rawn zin ta hlawl mai a... Indopui hmachhawn tura kal a ngaih thu leh Kei chu nupui tura min hualna zungbun min pek a duh vanga rawn zin a lo ni a.. Ka nu leh pa bulah ka sawi ngam silo, Khatih laia k rilru mangan zia kha.. Capt.Alberta kha ka chan ka hlau bawk si, ka nu leh pa ka hlau bawk si, ka khumah ka let ka let țhin a.. Kar khat lek cham tur a ni a, a hmanhmawh ropui si.. Keini Mizo tihdan ah chuan nu leh pa te thu hmu hmasa lo chuan inhualna kan ti ve thei hauh silo... Kar khat chhung khan Kan Inah vawi 20 vel a rawn lang hman awm e.. A hawn hma zanah ka pa hnenah Zanriah min eichhuahpui a duhthu a rawn thlen ta pek a, Ka sen ap ap a, Ka nu khirh zawk tura ka rin chuan "Nang ang mipa bulah chuan kan fanu te chu zalen takin kan kal tir phal reng a lawm" a lo tive tlat mai.. Ka lawm lutuk hi ka nu kha ka kuah nawk nawk lo chauh a ni. Chutah ka nightdress tur kawr fual khum khuh, dar puk laih mai leh arh deuh lek lek, parsin te te a par a senno hi a rawn phawrh a, "Hei hi min lenchhuahpui dawn vanga ka lawmthu sawina ni rawhse" a ti a.. Ka insiam reilo kher mai.

Bombay khawlai ah Sakawr tawlailir ah chuangin khua kan chuan dun a, kan hlim dunin kan inkai deuh chawt reng a, Zanriah ei khamah Cinema kan en dun leh a, Sap sipai officer ho tan bika an siam Cabin ah kan 2 chauhin kan awm dun a, Hetah hian Khawvela ka mipa fawh hmasakna ber chu ka tawng ta a ni. Thla kan la duh a, kan hlim dun kher mai.. Zungbun min pek pah chuan "Damchhunga ka nupui ni turin rinawm takin lo awm rawh aw" a ti a, ka lo amen em em a.. Kham lo takin chu zan chu kan hmang liam dunta a ni.. Hun a liam a, A lehkha ka dawng reng a, ka chhang ve reng bawk.. Kum 1943 ah a rawn haw ta nawlh mai a.. Chutah chuan Inneih a duhthu ka pa hnenah a thlen a, Ka pa chuan a lo phal ikhaw lo mai... Lunghnur deuhin a awm a, Kan inhmuh pawh a remti ta lo.. Rem kan ruat dun a, Tlan dun mai chu kan tum ta a.. Zirtawp ni a Burma ram pana kal tur lawng ah chhan kan tum ru ta a ni. Tichuan kan ruahman ruk ang chuan kan chuang a, Kasturi hnenah ka lehkha ka ziak a, ka nu leh pa pe turin ka dah tawp a.. Ka nu leh pa rilru nat tur zia kha ka dawn pha lo... Kar khat dawn teh meuh lawnga kan chuan chhung hian min tlanpui tu Sipai rothap pui chuan farnu duat takin min duat a, Min mutpuia nupui chei a min cheibawl chuang heklo.. A polite em em a, min ngaihtuah em em ringawt a ni mai. Burma kan thleng a, Engmah sawi set set lo chuan Rangoon atangin tuna kan awmna pan hian Sipai 20 rual nen kan kal ta vang vang a.. Helai hmun kan va thlen hi chuan In hi an lo sa mup mup a, an sa zo a ni deuh der tawh..

In kan luah zan chuan Sipai leh hnathawk ho nen zanriah kan kil tlang a, Kei chu a nupui ka nih rualin Dan anga innei kan la nihloh thu a sawi a, Kan hlim khawp mai.. Zan kan mut laiin Sipai pakhat a rawn kal a, Rangoon ah rang taka kal tura tih a nih thu a rawn hrilh a.. A tukah min kalsan ta thut a, Sipai 5 leh chhiahhlawh 3 nen kan awm ho nawlh nawlh a..Ni 4 hnuah a rawn haw a, a hlim em em reng ringawt a.. A tukah Buannel ah kan leng dun a, kan inhmangaih zia thu te kan sawi dun mawlh mawlh a, A nupui ka ni a, a duh duh a awmtur ka nih thute ka hrilh ve hial a.. A nui mai a, Tichuan kar 2 zet hlim leh nuam ti taka kan awm dun hnuah Ka pa hnena kir leh phawt tur leh America ram buai vangin Indo tura a zin a ngai thu a sawi a, Lehka min thawn reng tur thute min hrilh a.. Tichuan Rangoon ah kan kal a, Chuta țang chuan kan ințhen zui ta nghal a.. He mi ni hi August thla nita in ka hria a ni a..Ka thianghlimna ka hlan tawh a, min kalsan ta ah ka chan a, ka na kher mai.. Ka muhil thei lova, India rama kir talo chuan Kan awmdunna In bawk chu ka pan leh a, Sipai 2 in nghatu lo awmte nen khawhar takin hun kan hmang chho ta bek bek a.. Thirhrui ka thawn ah Ka lo nghak reng zawk tih thu ka hrilh chu min rawn chhang vat a, lawmthu min hrilh luam nghe nghe..Ka U a boral thu min rawn hrilh te chuan min lainat thu a rawn ziak kur ngei nguai a.... Thla 3 hnuah ka ruak lo tih ka hria, ka lawm em em rualin ka huphurh bawk si, Khatih hunlai khan Capt.Alberta kha awmse ka thla amuang huai huai ngei ang...... Chutah Athawm riva ka hre thei ta reng reng lo mai.. A lehkhathawn pawh thla 2 zet ka dawng tawhlo... Ka beidawng lutuk chu chaw ka ei thei bawk silo, Ka chhe tawlh tawlh a. Chu chu Sipai chuan ka pa hnenah thirhrui a thawn .. An fanu an mahni kalsantu chu engahmah an ngailo turah ka dah ngawt a, teuhlo mai.. Ka nu leh ka nau mipa Kum 12 mi lek chu an rawn lang chho rang kher mai..

Ka rilruhah chaw ei thei bawk silo chu ka damlo chho leh ta zel a, Ram damdawi Burma doctor in min chawh te chu ka ei a eng ka ang mai thei lova, ka nute rawn thlen hi chuan ka țawng peih meuh tawhlo.. Pawi em em chu Doctor hnenah nau ka keng tih ka hrilh lo kha a ni.. A damdawi min pek kha Naute tan a țhalo hle a lo ni a, Tichuan Naute nun chhan nan thla 9 a nih zan ah kan In chhungah ngei hian min vei luih tira min neih tir ta a ni. Ka dam a, naute a dam bawk a, Mahse rual a ban dawnlo tih a rawn hriat nghal viau thung... Hemi țum hian Doctor rilru na lutuk hi kan nufa in kan hnem mawlh mawlh zawk hial a ni. Chu doctor chu ka nau nupui pa hi a nita nghe nghe.. Burma mi nimahse Budish zuitu nilovin Kristian sakhaw zuitu a lo ni hlauh lehnghal. Naute ka nei hrim hrim chu ka lawm tawk em em, lehkha ka ziak a, Naute ka neih tawh thute chu ka hrilh kur dup a, thla 2 a ni tawh, thla 3,4,5, 6 a ni thu thla tin ka thawn ziah țhin a. Mahse, a chhanna engmah ka hmu ngailo, Ka beidawng duh chuang heklo.....

Nikhat chu huana pangpar phun sawnin ka nu nen hna kan thawk a, Kan Sipai pakhat chu hmanhmawh deuhin a rawn kal a, Sipai Officer pakhat in min hmuh a duh thu a rawn sawi a.. In ah ka inthlak sawk sawk a, Kaptel hmuna Burma Sipai Camp ah chuan ka kal nghal nal nal a.... Ka thil zuk hriat chuan min țhawng kher mai.... Ka lehkha thawn zawng zawng chu an rawn thawn kir leh vek a, Note ah "Capt.Albert Clayton leh Lawng sipai 50 vel awmna chin hriat lohin Kum 19... ah khan Pacific Ocean chhungah an bo vek tawh.... Ram leh hnam tan an beihna kawngah UNO chuan zah takin a thlahliam e, a nupui leh fanaute an awmna ram sawrkarin a enkawl sak bawk ang" tih a lo ni a.... a lehkha thawn ka hmuh tawpna ber hnu lawkah an bo daih tawh a lo ni a, Chu chu Ka naupai ka hrih țan chhoh vel daih tawh kha a lo ni a.. Ka tliak vekin ka hria.. Chuta țang chuan ka hlim thei tawhlo, ka khawhar ngawih ngawih a, Kum tin kan intawnna hmasaber champha ah chiah Buannel saw ka tlawh ta ziah nghe nghe.. Kum 3 ka naute a nih pawn a la bawkvak ve chauh a, Ka nu leh pa pawh Mizoram lama an boral thleng an awm ve ta nghe nghe a ni. Tichuan he hmun min buatsaih saktu, ka lei Pathian ang tluka ka innghahna chu a zamral bta riai riai ni maiin ka hria.. Ka monu pa Doctor hi a rawn kal fo a, ka fapa hriselna a rawn en dik chamchi a, fuihna thu min hrilh mawlh mawlh țhin.. A fanu ka monu nita hi ka kiangah a rawn dah tawp a, Kan 2 chuan Puan deh lamah eizawn kan rilruk ta a, Puanțhui ka thiam a, a nin puan tah a lo thiam bawk nen kan buai dun zar zar reng a, Kawta motor chhe tawh zawk saw Doctora min pek a ni nghe nghe.. Saw sawn kan thil siam chhuah chu kan zuar chhuak ve ta țhin a.. A hnuah phei chuan kan kalbuai ngai lovin min rawn pan ta zawk țhin a ni... Kan Inhnuaiah khuan Puan tahna kan siam a, kan ri ve tluk tluk țhin a.. Ka nu leh pa an boral takah chuan ka nau chu kan bula awm turin a rawn chho a, min pui bawm a, mipa tha nge nge a lo chak bawk nen kan samlamphah ta viau a ni... Ka nau nen an inneih hnu Kum 1992 khan Factory kan din ve a, Kan kawmtlanga In sei pui khu a nih khu.. Mahse Burma sawrkar inthlak velah min tih tawp sak leh ta daih a.. Hemi kum hian a rukin kan inhnuaiah kan la ti ru hram a.. Nikhat chu ka puantah khawl chhia ka siamna lamah chhuat awngah ka tlahawlh pek a, Ka ngal ruh ka tina a.. Chu chhuat chu leichhuat vek a ni a.. Chulai tak ah chuan engtik lai ațanga dah nge tih ka hriat hauhloh Barrel bung hi țhut remchang deuhin a awm reng țhin a.. Khawl ka siam turin hnawk ka tih deuh avangin ka hung sawn a, chhuat dang ang thoin a inzut mam vek nangin a lo pan em em mai a lo ni a, Tichuan ka tlahawlh ta a ni ber.. Ka tlakhawlhna chu mak ka ti viau nghe nghe.. ka hai a, ka hai zel a, Mihring ruang chen dawn hian a lo kaw phei rul mai a, Light in kan chhun a, Thingrem 3ft.square tur vel hi a lo inhung a, Kan hawng chu a mak a mak atam Rangkachak leh Kumpinu thla chuanna Rangkachak pawisa thir a lo awm ruih mai a, a chhin a ipte ah chuan savun lehkha hian "Ka hmangaih Margaret Sailo tan" tih a lo ni a.. a hlut zawng chu Millionair nih theihna let hnih vel a ni nghe nghe..

Kan hmang ngam mai lova, Mahse Doctora bawk chuan a tihdan min hrilh a, India ram ah leh London ah Kan dah țha nual a, abak pawh hmun dangah kan thukru ta zel a ni.. Ka nau pai laia ka damdawi ei khan ka upat hnuah min tibuai ta zauh zauh a, Zeng ang maiin ka awm țhin a.. Doctor lah a boral tawh si, Mithiam hrang hrang kan rawn nual hnuah pawh kan beidawng zel si.. Tlangkam ațangin Maawmi hmeichhe specialist Mizoramah a awm thu an sawi kan hria a.. Ka nau nupui nen kan rawn pan ta vang vang a, a tira țhut pawh țhu thei lo kha, Hei tunah chuan Wheel chairah ka țhut vang theih tawh hi" a ti a, a nui hak hak a.. "Ka pi Buannela i lehkhadawn i sawi kha engtik huna dawng nge i nih?" ka ti leh zel a, min en ran pah chuan "Naute kum 4 a nih hnu ah Dakpu in min rawn pe chauh mawle.. a lengkual vel hnem hle a niang.. seal a chuang hnem emai.. Capt.Alberta te boral ni an sawi hma zan chiah a, a ziak a ni nghe nghe" a ti a.. a khap fak fak a.. Chutihlai chuan Motor thawm kan hria a.. Kawtah chuan motor a rawn ding a, Nula sang cher lam deuh sam sei dum hlap mai Jeans kekawr tluan ngalrek chen vel a sei pian nalh deuh mai hi a rawn chhuk hmasa ber a, "Santei" a ti sap a, Chumi hnuah Santei chuan Jeep atang chuan Mipa naupang niawm tak hi a pawm thlah nawlh a.. "Bawihtea" Pitar chuan a lo ti leh sap a..

Zanriah ei khamah kan awm tual mei chhem kan kil bial lat lat a, Ka ep ah chiah chuan Santei leh Ngurpuia (Pitari Fapa) chuan Pitari an lai tat a, Chu pa chu puitling hmel pu al tawh si, ban tawite kual țai mai leh ke tawite inseihleih lehnghal nei, Hmuihmul zuah buk laih a ni a.. En mai pawn a naupang chhe tawhlo tih a hriat theih mai... Pitar te nen chuan eng eng emaw an sawi a, Za em em chuan an nui leh hawk hawk țhin a, Ka rilru te te chuan "Fuke kim, pianphung rualban nun hlim chuang silo.. Nu leh pa te tan hnawksak em em lawisi neih ai chuan, Pu Ngura ang rilru thianghlim, nu leh pa hlimna thlenthei nih hi a thlanawm zawk hle a lo ni e.." ka ti a.. an chezia chu camera chuan ka lo click sak mawlh mawlh reng a...

A Tawp ta.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)