KA LUNG ' D ' BY Lalnunmawii Manuntei

Story tawi te te emaw luanliamna emaw post na
Lalnunmawii manuntei
Posts: 109
Joined: November 26th, 2020, 10:46 pm

KA LUNG ' D ' BY Lalnunmawii Manuntei

Unread post by Lalnunmawii manuntei » November 19th, 2021, 8:17 pm

KA LUNG 'D'


By


Lalnunmawii Manuntei


Fur lo in ṭan ruah hmi tla seng seng thlirin khang kum liam ta a kan hlim lai te chu a mal te te in chhui kir tum ni awm fahran chuan pawn lam ka thlir dauh dauh a.



Ruah hmi hian keimah ang lo takin ka lung a ti leng riau pek a, ka lunglen chhan ka ngaih em em hian min la hre ve a ngem le? A kal aṭang khan ni tam a liam tawh, ni lo kum a vei tawh zawk, kan taksa chu chhim tawp leh hmar tawp ang hian a inhlat em em a , mahse, kan thinlung erawh a inhlat thei ngai lo , mahse tunah hian chhete talin min ngaihtuah ve ngai em tih ka hre lo, min hriat tawh kher pawh ka ring hek lo.



Ka maimit chhin rualin a hmelṭha lutuk leh a hmel pa hrakte chu chiang takin a lo lang, "thlakhat vel inhmuh loh chuan a hmel awm dan ka theihnghilh vek zel" an tih hi kei chuan ka awih ve lo, an duh tak zet te a nih ngai chuan kan hmangaih chu kum sang tam tak pawh hmu lo mah ila kan hmangaih tak zet a nih chuan kan thinlungah hian a cham reng tawh ṭhin. Theihnghilh mai mai theih a ni lo.

******



"Ruah a sur a nia lo kal rawh i huh vek ang" min ngaihtuah tak a ti tu chu ka nuih seih, min ngaihtuah tih hre reng mahila a rilru tih buai hi nuam ka ti ṭhin. Abulah hi chuan ka pangchang ve ṭhin em em a, kan naupan lai pawhin ṭhian dang kawm lem lo hian kan inkawm chawt ṭhin.



Kan inbul maiah an awm a, kan nu leh pa te hi ṭhian ṭha tak an ni a , kan in ti chhung viau, keini an fate ho pawh hian an inṭhian ṭhat na vang chuan unau ang mai kan ni.



"Luhlul reuh lutuk, i huh zawr vek lo chauh a nih kha, min run luih vang hian i dam loh phah thei tih i hria em? " a mitmeng thuk ruih chuan mi melh kur tih ka hria luhlul chhuahin hnuai lam ka bih daih.



Ka lungawi lo tih a hriat vangin min thlem char char, kei lah mi luhlul leh thinlung sak an tih ang chi kha ka lo ni ve bawk si, ṭap ṭuau chuan "insual lutuk, tumah hian ka duh zawngte ka ngainat zawng engmah in care ve ngai lo, in thu thu a min awm tir in tum vek," ka mittui lo luang chu ka hru tawk, ka bula mi inthiam loh lutuk leh sawi tur hrelo a ding ngawi ngul chu ka mittui kar aṭangin ka hmu phe ruai.



A taksa che hrut chu ka hre thei, thawk la vang vangin, " kan ngaituah che nih hi tinge i hriatthiam theih loh a, midang ang i ni ve lo , i hriselna a pan em em a , i naupan zual lai phei kha chuan damdawiin ah i awm tam zawk, in chhuak chiah in lut leh nghal, hei vang hi lawm tu pawh hian an ngaihtuah em em che," â min tih hmel lutuk chuan min en a, ka lung a awi thei chuang lo.


"Ka hre ve reng a lawm, ka ngaihdan te hi ngaichang ve se, fanu neih chhun leh naupang ber te ka ni ve a, ka rilru tur in dawn ve lo em nii?" Ka duh aiin ka ṭawng ring, khawlaiah awm mah ila ring tak pawn ṭawng mah ila tumah in an hre thei lo, ka dang ring thup nan ruah a sur tlat.



Ka mitah tak min en , rei ka en ngam hauh lo, "haw phawt ang , inlamah kan sawi leh dawn nia," chhan tinah pawh ka ngai lo,ka lung a la awi thei chuang lo.



Kan in kan thlen chuan, " Inthlak la kan inah lehkha kan zir dawn nia," ngawi reng chuan ka lut daih, muangchang deuh chuan ka inthlak a , ruah ka do vang nge ka taksa chu a chau hluah hluah, ka hnar a pingin ka hahchhiau nghal mawlh mawlh, min hmangaihtu ten ruah do an phal loh chhan chu ka hrethiam ta uar uar mai.



Ka che reng reng chu ka zawi ngawih ngawih, ka awm a nuam meuh lo, Rema chu an inah a haw tawh ang chu tih laiin long chair ah a lo ṭhu ta va mai, ka inthiam loh ru kher mai.



"Ti nge i va dang ve, i awm dan a dik miah lo," tih leh ka pang rawn deh a rual nghal, a mitmeng ah chuan mangan na ka hmu thei, eng emaw hlekah ka damlo nghal mai ṭhin a , ruah do a taksa tih vawh hi ka tan chuan túr hlauhawm tak ang a ni, vawiin pawh khan thuawih loin ruah do nuam ka tih vangin ka do kha nia.



"Ka thusawi i awih duh lo a , kha i khua a sik a nih kha, lo kal rawh damdawi ei la in mu lum ang che, tui vawt te kha i lo khawih leh a nge," a che zung zung chu thuawih hmel fahran chuan ka thlir mawl tawp, high school rap ve tawh ah chuan kei aia mawl hi a an awm tawh lo ang, ka ngaihtuahna naupang chhia lutuk te, ka mize ho te te te hi kei pawn insiam ṭhat ve ka duh, mahse, nun inthlak hlauh hi chu a har ka ti. Hmanlai kan pi leh pu te chuan "nungchang chhia leh suahsual hi chu sim theih a ni a, hmelchhiat erawh chu sim theih a ni lo ve," an lo tih ṭhin hi dik ka ti, hun tlem azawng ka mamawh mai chauh a ni.



"Kha le, ei tawh rawh, damdawiin luh ngai lo turin mahni inenkawl thei rual i ni tawh a nia, kan thusawi hi ngaihtuah ngun hle rawh, mahni duh zawng tih rikngawt tur a ni ngai lo, nangmah hi inngaihtuah em em la a ni mai," damdawi lo lek va pah chuan a ti leh a , rang lutukin ka ban vat, "good fel lutuk, i hmel pawh a ṭha leh sawt e," a nui deuh suk, a mi zilh na vang chuan ka inthlahrung zo vek.



"Lo mu la, ka va inthlak zawk a nga hetah lehkha zir turin ka lo kal leh ang," a kal liam tur chu ka en zui reng, kei aiin kum 5 in a upa a, a rilru puitling bik lutuk te hi a mak ka ti ṭhin, kan school bul lawkah an school a awm vang hian kan kal rualin kan haw rual leh ṭhin.



Ka mu mai mai kha ka lo muhil a ni ngei ang, ṭawng ri nak nak te chu ka mang hriat ruai ruai, ka thawk zawng chuan ka kawchhungte chu a sa huam huam a, in bengkang ka tum uk a , ka beidawng nghal, ka chau ta lutuk chu a ngaihna reng ka hre lo.


Ka tui a hal huam huam reng a , che turin chakna ka nei lo, ṭawng chhuah tumin ka hmui ka chet a , ka ṭawng ri chu kei ngei pawn ka hre lo, chawp leh chilhin vawt in min tuam nghal, ka tha te chu a khur hlawk hlawk mai, "Bawih , e he! I khawsik chu a sang hle a nih hi, Nute," ṭawngri te chu fiah lo ruaiin ka hria, tu tu nge maw ni ka roomah an lo lut a , ka taksa an khawih pawh ka hria , ka che thei si lo a ka dawh mawl tawp.


Engtin nge min sawngbawl pawh ka hre lo, rei vak lo hnu chuan ka kut ṭang pawh ka chet thei tawh, ka taksa zawi lutuk te chu a reh tial tial; mahse, ka mit ka meng thei lo, mutchhuakin min tuam leh tawh.



Ka mangrama ka cheng dawn lai mek chuan, "vawiin khan ruah hmi tla kha a do a , ka thiamloh ani, ka ngaihsak tawk lo a," inthiam loh tak a ti tu vang chuan ka harh chhuak zawk.



Ka mit ka men rual chuan ka nu leh pa leh Rema chuan min lo en rual ṭhap mai, ka en tawn chhen hlawm a , "a thiam loh a ni lo," ri chang chang chuan ka ti a , an hriatthiam loh hmel kher mai.



Ka nu lo che chhuakin " Nunu.. enge i duh? Mamawh i nei em ni? " duat takin min chul a , lu thing vakin ṭawng kan tum leh a ka dang a ro hulh mai, ka khuh zui bawrh bawrh , Rema chuan tui a lo ban vut, ka lem nghal pawp pawp.



"Muang changin in rawh i hak palh a nge," ka nu hi chuan min ngaihtuah thei a sin, a fanu neih chhun ka ni a , ka duh mamawh engkim min pein, ka mamawh ka sawi kher loh pawh hian min tih sak zung zung zel, ka tan chuan ka engkim ka neih chhun an ni a , ka unaute pawh hian min ngaihsak em em ṭhin.



Ka duh vang renga ruah do ka ni tih ka sawi chuan min hauh hrep ka rin tehreng nen ka pa chuan dam diai hian ka tan a pawi zia min hrilh a, ka zawm ngei theih nan uar takin min hrilh mawlh mawlh reng.



Kei pawhin zawm ngei ka tum bawk, na neih hi ka peih tawh lo, damdawiin ngat phei hi chu ka ngaina lo bur, Rema sawi ang khan damdawiin leh kan in hi kan vei tawn chhen ṭhin. Ka damdawi ei ruah na zawng zawng pawh hi chhiar dawn ila chhiar sen rual a ni tawh lo ang.



Ka bula inthiam loh tak a ding reng chu a inthiam loh em vangin ka ko a, ka bul a lo thlen chuan "inthiam loh duh suh, ka thiam loh a nia, ka luhlul lutuk hi sim vat a ngai a ni ti rawh," ka nuih seih, min nuih let ve sak;mahse, a mitmengah chuan a la inthiam loh tho a ni tih chu ka hmu thei.



Damlo awmpui tu ber hi a hmel en mai chuan damlo zawk te pawh a ang hialin ka hria , hlim hmel pu reng ṭhin khan a hlim hmel te chu khawiah nge a awm ni , mi hlimthei tak a nih na hmuh tur reng a awm lo, nui lui ve ngial mahse , a der chu hai rual a ni lo.



Tlangval in la pa ve tak, en ngai en ngar ngar chu inhmeh lo ka ti rilru viau, enge a ngaihtuah lah chu ka hre thei der si lo, kei pawh hi mi ngaihtuahna hriat tum in ka lo buai ve em em chu nia.



"Nunu... thil hrilh tur che ka nei a , min chhan kher pawh ka phut hran lo," a thaw chhuak hawk, eng emaw rilru kam tu a nei tih chu ka hai bik hauh lo, "e nge han sawi la," a mitah tak ka en, ani pawn min en ve run. " Ih maw , ka duh lutuk che a , unau ang mai chuan ka hmangaih tawh lo che , a aia thukin a ni ka hmangaih tawh che, min duh ve em tih chu ka hre hauhlo , min duh tur pawn ka nawr lui hek lo che," ka rinloh lam daih a sawi vang chuan ka ang phiau mai, he mipa pa lutuk hian min duh a nih chu awih tur nge awih loh tur pawh ka hre thiam lo.



Unau , thisen zawm pawh ni lo inchhungkhat tho si te pawh inngaizawng/ innei an awm nual tho, mahse, ka duh ve em tih ka hre lo , a bula awm a nuamin a hahdam thlak tih chu ka hre tho, ka unaute tih lohah chuan ka mipa ngainat tak a ni.



"Ih, ih ih ka hre bik lo, engmah hi ka hrethiam lo," ka ti bah nuai, ka ngaihtuahna a fim thei lo, unau ang a ka en in min duh thu a sawi a mak tih lohna chi ziazâng a nilo.



Ka unaupa ang bakin ka en thei lo , ngaihzawng nei rual ka niin ka in hre thei tlat lo, ani chu kei aiin a upa daih a , India danah puitling a ni tawh a, kei chu naupang mai ka ni.



Nuam lo a tih hmel kher mai, kei ngei pawh hian tunhma ang khan chuan ka ngam tawh kher lo ang, a sawi zawh rual te khan nuam tih lohna ka nei nghal der chu nia.



"Theihnghilh daih rawh, ka thil sawi kha sawi lo angah ngai mai rawh," ka mitah chiang takin a en reng a , engemaw ti zawng takin ka zam riau a nih chu a zahthlak zawk.



Zanriah eia a haw tih loh chu kan inah a awm chawt, ka damloh hi chuan min ngaihsak em em a, tlaivar pui ka ngaih pawn a la inpe zo tho, unau hmeichhia nei ve ta lo chu mipa karah ka seilian a, an nundan copy ka nei nual bawk.



*****************

Sofa a ka ṭhu kha ka lo muhil a ni ngei ang, ka harh leh meuh chuan ruah pawh a bang fel der tawh, ka ngaihtuahna ni loin ka mangramah ka nunhlui ngaihawm tak kha ka lo mangphan ta si a , ui tak chungin inhnuai lam ka pan thla nghal a.



"Nunu... i lo harh tawh a ni maw? Na i nei em ni? " ngun lutuk a ka nuin min en reng chuan ka ṭha tih nan ka nuih seih a, nula ka ni tawh chung pawh hian an fanu ka nih angin min duatin min dimdawi em em a , ka tan ahriat nuam loh turin ṭawngkam vin an hmang ngai lo.



Ka pian hlim aṭang tun thleng hian ka hrisel loin ka bawrhsawm em em a , min enkawl hi nuam an ti emaw tih tur hian hlim hmel min la hmuh hram hram ṭhin, min ning hmel pawh a tu amah hian an pu ngai lo, hei hi ni ka chhungte chung a ka lawmna em em chu ni.



"Naktuk aṭang class i kal leh tawh dawn sia, i huphurh em?" In a tawm reng hi ka ning lutuk, tih tur awm bawk si lo chutah ka tih ve theih reng lah tih an phal si lo, "ka phur lutuk, ṭhian thar te ka nei a nga, a nuam ngawt ang," ka duhthusam mai a ni ang tih ka hlau.



Ka natna vangin kum hnih dawn ka chawl tawh, ka chhungte chuan min ngaihtuah em vangin kal zawm tawh lo turin min ti a; mahse , tun hma aṭanga ka lo dream ve ṭhin collage life hi tem ve ka chak a , ka pa pawn min hrethiam takin " eng em a ti bik lo ang, damdawi a ei ṭha anga, thu a awih bawk dawn a lawm, fanu fel tak a nih hi," tiin ka lam a ṭang ve bawk.



Ka nu'n phal lo viau mahse in a awm chawt chawt a ngaihtuahna kawm vak vak a phal bawk si lohah chuan a remti ve ta nge nge.



Ka nu che mawlh mawlh chu au chulin "Nu bazar ila, thawmhnaw simple deuh deuh ka duh dawn a , tuna mi ho hi chu duh aiin a changkang mah mah ," ka tih chuan " ka thil tih lai a lawklawh lutuk, lo va insiam sa la , kan kal vat dawn nia," a kuta lei kai chu ka hmuh theih turin a lo phar chhuak hliai a . Pangpang hi a ngaina ve a, kan varenda khat vekin a pot a tlar dul mai.



Ka sam chu chhipah ṭawn kawh vahin ka hmai chu cream ka hnawih tawp, nula ve tawh si hi make up ka hmang ngai lo, ka thiam lo bawk, mite nalh tak a an inchei ka hmuh te hian ka awt ve thei lutuk; mahse, make up lam hi ka hre hlawl si lo.



Insiam vak ka ngaih loh vangin sofa a ṭhu nuai chuan ka nu hman hun ka nghak ta ran a, rin aiin a rei zek leh nghal, a tawp a tawpah chuan a hman ve thei hram, engmah sawi lem lo chuan kan inzui hnak hnak a .



Thawmhnaw dawr lian deuh ber leh nei ṭha ber Nu Sangpui te dawr chu kan pan ding nghal, ka duh changkang em em lo a , simple thei ang ber hi ka duh ṭhin; mahse, ka duh khirh ve thung.



Ka duh tur a arin apiang chu a lo thlur chhuak nalh nalh a, ka mit a la ve thei ṭhak lo, " ka en den den a nge, " ka tih chuan Nu Sangpuii nen an in kawm ta daih a , "ani hi chu a duh changkang vak lo na a, a duh khirh," tia a sawi pawh chu ka hre hman , ngaihsak duh loin ka en lai chu uluk takin ka en mial mial.



A tawp a tawpah chuan ka duh ang chi sawm ( 10 ) ka thlang chhuak nalh mai, "kha tiang i duh tih hria ilang chuan a rawng dang pawh a la awm nual a sin," dawr nghaktu pakhat chuan a lo ti zung zung a .



Mite angin thawmhnaw kan taksa ti lang tam thei ang chi hi ka ngai na ve ngai lo, tlem a lian lampang deuh si hmuh nuam em em tho si ang hi ka duh a , rin ai takin ka inhmeh thei viau.



Car a kan luh hnu chuan " kha tiang kha maw i duh a , i nu hian ka hrechiang ve tawk che emaw ka in ti a, ka lo hrechiang tawp lo mai che," ka nu thusawi vang chuan ka nui chhuak hak.



"Tinge le ka dangdai em em mai le ti raw? Arem rem hi han ha ve mai ila i tan phur rit siam tu ka ni lo mai tur a nia," ka nui seih, "chutiang zawngin ka sawi lo,ka hrechiang viau ah che ka lo in ngai a , i duh zawng ngainat zawng hre ber tu ah ka in ngaih vanga nia," ka rilru tih nat hlau zet chuan a ti leh zung zung.



In kan thlen chuan ka pa pawh a lo haw der tawh, ka pa ka hmuh rual chuan, " pa naktukah class ka ṭan tawh dawn sia kan bazar a, " nui sang hian ka ti a , ka hlim zia ka hmelah a hmu chiang ngawtin ka ring, "khawi maw in thil lei chu ka va hmu lo ve," ka inkhai bawr lem loh vangin a hmu thei lo a ni ngei ang, ka thil khai lai lek va pah chuan " hei hi nia , en chhin rawh aw," phur deuh chuan ka ti sar sar.



A fanu neih chhun hlimna min ṭawmpuiin kan thil lei chu a en ve hlawm a, ka nu ang lo takin " i inhmeh ngawt ang, i thlang thiam hle mai," a ti a, ka lawm tawk a tling em em.



Zan ka mu chu ka muhil thei ṭhak lo, ka helhhawlh vang nge ka harh tulh tulh mai, mutthilh theih loh tak rau rauah tiin Rempuia ka ngaihtuah ta daih a , ka suangtuahna leh ka mumangah bak ka ta a ni ve ngai lo a , a taka thleng tur phei chuan ka suangtuah ngam lo.



Mipa dang tam tak pawn min hél ve fo, an hlawhchham leh nge nge ṭhin, ka ta ni lo mahse a tan tiin ka rinawm ve em em a, ani zawng min ngaihtuah ve loin a nun hlim takin a chen awm sia, ka ngai a ni, nitin mai hian ka ngaizual ṭhin.



"First dayah tlai chu a ṭha lo, i zawngchhang palh ang, lo tho vat teh," U Mama'n a tih chuan rang lutukin ka inperh tho vat, dar zat ka en chuan duh aiin ka tho tlai, ka nuin chaw ei min siam a , "Mama scooty ka hmang dawn aw," inring tawk zet a ka tih chuan min rin loh hmel kher a sin.



"Va fimkhur la aw, chak deuh te khan i lo khalh ve a nge, ka thlah zawk mai dawn che emaw ni zawk le?" Min ring lo lutuk chu ka nuih a ti za zawk, " kan zir nasa bawk a ka thiam tawh lutuk a lawm, min ngaihtuah suh," ka ti vei rawk a , lirthei hi ka lawm em em lo nain vawiin chu ka tlai deuh vangin ka la chhuak ve chauh zawk.


" Nute... va fimkhur la aw, ka ngaihtuah e mai che," min ngaihtuah leh lutuk ṭhin a, ngaihtuahawm pawh ka ni tawh tawp si lo.


College gate chu ral khat aṭang ka thlir vang vang a, ka lo chak ve em em ṭhin, ka hrisel loh em vanga ka chhungten ka theih an rin loh kha tunah chuan phalsak ka ni tawh a, ka va hlim tak.


Hma lam pan chuan ka inkhalh phei ve zel a, ka inrin hma hauhin tu emaw ni hi ka su thlu tawp, ka hlauthawng lutuk chu rang lutukin ka pan nghal thuai.



A bul ka thlen chuan, " ka tihpalh lutuk, a na viau em? Hospitalah kal ang, " ka ti chul a, min vin let hrep ka rin tehreng nen awki dam diai hian, " a ho lutuk, kei pawh ka kalna ka lo en lo a," a rawn tih meuh chuan mak ka ti , a hmel en ringawt pawh hian mi rilru ṭha tak a ni tih lah chiang reng.



Ka fimkhur loh a lêi ah ṭhian thar ka chhar phah ta hlauh mai, hmeichhia ṭhian ka kawm ngai lo ka tih tawh kha, ka vawikhatna tur a ni bawk nen rin aiin kan inkawm ngeih phian mai.


" Khawi vengah nge in awm a?" A mitmeng fiah kak mai chuan min en khiau a, kan awmna vel ka sawi chuan kan veng ṭhenawm lawkah an lo awm reng chu niin, nitin kalpui tur ka nei ringawt pawh chu ka lawm tawk em em ringawt tawh.



Nikhat ni pum chuan kan inbel chiang a, kan subject lak leh kan thil ngainat zawng chu a in ang fai ta ṭhak mai, ka tan a khuanu ruat a nih ka ring ve tawp.



Kan inan na tam tak zingah kan inan lo na chhete a lo langchhuak nawlh mai, ani chuan ngaihzawng nghet a nei a, kei chuan ngaihzawng tia sawi tur ka nei ve lo; mahse, tu emaw nghah chu ka nei, social media ka hmelhriat lem hlei lo a, ani pawn rualpawl nan tak a khawih ve .



Thla khat dawn class ka kal hnu chuan ka tlang nel ve tawh hle, ka chhungte pawn ka nun hlim zia an hmuh chuan an ngaih a ṭha ve em em a, chutih rualin Manuntei ka sut ṭhelh nawk pawh kha an bulah ka zep tlat, chuti lo chu min ngaihtuah leh lutuk anga, an tan buaina nih hi ka hlau.


" Nu , ka kal aw " kan in bye bye lauh lauh a.


Manuntei'n min lo call na a rei tawh bawk nen ka hmanhmawh tawh hle.


College life chu ka rin aiin a nuam, Manuntei hi awm lo ta se chuan a nuam kherin ka ring lo, kan inhriat hma khan ṭhian dang pawh a lo nei nual a, anni thlang loin kei min thlang mawlh hian mi ti lawm.


" I va rei ve, min kalsan daih emaw ka ti zawk a, " tiin ka banah vuanin taxi nghah pahin min kal pui dawr dawr a.



" Banah sawtah min kal pui teh, " ngen ngawl zet hian a ti reuh a, class a awm tawp ai chuan tiin ka remti ve mai bawk.


"Ka zun a chhuak lutuk, ka cheh dawn , wash room ah ka kal lawk ang, ka lo let leh vat ang," tiin hmanhmawh deuhin a pen hlawk hlawk a, a van hahthlak ṭhin tak, nula pasal nei ngam zán tawh tih atan chuan a atthlak viau in ka hria.


Ṭhian dang em em ka nei lem lo bawk a, ngawi rengin keimahin ka ṭhu a, kan piah lawk a mite thu sawi chuan ka beng a verh zar mai, " ṭhian vek emaw an nih ka tia, an ṭhiannu chunga an rilru put hmang chu a chhe hle mai, hetiang tak hian a ni maw mihring rilru hi a lo chhiat theih, " ka tih rilruk mek lai chuan Manuntei pawh a lo let ve nghal.



A ṭhian ten a chungchang an sawi chu hre lem hlei loin ṭha deuh deuh chuan a be siam siam a, ka lo hah hluah hlauh tawh. Anni lah chuan a der tih hriat miah lohin ṭha deuh chuan an be leh ta nghal a, hrilh mai ka duh a chutih rualin tun hnai mai a hmelhriat thar thusawi ai chuan kum tam tak a lo kawm tawh te thusawi chu a awih ngei dawn a, inrawlh lo a ngawih bo pui mai ka rilruk ta zawk.



Thui pawh kan kal hma chuan, " nangmah ka sawm nachhan che chu ka chhungte hian ka ngaihzawng hi min duhpui lo a, kha leh chen ka lo kawp tawh chu nikhat thil thuah ka ṭhen thut thei bik si lo a, ti hian a rukin kan in hmu ṭhin a, min en thla tu an dah vangin lawm nangmah kher ka sawm che, nang chu an ring em em che a ," a rawn ti ta chiah mai, ka thup bo ang ka tih sawina hun remchang tak a ni.


" I sawi takah chuan ngaihloh lamah ngai ta lo la , i ṭhiante ho hi engmah hrilh lo la ka duh, an thusawi ka hre ru a, inveng tlat rawh," a bak a thui sawi ka duh rualin mi chanchin han sawi vak hi ka duh lo a, a tawi zawngin ka hrilh ta mai.


" Amak ka ti e mai; mahse, ka rinhlelh na a rei tawh mai, nang i awm tho a, kawm tam lo ila ṭha a ni mai," a ti ta diam mai, a ngai kawi lo chu ka lawm tak zet.


A bialpa nen an inhmuh chhung chu ka nghak char char a, tiang reng reng hian kar kan tluan ṭhak ṭhin, a nuam ka lo ti ve em em a chutih rualin amah kha ka hrechhuak leh ṭhin.


Ani chu a hmangaih ber a chhungten duh lo mahse, a ruk talin a la hmu thei a, kei chu a ngaihtuahna kil khatah pawh hmun ka chang ve hian ka inring lo, ka tan erawh ka thinlung location a ni


" Ngaihzawng pakhat mah i la nei lo maw? A mak ka ti bang thei lo ," ka mitah tak min en ran a, dawt ka sawi thei si lo, a bulah chuan ka inpuang fai ta vek mai.


" A awmna chin pawh ka hre lo, kha tih lai khan ka la naupang ve em a, ngaihzawng neih nachang pawh ka hre lo, ka duh tih ka hriat chhuah meuh chuan ani chu hmundangah a awm daih tawh, apa lah an transfer daih sia, ka chhungte nen lah an inbe pawp tawh ngai si lo," beidawng taka ka tih chuan min khawngaih hmel hle.


" I lungngai hma e mai, a hming i hriat chuan phone a awm a lawm, kan zawng chhuak em em ang, " tiin a phone a lo lek kang va va a.


" Engtin nge kan zawn chhuah ang? " Ka bo viau mai, " instagram hi a tam zawkin an khawih fur a, a khawih ve em em ang, ig install rawh ," a tih zawm zat a, duh lo eng ang mahila ka hmangaih zawn chhuah nan chuan angai ve tlat sia, ka install ve ta nge nge.


Social media ka hmelhriat lem loh vangin engkim min tih sak vek a, ani ang ṭhian hi ka nei lo ang tih mawlh hi ni ka hlauh ni.


"Hei hi a ni em?" A ti deuh sek a, a hmingpui an lo tam phian bawk nen zawn chhung chu rei duh tak ani. " Ni lo , zawng duh tawh suh ," ka beidawng ti tih der, ani erawh beiseina nei tih hriat zet hian a phone a bih leh ngar ngar tawh.



Rei ngial a zawn hnu chuan a beidawn ve lo zarah kan hmu ta nge nge ; mahse, ka na ani, a hmeichhe thlalak pui hi tunge a nih ka hre tlat lo a, ṭap turin chakna ka nei lo, ka rilru erawh a na hle thung.



Class lak lai te chuan ka rilru kamtu lian tak vang chuan duh ang pawn ka in concentrate thei lo, ngaihtuahna nei lo ang mai chuan ka ṭhu mawl ve tawp.



Haw kawng te chu thui ta riauin ka hria, engkim mai hi mak ka ti vel vek tawh, mi tam tak rilru nat lai a an awm dan tur te chu ka feel pui vek thei tawh, ṭap chak si ṭap thei lo a ka awm hi ka chak loh vang a ni. Mi chak tak chu ni ilang chuan ka natna te hi ka ṭahpui anga , rei lo te ah a reh leh mai tur hi nia.


"Nute... i lo haw tawh maw? I nuam sam zân lo em ni ihmel a dáng riau ," ka chhungril lamna chu ka hmelah ka lo ti lang a ni ngei ang, na nei lo ang mai chuan phur na tel hauh loin ka nui chiam.



Min thlek leh vang vang ṭhin, a ngaih chu a la ṭha chuang miah lo.


Ka inthlak lai te chuan ka ti hlei thei meuh lo, tha ka nei lo reng reng , ka zawi ngawih ngawih a, raino an sawi ang mai ka ni.



Ka nawmsam loh em vangin inhnuai lamah pawh chhuk peih loin ka mu zal mai mai a, ka inngaihtuah lungpuam a, ka ṭah a chhuak leh ṭun tawh.


Zanriah ei dawn pawh chuan ka tho chhuak peih lo, "Nunu... chaw kan ei dawn i lo tho peih em?" A rawn ti lang lang a, ka lu na hi a puak keh thei dawn takngialin ka hria, ka taksa lah chu a na in a kham em em mai bawk si, kam let pawn ka chhang peih meuh lo.



Ka room kawngka pawn lam aṭang an lo sawi dawt dawt rual chuan ka harh nghal kawk mai, ka puan sin lai ka hlim rual rual chuan vawt ka tiin ka khur chhe lo chauh.


" Nute.. i enge na? " ka nuin min ngaihtuah hmel taka a tih chuan na em em sawi tur ka hre hauh lo, ka pang a lo dek a, "i khua a sik a nih hi, damdawi ei nghal rawh, i dam var tawh mai ang," ti eng ang mahse ka na hi nachhawkna mum engzah pawh ei ila a dam phah dawn lo nasa.



Ka nu thu ka hnial hreh em vangin a mawiah ka ei ve a, a chhawk pawh chu ka ring hran lo.


Dar 8 a pel fel awrh tihah Manuntei hnen aṭang phone call ka dawng a, " enge i tih a? " phur deuh chuan a lo ti sar sar a, " ka dam lo ," ka ti nghal thawr.


" I tan chanchin lawmawm em em ka nei, i damlo pawh kha damdawi ngai loin i dam var thei ang," a tih zawm zat a, eng thu tak ni ang maw?


" Sawi vat teh," damlo e ti lo chuan ka pawr hlar a, ani lah chu engah vak ngai lo tih hriat zet hian dam diaiin ," Rempuia bul a mi kha a cousin a nih kha, chuan ani chu tunah hian pastor a ni ṭep tawh, pastor nupui ni turin lo in ruahman lawk deuh rawh aw," kei aiin a hlim hmel zawk daih, ka thu hriat sual vangin ka na a, tu nen pawh thla chu la lo tehreng se a bialnu ni tur a ka lo ring ve ngawt kha ka tihsual lian ber a la ni hial ang.


Ka rilru natna min chhawk zângkhai thei turin eng emaw tak a sawi ka lo beisei réng a ni. Ka tun hun hman mek chu nuam tak a ni.



"Engtin nge i hriat a? I awm lo ang tih mawlh hi ni ka hlauh ni, nang ka lo tawng che hi khawvela hmeichhe vanneih ber ka ni hialin ka in hria," uar takin ka sawi a, ani erawh a chek hlak hlak thung.




Ka nu damdawi min pek ni lo ka dampui ta sia, a ruk tak chuan ka nuih a za zawk, kha thu ka hriat rual khan ka khawsik sang em em te kha a reh nghal duak a, na sawi tur pawh ka nei tawh lo, ka dam var mai.



Pastor nupui awmdan tur te ka ngaihtuah rauh rauh a, ka nui leh tawp zel, mipa inla pa ve chi tak mai kha a nia Pastor a han ni tur ka mitthla zawng ringawt pawh hian ka hmu pa hluah hluah tawh.



Zan lamah damloh vangin chaw ei peih lova mu hlawm reng zing a class kal tur a phur deuh tak a inhnuai lam ka pan chuan ka chhungten mak min ti ngei mai.


" Vawiin chu chawl rawh," an ti sek hlawm a, class kal ka phur zia hi hria se chuan min dan chu sawi loh min nawr liam nghalin a nia ka rin ni.



Manuntei nen inhmuh thuai thuai a, engtia han hre ta mai nge a nih zawh ka chak tawh tak zet, ka phur lutuk chu theihnghilh ka nei leh ṭhin, kan in chhung pawh vawi engzat chuang nge ka kal kual tawh pawh ka hre lo, keimah ka ang ta lo riauin ka inhre hial.


Phur em emin class ka kal ve kha nia, Manuntei a rai tih ka hriat meuh kha chuan mal tak leh khawhar takin ka nun ka hmang leh ngei dawn tih hrilh hranpa ngai loin ka hrethiam ve ta chiah, mahni tawk a rilru hah tawh tehreng nen ani lah chuan a chhungte hriat a hlauh thu a sawi ve sek bawk si, zahpui awm a intih zia nen lamin min hrilh a, ka ngaih dan dik tak ka hrilh hnu kha chuan tlemin a zia ve ta deuh.



Tunlaiah chuan sawn pai hi intihtheih nan tak an hmang tawh a, zah a hnekin in uanah an la deuh tlat a, tunhma ang in zahna leh mualphona tih te kha chu a chi bo in a bo vek tawh, miin an hre lo ang tih hlau ni awm fahranin an dul puar pungte chu mi hma hmaah an hlim tung zel a, an chhungte lahin an lo hlimpui em em mai sia, ani hi chu a chhungte vang pawh hian rai awm reng a ni, mifate erawh chu mipa an mamawh luatah indanna chang an hre lo a, an tum ruk leh anbeisei loh ang takin an lo rai ta ṭhin a, bakah hmeichhe zu in ching reng reng chu an hur a, an rai nghal mai ṭhin, kei ni ngat ilang chuan ka nu leh pa chu sawi loh, ka nuṭa te hian min vaw hlum duh hialin ka ring.


Thla khat dawn chu class a la kal peih a, chu thla khat chhung rei lo te ah chuan Rempuia a lo be fel vek hman kha mak ka ti, ani pawh man leh mual te inhlan felin Chhana te in lamah a awm tawh.


Ka ṭhian kawm berin pasal min neihsan takah chuan class kal nawmna a bo tial tial , chutih rualin ka hlim em em tho.



Mal viau e ti lo chuan ka nun afamkim ang lawi a, kum kha leh chen ka lo nghah ve ṭang ṭangna chuan rah duhawm tak a chhuah ta ngei a, Rempuia pawh vawiin hian Mizoram lam panin a lo thlawk haw mek.


Tunhma a ahmel kha tlemin paih ve mahse, hmangaihtu mit aṭang chuan a danglamna sawi tur vak a awm chuang lo.


Kan hma lawk a tlangval sang thlerh thlawrh, a taksa inphut mawi em em leh a pian rem zaih tur a a thawmhnaw inbel te leh sunglass vuah chung a mahni inringtawk tihhriat tak a lo pen pawk pawk chu a hmel ka hmuh rual khan Rempuia a ni tih ka hre nghal mai, mi lah chuan an en duh hrep leh nghal, ka awm hmun aṭang nuam ka lo tiin ka lo lawm ve em em ringawt.


Min hmu lo nge min kal pel nul nul a, a lam pan chuan chak deuh takin ka tlan ve lawp lawp a, ka la umpha lo zui.


Phone aṭang inbe fo mahila hmaichhan a han inbiak dawn meuh chuan ka zam ve hle.


"Rema" a kal chak em vangin ka um pha dawn lo a ka inhriat avangin ka au ta ringawt a, a lo lehhawi rang kher mai.



Ngun lutuk hian ka chhip aṭanga ka ke ler thleng chuan min en chhuak vek, a lungawi deuh nge a vei nuih suk a, ka thi dang lo chauh tawh.


" Nangmah hi maw Nunui chu," a ti thum dut a, "aw" tih nan ka bu zeuh a, mawi lutuk a lo nui in mi zawng zawng hmuh lai chuan min zahpui hauh loin min kuah vang vang a, mi zawng zawng mit chu keimahniah a fu ṭhap mai.



"Rempuia chu ka rin loh deuhin Pastor i ni tawh mai dawn sia, ka la awih thei hlawl lo," ka nu chuan a khat tawkin a lo ti leh ṭhin, engvang ngawtin nge maw a lo rin loh vei ni, a hmel leh a mizia zawng zawng nen hian a inrem tehreng nen.



" Ka nih tum leh ka chak em em Doctor ka ni thei dawn lo tih ka hriat khan ka thinrim in ka hrilhhai lutuk, amaherawh chu ka nu leh pa ten ka pianhlim a Pathian hmaa Pastor tur a min lo hlan takah chuan ka hnial thei si lo a, bakah Pathianah chauh hian hlimna dik tak a awm tih nen lam ka hriatchhuah phah a, ka inchhir hauh lo," a aw (voice) pa lutuk a a tih chuan ka lo amen nghal vek.


A ṭawngkam chhuak tinah Pathian hming a lam deuh reng a, a der ni lo a, a tak ngei a nih tih ka hriat phei hi chuan ka lo nghak ta kha ka tifuh ka ti tulh tulh tawh.



Sum tam tak lalut lo mahila Pathian neitu Pathian mihriat kan nih chuan engmah thlakchham kan nei ngai dawn si lo, a thutiam a dingnghet tlat ṭhin a ni a, a fate hi hrehawmin min awm tir hauh lo ang.



Ka nu leh pa ten kan inngaizawng tih an hriat chuan makpa atan ani aia ṭha an awm loh tur thu an saei chamchi a, kei aiin a duh hmel zawk tawh.


A lo haw aṭang kan in lamah a tal tam zawk a, ani pawh a tlangnel nghal thuai.


Karkhat ṭha nelh nawlh chauh a la awm tihah Lawngtlai Chanmari a Pro Pastor tur a ni tih min hrilh ta chiah chu zui ve mai ka duh rum rum, chu zawng thil tih chi ni nghal lo chuan.




"Rei a ni dawn hleinem, kum kha leh chen min lo nghak thei a ni lawm ni, rei lo te nghah leh pawh chu i tan a harsa lo ang, ka lo let leh hun chuan a rang thei ang berin kan inneih vat dawn nia," tiin min hnem ve bawk mahse nikhat lek pawh hi kum tam ka lo nghah ai khan a rei zawk ka la ring fan.


I then veleh min lo be nghal ang che, a remchan chuan chanchin min lo hrilh zel thei la ka ti, khawkar kawng a hla tham ve sia, ka ngaihtuah riau che," ka tih chuan a nui deuh suk a, ngaihtuahawm a nih loh thu leh hun awl a neih a piang a min lo biak tur thu sawiin a tlan liam nghal a.




A kal chiah chu ka ruak ta huaiin ka hria, kan awm dun ve thei chiah a, kan inṭhen hran leh ngai ta mai si, ka lung a leng leh ngawt ang.


"Aw, ka lungdi i zun ngai reng reng hian maw, ni chhun zan awmkhawharin ka hmang ral ṭhin, lenna khuahmun loh hi zawng a pawi a ni, tumah reng hian ka chan min dawn pui si lo" Lalngengpui hla ka ngaihthlak lai mek chuan ka phone a lo ri ta chiah a, amah a nih tawh ngei ka ring.


Rang lutukin ka ban nghal thuai a Manuntei zawk chu lo niin, " aw, Hello," ka ti nghal thuai a, nidangah a reh theih tehreng nen vawiin ni berkhera min lo bia chu mak ka ti ve deuh.


" Nunui.... ka rilru a hah e," a rawn ti hliai a, a awki aṭang pawh chuan a rilru hah zia ka hrethiam nghal, " eng lam nge a? I rilru hahna te chu up bet mai loin min han hrilh vek teh, kan sawichhuah hian kan thawl huai ṭhin a nia," ka ti ta duah a, eng tak chu ni ang maw?


"Kan pa hi nia," a chawl dat a, " engtin nge a awm a? A damlo em ni?" Ka ti nghal zung zung a, ani lah chuan sawi zawm ta mai loin rilru na tih hriat zet hian a insut feih feih bawk si, mahni lo mah a lunglen lai lai a, tiang a a awm thut chu awm dan tur ka hre lo.


" Ngaihzawng a neiin ka hria, zanah tlai tak takah a lo haw fo a, kei leh a fate tan hun a nei meuh tawh lo, zing lamah nise mi be ngai bawk si lo, ka rilru hi a hrehawm khawp mai," rilru na tak chung a a tih meuh chuan ka lo na veng veng.



Ngaihzawng in kawp san ang chi hi ka la tawn loh a ni nachungin ka ṭhian ṭha ber natna chuan min ti na a ni;mahse, a mit ngei a a hmu a nih loh chuan a pasal a ringhlel tur a ni lo, mi sawiah pawh buai tur a ni hek lo tih hi ka ngaihdan dik tak a nih thu nen lamin ka hrilh fai ta vek a, ani pawn zawn chhuah ngei a tum thu a sawi bawk.



Phone kan dah chiah chu call a lo lut leh nghal zat, ka chhan hma hma chuan, " ka thleng chiah," a rawn ti a, ka nuih seih.



Class kal e ti lo chuan ka rilruah Rempuia ngawt zuk awm pek a, enge kan zir tih pawh ka hrechang hauh lo leh nghal, ka bulah awm lo mahse ka suangtuahnaah erawh ka kiangah a awm reng thung.



"Ka rin aiin i thleng hma," tih te maiin ka chhang a, sawi tur hi ka van haichham ṭhin tak, "kawng a chhe em a , ka thleng har zawk a lawm, mizoram kawng chu a chhe lutuk a, ' kuva pawh ṭhial buai a ngai lo, hmawm tawp ila a chip nghal vek' an tia lawm" a tih chuan za lutuk hian ka nui a, ani pawh amah ang lo takin a nui ve huah huah mai.


Thlakhat a awm tling awrh tihah palai an lo tir ta mai, a ruka ka lo nghahhlelh em em ka sawichhuah ngam tak loh a tak ngei a lo thleng tur chuan min ti phur kher mai, awm dan tur pawh ka hre lo, ka nui leh tawp zel.



Palai vawithum an lo len naah kan inneih ni leh thla an ruat fel a, ka nu chuan ka birthday ni a inneih a rawt a, hla ka ti ngei mai, tunah August thla a ni a, November 19 ah daih innei tur chuan hla ka ti ngawih ngawih; mahse, ka thu a ni ve si lo a.



Chutia hlim em em a ka awm lai chuan ka hlimna belhchhah turin Manuntei birthday a lo ni leh zel a; mahse, Rempuia lo haw ni tur a nih vangin ka kal thei dawn ta si lo a, ka inthiam loh kher mai.


Nilengin kan in leh a vel tih fai nan hun ka hmang a, ka chawlh kar lakah Manuntei leh Rempuia ka biak chhawk zak zak mai, vawiin chu keima tawkah ka thawk nasa ve hle in ka hria, ka pa pawn, " i pasal nei tur hi i phur riau mai, i hriselna te pawh a ṭha sawt sawtin ka hria," tiin min fiam leh zeuh ṭhin.



Ka chhungte lah chu an inbuatsaih nasa hlawm a, engkim mai chu ka ngaihtuah ngai loin an tifel vek, ka tan hian an hlu ngawih ngawih.



"Nunu.... i hman dawn tawh em? Hei a lo thlen a hun tawh a nia," U Mama min ko na pawh ka chhang ṭha hman meuh lo, ka hak tur mawlh mai chu ni ka buai na, a mit hmuh a lan mawi loh ka hlau a, a nalh thei ang ber a inchei ve ka duh a ni.



Ka kawr hman thiam ber ka ha leh tawp a, tlemin make up ka hmang ve a, ka confi leh em em mai ni.



"Ka rei lo ti raw?" Zam hauh lo a ka tih chuan U Mama chu a mengrang nasa tawh mai, ka nuih za bawk si chu nui ngam chiah si lo hian ka awm.



Kan thlen dawn a ruaihah ka phone ka ken theihnghilh tih ka hre chhuak ve chiah, ka haihawt ta lutuk te hi mak ka ti zawk, ka phur lutuk helhhawlh vang a nih ka ring thul , hmangaihna zet hi chu a lo thawk na ve hle tih ka hrethiam ta uar mai.


Ka nghah na tur hmun ka hrilh tawh vangin inbe nawn kher lo mahila a hriat ka ring ve tawp. Ka rin ang chiahin a lo la hria, engkhaw sawi set set lo chuan dinner kan ei ma tur hmun ka pan ding nghal.


Hma lam a bih ngar ngar a, keiin amah ka en ve reng thung.


"Ṭha min va ti awm ve ," a tih chuan ka hawi sawn nghal vat, en laih ka tum tehreng nen keimah zawk ka lai chhe der chu nia, zei tak a awm leh duh ber te bula confi tak a awm hi thil awl ai tak chu a ni lo tawp mai.


Kan pahnih chauh a hun ka hman vawikhat na a ni bawk nen nuam ka tiin ka hlim hle, "engtik lai khan nge min lo duh ve reng reng a, chhan harsa i tih leh min chhang buai lo mai rawh," a ti leh ang lawi a, "chhanna a beisei vak chuang lo a" tiin ngawih bo pui mai ka tum uk a, thil ni theiin ka hre si lo, ka chhang leh ta zawk a.



Ka ṭawngkam thiamna zawng zawmg sawmkhawmin ka hrilh ve ngial a, ka ngaituah let hian ka nuih a za zawk, ṭawngka mai ni lo, kut nen ṭangkawp a ka sawi mawlh kha ni nuihzatthlak, â min ti ve ngawt ang le.



"Nunu.... thawh a hun tawh e, pasal nei mai tawh tur i nih kha, mo thar tirha thawhtlai chu a fuh lo ang, thawhhmat zir rawh," pawn lam aṭanga lo au thawm chu ka bengah a lut a lehlamah ka chhuah tir leh daih.


Thawhhmat te hi ka duh ve ṭhin, ka tum nasat poh leh ka tho tlai ting a ni ringawt.



Tukṭhuan ei lai chuan ka phone a lo ri a, "chaw ei lai a ni sia," tiin ka chhang duh mai lo a, a pawimawh deuh nge a lo ri nawn leh ṭhin, ka chaw ei lai dahin ka tho nghal vat a.



" U Chhana"n min lo bum reng a lawm, nizan khan a lo hruai haw, min chhuah tir a, ka fate hruai a phal bawk si lo a, ka rilrua na lutuk, ka nu leh pa te thu ka lo awih lo kha ka inchhir lutuk," a insut feih feih a, Chhana mizia inthlak ta thut chu mak ka ti, ka khawngaih bawk si, mi hnem thiam tak nih ka chak kher mai.



"Chhunah ka lo leng ang, i thiam loh a ni lo a, lo inpuh leh ringawt suh aw, kan sawi ṭha dawn nia," tia dah mai ka tum chu min rawn ṭah khum chiam a, mittui pawn ve tak ka ni bawk nen ka mittui a lo tling leh pam tawh.



"Amah tak hi chu neih let leh ka in beisei tawh lo; mahse, ka fate kha, nuhrawn an hrawn tur hi ka ngaingam lo a ni," a ti chuai raih, ka khawngaih zia hi ka sawi chhuak thiam lo mai zawk a ni.



Nu leh pa ten an remtih loh chung kan duh a kan hmangaih hle a nih pawn neih luih loh hi a fin thlak ber, kan induhin kan inhmangaih hle a nih pawn kan lei Pathian hmuh theih te thuawih tluk a hlu hi a awn lo.


2 Month later


Ka pual liau liau a dar ri turin hun tlem te chauh a awm tawh, hmeichhia tu te pawh nise an hmangaih ber nen a pumkhat an nih ni leh an pual a biak in dar rik ni tluk a ni hlimawm hi a awm lo.



Rempuia ta ka ni mai tawh tur chu ka awih lo lek lek ṭhin, ka mumang, ka ṭhanharh rual a engkim bo nghal vek ang kha a nih ka hlauh, ka suangtuahnaah chauh ka ta ni ve thei ṭhin ka damchhung a ka ta a ni mai tawh tur hi mangram mai chauh ni tur chuan a uihawm em bawk a ni.


Biak in dar ri chu ka bengah chuan a ri ring ṭha kher mai, dar ri ka hriat tawh a mawi ber a ni hialin ka hria. Mipui lo kal khawm lah chu ka beisei ai daihin an tam leh nghal, mifel , mite fak rawn ni lem si loah chuan ka pasal neih ni tluk a mi an tam hi ka la hre lo.



U Mama'n biak in chhungah min kai lutin min vawnna ka kut chu muangchanga thlahin ka hma a Pastor lo ding chu a vawn tir a, thinphu a rang duh kher mai.




Pastorin min invawn tir zawh chuan thlalakna te kan nei a, ka hlim tluk zetin ka lung a chhia a ni.

********************************************

Zing ka tho chu ka tho fuh zan lo mai, ka ni chiai chiai a, luhai a tlu mai tur angin ka awm, ka chhungte ho chu an buai buaiin an buai leh nak nak hlawm tawhin ka ring, ka thawh tlai em vangin ka pasal awmna pawh ka hre mai lo.


Chechang lo a rei fe ka awm hnu chuan ka pum a rawn na vak a, ka tui bawm a keh nghal, ka hlauthawng lutuk chu Rempuia ka au chul a, ani pawh rang takin a lo thleng nghal.



Ka tui bawm keh chu a lo hrethiam lo nge, kei aiin a hlauthawng zawk a, ka nu te a au chul mai, tuk dang ang lo takin zingkarah thawm kan ngah hle.



"Ka nu... Bawihi hian nau a vei dawnin ka hria, driver lo ko la , kan lo chhuk thla nghal ang," ka pasal phili buai nuai chu hmuh a nuam ngei mai, tianga min ngaihtuah tak a a awm hian nuam ka tiin ka hlim em em a, ka na ka hrechang tawh lo.


Hospital kan thlen hnu chuan muangchang loin nau neihna roomah min nawr lut nghal a, rei vak loah ka nei nghal mai. Ka taksa a chau tawngkhawng bawk nen engmah ka hre zui tawh lo.



Ṭawng ri nak nak thawmah ka harh hlawl a, ka chhungte an lo kim ṭhap mai, an hmel ah chuan hlimna ka hmu thei.



"Nute....mipa i nei a sin, fa tir ah chuan mipa ka duh in ti sia, in dilna chhanin a awm e," ka nu ( pasal nu ) thusawi vang chuan thei leh thei loin ka nuih , Ṭawipui North 2 a kan awm lai a ni lo hlauh chu a vanneih thlak ka ti tak zet.


Ka fapa chu a pa in a lo pawm a, a ṭahbelh lo a ni ngei ang thuawih takin a awm reuh a, nupa nun ti nghet tu chu fate hi an ni reng a ni, ti hi chuan he khawvelah hian duh leh awh ka nei tawh bikin ka ring lo.


Mi hrang lutuk inah ka lawi lo bawk nen min duat em em vek a, tun hma aṭanga an fanu ang chiah a min entu te an ni bawk a, min duh tak zet a ni.


Ka fapa pawh thla 5 na a hmang ve mek a, a pu in a hming atan Jacob Malsawmzuala a phuah a, kan lungawi tlang hle.



Rempuia hian a fapa hi a atchilh tawp a, hun awl a neih chuan a awmpui deuh chawt zel.



Nupui fanau te hmangaih a ngaihsak em em rengtu Rempuia ang mipa hi he khawvelah hian an piang leh hian ka ring lo, Pathian a ring a, engkim mai hi a kutah a kawl tir vek zel, chu mi rah chu malsawmna chhiar sen loh kan dawng mawlh mawlh mai zawng a nih hi.



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)