I LOVE YOU MORE-26

Story tawi te te emaw luanliamna emaw post na
Sandy sweet
Posts: 95
Joined: June 11th, 2021, 10:34 pm

I LOVE YOU MORE-26

Unread post by Sandy sweet » November 5th, 2021, 9:16 am

Part-26




Ka putea te in ah chuan nithum zet ka awm tawh , ka chetdan a piang chu an duh khawp lo zel , eng pawh ti ila min sawisel a ni deuh ber mai .



Hreawm ka ti lutuk ringawt , tlanbo theih lah ni si lo , nula a pumpa a ruk in ka tap keuh keuh lo chauh a ni .


Inrinni a ni a , pitei damdawi in ah a kal a ,putea erawh school-ah a kal thung .In ah Vanlala (an fapa) nen chauh kan awm a ,pitein a pangpar duatlai sawisa tura min tih avangin a pangpar huan pangpar chi hrang hrang awm naah chuan ka lut .


A pangpar mak hlawm zia chu an hming pawh ka hre hlawm lo . Khawvelah hian hetiang ang thil siam mak leh danglam hi a awm ang tih rin ngaihna ka hriat loh te pawh a awm nual . Ka vawikhat hmuhna a ni hlawm tlangpui , a pangpar zinga ka hriat chhun te chu rose , anthorium leh kumtluangpar a ni deuh tawp .


Hling nei chi a awm laiin nei lo a awm leh a , a thente phei chu mak tak an ni bia ila min chhan mai duh hmel , an rim te lah chu na deuh leh rim nei lo hrim hrim te anni hlawm .Rawng ka sawifiah thiam loh te pawh a awm nuk mai .


Tawtawrawt ang deuh deuh leh bawkbawn ang deuh te , ball-a hling phun ang deuh te pawh a awm nual , a thenin van an kawk athenin leilam an kawk thung . A thente phei chu an rah in ka hria .Tui hmel deuh te pawh an awm . A te ber atanga a lian ber thlengin a awm ve teuh .


Ka enkual fe pawh in mawi pawh ka ti ve hlawm lo , awm lo mahse pawi ka ti lo , pangpar hi ka ngaina lem lo mahse an awm avangin ka buai phah chuang lo 50-50 anih ber chu .


** Han sawisak dan tur ber pawh ka hre lo , a rawng atanga tanin a in ang zawng hmunkhatah ka dah , chuta tang chuan nalh ka tih loh zawng chu ka pawt phawi hmiah hmiah . A thente chu zung an kaih thuk lutuk a , hmanrua ka keng si lo ka kut a pilh pheng phung mai .


" Heng zawng zawng hi sum tamtak sengin a enkawl awm sia , eng rilru pua sawisa tura min ti chu ni maw ? " Tiin ka phun bul bul .


Tlem bak ka phawi hman lo , a rawng ka thliar naah ka kawng ana , thu hah chawl pahin hnim ka pawt phawi a , a enkawl uluk tih hriat takin hnim pawh hmuh tur avang pharh mai .


Vanlala chu lo lut ve in ka phone min lo pe , pitei'n min lo call tlailam chawhmeh atan bean chhum turin min ti a , a dah leh daih . Vanlala chuan , " Anu pangpar hi ngati nge avan tlu nasa ? " A tih chuan ka pawh phawi anih thu ka hrilh , mak ti tak hian min en mahse eng mah sawi lo in in chhung lamah a let phei leh mai a.


**Ka pangpar pawh chu thian fai in in chhungah ka lut ve a , ka intih fai zawh chuan eirawng bawl a hun der tawh .


Bean chu ka silfai a tui dekchi-ah dahin ka chhuang hmasa phawt , a so hnuah bean chu ka dah lut , ka hawlh thin a lut kim thei lo re re .Tih ngaihna vak pawh ka hre lo , a awm ang ang chuan ka chhin tawp a , a so bawrh bawrh hnuah ka off chuan a tui ka paih a , bean chu thlengah ka thur chhuak vek .



Siam tur dang a sawi loh avangin enge ka siam ang tih ah chuan ka buai leh ta . Chawhmeh chu a awm teuh mahse an duh zawng leh ka duh zawng inmil lo lutuk hi buaina pakhat a tling .


>>>>>>>


Tlai lam dar li bawr velah chuan eirawng ka bawl zawh tawh avangin tv en in ka thu vel mai mai tawh , ka thil en chu a nuihzatthlak bawk a in chhung khawk rum rum khawp in ka nui .


Chutia ka nuih her her lai chuan putea te nupa chu an lo lut thut , ka phu zuk zui .


" Rukru ang mai thawmte nei ve ta che u , " Ka ti nang nang .


" I nui ring leh lutuka kan thawm pawh i hre lo zawk anih kha , " Pitei chuan a lo ti . A mitmeng fin hmel tak dum fiah kak chuan vawiin ah thil tih sual ka neih leh neih loh ka hmel atanga hriat tum ang mai hian min la en zui . Ka chalah hian ka rilru a thil awm a hmuh theih a ring reng reng emaw ni .


" Thingpui ka lum ang che u , " Tia thawh ka tum chu a ngaih loh thu a min chhang in an pindan lamah a chho zui .



>>>>>>>


Chokaah chuan pitei chu eng thil emaw tiin a ri rek rek , ka va luh ve chuan ka bean chhum dan chu min zawt phawt chumi hnuah chhum hmaa thenfaia phawt tur tih leh hmin lova chhum tur tih vel min hrilh leh hrep .


A sawi rei zia chu sermon tenau a ni ringawt . Chawhmeh dang la chhuakin siam dam min hrilh leh fe hnuah siam turin min ti chauh , awi awi awi ! Ka ke hi kham tak a ni .


Thim hma deuh chuan kan bawl zo thei hram chu pawh a duh dan a la ni lo cheu , " Inzir fe ila ngai , " A la ti ta deuh deuh a . Mihring kan in ang lo tih hi ka hrilh chak mang e , a thil ei duh zawng hi ka ei duh zawng a ni ve lo tih a hriat hun chuan a upa tawh ngawt ang .


>>>>>>>


Thim hma hre chuan a pangpar huanah a zuk kal , a lo let leh chuan beidawn hmel zet hian min en , " Ngati nge ? " Ka tih chuan thawk a'n la deuh kawk phawt a , " Ka pangpar huanah khuan lut tawh hauh suh , " Tiin choka lamah a phei zui daih .


Hrilh hai zet chuan putea leh Vanlala chu ka en , putea chuan a chhan a hriat hmel bik vak loh, a dar a san uk ringawt .


Vanlala chuan , " A pangpar i phawi vang a nih kha , " Tiin min dem hmel deuh chuan min en , ka putea chu a nui chhuak huk .


" Duata , eng tin maw i u Zodini hian i nu fate a lo pawt phawi a maw ? " Tiin a nui huk huk nghal .



A nuih chhan ka hriat miau loh avang chuan tum deuh hmuk in ka en , "Ama'n sawisa turin min ti a lawm , eng tin vak nge ti se min tih ? " Lungawi lo zet chuan ka ti .

Putea chuan nuihza insum tih hriat tak hian , " Siamtha a tihna a lawm , " Tiin an pafa chuan an inen a an nui dun hak hak nghal . A sawi dan in zir miau hek lo , ka inthiam lo vak lo .



>>>>>>



Zanriah kan kil lai chuan putea'n , " A thar kan phun belh dawn nia , " A ti zeuh a .


" Sawi lo ang u , " Tiin pitei chuan a chhang . A rilru a nat hmel tawp .


" Eng zat vel nge i pawh ? " Tia putea'n min zawh chuan , " sawmthum vel a niang , " Tiin ka chhang a pitei chuan min en zawk . A ui ngang a niang .


" A thar neihna chance a nih chu , a thar i duh a mahse a khat tawh i tih kha , a thar chuan kan thlak daih dawn nia , " Putea chuan pitei thlem ti tih deuh chuan a ti a . A um e lem hlei lo , a lungawi thei ngang lo a niang .


Putea chuan fiamthu a thawh zui bawrh bawrh , nidangah chaw ei laia tawng an phal ngai loh nen ka thil tih sual avangin kan hlim ta phian .


" Eng vangin maw sir Patea nen khan in insual ? " Tia min zawh thut chuan ka thil ei lai ka hak nghal , pitei chuan tui min thlit sak vat .


" Pute , i ti mak thei chaw ei lai lai a chutiang te lo sawi , " Ka tih pawh chuan sawi tura min tih tlat avangin ka sawi ta nge nge .


" Ka superman min tih chhiat sak anih kha , " Lungawi lo zet chuan ka ti nung nung . Han sawi leh takah chuan ka thinrim thar leh hle . Vanlala chuan min nuihzet lutuk . Nula puiin superman vanga midang ka insualpui vang chu a nih ka ring .


" Superman lem tih vel mai mai nula pui han thinrim phah nan chuan a ho viau lo maw ? I thiam lo hul hual anih chu , " Pitei chuan a rawn ti . Ka superman lem min tih chhiatsak ho a ti tlat chu ka rilru a na dawn dawn mai .


" Vensanga min lei a sin , " Tap lek lek chuan ka ti tuau a . Ka kham zui nghal , ka ei lui thei tawh lo , ka rilru hi ka sawifiah thiam si loh hian ana tlat .



An kham zui ve sap sap nghal . Hmun vel ka tih fel lai chuan pitein ngaihdam min dil a .


" A ho lutuk , " Ka ti liam mai thei tlat lo . Ka sawi tawh ang khan ka rilru chhungrilah hian na a awm tlat .
Pitei pawh a inthiam lo hmel ngang mai , nidang ang lo takin sawi tur ka hre lo .

>>>>>>>>>
Tv en in ka thu ngawi reng ringawt , eng movies nge kan en pawh ka hre lo , dar sarih leh a chanve velah chhung in khawm kan nei a , rei thu tawh lo in ka mutna pindan lam ka pan zui nghal .

Khumah chuan ka bawk thlawp a , ka mittui chu a far zung zung nghal .


Ka phone a lo rik chuan ka la duh lo , tu mah ka be chak rih lo mahse a rik nawn tluk tluk takah chuan ka chhang ve hram . Tu nge min lo be tu pawh chu ka en hran lo .


" I tha maw ? " Dam dupa a lo tih chuan Ben-a aw a ni tih ka hre nghal mai a , ka tah a chhuak sawtin ka hria , ka chhang mai thei lo .


" Zote , " A rawn tih leh chuan tial ruai hian , " Ummm , " Ka ti thei hram .


" Ngati nge ? " A rawn ti vat .


Ka hmui pet fan fan chung chuan , " Vensanga ka hrechhuak a , " Ka ti a . Ka mittui chu a far leh zung zung nghal .


A ngawi reng a kei ri chang changin ka insut thung . A hnu chuan , " Min hrilh duh em ? " A rawn ti a .


Khumah chuan a letling zawnga mu in ka mit ka chhing vang vang phawt .


" Ani chu ka thian tha tak a ni . Ka naupan lai hun ka sawi dawn anih chuan a tello in a kim thei lo . Ho te teah kan inhnial a , kan intibuai a , kan insual thin mahse kan inkawm loh phah lo , " Tiin ka ngawi leh rih a . Amak khawp mai ka rilru hi a no ta lutuk , thil ho teah leh sawtna awm miah loah ka mittui ka seng ve ta a nia . Ka hrawk hi a na vek .


" Kum hnih liam ta mai khan mim boral san a , ka hmuh lai ngeiin , " Ka sawi zawm hreh takzet . Ani khan ka tan a nunna a hlan a sin .


Hreawm ka tih chuan sawi tawh lo turin min ti a , ka ngawi ta daih . Ka pa hnen atang a hre leh tawh tho in ka ring . Rei pawh kan inbe lo , ka tawng luam peih tlat lo .


*"" Mak tak maiin Vensanga chu ka rilruah a awm tlat thil dang ka ngaihtuah zui thei lo . Mut hmunah chuan thil thlen dan vel chu ka ngaihtuah zui a .

Kum hnih liam ta khan kan thian ho phur thutin picnic kan rawt a , fur lai a nih avangin Vensanga chuan kal loh mai a duh thu a sawi mahse ka sawm luih tlat avangin min zui ve mai .


Kan thlen chuan nidang ang lo takin a ngui riau a , tui pawh a cheng peih meuh lo , eirawng a lo bawl daih. Nidanga ka inhnial pui chamchi thin a nia chutia a nguai riau chu keipaw'n nuam ka tih loh phah .


Kan haw lam chuan leimin in min dang ta tlat , kan motor chu dahin kein leiminna piah lam chu kan kal tlang a ngai a , a tlai deuh tawh avangin kan chhungte kan bia a , rei loah an lo thleng nghal leiminna piah lamah min lo nghak , a hnungber dawtah ka kal , ka hnung chiahah Vensanga a kal thung .


Midang zawngin leiminna piah lam chu an thleng vek tawh , keipawh hlam chen vel bak kal ka ngai tawh lo tihah chuan ka chhak zawnah lung a lo lum ta mai , a ri ringawt pawh chuan min ti hamhaih lutuk chet mai nachang pawh ka hre lo , leiah ka tlu a ka chungah chuan Vensanga chu thi hnuangin a lo bawk .


Thil thleng chu hmu reng chung si in , ka hre mumal hauh lo thung , Vensanga thihna chuan keimahah nghawng a nei nasa in ka tuarna hle bawk. A hnua ka pa'n min hrilh dan chuan lungin min den loh nan Vensanga khan min lo kuah a ni awm e mahse mak tak maiin khathil thlen lai khan awm ve lo ang mai ka ni . Ka ngaihtuah let ngial pawh hian Vensanga lua thisen kai hnuang bak kha ka mitthla thei lo . ( Heihi kan thil tawn tak tak ania mahse vanneih thlak takin nunna chan erawh kan awm lo thung ,ka hmaa lu tia dawn dawn lung lo lum in min thawi fua chuan tha a khur nasain lung pawh a phu rang zawih zawih hle mahse mak tak mai in thil thleng kha sawi kim vek turin ka hre mumal tawh lo thung)


Keimah ka indem lo thei lo , lo sawm lui lo ta ila , lo kal chak deuh ta ila , kei hi thi tur zawk ka ni tih thlengin ka ngaihtuah thin. A chhungte chuan min dem miah lo in min lainat zawk a nih chu , a nu phei chuan min hmuh hian min tah khum thin .


Tun thleng hian hrisel tha pangai taka nunga la dam anga ngaihtuah ka duh a , a thlanah tak tak pawh ka kal ngai lo mahse tunlai chu thil eng eng emaw vang hian a hming ka lam nasa a , a boral tawh tih ka ngaihtuah chhuak lo thei lo a ni .


>>>>>>>>>>


Zingah chuan dar ruk ah chiah chiah ka tho , pitei bulah chuan a thawh tlai theih loh reng reng .


Choka ka luh chuan tui lum in in a lo thu leh vang tawh , min hmuh chuan , " I mit chu khuaiin an zuk che em ni ? " Tiin min zawt nghal.

Tui lum min pek pah chuan fiamthu a thawh nghal char char . Ka ngui deuhin a hria a niang .


Pitei hnaa a kal loh avangin a pangpar buaipuiin kan tul nileng thak , eng par leh eng par emaw ni a chhah thlen teuh ni . A tih dan vel chu uluk lutuk in min hrilh leh hmasa te te phawt , ka tui loh lam tak a lo ni bawk nen tah a chhuak rum rum mai a lawm .

Chawhnu lam anih meuh chuan ka kawng hi a bung thei mai dawn in ka hre tawh . A na lutuk ringawt !

Dar li rik dawnah putea a lo haw a , kan chawl ve thei hram . Ka lawm zia chu ka lawm hi a ni tawp mai .


>>>>>>


Zanriah kan kil lai chuan putean , " Bialpa te hi i nei ve em ? " A rawn ti thut . Eng zawhna nge maw ni ngai ? Nei lo hmel leh luck lo lutuk hmel ka pu emaw ni .


"A nei ve bawk ang chu , " Pitei chuan a lo ti . A thusawi thlawp zet hian , " Nia , nei ve bawk ang chu , " Ka ti a .


A zawhna han awm an loh zia chu , " Bike a nei em ? " Tih a nia min zawh daih ni . Ka putea thin hi chu ka nui huk lo chauh a ni .


" Aw , nei , " Ka ti awlsam et .


" Anih chuan then la a tha ang , " Eng amah hma chuan a ti thla rawk a . A hmel ka en chuan fiamthu thawh hmel a pu hauh lo .


" Bike a neih vang chuan maw ? " Ka ti hehaw a .


" Ni chiang e , " A lo ti . Then tura min tih chhan chu a ho e .


" Pute , i ti awm ang lo e , " Ka ti bul bul .


Rum deuh hian , " Tunlaiah mahni thawhchhuah ni mang si lo a bike changkang tak tak nei thei , an underpant man tak tak pawh thawkchhuak leh chuang miah si lo ,in la pa taka tlan chak ve satliah an tam tawh em , " A ti deuh hmuk .



" Bike an khalh chak vang chuan maw ? Nge underpant man an thawhchhuah loh a vang zawk chuan ? " Tiin nui pet pet chung chuan ka zawt lui leh deuh kher .



Rum deuh nghut chung hian , " An bike ri lah a ring si , ka tlanpelh chiahah khan lung tha lo leh nausen te an awm takin tia silencer vuah nachang pawh hre lo , an inti thei zawk emaw tih tur khawpa tlan ving fua fua thin . Kalkawnga kal te tan pawh van rim a nam rum rum lo ang maw ? Tih tur khawp a thlawk fua fua . Midangte tan a an bengchhen zia leh air pollution an siam nasat zia pawh hre leh tawp si lo . Thing lutuk ! Thing lutuk !Chutiang ho chu ben hrep a nia ka chak ni , nula lamah lah hian an tlana zek a , eng in nge maw an nupui fanau te chawm an tum ni ? " Tiin a sawi zawm zel . Ngawi reng in kan ngaithla thap , a phun tui laklawh tlat .


A fapa in dawhkan a thawhsan chuan , " Duata , nang pawh hre reng rawh , bike i duh ve anih chuan thawhchhuah i neih hunah chauh i nei ang , keini chuan kan lei dawn hauh lo che , " A ti leh kher a . Pitei chu nupui tha tih takah ngawi reng in an pa thusawi a ngaithla .

( ka putea te nupa mak ve na riau chu an hnathawh na hmun in ang chuang miah si lo hi lirthei pakhat chauh an nei , bus-ah te an chuang lawp lawp mai a , a tam thei ang ber ke in an kal bawk thin - thil hmanhmawh thlak a nih lem loh chuan )


" Ben-a chuan thawhchhuah a nei a lawm , " Ka tih chuan , " Thlakhatah eng zat nge a lak luh , " Tiin min zawt leh .

" A... chutiang thleng thleng ka hre bik nang , " Tiin ka chhanglet a . Eng tin nge hria se min tih ni .


" I bial pa thlakhat lak luh zat pawh i hre lo a nia , in inhre chiang lo hle a nih chu . "

" Ka zawt ngai tlat lo a , " Dawhkan thawh san pah chuan ka ti , tui deh na'h chuan ka thleng dahin ka kut sil pahin ka tleng zui a .


An nupa in an kham zui ve nghal , " Sir Abraham-a ang te hi an fel a , pasal atan pawh an iai awm lo , " Tiin V. Principal chu a'n fak ngei a .


" Ben-a pawh a fel lutuk a lawm , " Tiin Ben-a thlavang ka hauh ve thung .

" Nanga fel tih ve chu ka ring lo em mai , " A la ti tal nia .

Ka chhang buai peih tawh lo . V. Principal chu a fak zawm nghal . Eng ang paw'n fel se ka bula fak chiam hi a tul emaw ni ?

>>>>>>


Kan intih fel hnu chuan thutkhawm na pindanah kan thu thap .

Ka phone a rik chuan Vanlala'n min lo pe , ka awm hnuhnun ber na ah ka lo kalsan leh daih , ka va nikhua lo thin tak em .


Ka movies en lai ka en tui laklawh chuan tu in nge min lo call tih pawh en mang lo in ka pick up, loudspeaker-ah ka la dah zui , Ben-a chuan , " Zote , i putea te khan in leng neih an phal em ? " A rawn ti . Motor a khalh mek a nih ka ring a aw a kir tlat.




Nizan khan ka tap bawk sia min hnem tur in lo len a duh a nih ka ring .


Awi ! Cube couple-te chuan chik zet hian min lo en . Nuam lo duh ngei mai . Putea chuan ka chhan hma chuan , " Kan kawm viau lo , " A lo ti . Ben-a chu a zak leh viau ang , ka mawl zia hi loudspeaker te lo on reng reng .


Tho chhuak in loudspeaker chu ka off-a , " Aw an phal , lo kal rawh , " Tiin awlsam taka kan awmna a hriat theih nan kalkawng vel chu ka hrilh nghal .


Putea chuan , " Sir Abraham-a( V. Principal kha aw ) pawh a lo leng dawn tha deuhin i kawm dawn nia , " A ti ta mai . Ka thin pawh a rim lo ka nuih a za zawk . Ani nen a min hmehbel a tum tlat erawh ka hrethiam thei lo thung .


" Aw le , " Ka ti fan duai . A duh leh lo leng ve mai mai teh se putea lawmah pawh .

" Leng turin i sawm nge lo len a tum ve hrim hrim ? " Tiin pitei chuan a zawt a.

" A pahnihin , " A chhanna chu a phakar reuh hle mai .


" Zote , i putea tih dan tak ah mipa bike nei hrim hrim chu duh suh , " Pitei pawh chuan a lo ti . Eng thil nge maw an hriat ni ? Bike neih hi sual a ni em ni ?


>>>>>>>>


Sir Abraham-a chu a lo thleng hmasa zawk a, smart zeta inthuam in a lo pen lut tha tha . Min hmuh chuan a kiai suk duh chauh putea nen chuan an inbe luam nghal . A chawlhni inkhawm thawmhnaw a rawn ha chiang mai .


Minute hnih hnu velah kawngkhar chu a lo ri ve leh , ka tho kang uai chu pitei'n a hawn tur thu a sawi vangin ka thu leh a , Ben-a nen chuan an lo inzui lut . Ani chuan chapal rawlh thawk a bun a track suit dum plain a ha leh mai . A inchei duh dah thin lutuk hi chu . A exer lakna thawmhnaw a rawn inbel a niang .



Min hmuh chuan a nui suk a , sir Abraham-a erawh sakei ang mai kha a ni leh tawh a tum deuh hmuk . Ka bulah thutna awl a awm reng mahse ka piah deuh ah chuan a thu zawk a . In leng dang kan lo nei sia a nuam lo duh ngawt ang . Putea te lah in an lawm hmel teh chiam si lo , ka khawngaih lutuk .


Vanlala chu lehkha zirin a room-ah a awm a , cube couple te erawh kan bulah an thu ve reng thung .


Sawi tur kan hre lo tlang hlawm bawk a niang chu kan ngawi reng . Tv chu hmuhnawm tih hmel takin kan en hlawm , ' Zootopia ' a la chhuak zui .ka nui chhuak leh hak thin .


Putea chuan Ben-a chu zawhna a'n zawt tan a , a zawhna zawh ho chu chhan a nuam zawk zawk miah lo ang . Thlakhata a lakluh zat te nia a zawh ni .


Ben-a hi chu a confi. ve hrim hrim a a ngaihtuah awm hran lo . Awl sam thei ang ber chuan a chhang zel . Dar riat velah thingpui ka lum a , Ben-a chuan nuam a ti chiah lo aniang rei pawh thu tawh lo in a haw zui a .



Sir Abraham-a erawh a la thu thung . Ka chhungte an pindana an luh hnu chuan , " I bialpa chu ka tluk lo chiang a nih kha , i chhuang viau pawh kha a awm lo hran lo , " A lo ti .



" Ka chhuan viau pawh ka lo hre hleinem , " Ka ti mai a .


" I en dan atang khan ka hre mai a lawm . "


" Chutiangin ka lo en a ni maw ? Ka lo hre hauh lo a , a thu hrimah i tluk lohna pawh ka hre chuang law , in thatna mual ah chuan in tha ve ve a lawm , " Chhan vak ngaihna ka hriat loh avangin ka ti tawp .


" Mahse i rilru in keiai chuan tha i ti tho tho , " A la ti . A at a a at zia hi . Ani pawh hi a zei hlawl lo . Huizzzz.....


"Ti ve bawk ang chu ani te chu ka bialpa a ni miau a , bakah a nun dan in a zir a ,ka zahpui turin a awm miau hek lo , " Ka ti ta duah . Ka tawngkam chu a na viau mai thei mahse pawi pawh ka ti chuang lo tui baw hnu a ruh leh theih miau loh a .

" I bialpa ni ve ta i la min chhuang ve a ngem ? " Hah , a a takzet a nih hi .


" I ni dawn tlat lo a , " Ka ti deuh hmuk.


" Ka fiamthu a nih kha thinrim kher lo la, chance a awm tawh lo tih ka hria a lawm , in innei hunah min sawm ve mai dawn nia , " Te a la ti .


Ka mipa hriat ho hi puitling taka kawm tlak an awm hlawl lo.


>>>>>>


" Kan veng a inang reng sia , ngati nge ka hmuh ngai loh che ? " Tiin min zawt ta thut mai. Phut zuk na tham a tling , ani hian a mit hi a rap bet thin emaw ni dawn chu le ?


" I mit i meng lo a niang chu , kohhran khat kan la ni zui a nia , i thluak kha a thawk vak lo nge a hmanna i hre lo ? " Ka ti deuh hrep .

A nui suk suk a , " Thluak lam anih loh chu ka hmu ngai lo che ka ti mai a lawm , " Thu tha sauh sauh pah chuan a la rawn ti . Val senior tih takah haw nachang a hre dawn lo a ang tlat .


" Biak in chu sawi lo phawt ila mi kan tam deuh avangin , school-ah tak ngial pawh min hmu ngai lo em ni ? " Ka ti deuh hu .


" Hmu ngai e , " A ti leh lawi sia . A hmel en aiin a a tlat .

" A nih te chuan ti nge i sawi si ? "

" Lo hre hma deuh che ila tha tur hi nia. "

" I ler a nih chu , bial pa ka nei tih theihnghilh suh , " Ka ti a .


" Ka theihnghilh lo , ti nge ler pawh chu min tih reng le ? " Tiin min zawt let .


" I ler miau a . "

>>>>>
Kan titi a kaltluang deuh nge dar sawm rik hma deuh chuan a haw ve hram .


Ka mutna lam ka pan hnu chuan Ben-a chu a la mut ka rin loh avangin ka call a , hmeichhia in a lo la tlat .


" Khawnge Ebenezer ? " Ka ti hrawk nghal .


" He phone neitu hi em ni ? " A rawn tih chuan tawh sual a tawk anih ringin ka thu ngil vat .


" Aw , eng thil nge thleng ? " Ka tih chuan an pa te an accident thu leh Ben-a'n damdawi in a a hruai thu vel chu min hrilh luam a , an la buai deuh thu leh Ben-a phone a hman hawh sak thu vel te chu a sawi a ,ka thaw huai mai . Hepa tak hi chu aw !


" In buai loh hunah min lo , " Ka sawi zawh hma chuan Ben-a zawk chuan min lo chhang a .


" I haw thei tawh em ni ? " Ka tih chuan tha deuh in min chhang a , zan in thil thleng avang khan a lungawi lo lo a niang .


Motor a khalh dawn avangin kan titawp phawt , in a thlen ah min lo be leh a , lo leng ve kha tu nge a nih pawh min zawt lo . A thik thu a chhe vak lo nge a sawi zui peih lo pawh ka hre tawh bik lo .


" Ka ngai lutuk che , " A rawn tih chuan ka tim sawk thei . Ka hmul thi te a ding hialin ka hria . Eng emaw vanga min kalsan tur ang hian ka ngaihtuah tlat a nih chu . Tun lai ka thil ngaihtuah hi a mak thei riau .

Kan dah hnu chuan a lo tlai leh duai tawh .

>>>>>>>>



Ka putea te in ah chuan thla chanve zet ka awm a , Ben-a nen chuan nikhatah vawikhat kan in be hman tawk . Ka ngai thei hle a mahse leng tur erawh chuan ka sawm ngam lo thung .


Pawnah ka chhuak ngai lo a , in ah ka tawm deuh chawt . Pitei chuan thil tam tak min zirtir a , a thente chu ka tangkai pui a mahse a then chu ka duh dan bak in ka ti leh chuang lo ang .

An hnena ka awm hnu hi chuan a clinic pawh a hawng tawh meuh lo .


>>>>>

May ni hnihah (ni-2) Lalmuanzuali'n pasal a neih dawn avangin keipawh kan in ah ka insawn tawh , ka pa paw'n a sam te a lo ti danglam deuh bawk nen a lang naupang sawt . Ka u niawm tak ani .


Lalmuanzuali'n thian a min hman dawn avangin kar hnih vel zet chu bazar nan hun kan hmang , kan buai rei khawp mai , anu hi nu duhkhirh lutuk tak mai a nia , kan thil tih a sawt theih loh phah .


Kan han bazar-a kan thlan fel vek tawh hnu pawh anu in a en chuan thlan that leh a ngai zel . Hna hah tak thawh ai pawhin a hahthlak zawkin ka hria .


>>>>>>


Lalmuanzuali te inneih ni ah chuan mi an thahnem khawp mai , mihlun chhungkua an lo ni leh zel nen mi zawng zawng an sawm emaw tih mai tur hi a ni .


Anu'n min hrilh zing bawk a , ka chesual lo ve hlauh .


Hunserh kan hmang zo a , biak in atang kan chhuah chuan thlalak na hun kan hmang leh rih , ka taksa chu a na leh hle dawn a nih hi . Lalmuanzuali a san deuh avangin pheikhawk sang min bun tir vei nen ka chawn vel hi a na vek .


Mipui zi nuai nuai karah chuan rin loh takin Ben-a ka hmu hlawl mai , a changtupa nge nge . " Ka hman ka ring lo , Kha a ti ve sia , " tiin ka phun nung nung .


Vawiin zet chu s nalh in a smart tak zet, coat suit nen a induang zaih a , leather jacket emaw track suit a lo ha lo chu thil mak a ni . A piangthar a nih dawn hi .


Lalmuanzuali chuan ka lama lo kun deuhin , " Saw romantic scene-a , " A rawn ti . Ka nuih a za lutuk , a hawi kual nasa nge a lo hmuh ve chat ni . Mahse a awm lo hran lo e , a langsar bik em a lawm . Nula ho mit pawh a chungah a fu leh thup tawh .


>>>>>>


Pangpar vawrna hun kan hmang dawn a , chu thil chu tul ka ti lo ber ang , ho hi ka'n ti khawp a .


Kal daih ka tum chuan Lalmuanzuali'n min pawt lui tlat sia , hmeichhe intlar thup lamah chuan ka ding ve ta nge nge .


Hawi kualin Ben-a ka zawng ru deuha ka hmu tawh miah lo , biak in atang a lo chhuak lam chiah kha ka hmu a , a haw daih emaw ni le .


1,2,3.... an chhiar pawh chu ka hre miah lo , ka hmaah Lalmuanzuali a lo vir phei ka hmuh chuan ken ka tum mahse a pangpar ken chu vawr ta mai loin ka kutah a lo hmeh bel ta mai . Chutah Ben-a chu khawi atang emaw a lo chhuak a , ka hmaah lo dingin a coat hak ipte chu a zen rak rak a , bawm mawi deuh hi a lo phawrh chhuak .

Chu bawm chu a te reuh sia , a la tle sap sap zui .

Hawn mai nachang pawh ka hre lo ,thil thleng chuan mi ti hrilhhai .

" Hawng la , " A lo tih chuan bawm chu ka ban a .


Ka hawn chuan tissue paper a awm , phawrh chhuak tura min tih avangin ka phawrh chhuak ve mai a , thu inziak a awm , hawrawp mawi deuh hian ' Min nei rawh ' tih a lo inziak . A mawi lutuk a , a kikawi kual vel si nen ka chhiar thiam lo tep .


Ka chhiar nawn leh chuan ka harh chhuak zawk , Ben-a ka en chuan a nui sang a , a inrintawk hmel hle .


Pangpar chu ka en leh phawt a , mipui chuan thin phu dep dep in min en in ka hria .


" Eirawng i bawl peih leh peih loh a ni mai lawm , " Ka tih chuan a nui chhuak hak a . Mipui chuan an kut an beng dar dar nghal ,an nui tha hlawm bawk a .


" I tan chuan nau pawh kan pai mai ang chu , " Fiamthu tih hriat tak hian a lo ti . Ka beng thlawp nghal , tenawm lutuk mai !


Zungbun mawi deuh hi a kekawr ipte atang a rawn phawrh chhuak a , ka kut chu lo ban in a fawp zeuh a , ka kuttang ah chuan chu zungbun chu a rawlhlut nghal . Ka bun tawk chiah maw le .


" Ka lawm e , " Tiin a phun sup a .

>>>>>>

Zingah chuan dar rukah bawk ka harh leh ngaiah ka neih tawh a nih hi .


Hmanhmawh lem lo takin ka tho chhuak , ruah lah chu a tla pheuh pheuh zui, mut leh mai ka chak mahse ka mu leh anih chuan thawh ka hai chiang khawp ang . Tho tlang law law mai ang .


Bathroom-ah chuan lutin ka inti fai sawk sawk a , ka ha ka nawh chuan ka kuta zungbun chu ka hrechhuak zawk . Ka nui ver ver nghal . An lo ruahman lawk vek anih dawn kha , a kal hman loh tur thu min hrilh reng sia .


>>>>>>


Lalmuanzuali chuan min lo call , " Eng tin nge in awm ? " Fiamthu ti tih chuan ka zawt a .


" Kan mu tawp , ani khumah kei sofa-ah , " A tih chuan ka nuih kur kur .


" Min nuih suh , rock , paper, scissor kan tel a ka chak lo a lawm , " A tih chuan a hma ai nasa in ka nuih leh . Nupa tur dik tak an lo ni . Bul an tan fuh em mai .


" A that nasat chu , " Ka tih chuan , " Nia , rai te hi ka hlau bawk sia a tha zawk daih , " A lo ti . A va a tak !


" Chutiang an sawi ngai lo fate chu malsawmna an nia nupa phuar nghettu pawh an ni , " Tiin ka hrilh a . Hrethiam tak ang maw ?

" A nih chuan mipa rilru hneh dan min lo hrilh , " Tiin min rawn zawt . Ka hre bik teuh si lo . Kan inhrilh khawlo vek ang tih pawh a hlauhawm zawk a lawm maw le .



" I nihna ang khan awm tawp rawh , mize thup kual vel kha a ngai lo mahse chutih rual erawh chuan sim then tur i ngah hle , zing thawh tlai te kha a chi miah lo .


A chhungte , a nu leh pa te zah thiam la, i nu leh pa tak tak te i en ang khan en i tum dawn nia . Anu leh pate rilru i hneh phawt chuan i pasal rilru pawh i hneh thuai mai ang . Mipa te hi an chhungte laka kan that chuan an lawm ve thin an ti in ka hria .


Chuan i pasal kha zah thiam la , a thusawi ngai pawimawh bawk la , a hmaa i awm dan ang kha chuan awm suh , a bul a zak tung tung ang khan , hei ka bula i awm bawrh bawrh ang khan i awm dawn nia mahse chintawk erawh neih a tha , sawi tur a tam mai , nidangah kan sawi tha leh dawn nia , " Tiin ka thiam ang tawk chuan ka hrilh ve ngial a .


" Awi ! Ka van lawm , i tello hi chuan ek mai ka ni , " A ti deuh kher . A tawngkam te hi a duh hi chuan a tha thin .


Cont......



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)