I LOVE YOU MORE -25

Story tawi te te emaw luanliamna emaw post na
Sandy sweet
Posts: 95
Joined: June 11th, 2021, 10:34 pm

I LOVE YOU MORE -25

Unread post by Sandy sweet » October 31st, 2021, 8:40 pm

Part-25



Ben-a awm ngheng chuan ka bei hle hle a , a lungphu inthum rawn tluk tluk chu ka hrechiang viau , a awm veilamah chuan ka kut ka nghat a , dup' dup' rang tak tak hian a ti .



Ka'n ngaithla chiang deuha a phu rang mah mah ,ka ngaih tha lo chuan tlem ka inbeng kang deuha, " Lungphu tha lo i nei em ni ? " Tiin ka zawt ta tawp . A hrisel hmel viau sia , a lungphu hi mi pangai lungphu aiin a rang .


" Nei lo e , " A ti awlsam leh et a . Ka ngaih tha lo chuan tlem awm hniam leh deuhin ka bengin ka ngaithla nawn leh ngat , a rang lutuk ringawt .


" A pangai miah lo , damdawi in ah kal a ngai anih hi , " Ka ti zung zung a . A taksa atang chuan inlak hran ka tum nghal bawk a .


Ka chhuk hma chuan min kuah betin a awm zawnah chuan ka kut a nghat a , ka kut chu a kuta rawn vawn hnanin , " I bulah chuan a zuang zawk zawk thin , " Thu tak fe hian a tia . A fiamthu anih ringin ka ang zuaia mahse fiamthu thawh hmel a pu hauh lo ka nui ta ringawt a .



Ka lungphu a ti rang thin ang bawk hian ani pawh keimah vangin a lungphu a rang ve thin tih na . Haha , ava nuam leh si . Ka nui pet pet a mahse ani erawh a nui ve duh mang hauh lo ,a tum hmuk ni maiin ka hria , ka nuih avang hian a thinrim zawk emaw ni ? Mak leh lutuk mai .



Min chhuk en run chung hian , " I lungawi lo em ni ? " Tiin min zawt ta daih a . Ka lungawi lo tih chu ka ti lang viau a ni ngei ang . A thutak ve mai sia .



" Awi tawh e , " Ka ti ringawt .


" Awi tawh e , a , a tirin i lo lungawi lo chiang a , a chhan te ? " Tiin min zawh zawm a . Ka lungawi lo tih a hre renga min thlem tum hauh lo in zawhna min zawt ta zawk a . Eng ber chu nge hriat a duh ni . A mit meng pa hrak lah chuan min la en run zui a . Tum dang ang bawkin a tawngkam hman pawh amak leh hle .


**" Zep neih tit tet vel hi inlaichinna ah chuan thil tha lo tak a ni tih ka hre ve kur chuvang chuan alaka ka lungawi lohna pawh thup ka tum buai lo .



" U Bawihi hnen atang hman ni a thil thleng kha ka lo hria a , " Tih zawng ka sawi .


" I lungawi loh chhan tak chu ? " A ti dam leh thlup . Detective tha chungchuang a mi dawp te inpuang lo thei lo a tawngkam thiam tluk vel a ni . A tawngkam chhuak ho te pawh hi , palzam har tak a ni . Bakah a zawhna min zawh dan hi amak thei bik e , zirtirtu ni ta se a question a har thei ngawtin ka ring . A subj. -ah ka fail ziah ngei ang .


** Kei Zodinsangi Biakdika fanu naupang zawk Building number F-47-a cheng mek hmel vantlang ve tak hi heti taka a laka ka luangliam thei mai hi thil mak lawrkhawmah telh ila a tha ang . Ka rilru a luah hneh em mai ,mihring damlai zinga ka vei ber ani miau a chu ringawt pawh chu thil mak a tling . Ani hian zawlai di te hi a rukin a nei reu reu a ni hial zawk lo maw ?


Ka en tulh tulh hian a tha tulh tulh a , ka en tulh tulh lem loh pawh hian a tha tulh tulh lo chuang lo a , pa , zaidam leh sang a tha thlawt a ni . Magic danglam deuh a nei ang a kei hi a zuna uai turin min dawi te hi a lo ni mai anga . Awi ! Ka a tawh a nih hi ! Ngaihtuahna mak deuh deuh hi ka nei thin a .



Ka en reng chuan a khuh kharh kharh a , ka inthing harh vat , ka a tawh anih hi ka bula a awm reng laiin a chung chang bawk ka lo ngaihtuah thei a nia .



" A rukin bike racing-ah i tel ziah a chuan Irene-i , Rosy-i leh hmeichhe dang pawh an awm nual thin , " Ka sawi tum tak ka'n sawi theih loh chu le . Dang awk ang mai in a lawm ka tawng . Ti sual tu zawk ang mai ka ni. Ani lah hi a confi. ropui si.


" A ruk in a ? "


" Min hrilh si lo a , a ruk a nih mai loh chuan , " Ka ti let vat . Eng mah hi sawi tha duh reng reng lo mai , a zawh a zawh hi a ngai ziah a , a ni em em tawh lo . Inlak thinrim vak ka tum a mahse ka thei leh pek lo .


" Min zawt si lo a . ''


" Engkim hi zawh vek i ngai a ? " A tawngkam hman thin ang bawk chuan ka chhang a .


Mit ti zim sun in min en , " Hmeichhe dang vang chu nge ni a bike racing a ka tel vang zawk chuan le ? " Nuih zat hmel deuh hian min zawt zui a . Eng mah hi a la thu tak leh tak tak lo a nih dawn hi .A nui vel mai mai .



" Thil dang sawi ang i aw zawng zawng nen khan a boring tawh riau , ka mut a ti chhuak , " Tiin thil dang sawi pui ka tum ta zawk a .



Mahse tuna kan thu khel lai hi pawimawh a ti nang a niang , thil dang daiha pakai chu a lo duh aw zawng lo mai .


" Kan sawi fel a ngai , kan khek khawl rei tawk tawh i ti lo vem ni ? " Tiin chhan loh theih loh chuan min zawt ta khauh sia . Mi dang ka lo thik ve ringawt thu ka inpuan a ngai ngei dawn ta a nih hi . Chuan a sawi dik viau thil ho te te pawh sawi fel loa kan pai reng chuan a puak chhuah hunah a na viau ngei ang. Buaina nasa zawk a thlen ngei ang .


" Anih leh eng lai chang ber nge kan sawi ang ? " Ka ti ve ta nge nge a . A hmel en ai hian a luhlul zek mai . Ka pen fawk dawn maw ni .



" Hla thu chham tur em ni kan nih ? " A mak hepa hi zan in hian a tawng thei thar thut mai . A lo kal hma in tawng tam na dawmdawi a ei em ni ?


Ka hnar chu len kual vak vak in a hmui zawn velah te chuan ka han hnim kual vel a , eng rim danglam mah ka hre lo . A lo kal hma in thlarau dang a lo hruai zawk a niang .


" Uite ang mai , " Tiin a kut zungchal chuan ka chalah min nem dawr a . Ehe ! Uite nen te min tekhin vel a a tawh a nih hi .



Ka mitmeng bial ker kawr chuan ka en ran a , lehlam hawi a nui sukin , " Keimah tho kha ka la ni , " A ti a .


" A that chu , " Tih zawng ka sawi . A ho em mai Ka buaina tur pawh a ni lo , tawng lamah a piangthar ve a ni mai a .


" Hmeichhe dang i phur thin em ? " Tiin ka zawt tawl a . A nui chhuak hak hak nghal . A nui hmel chu a ti der mai mai hauh lo a nui tak tak tun ang hian nui reng thei se .


" Chu tak chu maw kan buai na lo ni ? " Tiin a lu thing meuh chuan a nui chhuak leh hak hak a . A nuih zawng chuan a taksa a che dat dat a keipawh ka che tel ve zel . Min pawm miau a .


" Hmeichhe thikthu chhe lo i hre ngai em ni ? Keipawh ka thikthu a chhe ve thei tho a lawm , a mak vak lo a nia mahse nui zel rawh , " Tiin ka nui lui ve sak a .


" A that chu , " Ti leh ringawt in a nui tawp hmak nghal . A nui der mai mai a niang a .


Ka melh deuh rawm rawm takah chuan , " Tu mah ka phur ngai lo , " In sawifiah tih hriat tak hian chunglamah a ban a phar duai a .



" A that nasat chu , " Tiin ka nui ver ver a .
" A nih bike racing atang hian hlawkna pakhat tal i nei em ? " Tiin ka zawt leh a .


" Ummmh........, " Tiin a khabeah chuan a kut a nghat a , " Kei chuan nei lo mahse kan in bet a pawisa tlingkhawm chu hmun hran hranah kan donate leh thin , " Tiin min chhang ta a . Ka rin loh lam daih a ni . Ka kal ve lai khan setanic an nih te kha ka ring deuh rum rum a nih kha , ka sawi tawh kha ka thil rin hi za a pahnih vel bak hi a dik ngai lo .


" A nih chu mahse maw . "


" Ummm . "


" A that viau rualin in tlanchak thin si a , zan lam te a lo ni bawk nen keichu a hlauhawm ka ti , chak ber nih inchuh in thil tha lo tih pawh in hreh lo a , ngaihtuah chet chet chuan thil tha ni in ka hre lo , accident liantham pawh in tawk thut thei a , in nunna in bawt a ni ringawt a lawm , kei chuan ka thlawp viau lo che , " Tiin ka thiam ang tawk chuan ka hrilh ve ngial a pawm tak ang maw ?


" A dik a lawm , " A ti awlsam leh et a . Eng kim hi a ngai awlsam thei sia .

**Hmeichhia zawk ka nia tha ka tih loh thu ka sawi chuan a tawk a nun a nia keia thunun phak a ni lo . A nun dan chu a thu a ni . A nun zawng zawng a inrawlh ka tum lem lo .


" Kha chu duhtawk ang thil dang hrilh tur che ka ngah lutuk , " Ka tih tak daih ah chuan a thut dan chu a siam rem deuh a , ka rit ve tho sia a mawng a kham tawh a niang .


Chhuk ka tum chuan a phal bawk si lo , inthlahrung deuhin ka thu tha leh . " Ka rit lo em ni ? " Ka tih lahin thu mai mai turin min ti bawk si . Min pawm tu berin rit min tih loh phawt a hnu kan thu nga ni mai lawm .


" Eng lam nge ni a ? " Tiin min zawt vel nia , hepa pui rauh hi a piang thar chiang .


A beng khawih sak niap niap chung chuan chawhma lama thil thleng vel chu ka hrilh a . Min hauh ka rin teh lul nen , " A pui riap riap khawp a lawm , " Tiin a nui a . Ka hrilh kher kher chu ka zak hnu hnawh leh deuh . Insual hrat mahni thawhpui te pawh ngai thei lo min ti hrim hrim ang , a rilru te te chuan .


" Hre lo der mai rawh , ka lo hrilh kher kher che ni , i duh chuan min hau thei ang , " Ka ti duk a .


" Ka hau hrep dawn che maw ni , " Tiin a nui leh mai a . Min hau tak tak se a tawngkam hman dan ka hre chak .

Kan ngawih reuh reuh hnu chuan , " In sual tih vel hi chu a tha lo na in , hau ngam tur che ka ni lo keipawh ka bang bik tlat lo va , " A lo ti a . A insual ve thin tho avangin min hau duh lo ngei a , a van fel tak min hau mahse pawi ka ti lo sin le .

>>>>>>
" Chuan maw thil dang leh . "


" Umm . "


" K. C-a kha maw Lalmuanzuali pasal tur a lo nia . "


" A nih chu . "


" A nih chu ringawt maw ? "


" Ummm , ni mai kan sawisa thei tho a lawm kan pathum in , " Tiin amah zawk pawh chu a nuih a za a .


" Nghal viau lo mai teh , " Tiin a darah ka beng thlawp nghal . An inneih chhan tur vel te chu ka hrilh leh siam siam a , ka thiannu te chungchang keiin ka lo hrilh daih chu tha ka ti vak lo mahse K . C-a a nih miau avangin thil nih na ka hrilh chian ngei hi ka tih tur a ni .


" I ngaidam fel tawh a ? " Tiin ka zawhna dawn tura ka lo beisei ruk tak mahse chhan ka huphurh tak si chu min zawt a .


" Um, ngaihdam min dil a amah pawh khatianga a che ta mai kha a inthiam lo lutuk , ka ngaihdam mai hi a tha zawk bawk Lalmuanzuali avang pawh in bakah thil kal tawh a nia hriat reng ka duh tawh lo , " Ka tih takah chuan min pawm pui thu a sawi a .


** K. C-a sawi dan chuan Muanzova ex ka nih vanga sihhnip deuh ni turah min ngai a , a chhan chu Muanzova chu nula mi ve deuh mai a nia chuan Munzova chu K. C-a bulah a lo insawi thei vel a ni awm e , chutiang vel avanga ka chunga khatia che ta mai kha a ni .


## Ka nun ka uluk loh man a nia tu mah dem thei ka ni lo .

>>>>>>>
Ka kawngah chelhin min pawt hnai deuh a , " Tu thu in nge ka room-ah i lo luh ? " Ka ti mai chu a khuh kharh kharh nghal .


" I pa thu in , " A ti ve thei hram .

" Awih awm loh loh ka pa in ah a awm bawk lo . "

" Awm e , " Tiin ka nghawngah a lo fawp zeuh a .


" Phakar lutuk mai , " Tiin a samah ka tham a . Chutih lai tak chuan kawngkhar a lo inhawng thuai . Kan hawi rual thawt a , khawi lama palian ber lo lut tur ang zia zang a a rik thawt chu le .


Lalmuanzuali chu lo pen lutin , " Romantic scene chan thiam-a a awm tawh hi chuan khatiang khan in awm leh dawn tih ka hre lawk sa , in pahnih khan in over lutuk in inlem lo chauh a nih kha , in zak ve em em lo em ni ? " A rawn ti lut bawrh bawrh nghal .


" Hey , Samdal , phalna la lo in midang room-ah an lut mai mai ngai lo tih hi i pian tirh atanga miin an hrilh vawi khat na che a ni em ? " Tiin ka zawt ve nghal a . Ben-a lam chu hawi leh in , " Hming thar a nei a , Samdali a nih hi , " Tiin thuruk sawi ang deuh chuan ka hrilh a mahse a hriat theih tura ring in ka tawng thung .

Kan lamah chuan lo pen hnaiin , " Rawn chhuk rang mai teh , i rit ropui si , kha a per vek lo chauh a nih kha , khatianga in awm in awm te chuan in duh ai hma in chun leh zua in ni thuai mai tur a sin , in innei leh duh lo vel te kha a nia nga milar ni si lo in mite sawi inkai sap mai tur a sin , kei phei chu inhmelhriat nih ka duh dawn thak lo , " A ti leh pawng pawng a . A tawng theih em em zia hi chu sawi tur lah a hre thei si .


" Rak rak lo khan zuk chhuk leh mai teh , " Ka tih chuan min lo pawt thut a ,ka inring hman reng reng lo , chhutah ngum sawh dawt khawpin ka tla a, a na lutuk !


Ka tho lawk thei lo , kawl a rawn phe a tek a rawn tlak phei chuan ka na vawng vawng in ka inhria .


Ben-a zawk chuan min lo kai tho a , ka tawng chhuak lawk thei lo , ka mawng ka dawm vawng vawng mai .


Amah lah chuan inthiam lo hmel pawh zu pu hauh lo a . Ka beng ve hrep zawk dawn maw ni . Thut pawh ka thu lawk ngam lo ka ding reng a .


" A la na viau em ? " Tia Ben-a'n min zawh chuan ka lu ka thing ringawt .


" A ti der a nih kha , " Lalmuanzuali pui roh chuan a lo ti . A at zia hi khatianga ka tlak khan ka nat loh a ring reng reng emaw ni . Eng tin nge ti der peih tura min rin theih zawk ni .

>>>>>>>>>>

" Thingpui min lum la , haw te pawh tum hnai ve tawh dawn ila , " Ben-a chuan a lo ti a . Sana ka en chuan a lo tlai tawh ngei mai . Kan pahnih a kan awm hian hun a kal chak riau in ka hre thin .


Ka mawng la tuai nauh nauh chung chuan ka kal a , ka hmaah Lalmuanzuali nen an kal thung , eng thu ah emaw an la inhnial zui .


" Benchawrh ka beng chawrh mai tur che nia , " A hmeichhia zawk chuan a ti nang nang a , Ben-a lah chuan , " Ka na lutuk palh ang ka duh lo mai , " Tiin awlsam zet hian a chhang .

An inhnial na chu ngaithla in ka nui ka nui ve tawp . Choka lamah chuan kan inzui phei thap a .


Thingpui sen hang ka lum a , anni pahnih chu ka bulah dingin an la inhnial char char Ben-a chuan chhan a tum tawh lo thin mahse Lalmuanzuali chuan a ti lui zel sia , an inbe tawng thei deuh , ka nuih pui nasa an inhnial na chu a ho reuh sia .


Ben-a inchei dan chu a tir khan ka lo en chik lo a ni . Nula rim tura lo kal ve meuh si hi , bata siliper var ang kha a bun a , truck suit a inbel leh tawp , a zip pum vek zui a . Val senior tih takah eng tikah nge smart deuh zaih hian ka hmuh ve dawn ni .** Torch light lian zet a awrh lo hi lawm phawt mai ang .



Thingpui ka lum zawh chuan ka pe a , " Ka lawm e , " A ti deuh thlap . Thil ka tih sak emaw ka pek te hian lawm thu hi a sawi ziah a , kan inngaihzawn hma a lo len thin lai khan a a deuh emaw ka tih phah a lawm .


Uang deuh hian , " Kei pawh le , " Ka ti let ve a .


Lalmuanzuali chuan , " In ninawm ! Khawi ka ta ve tur , " A rawn ti . A zam lo hah hah a nia , Ben-a bula a awm ang chiah hian K. C-a bulah awm ve se tha tur hi nia . A a em mai a hrilh fin theih loh ang .


" In siam ve mai rawh , " Tiin ka thingpui tur chu ka inthlit a . Ka in chuan ka kawchhung a lum veng veng mai .



A thingpui tur chu a insiam ve ngei a , a hang a duh dawn lo tih ka hre lawk sa , frige hawng in bawnghnute a la chhuak a , tak mang kheng in a insiam . A la tawng zuah zuah zui a .



Dar sawm leh pakhat a rik dawn tepah Ben-a chu a haw a , a haw lai chuan ruah pawh a han deuh tawh pawn thleng ka thlah a , nui vur vur in kan inthlah .


A kal liam hnu chuan ka putea te inah ka insawn dawn tih ka hrilh theihnghilh tih ka hre chhuak chiah Lalmuanzuali vang vek .


In chhung ka luh chuan a thla tak ngial pawh hmuh tur a awm tawh lo , a lo han chho hmanhmawh leh tawh a niang .


Kawngkapui te kalh tha in tukverh vel te ka en fel thuak thuak a , choka lamah lutin gas kan off that leh that loh ka en fel leh te te phawt a . Pindan lam ka pan ve choh .



Pindan ka luh chuan Lalmuanzuali chu a lo awm hauh lo batroom-ah a lut a niang . Mut ka tum zet a ka zun a chhuah avangin ka thu leh ta zawk .


Darkar chanve vel aral tawh ang a lo la chhuak chuang lo , ka chet hlek chuan a lo pit chhuak dawn in ka hre tawh , ka tai bawr vel thleng hian min tham un tawh .


Zawi muangin bawp khawkherh chung chuan bathroom lam ka pan a , kawngkhar chu kik kharh kharh in , " Lo chhuak vat rawh , " Tiin ka au a . Ka ip chawih nghal , ka insum thei lo tep tawh a ni .



Minute nga vel a ral hnuah thawveng zet hian zai al al chungin a lo chhuak ve hram . Bawp kherh ngawng ngawng chung chuan bathroom-ah chuan ka lut a . A la nal em em zui , a ti fai leh lo a nih hi . Ka tap tep a ni . Ka zun zawh chuan ka thawl huai a , ka thaw suai suai nghal .


Ka chhuah chuan a lo inchul hliau hliau a , khumah lawn in ka mu thak nghal . A lo mu ve mai dawn emaw ka tia , drier in a sam a la chhem heuh heuh , henu bulah hi chuan thlamuang taka mut a har a ni . A muhil emaw a thi anih ngawt loh chuan bengchheng a siam reng ang .


Ka mit ka chhing riai riai a , ka mutthilh hma tak tak si chuan Lalmuanzuali kut vawtthler chuan ka pumah a lo zut , ka tlawh vak a , a la nui vur vur zui . Ka tlawh ka tlawh chung pawh chuan min kuah bet tlat , a chang leh ka zakah a kut a lo dah , a ke in ka kekawr hak a hlim chho deuh a ka chawnah a ke chu a ngat zui bawk a . Vawt a ti ve hle a niang . Ka pang ti lum ringawt a rawn zawng mai .



Lalmuanzuali kut vawt tak khan min ti harh vek , nghate rep ang mai in zing lam dar hnih velah pawh ka la harh tha , Ben-a nen a kan awm dan vel chu ka ngaihtuah let a , ka nui pet pet mai , bathroom-a kawng khar lo va ka zung tur tur ri te kha a hre vek awm sia hre lo ang maiin a awm leh mai sia , hepa hi chu a mak ve ni . Ka mutthilh lai khan ka chil khiri ka thlauh a ngem ? Min en reng sia awi chu zawng ai chuan ka ka kha ka lo ang huau mai anga .
No no no ....... Ava chi loh ve .


Zak vak duh lo mai ang , a ai a zahna ka lo tawng hnem tawh em mai bakah ka zah vakin a sawt lem lo bawk .
>>>>>>>>>>>>>


A tukah chuan tuk thar duhawm tak a lo her chhuak leh a , ni zung in ka hmai a rawn chhun chuan ka inkhuh tha vata , ka alarm set a rik takah chuan dar ruk a ri tawh tih ka hre mai , thawh loh theih a ni tawh lo .


Zan lama ka mut that loh ngaihtuah chuan ka harh vang tha , khumah chuan thu chhuakin ni chu ka'n thlir a , ruah sur zawha ni eng lo chhuak hi chu a mawi bik chiang a ni . Vawiin ni zet zawng ka tho fuh tlat ka vanneih ni a ni dawn chiang a nih hi .




Zik mar ar ar pah chuan ka tho chhuak a , Lalmuanzuali chu a la mutui khawp mai , ka alarm ri tuar tuarah pawh khan a harh chhin eih lo a nia , mut a duh leh lutuk hi chu Vawkpui ang maia a la thau lo hi a mak zawk.


In la tho fuh zet chuan ka phone ka la a , Ben-a number chu Ka dile , a rik chhung chuan darthlalangah in en in , ka nui ver ver mai .


" Hello , " A rawn tih chuan a hma ai nasa in ka nui leh vur vur a .



" Tuna ka biak mek hi , Ebenezer feet 5.11' a sang vengchuan hnuai a cheng mek bialnu hmeltha deuh nei kha ani em aw ? " Tiin ka fiamthu duah a .


A nui thum dut .


" Ni lo ta ila i dah dawn em ni ? " A rawn ti let ve mial a . Fiamthu pangai tak a'n thawh ve chu le . Ni khi khawthlang lam ah a tla tih ka chiang lo tep a ni . Zing kar karah , min thawng em mai .



" I tawngkam atang khan thil pakhat hriat chhuah ka nei , " Tiin ka ngawi leh daih a . Ka mood fuh tak kha a fuh leh lo tep .


" Min hrilh dawn em ? " Rawn ti dam leh thlup in . Ri bengchheng a awm nghal a . Zingkar karah eng thil nge maw a tih ni ?



" I bengchheng lutuk , eng thawm nge ? " Ka ti nghal vat.


" Machine a nih kha , a reh tep ang , " A tih chu chiang lo nuaiin ka hre thei .


" I in su em ni ? " Tiin ka zawt nghal a . Thawm pawh chu a reh zui ve mai bawk .


" Um , " A ti leh mai a . Zingkar hma takah a in su a nia a taima hle mai .


" U Bawihi a lo kal em ? "Tia ka zawh chuan u Meribah a lakah a lungawi loh avangin a kal tawh a rin loh thu a sawi a ka khawngaih reuh zia chu , engkim amaha a tih vek a ngai dawn sia . Awmpui te hi la ve mai se tha tur hi nia . Mahse hrem hi a phu hliah hliah thung .


A hnu chuan thil ho te te ka sawi a ,ka thu sawi tawp a piangah chuan um a lo ti zel a , ka putea te in ah ka awm zuai a ngaih thu ka hrilh lai chuan a huphurh hmel ngang mai , a rei dawn loh dawn loh min zawt nghal vata ka hriat bik loh thu a ka chhan chuan rei ni lo se a tih thu a sawi a .



" Min ngai a ngem ? " Ka tih chuan , " Um , " A ti ringawt .


Dah ka tum tawh zet na a mahse ka thil hriat chhuah kha ka la hrilh lo tak .


" Ka thil hriat chhuah kha ka la hrilh lo che , " Ka ti a .


" Um, enge i hriat chhuah chu le ? " A lo ti thuai a .


" Tu bulah mah i bial nu ka nih thu i la sawi lo chuan min la len chhuah pui miah lo bawk a nia , " Rum deuh tak hian ka ti a . Ka tum deuh hmuk nghal . Min hmu thei tawp si lo .


" Ka tihpalh a ni , ka bialnu , " A lo tih chuan ka nui leh vur vur nghal . Thil ho deuh sawi leh in kan ti tawp zui a .


>>>>>>

Tui luma ka inbual chuan ka nuam huai mai , ka taksa hi na lo lai a awm zeuh zeuh choh a ni. Zai rat ratin ka chhuak a .


" Ka duh ber che aw ka ngai em che , sakhmel tawn loh chhung rei lo teah pawh eng dang reng hi ka dawn thei lo nang choh lo chu , i tan choh rinawm in hmangaih 'd' valmawi "




Tiin Lalmuanzuali bulah chuan ka zai a , a la harh duh chuang lo , a ai ringin ka zai leh a , ka hmai a kutin a lo nawr vak .


" Tho rawh , kan kal chhuah a ngai a nia , " Ka tih pawh chuan a la inkhuh tha hlun hlun mai .


" Tho rawh ka putea te in ah ka awm dawn nia , i la awm dawm zawk nge ? " Ka tih chuan a tho kang zawt nghal a , " Cube couple te inah maw ? " A rawn ti .


A harh reng sia , a la mut tang tang chu le . Hre hru hian .


" Mm, chiang e , " Ka tih chuan a ner nang nang a .


Tho tuah tuah pah hian , " I hmangaih 'd' valmawi hma si , ka beng athi lo chauh , i zai thiam loh loh nen i hla sak kha ka bengah chuan Benchawrh 'd' valtawi a ni daih , " A ti leh nghal bawrh bawrh . A thluk a inmil a ring reng reng a maw ni .


>>>>>>


In hnuai a ka chhuk thlak chuan ka pa chu chanchinbu chhiar in a lo thu vang tawh a . Be lem lo in chokaah ka lut tlang nghal .


Ei rawng ka bawl zung zung a , dar riat rik hma deuhin kan ei fel der tawh .


Kan in tih fel zawh chuan ka pindanah chho in ka mamawh zualpui ka khung fel zung zung a , thawmhnaw phei chu pathum ve ve chiah ka keng , awm rei ka tum lo mahse ka mark tih that erawh a ngai viau ang .


Ka thawmhnaw khai chhuk in lak awlsam tur chuan ka dah a . Ka pa chuan eng eng emaw min hrilh teuh mai ,pasal ka nei dawn emaw a ti deuh nge maw ni .


Ani pawh amah chauh in a awm dawn a ka ngaihtuah ve tho mai .


A hnu chuan , " I u i be thin em ? " Tiin min zawt thut a .


" Aih , " Ka tih chuan a phun leh nghal char char .


" Midang te ngaihsak nachang pawh i hre lo , in pahnih bak inngaihtuah tur in awm lo ka ti thin a , hrilh fin theih reng reng loh mai , midang mamawh lo ang mai hian i khawsa mai a , sim ang che , " Tiin min hau zui mawlh mawlh a .


" Ani paw'n min be bik hleinem , min biak loh chuan biak reng thu va awm hek suh , " Ka tih chuan ka chhan dan avanga lungawi lo tih hriat deuh hian a rum nghut a . Min en rum ngang mai .


" Ani chu pasal nei tawh a nia , nang chu nula thawveng tak leng hah hah thei ila ni zawk , be tu tur zawk i ni , " Tiin thiam loh min chantir leh vek .


" I tan hrim hrim a nih kha , min hau bik ziah mai , ka lo haw tawh lo ang , " Ka ti nang nang a .


" I hahthlak thin mang e , Zodinsang , puitlin lam hi pan tum ve teh , unau inngaihsak tur tih lam a nih chu ka sawi , " A tih pawh chuan ka la tum hmuk tho .


Ka ning min duat lo si , nula ka ni ve a pawisa min pe tlem thei si , min hrem peih si min hau peih si , iskut , alu , mai leh dal min hmeh tir bik ziah leh nghal . Ka la tlanbo san tak tak ang mawle .


>>>>>


Lalmuanzuali lo chhuk chuan kan ngawi thei hram .


Pitei chuan dar sawm velah a lo kal tur thu a lo sawi a , ka phur lo lutuk chu midang nui hmel ka hmuh ringawt pawh hian ben hrep ka chak . Ka thin a rim hlur thei .



Ka room-ah chuan ka chho leh rih a , eng mah tih tur pawh ka nei lem lo , khumah chuan thu in ka room chu ka en kual a , ka lung te pawh a leng deuh a lawm le .



Ka phone a lo rik chuan ka en thuai , " I damdawi ken theihnghilh lo la , ka bialnu , " Tih te mai hi a lo thleng a . Ka lungawi loh na zawng zawng chu a reh nghal vek . Ka nui nghal ver ver a .


" Aw le , ka bialpa , " Tiin ka thawn let ve nghal . Min chhang let leh tawh chuang lo ka message pawh a seen lo , a buai anih ring in ka be zawm tawh bik lo .



A hnu chuan ka phone chu a lo ri leh , video call a ni tawh thung .


Ka lak rual chuan a ri chur chur , a thawm chu a bengchheng mah mah a ni.
A hmel a lo lan chuan a hmai ah thil dum a kai nuai mai .


Motor hnuaiah a lut chu lo niin ka nuih a ti za reuh lutuk mahse a inhmeh em em tho . Eng vak pawh a sawi chuang lo, ka hmel a hmuh duh hrim hrim vangin a lo call . An laklawh deuh aniang an lo ko reng a rei inbe lo in kan dah .



Dar sawm a rik chuan kan in kawtah motor a ding tih hriat tak hian a ri vung vung . Horn lah chu a hmet ri tuar zui a , lo luh ve mai awm hi nia .


Hmanhmawh vak lo chuan ka chhuak phei , min hmuh chuan min nuih sang a , ka nui let ve lo .


Ka pa chuan ka suitcase chu a lo la chhuak , motor-ah chuan a dah lut zung zung a , Lalmuanzuali chuan a be leh nghal char char .


Ka pa chuan , " Lo hrem na hle rawh u , " Tiin a hrilh deuh kher . Ka thinrim zia chu . Hospital-a kal a la ngaih avangin a hmanhmawh deuh a kan chhuak zui nghal .


Lalmuanzuali chu kan kalna kawngah tho an awm avangin kan thlah pah a , kalkawngah an ti ti char char .


A chhuk dawn chuan , " A nuam ngawt ang , " Tiin mit min la siai zui . Ka beng chak thin mang e .



Cont.......



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)