A COLDEST WINTER NIGHT..

[chester ralte]

..Zanlai alo thleng ta tih min hrilh tum ni awm fahran a banga sana lian in khawng rik na pawh dar chanve vel lai ani tawh ta hial ve ang, dar sawm leh pathum pawh lo ri ta teh reng pawh nisela ka tan chuan danglamna leh pawimawhna hranpa em em a awm chuang lo, hun aliam hret tih mai loh chu.

Ka muhil theilo chu khum ah chuan ka let ka let a, thlasik khawvawt tlanbosan a, mumang khawvel fan ka tum ve na chu a thelh chiang khawp mai.

Chutia muhil theilo a ka leh ka leh hnu chuan ni thei ngangin ka hre lo a, intih harh tum in tukverh kan hawng a, room chhunga thlasik thlifim rawn thaw lut heuh heuh te chuan min zem ni ber in ka hria.
Lemziak thiam in a uluk tak a aziah ni awm tak a Van chung sang tak a arsi sang tam tak lungrual hmel tak a eng sep sep leh in pho uarh te leh khaw chhak lam pan a a zinkawng zawh mek ni awm tak a Thlasik kawng paw riai mai te chu ka thlir ning thei lova, hetiang a awm tur hian Siamtu hian kum maktaduai engzah nge a remhriatna leh ngaihtuahna te chu a lo sen ang tih hi rilru hian a ngaihtuah vawng vawng mai.

Chutia Van lam thlir a ka hawi dauh dauh hnu chuan ka hma zawn a khawpui ropui tak mai chu kan thlir leh a, a tuk mai a Lal pian hun champha lo thleng tur nghah nan leh lawmna atan a inbuatsaihna, mitin in a uluk tak a cheimawina chitin reng a kawtthler leh an in an chei te chuan ka rilru a hneh in ka lung a ti leng a, ka muthilh ni lovin, chung ka thil hmuh te chuan ka thinlung aluah in min zem ni ber in ka hria, ka ngaihtuahna chuan kum liam ta chu a chhui let a..
..nilo, chhui let mai nilovin hun liam ta ah a kir leh zwk ani.

Ni e, nikum Christmas urlawk zan te kha chuan, ka hmangaihi nen he tukverh ah ngei hian Siamtu ropui zia thlir in chung Van lam hla tak a arsi inpho iarh te chu hlim tak a inkuah rial in kan chhiar vel a, kawtthler an cheimawi ah te thla la in inkai rial in kan fang dun anih kha.

Ni e, kha zan lunglen thlak tak leh ngaihawm tak kha he ka damchhung hian ka tawng leh ngai tawh dawnlo tih ka ngaihtuah chang phei chuan khawvel ah hian mal ngawih ngawih in ka in hria a, dam chakna reng ka nei mawlh lo.

Thlamuang taka ka awm a bei a, " Khawiah pawh awm ila, lo thi ta pawh ni ila, urlawk zan alo thlen apiang in ka hmangaih che tih hi ilo hrechhuak ziah dawn nia, ka hmangaih che a, ka hmangaih reng fo ang che "a tih te kha ka beng ah hian a ri nawn tluk tluk a, tun lawk ni maiin ka hria.

Kha zan hlimawm tak kan hman dun lai khan tun kum urlawk zan kan hman dun dan tur te kha a sawi siam siam kha ania, he hun lo thleng tur a nghahhleh zia te khan ngaih ati tha lo rum rum zawk a, ngaih thatloh ang rengin a duhthusam te chu boruak ah a thamral a, chu mai pawh ni lovin a mah ngei pawh in a duhthusam te chu kumkhua ai pawh a rei zawk chatuan thleng pawh a hmang thei tawh ngailo tur in a kalsan ta si a..

Ni e, kan in tawn tir atang reng khan kan in hmangaih a, hun lo in her danglam zel mahse kan in hmangaihna chu a danglam ve ngailo mai nilovin, nitin in a zual deuh deuh zawk a, kan in hmangaih a, kan in hmangaih reng a, kan in hmangaih reng fo thin a, Ni leh Thla leh Arsi te khi tuipui zau tak a an pil bo hun alo thlen hun ah pawh kan la in hmangaih reng ka ring ani..

Ni e, he Thlasik zan boruak vawt leh thiang tak hi ka tan chuan hlimna alo ni thin a, chutiang bawk in mitin tan pawn kumpui linglet a an lo nghah fak leh an lo thlahlel ber ani a, mahse ka tan chuan mittui ti tla tu mai alo ni ta si anih hi..

A enga pawh chu lo nita tehreng pawh ni sela, ka hmangaih chuan he hringnun khawvel ata hi min kalsan mahsela, a hmangaihna chuan min chenchilh a, min kalsan ngailo ani tih hi ka hriatchhuah chang hian lawmna avang in ka mittui a tla thin..