A PAINTFULL REGRET

Story tawi te te emaw luanliamna emaw post na
Tochhong Ruata
Posts: 53
Joined: October 2nd, 2016, 1:46 pm

A PAINTFULL REGRET

Unread post by Tochhong Ruata » May 31st, 2021, 1:25 pm

JUNIOR GRADE.

Kan Khua-ah an rawn pem luh tirh lai a ni a, School a rawn rah hmasakna ber kum a ni nghe nghe, Kan Zirtirtu chuan " mithar a ni a, A hming chu (Sensore) a ni a, a pa hnathawhna avangin an rawn awm a, vawiin atang hian in zingah zirna arawn chhunzawm ve tawh dawn a ni, tha takin lo dawngsawn tur a ni" tiin ka bul chiah a thutn awl chu a kawh hmuh a, Min melh zak zak chungin ka bulah a rawn thu a, ngawi rengin ka lo en a.,a nui seih a. Zirlaibu a la neih loh avangin ka lehkhabu ka en tir ve a. Chumi ni atang chuan Nitin kan inzui a, kan kal rual a, kan haw rual a, Kan ti ti a, ice-cream te kan ei dun ta thin a. A bula awm a nuam a, a kianga awm a ninawm loh a, a ngaihawmna chuan min hnukhnai thin a ni ber. A nui riin thlifim a siam a, a zai ri rimawiah a chang a, A kal vel in boruak a ti nuam a, a hawina lam apiang chu thil hmuhnuam tak a ni a, a chetvelna apiang chu hmun khawhar a ni ngailo hrim hrim thin. Chutiang a kum kan hman zawh a, High School kan rahna tur atana Junior kan nih hun kan thlah dawn hnaiah chuan " Ka duh zia leh ka thlak hlelh zia hrilh hriat ka tum a. Chu Farewalle ni ah chuan a hnena hrilh tumin ka pan hnai a. Min en a, chiang takin min melh hnuah " ka rawn awm tirh atanga tun thlenga min tanpuina zawng zawngah lawmthu ka sawi e" tiin a kut nem tak chuan ka biangah a piai zauh a. Ka thusawi tum chu ka sawi ngam talo a.

10th GRADE

English class kan neih tumin ka kiang ah a thu a, ka thian thaber " Best Friend" tiin mi kiangah min chhal thin a, Kei erawh chuan " Ka hmangaih hmasa ber leh ka hmangaih la awmchhun a ni e" tiin tuma hriatlohin ka ti thin. Chu thu chu hriase ka tih em em rualin, ka rilru ang a pulo palh a nih chuan ka lak ata a kalbo daih ka ring bawk si a.,ngawihmai thain ka hria a. Hemi ni pawh hian ngawih ka chuh leh ta nge nge a.

Class banah a hma ni a, sikul a kalloh avangin Home work leh Note kan lo lak leh kan neih angte copy a duhthu min hrilh a. Ka note bu leh ka Home-work bu ka pe a, Lawm takin a hawn pui ta a. Kha lehkhabu page thenkhat ah khan ka duhzia ka tarlanna thu ka ziah thliah thliah kha a hmuh ngei ka ringin ka beisei hle a. A hmuh hunah a rilru enge ni ang tih ringawt ka ngaihtuah zankhua a. Atuk ah school gate bulah minlo nghak a, Ka lehkhabu chu a keng va va a, a hmel chu ngun takin ka en a, ka thil ziah chu a hmu nge hmulo hriat theih pawh a ni lo. Min nuih sak pahin " Ka lawm lutuk, nang nge nge" tiin ka biang ah a piai leh zauh a. School ah kan inzui lut ta a. Ka zawt tawp mai dawn em ni aw? Ka lehkhabu a, ka duhzia thu ka ziahte kha a hmu em tih chu, mahse ka zawt dawt ngam mailo. Achhan pawh, a lo hmu reng tawh ang a, engmah a sawi duhlo zawk emaw, min nuihzat ru deuh rilru reng tawh zawk em ni ang aw tih ngaihdan ka neih ruk tlat vang a ni bakah, ka huaisenna in a tlin thlawtlo a ni ber. Chutiang reng reng chuan kum ka tluan leh ta nge nge a.

12th GRADE

Pawl 12 kan zir kum a ni a, Nikhat chu ruah sur buan buan laiin min rawn be hlawl mai a, " rawn kal vat teh, kan In-ah, Ka pa motor in a chesual a, Damdawiin ah an phur a, ka nu leh ka u te an kal daih mai a, Keimah chauha awm ka zuam lo" tiin tap pur chungin min rawn ti a. A sawi leh ngen ang chuan an in lam panin ka kal ta vat a. An in ka va thlen chuan Kawngka hawngin min lo hmuak a, Minlo kuah a, a tap nghal ngat ngat a. A samah chulin ka theih ang tawkin ka thlamuanba. Inchhungah lutin Chanchin ngaichangin midang ( thenawm khawveng) te nen ka awm thap a. . Darkar 2 hnuah chanchin lawmawm tak, a pa chu ngaihtuahawm a nih tawhloh thu kan hria a. A hlim in a lawm hle mai. An midang hawn hnu chuan chiang taka min melh kiau chung chuan " Ka lawm tak zet a ni, Nang nge nge" tiin ka biangah min chul sak leh zauh a. Chu boruak chuan a tih chauh ziate sawiin ka mal chungah muin a muhil ta sak sak a.

A hmel chu ka en reng a, tui tak leh thlamuang taka a muhil sak sak lai hmel chu ka en a, Zawite in " Ka va hmangaih in ka va duh tak che em?, ka duh ang che hian min duh ve la, ka van lawm dawn tak em" tiin ka phun sep a. Ka thusawi chu a hria em ni dawn ni " min bia em ni? Enge i sawi kha?" tiin meng chuanglo chuan a rawn ti niah niah a. Mahse ka sawi nawn ngam tawhlo, ka rilru ang a pu ve dawnlo tih ka ring tlat a ni. Ka zahkhua tisei mai mai tur.

SENIOR GRADE

Convocation kan hmang dawn a, Zan lamah Prom ninte kan hmang nghal dawn a. Chhun programme kan hman zawh hnuah hlim takin kan hawng a. Ngawi rengin kan in ka pan ding a. Prom nite atan date ka neih ve loh avangin Zan lan chu kal loh mai tumin ka inbuatsaih mek laiin a phone call ka dawng a " Ka Thian, enteh, hei ka date ( ka partner ) tur kha vawiin Convocation kan neih zawh a, a hawn kawngah Bike in a accident hlauh mai a. Na lutuk chu nilo mahse, prom nite a kal turin a hmai a khem nual bakah, a lu a tuam luk bawk si a. Kalpui tur ka nei dawn ta lo tawp mai, Engtin nge min tanpui dan i nei mial a ngem?" tiin rilru hah hmel takin min rawn bia a. Ka rilru ka share theihna hun remchang takah ngaiin " ka kalpui mai dawn che nia" ka ti awlsam ve et a. Lawmthu min hrilh hnuah Zan dar 6:30 a an ina lam turin kan intiam ta a.

A nalh kher mai, evening gown hring dal, satin manto chi a thui fual hnalh mai a ha zan a, a sam chu hnawng chap ang maia langin awmze nei takin a tawn tawm a. " i nalh kher mai, duhlai, zanin hian ka hmangaihna zawng zawng hlan che ka duh" tia fawh tak ka nap hman a. Mahse engmah sawilo chuan ka thenkhum sak ringawt a. Chung thalai nun hlim taka hmang mek zi luai luai karah chuan kutsuih rialin zan kan tlingtla ve thei ta hram a. A hmel hlim tak chuan min ti lawm a, a nui hak hak ri chuan beng a fan raih bawk a. An In kawtah motor chhungah kan thu dun a, a nui sen sen a, rei vaklo chu kan ngawi dun a. " Zanin chu i nalh takzet a ni, Enteh khami ni kha hmuh hmasakna ber che atang khan he ka thinlung phek ah hian i hming ka ziak lut a, ka nawtreh tawh ngailo a, ka chhui fiah reng thin zawk a sin. Engtin pawhin ngai dawn mahla. Ka hmangaih zia che hi hrilh ve hrim hrim che ka duh" tiin a khabe ah dawm kangin, a hmui sen vam ham mai chu duhthawh taka keih mawlh mawlh turin chakna ka neilo. Ka ngamlo pawh a nilo. Ka huaisen zo lo mai zawk a ni. Chu second reilote chhung kan ngawih dun lai a, a rilru tir hrethei ni i la, ka huaisenna zawng zawng nen " Ka hlan" ngei ang mawle. " Ka tan hian i hlu takzet a ni, Ka thian tha ber, ka mamawh hunlaia awm tlat thin i ni si a, Ka lawm takzet a ni e" tiin ka bianga fawp turin a rawn kun hnai a, a thaw lum ham ham chu ka biang a chhem sen ap ap niberin ka hria. A hmui nem nel thep in ka biang sen ap ap a tawk zauh chu rehthei tawhlo tura tatoo anga kai thei nise ka ti kher mai. An In kawngka a luh rualin a rawn lehhawi zauh a " Thianpa ka lawm takzet a ni, Mangtha le",tiin min thlah liam a..

KUM 2/3 HNU AH..

A Ropuina Ni. Vawi 2-na

Ka Staff te zinga ka ngainat ber Lucy sawmin Biak In lian leh fai nuam zet maiah Tlar hnung lam deuhah thuthmun kan rem dun a. Ka thian nu, ka hmangaih. Ka engkim,,a hlim chuan ka hlim a, a nuih chuan ka nui a, a lungngaih chuan ka lungngaihna thin ngei mai chuan " Damchhungin a nuam leh hrehawmah pawh, thalai leh bawrhsawm lai hun pawh nise, thihna chauhlo chu engmah rengin min then theihloh i nupui niturin Pathian hming chhalin, kohhran leh mipui hriatpuina in ka Intiam e" tiin A kianga ding a pasal nitura a thlan, Damchhunga a kawppui tura a thlan ngei mai chu neiin a tiam lai chu ka lo en reng a. Kut suih programme a zo a, Biak In kawtah mi zi nuaih nuaih karah hlim takin a nui a,, a dam hun chhung hmanpui tura a thlan mipa kut a dawm chungin lawmpuitute a chhawn lai hmel tluka hmuh nuam thil a awm dawn em ni. Ka thlir reng a. Ka ta nilo tura khuanu ruat a niah ka ngai a, Engkim hrilh tuma huaisenna ka neihloh chhan pawh he khuanu samsuih tura a lo duanlawk midang an nih vang a nih ka ring nghet bur a. Mahse, chuti chung chuan tinge ka thinlung a nat a, Mita nitura a vullai hmel chu ka en that ngam tlat siloh le. Ka tuar em em a, ka tilang ngamlo a. " Pasal neih ka tum a sin, enge i ngaihdan?" tia min hrilh tuma " a theihloh, keimah lo chu tumah i nei theilo, ka phallo" tia ka lo hrilhlo kha..enge ka huaisenna tlakchham vang lek em ni ang le. Kan lam panin a rawn kal a, Hmeltha lalnu, Hlimna famkima thuam mengmawi tak chuan ka mit takah min en ran chungin " Ka thianpa i lo kal ve avangin ka lawm e" ti chunga ka kut rilrunat luat vanga khur ru der der chelh chunga min ti lai hmel chuan min chiahzawp hneh hle mai. Tha ka neilo " ka nuamsamlo" tia chhuanlam siam mailoh chu mualphona thlen mai hlauh luatah a tul ta a ni ber.

MITTHI VUINI MAW?!!!!...
A ropuina ni vawi 3-na leh Tawpna ber tur chu.

An In ropui tak, a pasalin a hrehawm hlau ngawih ngawiha a tana leh a fate tan a buatsaih sak ding luah mai tualah chuan Dum veka inthuamin kil khatah ka thu ngawi reng a. An luhka bulah chuan a hlimni hmel mawileh nalh, nui sang hmel chu a tak tiat lawng a lianin an tar kulh a. Chu a hlim hmel chuan takna reng a neilo, a lem mai a nih zia tarlan nan, tap chunga au lawm lawmten chulin nul vel mahse, Hlim taka a nuilai hmelin danglamna a neilo a. Chung lungngaia rum mekte hnem turin chetzai a rel tlat silo.

Khang hun liamta a kan nun zozai kha tinge hetiang maia tawp tur nisi confession nei ngamlo khawpa a lakah ka dawihzep tlat mai kha eng vang nge ni ang le..?.. Tinge ka inpuan ngamloh leh. Tunah ka huaisenna zawng zawng sawmkhawmin puan tum teh mah ila, a sawt tawh hauh silo. Kil khatah tu khawkha hriatlohin Tarmit dum phenah ka mengphe ruai ngam chauh a ni si a. Chhungkaw thlak-ah a lang velo. A unaute zingah a lang velo. Mahse a taksa rialang dai tawh si chu Kuang chhungah dahin a telpui ve hram mai chauh a ni. Pialral ah tawng leh thei tak ang maw?. Chumi hunah chuan ka hlan ve ngam ngei tawh ang..Ka hmangaihna....

A LO NI RENG SI MAW..?

Ka kutah Lehkhabu kawm sen uluk taka enkawl tih hriat tak, a neitu khawvel ata lakbo nitawh si " Ka thian thaber" tia min chhaltu kuthnu ngei chu ka bih reng a. A kawm khawng tak chu ka keu a, " KA SAWI NGAMLOH" tih thupui fiah taka Capital letter a inziak chu ka hmu a. Chumi hnuaiah chuan Kum engmawzah liamta a, Kan Nui dunlai hlimthla, Krismas, zonal Sports, Prom nite thlak a lo bel thluah mai a. Ka nui sak nangin dawn a sei duh kher mai. Chu thlalak awmna phek chu kian sanin phekdang ka kai san a. Thu tam hmuh tur a awm lo. Engkim mai chu a hun leh hmun darkar tarlang zelin tiang hian a sawi ngamloh thil chu a lo ziak zel a lo ni a.
" An khua kan awm tirha ka sikul hmasak ber ni in, a kiangah ka thu a, khami ni atang khan ka thinlung phekah a hming ka ziak kai ta a nih kha. Ka thian a ni a, Ka hmangaih a ni a, ka tan engkim a ni si a. Ka rilru chu hriase min ngei ang nge min tawmpui ang tih ka hre silo. A kiangah ka hlim a, a kiangah ka him a, ka thla a muang a. Ka tan a thil min tihsak ka duh vang mai mai in Homeworkd thiamlo leh note lalo anga langin lehkhabu ka hawhsak te khan. Tunge a duh zia leh tha a tih a, a hmangaih zia a tarlan kha ni ang le" tiin Ka inkil tawi phah a. Ka pa chetsual ka hriat khan kathla a phang em em a, Amah ka bulah awmse ka ti hluah hluah a, ka bulah a awm tak avanga ka thlamuan ziate kha. Min duh zia thu sawiin ka hre tlat a, ka chiang ngam silo a, chiang taka hriat tuma ka zawh lah khan engmah a sawi leh tabawk silo a, ka suangtuahna vanga ka bengin a hriat sualah ka ngai ta ber a.

Prom nite hmanpui atan min sawm beisei takin ka lo nghak a. Mahse, engmah sawilo in hun a hmang a, dawt sawiin chhuanlam ka siam avangin min kalpui hram tuma ka hlim zia leh ka lawm ziate kha aw...Hmeichhia zawkin ka duh thu leh ka hmangaih zia thu hrilh hmasa ta ni i la, a mi ngaihdan tur kha dik dawnlo a ka hriat avangin ka ngaichang a, mahse engmah sawiloa a awm tak tlat avangin beidawng rilru takin kian san ka tum ta zawk a. Ka fawh chak em avangin a hmui ah fawp ngam siloin a biangah ka fawp ta zawk si a. Beisei nei takin ka nghak a. A rilru thlakin motor atanga rawn chhukin min kuah ka beisei a. Min thlakhlelh em avanga kan in a rawn lenluh a duh ka ring rilru deuh a. Ka nghak a, ka lehhawi pawhin engmah a sawi takloh avangin beidawng takin ka mangtha ta ngawt a nih kha.

Mihring kan nih chuan kawppui kan neih a, Chi kan thlah a ngai a, chumi hun chu a thlen ka nghak a, a ni chu thehhmeh ang hlauhin a reh vung vung mai bawk si a. Nula ta chu tlangval in min hel velo thei silo. Ka thian a nghak chungin hun ka hmang a, Min duh der vetute pawh amah ngaichangin ka hnar phah fo thin.,engmah a sawi tak silohah chuan ka beidawngin mi min sawmna ka yes hmain a rilru hriat tumin ka chhimbudawi a. " Ka phallo, ka ta i ni" tia minchhan ring rilru tak leh beisei nei tak chungin ka ngaihchanna chu " Ka lawmpui lutuk che" tia chhanna chauh ka dawng ta si. Mipa nih a, ka hmangaih zia leh khami ni a ka thinlung pheka a hming ka ziah ni atanga ka chhuifiah ngat ngat dante, Ka hmangaih luat vanga a bula ka awm duh tlat ziate, ka thlamuanpu ziate, a thil min tihsak avanga ka lawm ziate hrilh ' ka damchhungin ka kawppui niturin ka sawm ngei ang" mahse. hmeichhia ah pawh hmeichhe zaklo tak leh huaisen tak ka ni silo. Min hnawlna anka hriat ka hlauh luatah ngawih ka chuh a. Ka tuar ta mai mai zawng a nih hi.

Khami ni khan a hmel ka hmu kha mak kati mai a nilo. Mita ni mai tura min nawrliam hnuah a hmel ka hmu tawhlo turanga ka ngaihtawhna min lakkian sakin a hmel nung sarh mai leh a kawppui tur atana a duhthlan nula hmeltha tak mai bula awm ka hmuh khan a hlim pui nula, a hmangaih nula kha ka lawmpui a. Kei ang a rilruna leh khawhar takin hun a hmang dawnlo a ni tih ka hriat khan ka lawm a.,ka hmangaih takzet a ni tih min hriatchhuah nawn tir a nih kha. Hmangaihna avanga thikna chu Hmangaihluat vanga hmangaihna tawpintai neilo chuan luahlanin ' Hlim taka i awm theihna a nih phawt chuan ka hmanhaihna leh ka duhna che hi hrilhlo chein mual ka liampui tang e. I duhtak, nuthai atana i thlan, hlimna petheitu che chu thlangin hlim takin hun hmang turin duhsakna ka hlan zawk ta che a ni" tia kuah a, a hmasaber leh a tawpna ber nitura fawh ka duh rum rum a nih kha..

Ka fa, ka pasal, ka chhungkaw tharte kiangah hlim takin hun ka hmang emaw ka tih laiin amah ka tawhchangin ka na a, ka rilru chu thirling sataka fih ang maiin awmthin mahse. A dam a, a hlim a, a nun a nuam tih ka hriat avang erawh chuan ka chhungril hi lawmna avangin a hlim phah zawk thin si a. Hmangaih leh duh thu hlan mai aiah ' I dam thin maw' tia biahthu hlan a tul fo thin erawh kha zawng.. Tih theih ka neihtlem zia leh Ka phuloh leh ka chorualloh Val ka tawng a ni tih ka hriat phah zawk fo thin si a.

Ka hun a liam a, Ka thinlung natna in ka thisen pal chhuaka Pathianin ka rilrunatna ata min lakchhuahna tur atana Fanau min pekte nen nunthat leh thinlung thar nen bultan tura hun ka hmang dawn choh tihah, He tisa natna avanga ka nun ngui leh chau ta hian Kei hi he khawvelah hian Hlimna tluantling tawng ve turin min phallo ni hialin ka ngaih phah ta a nih hi. Nge Hetiang renga hrehawm taka awm tur hian ka nu leh pa te khan Van Pathian pawi an lo sawi zawk em ni ang. Heti taka thinlungna a ka damlai hun Leiah min hmantir bik ni' tiin ka ngaihtuah fo thin..

Engpawh nise. He ka thil ziak hian den hun a neih hunah tal Ka thian, Ka thiantha ber, Ka hmangaih, Ka hmangaihber, ka hlan ngam siloh val khan ka rilru leh ka nun hman dante. Amah avanga ka hlimnate, amah vanga ka lawmnate. A hlimna ka hlimna a nihziate tal chu Mual ka liam hunah tal a hreve ngei ang chu. Chutih hunah tal chuan anchhia em min hlawh biklo in, ka rilru min hriatpui takin " Mangtha" min tive tal turah ka ngai..

"Ka hmangaih, ka duhber. Ka banphak siloh nangmah hmangaihtu hi min diriam bik mai suh aw...Mangtha le"

Ka mi ameng theilo, ka hmuh phak tawk a tawi a, Ka thinlung chu a kehsawm vek a. Zawmkhawm leh turin theihna ka nei tawhlo. Ka pawm a, ka fawp a, ka tap a. Zahpawh dawnzo lo rengin ka tlan a. A thlan vung thar chhuah turh mai awmna chu ka thleng a. Ka ko a. Ka au va, ka rak a, ka tap a, ka inchum a, ka let a, ka thu a, ka ding a, ka van ruai ruai a. Mi a tiin min ngai ngei ang. Enge ka tih ka hrelo. Chu lehkhabu kawmsen chu ka pawm a, ka fawp a, ka tahpui a. Min thlir thup a. Min en a, " Tunge sawpa saw?" " khawilam mi teh ngawt nge?" tia min chham ri pawh ka hria. " Ka hrelo, Mi a a ni maithei" " Mi a, vak vel chiam chiam thin a nih dawn saw?" " Khawilam mi a nge mawni le?" an tih ri tenen lam.....engkim ka hria.

" Ni e...Kei hi Mi á, Mi á tak, finna reng neilo ka nih hi." tiin ka rak chiam chiam a. Khua a thim a, kalna tir hreloa au vak vak ang maiin chu thlan, Ka hmangaih anga min hmangaihtu, Ka hrilh ngamloh anga min hrilh ngamlotu. Khawvel a ka tawn hmasak ber. Ka hlan ngam siloh thlan ah chuan naupang sawngnawi ang maia thuin ka rak chiam chiam ringawt mai a ni...

The end....

( Shorts story pakhat ka chhiar ka thiam ang tawka ka lehlin ve tehmial, Tin, ka phuau belh tak chiam bawk a nih hi. A ziaktu hmasa in Mizotawng a thiamlo turah ka ngai, thubuai hla buai ah a la duh emlo ang chu maw? Hi2. Thutak khuk a khukpui chiam turin thuneihna ka neilo...in thu thu le....)



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)