DEEPNESS OF SKY Part-II

Story tawi te te emaw luanliamna emaw post na
Amber Bluefairy
Posts: 4
Joined: May 5th, 2022, 5:39 pm
Location: Aizawl

DEEPNESS OF SKY Part-II

Unread post by Amber Bluefairy » May 6th, 2022, 10:12 pm

PART-II
Kan pahnih chuan kan in nêl telh telh a,ka hmun nuam tih ber hmun reh tak,Library-ah chuan kan inhmu thin a.Class lak lai pawh nise min lo koh tawh chuan ka kal lo thei thin lo..
Ni khat chu Hiro chuan,"Vawiin chu class kallo ang" a ti a.Min pawt phar dawrh a,school atang chuan kan tlan chhuak a,a cycle chuan min phur a.
Kawngpui zawl nuam tak mai,thingkungten an hual velna hmunah chuan kan tlan a,thli a rawn thaw heuh heuh va,a cycle a khalh chak deuh chang chuan a kawngah chuan ka vuan vat zel a,ka pawmchilh a ni ber.Chu chu ani nuam tih em em a ni a,a khalh chak lui ngat zel .....

Luikamah chuan min hruai a,boruak a nuamin khua a thiang tha bawk si..
Boruak thiang chu kan han hip dun vang vang a ..
"He lai hmun hi nuam ka tihna ber hmun a nia,ka kal zing thei lutuk" a rawn ti .
Kei chuan "Chaw chhun tur lei ila,kal thin ila a that dawn hi" ka ti a ..

Kan in en a,kan lai deuh chu kan nui leh var var ringawt ....

Hiro chuan,"Kan inah kal ila,tumah an awm dawn lova"a ti a.
"Mahse,......a tha dawn a mi?" tia ka zawh chuan min chhan zawm tawh lovin ka banah chuan a vuan a,a cycle nen chuan an in lamah kan inkhalh phei nghal chawt a.

A room-ah chuan kan awm a,in tur leiin a chhuak a,a khumah chuan ka thu a,ka inthlahrun deuh avangin chhuatah chuan ka han thu leh ngial a..
Rei vak lovah chuan a lo lut a,"Drinks bak hi a awm lova"tih pahin min hawnsak a,a rawn thu ve nghal a..

Thu ho tete te sawia kan titi lai chuan kan thusawi chu kan tawp deuh chawt a,kan mit leh mit intawng chu lak sawn a har khawp..

Min rawn hnaih chilh deuh a,ka sam chu a chûl a,ka bengah a zep a,a hmui sexy tak pawh chuan ka hmui chu a dek teuh hle....ka mit chu ka chhing riai riai a,min rawn kiss ta mai ..
Kei chuan chhan let dantur pawh ka thiam lova,tumah ka la kiss ngai lova,Hiro hi ka bialpa hmasa ber a ni bawk a.Ka zeilo chu a ti viau maithei a ni..chhang let lo chuan ka dawh tawp ringawt a....

Hiro chuan zawi sap hian,"I vawikhatna a ni maw?" a rawn ti a..
Ka lu chu ka bu ringawt....

"Mika,ka hmangaih lutuk che tih hi hria la duh a,pangngai takin ka la sawi ngai lova,mahse tunah hian sawina hun tha ber a niin ka hria..ka hmangaih lutuk che,ka hmuh hmasak ber ni che atang khan...." a tih chuan a thu sawi lai chu ka lo pawt chat a..

"Kha mi ni khan i sual hmel ka ti lutuk a,ka hlau che alawm" ka han ti chu a nuih a za lutuk a,min en vung vung a,a nui leh ringawt zel mai a..

Ka kawngah chuan min rawn pawt hnai a,ka thin phu a rang sawt mai..
Ka chalah chuan a rawn fawp a,ka hmuiah chuan a rawn fawp zawm a,keipawh chuan tlem chuan a chhan lêt dan chu ka thiam ve deuh tawh....
Chumi ni chuan thil tam tak a thleng a ni....Hiro chu ka hmangaih êm a,inpumpek vek tawp mai chu pawi tihna ka neilo....



Tlai ni tla tur chuan min rawn chhun siar siar a,ka han harh chu Hiro chu ka bulah chuan tui takin alo la muhil a,a kamis pawh inkilh tha lo chuan a lo la awm....a mithmul sei sung chuan a muhil lai hmel chu a ti hmeltha zual takzet a ni..ka thawmhnaw chu ka inbel sawk sawk a,kal mai ka tum chuan Hiro chuan hmeichhe dang hmingin min rawn ko ta daih mai..
"Saki,i haw dawn mi?" a rawn ti zeuh a..

Ka rilru chu a hnual hle...ka haw kawngah chuan min rawn text a,
"Ka muhil tui lutuk a,in in thlenga ka thlah loh che avangin ka tihpalh aw"
tih hi min rawn thawn a..

Keichuan ka that thuin ka chhang a,kha hmeichhe hming Saki tih kha a bialnu hlui a nih leh nih loh chungchang zawh tuma ka type chu..ka inngaihtuah a,hmaichhanah ngei zawt ila a tha zawk ang tiin ka type sa chu ka clear leh ta zawk a..

Atuka school kan kal chuan Library ah a ngai tein kan inhmu leh a,ka insum theilo chuan Saki chu tunge a nih ka zawt ta tawp mai a,ani chuan a bialnu hlui a nih thu leh eng atan mah a tih tawhloh thuin min chhang a,ka rilru chu a dam leh huai mai ....ka chhip chu a rawn chul leh heuh heuh a,ka sam pawh a tiphir leh sung tawh....mahse chutia min tih thin chu nuam a tih ber a ni a,a nui hmel mawi lutuk chuan naupang thuawih tak ang maiin min awmtir a ni ber..

Hiro chu tupui thûk tak ang mai hi a ni a ..a hmangaihna tuipuiah chuan ka pil mek a,chhuah leh pawh ka duh tawh lo ....


Ni chu a liam zel a,ka awm a nuam lovin ka haihawt thut thut mai bawk si..zingkar luak chhuak te ka nei a,ka awmdan chu a mak takzet...ka la period leh lo re re bawk nen....
Khami nia thil thleng kha ka ngaihtuah a..

"Ehee,,kei hi ka rai em ni le?Hiro-a fa ka pai em ni?"

Chutia ka in ngaihtuah mek lai chuan ka nu chuan ka awm a nawmloh fo avang leh ka luak a chhuah fo avang chuan inentir turin min hruai a tum ta a.Duhlo eng ang mah ila min hruai luih dan tur a ngaihtuah tho tho dawn tih ka hriat avang chuan kal chu rem ka ti ta a..Lo rai ta ang pawh ni ila,ka nu chu thudik hrilhin naute chu pai tlang tho tho ka tum a ni..


Ka in rinhlelh ang ngei chuan ka lo rai a..nu ka ni ve tawh dawn a ni..

Doctor chuan ka nu hnena ka dinhmun a sawi mawlh mawlh lai chuan ka nu chu hamhaih vangin a mit meng pawh a phawk deuh hrû mai ....
Damdawi in atanga kan chhuah chuan ka nu chu a la ngawi reng a,ka sawi hun a nghak a ni ngei ang....

"Nu,naute hi....ihh....Hiro-a fa a nia.." ka tih chuan ka nu chuan mi a ang maiin min melh phawk deuh hru mai a..a nuamlo duh ang reng khawp mai.


"Naute pa chu hrilh nghal ang che,a mawhphurhna hi a la duhlo a nih chuan engtia awm lehzel tur nge tih chu a hriat mai ang" a han ti bul hmuk a..

Kei chuan engmah ka sawi ngam tawhlo ....

Hiro chu inhmuh puiah ka sawm a,Cafe-ah chuan a lo kal a,“Inthen lam a nih chuan ka ngaihthla peih miahlo ania,”a rawn ti nghal ringawt ....

Inthlahrung aw deuh hian,“Englo ania ....ihmaw..Hiro....i.....i fa ka pai a ni''tia ka han sawi chiah chuan Hiro chu a ngawi reng a,thudang sawi lovin Cafe atang chuan a chhuak ta nghal vang vang a..

A awmdan atang chuan naute hi a pawmlo a ni ngei ang..Ka rilru chu a na takzet..min lo hmangaih tak tak lo tihna em ni ang?Mahse,a rang teh thut lutuk a, a la thrawng deuh zawk a ni ang,ti tein ka inhnem a,a chang leh midang duh anei ni ah te ka ngai a,ka rilru chu a insual nasa hle....

Ka haw kawngah chuan chhungkaw duhawm tak tak ka hmu a,an hlim hmel takzet a ni..

Hiro chu a lo lang thut...naute lem hi a rawn lei a,"Hei hi pek che ka duh a,naute chu nei rawh..in pahnih in hlim takin ka siam ang che u,ka fa chu piantir ngei ngei rawh aw"a han ti chu ka hlim takzet,au vak mai te chak..

Mittui hnam pûr chuan ka hlim em avangin ka nui nasa takzet a ni....

Couple ring te chu chumi zanah chuan kan lei a,kan inbuntir a,hlim takin kan leng dun a,christmas boruak a hnaih avangin mi an tam a,chhungkuaa leng pawh hmuh tur an tam hle a..

Hiro chuan,“Nakumah chuan kan pathumin kan leng ve thei tawh ang"a han ti a..

"Pathum kan nih sa tawh reng hi maw le" ka tih chuan kan nui leh a ..
A kianga awm hi chu a hlimawmin a nuam thin takzet a ni.Kan inneih hunah phei chuan darkar tam zawk ka hmu thei tawh ang a,engkim kan tidun ang a,kan naute hian apa tiin fiahlo deuh maiin a ko ve dat dat ang a. tih te chu ka ngaihtuah a..

"Kan naute hian a pa a chhun vaih chuan ka thik ngawt ang"

"Ehee ..keichu a nu a chhun vaih chuan ka tap vak ang"

"Engvangin maw,hlim zawk tur ini sin,ka hmelthat êm hi" tiin kan inhnial fiam leh vak vak a..


Innei tur chuan kan nu leh pate hneh a,an phalna lak hmasak phawt a trul a .....Hiro pawh chuan a lan zahawm ve deuh theih nan a sam var chu a tihdum a ngaih phah ta a..

Mahse,ka Hiro chu a sam a dum chuan a puitlin hmel takzet....


A nu leh pate chu kan hmu hmasa a,ka chungchang chu eng teh ual an ngaihven lo,an duh ber chu Hiro hian tha takin min enkawl thei se,min tihlim reng thei dawn a nih phawt chuan an lo pawm em em zawk a..kan chhuah dawn chuan Hiro nu chuan scarf lum nuam tak mai hi min rawn awrhtir a,"Intilum tha rawh,khua a vawt tawh si,ka tupa pawhin vawt a tih phah dawn asin"a tih chuan a ngilnei ka ti takzet..Hiro hian a lo chhun a nih hi..


Ka nu leh pate hmu tura kan kal chuan keimah zawk hian ka huphurh lek lek a,ka pa hi a khirh ve deuh thin avangin alo pawm lovang tih chu ka hlau hle a.

Hiro chu coat suit nen smart zaih hian a inthuam a,kan in kan luh dawnah chuan a zam ve hle a nih tih chu a thawk hluai dan atang chuan a hriat hle a..

Ka pa chuan a hmel chu nêl awm loh zet hian a lantir a,ka nu pawh chu a hmel a lo rum deuh rût mai....

"Naute hi engtia enkawl nge in tum a?" tiin ka nu chuan a zawt a.

Hiro chuan a zam hmel chu thup lui hram hram tih hriat tak hian hnuai lam a melh lai chu a rawn dak chhuak a,inrintawk hmel takin,"School ka bang ang a,ka theih tawpin hna ka thawk ang a,Mika leh naute hi hlim takin ka siam dawn a ni.Khawngaihin min pawm hram rawh u",tia a sawi zawh chuan ka pa chuan a lo chhang nghal a,"A rang teh thu lutuk a,in ingaihtuahna hun pawh min pe ve ula mawle,ka rilru a buai a nih hi"a rawn ti thûm deuh ût a..

Hiro chuan kan pahniha inneih rem min tihsak hma chu a beidawnloh tur thuin a chhang ve bawk a..

A haw hnu chuan ka room ah rei lote ka lo chhing sek a,mipa au thawm hian min tiharh a..
Ka tukverha ka dak chu Hiro chu pawnah a lo la awm a,"Rem in tih hma chuan ka beidawng lovang,Mika hi ka hmangaih a ni"tiin ka nu leh pa te remtihna nghak chuan pawnah alo la ding reng chu niin....ka ko vat a,
Inchhungah chuan ka hruai lut a,beidawnsan a tum loh zia a sawi te chu a titak hle a ni tih a hriat a....

Kar lovah chuan ka nu leh pate pawn an remti ve ta mai a,mahse kum18 ka tlin phawt a ngai a,kei chuan school chu ka la zawm a,Hiro erawh erawh chu a bang ta a....kan inneih huna kan in tur leina te tuakin hna a thawk a..

School banah a hnathawhnaah chuan ka va tlawh ziah thin a..a hah hmel leh bal hnik hneka a awm te ka hmuh chuan keimah hi ka lo na thin..kei leh kan fa lo piang mai tur tan chuan theihtawp a chhuah a,kei lahin ka pui thei silo....


Nikhat chu Saki leh a thian mipa sual hmel tak tak te hi min hmu turin an lo kal a,min rawn vo tura lokal an ni mah zawk ang chu.Saki chuan Hiro chu a la hmangaih thu leh ka lo lan ve atang chiaha Hiro nen an inkar chu buai niin a sawi a..keimah vanga Hiro-an school a chawlhsan te chu ka thiam loh niin Hiro chu then turin min ti a..
Mahse,zam mai ka tum biklo..
Hiro chu ka hmangaih reng tur thu leh,anni vang mai maia kalsan ka tum loh zia te chu ka sawi a....
Saki chu a thinrim hle a,min rawn nam pawp a,ka tluk lai chuan thil pawi tak a thlen phah ang tih reng ka hre lo....


Zanah chuan Hiro nen kan leng chhuak a,naute pheikhawk cute lutuk hi min pe a,"Hmeichhia nge mipa a nih dawn pawh hre lovin ka lei ve ngawt a nih hi"a ti a,a nui seih a....
Kawnga kan kal mek lai chuan ka pum a rawn na thut....

"Hiro ..........ka pum....ana lutuk,ka pum hi......"

Hiro chu a buai vek ,"Mika,eng tin nge i awm ,tuar hram hram rawh aw"tiin tanpuitu a au nghal a....

Nikhaw hrelo chuan ka lo awm reng tawh mai a,ka han harh chuan damdawi in khumah ka lo mu a....


Ka nu leh pate pawh chuan min lo ngaihven nghal vat,an mitmeng chu a hlauhthawn hmel takzet....

"Khawnge Hiro?"


"Naute nen dinhmun hlauhawma in awm tih a hriat khan a tlan chhuak nghal a" tiin ka nu chuan min lo chhang a..

Ka sama chûl hliau hliau pahin,"Mika,khawiah emaw insawhna emaw tluk sual palhna te i nei em ni?"tiin ka nu chuan min zawt leh a,ka pa pawh chu kil khatah hrehawm ti hmel deuhin a lo kun reng a....


"Eng nge awmzia?..Ka naute hi a tha tiraw?" tih pahin ka pum chu ka khawih a....

Ka nu chuan,"Mika,a pawi ka ti,naute chu a awm tawh lo" tiin mittui tling pûr chuan min rawn kuah a....


A na takzet a ni....chhungkaw hlim tak din tura kan suangtuahna te....nilo a ni thei lo. ...
Dam chhuah tumin a bei ve trang trang awm si a..keimah vang vek a ni..
Ka venghim zo lo che a,nu laktlak loh tak ka nih hi. .....


Damdawi in atanga haw tura kan chhuah chuan Hiro chu alo kal a,ka nu te chuan Hiro an hmuh chuan kan pahniha hun min pek an duh avangin min hawsan ta a...

Hiro chu a rawn tlan a,thaw hlawp hlawp chungin,"Mika,i tha tiraw?" tih pahin ka pum chu a rawn khawih a..
"Naute pawh a tha ang tiraw?" tia beiseina mitmeng nena min rawn melh chu ka tuar zo lo....
Ka kuah chawt a,"Hiro,ka tihpalh....ka venghim zo lo a ni" tiin ka mittui chu a luang zawih zawih....

Hiro chuan ka mittui chu min hrûk hulsak a,"A pawilo e,Mika a pawilo..engkim a tha leh vek mai ang"tiin sawi mah se,a insum thei bik lo..a hnuk a ulh tih chu a trawng that theih loh dan atang chuan ka hre thei mai....

Chumi zan chuan kan school atanga hla vaklo,pangpar a phun thinna hmunah chuan kan kal a..
Ka nau pai lawm nana min pek naute lem chu pangpar bulah dahin chumi zana kan naute boral hriat reng nan chuan kum tin in chu lai hmunah chuan kan kal ziah ang tiin kan intiam a...chu ni duhawm lo tak mai,december ni24 a lo thlen apiangin chu lai hmun chu kan tlawh ziah dawn a ni....
Hiro chuan,"Naute kha dinhmun hlauhawma a ding tih ka hriat chiah kha biak inah tawngtai turin ka kal nghal a,mahse hetiang hi Pathian duh dan a lo ni zawk a ni ang"a tih chuan ka hnuk a rawn ulh dawn a,ka insum avang chuan ka hmui pawh a khûr dar dar....Hiro chuan min rawn kuah leh a,min kuah hi chuan ka thla a muang sawt thin....

Hun a liam a,Hiro chuan school chu a la chawlhsan zui ta tho a..
Mahse ahma ang khan kan inbe tam ta lo,a reh vang vang zel a..ka call pawh a chhang ngai lo....an inah chuan ka va kal ta a,a u hmeichhia chuan tha takin min lo dawngsawng mah se Hiro chu ka hmuh theih rih loh tur thu a sawi a..
"In vanduaina tawh khan a thrawng êm a,hun pe deuh rih la,vawi khat na na na chu in la inhmu leh em em ang" a tih chuan min chhan dan chu mak ka ti deuh a..ka ngaihtuah chian chuan keipawh chuan Hiro chu hun pek rih thain ka hria a,amah hmu ta lo chuan ka haw leh ta a....

Aya nen kan inah chuan assignment kan tidun a,"Zanin chu kal i tum em?" min tih chuan ka hamhaih hle.....

"Khawiah maw?"

"Hiro te inah mawle,a nu leh pa an awm dawn lova,intihlimin party ang u" a tih kha..a hrilh ve lo che em ni?"

Tinge min hrilh lova Aya chu a hrilh bik le?....Mak ka tih hle mai..

"Aw,hrilh e....ka lo theihnghilh leh alawm mawle ...." tiin hria ang tak chuan ka lang ta a..

"Anih chuan ka lo sawm dawn che nia" tiin min haw san ta a....


Hiro chu ka hmuh lohna a rei tawh êm a,hmu chak viau lo ila chuan thinrimin party-naah chuan ka kal tawp lo vang..

Hiro te in kan thlen chuan Hiro chu a lo rui khawp mai a,"Mika" tiin ka banah chuan min pawt a,kan thiante ho hmaah chuan ,"Hei hi ka bialnu Mika hmeltha a nih hi"tiin rui takin a trawng a.....

Zanah chuan a rui deuh chin chu an chat thla a,keipawh chu ka lo muhil a,ka han men chuan Nozomu chuan min lo en reng a,ka inrin hma chuan min rawn kiss ringawt....ka nam sawn nghal a,a rui lutuk chu a chat thla leh nghal ....bathroom-ah ka va inphih fai a,ka hmui te chu ka nuai sawk sawk a,haw nghal ka tum a,chu mi hma chuan Hiro chu a muhil lai tal pawh nise va hmuh zuaih chu ka tum a,a room-ah chuan ka han chho a....

Ka thil hmuh chu(h)....
Hiro leh kan class ami Saori te chu khumah chuan an lo in kiss mawlh mawlh lai ka va phawk a..

Ka thinlung a na lutuk,ka kehsawm vek ....hnuk ulh trun chungin ka tlan chhuak nghal.....
Ka thil hmuh chu ka awih lo takzet..Hiro hian min bum thei lovang..
Kal kawngah chuan ka rilru na lutuk chu ka tawt up up a,ka tap chhuak thei silo,ka awm chu ka chûm dawt dawt a..ka tah a chhuak takzet....





To be continued....,


Based on Koizora(Sky of Love)


Min lo chhiarsak ve avangin ka lawm e..ads kha khawngaihin click ve rawh aw ☺️



Link:
BBcode:
HTML:
Hide post links
Show post links

ADVERTISEMENT (A hnuai a milem hi a nia hmeh zeuh tur chu)