KAN RAM, MIZORAM(Ziaktu : Maruata jr)

Story tawi te te emaw luanliamna emaw post na
Maruata jr
Posts: 82
Joined: September 12th, 2018, 10:28 am

KAN RAM, MIZORAM(Ziaktu : Maruata jr)

Unread post by Maruata jr » September 16th, 2021, 8:45 pm

Maruata jr



KAN RAM, MIZORAM



Leee, thiam lo tak leh in sit tak chungin 'Kan Ram Mizoram' tih chu ka han ziak leh thawr dawn chu a ni a.


Chhiar dan leh ngaihthlak dan min lo thiam sak a ni ang chu.



Kan Pi leh Pu te atang tawh khan he kan chenna, kan ram Mizoram hi Rimawi Ram ti te in an lo chhal hial a. Tin, Thian chhan thih ngam, Tlawmngaihna te ai a upa zah thiamna te. Kan Zo nun ti mawitu an ni a.



Hram thiam chi hrang hrangte, hun bi chhiar a hram thin rannung te'n kan Zoram ti mawi turin an aw rawl an chhuah thin.


Thal laiin Thereng a aw mawi chhuahin a hram thin a, Fur lai a hram thin Dawng thlek te. Hengte hian kan Mizoram a ti mawi a.



Pu.Liandala khan kan ram Mizoram hi,'Phunchawng, nauban, ainawn par, Tuah vau, Chhawkhlei, Senhri par. Chawnpui, Pâng, samtlâng, dingdi. Parmawi thang vulna, Zoram hmun zauvah,' tiin kan Zoram chu Pangpar mawina in a khat thu in a lo au chhuah pui a.


Kan Zoram hi Rimawi ram tih leh Pangpar mawina in a bawh, Zoram mawi tiin an lo sawi bawk a. Hram thiam tin reng Chhimbuk, Thangfen, Kangkang, Uleuh, Dawngthlek leh a dangte. Hengte hian an aw mawi chhuahin kan Zoram an ti mawi thin.



Thlasik a lo in her chhuak a, Japan hlo leh Tlangsam a han par a, zingah Maimawm ril nizungin a rawn chhun tle zawrte hian, Bethlehem Bawngin Tlawm a Nau lo piang tur a lo hril a. Boruak a nuamin a theng thaw nuam em em a. Patling meuh pawh lunglengin a kiu vawng vawng e an tih chu. Hei hi kan Mizoram ti mawitu a ni a.


Favang hun a lo in her chhuak a, ruah lo hul tanin Hnah leh Pangpar atangin Ruah dai mal a lo tla a. Tin, Romei a lo zâm paw chiai thin bawk a. Hei hian Kan Zoram mawina leh a nawmna a ti lang a.

Khuanu khian Sik leh Sa min then hran sak a, chu chu kan tan a hun tha leh duhawm em em a ni si a. Hun bi neia Hram thiam ten aw mawi an chhuah bawk thin. Hei aia nuam hi a awm thei dawn em ni ?


Kan Mizoram hian Tlang tam tak neiin chuta sang ber chu Phawngpui Tlang niin. Sap(Mingo) ho in ral khat atanga lo hmu in, a mawi an tih vangin 'Phawngpui Blue Mountain' tiin min phuah sak nghe nghe a.


Hmana kan Pi leh Pute khan an tha leh zung sengin he kan chenna Zoram tan hian theih tawp an lo chhuah a. Kei ni thang tharte hian kan la chhawm nung zel a nih hi.

Hmana kan Pi leh Pute kha zirna Sikul nei lo mahse 'Zawlbawk' neiin tah chuan nun dan mawi leh thu tinreng in fah nan an hmang a. Thih leh Ruam khatah, dam leh tlang khatah tiin thu an lo in tiam hial a. Kan sawi nin theih loh Tlawmngaihna leh Aia upa zah thiamna leh Sem sem dam dam, Ei bil thi thi tih nun neiin, an nuna bet tlat a ni a.

***************

Pu. V.Thangzama khan,'Thiam leh finna lo sang zel lai hian, Rethei, hausa inkar a zau si. Din thar ka nuam kan nun ze mawi kha, Par anga lo vul leh turin. Thlafam chang hnu kan pi leh pute, lo tho leh se engtin min ngai ang maw. Lawmin an hlim thei hian ka ring lo, an nun mawi par ang a chuai hi.' Tiin a lo au chhuah pui a.


Tunah chuan khang kan nun ze mawite kha a bo ta em ni le ?


Thenawm ten nghei se, keiin ka neih chuan a tawk. Khawvel thiamna lo sang zelin kan ram Mizoram mawina chu kan hloh tial tial a. Hnam dangin min chim mek a. Kan hmuh leh kan hriat te tih dan kan la(copy) tawh a. Mizo ni si hian kan incheina leh kan thinlung erawh a Korean ta hle si.


'A ni in a nei a, ka nei ve lo maw !' Tih nunah kan cheng tawh a. Lawmpui a hnehin thikna thinlung kan pai tawh a. Kan Mizo tawng pawh a tham ral mek chu a ni ta si.


'Chu' tih turah 'Cu' kan hmang tam ta. 'Lawm e' tih turah 'Lom e'kan uar ta zawk a.


Kan Zoram timawi tu nungcha ten min liam san zo ta. Luia Sangha te Tur leh Chinai hmangin kan suat a. Ramsa leh Sava te Thal, Silai leh Thang hmang te in kan um tlan bo zo ta. Kan Ram timawi tu kha tunah zawng an rem zo ta. Rimawi ram tia kal hmasa ten kan Zoram sakhming an phuah ngei kha tunah zawng kan Ram, Mizoram chu Ram reh leh khawhar a chang zo ta.


Ka U leh Nau ka thian duh tak te u, Pai ang kan pawm cheng rang sirah hnawlin kan ram riangte hi i din thar leh teh ang u khai.


Capt.L.Z Sailo khan,' Aw, thang leh tharten eng nge kan tih tak ang le? Kan chanvo bil neihna kawng chu. Thawk chhuak turin eng nge kan tih tak ang le ? Insuih khawm leh zai i rel ang u.' Tiin min chah a.


Kan Ram, Mizoram a chengte, chi peng hrang hrang Lusei, Hmar, Paihte, Thado leh Pawi te hian kan Ram Zoram nun ze mawi tak bo pil mek a hi In suih khawm leh tangrualin i din thar leh ang u hmiang. Hei lo ram dang kan nei lo, kan Ram neih chhun Zoram hi i humhalh zel teh ang u.



V.Thangzama vek khan,' Hmana pi leh pute ang khanin. Chanhai, riangvai, tlachham, pachhia te. Tanpui ngai tanpuitu ni zelin. Chutin ram nuam kan siam ngei ang.' Tiin min chah leh bawk a.



Hawh u, Hmana kan Pi leh Pu te nun Inpumkhatna, Tlawmngaihna, Aia upa zah an thiamna te, thian chhan thih an ngamna te kha kei ni thang tharte hian chhawm nungin he kan Ram, Mizoram mawi leh duhawm em em tlu chhe mek hi i din thar leh teh ang u.





A tawp ta.




Theih tawp chhuahin ks han thai kawi ve leh chu a ni a. Eng nge a an chu ka hre law.


Chhiartu zawng zawngte tan Malsawmna thlen tu ni mawlh rawh se.



Tunah hian Story pakhat 'Ka hringnun Diary' tih ka buatsaih leh mek a. Min lo duhsak ve leh theuh turin ka sawm che u a ni.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)