HMANGAIH BT-I SHORT STORY

Story tawi te te emaw luanliamna emaw post na
Lalnunmawii manuntei
Posts: 109
Joined: November 26th, 2020, 10:46 pm

HMANGAIH BT-I SHORT STORY

Unread post by Lalnunmawii manuntei » October 20th, 2021, 7:52 pm

HMANGAIH BT-I


BY



Lalnunmawii Manuntei


Table a ka phone rawn nghawr dat dat ka hriat rual chuan ka nui deuh suk a, ka nupui a nih ngei ka ring a ni. A ni ngei bawk .



"Vawiinah interview an nei dawn a , a lo thlen ṭep tawh thu rawn sawi a tum a ni ngei ang" ka tih rilruk mek lai chuan lehlama mi thu sawi vang chuan ka nghing hlawih ni berin ka hria.





"Maw?" Ka ti hu a, ka hriat sual palh a nih ka ring, "enge i sawi awm zia chu? Han sawi chiang deuh teh a" tia ka zawh nawn leh pawh chuan, " he phone neitu hi a accident a, tunah Christian hospital ICUah dah a ni" a chiang thawkhat viau bawk si, "ka nupui ni loin midang ni thut se" ka ti vawng vawng mai.



Phone a dah hnu pawh chuan ka chechang lawk thei lo.



Harh chhuak thutin hospital lam pan turin ka insiam zung zung a, kan awmpuinu hnenah , "i pi a accident a chhuah lawk ka ngai , eirawng i bawl zawh chuan i duh leh i lo ei hmasa mai dawn nia" tiin ka kal san nghal thuai a .



Hospital kawt ka thlen chuan ka lungphu a rang khawp leh nghal, thil dang a ni lo, ICU a an dah tawh te hi chu an na hle tih a hriat ṭhin sia, a thi ang tih mawlh chu ni ka hlauh tawh ni.





Mipui zi nuai nuai karah chuan ka in zep phei ve zel a , Aizawl khawpui ka nin em em na chu mipui kan tam lutuk hi ni, khawi hmunah pawh kal ila kan insulpel thuak thuak hlawm a, tum loh deuhin tu emaw kan su leh nawk ṭhin. Polite tak tak awm ve ṭhin mahse polite vak lo te pawh kan tawng leh nawlh ṭhin.





Min lo be tu lam ka bul ka thlen rual chuan , " tu nge a su tu hi" thinrim ha seh chilh rap chuan ka nghal a," X MLA fapa a nia, a tlan tlang daih" inthlahrung tak a ti tu chu han tih vak ngaihna ka hre bik lo, a ti tu ni loin a hmu tu mai a ni si.





ICU aṭanga doctor lo chhuak chu panin chanchin vel ka lo zawt chamchi a," a ṭha vek e; mahse, a damchhungin ke in a kal thei tawh dawn lo" ka bengah chuan a ri nawn tlut tlut mai, mipa in ti pa ve tawk tak tan pawh mittui dân chu thil harsa tak a ni.





Ka nupui damdawiin khuma mu engmah hre lo chu ka en tlawk tlawk a , a dam lai hmel chiah ka lo hmu ṭhin a, a dam lo hmel chiang tak a ka hmuh chuan ka na ngawih ngawih.





A ban benflon an vuah na te leh a chal a pem vanga an tuam chhah luk na te chuan min ti na veng veng a ka thin a ti rim hlur bawk.





In thing harhin a chhungte ka call nghal thuai a , anni lam pawh an rilru a hah hmel hle, anu phei chu a ṭap ti tih leh nghal, mi hnem thiam lo tak hian engtin nge ka lo hmachhawn tak ang le.





Ka hma engmah hre lo a mu chuan ka ngaihtuahna lamah pialral min fan tir a , midangte chauh tawn tur emaw ka lo tih ṭhin kha kan chungah a tak ngeiin a thleng ta si, hrilh a haiin eng dangmah ngaihtuah thei lo lekin min siam .





Mi tam tak thihna vanga nupa ṭang ṭhen , mipa in la pa ve tawk tak aw rawl chhuah meuh a an nupui te ruang chung a an lo ṭap te chu ka dem ta hauh lo mai, hmangaihna vang a ni tih ka chiang ta hle bawk.





"Bt i har ti raw?" A lo phu leh zuk zuk ṭhin vang chuan ka ti a, min chhang thei mai lo leh nghal, ka nupui hi a na a ni, hliam natak a tuar bawk, engtin nge min chhan theih teh lul ang.





"Khawnge Bawihtei chu a awm a, ka fanu ka van lainat tak che em!" Ka pi zawn chu a lo ṭap lut nghal a , ṭap lo turin ka insum nasa tawh hle.





"Ka fanu duat i nu ka lo thleng tawh a nia, kam khat talin min be dawn lo em ni? Awii a rapthlak e mai! I pasal a hrilh hai lutuk a nia, lo harh teh" a ṭah hla chu ka ngaithla ngam tawh lo, mitthi ṭah te pawh a ang zawk.



Ka chhungte lam an lo thlen pawh chuan an ni pawh chu an lo ṭap lut ve nghal a, ka hliamah chi an phul a ni ringawt tawh, ka â vek a , ka lu chu puak keh mai tur ang maiin a na tawh.




Zankhua in chhin khat pawh chhing loin ka nupui kiangah ka ṭhu reng a, ka ven tlat loh chuan ka hriat loh karah min kalsan daih ka hlau a ni.





"Mathan, kan awm tawh a lawm, va chhing ve zawk rawh, i tlaivar thei tak ngial dawn, i chawlh ve chhunah tiang hi a ni sia, kan awm a lawm ngaihtuah duh suh" Bt-i chhungte lam chuan an lo ti chhen a , an rilru put hmang hi ka hrethiam lo, ka nupui a ni a , zankhat lek amah vanga tlaivar ka hreh teuh lo mai.





Ngawi renga ṭhut char char chuan zan a rei duh khawp mai, Bt-i ban vuanin a hmel chu ka en leh vang vang ṭhin, achangin a kutah te chuan ka fawp leh tawp zel, awm dan ka thiam tawh lo.





Sipai ka ni a, kan awm dun reng thei lo, min ngaiin min thlahlel em em in chhunni leh zankhua vawi tam ka telloin a lo hmang ral tawh ṭhin, chawlh ka neih ve chhunah tiang hi a ni leh ta sia, Pathian lakah ka vui lek lek ṭhin; mahse, kan tan a ṭha lo tur kan chungah a thlen tir ngai lo tih ka hria, enge thleng leh tur hre lo mahila a kut phah ropuiah ka in nghat tawp.





Zing ni chhuak tur , la chhuak famkim chiah lo chu a mawi dang dai hle, nidang ang chu nise kan hlimpui leh hle tur a nia, tunah chuan ka hlimna min ṭawmpui tu ber biak theih lohin a awm a, ka hlim thei bik lo.




Wash room ka hman karah Ka pi zawnin min chhawk ve a, ka let leh meuh chuan Bt-i pawh a lo harh ve
tawh.



"Baby, i lo harh tawh maw? Ka van lawm tak em! I tan ka lo ṭawngṭai reng a lawm" ka tih chuan min nuih seih a, a nui hmel ka hlimpui ṭhin hian min tina veng veng a ni tih hi tu mai pawh hian an hriat thiam ka ring.




"Bt-i chu a zia awm tawh, dam chhunga ke a kal thei tawh lo tur a ni tih chu kan hre vek mai awm e, ti hian kan in lamah kan lo enkawl tawh mai ang, i tan phurrit mai niin a rilru i lo hliam sak palh hlauh dah a nge" ka pi zawn chu ni lo se kut ka thlak duh ngei ang, ka hmangaih nen min inṭhen tir phet a tum chu nia, ka phal lo a ni tawp mai.




" A theih loh ang, ka nupui a nia ka enkawl thei" ka ti chhum hmuk a , engtiang pawn tih luih tum eng ang mahse ka hlatah a awm tur a ni lo.





" I hna nen chuan a in rem lo, kan thu hi awih ve mai rawh, amah hringtu nu leh pa kan nih angin nia ka sawi ni, i chawm zo tih te zawng kan hre lutuk, keini pawn ani ringawt te chu kan huphurh teuh lo mai" ka thinrim lutuk chu ka kut ka hum ruh vak tawh, kut thawh a chinfel theih chu nise ka chingfel vek tawh ngei ang.



" Thu i la kawi a nih kha, ngaihloh lamah ngai duh suh, i hna i thawk thei anga, i ngaihtuah lutuk loh nan a nia ka sawi ni" a ti leh zel a , eng pawh chu lo ni se ka thu ka sut dawn lo.




Mipa luhlul ve tak chuan Pathian leh kohhran mite mithmuha a thutiam a hlen loh na chhan tur ka hre lo, hrisel lai leh bawrhsawm lai pawha enkawl turin ka intiam vek tawh, mi nep tak ka ni lo , sum lamah zawng ka neih bak piah lam a tam an nei ngei mai, hmangaihna ah erawh kei aia thuk leh ril an nei bik tawp lo ang.




"I hna chauh ngaihtuah mai rawh" Bt-i muhil thaw ri sek sek chu a en leh zeuh a, ka thinrim insum zo lo chuan duh aiin ka lo vin ve bawk , ani lah duai hek lo, kan inhnial nasa tawh mai.




A chhungte lamin an lo khak a, kei lah rilru na bawk si chuan pi leh pu e ti lo chuan kam bak loin ka chhang ve zuah zuah a , kan boruak chu a ṭha tehchiam lo.




Nileng zankhua ṭhak chuan a bulah ka awm reng a , anu leh pa te erawh kan inhnial hnu khan an haw tau a , pawi ka ti lo nasa.





Kan X MLA hmel ka hmuh chuan engtia lo hmachhawn tur nge tih ka hrethiam mai lo, rilru fim put tumin boruak chu ka hip leh vang vang phawt a.





" Tih sual palh liau liau a nih kha, ka tawrh pui lutuk che, amah kân nan" tiin pawisa cheng enge maw zat envelope in min pe a, pawisa hian mihring nunna a lei zo lo tih a hrethiam lo a ni ngei ang.





"La let leh rawh, heng i pawisa lo ken zo zai hian ka nupui nunna hi a lei zo lo a sin" ka ṭawng laklawh lai pawtchatin , " a tlem em ni? A dang iduh belh pawh ka pe em em ang che, buaina ka duh lo" mai mai chuan le.





"Ka sawi i man lo a nih hmel, i pawisa aiin ka nupui hi ka duh zawk, in hausa tih te chu tlang hriat a nia lawm, i hausak na chapo pui lo hian tlawm takin ngaihdam min dil zawk lang chuan ka rilru a khawih zawk daih ang" ka ti let ve sak.






Kan ram ṭhanmawhbawk na em em chu mi hausa fa te an duh ang tawk a an lal lenna a ni a, an chhungte lah huan an thil tih sual lah thup bo pui an la tum ta deuh deuh a, mihring hmuh pawn ka hmu nek lo e.





" Zirlai mai a la nia, a hma hun tih chhiat sak lo hram ang che, i nupui enkawlna senso zawng zawng chu kan tum vek mai ang" a tihleh lek phei chuan ka thinrim a ti so sang tawh hle.





"Ka hman hun remchang hmasa berah ka lo tlawh leh ang che u" tiin a pawisa lo ken pawh la let lem hlei lo chuan a kal nul nul mai.





Heng a pawisa lo ken hian a hmaiah ka vawm lo kha chu a vanneih hlr in ka hria, sum hmanga toh lungawi thei mai mai ka ni lo tih a hrethiam lo nge a hrethiam lo lui zawk?




Karkhat ṭha zen zawn damdawiina kan awm hnuin kan chhuak ve thei hram, inlamah inenkawlin kan invil deuh chawt a, ka chhungte an lo leng tih loh chu inleng kan nei vak ngai lem lo , a ti zia phian mai.





"U Than min ṭhen mai rawh, tiang a i awm hi ka hmu duh lo, ka nu leh pa kiangah ka awm leh mai dawn a, nupui ṭha tak neiin fa duhawm tak tak nei rawh" teh tawp chuan a , engvanga hetiang thu hi sawi nge maw a nih chu le?





"Teuh lo mai, kan inneih thutiam ka vawng nung tlat dawn, hliam natak i tuar a, ka kal san ang che maw? Mipa ka nih hi, chu mai bakah ka hmangaih che a, midang neih tumna ka nei lo bawk , chutiang thu ka beng hriatah sawi ri tawh suh" ka ti chang fak a, a mittui a hru zeuh chu ka hmu chiang hle.





A mittui luang ngiai ngiai chu hruk sakin duat takin a chalah ka fawh sak a, he mittui hi ka hmu duh lo, a hmelah hlimna chiah a ni ka hmuh duh ni.




" I mittui hian chakna min pe lo a sin, mipa chak tak ka nih theih nan min fuih leh zawk ta che, ṭah i inhmeh ve lo , ṭap tawh reng reng suh, hlimna mittui bak i biangah luan tir ngai suh" a hma aia uarin a lo ṭap a, ka chhungril a dek zâr mai.





" I hna nen min enkawl nen chuan i tan phurrit nih ka hlau a lawm" ṭap ṭuau in a lo ti chhuak a , " phurrit a? Ka tan chuan ka nunna, ka taksa peng pakhat ang mai a sin i nih, i tello chuan ka nun a famkim thei lo tih chu i hriat chian kha" ka tih chuan thei leh thei loin min lo kuah .




Thlakhat chhung chauh a tan chawlh ka nei a, ka hna kalsan meuh a enkawl hi ka hnial lo, ni rei lo te tak meuh ka kalsan anga a bak zawng chu amah enkawl nan hun hman ka tum.




Nitin kan inawm a , kan inngaihzawn lai ang mai khan ka ning thei lo, a nitelin ka thlahlel tulh tulh zawk.




Kar lo ah ka chhuk a hun leh ta reng mai, nikhat lek tal a bula hun hman leh theih ka chak.Mahse, ka chhuk a nih chuan pawimawh vel ka ti fel vek anga a kiangah ka hun tam zawk ka hmang thei ngei dawn tih ka hriat vangin phur vak lo chuan ka kalsan thei hram.




Thla khat chhung chauh min nghah a ngaih dawn vangin ka nu leh pa te nen an lo inawm fin a, thlamuang takin ka awm theih phah.



Sipai kan nih chuan duh hun hunah phone kan hmang thei loa, hun bi a awm vek a, chu mi pel lo turin kan insiam rem ve mai ṭhin.



Ka chhungte ai mahin ka nupui ka be tam zawk, pumkhat kan nih tawh miau vangin ka dah pawimawh zawk fo.





Nikhat chu Bt-i phone tum chuan ka try char char a , switch off a in ti char char mai, hrilh hai zet chuan ka nu ka call nghal zat a , a ring rual rualin a lo pick vat mai le, " Nu, Bt-i ka lo bia, tinge a phone a in switch off tlat a " a ṭawng hma hma chuan ka ti zung zung a, "nizanah a nu leh pa ten an lo hruai" a ti chuai raih a , ral khat aṭang ka thin rim hlur mai.





" Ka thu hmu loin engtin nge an lo hruai ngam zawk a , discharge ka dil a, hun rei nghah a ngai tawh lo a sin" thinrim tak chuan ka tia, min chhan ngaihna hre lo chuan a ngawih daih.




" Bawiha, i awm loh chhungin an lo enkawl ve tihna ni mai a , a nu leh pa te bulah tho a nia, ngaihtuah lutuk suh, i lo haw hunah i hruai leh mai dawn a lawm" dam diai a a tih chuan dik ka ti ang lawi a ; mahse, a nu leh pa te hian kan inṭhen theihna remchang hi an zawng ve reng tih lah ka hai bik si lo.





Ramri-ah kan duty ṭhin vangin duh ang thanin phone kan khawih thei tawh lo , chutih rualin ka haw theih hun lah a hnai tual tual thung.



Ka phone rei tak ka deh tawh lo chu ka sik neuh neuh a , whatsaap message lah chu a tam ngei mai, message tam tak kara ka mit la deuh tu chu ka open hmasa ber a.





"Mama lo haw vat rawh , U Bt-i a zual deuha , tunlai tak phei chu chaw pawh a ei mumal thei lo an tia, zan tam an tlaivar pui, nitin hian i hming a lam reng a a khawngaihthlak e mai" Ka nau hnen aṭang a ni, ka chhiar zawh rual deuh thaw chuan ka call nghal zat.



Ka rilru a hmanhmawh a ni, ka awm loh hlan a min kalsan a nih chuan ka dam chhungin ka inthiam thei tawh ngai lo ang.





" Engtin chiah nge a awm a? Ka ti vin ṭhat, " ka sawi ang kha ni mai, a dam rei tawh hmel loh khawp mai" a ti chuai raih a , chhungril lam aṭang ka na nghal veng veng mai.



"Nitin ka nu nen kan va kán ṭhin a, U lo haw vat teh" rilru nat hmel deuh chuan a ti leh ṭhin, kan inbiak chhung chuan Bt-i chanchin bak sawi tur a nei lo, kei pawn rilru natak chungin ka ngaithla ve tawp.




"Ka nu leh pa thu ka zawm lo kha ka inchhir ṭan tawh, kan chhungkaw school a thawk turin min duh hle tih ka hria, an thu kha lo zawm ta ilang chuan tunah te hian ka nupui, ka hmangaih em em kiangah hun ka hmang thei tur" sawtna awm lo chu ka ngaihtuah chiam a , ka lei Pathian hmuh theih te thu ka zawm loh apiang hian harsatna ka chungah a lo thleng ngei ngei zel, an thu awih tluk ahlu leh dam reina hi khawvelah a lo awm lo a nih hi...






Thlakhat a liam leh hnu chuan Mizoram lam panin ka haw ve thei tawh, ka nupui hmel hmuh chakin zantin a thlalak ka be ṭhin a, tunah chuan a tak ngeiin ka hmu thei tawh tur chu ka mumang mai mai emaw ka la ti .




Lengpui Airport-ah chuan kan driverin min lo lam a , in a innghat hmasa lo in Bt-i nu leh pa te in lam ka pan nghal, an phal emaw phal lo pawh nise hruai haw ka tum ruh viau.





Door bell ka hmeta , rei ka din hma hauhin Bt-i nu nen kan in hmachhawn nghal .





"E he ! Nang elo? Engtik khan nge i lo thlen a?" A mita mak tihna leh hlauhthawnna chu chiang takin ka hmu nghal.





"Tun mai khan, khawnge ka nupui?" Tiin ka kal chhan tak chu ka sawi chhuak nghal hmiah, " a room lamah a awm a, i lo haw dawn vang hi a ni ngei ang, vawiin chu a harh ve deuh" tiin a room lam panin kan inzui phei .



Ka nupui khuma muhil thawk ri sek sek chu ka thlek vang vanga , ka ngaiin ka thlahlel ngawih ngawih, ka bula a awm lai khan tiang em em hian a cherin a dawldang miah lo, a kut chu la kangin ka fawp vang vang.



A rawn che ṭual ṭual a, a mit a rawn men rual chuan thei leh thei loin min nuih seih, he a nui hmel mawi lutuk hi lawm hmuh leh ka chak em em.




Zawite hian a lo phun sep sep a , ka hriat mai theih loh vangin beng dawhin ka ngaithla a, " min lo hruai dawn em ni? Ka ngai tawh lutuk che" tham ṭiak a rawn tih chuan , " aw , i bulah ka awm char char tawh dawn" anu hriat tur chuan ring deuh takin ka ti a, a hmelah chuan a lawm vak lo tih chu ka hre reng kei pawh an chungah hian ka lawm bik chai lo.





" Apa lo haw phawt se, zan lamah pawh in lo hruai thei reng a lawm" lo ṭawng ve eng ang mahse hre lo ang maiin ka nupui chu ka pawm chhuak nawlh.




An fanu an hmangaih vang tih ka hai bik lo, kei ngei pawh an fanu in fa min neih sak tak lohah chuan min ngaihtuah vangin midang nei leh mai turin min duh hle tih pawh ka hre vek; mahse , an thil tih dan hian ka lung an ti awi lo laklawh tlat.





Khuma ka nghah rual chuan a hlim hle tih hriat takin a hmel te chu a nung sâr mai.





Doctor thiam tak tak an sawi ho chu ka rawn kual a , ka beisei ang chhanna ka dawng lo.



Ka beidawn tawh a hnu lamah naupang te kan nih laia ka ṭhian Sangmama nen kan intawng leh ta hlawl mai.



" Doctor Reubena tluka thiam an awm lo, va pan ve ngei ngei ru, ka fanu pawh kea kal thei tawh lo tur a an sawi kha nia, tunah chuan duh ang tawkin a kal thei tawh" phur deuh a a sawi chuan ka beng a verh zak mai.





Bt-i nen zan mutnaah ka ṭhianpa thu sawi ka hrilh chhawn chuan beiseina a neih tawh loh thuin min chhang a, kei chuan hetiang teh tawp a a awm hi ka phal thei lo, hmuh hrehawm ka ti a ni.




"Tunchiah hi ka thusawi awih la, keimah vang tal pawn ringngam hram rawh" a kut vawt thlarh nuai lum sak chung a ka tih chuan a inngaihtuah muk hmel hle.





"Min ring a ni ti raw, tun bak chu ka ti lui lo ang che, kan beidawng hma lutuk e mai, mi te pawn tiang hi an lo tawng fo a lawm, i dam leh ngei ang tih tiam thei lo che mahila ka rinna hi min tih chhiat sak suh" ka tih leh takah chuan a hrethiam a ni chek ang, " awle i thu thu a ni mai" a rawn ti reuh a , min rin em vang hian lawm ka hmangaih loh theih loh ṭhin.





" Doctor tam zawk hian damchhunga ke a kal thei a ni tawh lo an ti fo a, hei hi a zawng zawng awih vek loh tur, naute ang maiin nitin kal zirtir an ngai ve a, an kal tam pauh leh an dam hma ting a ni mai, vanduai te chu awm mahse dam leh hi a tam zawk ani, damdawi ṭhenkhat ka ziak ang a, hei hi ruh ti chak tu ani a, regular tak a a ei chuan hmasawnna nasa tak a nei ngei ang" thil ziah mawlh mawlh pah chuan a ti a, a thu sawi chuan beiseina sang tak min pe a ni.





Ka theih ang tawkin ka duat ve a, anu leh pa te lam lahin hruai haw an la tum fo, kan inkam khat hnuah beidawngin an haw leh ṭhin.


Nitin kal kan in zirtir hnu pawh chuan hmasawnna hmuh tur a awm ngai lo, ngai a la awh char char a, beiseina ka la neih vang chauhin ka thu a awih hram hram ṭhin.



"Duh tawk tawh mai ang, kan bei nasa thawkhat tawh a lawm, Pathian hian kan hun tawn tur engkim hi a ruat lawk vek ṭhin a sin, mihring ve mai kan nih hi engmah kan tidanglam thei lo" a mittui luang ngiai ngiai chu ka hruk sak a, ka beiseina neih chhun te kha beidawnna ah a chantir zo ta.




Ka beidawnna chu thuhran ka rilri hi a na a ni, ti mai a awm tur hian ka phal thei lo, tiang dinhmun a din vang hian ka duhna a tlakhniam phah lo nachungin ka rilru nasa takin min hliam sak thung .



Nitin zantin a dam theih nan Pathian hmaah kunin ka ṭawngṭaisak bang ngai lo, ka chhungte lam pawn an ṭawnhṭai sak mawlh mawlh thu an sawi fo, a chhungte lam erawh a der pawn chanchin an lo zawt chhin ngai lo.



"Ka birthday leh kan immeih anniversary kan thleng ṭep tawh a sin, i la hria em? Kha mi zan kan hlim zia kha, tiang chiah khan hlim reng thei ila ka ti" a tih chuan kan hlim dun lai te chu ka mitthlain ka chhui kir a, lunghlui a leng veng veng mai.




Lawm sak ka duh a ni, khatih hun lai a kan hlim ang em em in hlim thei dawn lo pawh ni ila, hlim takin kan hmang thei em em ang," kan lawm dawn em ni? I ṭhian hlui te pawh kan sawm anga, nuam i ti ngawt ang" wheel chair aṭang chuan engtin tak nuam takin hmang thei ang maw?




Ka mipat pui tam tak te mittui tla ka lo hmu ve fo tawh a, sipai a ka ṭan lai phei kha chuan an ngaihzawng/ nupui te an ngaih vangin an mittui hial a tla ṭhin a, kei ngei pawh ka kiangah awm reng chuang hian ka ngai em em a ni, hun liam ta te kha ngaihtuah lo thei loin min siam a ni.



"Bawiha, i nau te pawh an awm a lawm an pui dawn che nia, lungngai mah ta che, i chhungkua hi i lamah kan ṭang reng a nia, hotelah lawm ila, engkim kan lo tum vek ang, i buai ngai loin keini kan awm a lawm" ka nu leh pa te hi ka zah thar riau, inhrang aṭang pawn an fapa anmahni thu zawm duh lo a luhlul chhuah ṭal chu min la hmangaih fan a, nu leh pa hmangaihna hi a van hlu tak, Pathian aṭanga chhuak a ni.




"A va inthlahrun awm ve, sum chu awm mahse ka nupui surprise ka duh sia, keiin ka buaipui dawn chuan a hmuh leh hriat ngei a ngai ngei dawn sia, in kutah ka innghat tawp dawn ania" inthlahrung tak a ka tih chuan nu leh pa annih vanga an tihturah an ngai nghet hmiah mai bawk sia, an thu ka awih ngei chu a ngai tawh .



A hun leh ni te chu a hnai tulh tulh a , hrehawm tihna in ka khat telh telh thung. A hlim nan abuatsaih ka nih rual hian a hrehawmna thlentu ka ni thei tho bawk si, rilru hleihhlang ka pu thei lo.





" Naktuk hi thleng thuai thuai se ka ti" nui ver ver hian a rawn ti chhuak hlawl a, " i va nghakhlel awm ve, i ṭhiante vang nge kan inneih cham vang" tiin ka zawt a.





" A vaiin a ni mai, tunhma kan lo hman tawh ṭhin ai khan i hlim ve ngeiin ka ring" a sawi awm zia chu ka man pha hauh lo, eng a sawi na nge ni ta ang le??



" Han sawi chiang deuh la"



" A hunah chuan i hre mai ang, takah ks birthday ni kher a kan inneih kha a lo fuh ber mai" a tih leh phei chuan ka bo tulh tulh.




" Mu tawh ang le, a tlai tawh a, menrei i tan a ṭha miah lo a nia" puan ka sin ṭhat tir a, eng emaw ngaihtuah ni awm fahran chuan a la nui ver ver mai.





Min sawi dat dat tu an awm avang chuan ka mangram aṭang ka ṭhangharh nghal thuai a , sana ka bih nghal vut a , karei leh! thawh kan hai.





" Happy birthday Duhtak" a chalah ka fawh sak a, khum aṭanga in perh tho vatin a birthday gift chu ka pe hmanhmawh a, " ka lawm e" nui ver ver hian a ti a.





Gift chu a hawng zui nghal mai bawk a , a duhthusam a nih ngei ka beisei.







"Wow! nalh lutuk ringawt, ka favourite colour leh nghal, i mit a fing hle mai" a in teh mawlh mawlh a , kawrfual a taksa rem zaih tur , sexy ni si lo ati lang zahawm khup thei tur , ahmel nen a i rem thlap tur ang ber ka mitthla zawng pawh a ani tluk a inhmeh an awm lo ang tihtur khawp a ka thlan uluk ve ngat kha nia, chu mai bakah a rawng ngainat ber a ni bawk a , engtin nge a duh loh theih ang.





" Chaw ei i peih tawh em?" Kan awmpuinu chu ka au chel chul a, ka za cheng tawh mai.





" Hmanhmawh vak vak zel suh, hmanhmawh hi tlai hlauh vang mai mai a lawm" a ti takna in ka rilru chu a hmanhmawh ta tho.





Tukṭhuan ei zawh rual chuan min insiam tir thuai a , a insiam chhung chuan luh ve a phal ṭhal lo nia, kan awmpui Siamtei chu amah pui turin a au a, eng tak chu ti ang maw??





Rei ngial ka ṭhut hnu chuan kan room kawngkhar ri rak vang chuan ka hawi dawrh thei , ka hmaa mi hi ka nupui a ni lo emaw ka ti hman hial.







Make up tlem a hmang a , a sam ngil tak ṭhin khan a hmawr a ti kir bawk , a kawrfual hak te nen phei chuan vantirhkoh a ni ringawt a lawm, thla anei lo mah mah.





" I inhmeh hle mai, ka lei dawn a ka mitthla ai daihin i inhmeh"



" Nangmah vang liau liau chauh a nih hi, nang awm lo la chu" a chawl dat a , sawi zawm tawh lo chuan min nuih seih.





" Khawvelah hian ka nupui aia hmelṭha hi an awm tawh lo ang" ka tih chuan a ri meuhin a lo nui.





Mipui zi nuai nuai karah chuan kan in nawr phei zel a, ka nupui ah chuan an mit a fu ṭhap hlawmin ka hria.





A ṭhiante bul kan thlen chuan, "Bt i nalh kher mai" an lo ti sap sap hlawm a, kan boruak tawn mek chu sawi fiah thiam phak bakin a nuam a ni.





Chhungkaw ai awihin ka pa in thusawi in vawiin kan hun hman tur te chu Pathian hnenah a hlan bawk.







" Vawiin hi ka fapa te inneih anniversary mai ni loin ka fanu birthday a ni bawk a, nuam deuhin hman kan tum ṭheuh dawn nia" tiin thu tlem a sawi belh bawk.





"ka pasal duhtak, thilpek hlu tak hlan duh che ka nei, a man zawnga an teh a nih chuan hlutna reng a nei ve hauh lo ang, a pe tu thinlung an en chuan hei lo liam a hlu hi a awm chuangin ka ring lo" gift lek kang va va chuan a ti a.





Nui sangin a lam pan chuan ka phei a, gift min hlan dawn emaw ka tih laiin rin loh tak maiin a chair aṭang a lo tho chhuak hlawl mai.





Lalpa leh! Eng thil nge ni ngai! Ka rin loh lam daih thil a thleng thut mai le, damchhunga ke a kal thei tawh lo tur a an tih, tumah rinchhan nei loin ka hma ah a ding ngei sia, ka ngaihtuahna emaw ka mumang mai mai ni lo se ka ti hle.





"I thinphu a rang em? Kei ngei pawn ka theih ka ring lo ṭhin a, beiseina min siam sak a, kan ṭawngṭai rah kha a thlawn lo a sin" a hnuk a ulh vangin a sawi zawm thei ta lo.





Ka hma a mi chu lungchim zetin ka fawp vang vang a. Mipui thawm pawh a ṭha hat hat hle tawh.







Mihring hian theih loh kan nei lo, kan tum loh vang te leh kan teirei peih loh vang mai a thei lo kan ni chawk, kei ngei pawh hi a tir khan chuan ka beidawng ve ṭhin a, ka pasal hian chakna thar min pe in , beidawng tak a ka awm lai pawhin beiseina thar ka neih theih nan min fuih hram hram ṭhin, kan rinchhan Pathian hian min ensang ngai lo a, kan beiseina chhete khan min tihthlawn sak ngai lo, Sam ziaktu chuan , 'i awm dan tur chu Lalpa chungah nghat la, amah chu ring la, aman a ti vek ang' a lo ti a, hei hi a dik hlein ka hria, amah kan rinchhan em vang chauh a tiang dinhmun thleng thei hi kan ni, Lalpa chu fakin awm rawh se" a sawi lai te chuan a mittui a hru leh zeuh ṭhin.





"Min lo hmangaih ve ngawt mai, ke a ka kal thei tawh lo tur thu ka hriat khan ilakak pawh ka beidawng tawh, fa pakhat tal ka hrin sak hman lo che khan minti na leh zual, tunah chuan nangmah ang a palian deuh deuh tur ka hrinsak tawh che a, ka lawmna te chu a famkim tawh ngawt mai, tunah chuan ka duat ve che a hun tawh viau in ka hria" a nui seih a.





Ka hmangaih Bt-i te nufa muhil chu ka thlir ning thei lo, flim hmuh nawm tak ai pawn an hmuhnawm ka ti zawk daih. Bt-i nen kam inhmangaihna hi hmangaihna dik a ni ka ti lo thei lo, tiang dinhmun kan thlen hnuah pawh a nu leh pa te meuh pawn min pawt ṭhen zo lo a, ka tan a khuanu ruat dik tak a ni.



Link:
BBcode:
HTML:
Hide post links
Show post links

Hmangaiha Chhangte
Posts: 1
Joined: February 10th, 2022, 10:55 pm

Unread post by Hmangaiha Chhangte » May 29th, 2022, 9:50 pm

I story hi YouTube a dah turin chhiar i phal em??😇

Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)