I LOVE YOU MORE -13

Story tawi te te emaw luanliamna emaw post na
Sandy sweet
Posts: 95
Joined: June 11th, 2021, 10:34 pm

I LOVE YOU MORE -13

Unread post by Sandy sweet » September 16th, 2021, 8:02 pm

Part-13



Choka atang ka chhuah chuan ka pa chu Tv en in a lo la thu a , ka awm a nawm loh avangin thut khawmuan pawh ka tum lo , mut hmak chu ka chak ber a , ngawi reng chuan ka room pan na kailawnah chuan ka pen chho a , pen thum vel bak ka pen hman lo ang , " Lo thu rih la , " A lo ti a . Min en paw'n ka hre si lo eng tin nge min biak theih le ,ka pen ring viau maw ni ?


Sawi buai lo chuan in herin ka pen thla leh ta nge nge a , a thutna ep chiah single sofa-ah chuan ka va thu a , Tv chu ngun deuh mai hian a en a min en chuang miah lo a bulah chuan ka thu ve a ni tih pawh chu a hre ngut a nge maw ?

A channel en ber kher lah chu news vai ho puan leh nghal , a la ti ring em em zui a , peih lo deuh chuan a hma zawnah ka ban ka va phar , Tv en reng chung chuan a kutin ka kut chu a lo vai kiang , kei lahin tih luih nuam ka ti sauh sia , ka ke chu ka theih ang a sangin ka lek kang zui , a thinrim chuan vai kian a tum mahse a lo tawk hman hma chiah in ka la let leh zel sia.


A ngaih dan ni lo lutuk chuan , " News ka en zawh hian ka zai dawn lo insum rawh , " Rum zet hian a lo ti a . Ka ke chu ka dah sawn rang ngei mai , a zai a nih vaih chuan thenawm khawveng te an lo pungkhawm a ni mai , a aw a thum si , a zai ring si a zahthlak thei lutuk . Hmanah a zai vak a thenawm te an lo leng nghal a lungleng emaw an tia , a awm ve tho patling ring zeta zai ta chu a lungleng emaw tih awm reng pawh a nia , ka zak lutuk chuan vawikhat mah zai vak vak tawh lo ka ngen a , min vau nan a hmang daih a nih hi.


Ngawi reng chuan kut kuangkuahin ka thu a , ka beng a ti kham ka ning tawh ngei mai mahse ka tawng peih lo , thawh chhuah pawh ka peih chuang lo . Ka mit te lah chu kham ngut ngut tak a ni , ka thaw pawh a sa ham ham nia .


Ka mit chu chhing in , news tawp hun tur chu ka ngaichang a , a puang rei zek a hrawk te a na ve lo a niang ,a dak par par ,a puang tu aw lah a thing ropui si ,a ka pa pawh hi eng vanga en ve ngawt nge maw ni a nih ni ?Channel dang en tur a tam teh reng nen .



A tawpah chuan a zo ve hram , channel dang a hmet zawk nge , " Tom and Jerry kha in ngaina thin a , a hmuhnawm viau pawh a niang ? Mahse tunlai naupang chuan a hming pawh an hre tawh lo , chhuak thar hi a tam ve tawh bawk a , " A ti chhuak sup a . Meng chhuak a ka en ve chuan cartoon network a lo en chu niin ka nuih chu a za hle bawk .


" Tom-a ka duh thin kha , " Nui hak in Ka ti ve mai a .

" Nia , i u in Jerry-a a duh vang a niin ka hria ,i sual reuh sia , i rilru te hi a kawi ngil ngel , "a ti leh a . Ka pa hi chuan min hrechiang a ni . Hah taka a enkawl seilen kha kan ni miau a .


" Ummm, a duh loh zawk a piang kha ka duh thin a lawm , barbie pawh anin a pink a duh a , keiin a blue , " Kan naupan lai ngaihtuah chuan ka ti leh sup a , a thusawi avang chuan ka thin pawh a rim bik chuang lo .

Kan naupan lai chanchin sawi takah chuan ka lungte pawh a leng ve rum rum mai.


" Nia , thawmhnaw in ang hak pawh i duh ngai lo , phir inni kha i thintirim tu a ni tlat a , " Tiin hmanlai thil ngaihtuah niawm tak hian a mitmeng chu a thuk ruih a . A lung a leng viau a ni ngei ang .


" Mite khan kan inang sia min hriat fin thin kha ka duh lo a lawm , " Ka ti leh mai a .


" I u hi chu ka fanu a nia , " Tiin a phun leh sap a , ka mitko ka san ak ringawt .

Sawi zawm lehin , " Nang chu ka fapa i ni thung , " A nui a . Keipawh ka nui mai mipa chu ni lo mah ila fapa ang mai a enkawl ngai kha ka ni thin reng a .


Ka ngaihtuah let hian ka pa tan hian enkawl ka lo hahthlak thin awm mang e aw ka ti , kan naupan lai khan ka ngaihtuah thiam pha ngai hauh lo a , mite'n nu tello a fanu pahnih enkawl a nih avangin thil ka tih sual hlek in ka pa bawk an sawi leh thin , tisual tu zawk ka ni chung khan ka pa bawk an dem leh thin.


Ka pa hi eng vang a dem ve ringawt nge an nih ka hre lo , nupui a sun hi a thiam loh a ni lo a , nu tello a naupang pahnih min enkawl pawh a thiam loh a ni chuang hek lo. Nu tello a thang lian ka nih avang a thil ti sual lah ka ni hek lo , ka pian pui ka mizia ve pangai a nih avang a thinchhia leh tihmawh ve tak , insual hrat ka ni ve mai , ka mizia ka nungchangah hian tumah mawh puh tur an awm lo . Ka duh dana nung ve mai ka ni.


" In naupan lai kha a ngaihawm thin , " A ti leh sap a .


" Puitling kan nih hnu hian a nuam zawk daih lo em ni ? Ka insual avang emaw school atang ka tlanbo vangin emaw midangte sawi selna i dawng tawh lo a ,lehkha min zirtir kan ngai tawh lo bawk a , a nuam zawk daih ang chu , " Keiin ka ti thung a .


Kan naupan lai kha chu a ngaihawm rualin puitling nih hi nuam ka ti daih zawk .

Nui chhuak hakin a thu awn duai a , a kut chu hnunglamah dah chhoin a ngheng al al a , " Puitling in nih hnu hi chuan ka tar daih a , nuam ka ti lo , tlangval nih te kha a nuam ve a , " A ti fiamthu ve ngei a , vawiin thil thleng avang khan min hauh ka ring a nia min hau miah lo . A lungleng viau nge thusawi tur pawimawh a nei zawk ?


" I tar loh kha , i duh dan danin i la awm thei a lawm , kum sawm nga paruk vel chiah i la nia i la tar hleinem , sap ho te chu e i kum ang rualah chuan nupui pathum an chhai thlu leh thei ang chu , nang pawh tar la tum suh ka la tlangval dawn chauh ti la i tha a ni mai , " Thatchhe deuh a thu awn ve duai chuan ka ti leh a .

A tarmit vuah lai chu phelh in , " Zote , " A ti dam thlup a . Lu ka lo bu nghauh a , " ka dampui reng lo thei che u , in hmalam hun tur chu nangmahni ngaithuah tur a nia , kei in chu chu kha kha lo tih reng theih pawh a ni lo , " A thu sawi lai chu pawt chatin , " Eng i sawi tumna nge ? " ka ti let thung a . Ka ngaih a ti tha lo dawn a lawm maw le tun ang hunah chutiang thil te sawi .


Min lo en in thutak zet hian , " I u in pasal a nei tawh a , ani chu ngaihtuah ngaiin a awm tawh lo nangmah zawk hi i ni ka ngaihtuah chu , Ben-a hi keichuan tha ka ti a, in pahnih a inawm dun pawh hian sawiselna tur ka hre lem lo , ka hmuh dan chuan a duh ve tak tak che pawhin ka hria ,a mizia pawh han fak chiam tur chu ni lo mahse mi fel tak chu a ni sawi sel tur ka hre lem lo .


An hausakna te chu eng a ni lo , mihring hi an pawimawh zawk . Ka sawi tum zawk tak chu mitha chhung anni a , apa atang rengin kohhran mi Pathian tih chhung tak anni , an inchhungkhur a an khawsak dan te chu keini hriat theih a ni lo .


Mahse pasal i nei dawn a nih chuan anni chhung saw ka duhpui ber che , i lawi luhna tur hmun tak ni pawhin ka hria , " A ti dam dap a . Tun hi kan pafa a inhnial lo a thu pangai tak kan sawi dun ve chhun a ni ngei ang .

" Pa , " ka ti chuai raih a , thil dang ka sawi leh hma chuan , " Nangma thutlukna siam tur a ni , keichuan kawng dik ni a ka hriat ka kawhhmuh ringawt che a , i duh thlanna kha a lalber , i duh thlanna chu ka zah sak ang che , " Min lo tih khalh a .


" Pa , kan inmil chiah ang maw ? An mo ni tur chuan ka tling zo a ngem ? Min ring ngam chiah maw ? " Tiin ka zawt a .



**An mo ni tur chuan ka tling a ngem ? Kan inhmuh chhun ang ah pawh chhungkaw fel tak annih zia ka hria . An monu uBawihi ber pawh mi fel tak a ni , chutih lai a karah kei keive teh lul hi anni ang chhungkuaa lawi tur sawn ka tling zo ve dawn em ni?


Ben-a chu ka bialpa a ni a , pasal ka nei dawn a nih chuan ka pasal ni thei tur awm ang ber pawh a ni . Hmanlai hun a ni tawh lo a , hmelhriat loh chuan min lo dil thu awm hek suh. Inneihna ah chuan chhungkaw hnih inzawm khawm kan nih miau avangin a chhungte pawh ka ngaihtuah tel ve an ngai a , Ben-a chauh ngaihtuah thei ka ni lo . Anni'n min pawm viau mahse keimah zawk hi an chhungkaw mil in ka insiam rem thei ve a ngem ? An chhungkaw ti darhtu ka ni zawk mai lo ang maw ? Keimah hi ka inring tawk lo a ni.


Eng vangin nge Mizote hi nupui pasal kan inneih dawn hian ngaihtuah tul leh tih tur tul hi a tam bik em em le ? Ka a zo dawn , ka unaunu khan pasal a neih dawn khan tiang thil hi a ngaihtuah ve tho a ngem le ?


Ka pa chuan ka kut lo vuan in , " Thil i ngaihtuah thui lutuk chuan a rem lohna i hre zel ang ...., i hria em ? " A ti leh daih a . " Eng ? " Ka ti thuai a .

" Mihring nun hi chu risk vek a ni , thil thleng thei lo nia kan ngaih pawh hi risk kan lak ngam chuan a thleng thei vek chutiang deuh chiah chuan nupui pasal a inneih te pawh hi risk vek a lawm , a pawimawh ber ah chuan i hmalam hun atan risk i la ngam dawn em ? Tih a ni zawk , thil ngaihtuah thui lutuk te , kan hmalam hun tur ringawt ngaihtuah ngut ngut te hi a lo ni ber lo , kan hun hman mek hi a lo pawimawh ber a, kan hmalam hun hriltu pawh kan tun hun bawk hi . Chuvang chuan nang pawh inngaihtuah thui lutuk duh suh , i thinlung in tha a tih zawng kha pawm tawp rawh , thu tlukna tha tak i siam ngei ka ring , " A ti a .


" Aw le , ka lo inngaihtuah dawn nia , " Tiin ka tho hluai a , " Ka mutsan mai ang che , " Ka ti leh a .

" Aw lo thu rih la , i room-ah thil tha tak a awm bik loh kha , " Nui chung chuan a ti a .


Zik mar pah chuan , " Awm lo mahse ka mu chak a lawm , " Ka ti leh a . Kan inhnial tan leh ta.


" Thu rih la Doraemon kan en dawn nia , " A sawi zawh rual chuan Nobeta tawng thawm ka hre nghal zat , a chhuak nghal a nih dawn hi .


Ka room lam pan ka tum tawh zet chu ka thutna ngaiah thu tha leh in , " Pa , eng tin nge a chhuah hun i hriat chat theih a ? " Tiin mak ti deuh chuan Ka zawk ta nge nge a .


Intih theih hmel fe hian , " Ka hria ang chu , keiin ka hriat loh in nang in i hre si lo a , " A ti daih . Zawhna ka zawt a mahse chhanna ai mah chuan min insawi theih khum zawk .


" Ka en duh tawh lo , kan naupan lai ang khan a hmuh nawm tawh lo , " Ka ti ve thung a . A awih lo leh ang chu , a ner sak mai .


A darah beng thakin , " Pa , i en ziah thin em ni ? I va ho tak patling pui in cartoon han en thin chu , " Tiin ka nui a . Min chhang lo in ka benna chu a kut leh lam chuan a tuai a ,hawi sawn miah lo in a Tv en lai chu a en reng , a nui leh hak thin .


Ho ti tak chuan ka then sak a , tho chhuakin ka ding deuh hluai a , " A nih ka mutsan ang che , nang pawh mu hma la , " Tiin ka room panna kailawn lam chu ka pan san a , " Ben-a nen inbe rei su aw , naktuk inkhawm a ngaih kha , " Tiin a lo au a . Min ngeih ven lo emaw tia , Ka thusawi a lo hre leh tho mipa ho hian ngawih reng hi an intih hmuh a nih dawn hi .


Kailawnah chuan muang chang a chho in zawite te in ka zai rat rat a , Lalngengpuii tochhawng hla thar kha ka sa ngei a , a thu ka hre fum fe lo nen a sang laiah ka la tlin lo zui , mahni in ka innuih char char .


Ka room ka luh chuan light ka on nghal a , ka khum ka pan dawn chuan dawhkan te ka room lai taka ka hun ah chuan ka ke ka la chhuih zui , na tak a ni . Light on hnu pawh a ka la inchhuih thei chu ka la na tlat . Vawiin zet zawng ka che fuh lo vel vek a nih hi . Ninawm lutuk mai !


Thinrim tun chung chuan khumah ka bawk nghal thlawp , puan pawh sin lo chuan ka mit ka chhing nghal hmak , mutthilh vat ka duh.


Ka phone a ri chuan min ti harh la vatin , " Ben-a bialnu chu a mu tawh naktukah lo be zawk mai rawh , " Ka ti nghal thawr a , leh lam a mi chu a tawng lawk lo , nui ri ka hriat chuan ka phone screen chu ka en vata ka unaunu Zodinpuii , Ruat hnarkaw vanga nupui lek lo niin , ka va ngei mai mai tak .


" Ti nge min lo phone dawn in min hrilh hmasak loh ? " Ka ti vak a . Nui chung chuan , " Eng tiang a hrilh hmasak nge i duh ? " A lo ti a . A la nui thei chu ka thin a tirim .

" Nui rawh nang maha i nuih sen loh chuan i pasal duatlai hnarkaw vang tak kha i sawm tel dawn nia , " Ka ti leh kher a .


" Ummm , a nih leh ka lo be tha ang che hrilh lawk kha i duh sia , tun hi inhrilh lawk na nise next chu a tak tak aw , " A aw a nuihzatna chu a la hriat theih , a nui kir vel maw le .


Ka awm dan chu ho ka ti leh deuh sia , " A ngai lo , tikhan i sawi duh chu sawi rawh , " Ka ti ta zawk a .


" Ok , i thinrim hian nakin hun a hril leh si a nge ? " La nui reng chung chuan a ti leh a.


" Eng nakin hun maw ? " Ka ti deuh hmuk thung.

" Aw , kan fate puak duh loh vel ang te kha , " Ani pawh hi apasal a chhun zo vek tawh a nih hi , sawi tur hi a hre sawt riau .

" Pawimawh a awm loh chuan ka dah dawn , " Ka lungawi loh zia chu ka aw ah chuan ka ti lang tel kher a .

" Dah teh suh , min ngai lo riau ka ti , ka ti tau mai tur a nia , " A ti kir chuai a .



Keiai nuar vel a thiam zawk daih tih ka theih nghilh a ni , a titau tak tak a nih chuan biak a har leh talh mai ang . Ninawm thlem hi min tum ve ngai hlawm si lo a , ka tihtauh khum ber te hi thlem an ngai leh daih zel , titau tur a piang ka ni ve lo a niang . Nau a pai bawk sia ka insum leh rih mai a ni ang chu.


" Anih , i duh duh sawi rawh ka lo ngaithla ang , " Thaw chhuak hluai chung chuan ka ti ta nge nge a .


A nui suk , " Ka pa nen kan inbia a . "


" Chuan ? " Ka lo tih khalh thung a .

" Chuan ah ...... Kan naupa'n lai chanchin te kan sawi a , " A aw atang chuan ani pawh a lunglen hmel khawp mai .


" Thil dang in sawi tel bawk a ? "

" Umm, Ben-a nen in chungchang te pawh kan sawi tel a , " A tawng ka chhuak chu a ban chap a , kei ang lo takin a vin ve khur khur lem lo mahse a pehhel kual thin .A sawi tum tak hi a sawi har thei mai sia , pehhel kual hi a master ve na a nia.


" Ummm , a nih chu , " Ka ti vawt ruih thung a .


" Engtin nge kan sawi i hria em ? "Leh ta zel chuan .


Inlet thakin ka thu chhuak a , " Nang leh kapa inbiakna chu eng tin nge hria se min tih , i mak em mai , sawi kual duah lo khan i sawi tum tak chu sawi ve mai la , " Ka vin lo mahse ka tawng rang , a hrethiam nghal mai ang , rang taka thil ka sawi chuan ka thinrim tep tawh thin . Chu chu a hrechiang hle.


" I dawh thei lo sia , ka thusawi chu tha deuhin ngaithla la ,zawhna ka zawh chein tha deuhin min chhang ve mai thin la thil har pawh a ni lo . " A ti rum ve hmak a.


" Ka dawhthei ngai em ni ? "

" Inhnial tura lo bia che ka ni lo . "

" Ok . "

Thawk la kawkin , " A tha e , min vin leh hrep hma hian ka'n sawi a nge , Ben-a chu mi fel tak a nia , a tihlim che tih pawh ka hria , nei rawh nei suh tih sawi ka tum lo mahse pasal i neih dawn pawn nau ka neih hnuah i nei dawn nia , " A ti hmawk hmawk a . Thil dang a sawi dawn emaw tia .


" Eng vang chuan maw ? "

" I mak , eng tin nge raipuar chungin i bulah ka din theih ang , " A ti thawp sup a . Pasal ka neih hunah thian ah ka hmang ang che ka ti tawp si lo a , a lo insawi lut ve ringawt a , zam lo ve .


" A tha mai e , " Tiin Ka thaw chhuak hluai a , " A nih , uRuata i neih dawn khan i inngaihtuah buai ve tho em ? " Tiin ka hriat chak tak chu ka zawt ta daih a . Ni danga zawh ngai lo in a sawi chhuah lai hian zawt ila ni mai lawm .



" Aw.....ti ila aih pawh a ni tho mai , ka inngaihtuah nasat lutuk chuan a buaithlak ka tia mai mitchhing chung in aw ka ti mai , " Amah lah chu a nui leh nghal a , fiamthu ang mai in a lawm a sawi chu le . Awih tur nge awih loh tur pawh min ti hre lo zo vek .


" Aw nge aih i hre tawh lo a nih kha , a tha tho e, ka lo zawt buai duh zawk che a ni , " Ring lo aw ka deuh chuan ka ti a .


Ka khum atang chuan tho chhuak in tukverh bulah chuan ka va ding a , pawm lam chu ka thlir a , arsi a lang phe tuar mai .

" Ka fiamthu lo , nangmah khan a chhanna tur chu i hre mai ang , ngati nge pasal neih pawh chu i huphurh em em ni ?.....In ngaihtuah vak vak duh suh , i rilru a kam tun anga i thluak a buai mai mai , " Uar fe hian a lo tia .

"Ummm , nia a dik ang ka at mai loh nan mitchhing chungin ka aw ve mai ang chu , " Ka sawi zawh hma chuan , " Aih , i thei lo , " A lo ti a .

" Ka thu vek a lawm , i sawi zawh chiah kha . "

"Ah....... Ka sawi tum chu nau ka neih hma chuan pasal nei suh ka tihna , " A aw ah chuan pasal nei lo turin min duh hmel ngawih ngawih , ngati nge a danglam sawt viau mai le ?

" Ok...... Kan sawi tha leh dawn nia , mu daih rawh i chau a nih kha , " Tiin min chhanna pawh nghak lo in ka phone ka off nghal hmak .


Sana ka en chuan ka rinai a la hma mahse ka mut a chhuak , thawh a insil pawh ka peih tawh lo , ka awm dan ngai ngai chuan mut hmak ka tum a , khumah chuan bawk leh thlawp in mit ka chhing a , ka mutthilh tak tak hma chuan ka phone a lo ri leh , ka la peih tawh lo .


Mit chhing a mang rama ka chen tan dawn chiah chuan a lo ri nawn leh , ka thinrim chuan thu chhuakin phone chu la in , " Tun ang hunah ti nge min lo call chhen a mi mah mut chhuah nak a lai a , " Ka ti zawi nuai a . Vin vak ka tum a mahse ka zawi vek , ka tum ang in ka vin thei lo .


" E , tihpalh a nih chu , " Ti zawi ve supin , a off daih min lo call tu chu Ben-a daih a ni . A aw atang khan ka hre nghal mai , call let vatin a lak hun chu ka nghak a , vawi hnihna ah a la ve hram .


" I mut a chhuak emaw tia ? " Thatchhe zet hian a lo ti a .

" Chhuak e , min lo call avang khan ka harh leh vek a lawm , " A aia thatchhe ve leh chhawng chuan ka ti a .



" A nih mu leh la , " Nuihza aw zet hian a lo ti ve leh a .

" In be rih ang , ka mutchhuak kha chu theihnghilh daih rawh , tunah chuan tlaivar turah inngai la , " Phur zet chuan ka ti a . Ka ke chu kawkalhin ka thu tha sauh sauh bawk a .


" Aw le , i tih tlat te chuan , " A aw a nuih zatna la lang reng chung chuan min chhang a.


" Kan naupan lai chuan maw cartoon hi kan ngaina thei lutuk a sin , kan en reng peih mahse ka pa'n en hun min siam a , " Ka ti phawt a , " Ummm , " Anin a lo ti ve thung a .


" Eng cartoon nge hmuhnawm kan tih ber thin a i rin le ? " Ringchhin ve reng reng teh se 'ummm' tih ringawt chu a boring tlat .


" Rin dan ka va nei thiam mai lo ve aw , " Thil pangai tak kan sawi ang mai hian a lo ti a . Chu chuan min ti lawm , eng pawh sawi ila min ngaih pawimawh sak tih a hriat .Tun ah pawh cartoon mai mai ka sawi a nia .


" Hint ka pe ang che i duh em ? " Phur tak chuan ka zawt a .


" Ummm . "


" A nih chuan in ring la , i ti dik lo a nih chuan i in a ka lo kal hunah eitur min siam ang . "

" Ummm , i thu thu , " A ti leh mai a.


" Aw le , kan tan a nge ,kan cartoon en duh ber ah chuan a film hmingah changtute hming an hmang a , an pahnih chuan an inngeih lo lutuk . "


A ngaihtuah phawt a niang , " Ah..... Idk , " A lo ti a . Ka nui hak , " Hbl tih zawk tur , " Tiin ka lo correct sak a , a nui ve ringawt .

" Taka Tom&Jerry kha in naupan laiin in en ve thin em ? " Tiin ka zawt ta daih a .



Nui chungin , " En vak lo , kan upa tawh a , " A lo ti a . Ani reng ang keiai in kum sawm velin a upa tak e . Tom & Jerry pawh a en peih ve tawp nang .


" A nih chu ....... Ka en duh deuh ka hrilh leh ang che , " Ka aw ka thian kharh a .


" Ummmm , tam deuh sawi rawh , " A aw thatchhe deuh kha a ri chhuak tawh lo , a thu tha tawh a ni ngei ang .


" Keiin ka en duh chu Doraemon a nia , ka unaunu ve thung chuan Pink Panther a en duh thin , " Ka ngaihtuah let paha ka nui hak .


" Blue leh pink indo na ? " A thusawi chu zawhna daih a ni . Thil min zawh ve dan hrim hrim a nia , em ni ? Tih vel hi a belh vak ngai lo , a hma kha chuan ka thinrim phah thin a mahse tunah chuan ngaiah ka neih tawh.


" Ummm , ani'n blue a duh chuan pink a ni leh mai , " Ka ti deuh kher a . Ka nui zui bawk a .


" Ka hrethiam , " A ti thum bul a . Kan naupan lai chanchin chu ka pa hnen atang a lo hre leh daih tawh ang . Ka pa hian kan chanchin sawi hi nuam a ti thin a , zep then pawh awm lo hian kan nihna ang ang hian a sawi a , a zahthlak rualin a tha tho mai ,kan nihna lo ang in min fak vak tase a hrilh a te khan min ngai fel viau emaw kha a nia nga , kan nihna diktak an hriat hunah a zahthlak lehzual ang .


" A nih chuan i mutchhuak kha lo insum rih la , bible-a mipa chanchin inziak zinga kan duh ber ka hrilh leh ang che , " keimah zawk chu ka nui vak vak a , a nui ve in ka hria .


" Ummm han sawi la , " A lo tih chuan pangai takin a ngaithla tih ka hria . Ka thusawi tur pawh hi a lo hre leh vek tawh hial lo maw ? Ka pa hian a lo hrilh leh tawh ka ring tlat . Pakhata lah hian ka thusawi apiang a hriat tawh hnu pawh nise a vawikhat hriatna ang chiah hian a ngaithla mai zel bawk sia .


" Keichuan LalSolomon-a ka duh ber thin a , ka unaunu chuan Tirhkoh Paul-a a duh thung , " Ka sawi zawh hma chuan a nui hak a , " Ti nge i nuih kher a ? " Ka ti leh ta nge nge a .

" I ler sia , " A ti ringawt . A sawi chhan ka hre mai LalSolomon-a hming ka sawi vang a ni chiang mai .


" Tun hnu hian ka thlak daih a lawm . "

" Tun hnu chuan kei min duh ta a ? " A nui tawh miah lo . A titak vel lutuk , zei lo deuh hian a zei leh ang lawi si thin a .


" Bible-ah i hming a chuang ve hleinem , " Ka ti nghek a .

" E-b-e-n-e-z-a-r a chuang lo maw ? " A ti ban chap a .

" Ebenezar te chu chuang e mahse mihring hming a ni em ni ? "


" A ni emaw ni lo emaw duh tho rawh , " A lo ti . Ka nuih chu za tak a ni . A thik tur hriat loh thlak lutuk mai .


" Aih tunah chuan Job-a ka duh tawh a lawm , a chanchin phei chu ka chhiar ziah , thlak thei ka ni lo , " Tiin ka hrilh a .


A chhan min zawt daih.......



Cont.......

_



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)