THE OTHER SIDE
* SHORT STORY *
By Jack Stuart Knapp
Lettu : Maveni Hmar
Characters :
Haley -- Tang Vengtu
Quinn -- Reporter
Allison -- Tihlumtu
Coughlin-- Warden
[Lemchan hi State Prison hmunah niin zan a ni a
Scene chung lama spotlight chuan vei lam sir dawhsana dawhkan leh chair pahnih a rawn chhun eng a . Hei hi Warden Coughlin -a office a ni a . Ding lam sira dawhsana chair leh bang hi spotligh chuan a chhun eng leh a . Chhuat atanga feet ruk vela sang bangah chuan tukverh , thir tlawn kham hi a awm a. Hei hi mi tihhlumna pindan a ni .
Puanzar a inhlim chuan zam taka hnunglam leh hmalama vei tawn chhen chunga meizial fawp kawk kawk chungin Haley-a ( tang vengtu) chu a rawn lang a . Jail vengtu uniform hi a ha a . Kum 28 bawr vel a ni a , a hmel a dángin a zam hle a . Banga switch chu a han en a , a khur dar dar a . Pa valai tak , hmuia meizial pet uai duai , tukhum lama lukhum khum , overcoat chuar zet hma hawng huaia ha Quinn ( Reporter) chu a rawn lut a . Haley-an a hmuh chuan mak ti zetin a lo en hau a .]
QUINN ---Pawi ka ti hle mai . Rawn tih phut zawk che ka tum hauh lo asin .
HALEY --- A tha vek e . Ka zam deuh mai chauh a ni .
QUINN--- Ka dem lo che . He thil hi intihhlimna chu a ni chiah lo alawm .
HALEY ---Intihhlimna chu a ni lo alawm . Tu nge i nih ka hre hauh lo mai che a .
QUINN--- (Chair-ah chuan thu kun duin meizial a pak tulh tulh a ) Quinn-a , chanchinbumi ka ni , chanchin khawn khawm turin ka rawn kal a 'Chronicle'-a thawk ka ni .
HALEY ---(Zam zet hian) Allison ka lo nghak mek a ni . Chair enchhinna a ka puih a ngai a . Heng thil zawng zawng hian min rap a ni .
QUINN --- ( Tlemin a rawn ngaihven deuh a ) Heta thawk thar hi i ni maw , a ni lawmni ?
HALEY ---Aw. Thi tura an chungthu rel tawhte tihhlum lai hi .....i hmu hnem tawh em ?
QUINN --- Hnem tawh teh reng mai .An chanchin hi ka ziak hnem hle tawh bawk a ni .
HALEY --- (Khur dar dar hian )Tun hi ka vawi khatna tur a nia . Ka paltlang zo em ang chu maw . Saw hmuna chair chunga mihring han inherh vial a , kang hlum tur ka ngaihtuah a piang hian ( tukverh lamah chuan a bu zoh a ) ka khua a sik ur ur thei hial a ni . Saw hmuna hruai luttu tur saw ka ni sia ...
QUINN ---(A thusawi chu lo pawhchahsakin) Theihnghilh a tha zawk ang, thianpa , chuti lo zawng i kehchhe dah ang e . Ngaiah i la neih ve mai ang . Brown-a ( mi tang , electric chair-a tihhlum tur ) chuan engtin nge a ngai ve reng reng a ?
HALEY ---(Zam tak leh rang zet hian) Keini zawng zawng aiin a ziawm fe zawk a ni .He hmuna awm zingah chuan zam buai lo ber a ni . Vengtute biain fiamthu a thawh bawrh bawrh reng mai a ni . Darkar khat hnu lawka thi tur a ni tih rin ngaihna reng i hre lo ang .
QUINN --- Brown-a tih hi a hming diktak a ni ang em le ?
HALEY --- Ka ring deuh . A chhungte tumah an zawng hmu zo lo a, mahse he gang-ah hian kum hnih chhung chu lo awm tawhin he hming hian an hre vek a ni . Hetiang khawpa naupang , kum 22 mi lek ni si hi electric chair-ah tihhlum a ni mai tur hi a mak a ni . Khuanu hian thil a rel sual deuh a ni ngei ang .
QUINN --- Nia, thalai tam tak hi an kalsual thin reng a ni .A tum zawng an tum bik lo nain a awlsam tlat si a nih hi .Naupangho hian inchawhphurna eng emaw tak hi an duh thin a , thian sual an tawng ta thin a ni . An mahni leh khawvel lakah ngaihdan maksak leh herh tak an nei a , awlsam taka pawisa hmuhchhuah duhin mi rawk te an lo ching tan ta thin a ni .Mi thenkhat lahin rim taka an sum thawhchhuah sa humhim nan an nunna hial an lo chan phah a , chutah a suamtu leh tualthattu chan chu chair ( electric chair) a ni ta thin a ni . Chutiang thil chu a thleng fo a , chutianga an lo thah tawhho dang zawng zingah chuan Brown hi a la naupang ber a ni .
HALEY --- A naupang a....a huaisen....
QUINN --- ( Ngaihsam zet hian )Tuarchhel , i tihna a ni ang chu . Misual pawl hi chu chutiang tur reng a duan an ni alawm , mahse i rilru chu ka hrethiam e . Electric chair-a mi an tihlum lai ka hmuh hmasak ber tumin chutiang rilru chu ka pu ve tawh a ni .Theihnghilh harsa ka ti kher asin . Tun tum ami ka en lo tur hi ka lawm thlawt a ni .
HALEY ---A chanchin i ziak dawn emaw tia ?
QUINN --- A nia lawm , mahse a pangkhing lehlam atangin a ni thung ang , a tihlumtu lampang zawk . Switch a hmeh laia Allison-a hmel lan dan leh awm dan vel ka en dawn a ni . Rawng taka mihring a thah hi eng angin nge a ngaih tih sawitir ka tum a ni . Chanchin ropui tak a chhuah ngei ang . Allison hi i hriat mi a ni em ?
HALEY --- Ka hmu tawh a . Amah pawh a rawn lang tep tawh ang . A chanchin a hrilh duh che i ring em ni ? Chanchinbu lam lah hi a lakah an che rawva mah mah --hming hnaisailo fe fein an ko vel bawk si a .
QUINN --- Titi phungleng sawia a chanchin hriat teuh chu ka inbeisei hauh lo , mahse amah ka lo thlir ringawt chu min dang thei tawp lo ang -- chuti chung pawh chuan a lak atangin a mi chhanletna chu ka hmu tam hauh lo ang . Hei hi a tan chuan a thil tih than a ni a , thisen lum ngam tak a ni .( a ham bui bui a )
HALEY --- Hetiang eizawnna hi eng tiang chiaha thawk tan nge a nih ang le . A tan chuan sumdawnna chi khat ve mai a ni a . Switch a hmeh apiangin dollar zathum a hlawh thin a .
QUINN --- ( Lawm tak hian ) Mi tihhlum hna ...dollar zathum hmatheh a mihring thahna ....Ka lawm e , ka thu ziah tur atan thu pawimawh tak tur a nih chu .
.HALEY --- Dollar zathum ! i thlarau hralh nan chuan a tam tawk lo ...
QUINN --- Allison hian thlarau emaw thinlung emaw a nei ve hleinem, thianpa . Bang ang leka hriatna nei lo a ni . He pa nuna thil pakhat awm chhun chu pawisa a ni .
HALEY --Fimkhur rawh...hei a rawn kal a nia !
( Allison-a a rawn lut a . Kum sawmruk bawr vel , sam var va leh mitmeng dumpawl vawt raih hi a ni a . Kawr rawng thim lam hian felfai thlarhin a inthuam a , thalai ang mai hian a la inthazo veh vawh hle bawk . Pipe (vaibel) hi a zu hlat hlat a , a ding a , mi pahnihte chu a en ta a .)
HALEY ---( Chibai tum hran lo hian ) Hello, Mr Allison . Haley ka ni a . Warden-in nangmah puibawm tura a mi tirh ka ni e .
ALLISON --- Hello ( Quinn chu a va melh rulh a )
QUINN ---Ngawiteh lawk . Chanchinbu lam hian nunrawng leh thisen lumna nei lo an ti thin che a . Tun hun hi i chungchang i sawina hun remchang tak a ni .
ALLISON --- (Ngaihsak lo fe hian ) Ni lo e .
QUINN --- Tha taka ziah che ka tum a , i tana tha tur ang berin a lungkuai zawngin ka kuai her ang . I insawifiah hun a ni . Min hrilh teh , switch i hmeh hian engtin nge i awm thin ?
ALLISON --- ( A nam sawn a ) Haley , chair ka enchhin dawn a . Ka rawn au ve leh switch kha rawn hmet ang che (a chhuak ta thurh a )
.QUINN ---Sangha ang maia thisen lumna nei lo chu a va ni teh lul em ! A chanchin chu ka ziak khawp ang . Chhe theih tawpin ka ziak ang . Tualthattu meuh pawh a lakah chuan mi thianghlim ang hialin ka chhuah ang !
.HALEY --- A pui hnem lua lo khawp mai che , a ni lawm ni ? (switch chu a vuan a ) Lalpa ! Chair-ah sawn tumah an thu lo tih hre reng chung pawh hian he thil khawih hi ka hua a ni . Allison hian engtin nge a theih bik ni ....
ALLISON -- (Dawhsan pawn lam atang chuan ) Tunah ! ( Haley chuan switch chu a han hmet a , a tek ri chhuai chhuai a , eng chu a thim deuh suai suai a ) A tha e , hmet tawp tawh rawh le .
( Haley chuan switch chu a hmet hlum a . Eng chu a rawn pangngai leh ta nghal a . Allison chu a rawn lut a )
ALLISON --- A tha e , Haley . Kal la warden hnenah chuan engkim peih fel anih tawh thu hi va hrilh rawh .
HALEY ---( A chal chu a hru pawk a ) Awle , ka pu .( a chhuak ta a .)
QUINN --- ( a ruk hian ) Awle, Mr Allison , hun min pe dawn lo'm ni ? Chanchin hi ka lak a ngai a ni , chutilochu Editor-in min ban mai ang . Intihhlum chungchang sawi i duh lo a nih paw'n nangma chungchang eng emaw tal min hrilh teh . Engtin nge he hna hi i thawh tan dan ? ( Allison chu a thu a , ngawi reng hian pipe a zu a ) Chu chu i sawi duh lo a nih pawhin khawi atanga lo kal nge i nih ? (chhanna a awm lo ) Chhungte i nei em ?(chhanna a awm lo ) Awle, i tawng duh lo a nih chuan , antam bulbawk thisen lumna reng nei lo mai i nih zia hi ka ziak mai dawn a ni . Tunah hian warden hmu turin ka kal dawn a , i switch hmet lai min entir turin ka dil dawn a ni . Ka thu ziak chu i hmu khawp ang , ngaihdan phuah khawm chawp a ni ngei bawk ang .
( Faifuk hlurh hlurhin Quinn chu a chhuak ta a . Allison chu a pipe zu chungin a thu run a . Eng chu thimin spotlight veilam chu a rawn eng a , Warden Coughlin-a chu a dawhkan bulah thuin meizial bung thi tawh hi zam hmel taka thial nuau nuau hian a rawn lang a . A dinhmun a ding atan chuan a la naupang deuh a ni . Kum sawmthum laihawl vel a ni awm e . A sana chu enin dawhkana telephone chu a thlir leh a . Haley chu hmanhmawh zet hian a rawn lut a .)
COUGHLIN-- (a melh chho a ) Engkim peih fel a ni tawh em ?
HALEY --- Aw , ka pu .
COUGHLIN-- (a chair chu a her deuh a ) Brown chuan engtin nge a tawrh a ?
HALEY-- A pawm zam thiam khawp mai , ka pu . Mi chhel tak a ni e , puithiam nen pawh engmah tih a duh lo a ni . Meizial zuin a thu a tang vengtuho a nuihpui bawk bawk mai a ni .
COUGHLIN-- A zam chhiat loh hram ka beisei ani . An zam chhiat hi chuan a tha lo a ni . Thla hmasa lah khan Greek pa kha a han te chhe nasa khawp mai leh nghal a .
HALEY --- Brown chu a zam chhiat ka ring lo , ka pu . Thir ang maia vawt leh dam raih mai a ni a .... Allison-a pawh a ang lek lek zawk . Chu lo rengah mi thah hmang an ni ve ve tlat a , Allison hian dan angin a that tih chauh a ni . An ngeng dun ve ve bawk a . An danglamna chu Brown hi a la naupang deuh e tih mai a ni .
COUGHLIN-- A la naupang a ni thei e , mahse hetiang hmel lang naupang deuh (baby face ) tual thah hmangho hi a rapthlak ber ber an ni duh chawk asin . Hetiang an awm thei hi ka hriatthiam phak bak piahlam a ni . Kum 22 mi lek , smart leh hmeltha tak chu zaninah electric chair-ah tihhlum a ni mai dawn chu a ni si a . Thian sual kawp man chu a nih hi . Misual pawl buluk tak , mi rikrapa rawk , clerk thah tawpna chu electric chair a ni .
HALEY --(a ngawih vang vang hnuin ) Governor lakah hriatthiamna....
COUGHLIN-- A awm ka ring lo , mahse he mi hi kan chinfel a ngai si a ....inngaihnatthiamna a awm lo a ni . A thil tawn tur hi Brown hian a phu ve reng a ni . Amah ngei pawhin a pawm kha . Eng ti zia nge ni ta , Haley ? Thinghnah ang maiin i khur alawm mawle .
HALEY --( a aw chu a mumal lo nuaih a ) A pawi ka ti khawp mai , ka pu , mahse he thil hian min fan tlat a ni . Chair-a thuttir turin zaninah ka duty a ngai si a ka la hmu ngai lo a ni hetiang a mihring....
COUGHLIN-- Ka lo mangnghilh pek a ni . Hetiang thilah hian zanin hi i duty-na hmasa ber tur a ni ti raw ? I ai han awh turin mi dang ka ti thei lo hi pawi ka ti khawp mai . Mahse ngaiah i neih a tul tlat a ni . I hna peng khat a ni si a .
HALEY --- Engtik hunah emaw tak chuan Allison ang mai hi ka la nih ka inring a ni . Sangha ang maia vawtin ( a dinglamah chuan a bu zoh a ) saw tah sawn a awm a . Mihring thlarau chu a kalna tur hmunah a thawn liam dawn mek a ni tih lam aiin thingpui in turin a kal emaw i ti zawk ta ve ang . Saw pa sawn min ti khur thei a ni . Mihring eng zat nge a ...?
COUGHLIN-- A tihhlum tawh maw ? Amah pawh sawn a hriat sen ka ring tawh lo . Kum sawm chhung chu State pasarihah tihlumtu hna hi a thawk tawh a ni .
HALEY ---(khur dar darin) Za tam a ti boral tawh ang ! Eizawnna rapthlak chu a va ni em !
COUGHLIN-- (tluangtlam tak hian ) Tu emaw chuan a tih a ngai si a ni . Allison-a kan nei hi ka lawm tak meuh a ni .(a sana chu a han bih zauh a )Minutes sawmhnih hnu-ah chuan tu emaw chuan switch saw a hmeh a ngai dawn a ni . Allison-an a tih loh chuan keiin ka tih a ngai dawn a ni . Saw tiang tih ai chuan ka ban dinglam tan pawh ka duh zawk tih hrilh che hi ka hreh lo a ni .
HALEY ---Tun darkar chanve chhung hian a zam lohna ang saw neih ve ka duh a ni .
COUGHLIN-- Intipachang teh , Haley . I mawhphurhna a awm hleinem . Mi chair-a va thuttir mai chauh kha i tihtur a ni a , switch hmettu chu Allison-a alawm .Dem tur a awm a nih chuan saw Allison-a lu bur saw a ni . (Quinn a lo lut a , Coughlin chuan a lo melh rulh a ) Tuin nge rawn luhtir che ?
QUINN--( dawhkan bula chair-ah chuan a thu a ) Tu man . Ka rawn lut ve tawp .
COUGHLIN-- ( thinrim titih hian ) Quinn, khaw chhunga chanchinbumi tlaktlai lo tak tak dang zawng aiin i zam lo fe a ni .
QUINN ---Chuvang chuan alawm chanchinbumi tha ber ka nih reng ni . In tur i kawl em ?
COUGHLIN-- Ka nei lo .Eng nge i duh a ? I duh chu sawi la kal bo rawh . Zanin chu ka buai a nia .
QUINN---Mitihlumtupa i rawih saw en turin ka rawn kal a ni a chanchin ziah ka duh a .
COUGHLIN--(dilchhut zet hian) Allison-a chuan eng nge a hrilh che a?
QUINN---( ngei hmel zet hian) Engmah . A tawng duh tlat lo .
COUGHLIN--( lawm hmel tak hian) A tawng duh ka ring lo reng a ni . Nang aia ngeng zawk mihring a awm tihna a nih chu .
QUINN---Ka pawm e . Saw mihring saw sangha ang maia thisen lumna nei lo a ni . Sawtah sawn a thu tawp a ,"Ni lo e." a ti hruih duh chauh a ni . Ka tawng hnem zawh poh leh a ngawi rei ani mai ( a ham bui bui a ) Aw a tha e ,a tha vek e . A tawng chuan a thusawite ka ziah a ngai dawn a , a tawng duh tak lohah chuan duh ang angin ka ziak thei a ni mai lawm.
COUGHLIN--(a sana chu a bih a )Minutes sawmpang . Intihhlum zana hun han kal muan dan em em hi a mak a ni , thihna pindana misual khawngaihthlak zet tan tiam lohin . Minutes tin kal ral zel chu a lo chhiar ve tlauh tlauh ang em le ka ti a ni .(a dar a san ak a )Awle, chanchin i ziak dawn a nih chuan kal tawh la a tha ang . Tihhlum hma minutes sawmah hriatpuitu chu thihna pindanah a awm a tul a ni .
QUINN---Tihhlum lai ka en dawn lo . Allison-a switch hmet lai ka en dawn a ni .
COUGHLIN-- Eng ngaihdan nge ni ta ngai ?
QUINN ---Editor chuan ruahmanna thar a nei thut a . A pang lehlam chanchin hriat a duh a ni , tihlumtu lam pang atangin eng emaw thil thar hriat a duh a .
COUGHLIN-- Ka luhtir theih dawn leh dawn loh ka hre thei lo . Allison-a a tihbuai phak ka hlau deuh .
QUINN--(a tho a) Saw vur hlawm saw a ti buai ang maw? Min ti nui teh suh khai . Sangha rilru leh lung milim thinlung alawm a neih . A vawt ruih a...
(Spotlight veilam chu a thim a , dinglam a eng ve thung a Allison-a chair-ah thu-a mei a zu lai a lo lang a . Khur der der leh dáng var papin Haley a lo lut a . Allison chuan chik zetin a lo en a .)
ALLISON---Thil dik lo a awm em ni ?
HALEY--Brown-a nui bawk bawk ka hmu a ...ka kal bo a tul a ni ! Ka ngaizam mai mai thei thlawt lo .
ALLISON--(dam ruih hian) Eng maw ngaizam i tih chu ?
HALEY---Tualthahna hi mawle ! Dan phalna a tualthahna a ni ! Chair-a thu tura ka hruai luh a ngai si a .
ALLISON---(vawt ruih hian) I hna hi i duh lo a nih chuan engah nge i bansan mai loh ni ?
HALEY ---Ka thei lo a ni . Pawisa ka mamawh alawm . Chhungkua ka nei a . Min ti á dawn pawh nise he hna hi ka thawh a tul a ni .
ALLISON ---Ngaiah i la neih mai ang .
HALEY ---Ka beisei . Nang paw'n ngaiah i neih tawh niin a lang. Minutes reilote hnuah mihring i that dawn tih i hriatna hian a ti buai pha lo che niin alang.(chiai tak hian ) Saw tukverh piaha chair-ah sawn kha switch i hmeh khan mihring , mipa naupang chu a thi sawrbawk dawn tih i hre lo em ni ? ( a insut hlap hlap a . Allison chu a ding uaih a )
ALLISON ---( a aw a lainatna tel hian ) Ka fapa, hetah hian thu lawk teh (chair-ah chuan Haley chu a nam thu a ) Intipachangin heng thil hi ngaihtuah rawh . Kan hna awlai loh zia chu van khian a hria alawm , mahse tu emaw tal chuan a tih ngei a ngai si a ni .( Haley chuan a melh chho ha a ) Chhuanlam dawrawm tak a ni tih chu ka hria alawm . ( a'n ngawi hlek a ) Chhungte i nei i ti em ni kha ?
HALEY---(a kuta a hmai hupin) Aw.
ALLISON-- Fate i nei em ?
HALEY ---Pahnih ka nei .
ALLISON ---I chawm seilen an tul si , a ni lawm ni ?
HALEY---( ngui tak hian ) Ka chawm an tul a ni .
ALLISON ---Ka pui thei maithei che a ni . Hun rei tak he hna hi ka lo thawk tawh alawm.
HALEY ---Min pui hram la ka ti a ni . Engtin nge i zam miah loh theih min hrilh teh . He mipa naupang hi la naupang viau lo se chuan ....kum 22 chauh...
ALLISON --- ( hriam hruk hian ) Tawp rawh . A chanchin engmah hriat ka duh lo a ni . An chanchin engmah hriat loh , an chanchin sawi loh leh ngaihthlak loh chu thil tih tur hmasa ber a ni . Chanchinbu chhiar ngai suh . An chanchin chhiar fuh ka hlauh avangin kum sawm chhung chanchinbu ka chhiar tawh lo a ni . Saw switch saw ka hmehin mihring ka that lo . Number ka hmet bo lek chauh a ni . Chu number chu 4386 a ni . Chu zawng chu ka hriat leh ka hriat duh chin a ni .
HALEY ---Chair_a awm chu tu nge a nih i hre ngai lo tihna maw ?
ALLISON ---Chair-a awm chu ka hre lo a ni .
HALEY --- Ngaihdan tha zet a nih chu mawle . He mi dawtah hi chuan ka hre ve tawh ang . Min hrilh belh zel teh , min be lumlam reng la ka ngaihtuah lo mai ang . Eng hun nge ni tawh ?
ALLISON ---( a rangkachak sana leh khaidiat nalh tak hi a phawrh a ) Minutes sawm .
HALEY ---(a nui khur dar dar a ) Mihring thih hun tur hrilh nan chuan sana nalh tak a nih kha le .
ALLISON---(hriam hrak hian a lo sawi dik sak a ) Number hmeh bo hun tur zawk mawle . (a sana chu a en a ) Kum li kalta khan hetiang hi inang chiah pahnih ka lei a .
HALEY---Nga tan nge pahnih kher ?
ALLISON --- Pakhat chu ka fapa graduate lawmpuina present a ni . Thil ker thiam hnenah a inang chiahin ka kertir a .
HALEY ---( ngaiven tak hian ) Chhungte i nei tih ka lo hre hauh lo a . A va mak em ...i fapa chuan engtin nge a ngaih i ....?
ALLISON --Ka hna hi maw ? A hre reng reng hleinem . Allison tih hi ka hming diktak pawh a ni hek lo .
HALEY--- A chanchin chu min lo hrilh teh ....engkim...tawng zel rawh . Min pui nasa teh mai a nia . Eng hna nge a thawh ve a ?
ALLISON ---Billy-a chuan dawrah hna a thawk a . Naupang tha , fel leh tak ngak mai hi a ni a , pawisa lamah hian a fimkhur hle thin a ni . High School a chhuahsan atanga kum li chhung chu a hna chu a chelh tawh a ni . (a thaw hulh a ) Kum hnih chhung ka hmu tawh lo a . A hnathawhna tan sumdawng ten a zin chhuak thin a ni . Billy hi ka ngaihtuah em em thin a , ka neihchhun liau liau ani tawh si a .
HALEY---I hna hi ka hna chelh chhan ang thoa chelh i ni tih ka hrethiam e .
ALLISON ---Chutiang vel chu a ni . Kum 10 kal ta khan Billy chu a dam loa , a dam khawchhuah nan chuan zai a ngai ta si a . Hna ka nei loa pawisa ka nei hek lo . Billy chu ka neihchhun liau liau a ni a , a pian tirh hian a nu chuan a boralsan tawh a ni . Khatih lai khan Billy chu kum sawmpahnih chauh a la ni a ...thi mai tur atan chuan a la naupag lulai em a ni . Ka á mai dawn ni te hian ka hria a -- Switch hmeh zeuh a dollar zathum hlawhna tur chu ka hmu fuh ta hlauh mai a . Ka thawk ta ani .
HALEY --- Ka hrethiam e .
ALLISON --Chutichuan a lo dam chhuak leh ta a , kan innel dun em em a , kan riak dun a , sangha kan man dun a , kan zin kual vel thin bawk a ni . He hna hian amah enkawl puitlin nan pawisa min pe a . High school ka zir thlentir ve theih phah a ni . Sana ka pek lai chuan a phur em em mai a . Hetiang thil inang kan neih hian min inpawh zualtir a ...chuvangin a kawl reng tur thu min hrilh nghe nghe a ni . Chutah college-a luhtir ve ka duh a , mahse a duh ta si loa . Sumdawnna lam khawih a duh zawk a . Pawisa hailuh dan hre tak hi a ni a , a che fuh thei hle bawk a ni .(a sana chu a bih zoh a ) I kal a hun ta . I ngaizam thei tawh em ang chu maw .
HALEY --Ka thei tawhin ka ring ...tunah chuan . Min pui nasa hle mai . Ka lawm e .
ALLISON ---In chhungkaw tana ti i ni tih kha hre reng ang che . Number mai a ni , mihring ni loin number mai a ni . Switch ka hmet a , a mawh pawh ka phur a ni .Chu chu ka hlawh hmuh chhan pawh a ni . Chuti ni lo se ka thawk tawp nang .
HALEY -- Ka hre reng dawn nia .
(A chhuak ta a . Allison chuan a thlir voh voh a , a sana chu bihin thuthmun a rem a Quinn chu a rawn lut a . Allison chuan a lo melh zoh a , a pipe chu a tan nghal zat a .)
QUINN ---( pawisa lo zet hian) Switch i hmet lai warden-in ka en min phalsak a . A tihbuai loh hram che ka beisei .
ALLISON --(dar a chhin uk a ) Buai lo e .
QUINN ---Ka lawm e , a tihbuai che ka ring lo reng a ni .(Hul hak hian) Chanchin ka ziah tan dan tur chu ka hria e .(tukverh thir kham lam chu pan pheiin thihna pindan chu a thlir a ) An rawn kal ta e ...an rawn hruai lut ta . Amahin a kal a , a lu a dak vah a . A pawmzam hle mai . Chair-ah an thuttir ta ...amah aiin a vengtute saw an zamchhe zawk a nih saw . Lalpa , a la naupang ....
ALLISON ---( chher chhuai hian ) Ngawi chipcham rawh !
QUINN --(a va melh zoh a) Ka tihpalh . Saw warden a lo kal e .
( Coughlin a rawn lut a , Allison chu switch bulah a ding a . Coughlin chuan romol-in a chal a hru pawk a )
COUGHLIN-- A zam chhe hauh lo a nia . A rawn luhtirh ang tho khan a la ngeng a ni . Kawng tluanin fiamthu a thawh a . I inpeih em , Allison ?
ALLISON ---(zawi sup hian ) Aw
( Switch chu a vuan run tawh a , Coughlin chuan tukverh atang chuan thihna pindan chu a va bih a . Quinn chuan Allison chu a melh reng a . Coughlin chuan a coat ipte chu zenin rangkachak sana leh khaidiat hi a rawn phawrh a , en hauh loin Allison chu a pe a .)
COUGHLIN -- Kha le ,Allison . Switch hmettu hnenah pe turin min ti a . An thih hmaa an thil tih duh thin hi a mak thin ngawt mai .
( Allison chuan muangchangin a kut veilam pang chu a pharh chhuak a , sana chu a la ta a . Rap hmel zet hian a melh ta tlawk tlawk a . A ipte zenin ama sana chu a phawrh a . An lo inang chiah chiah a . Bang chu a ngheng phei rawk rawk a .)
COUGHLIN---(a kut phar chhuakin) I inring em ? Tunah le !( Allison chu a chechang lo , maimitchhingin a din ngai chuan a ding tlawk tlawk a . Coughlin chu a rawn inher a , a va en a ) Thuai ! Switch kha hmet rawh ! Allison, eng i ti ta mai nge ni ? Switch kha hmet rawh .
ALLISON ---( a rum kawk a ) Ka thei lo ....ka thei lo...!
COUGHLIN ---( a darah a thamsak a ) I ti tur a ni ! Chair-ah a thu tawh --a rilru hahna i pawt sei ting mai a ni . Ka lalpa, switch kha hmet rawh !
ALLISON ---( zawitéin a lu a thing a , a phun sup a ) Ka thei lo .
COUGHLIN --Chair-ah a thu tawh a nia . Ka hrilh a che ! Switch kha hmet rawh ! Han che vat teh (Allison chu a chechang lo reng reng a .) I tih loh chuan ka tih tho a ngai a ni . (a phun su su a ) Tualthattu ka ni ve dawn tihna a ni mai .( mangang takin) Khawngaihin ,Allison , tualthattuah min siam lui suh . Chair-ah thuin a nghak mek a ni . Switch kha hmet rawh ....Pathian hmingin Allison , tual min thahtir i tum em ni ?
( Allison chuan a mit a meng a , a va melh a . Zawimuangin a lu a thing a , muangchangin a kut dinglam chuan switch chu a vuan a )
ALLISON ---( tham tuak hian ) Tualthattu-ah.... ka....siam lo....ang ....che....
( Switch chu a hmet ta a . Switch a han tek chhiai chhiai chuan spotlight chu a thim ta riai a . Allison chuan bang chu a ngheng let rawk rawk a , a hmai chu a dáng var pup mai a , khenbeh ang mai hian a ban chu a phar kak du mai bawk a .)
A _ T_A_ W _P _T _A
*****
He lemchan thawnthu hi vawi tam tak ka chhiar chhuah hnuah pawh ngaihnawm ka la tiin ka mittui a la titla sawk thei a ni. A ngaihnawmna phawk chhuak zo khawpin ka let chhuak zo lo ang tih erawh ka hlau.
Chhiar liam puat loa uluk taka rilru pe chunga chhiar chi a ni e. A cover leh a thawnthu erawh a inmil lo tih ka hria, inzawmna a nei lo bawk e. Ka hmuh remchan hmasak ber ka rawn hmang tawp mai.
THE OTHER SIDE
-
- Posts: 164
- Joined: March 17th, 2021, 6:20 pm
ADVERTISEMENT (A hnuai a milem hi a nia hmeh zeuh tur chu)